৭. পঠমসমযসুত্তং

২৭. অথ খো অঞ্ঞতরো ভিক্খু যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো সো ভিক্খু ভগৰন্তং এতদৰোচ – ‘‘কতি নু খো, ভন্তে, সমযা মনোভাৰনীযস্স ভিক্খুনো দস্সনায উপসঙ্কমিতু’’ন্তি? ‘‘ছযিমে, ভিক্খু, সমযা মনোভাৰনীযস্স ভিক্খুনো দস্সনায উপসঙ্কমিতুং’’.

‘‘কতমে ছ? ইধ, ভিক্খু, যস্মিং সমযে ভিক্খু কামরাগপরিযুট্ঠিতেন চেতসা ৰিহরতি কামরাগপরেতেন, উপ্পন্নস্স চ কামরাগস্স নিস্সরণং যথাভূতং নপ্পজানাতি তস্মিং সমযে মনোভাৰনীযো ভিক্খু উপসঙ্কমিত্ৰা এৰমস্স ৰচনীযো – ‘অহং খো, আৰুসো, কামরাগপরিযুট্ঠিতেন চেতসা ৰিহরামি কামরাগপরেতেন, উপ্পন্নস্স চ কামরাগস্স নিস্সরণং যথাভূতং নপ্পজানামি. সাধু ৰত মে, আযস্মা, কামরাগস্স পহানায ধম্মং দেসেতূ’তি. তস্স মনোভাৰনীযো ভিক্খু কামরাগস্স পহানায ধম্মং দেসেতি. অযং, ভিক্খু, পঠমো সমযো মনোভাৰনীযস্স ভিক্খুনো দস্সনায উপসঙ্কমিতুং.

‘‘পুন চপরং, ভিক্খু, যস্মিং সমযে ভিক্খু ব্যাপাদপরিযুট্ঠিতেন চেতসা ৰিহরতি ব্যাপাদপরেতেন, উপ্পন্নস্স চ ব্যাপাদস্স নিস্সরণং যথাভূতং নপ্পজানাতি তস্মিং সমযে মনোভাৰনীযো ভিক্খু উপসঙ্কমিত্ৰা এৰমস্স ৰচনীযো – ‘অহং খো, আৰুসো, ব্যাপাদপরিযুট্ঠিতেন চেতসা ৰিহরামি ব্যাপাদপরেতেন, উপ্পন্নস্স চ ব্যাপাদস্স নিস্সরণং যথাভূতং নপ্পজানামি. সাধু ৰত মে, আযস্মা, ব্যাপাদস্স পহানায ধম্মং দেসেতূ’তি. তস্স মনোভাৰনীযো ভিক্খু ব্যাপাদস্স পহানায ধম্মং দেসেতি. অযং, ভিক্খু, দুতিযো সমযো মনোভাৰনীযস্স ভিক্খুনো দস্সনায উপসঙ্কমিতুং.

‘‘পুন চপরং, ভিক্খু, যস্মিং সমযে ভিক্খু থিনমিদ্ধপরিযুট্ঠিতেন চেতসা ৰিহরতি থিনমিদ্ধপরেতেন, উপ্পন্নস্স চ থিনমিদ্ধস্স নিস্সরণং যথাভূতং নপ্পজানাতি তস্মিং সমযে মনোভাৰনীযো ভিক্খু উপসঙ্কমিত্ৰা এৰমস্স ৰচনীযো – ‘অহং খো, আৰুসো, থিনমিদ্ধপরিযুট্ঠিতেন চেতসা ৰিহরামি থিনমিদ্ধপরেতেন, উপ্পন্নস্স চ থিনমিদ্ধস্স নিস্সরণং যথাভূতং নপ্পজানামি. সাধু ৰত মে, আযস্মা, থিনমিদ্ধস্স পহানায ধম্মং দেসেতূ’তি. তস্স মনোভাৰনীযো ভিক্খু থিনমিদ্ধস্স পহানায ধম্মং দেসেতি. অযং, ভিক্খু, ততিযো সমযো মনোভাৰনীযস্স ভিক্খুনো দস্সনায উপসঙ্কমিতুং.

