জিনৰংসদীপং |ও০.০০০১|

নমো তস্স ভগৰতো অরহতো সম্মাসম্বুদ্ধস্স

১. মহাদযো যো হদযো’দযো’দযো

হিতায দুক্খানুভৰে ভৰে ভৰে,

অকাসি সম্বোধিপদং পদং পদং

তমাভিৰন্দামি জিনং জিনং জিনং; (যমকবন্ধনং)

২. |ও০.০০০২|

পহায যত্থা’ভিরতিং রতিং রতিং

রমন্তি ধম্মেৰ মুনী মুনী মুনী,

ৰিমুত্তিদং সব্বভৰা ভৰা’ভৰা

তমাভিৰন্দে মহিতং হিতং হিতং; (যমকবন্ধনং)

৩. |ও০.০০০৪|

নিপীতসদ্ধম্মরসা রসা’রসা

সুপুঞ্ঞখেত্তো’রসতং সতং সতং,

গতা ৰিধূতা ৰিনযেন যেন যে

তমাভিৰন্দে’সিগণঙ্গণ’ঙ্গণং; (যমকবন্ধনং)

৪. |ও০.০০০৫|

জিনা’নতম্ভোরুহ হংসরাজিনী

জিনোরসানং মুখপঞ্জরা’লি নী,

সদত্থসারং সরসং ৰিসূদ নী

উপেতু মে মানসমেৰ ৰাণি নী;

৫. কম্মাৰসেসা ৰিচিতো’পজাত্যা

গন্থা’হিসঙ্খারৰিবন্ধকা মে,

পণাম পুঞ্ঞাতিসযেন’নেন

মা পাকদানা’ৰসরা ভৰন্তু;

৬. সুৰণ্ণৰণ্ণস্স জিনস্স ৰণ্ণং

ৰণ্ণেয্য কপ্পম্পি কজিতো সুৰণ্ণো,

কপ্পস্সি’ৰোসান মনত্ততায

ন পাপুণে বুদ্ধগুণান মন্তং;

৭. |ও০.০০০৬|

নিদ্ধন্ত চামীকর চারু রূপং

সরস্সতী ভূসণ ভাসনংচ,

অনঞ্ঞ সাধারণ ঞাণমস্স

অৰাৰিযা’চিন্তিয মপক্পমেয্যং;

৮. কুহিং অসাধারণ রূপ লীলা

কুহিং অসাধারণ ৰাণি লীলা,

কুহিং অসাধারণঞাণ লীলা

কুহিং নু মে মন্দমতিস্স লীলা;

৯. |ও০.০০০৭|

ৰিভাৰিমানী পরৰম্হিনো যে

ইস্সা’ভিমানেন ৰিভঞ্ঞমানা,

গৰেসযন্তী’ধ পরস্স রন্ধং

তেসং পসংসাগরহাহি কিম্মে;

১০. পসত্থ সত্থাগম পারদস্সী

যে সাধৰো সাধু গুণপ্পসন্তা,

গন্থস্স নিম্মাণপরিস্সমং নো

জানন্তি তেযেৰ ইধপ্পমাণা;

১১. আদিচ্চৰংসপ্পভৰস্স তস্স

জিনস্স সত্থাগমকোৰিদেহি,

ৰুত্তোপি পুব্বাচরিযেহি যেসু

গন্থেসু সঙ্খেপৰসেন ৰংসো;

১২. ন তেহি সক্কা সুগতস্স ৰংসং

কিঞ্চাপি ৰিঞ্ঞাতু মসেসযিত্ৰা,

সম্পুণ্ণৰংসস্স ৰিভাৰনায

তস্মা সমুস্সাহিত মানসেন;

১৩. |ও০.০০০৮|

অভিপ্পসন্নো রতনত্তযম্হি

পসত্থৰংসপ্পভৰো পভুনং,

ৰিভুসণো ৰিস্সুতকিত্তিঘোসো

যো ভাতি লঙ্কায মুল়ারভাগ্যো;

১৪. অমন্দচাগা’ভিরতস্স

পুনন্দু নামস্স দযাধনস্স,

বুদ্ধে পসাদাতিসযস্স তস্স

অজ্ঝেসনঞ্চাপি পটিগ্গহেত্ৰা;

১৫. নস্সায পুব্বাচরিযো’পদেসং

সোতূন মত্থায মযা হিতায,

নিরুত্তিযা মাগধিকায সম্মা

ৰিধীযতে’দং জিনৰংসদীপং;

১৬. |ও০.০০০৯|

সদ্ধাসিনেহানুগতায পঞ্ঞা-

দসায সোতূহি মনোৰিমানে,

পদীপিতো’যং জিনৰংসদীপ-

দীপোহরেপাপতমপ্পবন্ধং;

১৭. পুরঙ্গপুণ্ণা সিরিজম্বুদীপে

সম্পত্তিভারেন দিৰা’ৰতিণ্ণা,

যা দেৰরাজস্স’মরাৰতী’ৰা-

মরাৰতীনাম পুরী পুরে’সী;

