সত্ততিংসতিম পরিচ্ছেদ

পঞ্চরাজকো

১. জেট্ঠতিস্সচ্চযে তস্স, মহাসেনো কনিট্ঠকো;

সত্তৰীসতিৰস্সানি, রাজা রজ্জমকারযি.

২. তস্স রজ্জাভিসেকং তং,

কারেতুং পরতীরতো;

সো সঙ্ঘমিত্তত্থেরো তু,

কালং ঞত্ৰা ইধাগতো.

৩. তস্সাভিসেকং কারেত্ৰা, অঞ্ঞং কিচ্চঞ্চনেকধা;

মহাৰিহার ৰিদ্ধংসং, কাতুকামো অসঞ্ঞতো.

৪. অৰিনযৰাদিনো এতে, মহাৰিহারৰাসিনো;

ৰিনযৰাদী মযং রাজ, ইতি গাহিয ভূপভিং.

৫. মহাৰিহারৰাসিস্স, আহারং দেতি ভিক্খুনো;

যো সো সতং দণ্ডিযো’তি, রঞ্ঞা দণ্ডং ঠপাপযি.

৬. উপদ্দুতা তেহি ভিক্খূ, মহাৰিহারৰাসিনো;

মহাৰিহারং ছড্ডেত্ৰা, মলযং রোহণং অগুং.

৭. তেন মহাৰিহারো’যং, নৰৰস্সানি ছড্ডিতো;

মহাৰিহারৰাসীহি, ভিক্খূহি আসি সুঞ্ঞকো.

৮. ‘‘হোতি অস্সামিকং ৰত্থু, পুতুৰিসামিনো’’ইতি;

রাজানং সঞ্ঞাপেত্ৰা সো, থেরো দুম্মতি দুম্মতিং.

৯. মহাৰিহারং নাসেতুং, লদ্ধানুমতি রাজতো;

তথা কাতুং মনুস্সে সো, যোজেসি দুট্ঠমানসো.

১০. সঙ্ঘমিত্তস্স থেরস্স, সেৰকো রাজৰল্লভো;

সোণামচ্চো দারণো চ, ভিক্খৰো চ অলজ্জিনো.

১১. ভিন্দিত্ৰা লোহপাসাদং, সত্তভূমক মুত্তমং;

ঘরে নানপ্পকারে চ, ইতো’ভযগিরিং নযুং.

১২. মহাৰিহারা নীতেহি, পাসাদেহি বহূহি চ;

অভযগিরিৰিহারোযং, বহুপাসাদকো অহু.

১৩. সঙ্ঘমিত্তং পাপমিত্তং, থেরং সোণঞ্চ সেৰকং;

আগম্ম সুবহুং পাপং, অকাসি সো মহীপতি.

১৪. মহাসিলাপটিমং সো, পাচিনতিস্সপব্বতা;

আনেত্ৰা’ভযগিরিম্হি, পতিট্ঠাপেসি ভূপতি.

১৫. পটিমাঘরং বোধিঘরং, ধাতুসালং মনোরমং;

চতুসালঞ্চ কারেসী, সঙ্খরী কুক্কুটৰ্হযং.

১৬. সঙ্ঘমিত্তেন থেরেন, তেন দারুণকম্মুনা;

ৰিহারো সো’ভযগিরি, দস্সনেয্যো অহু তদা.

১৭. মেঘৰণ্ণাভযো নাম, রঞ্ঞো সব্বত্থ সাখকো;

সখা অমচ্চো কুজ্ঝিত্ৰা, মহাৰিহারনাসনে.

১৮. চোরো হুত্ৰান মলযং, গন্ত্ৰা লদ্ধমহব্বলো;

খন্ধাৰারং নিৰেসেসি, দুরতিস্সকৰাপিযং.

১৯. তত্রা’গতং তং সুত্ৰা, সহাযং সো মহীপতি;

যুদ্ধাহ পচ্চুগ্গন্ত্ৰান, খন্ধাৰারং নিৰেসযি.

২০. সাধুং পানঞ্চ মংসঞ্চ, লভিত্ৰা মলযাগতং;

‘‘ন সেৰিস্সং সহাযেন, ৰিনা রঞ্ঞা’’তি চিন্তিয.

২১. আদায তং সযংযেৰ, রত্তিং নিক্খম্ম এককো;

রঞ্ঞো সন্তিকমাগম্ম, তমত্থং পটিৰেদযি.

২২. তেনা’ভতং তেন সহ, ৰিস্সত্থো পরিভুঞ্জিয;

‘‘কস্মা চোরো অহু মে ত্ৰং, ‘‘ইতি রাজা অপুচ্ছিতং.

২৩. ‘‘তযা মহাৰিহারস্স, নাসিতত্তা’’তি অব্রুৰি;

‘‘ৰিহারং ৰাসযিস্সামি, খেমমেতং মমচ্চযং.

২৪. ইচ্ছেৰ মব্রৰী রাজা, রাজানং সো খমাপযি;

তেন সঞ্ঞাপিতো রাজা, নগরংযেৰ আগমি.

