᭙. ᬙᬢ᭄ᬢᬸᬧᬵᬳᬦᬯᬕ᭄ᬕᭀ

᭑-᭒. ᬙᬢ᭄ᬢᬸᬧᬵᬳᬦᬵᬤᬶᬲᬶᬓ᭄ᬔᬵᬧᬤᬯᬡ᭄ᬡᬦᬵ

ᬯᬸᬢ᭄ᬢᬮᬓ᭄ᬔᬡᬂ ᬙᬢ᭄ᬢᬦ᭄ᬢᬶ ‘‘ᬙᬢ᭄ᬢᬂ ᬦᬵᬫ ᬢᬷᬡᬶ ᬙᬢ᭄ᬢᬵᬦᬶ – ᬲᬾᬢᬘ᭄ᬙᬢ᭄ᬢᬂ, ᬓᬶᬮᬜ᭄ᬚᬘ᭄ᬙᬢ᭄ᬢᬂ, ᬧᬡ᭄ᬡᬘ᭄ᬙᬢ᭄ᬢᬂ ᬫᬡ᭄ᬟᬮᬩᬤ᭄ᬥᬂ, ᬲᬮᬵᬓᬩᬤ᭄ᬥ’’ᬦ᭄ᬢᬶ (ᬧᬵᬘᬶ. ᭑᭑᭘᭑) ᬏᬯᬂ ᬧᬤᬪᬵᬚᬦᬾ ᬯᬸᬢ᭄ᬢᬮᬓ᭄ᬔᬡᬂ ᬙᬢ᭄ᬢᬂ. ᬢᬵᬤᬶᬲᬂ ᬞᬵᬦᬂ ᬧᬢ᭄ᬯᬵᬢᬶ ᬕᬘ᭄ᬙᬓᬤ᭄ᬤᬫᬵᬤᬷᬲᬸ ᬢᬂ ᬢᬂ ᬞᬵᬦᬂ ᬧᬢ᭄ᬯᬵ.

ᬙᬢ᭄ᬢᬲ᭄ᬲᬾᬯᬵᬢᬶ ᬓᬤ᭄ᬤᬫᬵᬤᬷᬦᬶ ᬧᬢ᭄ᬯᬵ ᬉᬧᬵᬳᬦᬵ ᬑᬫᬸᬜ᭄ᬘᬶᬢ᭄ᬯᬵ ᬙᬢ᭄ᬢᬲ᭄ᬲᬾᬯ ᬥᬵᬭᬡᬂ. ᬉᬧᬵᬳᬦᬵᬦᬂᬬᬾᬯ ᬯᬵᬢᬶ ᬕᬘ᭄ᬙᬵᬤᬷᬦᬶ ᬤᬶᬲ᭄ᬯᬵ ᬙᬢ᭄ᬢᬂ ᬅᬧᬦᬵᬫᬾᬢ᭄ᬯᬵ ᬉᬧᬵᬳᬦᬵᬦᬂᬬᬾᬯ ᬥᬵᬭᬡᬂ.

ᬤᬸᬢᬶᬬᬂ ᬉᬢ᭄ᬢᬵᬦᬢ᭄ᬣᬫᬾᬯ.

ᬙᬢ᭄ᬢᬸᬧᬵᬳᬦᬵᬤᬶᬲᬶᬓ᭄ᬔᬵᬧᬤᬯᬡ᭄ᬡᬦᬵ ᬦᬶᬝ᭄ᬞᬶᬢᬵ.

᭓-᭕. ᬲᬗ᭄ᬖᬵᬡᬶᬆᬤᬶᬲᬶᬓ᭄ᬔᬵᬧᬤᬯᬡ᭄ᬡᬦᬵ

ᬲᬗ᭄ᬖᬵᬡᬶᬦ᭄ᬢᬶ ᬓᬝᬶᬬᬂ ᬅᬦᬸᬪᬯᬶᬢᬩ᭄ᬩᬂ ᬆᬪᬭᬡᬂ. ᬢᬾᬦᬵᬳ ‘‘ᬬᬂ ᬓᬶᬜ᭄ᬘᬶ ᬓᬝᬹᬧᬕ’’ᬦ᭄ᬢᬶ.

ᬘᬢᬸᬢ᭄ᬣᬧᬜ᭄ᬘᬫᬵᬦᬶ ᬉᬢ᭄ᬢᬵᬦᬢ᭄ᬣᬵᬦᬾᬯ.

