᭗. ᬆᬯᬲᬣᬘᬷᬯᬭᬲᬶᬓ᭄ᬔᬵᬧᬤᬯᬡ᭄ᬡᬦᬵ
ᬲᬢ᭄ᬢᬫᬾ ᬆᬯᬲᬣᬘᬷᬯᬭᬦ᭄ᬢᬶ ‘‘ᬉᬢᬸᬦᬶᬬᭀ ᬪᬶᬓ᭄ᬔᬸᬦᬶᬬᭀ ᬧᬭᬶᬪᬸᬜ᭄ᬚᬦ᭄ᬢᬹ’’ᬢᬶ ᬤᬶᬦ᭄ᬦᬘᬷᬯᬭᬂ. ᬅᬦᬶᬲ᭄ᬲᬚ᭄ᬚᬶᬢ᭄ᬯᬵᬢᬶ ᬘᬢᬸᬢ᭄ᬣᬾ ᬤᬶᬯᬲᬾ ᬥᭀᬯᬶᬢ᭄ᬯᬵ ᬅᬜ᭄ᬜᬶᬲ᭄ᬲᬵ ᬅᬦ᭄ᬢᬫᬲᭀ ᬲᬵᬫᬡᬾᬭᬶᬬᬵᬧᬶ ᬉᬢᬸᬦᬶᬬᬵ ᬅᬤᬢ᭄ᬯᬵ. ᬧᬵᬘᬶᬢ᭄ᬢᬶᬬᬦ᭄ᬢᬶ ᬏᬯᬂ ᬅᬦᬶᬲ᭄ᬲᬚ᭄ᬚᬶᬢ᭄ᬯᬵ ᬧᬭᬶᬪᬸᬜ᭄ᬚᬦ᭄ᬢᬶᬬᬵ ᬧᬵᬘᬶᬢ᭄ᬢᬶᬬᬂ.
ᬲᬵᬯᬢ᭄ᬣᬶᬬᬂ ᬣᬸᬮ᭄ᬮᬦᬦ᭄ᬤᬂ ᬆᬭᬩ᭄ᬪ ᬆᬯᬲᬣᬘᬷᬯᬭᬂ ᬅᬦᬶᬲ᭄ᬲᬚ᭄ᬚᬶᬢ᭄ᬯᬵ ᬧᬭᬶᬪᬸᬜ᭄ᬚᬦᬯᬢ᭄ᬣᬸᬲ᭄ᬫᬶᬂ ᬧᬜ᭄ᬜᬢ᭄ᬢᬂ, ᬢᬶᬓᬧᬵᬘᬶᬢ᭄ᬢᬶᬬᬂ, ᬦᬶᬲ᭄ᬲᬚ᭄ᬚᬶᬢᬾ ᬤ᭄ᬯᬶᬓᬤᬸᬓ᭄ᬓᬝᬂ. ᬢᬲ᭄ᬫᬶᬂ ᬧᬦ ᬦᬶᬲ᭄ᬲᬚ᭄ᬚᬶᬢᬲᬜ᭄ᬜᬵᬬ, ᬧᬸᬦ ᬧᬭᬶᬬᬵᬬᬾᬦ ᬯᬵ, ᬅᬜ᭄ᬜᬵᬲᬂ ᬉᬢᬸᬦᬷᬦᬂ ᬅᬪᬵᬯᬾᬦ ᬯᬵ, ᬅᬘ᭄ᬙᬶᬦ᭄ᬦᬦᬝ᭄ᬞᬘᬷᬯᬭᬶᬓᬵᬬ ᬯᬵ, ᬆᬧᬤᬵᬲᬸ ᬯᬵ ᬧᬭᬶᬪᬸᬜ᭄ᬚᬦ᭄ᬢᬶᬬᬵ, ᬉᬫ᭄ᬫᬢ᭄ᬢᬶᬓᬵᬤᬷᬦᬜ᭄ᬘ ᬅᬦᬵᬧᬢ᭄ᬢᬶ. ᬆᬯᬲᬣᬘᬷᬯᬭᬢᬵ, ᬘᬢᬸᬢ᭄ᬣᬤᬶᬯᬲᬢᬵ, ᬥᭀᬯᬶᬢ᭄ᬯᬵ ᬅᬦᬶᬲ᭄ᬲᬚ᭄ᬚᬦᬂ, ᬅᬦᬸᬜ᭄ᬜᬵᬢᬓᬵᬭᬡᬵᬪᬵᬯᭀᬢᬶ ᬇᬫᬵᬦᬾᬢ᭄ᬣ ᬘᬢ᭄ᬢᬵᬭᬶ ᬅᬗ᭄ᬕᬵᬦᬶ. ᬲᬫᬸᬝ᭄ᬞᬵᬦᬵᬤᬷᬦᬶ ᬓᬣᬶᬦᬲᬤᬶᬲᬵᬦᬶ, ᬇᬤᬂ ᬧᬦ ᬓᬶᬭᬶᬬᬵᬓᬶᬭᬶᬬᬦ᭄ᬢᬶ.
ᬆᬯᬲᬣᬘᬷᬯᬭᬲᬶᬓ᭄ᬔᬵᬧᬤᬯᬡ᭄ᬡᬦᬵ ᬦᬶᬝ᭄ᬞᬶᬢᬵ.