নমো তস্স ভগৰতো অরহতো সম্মাসম্বুদ্ধস্স.

বালাৰতার

পণাম

[ক]

সব্বং নিরুত্তিপথপারগতং সবুদ্ধং,

বুদ্ধং তিলোকতিলকং হতপাপধম্মং;

ধম্মং ৰিমুত্তিসুখদং ৰিহতাঘসংঘং,

সংঘং চ নিচ্চমভিৰন্দিয দক্খিণেয্যং.

[খ]

ৰুদ্ধিপ্পত্তোস্মি মুদ্ধো মম ৰরগরৰো সীলপঞ্ঞাদিসোভে,

চন্দাদিচ্চেৰ সুদ্ধে ৰরজিনঠপিতে সাসনাব্ভে পতীতে;

নিস্সাযেৰা তিপেমা পণমিয সিরসা নিচ্চমেসং সরিত্ৰা,

পাদম্ভোজে গুণগ্গে হতদুরিতমলো আনুভাৰেন তস্সা.

[গ]

পোরাণ সীহল় পদত্থ ৰিনিচ্ছযঞ্চ,

সব্বম্পি মাগধনিরুত্তিনযং পসত্থং;

অঞ্ঞঞ্চ নেকৰিধ সক্কত সদ্দসত্থং,

পারম্পরাভত মতঞ্চ নিসম্ম সম্মা.

[ঘ]

বালাৰতার ৰরমাগধ সদ্দসত্থে,

দুব্বোধ নেকপদঅত্থ ৰিনিচ্ছযেন;

অত্থায আধুনিক বালপরম্পরায,

বালাৰতার ৰরগণ্ঠিপদং করিস্সং.

[ঙ]

নিচ্চং যে মেত্থ বালা ৰরহদযযুতা সুট্ঠু নিক্খিত্তনেত্তা,

পুণ্ণে নানানযানং সুরতরুসদিসে ধীরপাসংসিযে ৰে;

গম্ভীরং দুত্তরং তে জিনৰচনুদধিং তিণ্ণথামা ভৰেয্যুং,

লদ্ধোপাযা চ চন্দং তদিতরপচুরং সক্কতং সোতুকামা.

[চ]

গন্থনিপ্ফত্তিযা সেস – দুক্করত্তং যথাৰতো;

জানন্তি কুসলা ধীরা, নেকসত্থন্তরাদিসু;

গন্থেসু গুণদোসম্পি, তেযেৰ ৰিদুরা সদা.

[ছ]

তস্মা এত্থ পমাদাদি – দোসলেসো ভৰে যদি;

পোরাণাচেরলদ্ধীহি, ৰিলোমং ৰা ভৰেয্য চে.

[জ]

গন্থন্তরং ৰিগাহেত্ৰা, ৰিচারেত্ৰা পুনপ্পুনং;

যুত্তিমেৰ চ গণ্হন্তু, হুত্ৰা ৰীমংসবুদ্ধিকাতি.

পণাম

১. বুদ্ধং তিধা ভিৰন্দিত্ৰা, বুদ্ধম্বুজ ৰিলোচনং.

বালাৰতারং ভাসিস্সং, বালানং বুদ্ধিৰুদ্ধিযা.

১. সন্ধি কণ্ড

সঞ্ঞা

২. অক্খরাপাদযো একচত্তালীসং.

অক্খরাপি অকারাদযো একচত্তালীসং সুত্তন্তোপকারা. তং যথা-অ আ-ই ঈ-উ ঊ-এ ও, ক খ গ ঘ ঙ, চ ছ জ ঝ ঞ, ট ঠ ড ঢ ণ, ত থ দ ধ ন, প ফ ব ভ ম, য র ল ৰ স হ ল় অং-ইতি.

৩. তত্থোদন্তাসরা অট্ঠ.

তত্থ অক্খরেসু ওকারন্তা অট্ঠ সরা নাম. তত্থেতি ৰত্ততে.

৪. লহুমত্তা তযো রস্সা.

তত্থ সরেসু লহুমত্তা অ, ই, উ ইতি তযো রস্সা.

