᭘. ᬔᬚ᭄ᬚᬦᬷᬬᬯᬕ᭄ᬕᭀ

᭑. ᬅᬲ᭄ᬲᬵᬤᬲᬸᬢ᭄ᬢᬂ

᭗᭓. ᬲᬵᬯᬢ᭄ᬣᬶᬦᬶᬤᬵᬦᬂ. ‘‘ᬅᬲ᭄ᬲᬸᬢᬯᬵ, ᬪᬶᬓ᭄ᬔᬯᬾ, ᬧᬸᬣᬸᬚ᭄ᬚᬦᭀ ᬭᬹᬧᬲ᭄ᬲ ᬅᬲ᭄ᬲᬵᬤᬜ᭄ᬘ ᬆᬤᬷᬦᬯᬜ᭄ᬘ ᬦᬶᬲ᭄ᬲᬭᬡᬜ᭄ᬘ ᬬᬣᬵᬪᬹᬢᬂ ᬦᬧ᭄ᬧᬚᬵᬦᬵᬢᬶ. ᬯᬾᬤᬦᬵᬬ… ᬲᬜ᭄ᬜᬵᬬ… ᬲᬗ᭄ᬔᬵᬭᬵᬦᬂ… ᬯᬶᬜ᭄ᬜᬵᬡᬲ᭄ᬲ ᬅᬲ᭄ᬲᬵᬤᬜ᭄ᬘ ᬆᬤᬷᬦᬯᬜ᭄ᬘ ᬦᬶᬲ᭄ᬲᬭᬡᬜ᭄ᬘ ᬬᬣᬵᬪᬹᬢᬂ ᬦᬧ᭄ᬧᬚᬵᬦᬵᬢᬶ. ᬲᬸᬢᬯᬵ ᬘ ᬔᭀ, ᬪᬶᬓ᭄ᬔᬯᬾ, ᬅᬭᬶᬬᬲᬵᬯᬓᭀ ᬭᬹᬧᬲ᭄ᬲ ᬅᬲ᭄ᬲᬵᬤᬜ᭄ᬘ ᬆᬤᬷᬦᬯᬜ᭄ᬘ ᬦᬶᬲ᭄ᬲᬭᬡᬜ᭄ᬘ ᬬᬣᬵᬪᬹᬢᬂ ᬧᬚᬵᬦᬵᬢᬶ. ᬯᬾᬤᬦᬵ … ᬲᬜ᭄ᬜᬵᬬ… ᬲᬗ᭄ᬔᬵᬭᬵᬦᬂ… ᬯᬶᬜ᭄ᬜᬵᬡᬲ᭄ᬲ ᬅᬲ᭄ᬲᬵᬤᬜ᭄ᬘ ᬆᬤᬷᬦᬯᬜ᭄ᬘ ᬦᬶᬲ᭄ᬲᬭᬡᬜ᭄ᬘ ᬬᬣᬵᬪᬹᬢᬂ ᬧᬚᬵᬦᬵᬢᬷ’’ᬢᬶ. ᬧᬞᬫᬂ.

