᭔᭘. ᬲᬦ᭄ᬢᭀᬲᬦᬶᬤ᭄ᬤᬾᬲᬯᬡ᭄ᬡᬦᬵ

᭔᭕᭙. ‘‘ᬘᬢ᭄ᬢᬵᬭᬶᬫᬵᬦᬶ, ᬪᬶᬓ᭄ᬔᬯᬾ, ᬅᬧ᭄ᬧᬵᬦᬶ ᬘᬾᬯ ᬲᬸᬮᬪᬵᬦᬶ ᬘ, ᬢᬵᬦᬶ ᬘ ᬅᬦᬯᬚ᭄ᬚᬵᬦᬶ. ᬓᬢᬫᬵᬦᬶ ᬘᬢ᭄ᬢᬵᬭᬶ? ᬧᬂᬲᬸᬓᬹᬮᬂ, ᬪᬶᬓ᭄ᬔᬯᬾ, ᬘᬷᬯᬭᬵᬦᬂ ᬅᬧ᭄ᬧᬜ᭄ᬘ ᬲᬸᬮᬪᬜ᭄ᬘ, ᬢᬜ᭄ᬘ ᬅᬦᬯᬚ᭄ᬚᬂ. ᬧᬶᬡ᭄ᬟᬶᬬᬵᬮᭀᬧᭀ, ᬪᬶᬓ᭄ᬔᬯᬾ, ᬪᭀᬚᬦᬵᬦᬂ ᬅᬧ᭄ᬧᬜ᭄ᬘ ᬲᬸᬮᬪᬜ᭄ᬘ, ᬢᬜ᭄ᬘ ᬅᬦᬯᬚ᭄ᬚᬂ. ᬭᬸᬓ᭄ᬔᬫᬹᬮᬂ, ᬪᬶᬓ᭄ᬔᬯᬾ, ᬲᬾᬦᬵᬲᬦᬵᬦᬂ ᬅᬧ᭄ᬧᬜ᭄ᬘ ᬲᬸᬮᬪᬜ᭄ᬘ, ᬢᬜ᭄ᬘ ᬅᬦᬯᬚ᭄ᬚᬂ. ᬧᬹᬢᬶᬫᬸᬢ᭄ᬢᬪᬾᬲᬚ᭄ᬚᬂ, ᬪᬶᬓ᭄ᬔᬯᬾ, ᬪᬾᬲᬚ᭄ᬚᬵᬦᬂ ᬅᬧ᭄ᬧᬜ᭄ᬘ ᬲᬸᬮᬪᬜ᭄ᬘ, ᬢᬜ᭄ᬘ ᬅᬦᬯᬚ᭄ᬚᬂ. ᬇᬫᬵᬦᬶ ᬔᭀ, ᬪᬶᬓ᭄ᬔᬯᬾ, ᬘᬢ᭄ᬢᬵᬭᬶ ᬅᬧ᭄ᬧᬵᬦᬶ ᬘᬾᬯ ᬲᬸᬮᬪᬵᬦᬶ ᬘ, ᬢᬵᬦᬶ ᬘ ᬅᬦᬯᬚ᭄ᬚᬵᬦᬷ’’ᬢᬶ (ᬅ. ᬦᬶ. ᭔.᭒᭗; ᬇᬢᬶᬯᬸ. ᭑᭐᭑) ᬯᬘᬦᬢᭀ ‘‘ᬅᬧ᭄ᬧᬾᬦᬵ’’ᬢᬶᬆᬤᬶ ᬯᬸᬢ᭄ᬢᬂ.

ᬲᬦ᭄ᬢᬸᬝ᭄ᬞᭀᬢᬶ ᬏᬢ᭄ᬣ ᬬᬣᬵᬮᬵᬪᬬᬣᬵᬩᬮᬬᬣᬵᬲᬵᬭᬸᬧ᭄ᬧᬲᬦ᭄ᬢᭀᬲᬵᬦᬂ ᬯᬲᬾᬦ ᬏᬓᬾᬓᬲ᭄ᬫᬶᬂ ᬧᬘ᭄ᬘᬬᬾ ᬢᬬᭀ ᬢᬬᭀ ᬓᬢ᭄ᬯᬵ ᬘᬢᬹᬲᬸ ᬧᬘ᭄ᬘᬬᬾᬲᬸ ᬤ᭄ᬯᬵᬤᬲ ᬲᬦ᭄ᬢᭀᬲᬵ ᬳᭀᬦ᭄ᬢᬶ. ᬫᬢ᭄ᬢᬜ᭄ᬜᬹᬢᬶ ᬏᬢ᭄ᬣ (ᬫ. ᬦᬶ. ᬅᬝ᭄ᬞ. ᭑.᭔᭒᭒; ᬲᬂ. ᬦᬶ. ᬅᬝ᭄ᬞ. ᭓.᭔.᭒᭓᭙; ᬅ. ᬦᬶ. ᬅᬝ᭄ᬞ. ᭒.᭓.᭑᭖; ᬇᬢᬶᬯᬸ. ᬅᬝ᭄ᬞ. ᭒᭘; ᬥ. ᬲ. ᬅᬝ᭄ᬞ. ᭑᭒᭔-᭑᭓᭔) ᬘᬢ᭄ᬢᬵᬭᭀ ᬫᬢ᭄ᬢᬵ ᬧᬭᬶᬬᬾᬲᬦᬫᬢ᭄ᬢᬵ ᬧᬝᬶᬕ᭄ᬕᬳᬡᬫᬢ᭄ᬢᬵ ᬧᬭᬶᬪᭀᬕᬫᬢ᭄ᬢᬵ ᬯᬶᬲ᭄ᬲᬚ᭄ᬚᬦᬫᬢ᭄ᬢᬵᬢᬶ. ᬇᬢᬭᬷᬢᬭᬾᬦ ᬬᬵᬧᬾᬦ᭄ᬢᭀ ᬲᬸᬪᬭᭀ ᬦᬵᬫ. ᬲᬦ᭄ᬢᭀᬲᬯᬶᬦᬶᬘ᭄ᬙᬬᭀ.

ᬲᬦ᭄ᬢᭀᬲᬦᬶᬤ᭄ᬤᬾᬲᬯᬡ᭄ᬡᬦᬵ ᬦᬶᬝ᭄ᬞᬶᬢᬵ.