২৫. রাজানং সঞ্ঞপেত্ৰা সো, মেঘৰণ্ণাভযো পন;

রঞ্ঞা সহ ন আগঞ্ছি, দব্বসম্ভারকারণা.

২৬. ৰলভা ভরিযা রঞ্ঞো, একং লেখকধীতিকা;

মহাৰিহারনাসম্হি, দুক্খিতং তং ৰিনাসকং.

২৭. থেরং মারাপযি কুদ্ধা, সংগহেত্ৰান ৰড্ঢকিং;

থূপারামং ৰিনাসেতুং, আগতং দুট্ঠমানসং.

২৮. মারাপেত্ৰা সঙ্ঘমিত্ত-ত্থেরং দারুণকারকং;

সোণামচ্চদারণঞ্চ, ঘাতযিংসু অসঞ্ঞকা.

২৯. আনেত্ৰা দব্বসম্ভারং, মেঘৰণ্ণাভযো তু সো;

মহাৰিহারেনেকানি, পরিৰেণানি কারযি.

৩০. অভযেনভযো তস্মিং, ৰূপসন্তে তু ভিক্খৰো;

মহাৰিহারং ৰাসেসুং, আগন্ত্ৰান ততো ততো.

৩১. রাজা মহাবোধিঘরে, পচ্ছিমায দিসায তু;

কারেত্ৰা লোহরূপানি, ঠপাপেসি দুৰে তু সো.

৩২. দক্খিণারামৰাসিম্হি, কুহকে জিম্হমানসে;

পসীদিত্ৰা পাপমিত্তে, তিস্সত্থেরে অসঞ্ঞতে.

৩৩. মহাৰিহারসীমন্তে, উয্যানে জোতিনামকে;

জেতৰনৰিহারং সো, ৰারযন্তোপি কারযি.

৩৪. ততো সীমং সমুগ্ঘাতুং, ভিক্খুসঙ্ঘমযাচিসো;

অদাতুকামা তং ভিক্খূ, ৰিহারম্হা অপক্কমুং.

৩৫. ইধ সীমাসমুগ্ঘাতং, পরেহি করিযমানকং;

কোপেতুং ভিক্খৰো কেচি, নিলীযিংসু তহিং তহিং.

৩৬. মহাৰিহারো নৰমাসে, এৰং ভিক্খূহি ৰজ্জিতো;

‘‘সমুগ্ঘাতং করিম্হা’’তি-পরে ভিক্খূ অমঞ্ঞিসুং.

৩৭. ততো সীমাসমুগ্ঘাতে, ব্যাপারে পরিনিট্ঠিতে;

মহাৰিহারং ৰাসেসুং, ইধাগন্ত্ৰান ভিক্খৰো.

৩৮. তস্স ৰিহারগাহিস্স, তিস্সত্থেরস্স চোদনা;

অন্তিমৰত্থুনা আসি, ভূতত্থং সঙ্ঘমজ্ঝগা.

৩৯. ৰিনিচ্ছিয মহামচ্চো, তথা ধম্মিকসম্মতো;

উপ্পব্বাজেসি ধম্মেন, তং অনিচ্ছায রাজিনো.

৪০. সোযেৰ রাজা কারেসি, ৰিহারং মণিহীরকং;

তযো ৰিহারে কারেসি, দেৰালযং ৰিনাসিয.

৪১. গোকণ্ণং এরকাপিল্লং, কলন্দব্রাহ্মণগামকে;

মিগগামৰিহারঞ্চ, গঙ্গসেনকপব্বতং.

৪২. পচ্ছিমায দিসাযাথ, ধাতুসেনঞ্চ পব্বতং;

রাজা মহাৰিহারঞ্চ, কোকৰাতম্হি কারযি.

৪৩. রূপারম্মৰিহারঞ্চ, চূল়ৰিট্টঞ্চ কারযি;

উত্তরাভযসৰ্হে চ, দুৰে ভিক্খূনুপস্সযে.

৪৪. কালৰেল়কযক্খস্স, ঠানে থূপঞ্চ কারযি;

দীপম্হি জিণ্ণকাৰাসে, বহূ চ পটিসঙ্খরি.

৪৫. সঙ্ঘত্থেরসহস্সস্স, সহস্সগ্ঘমদাসি সো;

থেরদানঞ্চ সব্বেসং, অনুৰস্সঞ্চ চীৰরং.

৪৬. অন্নপানাদিদানস্স, পরিচ্ছেদো ন ৰিজ্জতি;

সুভিক্খত্থায কারেসি, সো’ৰ সোল়স ৰাপিযো.

৪৭. মণিহীরমহাৰাপিং, জল্লুরং খাণুনামকং;

মহামণিং কোকৰাতং, মোরকপরকৰাপিকং.

৪৮. কুব্বাহকং ৰাহকঞ্চ, রত্তমালকণ্ডকম্পি চ;

তিস্সৰড্ঢমানকঞ্চ, ৰেল়ঙ্গৰিট্ঠিকম্পি চ.

৪৯. মহাগল্লচীরৰাপিং, মহাদারগল্লকম্পি চ;

কাল়পাসাণৰাপিঞ্চ, ইমা সোল়স ৰাপিযো.