᭒. ᬲᬫᬸᬤᬬᬲᬸᬢ᭄ᬢᬂ

᭗᭔. ᬲᬵᬯᬢ᭄ᬣᬶᬦᬶᬤᬵᬦᬂ. ‘‘ᬅᬲ᭄ᬲᬸᬢᬯᬵ, ᬪᬶᬓ᭄ᬔᬯᬾ, ᬧᬸᬣᬸᬚ᭄ᬚᬦᭀ ᬭᬹᬧᬲ᭄ᬲ ᬲᬫᬸᬤᬬᬜ᭄ᬘ ᬅᬢ᭄ᬣᬗ᭄ᬕᬫᬜ᭄ᬘ ᬅᬲ᭄ᬲᬵᬤᬜ᭄ᬘ ᬆᬤᬷᬦᬯᬜ᭄ᬘ ᬦᬶᬲ᭄ᬲᬭᬡᬜ᭄ᬘ ᬬᬣᬵᬪᬹᬢᬂ ᬦᬧ᭄ᬧᬚᬵᬦᬵᬢᬶ. ᬯᬾᬤᬦᬵᬬ… ᬲᬜ᭄ᬜᬵᬬ… ᬲᬗ᭄ᬔᬵᬭᬵᬦᬂ… ᬯᬶᬜ᭄ᬜᬵᬡᬲ᭄ᬲ ᬲᬫᬸᬤᬬᬜ᭄ᬘ ᬅᬢ᭄ᬣᬗ᭄ᬕᬫᬜ᭄ᬘ ᬅᬲ᭄ᬲᬵᬤᬜ᭄ᬘ ᬆᬤᬷᬦᬯᬜ᭄ᬘ ᬦᬶᬲ᭄ᬲᬭᬡᬜ᭄ᬘ ᬬᬣᬵᬪᬹᬢᬂ ᬦᬧ᭄ᬧᬚᬵᬦᬵᬢᬶ. ᬲᬸᬢᬯᬵ ᬘ ᬔᭀ, ᬪᬶᬓ᭄ᬔᬯᬾ, ᬅᬭᬶᬬᬲᬵᬯᬓᭀ ᬭᬹᬧᬲ᭄ᬲ ᬲᬫᬸᬤᬬᬜ᭄ᬘ ᬅᬢ᭄ᬣᬗ᭄ᬕᬫᬜ᭄ᬘ ᬅᬲ᭄ᬲᬵᬤᬜ᭄ᬘ ᬆᬤᬷᬦᬯᬜ᭄ᬘ ᬦᬶᬲ᭄ᬲᬭᬡᬜ᭄ᬘ ᬬᬣᬵᬪᬹᬢᬂ ᬧᬚᬵᬦᬵᬢᬶ. ᬯᬾᬤᬦᬵᬬ… ᬲᬜ᭄ᬜᬵᬬ… ᬲᬗ᭄ᬔᬵᬭᬵᬦᬂ… ᬯᬶᬜ᭄ᬜᬵᬡᬲ᭄ᬲ ᬲᬫᬸᬤᬬᬜ᭄ᬘ ᬅᬢ᭄ᬣᬗ᭄ᬕᬫᬜ᭄ᬘ ᬅᬲ᭄ᬲᬵᬤᬜ᭄ᬘ ᬆᬤᬷᬦᬯᬜ᭄ᬘ ᬦᬶᬲ᭄ᬲᬭᬡᬜ᭄ᬘ ᬬᬣᬵᬪᬹᬢᬂ ᬧᬚᬵᬦᬵᬢᬷ’’ᬢᬶ. ᬤᬸᬢᬶᬬᬂ.

᭓. ᬤᬸᬢᬶᬬᬲᬫᬸᬤᬬᬲᬸᬢ᭄ᬢᬂ

᭗᭕. ᬲᬵᬯᬢ᭄ᬣᬶᬦᬶᬤᬵᬦᬂ. ‘‘ᬲᬸᬢᬯᬵ, ᬪᬶᬓ᭄ᬔᬯᬾ, ᬅᬭᬶᬬᬲᬵᬯᬓᭀ ᬭᬹᬧᬲ᭄ᬲ ᬲᬫᬸᬤᬬᬜ᭄ᬘ ᬅᬢ᭄ᬣᬗ᭄ᬕᬫᬜ᭄ᬘ ᬅᬲ᭄ᬲᬵᬤᬜ᭄ᬘ ᬆᬤᬷᬦᬯᬜ᭄ᬘ ᬦᬶᬲ᭄ᬲᬭᬡᬜ᭄ᬘ ᬬᬣᬵᬪᬹᬢᬂ ᬧᬚᬵᬦᬵᬢᬶ. ᬯᬾᬤᬦᬵᬬ… ᬲᬜ᭄ᬜᬵᬬ… ᬲᬗ᭄ᬔᬵᬭᬵᬦᬂ… ᬯᬶᬜ᭄ᬜᬵᬡᬲ᭄ᬲ ᬲᬫᬸᬤᬬᬜ᭄ᬘ ᬅᬢ᭄ᬣᬗ᭄ᬕᬫᬜ᭄ᬘ ᬅᬲ᭄ᬲᬵᬤᬜ᭄ᬘ ᬆᬤᬷᬦᬯᬜ᭄ᬘ ᬦᬶᬲ᭄ᬲᬭᬡᬜ᭄ᬘ ᬬᬣᬵᬪᬹᬢᬂ ᬧᬚᬵᬦᬵᬢᬷ’’ᬢᬶ. ᬢᬢᬶᬬᬂ.

