(১২) ২. আযাচনৰগ্গো

১৩১. ‘‘সদ্ধো, ভিক্খৰে, ভিক্খু এৰং সম্মা আযাচমানো আযাচেয্য – ‘তাদিসো হোমি যাদিসা সারিপুত্তমোগ্গল্লানা’তি. এসা, ভিক্খৰে, তুলা এতং পমাণং মম সাৰকানং ভিক্খূনং যদিদং সারিপুত্তমোগ্গল্লানা’’তি.

১৩২. ‘‘সদ্ধা, ভিক্খৰে, ভিক্খুনী এৰং সম্মা আযাচমানা আযাচেয্য – ‘তাদিসী হোমি যাদিসী খেমা চ ভিক্খুনী উপ্পলৰণ্ণা চা’তি. এসা, ভিক্খৰে, তুলা এতং পমাণং মম সাৰিকানং ভিক্খুনীনং যদিদং খেমা চ ভিক্খুনী উপ্পলৰণ্ণা চা’’তি.

১৩৩. ‘‘সদ্ধো, ভিক্খৰে, উপাসকো এৰং সম্মা আযাচমানো আযাচেয্য – ‘তাদিসো হোমি যাদিসো চিত্তো চ গহপতি হত্থকো চ আল়ৰকো’তি. এসা, ভিক্খৰে, তুলা এতং পমাণং মম সাৰকানং উপাসকানং যদিদং চিত্তো চ গহপতি হত্থকো চ আল়ৰকো’’তি.

১৩৪. ‘‘সদ্ধা, ভিক্খৰে, উপাসিকা এৰং সম্মা আযাচমানা আযাচেয্য – ‘তাদিসী হোমি যাদিসী খুজ্জুত্তরা চ উপাসিকা ৰেল়ুকণ্ডকিযা [ৰেল়ুকণ্ডকী (অ. নি. ৬.৩৭; অ. নি. ৪.১৭৬ আগতং] চ নন্দমাতা’তি. এসা, ভিক্খৰে, তুলা এতং পমাণং মম সাৰিকানং উপাসিকানং যদিদং খুজ্জুত্তরা চ উপাসিকা ৰেল়ুকণ্ডকিযা চ নন্দমাতা’’তি.

১৩৫. ‘‘দ্ৰীহি, ভিক্খৰে, ধম্মেহি সমন্নাগতো বালো অব্যত্তো অসপ্পুরিসো খতং উপহতং অত্তানং পরিহরতি, সাৰজ্জো চ হোতি সানুৰজ্জো চ ৰিঞ্ঞূনং, বহুঞ্চ অপুঞ্ঞং পসৰতি. কতমেহি দ্ৰীহি? অননুৰিচ্চ অপরিযোগাহেত্ৰা অৰণ্ণারহস্স ৰণ্ণং ভাসতি, অননুৰিচ্চ অপরিযোগাহেত্ৰা ৰণ্ণারহস্স অৰণ্ণং ভাসতি. ইমেহি খো, ভিক্খৰে, দ্ৰীহি ধম্মেহি সমন্নাগতো বালো অব্যত্তো অসপ্পুরিসো খতং উপহতং অত্তানং পরিহরতি, সাৰজ্জো চ হোতি সানুৰজ্জো চ ৰিঞ্ঞূনং, বহুঞ্চ অপুঞ্ঞং পসৰতীতি.

‘‘দ্ৰীহি, ভিক্খৰে, ধম্মেহি সমন্নাগতো পণ্ডিতো ৰিযত্তো সপ্পুরিসো অক্খতং অনুপহতং অত্তানং পরিহরতি, অনৰজ্জো চ হোতি অননুৰজ্জো চ ৰিঞ্ঞূনং, বহুঞ্চ পুঞ্ঞং পসৰতি. কতমেহি দ্ৰীহি? অনুৰিচ্চ পরিযোগাহেত্ৰা অৰণ্ণারহস্স অৰণ্ণং ভাসতি, অনুৰিচ্চ পরিযোগাহেত্ৰা ৰণ্ণারহস্স ৰণ্ণং ভাসতি. ইমেহি খো, ভিক্খৰে, দ্ৰীহি ধম্মেহি সমন্নাগতো পণ্ডিতো ৰিযত্তো সপ্পুরিসো অক্খতং অনুপহতং অত্তানং পরিহরতি, অনৰজ্জো চ হোতি অননুৰজ্জো চ ৰিঞ্ঞূনং, বহুঞ্চ পুঞ্ঞং পসৰতী’’তি.

১৩৬. ‘‘দ্ৰীহি, ভিক্খৰে, ধম্মেহি সমন্নাগতো বালো অব্যত্তো অসপ্পুরিসো খতং উপহতং অত্তানং পরিহরতি, সাৰজ্জো চ হোতি সানুৰজ্জো চ ৰিঞ্ঞূনং, বহুঞ্চ অপুঞ্ঞং পসৰতি. কতমেহি দ্ৰীহি? অননুৰিচ্চ অপরিযোগাহেত্ৰা অপ্পসাদনীযে ঠানে পসাদং উপদংসেতি, অননুৰিচ্চ অপরিযোগাহেত্ৰা পসাদনীযে ঠানে অপ্পসাদং উপদংসেতি. ইমেহি খো, ভিক্খৰে, দ্ৰীহি ধম্মেহি সমন্নাগতো বালো অব্যত্তো অসপ্পুরিসো খতং উপহতং অত্তানং পরিহরতি, সাৰজ্জো চ হোতি সানুৰজ্জো চ ৰিঞ্ঞূনং, বহুঞ্চ অপুঞ্ঞং পসৰতীতি.

