ছব্বীসতিম পরিচ্ছেদ

মরিচৰট্টিকৰিহারমহো

১. একচ্ছত্তং করিত্ৰান, লংকারজ্জং মহাযসো;

নানন্তরং সংৰিদহি, যোধানং সো যথারহং.

২. থেরপুত্তাভযো যোধো, দিয্যমানং ন ইচ্ছিতং;

পুচ্ছিতোৰ কিমত্থন্তি, যুদ্ধমত্থীতি অব্রৰি.

৩. একরজ্জে কতে যুদ্ধং, কিনামত্তীতি পুচ্ছিতো;

যুদ্ধং কিলেস চোরেহি, করিস্সামি সুদুজ্জযং.

৪. ইচ্চেৰ মাহ তং রাজা, পুনপ্পুনং নিসেধযি;

পুনপ্পুনং সোযাচিত্ৰা, রঞ্ঞোনুঞ্ঞায পব্বজি.

৫. পব্বজিত্ৰা চ কালেন, অরহত্তমপাপুণি;

পঞ্চখীণাসৰসত-পরিৰাএরা অহোসি চ.

৬. ছত্তমঙ্গল সত্তাহে, গতে গতভযো’ ভযো;

রাজা কতা ভিসেকোৰ, মহতা ৰিভৰেন সো.

৭. তিস্সৰাপি’মগা কীল়-ৰিধিনা সমলঙ্ক তং;

কীল়িতুং অভিসিত্তানং, চারিত্তঞ্চা নুরক্খিতুং.

৮. রঞ্ঞো পরিচ্ছদং সব্বং, উপাযনসতানি চ;

মরিচৰট্টিৰিহারস্স, ঠানম্হি ঠপযিংসু চ.

৯. তত্থেৰ থূপঠানম্হি, সধাতুং কুন্তমুত্তমং;

ঠপেসুং কুন্তধরকা, উজুকং রাজমানুসা.

১০. সহোরোধো মহারাজা, কীল়িত্ৰা সলিলে দিৰা;

সাযমাহং গমিস্সাম, কুন্তং ৰড্ঢেথ ভো’’ইতি.

১১. চালেতুং তং ন সক্খিংসু, কুন্তং রাজাধিকারিকা;

গন্ধামালাহি পূজেসুং, রাজসেনাসমাগতা.

১২. রাজা মহন্তং অচ্ছেরং, দিস্ৰা তং হট্ঠমানসো;

ৰিধায তত্থ আরক্খং, পৰিসিত্ৰা পুরং ততো.

১৩. কুন্তং পরিক্খিপাপেত্ৰা, চেতিযং তত্থ কারযি;

থূপং পরিক্খিপাপেত্ৰা, ৰিহারঞ্চ অকারযি.

১৪. তীহি ৰস্সেহি নিঠাসি, ৰিহারো সো নরিস্সরো;

সঙ্ঘং সসন্নিপাতেসি, ৰিহরমহাকারণা.

১৫. ভিক্খুনং সতসহস্সানি, তদা ভিক্খুনিযো পন;

নৰুতি চ সহস্সানি, অভৰিংসু সমাগতা.

১৬. তস্মিং সমাগমে সঙ্ঘং, ইদমাক মহীপতি;

‘‘সঙ্ঘং ভন্তে ৰিসরিত্ৰা, ভুঞ্জিং মরিচৰট্টিকং.

১৭. হস্সে’তং দণ্ডকম্মং মে, ভৰতূতি অকারযি;

সচেতিযং মরিচৰট্টি-ৰিহারং সুমনোহরং.

১৮. পতিগ্গণ্হাতু তং সঙ্ঘো, ইতি সো দক্খিণোদকং;

পাতিত্ৰা ভিক্খুসঙ্ঘস্স, ৰিহারং সুমনো অদা.

১৯. ৰিহারে তং সমন্তাপি, মহন্তং মণ্ডপং সুভং;

কারেত্ৰা তত্থ সঙ্ঘস্স, মহাদানং পৰত্তযি.

২০. পাদে পতিট্ঠাপেত্ৰাপি,

জলে অভযৰাপিযা;

কতো সো মণ্ডপো আসি,

সেসো কাসে কথাৰকা.

২১. সত্তাহং অন্নপানাদিং, দত্ৰান মনুজাধিপো;

অদা সামণকং সব্বং, পরিক্খারং মহারহং.

২২. অহু সতসহস্সগ্ঘো, পরিক্খারো স আদিকো;

অন্তে সহস্সগ্ঘনকো, সব্ব সঙ্ঘো চ তংলভি.

২৩. যুদ্ধে দানে চ সূরেন, সূরিনা রতনত্তযে;

পসন্নামলচিত্তেন, সাসনুজোত নত্থিনা.

২৪. রঞ্ঞা কতঞ্ঞুনা তেন, থূপকারাপনাদিতো;

ৰিহার মহনন্তানি, পূজেতুং রতনত্তযং.

২৫. পরিচ্চত্তধনানে’ত্থ, অনগ্ঘানি ৰিমুঞ্চিয;

সেসানি হোন্তি একায, ঊনৰীসতিকোটিযো.

২৬. তোগা দসদ্ধৰিধ দোসৰিদূসিতাপি,

পঞ্ঞাৰিসেস সহিতেহি জনেহি পত্তা;

হোন্তেৰ পঞ্চগুণযোগ গহিতসারং,

ইচ্চস্স সারগহণে মতিমাযতেয্যাতি.

সুজনপ্পসাদসংৰেগত্থায কতে মহাৰংসে

মরিচৰট্টিকৰিহারমহোনাম

ছব্বীসতিমো পরিচ্ছেদো.