ᬲᬗ᭄ᬖᬵᬡᬶᬆᬤᬶᬲᬶᬓ᭄ᬔᬵᬧᬤᬯᬡ᭄ᬡᬦᬵ ᬦᬶᬝ᭄ᬞᬶᬢᬵ.

᭖. ᬯᬵᬲᬶᬢᬓᬲᬶᬓ᭄ᬔᬵᬧᬤᬯᬡ᭄ᬡᬦᬵ

ᬕᬦ᭄ᬥᬯᬵᬲᬶᬢᬓᬾᬦᬵᬢᬶ ᬕᬦ᭄ᬥᬧᬭᬶᬪᬵᬯᬶᬢᬾᬦ.

ᬯᬵᬲᬶᬢᬓᬲᬶᬓ᭄ᬔᬵᬧᬤᬯᬡ᭄ᬡᬦᬵ ᬦᬶᬝ᭄ᬞᬶᬢᬵ.

᭗-᭑᭐. ᬪᬶᬓ᭄ᬔᬸᬦᬶᬉᬫ᭄ᬫᬤ᭄ᬤᬵᬧᬦᬵᬤᬶᬲᬶᬓ᭄ᬔᬵᬧᬤᬯᬡ᭄ᬡᬦᬵ

ᬕᬶᬮᬵᬦᬵᬬᬵᬢᬶ (ᬧᬵᬘᬶ. ᬅᬝ᭄ᬞ. ᭑᭒᭐᭘) ᬅᬦ᭄ᬢᬫᬲᭀ ᬫᬕ᭄ᬕᬕᬫᬦᬧᬭᬶᬲ᭄ᬲᬫᬾᬦᬵᬧᬶ ᬆᬩᬵᬥᬶᬓᬵᬬ. ᬆᬧᬤᬵᬲᬹᬢᬶ ᬘᭀᬭᬪᬬᬵᬤᬶᬦᬵ ᬲᬭᬷᬭᬓᬫ᭄ᬧᬦᬵᬤᬷᬲᬸ.

ᬅᬝ᭄ᬞᬫᬦᬯᬫᬤᬲᬫᬾᬲᬸ ᬓᬶᬜ᭄ᬘᬶ ᬯᬢ᭄ᬢᬩ᭄ᬩᬂ ᬦᬢ᭄ᬣᬶ.

ᬪᬶᬓ᭄ᬔᬸᬦᬶᬉᬫ᭄ᬫᬤ᭄ᬤᬵᬧᬦᬵᬤᬶᬲᬶᬓ᭄ᬔᬵᬧᬤᬯᬡ᭄ᬡᬦᬵ ᬦᬶᬝ᭄ᬞᬶᬢᬵ.

᭑᭑. ᬅᬦᬵᬧᬸᬘ᭄ᬙᬵᬲᬶᬓ᭄ᬔᬵᬧᬤᬯᬡ᭄ᬡᬦᬵ

ᬉᬧᬘᬵᬭᬂ ᬲᬦ᭄ᬥᬵᬬᬵᬢᬶ ᬲᬫᬦ᭄ᬢᬵ ᬤ᭄ᬯᬵᬤᬲᬳᬢ᭄ᬣᬹᬧᬘᬵᬭᬂ ᬲᬦ᭄ᬥᬵᬬ.

ᬅᬦᬵᬧᬸᬘ᭄ᬙᬵᬲᬶᬓ᭄ᬔᬵᬧᬤᬯᬡ᭄ᬡᬦᬵ ᬦᬶᬝ᭄ᬞᬶᬢᬵ.

᭑᭒. ᬧᬜ᭄ᬳᬵᬧᬸᬘ᭄ᬙᬦᬲᬶᬓ᭄ᬔᬵᬧᬤᬯᬡ᭄ᬡᬦᬵ

ᬅᬦᭀᬤᬶᬲ᭄ᬲᬵᬢᬶ ‘‘ᬅᬫᬸᬓᬲ᭄ᬫᬶᬂ ᬦᬵᬫ ᬞᬵᬦᬾ ᬧᬸᬘ᭄ᬙᬵᬫᬷ’’ᬢᬶ ᬏᬯᬂ ᬅᬦᬶᬬᬫᬾᬢ᭄ᬯᬵ ᬓᬾᬯᬮᬂ ‘‘ᬧᬸᬘ᭄ᬙᬶᬢᬩ᭄ᬩᬂ ᬅᬢ᭄ᬣᬶ, ᬧᬸᬘ᭄ᬙᬵᬫᬶ, ᬅᬬ᭄ᬬᬵ’’ᬢᬶ ᬏᬯᬂ ᬯᬢ᭄ᬯᬵ.

