᭙-᭑᭐. ᬧᬞᬫᬓᬣᬵᬯᬢ᭄ᬣᬸᬲᬸᬢ᭄ᬢᬵᬤᬶᬯᬡ᭄ᬡᬦᬵ

᭖᭙-᭗᭐. ᬦᬯᬫᬾ (ᬤᬷ. ᬦᬶ. ᬝᬷ. ᭑.᭑᭗; ᬤᬷ. ᬦᬶ. ᬅᬪᬶ. ᬝᬷ. ᭑.᭑᭗; ᬲᬂ. ᬦᬶ. ᬝᬷ. ᭒.᭕.᭑᭐᭘᭐) ᬤᬸᬕ᭄ᬕᬢᬶᬢᭀ ᬲᬂᬲᬵᬭᬢᭀ ᬘ ᬦᬶᬬ᭄ᬬᬵᬢᬶ ᬏᬢᬾᬦᬵᬢᬶ ᬦᬶᬬ᭄ᬬᬵᬦᬂ, ᬲᬕ᭄ᬕᬫᬕ᭄ᬕᭀ, ᬫᭀᬓ᭄ᬔᬫᬕ᭄ᬕᭀ ᬘ. ᬢᬂ ᬦᬶᬬ᭄ᬬᬵᬦᬂ ᬅᬭᬳᬢᬶ, ᬦᬶᬬ᭄ᬬᬵᬦᬾ ᬯᬵ ᬦᬶᬬᬸᬢ᭄ᬢᬵ, ᬦᬶᬬ᭄ᬬᬵᬦᬂ ᬯᬵ ᬨᬮᬪᬹᬢᬂ ᬏᬢᬶᬲ᭄ᬲᬵ ᬅᬢ᭄ᬣᬷᬢᬶ ᬦᬶᬬ᭄ᬬᬵᬦᬶᬓᬵ. ᬯᬘᬷᬤᬸᬘ᭄ᬘᬭᬶᬢᬲᬂᬓᬶᬮᬾᬲᬢᭀ ᬦᬶᬬ᭄ᬬᬵᬢᬷᬢᬶ ᬯᬵ ᬈᬓᬵᬭᬲ᭄ᬲ ᬭᬲ᭄ᬲᬢ᭄ᬢᬂ, ᬬᬓᬵᬭᬲ᭄ᬲ ᬘ ᬓᬓᬵᬭᬂ ᬓᬢ᭄ᬯᬵ ᬦᬶᬬ᭄ᬬᬵᬦᬶᬓᬵ, ᬘᬾᬢᬦᬵᬬ ᬲᬤ᭄ᬥᬶᬂ ᬲᬫ᭄ᬨᬧ᭄ᬧᬮᬵᬧᬵ ᬯᬾᬭᬫᬡᬶ. ᬢᬧ᭄ᬧᬝᬶᬧᬓ᭄ᬔᬢᭀ ᬅᬦᬶᬬ᭄ᬬᬵᬦᬶᬓᬵ, ᬢᬲ᭄ᬲᬵ ᬪᬵᬯᭀ ᬅᬦᬶᬬ᭄ᬬᬵᬦᬶᬓᬢ᭄ᬢᬂ, ᬢᬲ᭄ᬫᬵ ᬅᬦᬶᬬ᭄ᬬᬵᬦᬶᬓᬢ᭄ᬢᬵ. ᬢᬶᬭᬘ᭄ᬙᬵᬦᬪᬹᬢᬦ᭄ᬢᬶ ᬢᬶᬭᭀᬓᬭᬡᬪᬹᬢᬂ. ᬕᬾᬳᬲ᭄ᬲᬶᬢᬓᬣᬵᬢᬶ ᬕᬾᬳᬧ᭄ᬧᬝᬶᬲᬂᬬᬸᬢ᭄ᬢᬵ. ᬓᬫ᭄ᬫᬝ᭄ᬞᬵᬦᬪᬵᬯᬾᬢᬶ ᬅᬦᬶᬘ᭄ᬘᬢᬵᬧᬝᬶᬲᬂᬬᬸᬢ᭄ᬢᬘᬢᬸᬲᬘ᭄ᬘᬓᬫ᭄ᬫᬝ᭄ᬞᬵᬦᬪᬵᬯᬾ.

