১১. তিকৰগ্গো

১. রাগসুত্তং

১০৭. ‘‘তযোমে, ভিক্খৰে, ধম্মা. কতমে তযো? রাগো, দোসো, মোহো. ইমে খো, ভিক্খৰে, তযো ধম্মা. ইমেসং খো, ভিক্খৰে, তিণ্ণং ধম্মানং পহানায তযো ধম্মা ভাৰেতব্বা. কতমে তযো? রাগস্স পহানায অসুভা ভাৰেতব্বা, দোসস্স পহানায মেত্তা ভাৰেতব্বা, মোহস্স পহানায পঞ্ঞা ভাৰেতব্বা. ইমেসং খো, ভিক্খৰে, তিণ্ণং ধম্মানং পহানায ইমে তযো ধম্মা ভাৰেতব্বা’’তি. পঠমং.

২. দুচ্চরিতসুত্তং

১০৮. ‘‘তযোমে, ভিক্খৰে, ধম্মা. কতমে তযো? কাযদুচ্চরিতং, ৰচীদুচ্চরিতং, মনোদুচ্চরিতং. ইমে খো, ভিক্খৰে, তযো ধম্মা. ইমেসং খো, ভিক্খৰে, তিণ্ণং ধম্মানং পহানায তযো ধম্মা ভাৰেতব্বা. কতমে তযো? কাযদুচ্চরিতস্স পহানায কাযসুচরিতং ভাৰেতব্বং, ৰচীদুচ্চরিতস্স পহানায ৰচীসুচরিতং ভাৰেতব্বং, মনোদুচ্চরিতস্স পহানায মনোসুচরিতং ভাৰেতব্বং. ইমেসং খো, ভিক্খৰে, তিণ্ণং ধম্মানং পহানায ইমে তযো ধম্মা ভাৰেতব্বা’’তি. দুতিযং.

৩. ৰিতক্কসুত্তং

১০৯. ‘‘তযোমে, ভিক্খৰে, ধম্মা. কতমে তযো? কামৰিতক্কো, ব্যাপাদৰিতক্কো, ৰিহিংসাৰিতক্কো. ইমে খো, ভিক্খৰে, তযো ধম্মা. ইমেসং খো, ভিক্খৰে, তিণ্ণং ধম্মানং পহানায তযো ধম্মা ভাৰেতব্বা. কতমে তযো? কামৰিতক্কস্স পহানায নেক্খম্মৰিতক্কো ভাৰেতব্বো, ব্যাপাদৰিতক্কস্স পহানায অব্যাপাদৰিতক্কো ভাৰেতব্বো, ৰিহিংসাৰিতক্কস্স পহানায অৰিহিংসাৰিতক্কো ভাৰেতব্বো. ইমেসং খো, ভিক্খৰে, তিণ্ণং ধম্মানং পহানায ইমে তযো ধম্মা ভাৰেতব্বা’’তি. ততিযং.

৪. সঞ্ঞাসুত্তং

১১০. ‘‘তযোমে, ভিক্খৰে, ধম্মা. কতমে তযো? কামসঞ্ঞা, ব্যাপাদসঞ্ঞা, ৰিহিংসাসঞ্ঞা. ইমে খো, ভিক্খৰে, তযো ধম্মা. ইমেসং খো, ভিক্খৰে, তিণ্ণং ধম্মানং পহানায তযো ধম্মা ভাৰেতব্বা. কতমে তযো? কামসঞ্ঞায পহানায নেক্খম্মসঞ্ঞা ভাৰেতব্বা, ব্যাপাদসঞ্ঞায পহানায অব্যাপাদসঞ্ঞা ভাৰেতব্বা, ৰিহিংসাসঞ্ঞায পহানায অৰিহিংসাসঞ্ঞা ভাৰেতব্বা. ইমেসং খো, ভিক্খৰে, তিণ্ণং ধম্মানং পহানায ইমে তযো ধম্মা ভাৰেতব্বা’’তি. চতুত্থং.

৫. ধাতুসুত্তং

১১১. ‘‘তযোমে, ভিক্খৰে, ধম্মা. কতমে তযো? কামধাতু, ব্যাপাদধাতু, ৰিহিংসাধাতু. ইমে খো, ভিক্খৰে, তযো ধম্মা. ইমেসং খো, ভিক্খৰে, তিণ্ণং ধম্মানং পহানায তযো ধম্মা ভাৰেতব্বা. কতমে তযো? কামধাতুযা পহানায নেক্খম্মধাতু ভাৰেতব্বা, ব্যাপাদধাতুযা পহানায অব্যাপাদধাতু ভাৰেতব্বা, ৰিহিংসাধাতুযা পহানায অৰিহিংসাধাতু ভাৰেতব্বা. ইমেসং খো, ভিক্খৰে, তিণ্ণং ধম্মানং পহানায ইমে তযো ধম্মা ভাৰেতব্বা’’তি. পঞ্চমং.