৫০. গঙ্গায পব্বৰৰ্হংসো, মহামাতিঞ্চ কারযি;

এৰং পুঞ্ঞমপুঞ্ঞঞ্চ, সুবহুং সো উপাচিনীতি.

৫১. অসাধুসঙ্গমেনেৰং, যাৰজীৰং সুভাসুভং;

কত্ৰা গতো যথাকম্মং, সো মহাসেনভূপতি.

৫২. তস্মা অসাধুসংসগ্গং, আরকা পরিৰজ্জিয;

অহিং ৰা’সি ৰিসং খিপ্পং, করেয্য’ত্থহিতং বুধো.

৫৩. অহু রাজা সিরিমেঘ-ৰণ্ণো তস্স সুতো ততো;

ৰন্ধাতা ৰিয লোকস্স, সব্বসম্পত্তিদাযকো.

৫৪. মহাসেনেন পাপানং, ৰসগেন ৰিনাসিতে;

মহাৰিহারে সব্বেপি, সন্নিপাতিয ভিক্খৰো.

৫৫. উপসঙ্কম্ম ৰন্দিত্ৰা, নিসিন্নো পুচ্ছি সাদরো;

‘‘পিতরা সঙ্ঘমিত্তস্স, সহাযেন ৰিনাসিতং.

৫৬. কিং কিমেৰা’’তি আহংসু, ভিক্খৰো তং নরিস্সরং;

‘‘সীমাযুগ্ঘাটনং কাতুং, ৰাযমিত্ৰাপি তে পিতা.

৫৭. নাসক্খি অন্তোসীমাযং, ভিক্খূনং ৰিজ্জমানতো;

ভূমিগব্ভনিলীনাহি, সত্তাসুং এত্থ ভিক্খৰো.

৫৮. অমচ্চো সোণামচ্চো চ, সঙ্ঘমিত্তো চ পাপিযো;

রাজানং সঞ্ঞাপেত্ৰান, অপুঞ্ঞং তেন কারযুং.

৫৯. ভিন্দিত্ৰা লোহপাসাদং, সত্তভূমকমুত্তমং;

ঘরে নানপ্পকারে চ, ইতো’ভযগিরিং নযুং.

৬০. মাসকে চতুবুদ্ধেহি, নিৰুত্থে চেতিযঙ্গণে;

ৰপাপেসুঞ্চ দুপ্পঞ্ঞা, পস্স বালসমাগমং’’.

৬১. তং সুত্ৰা পিতুকম্মং সো, নিব্বিন্নো বালসঙ্গমে;

পিতরা নাসিতং তত্থ, সব্বং পাকতিকং অকা.

৬২. লোহপাসাদমগদো’ৰ, কাসি পাসাদমুত্তমং;

রঞ্ঞো মহাপনাদস্স, দস্সেন্তো ৰিয ভূতলে.

৬৩. পরিৰেণানি সব্বানি, নাসিতানি নিৰেসযি;

ভোগে আরামিকানঞ্চ, যথাঠানে ঠপেসি সো.

৬৪. পিতরা পচ্চযানঞ্চ, পচ্ছিন্নত্তা ৰিবুদ্ধিনা;

ছিদ্দাৰাসং ঘনাৰাসং, ৰিহারং’কাসি বুদ্ধিমা.

৬৫. কারিতে পিতরা জোতি ৰনেচে’সো ৰিহারকে;

কম্মং ৰিপ্পকতং সব্বং, নিট্ঠাপেসি নরিস্সরো.

৬৬. থেরস্সা’থ মহিন্দস্স, সমণিন্দস্স সুনুনো;

সুত্ৰান মনুজিন্দো সো, পৰত্তিং সব্বমাদিতো.

৬৭. পসীদিত্ৰা গুণে তস্স, রাজা দিপ্পপসাদকে;

‘‘ইস্সরো ৰত দীপস্স, থেরো’’ ইতি ৰিচিন্তিয.

৬৮. পটিবিম্বং সুৰণ্ণস্স, কত্ৰা তম্মাণ নিস্সিতং;

পুব্বকত্তিকমাসস্স, পব্বপক্খে তু সত্তমে.

৬৯. দিনে নেত্ৰা চেতিযম্ব-থলে থেরম্বসঞ্ঞিতে;

তত্রট্ঠমে নিৰাসেত্ৰা, ততো তু নৰমে পন.

৭০. মহাসেনং গহেত্ৰা সো, দেৰসেনা সমূপমং;

ওরোধে নগরে চেৰ, গেহরক্খণকে ৰিনা.

৭১. লংকাদীপে চ সকলে, সব্বে আদায ভিক্খৰো;

ৰিস্সজ্জেত্ৰা মনুস্সে চ, নগরে চারকট্ঠিতে.

৭২. পট্ঠপেত্ৰা মহাদানং, অযঞ্চাখিলপাণিনং;

পূজং সব্বোপহারেহি, করোন্তো চ অনূপমং.

৭৩. পচ্চুগ্গমনমেতস্স, দীপসত্থুস্স সত্থুনো;

ৰরপুত্তস্স সো কত্ৰা, দেৰরাজা’ৰ সত্থুনো.