একূনচত্তালীসতিম পরিচ্ছেদ

রাজদ্ৰযদীপনো

১. ততো কস্সপনামো সো, পাপকো নরপালকো;

অস্স গো পঞ্চসূদঞ্চ, পেসযিত্ৰান ভাতিকং.

২. মারাপেতুং অসক্কোন্তো, ভীতো সীহগিরিং গতো;

দুরারোহং মনুস্সেহি, সোধাপেত্ৰা সমন্ততো.

৩. পাকারেন পরিক্খিপ্প, সীহাকারেন কারযি;

তত্থ নিস্সেণি গেহানি, তেন তং নামকো অহূ.

৪. সংহরিত্ৰা ধনং তত্থ, নিদহিত্ৰা সুগোপিতং;

অত্তনো নিহিতানং সো, রক্খং দত্ৰা তহিং তহিং.

৫. কত্ৰা রাজঘরং তত্থ, দস্সনেয্যং মনোরমং;

দুতিযালকমন্দংৰ, কুৰেরোৰ তহিং ৰসি.

৬. মিগারো নাম কারেসি, সেনাপতি সনামকং;

পরিৰেণং তথাগেহ-মভিসেকজিনিস্স চ.

৭. তস্সাভিসেকং যাচিত্ৰা, সিলাসম্বুদ্ধতো’ধিরং;

অলদ্ধাসামি নো রজ্জে, জানিস্সামীতি সণ্ঠহি.

৮. হুত্ৰা ৰিপ্পটিসারী সো, অত্তনা কতকম্মনা;

মুচ্চিস্সামি কতং নু’তি, পুঞ্ঞং কাসি অনপ্পকং.

৯. মহা ৰত্থুনি কারেসি, দ্ৰারেসু নগরস্স সো;

অম্বুয্যানে চ কারেসি, দীপে যোজন যোজনে.

১০. ইস্সরসমণারামং, কারেত্ৰা পুব্বৰত্থুতো;

অধিকং ভোগগামে চ, অধিকং তস্স দাপযি.

১১. বোধি উপ্পলৰণ্ণা চ, তস্সাসুং ধীতরো দুৰে;

ৰিহারস্স’স্স কারেসি, নামং তাসঞ্চ অত্তনো.

১২. দেন্তে তস্মিং ন ইচ্ছিংসু, সমণা থেরৰাদিনো;

‘‘পিতুঘাতিস্স কম্ম’’ন্তি, লোকগারয্হ ভীরুনো.

১৩. দাতুকামোস তেসং’ৰ, সম্বুদ্ধ পটিমায’দা;

ভিক্খৰে অধিৰাসেসুং, ভোগো নো সত্থুনো ইতি.

১৪. কথা নিয্যন্তি উয্যানে, সমীপে পব্বতস্স সো;

কারাপেসি ৰিহারং সো, তেসং নামো ততো অহু.

১৫. অদা ধম্মরুচিনং তং, সম্পত্ত চতুপচ্চযং;

ৰিহারঞ্চেৰ উয্যানং, দিসাভাগম্হি উত্তরে.

১৬. ভত্তং সনীরপক্কং সো, ভুঞ্জিত্ৰা দিন্নমিত্থিযা;

সপ্পিযুত্তং মনুঞ্ঞেহি, সূপেহি অভিসঙ্খতং.

১৭. মনুঞ্ঞমিদময্যানং, দস্সমেৰন্তি তাদিসং;

ভত্তং পাদাসি ভিক্খূনং, সব্বেসঞ্চ সচীৰরং.

১৮. উপোসথমধিট্ঠাসি, অপ্পমঞ্ঞঞ্চ ভাৰযি,

সমাদিযি ধুতঙ্গে চ, লিখাপেসি চ পোত্থকে.

১৯. পটিমাদান সালাদিং, কারাপেসি অনপ্পকং;

ভিতো সো পরলোকম্হা, মোগ্গল্লানা চ ৰত্ততি.

২০. ততো অট্ঠারসে ৰস্সে, মোগ্গল্লানো মহাভটো;

আদেসেন নিগণ্ঠানং, দ্ৰাদসগ্গসহায ৰা.

২১. জম্বুদীপা ইধাগম্ম, দেসে অম্বট্ঠকোলকে;

কুল়ারী নামে বন্ধিত্থ, ৰিহারে বলসঞ্চযং.