᭔. ᬅᬭᬳᬦ᭄ᬢᬲᬸᬢ᭄ᬢᬂ

᭗᭖. ᬲᬵᬯᬢ᭄ᬣᬶᬦᬶᬤᬵᬦᬂ. ‘‘ᬭᬹᬧᬂ, ᬪᬶᬓ᭄ᬔᬯᬾ, ᬅᬦᬶᬘ᭄ᬘᬂ. ᬬᬤᬦᬶᬘ᭄ᬘᬂ ᬢᬂ ᬤᬸᬓ᭄ᬔᬂ; ᬬᬂ ᬤᬸᬓ᭄ᬔᬂ ᬢᬤᬦᬢ᭄ᬢᬵ; ᬬᬤᬦᬢ᭄ᬢᬵ ᬢᬂ ‘ᬦᬾᬢᬂ ᬫᬫ, ᬦᬾᬲᭀᬳᬫᬲ᭄ᬫᬶ, ᬦ ᬫᬾᬲᭀ ᬅᬢ᭄ᬢᬵ’ᬢᬶ ᬏᬯᬫᬾᬢᬂ ᬬᬣᬵᬪᬹᬢᬂ ᬲᬫ᭄ᬫᬧ᭄ᬧᬜ᭄ᬜᬵᬬ ᬤᬝ᭄ᬞᬩ᭄ᬩᬂ. ᬯᬾᬤᬦᬵ… ᬲᬜ᭄ᬜᬵ… ᬲᬗ᭄ᬔᬵᬭᬵ… ᬯᬶᬜ᭄ᬜᬵᬡᬂ ᬅᬦᬶᬘ᭄ᬘᬂ. ᬬᬤᬦᬶᬘ᭄ᬘᬂ ᬢᬂ ᬤᬸᬓ᭄ᬔᬂ; ᬬᬂ ᬤᬸᬓ᭄ᬔᬂ ᬢᬤᬦᬢ᭄ᬢᬵ; ᬬᬤᬦᬢ᭄ᬢᬵ ᬢᬂ ‘ᬦᬾᬢᬂ ᬫᬫ, ᬦᬾᬲᭀᬳᬫᬲ᭄ᬫᬶ, ᬦ ᬫᬾᬲᭀ ᬅᬢ᭄ᬢᬵ’ᬢᬶ ᬏᬯᬫᬾᬢᬂ ᬬᬣᬵᬪᬹᬢᬂ ᬲᬫ᭄ᬫᬧ᭄ᬧᬜ᭄ᬜᬵᬬ ᬤᬝ᭄ᬞᬩ᭄ᬩᬂ’’.

‘‘ᬏᬯᬂ ᬧᬲ᭄ᬲᬂ, ᬪᬶᬓ᭄ᬔᬯᬾ, ᬲᬸᬢᬯᬵ ᬅᬭᬶᬬᬲᬵᬯᬓᭀ ᬭᬹᬧᬲ᭄ᬫᬶᬫ᭄ᬧᬶ ᬦᬶᬩ᭄ᬩᬶᬦ᭄ᬤᬢᬶ, ᬯᬾᬤᬦᬵᬬᬧᬶ… ᬲᬜ᭄ᬜᬵᬬᬧᬶ… ᬲᬗ᭄ᬔᬵᬭᬾᬲᬸᬧᬶ… ᬯᬶᬜ᭄ᬜᬵᬡᬲ᭄ᬫᬶᬫ᭄ᬧᬶ ᬦᬶᬩ᭄ᬩᬶᬦ᭄ᬤᬢᬶ. ᬦᬶᬩ᭄ᬩᬶᬦ᭄ᬤᬂ ᬯᬶᬭᬚ᭄ᬚᬢᬶ; ᬯᬶᬭᬵᬕᬵ ᬯᬶᬫᬸᬘ᭄ᬘᬢᬶ. ᬯᬶᬫᬸᬢ᭄ᬢᬲ᭄ᬫᬶᬂ ᬯᬶᬫᬸᬢ᭄ᬢᬫᬶᬢᬶ ᬜᬵᬡᬂ ᬳᭀᬢᬶ. ‘ᬔᬷᬡᬵ ᬚᬵᬢᬶ, ᬯᬸᬲᬶᬢᬂ ᬩ᭄ᬭᬳ᭄ᬫᬘᬭᬶᬬᬂ, ᬓᬢᬂ ᬓᬭᬡᬷᬬᬂ, ᬦᬵᬧᬭᬂ ᬇᬢ᭄ᬣᬢ᭄ᬢᬵᬬᬵ’ᬢᬶ ᬧᬚᬵᬦᬵᬢᬶ. ᬬᬵᬯᬢᬵ, ᬪᬶᬓ᭄ᬔᬯᬾ, ᬲᬢ᭄ᬢᬵᬯᬵᬲᬵ, ᬬᬵᬯᬢᬵ ᬪᬯᬕ᭄ᬕᬂ, ᬏᬢᬾ ᬅᬕ᭄ᬕᬵ, ᬏᬢᬾ ᬲᬾᬝ᭄ᬞᬵ ᬮᭀᬓᬲ᭄ᬫᬶᬂ ᬬᬤᬶᬤᬂ ᬅᬭᬳᬦ᭄ᬢᭀ’’ᬢᬶ.