ᬧᬜ᭄ᬳᬵᬧᬸᬘ᭄ᬙᬦᬲᬶᬓ᭄ᬔᬵᬧᬤᬯᬡ᭄ᬡᬦᬵ ᬦᬶᬝ᭄ᬞᬶᬢᬵ.

᭑᭓. ᬅᬲᬂᬓᬘ᭄ᬘᬶᬓᬲᬶᬓ᭄ᬔᬵᬧᬤᬯᬡ᭄ᬡᬦᬵ

ᬧᬭᬶᬓ᭄ᬔᬶᬢ᭄ᬢᬲ᭄ᬲ ᬕᬵᬫᬲ᭄ᬲ ᬧᬭᬶᬓ᭄ᬔᬾᬧᬂ, ᬅᬧᬭᬶᬓ᭄ᬔᬶᬢ᭄ᬢᬲ᭄ᬲ ᬉᬧᬘᬵᬭᬂ ᬅᬢᬶᬓ᭄ᬓᬫᬦ᭄ᬢᬶᬬᬵ ᬯᬵ ᬑᬓ᭄ᬓᬫᬦ᭄ᬢᬶᬬᬵ ᬯᬵᬢᬶ ᬏᬢ᭄ᬣ ᬧᬭᬶᬓ᭄ᬔᬶᬢ᭄ᬢᬲ᭄ᬲ ᬕᬵᬫᬲ᭄ᬲ ᬧᬭᬶᬓ᭄ᬔᬾᬧᬂ ᬅᬢᬶᬓ᭄ᬓᬫᬦ᭄ᬢᬶᬬᬵ ᬯᬵ ᬅᬧᬭᬶᬓ᭄ᬔᬶᬢ᭄ᬢᬲ᭄ᬲ ᬕᬵᬫᬲ᭄ᬲ ᬉᬧᬘᬵᬭᬂ ᬑᬓ᭄ᬓᬫᬦ᭄ᬢᬶᬬᬵ ᬯᬵᬢᬶ ᬬᬣᬵᬓ᭄ᬓᬫᬂ ᬲᬫ᭄ᬩᬦ᭄ᬥᭀ ᬯᬾᬤᬶᬢᬩ᭄ᬩᭀ. ᬆᬧᬤᬵᬲᬹᬢᬶ ᬫᬳᬕ᭄ᬖᬂ ᬲᬂᬓᬘ᭄ᬘᬶᬓᬂ ᬧᬵᬭᬸᬧᬶᬢ᭄ᬯᬵ ᬕᬘ᭄ᬙᬦ᭄ᬢᬶᬬᬵ ᬉᬧᬤ᭄ᬤᬯᭀ ᬉᬧ᭄ᬧᬚ᭄ᬚᬢᬶ, ᬏᬯᬭᬹᬧᬵᬲᬸ ᬆᬧᬤᬵᬲᬸ.

ᬅᬲᬂᬓᬘ᭄ᬘᬶᬓᬲᬶᬓ᭄ᬔᬵᬧᬤᬯᬡ᭄ᬡᬦᬵ ᬦᬶᬝ᭄ᬞᬶᬢᬵ.

ᬙᬢ᭄ᬢᬸᬧᬵᬳᬦᬯᬕ᭄ᬕᭀ ᬦᬯᬫᭀ.

ᬇᬢᬶ ᬓᬗ᭄ᬔᬵᬯᬶᬢᬭᬡᬶᬬᬵ ᬧᬵᬢᬶᬫᭀᬓ᭄ᬔᬯᬡ᭄ᬡᬦᬵᬬ

ᬯᬶᬦᬬᬢ᭄ᬣᬫᬜ᭄ᬚᬹᬲᬵᬬᬂ ᬮᬷᬦᬢ᭄ᬣᬧ᭄ᬧᬓᬵᬲᬦᬶᬬᬂ

ᬪᬶᬓ᭄ᬔᬸᬦᬶᬧᬵᬢᬶᬫᭀᬓ᭄ᬔᬾ ᬧᬵᬘᬶᬢ᭄ᬢᬶᬬᬯᬡ᭄ᬡᬦᬵ ᬦᬶᬝ᭄ᬞᬶᬢᬵ.