২২. রাজা সুত্ৰা গহেত্ৰা তং, ভঞ্জিস্সামিতি নিক্খমি;

নেমিত্তেহি ন সক্কাতি, ৰদন্তেপি মহাবলো.

২৩. মোগ্গল্লানোপি সন্নদ্ধ বলো সূরসহায ৰা;

গচ্ছন্তো সুরসঙ্গামং, দেৰো ৰিয সুজম্পতি.

২৪. অঞ্ঞমঞ্ঞং উপাগম্ম, ভিন্নৰেলাৰ সাগরা;

আরভিংসু মহাযুদ্ধং, বলকাযা উভোপি তে.

২৫. কস্সপো পুরতো দিস্ৰা, মহন্তং কদ্দমাসযং;

গন্তুমঞ্ঞেন মগ্গেন, পরিৰত্তেসি দন্তিনং.

২৬. দিস্ৰা তং সামিকোনো’যং, পলাযতি ভণে ইতি;

বলকাযো পভিজ্জিত্থ, ‘‘দিট্ঠং পিঠ’’ন্তি ঘোসযুং.

২৭. মোগ্গলান বলারাজা, ছেত্ৰা নিকরণেন সো;

সীসং উক্খিপিযা’কাসং, ছুরিকং কোসিযং খিপি.

২৮. কত্ৰা’ল়াহন কিচ্চং সো, তস্স কম্মে পসীদিয;

সব্বংসো ধনমাদায, আগঞ্ছি নগরং ৰরং.

২৯. ভিক্খূ সুত্ৰা পৰত্তিং তং, সুনিৰত্থা সুপারুতা;

সম্মজ্জিত্ৰা ৰিহারঞ্চ, অট্ঠংসু পটিপাটিযা.

৩০. মহামেঘৰনং পত্ৰা, দেৰরাজাৰ নন্দনং;

মহাসেন নিৰত্তেত্ৰা, হত্থিপাকারতো বহি.

৩১. উপসঙ্কম্ম ৰন্দিত্ৰা, সঙ্ঘে তস্মিং পসীদিয;

ছত্তত্তেন সঙ্ঘং পূজেসি, সঙ্ঘো তস্সেৰ তং অদা.

৩২. তং ঠানং ছত্তৰড্ঢীতি, ৰোহরিংসু তহিং কতং;

পরিৰেণম্পি তং নামং, অহোসি পুরমাগতো.

৩৩. ৰিহারে দ্ৰেপি গন্ত্ৰান, সঙ্ঘং তত্থা’ভিৰন্দিয;

পাপুণিত্ৰা মহারজ্জং, লোকং ধম্মেন পালযি.

৩৪. কুদ্ধো নীহরি দাঠংসো, ঘাতকং পিতুনো মম;

অনুৰত্তিত্ৰা মচ্চাতি, তেন রক্খস নাম ৰা.

৩৫. অতিরেকসহস্সং সো, অমচ্চানং ৰিনাসযি;

কণ্ণনাসাদি ছেদেসি, পব্বাজেসি তথা বহূ.

৩৬. ততো সুত্ৰান সদ্ধম্ম-মুপসন্নো সুমানসো;

মহাদানং পৰত্তেসি, মেঘো ৰিয মহীতলে.

৩৭. ফুস্সপুণ্ণমীযং দান-মনুৰস্সং পৰত্তযি;

ততো পট্ঠায তং দানং, দীপে অজ্জাপি ৰত্ততি.

৩৮. সোপি সারথিকো লাজ-দাযকো পিতুরাজিনো;

আনেত্ৰা পিতুসন্দে সং, মোগ্গল্লানস্স দস্সযি.

৩৯. তং দিস্ৰা পরিদেৰিত্ৰা, পিতুনো পেম মত্তনী;

ৰণ্ণেত্ৰা তস্স পাদাসি, দ্ৰারনাযকতং ৰিভূ.

৪০. সেনাপতি মিগারোহি, নিৰেদেত্ৰা যথা ৰিধিং;

অভিসেক জিনস্সা’কা, অভিসেকং যথারুচিং.

৪১. সীহা’চলে দল়্হনামং, দাঠা কোণ্ডঞ্ঞকম্পি চ;

ৰিহারং ধম্মরুচিনং, সাগলিনঞ্চ দাপযি.

