ততিয পরিচ্ছেদ

পঠমধম্মসংগীতি

১. পঞ্চনেত্তো জিনো পঞ্চ-চত্তালীসসমা’সমো;

ঠত্ৰা সব্বানি কিচ্চানি, কত্ৰা লোকস্স সব্বথা.

২. কুসিনারাযযমক-সালানমন্তরে ৰরে;

ৰেসাখপুণ্ণমাযং সো, দীপো লোকস্স নিব্বুতো.

৩. সঙ্খ্যাপথমতিক্কন্তা, ভিক্খূ তত্থ সমাগতা;

খত্তিযা ব্রাহ্মণা ৰস্সা, সুদ্ধা দেৰা তথেৰ চ.

৪. সত্তসতসহস্সানি, তেসু পামোক্খভিক্খৰো;

থেরো মহাকস্সপোৰ, সঙ্ঘত্থেরো তদা অহু.

৫. সত্থুসরীরসারীর-ধাতুকিচ্চানি কারিয;

ইচ্ছন্তো সো মহাথেরো, সত্থু ধম্মচিরট্ঠিতিং.

৬. লোকনাথে দসবলে, সত্তাহপরিনিব্বুতে;

দুব্ভাসিতং সুভদ্দস্স, বুদ্ধস্স ৰচনং সরং.

৭. সরং চীৰরদানঞ্চ, সমত্তে ঠপনং তথা;

সদ্ধম্মঠপনত্থায, মুনিনা’নুগ্গহং কতং.

৮. কাতুং সদ্ধম্মসংগীতিং, সম্বুদ্ধানমতে যতি;

নৰঙ্গসাসনধরে, সব্বঙ্গসমুপাগতে.

৯. ভিক্খূ পঞ্চসতেযেৰ, মহাখীণাসৰে ৰরে;

সম্মন্নি একেনূনে তু, আনন্দত্থেরকারণা.

১০. পুন আনন্দত্থেরা’পি, ভিক্খূহি অভিযাচিতো;

সম্মন্নি কাতুং সংগীতিং, সা ন সক্কা হি তং ৰিনা.

১১. সাধুকীল়নসত্তাহং, সত্তাহং ধাতুভাজনং;

ইচ্চদ্ধমাসং খেপেত্ৰা, সব্বলোকানুকম্পকা.

১২. ৰস্সং ৰসং রাজগহে, কস্সাম ধম্মসঙ্গহং;

নাঞ্ঞেহি তত্ত ৰত্থব্ব-মিতি কত্ৰান নিচ্ছযং.

১৩. সোকাতুরং তত্থ তত্থ, অস্সাসেন্তো মহাজনং;

জম্বুদীপম্হি তে থেরা, ৰিচরিত্ৰান চারিকং.

১৪. আসল়্হিসুক্কপক্খম্হি, সুক্কপক্খঠিতত্থিকা;

উপাগমুং রাজগহং, সম্পন্নচতুপচ্চযং.

১৫. তত্থেৰ ৰস্সূপগতা, তে মহাকস্সপাদযো;

থেরা থিরগুণূপেতা, সম্বুদ্ধমতকোৰিদা.

১৬. ৰস্সানং পঠমং মাসং, সব্বসেনাসনেসু’পি;

কারেসুং পটিসঙ্খারং, ৰত্ৰানা’জাতসত্তুনো.

১৭. ৰিহারপটিসঙ্খারে, নিট্ঠিতে অহু ভূপতি;

ইদানি ধম্মসংগীতিং, করিস্সামি মযং ইতি.

১৮. কত্তব্বং কিন্তিপুট্ঠস্স, নিসজ্জঠানমাদিসুং;

রাজা কত্থাতি পুচ্ছিত্ৰা, ৰুত্তঠানম্হি তেহি সো.

১৯. সীঘং ৰেভারসেলস্স, পস্সে কারেসি মণ্ডপং;

সত্তপণ্ণিগুহাদ্ৰারে, রম্মং দেৰসভোপমং.

২০. সব্বথা মণ্ডযিত্ৰা তং, অত্থরাপেসি তত্থ সো;

ভিক্খূনং গণনাযেৰ, অনগ্ঘত্থরণানি চ.

২১. নিস্সায দক্খিণং ভাগং, উত্তরামুখমুত্তমং;

থেরাসনং সুপঞ্ঞত্তং, আসি তত্থ মহারহং.