৫. অঞ্ঞে দীঘা.

তত্থ সরেসু রস্সেহঞ্ঞে দীঘা.

সংযোগতো পুব্বে এও রস্সা ইৰোচ্চন্তে, অনন্তরা ব্যঞ্জনা সংযোগো. এত্থ, সেয্যো, ওট্ঠো, সোত্থি.

৬. সেসা ব্যঞ্জনা.

সরে ঠপেত্ৰা সেসা কাদযো নিগ্গহীতন্তা ব্যঞ্জনা.

৭. ৰগ্গা পঞ্চপঞ্চসো মন্তা.

ব্যঞ্জনানং কাদযো মকারন্তা পঞ্চপঞ্চসো অক্খরৰন্তো ৰগ্গা.

৮. ৰগ্গানং পঠমদুতিযা সো চাঘোসো. ল়ন্তাঞ্ঞে ঘোসা. ঘোসাঘোসসঞ্ঞা চ ‘‘পরসমঞ্ঞা পযোগে’’তি সঙ্গহীতা. এৰং লিঙ্গ, সব্বনাম, পদ, উপসগ্গ, নিপাত, তদ্ধিত, আখ্যাত, কম্মপ্পৰচনীযাদিসঞ্ঞা চ.

৯. অংইতি নিগ্গহীতং.

অংইতি অকারতো পরং যো বিন্দু সূযতে, তং নিগ্গহীতং নাম.

বিন্দু চূল়ামণাকারো, নিগ্গহীতন্তি ৰুচ্চতে.

কেৰলস্সা প্পযোগত্তা, অকারো সন্নিধীযতে.

১০. অ, কৰগ্গ, হা কণ্ডজা, ই, চৰগ্গ, যা তালুজা, উ, পৰগ্গা ওট্ঠজা, টৰগ্গ, র, ল়া মুদ্ধজা, তৰগ্গ, ল, সা দন্তজা, এ কণ্ঠতালুজো, ও কণ্ঠোট্ঠজো, ৰো দন্তোট্ঠজো.

সঞ্ঞা

সরসন্ধি

১১. লোক অগ্গোইত্যস্মিং – ‘‘পুব্বমধোঠিত মস্সরং সরেন ৰিযোজযে’’তি পুব্বব্যঞ্জনং সরতো পুথক্কাতব্বং.

সরা সরে লোপং.

অনন্তরে সরে পরে সরা লোপং পপ্পোন্তি.

‘‘নরে পরং যুত্তে’’তি অস্সরো ব্যঞ্জনো পরক্খরং নেতব্বো লোকগ্গো.

সরেত্যস্মিং ওপসিলেসিকো কাসসত্তমী, ততো ৰণ্ণকালব্যৰধানে কারিযং ন হোতি. যথা-মং অহা সীতি, ‘‘পমাদমনুযুঞ্জন্তী’’ত্যাদিগাথাযং ‘জনা অপ্পমাদ’ন্তি চ. এৰং সব্বসন্ধীসু.

অনন্তরং পরস্স সরস্স লোপং ৰক্খতি, তস্মানেন পুব্বস্স লোপো ঞাযতি, তেনেৰ সত্তমীনিদ্দিট্ঠস্স পরতাপি গম্যতে.

১২. সরেত্যধিকারো. পন ইমে পন ইমেতীহ-সরা লোপং ইত্ৰেৰ.

ৰা পরো অসরূপো.

অসমানরূপাসরম্হা পরো সরো ৰা লুপ্যতে, পনমে, পনিমে.

১৩. বন্ধুস্স ইৰ, ন উপেতীতীধ –

ক্ৰচাসৰণ্ণং লুত্তে.

সরে লুত্তে পরসরস্স ক্ৰচি অসৰণ্ণো হোতীতি ই উ ইচ্চেতেসং ঠানাসন্না এ ও. বন্ধুস্সেৰ. নোপেতি.

১৪. তত্র অযং, যানি ইধ, বহু উপকারং, সদ্ধা ইধ, তথা উপমন্ত্যেতস্মিং –

দীঘং.