ᬇᬤᬫᬯᭀᬘ ᬪᬕᬯᬵ. ᬇᬤᬂ ᬯᬢ᭄ᬯᬵᬦ ᬲᬸᬕᬢᭀ ᬅᬣᬵᬧᬭᬂ ᬏᬢᬤᬯᭀᬘ ᬲᬢ᭄ᬣᬵ –

‘‘ᬲᬸᬔᬶᬦᭀ ᬯᬢ ᬅᬭᬳᬦ᭄ᬢᭀ, ᬢᬡ᭄ᬳᬵ ᬢᬾᬲᬂ ᬦ ᬯᬶᬚ᭄ᬚᬢᬶ;

ᬅᬲ᭄ᬫᬶᬫᬵᬦᭀ ᬲᬫᬸᬘ᭄ᬙᬶᬦ᭄ᬦᭀ, ᬫᭀᬳᬚᬵᬮᬂ ᬧᬤᬵᬮᬶᬢᬂ.

‘‘ᬅᬦᬾᬚᬂ ᬢᬾ ᬅᬦᬸᬧ᭄ᬧᬢ᭄ᬢᬵ, ᬘᬶᬢ᭄ᬢᬂ ᬢᬾᬲᬂ ᬅᬦᬵᬯᬶᬮᬂ;

ᬮᭀᬓᬾ ᬅᬦᬸᬧᬮᬶᬢ᭄ᬢᬵ ᬢᬾ, ᬩ᭄ᬭᬳ᭄ᬫᬪᬹᬢᬵ ᬅᬦᬵᬲᬯᬵ.

‘‘ᬧᬜ᭄ᬘᬓ᭄ᬔᬦ᭄ᬥᬾ ᬧᬭᬶᬜ᭄ᬜᬵᬬ, ᬲᬢ᭄ᬢ ᬲᬤ᭄ᬥᬫ᭄ᬫᬕᭀᬘᬭᬵ;

ᬧᬲᬂᬲᬶᬬᬵ ᬲᬧ᭄ᬧᬸᬭᬶᬲᬵ, ᬧᬸᬢ᭄ᬢᬵ ᬩᬸᬤ᭄ᬥᬲ᭄ᬲ ᬑᬭᬲᬵ.

‘‘ᬲᬢ᭄ᬢᬭᬢᬦᬲᬫ᭄ᬧᬦ᭄ᬦᬵ, ᬢᬷᬲᬸ ᬲᬶᬓ᭄ᬔᬵᬲᬸ ᬲᬶᬓ᭄ᬔᬶᬢᬵ;

ᬅᬦᬸᬯᬶᬘᬭᬦ᭄ᬢᬶ ᬫᬳᬵᬯᬷᬭᬵ, ᬧᬳᬷᬦᬪᬬᬪᬾᬭᬯᬵ.

‘‘ᬤᬲᬳᬗ᭄ᬕᬾᬳᬶ ᬲᬫ᭄ᬧᬦ᭄ᬦᬵ, ᬫᬳᬵᬦᬵᬕᬵ ᬲᬫᬵᬳᬶᬢᬵ;

ᬏᬢᬾ ᬔᭀ ᬲᬾᬝ᭄ᬞᬵ ᬮᭀᬓᬲ᭄ᬫᬶᬂ, ᬢᬡ᭄ᬳᬵ ᬢᬾᬲᬂ ᬦ ᬯᬶᬚ᭄ᬚᬢᬶ.