‘‘পুন চপরং, ভিক্খু, যস্মিং সমযে ভিক্খু উদ্ধচ্চকুক্কুচ্চপরিযুট্ঠিতেন চেতসা ৰিহরতি উদ্ধচ্চকুক্কুচ্চপরেতেন, উপ্পন্নস্স চ উদ্ধচ্চকুক্কুচ্চস্স নিস্সরণং যথাভূতং নপ্পজানাতি তস্মিং সমযে মনোভাৰনীযো ভিক্খু উপসঙ্কমিত্ৰা এৰমস্স ৰচনীযো – ‘অহং খো, আৰুসো, উদ্ধচ্চকুক্কুচ্চপরিযুট্ঠিতেন চেতসা ৰিহরামি উদ্ধচ্চকুক্কুচ্চপরেতেন, উপ্পন্নস্স চ উদ্ধচ্চকুক্কুচ্চস্স নিস্সরণং যথাভূতং নপ্পজানামি. সাধু ৰত মে, আযস্মা, উদ্ধচ্চকুক্কুচ্চস্স পহানায ধম্মং দেসেতূ’তি. তস্স মনোভাৰনীযো ভিক্খু উদ্ধচ্চকুক্কুচ্চস্স পহানায ধম্মং দেসেতি. অযং, ভিক্খু, চতুত্থো সমযো মনোভাৰনীযস্স ভিক্খুনো দস্সনায উপসঙ্কমিতুং.

‘‘পুন চপরং, ভিক্খু, যস্মিং সমযে ভিক্খু ৰিচিকিচ্ছাপরিযুট্ঠিতেন চেতসা ৰিহরতি ৰিচিকিচ্ছাপরেতেন, উপ্পন্নায চ ৰিচিকিচ্ছায নিস্সরণং যথাভূতং নপ্পজানাতি তস্মিং সমযে মনোভাৰনীযো ভিক্খু উপসঙ্কমিত্ৰা এৰমস্স ৰচনীযো – ‘অহং, আৰুসো, ৰিচিকিচ্ছাপরিযুট্ঠিতেন চেতসা ৰিহরামি ৰিচিকিচ্ছাপরেতেন, উপ্পন্নায চ ৰিচিকিচ্ছায নিস্সরণং যথাভূতং নপ্পজানামি. সাধু ৰত মে, আযস্মা, ৰিচিকিচ্ছায পহানায ধম্মং দেসেতূ’তি. তস্স মনোভাৰনীযো ভিক্খু ৰিচিকিচ্ছায পহানায ধম্মং দেসেতি. অযং, ভিক্খু, পঞ্চমো সমযো মনোভাৰনীযস্স ভিক্খুনো দস্সনায উপসঙ্কমিতুং.

‘‘পুন চপরং, ভিক্খু, যস্মিং সমযে ভিক্খু যং নিমিত্তং আগম্ম যং নিমিত্তং মনসিকরোতো অনন্তরা আসৰানং খযো হোতি তং নিমিত্তং নপ্পজানাতি তস্মিং সমযে মনোভাৰনীযো ভিক্খু উপসঙ্কমিত্ৰা এৰমস্স ৰচনীযো – ‘অহং খো, আৰুসো, যং নিমিত্তং আগম্ম যং নিমিত্তং মনসিকরোতো অনন্তরা আসৰানং খযো হোতি, তং নিমিত্তং নপ্পজানামি. সাধু ৰত মে, আযস্মা, আসৰানং খযায ধম্মং দেসেতূ’তি. তস্স মনোভাৰনীযো ভিক্খু আসৰানং খযায ধম্মং দেসেতি. অযং, ভিক্খু, ছট্ঠো সমযো মনোভাৰনীযস্স ভিক্খুনো দস্সনায উপসঙ্কমিতুং. ইমে খো, ভিক্খু, ছ সমযা মনোভাৰনীযস্স ভিক্খুনো দস্সনায উপসঙ্কমিতু’’ন্তি. সত্তমং.