১৮. ৰিজ্জাধরানঞ্চ ৰিহঙ্গমানং

ৰিবন্ধ ৰেহাসগতিং বহাস,

যস্মিং পুরস্মিং জিতৰেরি চক্কং

পাকারচক্কং ৰিয চক্কৰাল়ং;

১৯. |ও০.০০১০|

সঞ্চুম্বিতম্হোজ রজো পবন্ধ-

সুপিঞ্জরাপা পরিখাহিরামা,

পুরিত্থি পাকার নিতম্বভাগে

সমুব্বহী কঞ্চন মেখলা’ভং;

২০. রত্তিন্দিৰা রত্তমণি’ন্দনীল-

মণিপ্পভারঞ্জিত রাজধানি,

ববন্ধ যা’মন্দসুরিন্দচাপ-

সমুজ্জলাকাসতলব্বিলাসং;

২১. যহিংৰধূনং ৰদনম্বুজেহি

কতাৰমানং হরিণঙ্কবিম্বং,

পভাহি নীলোপলতোরণাতং

সোকাভীভূতংচ ৰিৰণ্ণমাপ;

২২. |ও০.০০১১|

সরোরুহ’ন্তী মণিমন্দিরাভা-

সঞ্চুম্বিতং পুণ্ণসসঙ্কবিম্বং;

সঙ্কায রামাজনতা’ভিরামা

করে পসারেসি পুরম্হি যস্মিং;

২৩. যত্থ’ঙ্গনানং পটিবিম্বিতানি

আদাসভিত্তীসু মুখম্বুজানি,

আসুং ৰিঘাতায মধুব্বতানং

ৰিলোচনালীন মনুগ্গহায;

২৪. সম্মত্ত মাতঙ্গ ধরাধরেহি

যস্মিং অভিস্সন্দ মদস্সৰন্তি,

তুরঙ্গ রঙ্গেহী তরঙ্গ মালা

সমাকুলেৰা’সি ৰিধূত ধূলী;

২৫. |ও০.০০১২|

নিক্খিত্তৰীণা মণিনুপুরানং

ৰিলাসিনীনং মুদুপাণি পাদে,

মত্তালিমালা কলনাদিনী কিং

নালঙ্করুং যত্থ কতাৰকাসা;

২৬. ধৰত্থিনীনং কুচসারসেহি

নেত্তালিভারা’নননীরজেহি,

যা হাসৰীচীহি পুরী রজন্যা

ররাজ সমফুল্লসরোজিনী’ৰ;

২৭. চন্দপ্পভা চুম্বিত চন্দকন্ত

পাসাণধারা মণিচন্দিকাসূ,

চন্দাননানং যহি মঙ্গনাহং

পরিস্সমস্সো’পসমায’হেসুং;

২৮. |ও০.০০১৩|

যস্মিং পূরে উদ্ধমধো ৰিনদ্ধ-

জুতিপ্পবন্ধো মণিমন্দিরানং,

সমুব্বহী গেরুক পঙ্ক দিদ্ধ-

ৰিতান পচ্চত্থরণব্বিলাসং

২৯. সুৰণ্ণ মুত্তা মণি ৰংসৰণ্ণা-

পৰাল় রূপী ৰজিরেহিঞ্চা’পি,

যা সত্তধঞ্ঞেহি ধনেহি ফীতা

অহূ পুরি ধঞ্ঞৰতী’ৰ নারী; (সিলেসবন্ধনং)

৩০. পসারিতা’নেকদিসামুখেসু

ৰিচিত্তৰত্থা’ভরণাদিপূরা,

যত্থা’পণা নিজ্জিতকপ্পরুক্খা

করিংসু লোকাভিমতত্থসিদ্ধিং;

৩১. |ও০.০০১৪|

পরাগরত্তা মধুপাতিমত্তা

সম্হিন্নৰেলা ঘননীলৰালা,

হংসাসযা পঞ্চসরাভিরামা

যস্মিং তল়াকা ৰিয কামভোগী; (সিলেসবন্ধনং)

৩২. পুরন্তরস্মিং রতনগ্ঘিকানং

রংসিপ্পবন্ধেহি হতন্ধকারে,

কুন্দারৰিন্দব্ভুদযেনযস্মিং

রত্তিন্দিৰাভেদ মৰেদি লোকো;

৩৩. |ও০.০০১৫|

মাতঙ্গজীমূতঘটায ঘণ্টা-

টঙ্কারগম্ভীররৰায যস্মিং,

পলম্ভীতা মত্তসিখণ্ডিমালা

অকা ৰিকালেপি অখণ্ডকীল়ং;

৩৪. পুরম্হি যস্মিং চরণম্বুজেহি

ৰধূজতো বন্ধিতনূপুরেহি,

ৰিকাস কোকাসন সীস বদ্ধ