১. সিক্খাপদসুত্তং

২০১. ‘‘অসপ্পুরিসঞ্চ ৰো, ভিক্খৰে, দেসেস্সামি, অসপ্পুরিসেন অসপ্পুরিসতরঞ্চ; সপ্পুরিসঞ্চ, সপ্পুরিসেন সপ্পুরিসতরঞ্চ. তং সুণাথ, সাধুকং মনসি করোথ; ভাসিস্সামী’’তি. ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘কতমো চ, ভিক্খৰে, অসপ্পুরিসো? ইধ, ভিক্খৰে, একচ্চো পাণাতিপাতী হোতি, অদিন্নাদাযী হোতি, কামেসুমিচ্ছাচারী হোতি, মুসাৰাদী হোতি, সুরামেরযমজ্জপমাদট্ঠাযী হোতি. অযং ৰুচ্চতি, ভিক্খৰে, অসপ্পুরিসো.

‘‘কতমো চ, ভিক্খৰে, অসপ্পুরিসেন অসপ্পুরিসতরো? ইধ, ভিক্খৰে, একচ্চো অত্তনা চ পাণাতিপাতী হোতি, পরঞ্চ পাণাতিপাতে সমাদপেতি; অত্তনা চ অদিন্নাদাযী হোতি, পরঞ্চ অদিন্নাদানে সমাদপেতি; অত্তনা চ কামেসুমিচ্ছাচারী হোতি, পরঞ্চ কামেসুমিচ্ছাচারে সমাদপেতি; অত্তনা চ মুসাৰাদী হোতি, পরঞ্চ মুসাৰাদে সমাদপেতি; অত্তনা চ সুরামেরযমজ্জপমাদট্ঠাযী হোতি, পরঞ্চ সুরামেরযমজ্জপমাদট্ঠানে সমাদপেতি. অযং ৰুচ্চতি, ভিক্খৰে, অসপ্পুরিসেন অসপ্পুরিসতরো.

‘‘কতমো চ, ভিক্খৰে, সপ্পুরিসো? ইধ, ভিক্খৰে, একচ্চো পাণাতিপাতা পটিৰিরতো হোতি, অদিন্নাদানা পটিৰিরতো হোতি, কামেসুমিচ্ছাচারা পটিৰিরতো হোতি, মুসাৰাদা পটিৰিরতো হোতি, সুরামেরযমজ্জপমাদট্ঠানা পটিৰিরতো হোতি. অযং ৰুচ্চতি, ভিক্খৰে, সপ্পুরিসো.

‘‘কতমো চ, ভিক্খৰে, সপ্পুরিসেন সপ্পুরিসতরো? ইধ, ভিক্খৰে, একচ্চো অত্তনা চ পাণাতিপাতা পটিৰিরতো হোতি, পরঞ্চ পাণাতিপাতা ৰেরমণিযা সমাদপেতি; অত্তনা চ অদিন্নাদানা পটিৰিরতো হোতি, পরঞ্চ অদিন্নাদানা ৰেরমণিযা সমাদপেতি; অত্তনা চ কামেসুমিচ্ছাচারা পটিৰিরতো হোতি, পরঞ্চ কামেসুমিচ্ছাচারা ৰেরমণিযা সমাদপেতি; অত্তনা চ মুসাৰাদা পটিৰিরতো হোতি, পরঞ্চ মুসাৰাদা ৰেরমণিযা সমাদপেতি; অত্তনা চ সুরামেরযমজ্জপমাদট্ঠানা পটিৰিরতো হোতি, পরঞ্চ সুরামেরযমজ্জপমাদট্ঠানা ৰেরমণিযা সমাদপেতি. অযং ৰুচ্চতি, ভিক্খৰে, সপ্পুরিসেন সপ্পুরিসতরো’’তি [পু. প. ১৩৫]. পঠমং.