৬. অস্সাদসুত্তং

১১২. ‘‘তযোমে, ভিক্খৰে, ধম্মা. কতমে তযো? অস্সাদদিট্ঠি, অত্তানুদিট্ঠি, মিচ্ছাদিট্ঠি. ইমে খো, ভিক্খৰে, তযো ধম্মা. ইমেসং খো, ভিক্খৰে, তিণ্ণং ধম্মানং পহানায তযো ধম্মা ভাৰেতব্বা. কতমে তযো? অস্সাদদিট্ঠিযা পহানায অনিচ্চসঞ্ঞা ভাৰেতব্বা, অত্তানুদিট্ঠিযা পহানায অনত্তসঞ্ঞা ভাৰেতব্বা, মিচ্ছাদিট্ঠিযা পহানায সম্মাদিট্ঠি ভাৰেতব্বা. ইমেসং খো, ভিক্খৰে, তিণ্ণং ধম্মানং পহানায ইমে তযো ধম্মা ভাৰেতব্বা’’তি. ছট্ঠং.

৭. অরতিসুত্তং

১১৩. ‘‘তযোমে, ভিক্খৰে, ধম্মা. কতমে তযো? অরতি, ৰিহিংসা [ৰিহেসা (ক.)], অধম্মচরিযা. ইমে খো, ভিক্খৰে, তযো ধম্মা. ইমেসং খো, ভিক্খৰে, তিণ্ণং ধম্মানং পহানায তযো ধম্মা ভাৰেতব্বা. কতমে তযো? অরতিযা পহানায মুদিতা ভাৰেতব্বা, ৰিহিংসায পহানায অৰিহিংসা ভাৰেতব্বা, অধম্মচরিযায পহানায ধম্মচরিযা ভাৰেতব্বা. ইমেসং খো, ভিক্খৰে, তিণ্ণং ধম্মানং পহানায ইমে তযো ধম্মা ভাৰেতব্বা’’তি. সত্তমং.

৮. সন্তুট্ঠিতাসুত্তং

১১৪. ‘‘তযোমে, ভিক্খৰে, ধম্মা. কতমে তযো? অসন্তুট্ঠিতা, অসম্পজঞ্ঞং, মহিচ্ছতা. ইমে খো, ভিক্খৰে, তযো ধম্মা. ইমেসং খো, ভিক্খৰে, তিণ্ণং ধম্মানং পহানায তযো ধম্মা ভাৰেতব্বা. কতমে তযো? অসন্তুট্ঠিতায পহানায সন্তুট্ঠিতা ভাৰেতব্বা, অসম্পজঞ্ঞস্স পহানায সম্পজঞ্ঞং ভাৰেতব্বং, মহিচ্ছতায পহানায অপ্পিচ্ছতা ভাৰেতব্বা. ইমেসং খো, ভিক্খৰে, তিণ্ণং ধম্মানং পহানায ইমে তযো ধম্মা ভাৰেতব্বা’’তি. অট্ঠমং.

৯. দোৰচস্সতাসুত্তং

১১৫. ‘‘তযোমে, ভিক্খৰে, ধম্মা. কতমে তযো? দোৰচস্সতা, পাপমিত্ততা, চেতসো ৰিক্খেপো. ইমে খো, ভিক্খৰে, তযো ধম্মা. ইমেসং খো, ভিক্খৰে, তিণ্ণং ধম্মানং পহানায তযো ধম্মা ভাৰেতব্বা. কতমে তযো? দোৰচস্সতায পহানায সোৰচস্সতা ভাৰেতব্বা, পাপমিত্ততায পহানায কল্যাণমিত্ততা ভাৰেতব্বা, চেতসো ৰিক্খেপস্স পহানায আনাপানস্সতি ভাৰেতব্বা. ইমেসং খো, ভিক্খৰে, তিণ্ণং ধম্মানং পহানায ইমে তযো ধম্মা ভাৰেতব্বা’’তি. নৰমং.

১০. উদ্ধচ্চসুত্তং

১১৬. ‘‘তযোমে, ভিক্খৰে, ধম্মা. কতমে তযো? উদ্ধচ্চং, অসংৰরো, পমাদো. ইমে খো, ভিক্খৰে, তযো ধম্মা. ইমেসং খো, ভিক্খৰে, তিণ্ণং ধম্মানং পহানায তযো ধম্মা ভাৰেতব্বা. কতমে তযো? উদ্ধচ্চস্স পহানায সমথো ভাৰেতব্বো, অসংৰরস্স পহানায সংৰরো ভাৰেতব্বো, পমাদস্স পহানায অপ্পমাদো ভাৰেতব্বো. ইমেসং খো, ভিক্খৰে, তিণ্ণং ধম্মানং পহানায ইমে তযো ধম্মা ভাৰেতব্বা’’তি. দসমং.

তিকৰগ্গো একাদসমো. [পঠমো (স্যা.)]