ᬲᬳ ᬅᬢ᭄ᬣᬾᬦᬵᬢᬶ ᬲᬵᬢ᭄ᬣᬓᬂ, ᬳᬶᬢᬧ᭄ᬧᬝᬶᬲᬂᬬᬸᬢ᭄ᬢᬦ᭄ᬢᬶ ᬅᬢ᭄ᬣᭀ. ‘‘ᬲᬸᬭᬵᬓᬣᬵ’’ᬢᬶᬧᬶ ᬧᬵᬞᭀᬢᬶ ᬆᬳ ‘‘ᬲᬸᬭᬵᬓᬣᬦ᭄ᬢᬶ ᬧᬵᬮ᬴ᬶᬬᬂ ᬧᬦᬵ’’ᬢᬶ. ᬲᬵ ᬧᬦᬾᬲᬵ ᬓᬣᬵ ‘‘ᬏᬯᬭᬹᬧᬵ ᬦᬯᬲᬸᬭᬵ ᬧᬷᬢᬵ ᬭᬢᬶᬚᬦᬦᬷ ᬳᭀᬢᬷ’’ᬢᬶ ᬅᬲ᭄ᬲᬵᬤᬯᬲᬾᬦ ᬦ ᬯᬝ᭄ᬝᬢᬶ, ᬆᬤᬷᬦᬯᬯᬲᬾᬦ ᬧᬦ ‘‘ᬉᬫ᭄ᬫᬢ᭄ᬢᬓᬲᬂᬯᬢ᭄ᬢᬦᬶᬓᬵ’’ᬢᬶᬆᬤᬶᬦᬵ ᬦᬬᬾᬦ ᬯᬝ᭄ᬝᬢᬶ. ᬢᬾᬦᬵᬳ ‘‘ᬅᬦᬾᬓᬯᬶᬥᬂ…ᬧᬾ… ᬆᬤᬷᬦᬯᬯᬲᬾᬦ ᬯᬝ᭄ᬝᬢᬷ’’ᬢᬶ. ᬯᬶᬲᬶᬔᬵᬢᬶ ᬖᬭᬲᬦ᭄ᬦᬶᬯᬾᬲᭀ. ᬯᬶᬲᬶᬔᬵᬕᬳᬡᬾᬦ ᬘ ᬢᬦ᭄ᬦᬶᬯᬵᬲᬶᬦᭀ ᬕᬳᬶᬢᬵ ‘‘ᬕᬵᬫᭀ ᬆᬕᬢᭀ’’ᬢᬶᬆᬤᬷᬲᬸ ᬯᬶᬬ. ᬢᬾᬦᬾᬯᬵᬳ ‘‘ᬲᬹᬭᬵ ᬲᬫᬢ᭄ᬣᬵ’’ᬢᬶ ᬘ ‘‘ᬲᬤ᭄ᬥᬵ ᬧᬲᬦ᭄ᬦᬵ’’ᬢᬶ ᬘ. ᬓᬸᬫ᭄ᬪᬝ᭄ᬞᬵᬦᬧ᭄ᬧᬤᬾᬲᬾᬦ ᬓᬸᬫ᭄ᬪᬤᬵᬲᬶᬬᭀ ᬯᬸᬢ᭄ᬢᬵᬢᬶ ᬆᬳ ‘‘ᬓᬸᬫ᭄ᬪᬤᬵᬲᬶᬓᬣᬵ ᬯᬵ’’ᬢᬶ.