সরে লুত্তে পরো সরো ক্ৰচি ঠানাসন্নং দীঘং যাতি. তত্রাযং, যানীধ, বহূপকারং, সদ্ধীধ, তথূপমং.

১৫. কিংসু ইধেত্যত্র –

পুব্বো চ.

সরে লুত্তে পুব্বো চ ক্ৰচি দীঘং যাতি. কিং সূধ.

১৬. তে অজ্জ, তে অহংতেত্থ –

যমেদন্তস্সাদেসো.

সরে পরে অন্তস্স একারস্স ক্ৰচি যো আদেসো হোতি, ত্যজ্জ, ‘‘দীঘ’’ন্তি ব্যঞ্জনে পরে ক্ৰচি দীঘো, ত্যাহং.

ক্ৰচীতি কিং. নেত্থ.

১৭. সো অস্স, অনু এতিত্যেত্থ –

ৰমোদুদন্তানং.

সরে পরে অন্তো কারুকারানং ক্ৰচি ৰো আদেসো হোতি. স্ৰস্স, অন্ৰেতি.

ক্ৰচীতি কিং. তযস্সু, সমেতাযস্মা.

১৮. ইধ অহং তীধ –

দো ধস্স চ.

সরে পরে ধস্স ক্ৰচি দো হোতি. দীঘে – ইদাহং. ক্ৰচীতি কিং. ইধেৰ. চকারেন ব্যঞ্জনেপি, ইধ ভিক্খৰে.

১৯. পতি অন্তুং, ৰুত্তি অস্সেতীহ –

ইৰণ্ণো যন্নৰা.

সরে পরে ইৰণ্ণস্স যো নৰা হোতি. কত যকারস্স তিস্স ‘‘সব্বো চন্তী’’তি ক্ৰচি চাদেসে ‘‘পরদ্ৰেভাৰো ঠানে’’তি সরতো পরব্যঞ্জনস্স ঠানাসন্নৰসা দ্ৰিত্তং. পচ্চন্তং, ৰুত্যস্স.

নৰাতি কিং. পটগ্গি,

এত্থ ‘‘ক্ৰচি পটি পতিস্সে’’তি পতিস্স পটি, ৰণ্ণগ্গহণং সব্বত্থ রস্সদীঘ সঙ্গহণত্থং.

২০. যথা এৰেতীহ –

এৰাদিস্স রি পুব্বো চ রস্সো.

সরতো পরস্স এৰস্সাদিএকারো রিত্তং নৰা যাতি. পুব্বো চ ঠানাসন্নং রস্সং. যথরিৰ. যথেৰ.

২১. ন ইমস্স, তি অঙ্গিকং, লহু এস্সতি, অত্থ অত্থং, ইতো আযতি, তস্মা ইহ, সব্ভি এৰ, ছ অভিঞ্ঞা, পুথ এৰ, পা এৰতীহ ৰা ত্ৰেৰ –

য ৰ ম দ ন ত র ল়া চাগমা.

সরে পরে যাদযো আগমা ৰা হোন্তি, চকারেন গো চ. নযিমস্স, তিৰঙ্গিকং, লহুমেস্সতি, অত্তদত্থং, ইতোনাযতি, তস্মাতিহ, সব্ভিরেৰ, ছল়ভিঞা, পুথগেৰ, ‘‘রস্স’’ন্তি ব্যঞ্জনে পরে ক্ৰচি রস্সো. পগেৰ.

ৰাতি কিং. ছ অভিঞ্ঞা, পুথ এৰ, পা এৰ.

এত্থ ‘‘সরে ক্ৰচী’’তি সরানং পকতি হোতি, সস্সরূপমেৰ, ন ৰিকারোত্যত্থো.

২২. অভি উগ্গতোত্যত্র –

‘‘অব্ভো অভী’’তি অভিস্স অব্ভো. অব্ভুগ্গতো.

সরসন্ধি

ব্যঞ্জনসন্ধি

২৩. ব্যঞ্জনেত্যধিকারো. ক্ৰচীত্ৰেৰ. সো ভিক্খু, কচ্চি নু ত্ৰং, জানেম তন্তীহ –

লোপঞ্চ তত্রাকারো.