২২. তস্মিং মণ্ডপমজ্ঝস্মিং, পুরত্থমুখমুত্তমং;

ধম্মাসনং সুপঞ্ঞত্তং, অহোসি সুগতারহং.

২৩. রাজা’রোচযি থেরানং, কম্মং নো নিট্ঠিতং ইতি;

তে থেরা থেরমানন্দ-মানন্দকরমব্রৰুং.

২৪. স্ৰে সন্নিপাতো আনন্দ, সেখেন গমনং তহিং;

ন যুত্তন্তে সদত্থে ত্ৰং, অপ্পমত্তো ততো ভৰ.

২৫. ইচ্চেৰং চোদিতো থেরো, কত্ৰান ৰীরিযং সমং;

ইরিযাপথতো মুত্তং, অরহত্তমপাপুণি.

২৬. ৰস্সানং দুতিযে মাসে, দুতিযে দিৰসে পন;

রুচিরে মণ্ডপে তস্মিং, থেরা সন্নিপতিংসু তে.

২৭. ঠপেত্ৰা’নন্দত্থেরস্স, অনুচ্ছৰিকমাসনং;

আসনেসু নিসীদিংসু, অরহন্তো যথারহং.

২৮. থেরো’রহত্তপত্তিং সো, ঞাপেতুং তেহি নাগমা;

কুহিং আনন্দত্থেরো’তি, ৰুচ্চমানে তু কেহিচি.

২৯. নিম্মুজ্জিত্ৰা পথৰিযা, গন্ত্ৰা জোতিপথেন ৰা;

নিসীদি থেরো আনন্দো, অত্তনো ঠপিতাসনে.

৩০. উপালিথেরো ৰিনযে, সেসধম্মে অসেসকে;

আনন্দত্থেরমকরুং, সব্বে থেরা ধুরন্ধরে.

৩১. মহাথেরো সকত্তানং, ৰিনযং পুচ্ছিতুং সযং;

সম্মন্নু’পালিথেরো চ, ৰিস্সজ্জেতুং তমেৰ তু.

৩২. থেরাসনে নিসীদিত্ৰা, ৰিনযং তমপুচ্ছি সো;

ধম্মাসনে নিসীদিত্ৰা, ৰিস্সজ্জেসি তমেৰ সো.

৩৩. ৰিনযঞ্ঞূনমগ্গেন, ৰিস্সজ্জিতকমেন তে;

সব্বে সজ্ঝাযমকরুং, ৰিনযং নযকোৰিদা.

৩৪. অগ্গং বহুস্সুতাদীনং, কোসারক্খং মহেসিনো;

সম্মন্নিত্ৰান অত্তানং, থেরো ধম্মমপুচ্ছি সো.

৩৫. তথা সম্মন্নিয’ত্তানং, ধম্মাসনাগতো সযং;

ৰিস্সজ্জেসি তমানন্দ-ত্থেরো ধম্মমসেসতো.

৩৬. ৰেদেহমুনিনা তেন, ৰিস্সজ্জিতকমেন তে;

সব্বে সজ্ঝাযমকরুং, ধম্মং ধম্মত্থকোৰিদা.

৩৭. এৰং সত্তহি মাসেহি, ধম্মসংগীতি নিট্ঠিতা;

সব্বলোকহিতত্থায, সব্বলোকহি তেহি সা.

৩৮. মহাকস্সপথেরেন, ইদং সুগতসাসনং;

পঞ্চৰস্সসহস্সানি, সমত্থং ৰত্তনে কতং.

৩৯. অতীৰ জাতপামোজ্জা, সন্ধারকজলন্তিকা;

সংগীতিপরিযোসানে, ছদ্ধাকম্পি মহামহী.

৪০. অচ্ছরিযানি চা’হেসুং, লোকেনেকানিনেকধা;

থেরেহেৰ কতত্তা চ, থেরিযাযং পরম্পরা.

৪১. পঠমং সঙ্গহং কত্ৰা, সব্বলোকহিতং বহুং;

তে যাৰতাযুকং ঠত্ৰা, থেরা সব্বেপি নিব্বুতা.

৪২. থেরা’পি তে মতিপদীপহতন্ধকারা,

লোকন্ধকারহননম্হি মহাপদীপা;

নিব্বাপিতা মরণঘোরমহানিলেন,

তেনাপি জীৰিতমদং মতিমা জহেয্যাতি.

সুজনপ্পসাদংসংৰেগত্থায কতে মহাৰংসে

পঠমধম্মসংগীতিনাম

ততিযো পরিচ্ছেদো.