᭙. ᬦᬯᬓᬯᬵᬭᭀ

᭓᭒᭙. ᬦᬯ ᬆᬖᬵᬢᬯᬢ᭄ᬣᬹᬦᬶ. ᬦᬯ ᬆᬖᬵᬢᬧᬝᬶᬯᬶᬦᬬᬵ. ᬦᬯ ᬯᬶᬦᬷᬢᬯᬢ᭄ᬣᬹᬦᬶ. ᬦᬯ ᬧᬞᬫᬵᬧᬢ᭄ᬢᬶᬓᬵ. ᬦᬯᬳᬶ ᬲᬗ᭄ᬖᭀ ᬪᬶᬚ᭄ᬚᬢᬶ. ᬦᬯ ᬧᬡᬷᬢᬪᭀᬚᬦᬵᬦᬶ. ᬦᬯᬫᬂᬲᬾᬳᬶ ᬤᬸᬓ᭄ᬓᬝᬂ. ᬦᬯ ᬧᬵᬢᬶᬫᭀᬓ᭄ᬔᬸᬤ᭄ᬤᬾᬲᬵ. ᬦᬯ ᬧᬭᬫᬵᬦᬶ. ᬦᬯ ᬢᬡ᭄ᬳᬵᬫᬹᬮᬓᬵ ᬥᬫ᭄ᬫᬵ. ᬦᬯ ᬯᬶᬥᬫᬵᬦᬵ. ᬦᬯ ᬘᬷᬯᬭᬵᬦᬶ ᬅᬥᬶᬝ᭄ᬞᬵᬢᬩ᭄ᬩᬵᬦᬶ. ᬦᬯ ᬘᬷᬯᬭᬵᬦᬶ ᬦ ᬯᬶᬓᬧ᭄ᬧᬾᬢᬩ᭄ᬩᬵᬦᬶ. ᬤᬷᬖᬲᭀ ᬦᬯ ᬯᬶᬤᬢ᭄ᬣᬶᬬᭀ ᬲᬸᬕᬢᬯᬶᬤᬢ᭄ᬣᬶᬬᬵ. ᬦᬯ ᬅᬥᬫ᭄ᬫᬶᬓᬵᬦᬶ ᬤᬵᬦᬵᬦᬶ. ᬦᬯ ᬅᬥᬫ᭄ᬫᬶᬓᬵ ᬧᬝᬶᬕ᭄ᬕᬳᬵ. ᬦᬯ ᬅᬥᬫ᭄ᬫᬶᬓᬵ ᬧᬭᬶᬪᭀᬕᬵ – ᬢᬷᬡᬶ ᬥᬫ᭄ᬫᬶᬓᬵᬦᬶ ᬤᬵᬦᬵᬦᬶ, ᬢᬬᭀ ᬥᬫ᭄ᬫᬶᬓᬵ ᬧᬝᬶᬕ᭄ᬕᬳᬵ, ᬢᬬᭀ ᬥᬫ᭄ᬫᬶᬓᬵ ᬧᬭᬶᬪᭀᬕᬵ. ᬦᬯ ᬅᬥᬫ᭄ᬫᬶᬓᬵ ᬲᬜ᭄ᬜᬢ᭄ᬢᬶᬬᭀ [ᬧᬜ᭄ᬜᬢ᭄ᬢᬶᬬᭀ (ᬲᬩ᭄ᬩᬢ᭄ᬣ) ᬅᬝ᭄ᬞᬓᬣᬵ ᬘ ᬲᬫᬣᬓ᭄ᬔᬦ᭄ᬥᬓᬾ ᬓᬡ᭄ᬳᬧᬓ᭄ᬔᬦᬯᬓᬜ᭄ᬘ ᬑᬮᭀᬓᬾᬢᬩ᭄ᬩᬂ]. ᬦᬯ ᬥᬫ᭄ᬫᬶᬓᬵ ᬲᬜ᭄ᬜᬢ᭄ᬢᬶᬬᭀ. ᬅᬥᬫ᭄ᬫᬓᬫ᭄ᬫᬾ ᬤ᭄ᬯᬾ ᬦᬯᬓᬵᬦᬶ. ᬥᬫ᭄ᬫᬓᬫ᭄ᬫᬾ ᬤ᭄ᬯᬾ ᬦᬯᬓᬵᬦᬶ. ᬦᬯ ᬅᬥᬫ᭄ᬫᬶᬓᬵᬦᬶ ᬧᬵᬢᬶᬫᭀᬓ᭄ᬔᬝ᭄ᬞᬧᬦᬵᬦᬶ. ᬦᬯ ᬥᬫ᭄ᬫᬶᬓᬵᬦᬶ ᬧᬵᬢᬶᬫᭀᬓ᭄ᬔᬝ᭄ᬞᬧᬦᬵᬦᬷᬢᬶ.

ᬦᬯᬓᬂ ᬦᬶᬝ᭄ᬞᬶᬢᬂ.

ᬢᬲ᭄ᬲᬸᬤ᭄ᬤᬵᬦᬂ –

ᬆᬖᬵᬢᬯᬢ᭄ᬣᬸᬯᬶᬦᬬᬵ, ᬯᬶᬦᬷᬢᬵ ᬧᬞᬫᬾᬦ ᬘ;

ᬪᬶᬚ᭄ᬚᬢᬶ ᬘ ᬧᬡᬷᬢᬜ᭄ᬘ, ᬫᬂᬲᬸᬤ᭄ᬤᬾᬲᬧᬭᬫᬵᬦᬶ ᬘ.

ᬢᬡ᭄ᬳᬵ ᬫᬵᬦᬵ ᬅᬥᬶᬝ᭄ᬞᬵᬦᬵ, ᬯᬶᬓᬧ᭄ᬧᬾ ᬘ ᬯᬶᬤᬢ᭄ᬣᬶᬬᭀ;

ᬤᬵᬦᬵ ᬧᬝᬶᬕ᭄ᬕᬳᬵ ᬪᭀᬕᬵ, ᬢᬶᬯᬶᬥᬵ ᬧᬸᬦ ᬥᬫ᭄ᬫᬶᬓᬵ.

ᬅᬥᬫ᭄ᬫᬥᬫ᭄ᬫᬲᬜ᭄ᬜᬢ᭄ᬢᬶ, ᬤᬸᬯᬾ ᬤ᭄ᬯᬾ ᬦᬯᬓᬵᬦᬶ ᬘ;

ᬧᬵᬢᬶᬫᭀᬓ᭄ᬔᬝ᭄ᬞᬧᬦᬵᬦᬶ, ᬅᬥᬫ᭄ᬫᬥᬫ᭄ᬫᬶᬓᬵᬦᬶ ᬘᬵᬢᬶ.