ᬅᬲᬵᬥᬵᬭᬡᬲᬫᬸᬝ᭄ᬞᬵᬦᬯᬡ᭄ᬡᬦᬵ

ᬅᬘᬶᬢ᭄ᬢᬓᬵᬦᬷᬢᬶ (ᬲᬵᬭᬢ᭄ᬣ. ᬝᬷ. ᬧᬵᬘᬶᬢ᭄ᬢᬶᬬ ᭓.᭑᭒᭑᭔) ‘‘ᬦᬘ᭄ᬘ’’ᬦ᭄ᬢᬶᬆᬤᬶᬦᬵ ᬅᬚᬵᬦᬶᬢ᭄ᬯᬵ ᬤᬲ᭄ᬲᬦᬵᬤᬶᬂ ᬓᬭᭀᬦ᭄ᬢᬶᬬᬵ ᬆᬧᬢ᭄ᬢᬶᬲᬫ᭄ᬪᬯᬢᭀ ᬯᬢ᭄ᬣᬸᬅᬚᬵᬦᬦᬘᬶᬢ᭄ᬢᬾᬦ ᬅᬘᬶᬢ᭄ᬢᬓᬵᬦᬶ. ᬮᭀᬓᬯᬚ᭄ᬚᬵᬦᬷᬢᬶ ‘‘ᬦᬘ᭄ᬘ’’ᬦ᭄ᬢᬶᬆᬤᬶᬦᬵ ᬚᬵᬦᬶᬢ᭄ᬯᬵ ᬤᬲ᭄ᬲᬦᬵᬤᬶᬂ ᬓᬭᭀᬦ᭄ᬢᬶᬬᬵ ᬅᬓᬸᬲᬮᬾᬦᬾᬯ ᬆᬧᬚ᭄ᬚᬦᬢᭀ ᬮᭀᬓᬯᬚ᭄ᬚᬵᬦᬶ. ᬢᬾᬦᬵᬳ ‘‘ᬅᬬᬂ ᬧᬦᬾᬢ᭄ᬣ ᬅᬥᬶᬧ᭄ᬧᬵᬬᭀ’’ᬢᬶᬆᬤᬶ ᬲᬘᬶᬢ᭄ᬢᬓᬵᬦᬷᬢᬶ ‘‘ᬘᭀᬭᬷ’’ᬢᬶᬆᬤᬶᬦᬵ ᬯᬢ᭄ᬣᬸᬂ ᬚᬵᬦᬶᬢ᭄ᬯᬵ ᬓᬭᬡᬾᬬᬾᬯ ᬆᬧᬢ᭄ᬢᬶᬲᬫ᭄ᬪᬯᬢᭀ ᬲᬘᬶᬢ᭄ᬢᬓᬵᬦᬶ. ᬉᬧᬲᬫ᭄ᬧᬤᬵᬤᬷᬦᬂ ᬏᬓᬦ᭄ᬢᬵᬓᬸᬲᬮᬘᬶᬢ᭄ᬢᬾᬦᬾᬯ ᬅᬓᬢ᭄ᬢᬩ᭄ᬩᬢ᭄ᬢᬵ ᬧᬡ᭄ᬡᬢ᭄ᬢᬶᬯᬚ᭄ᬚᬵᬦᬶ. ‘‘ᬇᬥ ᬲᬘᬶᬢ᭄ᬢᬓᬵᬘᬶᬢ᭄ᬢᬓᬢᬵ ᬧᬡ᭄ᬡᬢ᭄ᬢᬶᬚᬵᬦᬦᬵᬚᬵᬦᬦᬢᬵᬬ ᬅᬕ᭄ᬕᬳᬾᬝ᭄ᬞᬵ ᬯᬢ᭄ᬣᬸᬚᬵᬦᬦᬵᬚᬵᬦᬦᬢᬵᬬ ᬕᬳᬾᬢᬩ᭄ᬩ’’ᬦ᭄ᬢᬶ ᬯᬤᬦ᭄ᬢᬶ.

ᬅᬲᬵᬥᬵᬭᬡᬲᬫᬸᬝ᭄ᬞᬵᬦᬯᬡ᭄ᬡᬦᬵ ᬦᬶᬝ᭄ᬞᬶᬢᬵ.