‘‘ᬅᬲᬾᬔᬜᬵᬡᬫᬸᬧ᭄ᬧᬦ᭄ᬦᬂ, ᬅᬦ᭄ᬢᬶᬫᭀᬬᬂ [ᬅᬦ᭄ᬢᬶᬫᬲ᭄ᬲ (ᬓ.)] ᬲᬫᬸᬲ᭄ᬲᬬᭀ;

ᬬᭀ ᬲᬵᬭᭀ ᬩ᭄ᬭᬳ᭄ᬫᬘᬭᬶᬬᬲ᭄ᬲ, ᬢᬲ᭄ᬫᬶᬂ ᬅᬧᬭᬧᬘ᭄ᬘᬬᬵ.

‘‘ᬯᬶᬥᬵᬲᬸ ᬦ ᬯᬶᬓᬫ᭄ᬧᬦ᭄ᬢᬶ, ᬯᬶᬧ᭄ᬧᬫᬸᬢ᭄ᬢᬵ ᬧᬸᬦᬩ᭄ᬪᬯᬵ;

ᬤᬦ᭄ᬢᬪᬹᬫᬶᬫᬦᬸᬧ᭄ᬧᬢ᭄ᬢᬵ, ᬢᬾ ᬮᭀᬓᬾ ᬯᬶᬚᬶᬢᬵᬯᬶᬦᭀ.

‘‘ᬉᬤ᭄ᬥᬂ ᬢᬶᬭᬶᬬᬂ ᬅᬧᬵᬘᬷᬦᬂ, ᬦᬦ᭄ᬤᬷ ᬢᬾᬲᬂ ᬦ ᬯᬶᬚ᭄ᬚᬢᬶ;

ᬦᬤᬦ᭄ᬢᬶ ᬢᬾ ᬲᬷᬳᬦᬵᬤᬂ, ᬩᬸᬤ᭄ᬥᬵ ᬮᭀᬓᬾ ᬅᬦᬸᬢ᭄ᬢᬭᬵ’’ᬢᬶ. ᬘᬢᬸᬢ᭄ᬣᬂ;

᭕. ᬤᬸᬢᬶᬬᬅᬭᬳᬦ᭄ᬢᬲᬸᬢ᭄ᬢᬂ

᭗᭗. ᬲᬵᬯᬢ᭄ᬣᬶᬦᬶᬤᬵᬦᬂ. ‘‘ᬭᬹᬧᬂ, ᬪᬶᬓ᭄ᬔᬯᬾ, ᬅᬦᬶᬘ᭄ᬘᬂ. ᬬᬤᬦᬶᬘ᭄ᬘᬂ ᬢᬂ ᬤᬸᬓ᭄ᬔᬂ; ᬬᬂ ᬤᬸᬓ᭄ᬔᬂ ᬢᬤᬦᬢ᭄ᬢᬵ; ᬬᬤᬦᬢ᭄ᬢᬵ ᬢᬂ ‘ᬦᬾᬢᬂ ᬫᬫ, ᬦᬾᬲᭀᬳᬫᬲ᭄ᬫᬶ, ᬦ ᬫᬾᬲᭀ ᬅᬢ᭄ᬢᬵ’ᬢᬶ…ᬧᬾ… ᬏᬯᬫᬾᬢᬂ ᬬᬣᬵᬪᬹᬢᬂ ᬲᬫ᭄ᬫᬧ᭄ᬧᬜ᭄ᬜᬵᬬ ᬤᬝ᭄ᬞᬩ᭄ᬩᬂ’’.