‘‘দ্ৰীহি, ভিক্খৰে, ধম্মেহি সমন্নাগতো পণ্ডিতো ৰিযত্তো সপ্পুরিসো অক্খতং অনুপহতং অত্তানং পরিহরতি, অনৰজ্জো চ হোতি অননুৰজ্জো চ ৰিঞ্ঞূনং, বহুঞ্চ পুঞ্ঞং পসৰতি. কতমেহি দ্ৰীহি? অনুৰিচ্চ পরিযোগাহেত্ৰা অপ্পসাদনীযে ঠানে অপ্পসাদং উপদংসেতি, অনুৰিচ্চ পরিযোগাহেত্ৰা পসাদনীযে ঠানে পসাদং উপদংসেতি. ইমেহি খো, ভিক্খৰে, দ্ৰীহি ধম্মেহি সমন্নাগতো পণ্ডিতো ৰিযত্তো সপ্পুরিসো অক্খতং অনুপহতং অত্তানং পরিহরতি, অনৰজ্জো চ হোতি অননুৰজ্জো চ ৰিঞ্ঞূনং, বহুঞ্চ পুঞ্ঞং পসৰতী’’তি.

১৩৭. ‘‘দ্ৰীসু, ভিক্খৰে, মিচ্ছাপটিপজ্জমানো বালো অব্যত্তো অসপ্পুরিসো খতং উপহতং অত্তানং পরিহরতি, সাৰজ্জো চ হোতি সানুৰজ্জো চ ৰিঞ্ঞূনং, বহুঞ্চ অপুঞ্ঞং পসৰতি. কতমেসু দ্ৰীসু? মাতরি চ পিতরি চ. ইমেসু খো, ভিক্খৰে, দ্ৰীসু মিচ্ছাপটিপজ্জমানো বালো অব্যত্তো অসপ্পুরিসো খতং উপহতং অত্তানং পরিহরতি, সাৰজ্জো চ হোতি সানুৰজ্জো চ ৰিঞ্ঞূনং, বহুঞ্চ অপুঞ্ঞং পসৰতীতি.

‘‘দ্ৰীসু, ভিক্খৰে, সম্মাপটিপজ্জমানো পণ্ডিতো ৰিযত্তো সপ্পুরিসো অক্খতং অনুপহতং অত্তানং পরিহরতি, অনৰজ্জো চ হোতি অননুৰজ্জো চ ৰিঞ্ঞূনং, বহুঞ্চ পুঞ্ঞং পসৰতি. কতমেসু দ্ৰীসু? মাতরি চ পিতরি চ. ইমেসু খো, ভিক্খৰে, দ্ৰীসু সম্মাপটিপজ্জমানো পণ্ডিতো ৰিযত্তো সপ্পুরিসো অক্খতং অনুপহতং অত্তানং পরিহরতি, অনৰজ্জো চ হোতি অননুৰজ্জো চ ৰিঞ্ঞূনং, বহুঞ্চ পুঞ্ঞং পসৰতী’’তি.

১৩৮. ‘‘দ্ৰীসু, ভিক্খৰে, মিচ্ছাপটিপজ্জমানো বালো অব্যত্তো অসপ্পুরিসো খতং উপহতং অত্তানং পরিহরতি, সাৰজ্জো চ হোতি সানুৰজ্জো চ ৰিঞ্ঞূনং, বহুঞ্চ অপুঞ্ঞং পসৰতি. কতমেসু দ্ৰীসু? তথাগতে চ তথাগতসাৰকে চ. ইমেসু খো, ভিক্খৰে, মিচ্ছাপটিপজ্জমানো বালো অব্যত্তো অসপ্পুরিসো খতং উপহতং অত্তানং পরিহরতি, সাৰজ্জো চ হোতি সানুৰজ্জো চ ৰিঞ্ঞূনং, বহুঞ্চ অপুঞ্ঞং পসৰতীতি.

‘‘দ্ৰীসু, ভিক্খৰে, সম্মাপটিপজ্জমানো পণ্ডিতো ৰিযত্তো সপ্পুরিসো অক্খতং অনুপহতং অত্তানং পরিহরতি, অনৰজ্জো চ হোতি অননুৰজ্জো চ ৰিঞ্ঞূনং, বহুঞ্চ পুঞ্ঞং পসৰতি. কতমেসু দ্ৰীসু? তথাগতে চ তথাগতসাৰকে চ. ইমেসু খো, ভিক্খৰে, দ্ৰীসু সম্মাপটিপজ্জমানো পণ্ডিতো ৰিযত্তো সপ্পুরিসো অক্খতং অনুপহতং অত্তানং পরিহরতি, অনৰজ্জো চ হোতি অননুৰজ্জো চ ৰিঞ্ঞূনং, বহুঞ্চ পুঞ্ঞং পসৰতী’’তি.

১৩৯. ‘‘দ্ৰেমে, ভিক্খৰে, ধম্মা. কতমে দ্ৰে? সচিত্তৰোদানঞ্চ ন চ কিঞ্চি লোকে উপাদিযতি. ইমে খো, ভিক্খৰে, দ্ৰে ধম্মা’’তি.

১৪০. ‘‘দ্ৰেমে, ভিক্খৰে, ধম্মা. কতমে দ্ৰে? কোধো চ উপনাহো চ. ইমে খো, ভিক্খৰে, দ্ৰে ধম্মা’’তি.

১৪১. ‘‘দ্ৰেমে, ভিক্খৰে, ধম্মা. কতমে দ্ৰে? কোধৰিনযো চ উপনাহৰিনযো চ. ইমে খো, ভিক্খৰে, দ্ৰে ধম্মা’’তি.

আযাচনৰগ্গো দুতিযো.