ব্যঞ্জনে পরে সরানং ক্ৰচি লোপোহোতি, তত্র লুত্তে ঠানে অকারাগমো, চকারেন ওকারুকারাপি. সভিক্খু কচ্চিনো ত্ৰং, জানেমু তং.

ক্ৰচীতি কিং, সোমুনি.

২৪. উঘোসো, আখাতন্তীহ – দ্ৰেভাৰে ঠানে ইত্ৰেৰ.

ৰগ্গে ঘোসাঘোসানং ততিযপঠমা.

ৰগ্গে ঘোসাঘোসানং চতুত্থদুতিযানং তব্বগ্গে ততিযপঠমা হোন্তি যথাসঙ্খ্যং যুত্তে ঠানে, উগ্ঘোসো, রস্সে অক্খাতং.

২৫. পর সহস্সং, অতিপ্পখোতীহ – ‘‘ক্ৰচি ও ব্যঞ্জনে’’তি ওকারাগমো. পরোসহস্সং. গাগমে চ, অতিপ্পগোখো.

২৬. অৰ নদ্ধাত্যত্র – ‘‘ও অৰস্সে’’তি ক্ৰচি অৰস্স ও. ওনদ্ধা.

ক্ৰচীতি কিং. অৰসুস্সতু.

ব্যঞ্জনসন্ধি.

নিগ্গহীতসন্ধি

২৭. নিগ্গহীতন্ত্যধিকারো. কিং কতো, সং জাতো, সং ঠিতো, তং ধনং, তং মিত্তন্তিহ –

ৰগ্গন্তং ৰা ৰগ্গে.

ৰগ্গব্যঞ্জনে পরে বিন্দুস্স তব্বগ্গন্তো ৰা হোতি. কিঙ্কতো, সঞ্জাতো, সণ্ঠিতো, তন্ধনং, তম্মিত্তং.

ৰাতি কিং. ন তং কম্মং.

ৰাকারেনেৰ লে লো চ. পুল্লিঙ্গং.

২৮. ৰাত্যধিকারো. এৰং অস্স, এতং অৰোচেতীহ –

মদা সরে.

সরে পরে বিন্দুনো ম দা ৰা হোন্তি. এৰমস্স, এতদৰোচ.

ৰাতি কিং. মং অজিনি.

২৯. তং এৰ, তং হীতীহ –

এহেঞং.

একারে, হে চ পরে বিন্দুনো ঞো ৰা হোতি. দ্ৰিত্তে – তঞ্ঞেৰ, তমেৰ. তঞ্হি, তং হি.

৩০. সংযোগোতীহ –

সযে চ.

যকারে পরে তেন সহ বিন্দুনো ঞো ৰা হোতি. দ্ৰিত্তে – সঞ্ঞোগো, সংযোগো.

৩১. চক্খু অনিচ্চং, অৰ সিরোতীহ - আগমো, ক্ৰচিত্ৰেৰ.

নিগ্গহীতঞ্চ.

সরে, ব্যঞ্জনে ৰা পরে ক্ৰচি বিন্দ্ৰাগমো হোতি. চক্খুংঅনিচ্চং, অৰংসিরো.

৩২. ৰিদূনং অগ্গং, তাসং অহংতীহ –

‘‘ক্ৰচি লোপং’’তি সরে বিন্দুলোপো, ৰিদূনগ্গং. দীঘেতাসাহং.

৩৩. বুদ্ধানং সাসনং, সং রাগোতীহ –

‘‘ব্যঞ্জনে চে’’তি বিন্দুলোপো, বুদ্ধানসাসনং. দীঘেসারাগো.

৩৪. বীজং ইৰেতীহ –

পরো ৰা সরো.

বিন্দুতো পরো সরো ৰা লুপ্যতে, বীজংৰ.

৩৫. এৰং অস্সেতীহ –

ব্যঞ্জনো চ ৰিসঞ্ঞোগো.

বিন্দুতো পরে সরে লুত্তে সংযোগো ব্যঞ্জনো ৰিনট্ঠসংযোগো হোতীতি পুব্বসলোপো. এৰংস.