᭑. ᬲᬫᬵᬥᬶᬫᬹᬮᬓᬲᬫᬵᬧᬢ᭄ᬢᬶᬲᬸᬢ᭄ᬢᬂ

᭖᭖᭒. ᬲᬵᬯᬢ᭄ᬣᬶᬦᬶᬤᬵᬦᬂ. ‘‘ᬘᬢ᭄ᬢᬵᬭᭀᬫᬾ, ᬪᬶᬓ᭄ᬔᬯᬾ, ᬛᬵᬬᬷ. ᬓᬢᬫᬾ ᬘᬢ᭄ᬢᬵᬭᭀ? ᬇᬥ, ᬪᬶᬓ᭄ᬔᬯᬾ, ᬏᬓᬘ᭄ᬘᭀ ᬛᬵᬬᬷ ᬲᬫᬵᬥᬶᬲ᭄ᬫᬶᬂ ᬲᬫᬵᬥᬶᬓᬸᬲᬮᭀ ᬳᭀᬢᬶ, ᬦ ᬲᬫᬵᬥᬶᬲ᭄ᬫᬶᬂ ᬲᬫᬵᬧᬢ᭄ᬢᬶᬓᬸᬲᬮᭀ. ᬇᬥ ᬧᬦ, ᬪᬶᬓ᭄ᬔᬯᬾ, ᬏᬓᬘ᭄ᬘᭀ ᬛᬵᬬᬷ ᬲᬫᬵᬥᬶᬲ᭄ᬫᬶᬂ ᬲᬫᬵᬧᬢ᭄ᬢᬶᬓᬸᬲᬮᭀ ᬳᭀᬢᬶ, ᬦ ᬲᬫᬵᬥᬶᬲ᭄ᬫᬶᬂ ᬲᬫᬵᬥᬶᬓᬸᬲᬮᭀ. ᬇᬥ ᬧᬦ, ᬪᬶᬓ᭄ᬔᬯᬾ, ᬏᬓᬘ᭄ᬘᭀ ᬛᬵᬬᬷ ᬦᬾᬯ ᬲᬫᬵᬥᬶᬲ᭄ᬫᬶᬂ ᬲᬫᬵᬥᬶᬓᬸᬲᬮᭀ ᬳᭀᬢᬶ, ᬦ ᬘ ᬲᬫᬵᬥᬶᬲ᭄ᬫᬶᬂ ᬲᬫᬵᬧᬢ᭄ᬢᬶᬓᬸᬲᬮᭀ. ᬇᬥ ᬧᬦ, ᬪᬶᬓ᭄ᬔᬯᬾ, ᬏᬓᬘ᭄ᬘᭀ ᬛᬵᬬᬷ ᬲᬫᬵᬥᬶᬲ᭄ᬫᬶᬂ ᬲᬫᬵᬥᬶᬓᬸᬲᬮᭀ ᬘ ᬳᭀᬢᬶ, ᬲᬫᬵᬥᬶᬲ᭄ᬫᬶᬂ ᬲᬫᬵᬧᬢ᭄ᬢᬶᬓᬸᬲᬮᭀ ᬘ. ᬢᬢ᭄ᬭ, ᬪᬶᬓ᭄ᬔᬯᬾ, ᬬ᭄ᬯᬵᬬᬂ ᬛᬵᬬᬷ ᬲᬫᬵᬥᬶᬲ᭄ᬫᬶᬂ ᬲᬫᬵᬥᬶᬓᬸᬲᬮᭀ ᬘ ᬳᭀᬢᬶ ᬲᬫᬵᬥᬶᬲ᭄ᬫᬶᬂ ᬲᬫᬵᬧᬢ᭄ᬢᬶᬓᬸᬲᬮᭀ ᬘ ᬅᬬᬂ ᬇᬫᬾᬲᬂ ᬘᬢᬸᬦ᭄ᬦᬂ ᬛᬵᬬᬷᬦᬂ ᬅᬕ᭄ᬕᭀ ᬘ ᬲᬾᬝ᭄ᬞᭀ ᬘ ᬫᭀᬓ᭄ᬔᭀ [ᬧᬵᬫᭀᬓ᭄ᬔᭀ (ᬲ᭄ᬬᬵ. ᬓᬂ.) ᬏᬯᬫᬸᬧᬭᬶᬧᬶ] ᬘ ᬉᬢ᭄ᬢᬫᭀ ᬘ ᬧᬯᬭᭀ ᬘ. ᬲᬾᬬ᭄ᬬᬣᬵᬧᬶ, ᬪᬶᬓ᭄ᬔᬯᬾ, ᬕᬯᬵ ᬔᬷᬭᬂ, ᬔᬷᬭᬫ᭄ᬳᬵ ᬤᬥᬶ, ᬤᬥᬶᬫ᭄ᬳᬵ ᬦᬯᬦᬷᬢᬂ, ᬦᬯᬦᬷᬢᬫ᭄ᬳᬵ ᬲᬧ᭄ᬧᬶ, ᬲᬧ᭄ᬧᬶᬫ᭄ᬳᬵ ᬲᬧ᭄ᬧᬶᬫᬡ᭄ᬟᭀ ᬢᬢ᭄ᬭ ᬅᬕ᭄ᬕᬫᬓ᭄ᬔᬵᬬᬢᬶ; ᬏᬯᬫᬾᬯ ᬔᭀ, ᬪᬶᬓ᭄ᬔᬯᬾ, ᬬ᭄ᬯᬵᬬᬂ ᬛᬵᬬᬷ ᬲᬫᬵᬥᬶᬲ᭄ᬫᬶᬂ ᬲᬫᬵᬥᬶᬓᬸᬲᬮᭀ ᬘ ᬳᭀᬢᬶ ᬲᬫᬵᬥᬶᬲ᭄ᬫᬶᬂ ᬲᬫᬵᬧᬢ᭄ᬢᬶᬓᬸᬲᬮᭀ ᬘ ᬅᬬᬂ ᬇᬫᬾᬲᬂ ᬘᬢᬸᬦ᭄ᬦᬂ ᬛᬵᬬᬷᬦᬂ ᬅᬕ᭄ᬕᭀ ᬘ ᬲᬾᬝ᭄ᬞᭀ ᬘ ᬫᭀᬓ᭄ᬔᭀ ᬘ ᬉᬢ᭄ᬢᬫᭀ ᬘ ᬧᬯᬭᭀ ᬘᬵ’’ᬢᬶ. ᬧᬞᬫᬂ.