᭖. ᬲᬷᬳᬲᬸᬢ᭄ᬢᬂ

᭗᭘. ᬲᬵᬯᬢ᭄ᬣᬶᬦᬶᬤᬵᬦᬂ. ‘‘ᬲᬷᬳᭀ, ᬪᬶᬓ᭄ᬔᬯᬾ, ᬫᬶᬕᬭᬵᬚᬵ ᬲᬵᬬᬦ᭄ᬳᬲᬫᬬᬂ ᬆᬲᬬᬵ ᬦᬶᬓ᭄ᬔᬫᬢᬶ; ᬆᬲᬬᬵ ᬦᬶᬓ᭄ᬔᬫᬶᬢ᭄ᬯᬵ ᬯᬶᬚᬫ᭄ᬪᬢᬶ; ᬯᬶᬚᬫ᭄ᬪᬶᬢ᭄ᬯᬵ ᬲᬫᬦ᭄ᬢᬵ ᬘᬢᬸᬤ᭄ᬤᬶᬲᬵ ᬅᬦᬸᬯᬶᬮᭀᬓᬾᬢᬶ; ᬲᬫᬦ᭄ᬢᬵ ᬘᬢᬸᬤ᭄ᬤᬶᬲᬵ ᬅᬦᬸᬯᬶᬮᭀᬓᬾᬢ᭄ᬯᬵ ᬢᬶᬓ᭄ᬔᬢ᭄ᬢᬸᬂ ᬲᬷᬳᬦᬵᬤᬂ ᬦᬤᬢᬶ; ᬢᬶᬓ᭄ᬔᬢ᭄ᬢᬸᬂ ᬲᬷᬳᬦᬵᬤᬂ ᬦᬤᬶᬢ᭄ᬯᬵ ᬕᭀᬘᬭᬵᬬ ᬧᬓ᭄ᬓᬫᬢᬶ. ᬬᬾ ᬳᬶ ᬓᬾᬘᬶ, ᬪᬶᬓ᭄ᬔᬯᬾ, ᬢᬶᬭᬘ᭄ᬙᬵᬦᬕᬢᬵ ᬧᬵᬡᬵ ᬲᬷᬳᬲ᭄ᬲ ᬫᬶᬕᬭᬜ᭄ᬜᭀ ᬦᬤᬢᭀ ᬲᬤ᭄ᬤᬂ ᬲᬸᬡᬦ᭄ᬢᬶ; ᬬᬾᬪᬸᬬ᭄ᬬᬾᬦ ᬪᬬᬂ ᬲᬂᬯᬾᬕᬂ ᬲᬦ᭄ᬢᬵᬲᬂ ᬆᬧᬚ᭄ᬚᬦ᭄ᬢᬶ; ᬩᬶᬮᬂ ᬩᬶᬮᬵᬲᬬᬵ ᬧᬯᬶᬲᬦ᭄ᬢᬶ; ᬤᬓᬂ ᬤᬓᬵᬲᬬᬵ ᬧᬯᬶᬲᬦ᭄ᬢᬶ; ᬯᬦᬂ ᬯᬦᬵᬲᬬᬵ ᬧᬯᬶᬲᬦ᭄ᬢᬶ; ᬆᬓᬵᬲᬂ ᬧᬓ᭄ᬔᬶᬦᭀ ᬪᬚᬦ᭄ᬢᬶ. ᬬᬾᬧᬶ ᬢᬾ, ᬪᬶᬓ᭄ᬔᬯᬾ, ᬭᬜ᭄ᬜᭀ ᬦᬵᬕᬵ ᬕᬵᬫᬦᬶᬕᬫᬭᬵᬚᬥᬵᬦᬷᬲᬸ, ᬤᬮ᬴᭄ᬳᬾᬳᬶ ᬯᬭᬢ᭄ᬢᬾᬳᬶ ᬩᬤ᭄ᬥᬵ, ᬢᬾᬧᬶ ᬢᬵᬦᬶ ᬩᬦ᭄ᬥᬦᬵᬦᬶ ᬲᬜ᭄ᬙᬶᬦ᭄ᬤᬶᬢ᭄ᬯᬵ ᬲᬫ᭄ᬧᬤᬵᬮᬾᬢ᭄ᬯᬵ ᬪᬷᬢᬵ ᬫᬸᬢ᭄ᬢᬓᬭᬷᬲᬂ ᬘᬚᬫᬵᬦᬵ [ᬫᭀᬘᬦ᭄ᬢᬵ (ᬧᬷ. ᬓ.)], ᬬᬾᬦ ᬯᬵ ᬢᬾᬦ ᬯᬵ ᬧᬮᬵᬬᬦ᭄ᬢᬶ. ᬏᬯᬂ ᬫᬳᬶᬤ᭄ᬥᬶᬓᭀ ᬔᭀ, ᬪᬶᬓ᭄ᬔᬯᬾ, ᬲᬷᬳᭀ ᬫᬶᬕᬭᬵᬚᬵ ᬢᬶᬭᬘ᭄ᬙᬵᬦᬕᬢᬵᬦᬂ ᬧᬵᬡᬵᬦᬂ, ᬏᬯᬂ ᬫᬳᬾᬲᬓ᭄ᬔᭀ, ᬏᬯᬂ ᬫᬳᬵᬦᬸᬪᬵᬯᭀ’’.