ᬭᬵᬚᬓᬣᬵᬤᬶᬧᬸᬭᬶᬫᬓᬣᬵᬬ, ᬮᭀᬓᬓ᭄ᬔᬵᬬᬶᬓᬵᬤᬶᬧᬘ᭄ᬙᬶᬫᬓᬣᬵᬬ ᬯᬵ ᬯᬶᬦᬶᬫᬸᬢ᭄ᬢᬵ ᬧᬸᬭᬶᬫᬧᬘ᭄ᬙᬶᬫᬓᬣᬵ ᬯᬶᬫᬸᬢ᭄ᬢᬵ. ᬉᬧ᭄ᬧᬢ᭄ᬢᬶᬞᬶᬢᬶᬲᬂᬳᬵᬭᬵᬤᬶᬯᬲᬾᬦ ᬮᭀᬓᬂ ᬅᬓ᭄ᬔᬵᬬᬢᬷᬢᬶ ᬮᭀᬓᬓ᭄ᬔᬵᬬᬶᬓᬵ. ᬅᬲᬸᬓᬾᬦ ᬦᬵᬫᬵᬢᬶ ᬧᬚᬵᬧᬢᬶᬦᬵ ᬩ᭄ᬭᬳ᭄ᬫᬸᬦᬵ, ᬇᬲ᭄ᬲᬭᬾᬦ ᬯᬵ. ᬯᬶᬢᬡ᭄ᬟᬲᬮ᭄ᬮᬵᬧᬓᬣᬵᬢᬶ ‘‘ᬅᬝ᭄ᬞᬷᬦᬂ ᬲᬾᬢᬢ᭄ᬢᬵ ᬲᬾᬢᭀᬢᬶ ᬦ ᬯᬢ᭄ᬢᬩ᭄ᬩᭀ, ᬧᬢ᭄ᬢᬵᬦᬂ ᬓᬵᬮ᬴ᬢ᭄ᬢᬵ ᬓᬵᬮ᬴ᭀᬢᬶ ᬧᬦ ᬯᬢ᭄ᬢᬩ᭄ᬩᭀ’’ᬢᬶ ᬏᬯᬫᬵᬤᬶᬓᬵ. ᬆᬤᬶ-ᬲᬤ᭄ᬤᬾᬦ ‘‘ᬲᬾᬮᬧᬸᬧ᭄ᬨᬮᬓᬵᬦᬶ ᬯᬶᬬ ᬚᬷᬯᬶᬤᬵᬯᬶᬭᬧᬵᬭᬬᬢ᭄ᬢᬶᬯᬶᬲᬵᬮᬵ ᬦᬢ᭄ᬣᬶ, ᬬᬂ ᬬᭀ ᬓᭀᬘᬶ ᬢᬶᬭᬶᬬᬵᬫᬵᬦᬵ ᬓᬢᬢ᭄ᬢᬵ’’ᬢᬶ ᬏᬯᬫᬵᬤᬷᬦᬂ ᬲᬗ᭄ᬕᬳᭀ ᬤᬝ᭄ᬞᬩ᭄ᬩᭀ. ᬲᬵᬕᬭᬤᬾᬯᬾᬦᬵᬢᬶ ᬲᬵᬕᬭᬧᬸᬢ᭄ᬢᬭᬵᬚᬹᬳᬶ. ᬔᬢᭀᬢᬶ ᬏᬢᬂ ᬏᬓᬯᬘᬦᬂ ᬢᬾᬳᬶ ᬧᬘ᭄ᬘᬾᬓᬂ ᬔᬢᬢ᭄ᬢᬵ ‘‘ᬲᬵᬕᬭᬤᬾᬯᬾᬦ ᬔᬢᬢ᭄ᬢᬵ’’ᬢᬶ ᬯᬸᬢ᭄ᬢᬂ. ᬲᬳᬫᬸᬤ᭄ᬤᬵ ᬲᬫᬸᬤ᭄ᬤᭀᬢᬶ ᬯᬸᬢ᭄ᬢᭀ. ᬪᬯᬢᬶ ᬯᬤ᭄ᬥᬢᬶ ᬏᬢᬾᬦᬵᬢᬶ ᬪᬯᭀ. ᬪᬯᬵᬪᬯᬵ ᬳᭀᬦ᭄ᬢᬷᬢᬶ ᬇᬢᬶᬪᬯᬵᬪᬯᬓᬣᬵ. ᬏᬢ᭄ᬣ ᬘ ᬪᬯᭀᬢᬶ ᬲᬲ᭄ᬲᬢᬂ, ᬅᬪᬯᭀᬢᬶ ᬉᬘ᭄ᬙᬾᬤᬂ. ᬪᬯᭀᬢᬶ ᬯᬸᬤ᭄ᬥᬶ, ᬅᬪᬯᭀᬢᬶ ᬳᬵᬦᬶ. ᬪᬯᭀᬢᬶ ᬓᬵᬫᬲᬸᬔᬂ, ᬅᬪᬯᭀᬢᬶ ᬅᬢ᭄ᬢᬓᬶᬮᬫᬣᭀᬢᬶ ᬇᬢᬶ ᬇᬫᬵᬬ ᬙᬩ᭄ᬩᬶᬥᬵᬬ ᬇᬢᬶᬪᬯᬵᬪᬯᬓᬣᬵᬬ ᬲᬤ᭄ᬥᬶᬂ ᬩᬵᬢ᭄ᬢᬶᬂᬲ ᬢᬶᬭᬘ᭄ᬙᬵᬦᬓᬣᬵ ᬦᬵᬫ ᬳᭀᬦ᭄ᬢᬶ. ᬅᬣ ᬯᬵ ᬧᬵᬮ᬴ᬶᬬᬂ ᬲᬭᬹᬧᬢᭀ ᬅᬦᬵᬕᬢᬵᬧᬶ ᬅᬭᬜ᭄ᬜᬧᬩ᭄ᬩᬢᬦᬤᬷᬤᬷᬧᬓᬣᬵ ᬇᬢᬶᬲᬤ᭄ᬤᬾᬦ ᬲᬗ᭄ᬕᬡ᭄ᬳᬶᬢ᭄ᬯᬵ ᬩᬵᬢ᭄ᬢᬶᬂᬲ ᬢᬶᬭᬘ᭄ᬙᬵᬦᬓᬣᬵ ᬯᬸᬢ᭄ᬢᬵ. ᬤᬲᬫᬾ ᬦᬢ᭄ᬣᬶ ᬯᬢ᭄ᬢᬩ᭄ᬩᬂ.

ᬧᬞᬫᬓᬣᬵᬯᬢ᭄ᬣᬸᬲᬸᬢ᭄ᬢᬵᬤᬶᬯᬡ᭄ᬡᬦᬵ ᬦᬶᬝ᭄ᬞᬶᬢᬵ.

ᬬᬫᬓᬯᬕ᭄ᬕᬯᬡ᭄ᬡᬦᬵ ᬦᬶᬝ᭄ᬞᬶᬢᬵ.