৪২. পব্বতন্তু ৰিহারংসো, কত্ৰা থেরস্স দাপযি;

মহানামসনামস্স, দীঘসণ্ড ৰিহারকে.

৪৩. রাজিনিনামকঞ্চেৰ, কত্ৰা ভিক্খুনুপস্সযং;

অদা সাগলিকানং সো, ভিক্খুনীনং মহামতি.

৪৪. লম্বকণ্ণকগোত্তোপি, দাঠা পভুতি নামকো;

কস্সপস্স উপঠানে, কোচি নিব্বিন্ন মানসো.

৪৫. গন্তা মে রেলিযং ৰগ্গং,

ৰাসং তত্থেৰ কপ্পযি;

অহোসি পুত্তো তস্সেকো,

সিলাকা লোতি পিস্সুতো.

৪৬. সোপি কস্সপতো ভীতো, ঞাতকেন সহ’ত্তনো;

মোগ্গল্লানেন গন্ত্ৰান, জম্বুদীপতলং ইতো.

৪৭. বোধিপণ্ডৰিহারম্পি, পব্বজ্জং সমুপাগতো;

করোন্তো সঙ্ঘকিচ্চানি, সাদরো সো সুপেসলো.

৪৮. অম্মং সঙ্ঘস্স পাদাসি, সঙ্ঘো তস্মিং পসীদিয;

আহ’ম্ব সামণেরো’তি, তেন তং নামকো অহু.

৪৯. সো কেসধাতুৰংসম্হি, ৰুত্তেন ৰিধিনা ততো;

কেসধাতুং লভিত্ৰান, তস্স রজ্জে ইধা’নযি.

৫০. তস্স কত্ৰান সক্কারং, গহেত্ৰা কেস ধাতুযো;

মহগ্ঘে নিদহিত্ৰান, করণ্ডে ফলিকুম্ভৰ্হে.

৫১. দীপঙ্করস্স নাথস্স, পটিমায ঘরে ৰরে;

ৰড্ঢেত্ৰা পরিহারেন, মহাপূজং পৰত্তযি.

৫২. মাতুলং ভরিযঞ্চ’স্স, কত্ৰা সোৰণ্ণযং তহিং;

ঠপেসি পটিমাযো চ, অস্স বিম্বঞ্চ চারুকং.

৫৩. কেসধাতুকরণ্ডঞ্চ, ছত্তং রতনমণ্ডপং;

সাৰকগ্গযুংগং ৰাল়-বীজনিঞ্চ সকারযি.

৫৪. পরিহারঞ্চ তস্স’দা, রাজা অধিকমত্তনো;

সিলাকাল় মসিগ্গাহং, কত্ৰা রক্খায যোজযি.

৫৫. অসিগ্গাহসিলাকাল়ো, ইতি তেনা’সি ৰিস্সুতো;

ভগিনিঞ্চ’স্স পাদাসি, সদ্ধিং ভোগেন ভূমিপো.

৫৬. ৰুত্তো’যমতি সঙ্খেপো, ৰিত্থারো পন সব্বসো;

কেসধাতুকৰংসম্হা, গহেতব্বো ৰিভাৰিনা.

৫৭. বন্ধিত্ৰা সাগরা রক্খং, দীপঞ্চ কাসিনিব্ভযং;

ধম্মকম্মন সোধেসি, সধম্মং জিনসাসনং.

৫৮. সেনাপতিস নামং’কা, পধানঘর মুত্তরো;

কত্ৰা’ট্ঠারসমে ৰস্সে, সো পুঞ্ঞানি খযং গতো.

৫৯. কস্সপতো জিতো অতিবলি পুঞ্ঞক্খযে সঙ্খতে;

জেতুং নো ৰিসহিত্থ মচ্চুমুপগং সো যেৰদাসোৰিয;

তস্মা মচ্চুবলং নিহচ্চ সুখিনো হেস্সন্তি মেধাৰিনো;

নিব্বানং পরমচ্চুতং সিৰপদং পত্তব্বমত্তঞ্ঞুনা.

সুজনপ্পসাদ সংৰেগত্থায কতে মহাৰংসে

রাজদ্ৰযদীপনো নাম

একূনচত্তালীসতিমো পরিচ্ছেদো.