‘‘ᬏᬯᬫᬾᬯ ᬔᭀ, ᬪᬶᬓ᭄ᬔᬯᬾ, ᬬᬤᬵ ᬢᬣᬵᬕᬢᭀ ᬮᭀᬓᬾ ᬉᬧ᭄ᬧᬚ᭄ᬚᬢᬶ ᬅᬭᬳᬂ ᬲᬫ᭄ᬫᬵᬲᬫ᭄ᬩᬸᬤ᭄ᬥᭀ ᬯᬶᬚ᭄ᬚᬵᬘᬭᬡᬲᬫ᭄ᬧᬦ᭄ᬦᭀ ᬲᬸᬕᬢᭀ ᬮᭀᬓᬯᬶᬤᬹ ᬅᬦᬸᬢ᭄ᬢᬭᭀ ᬧᬸᬭᬶᬲᬤᬫ᭄ᬫᬲᬵᬭᬣᬶ ᬲᬢ᭄ᬣᬵ ᬤᬾᬯᬫᬦᬸᬲ᭄ᬲᬵᬦᬂ ᬩᬸᬤ᭄ᬥᭀ ᬪᬕᬯᬵ. ᬲᭀ ᬥᬫ᭄ᬫᬂ ᬤᬾᬲᬾᬢᬶ – ‘ᬇᬢᬶ ᬭᬹᬧᬂ, ᬇᬢᬶ ᬭᬹᬧᬲ᭄ᬲ ᬲᬫᬸᬤᬬᭀ, ᬇᬢᬶ ᬭᬹᬧᬲ᭄ᬲ ᬅᬢ᭄ᬣᬗ᭄ᬕᬫᭀ; ᬇᬢᬶ ᬯᬾᬤᬦᬵ… ᬇᬢᬶ ᬲᬜ᭄ᬜᬵ… ᬇᬢᬶ ᬲᬗ᭄ᬔᬵᬭᬵ… ᬇᬢᬶ ᬯᬶᬜ᭄ᬜᬵᬡᬂ, ᬇᬢᬶ ᬯᬶᬜ᭄ᬜᬵᬡᬲ᭄ᬲ ᬲᬫᬸᬤᬬᭀ, ᬇᬢᬶ ᬯᬶᬜ᭄ᬜᬵᬡᬲ᭄ᬲ ᬅᬢ᭄ᬣᬗ᭄ᬕᬫᭀ’ᬢᬶ. ᬬᬾᬧᬶ ᬢᬾ, ᬪᬶᬓ᭄ᬔᬯᬾ, ᬤᬾᬯᬵ ᬤᬷᬖᬵᬬᬸᬓᬵ ᬯᬡ᭄ᬡᬯᬦ᭄ᬢᭀ ᬲᬸᬔᬩᬳᬸᬮᬵ ᬉᬘ᭄ᬘᬾᬲᬸ ᬯᬶᬫᬵᬦᬾᬲᬸ ᬘᬶᬭᬝ᭄ᬞᬶᬢᬶᬓᬵ ᬢᬾᬧᬶ ᬢᬣᬵᬕᬢᬲ᭄ᬲ ᬥᬫ᭄ᬫᬤᬾᬲᬦᬂ ᬲᬸᬢ᭄ᬯᬵ ᬬᬾᬪᬸᬬ᭄ᬬᬾᬦ ᬪᬬᬂ ᬲᬂᬯᬾᬕᬂ ᬲᬦ᭄ᬢᬵᬲᬂ ᬆᬧᬚ᭄ᬚᬦ᭄ᬢᬶ – ‘ᬅᬦᬶᬘ᭄ᬘᬵᬯ ᬓᬶᬭ, ᬪᭀ, ᬫᬬᬂ ᬲᬫᬵᬦᬵ ᬦᬶᬘ᭄ᬘᬫ᭄ᬳᬵᬢᬶ ᬅᬫᬜ᭄ᬜᬶᬫ᭄ᬳ. ᬅᬤ᭄ᬥᬸᬯᬵᬯ ᬓᬶᬭ, ᬪᭀ, ᬫᬬᬂ ᬲᬫᬵᬦᬵ ᬥᬸᬯᬫ᭄ᬳᬵᬢᬶ ᬅᬫᬜ᭄ᬜᬶᬫ᭄ᬳ. ᬅᬲᬲ᭄ᬲᬢᬵᬯ ᬓᬶᬭ, ᬪᭀ, ᬫᬬᬂ ᬲᬫᬵᬦᬵ ᬲᬲ᭄ᬲᬢᬫ᭄ᬳᬵᬢᬶ ᬅᬫᬜ᭄ᬜᬶᬫ᭄ᬳ. ᬫᬬᬫ᭄ᬧᬶ ᬓᬶᬭ, ᬪᭀ, ᬅᬦᬶᬘ᭄ᬘᬵ ᬅᬤ᭄ᬥᬸᬯᬵ ᬅᬲᬲ᭄ᬲᬢᬵ ᬲᬓ᭄ᬓᬵᬬᬧᬭᬶᬬᬵᬧᬦ᭄ᬦᬵ’ᬢᬶ. ᬏᬯᬂ ᬫᬳᬶᬤ᭄ᬥᬶᬓᭀ ᬔᭀ, ᬪᬶᬓ᭄ᬔᬯᬾ, ᬢᬣᬵᬕᬢᭀ ᬲᬤᬾᬯᬓᬲ᭄ᬲ ᬮᭀᬓᬲ᭄ᬲ, ᬏᬯᬂ ᬫᬳᬾᬲᬓ᭄ᬔᭀ, ᬏᬯᬂ ᬫᬳᬵᬦᬸᬪᬵᬯᭀ’’ᬢᬶ. ᬇᬤᬫᬯᭀᬘ ᬪᬕᬯᬵ…ᬧᬾ… ᬏᬢᬤᬯᭀᬘ ᬲᬢ᭄ᬣᬵ –

‘‘ᬬᬤᬵ ᬩᬸᬤ᭄ᬥᭀ ᬅᬪᬶᬜ᭄ᬜᬵᬬ, ᬥᬫ᭄ᬫᬘᬓ᭄ᬓᬂ ᬧᬯᬢ᭄ᬢᬬᬶ;

ᬲᬤᬾᬯᬓᬲ᭄ᬲ ᬮᭀᬓᬲ᭄ᬲ, ᬲᬢ᭄ᬣᬵ ᬅᬧ᭄ᬧᬝᬶᬧᬸᬕ᭄ᬕᬮᭀ.

‘‘ᬲᬓ᭄ᬓᬵᬬᬜ᭄ᬘ ᬦᬶᬭᭀᬥᬜ᭄ᬘ, ᬲᬓ᭄ᬓᬵᬬᬲ᭄ᬲ ᬘ ᬲᬫ᭄ᬪᬯᬂ;

ᬅᬭᬶᬬᬜ᭄ᬘᬝ᭄ᬞᬗ᭄ᬕᬶᬓᬂ ᬫᬕ᭄ᬕᬂ, ᬤᬸᬓ᭄ᬔᬹᬧᬲᬫᬕᬵᬫᬶᬦᬂ.

‘‘ᬬᬾᬧᬶ ᬤᬷᬖᬵᬬᬸᬓᬵ ᬤᬾᬯᬵ, ᬯᬡ᭄ᬡᬯᬦ᭄ᬢᭀ ᬬᬲᬲ᭄ᬲᬶᬦᭀ;

ᬪᬷᬢᬵ ᬲᬦ᭄ᬢᬵᬲᬫᬵᬧᬵᬤᬸᬂ, ᬲᬷᬳᬲ᭄ᬲᬾᬯᬶᬢᬭᬾ ᬫᬶᬕᬵ.

ᬅᬯᬷᬢᬶᬯᬢ᭄ᬢᬵ ᬲᬓ᭄ᬓᬵᬬᬂ, ᬅᬦᬶᬘ᭄ᬘᬵ ᬓᬶᬭ ᬪᭀ ᬫᬬᬂ;

ᬲᬸᬢ᭄ᬯᬵ ᬅᬭᬳᬢᭀ ᬯᬵᬓ᭄ᬬᬂ, ᬯᬶᬧ᭄ᬧᬫᬸᬢ᭄ᬢᬲ᭄ᬲ ᬢᬵᬤᬶᬦᭀ’’ᬢᬶ. ᬙᬝ᭄ᬞᬂ;

᭗. ᬔᬚ᭄ᬚᬦᬷᬬᬲᬸᬢ᭄ᬢᬂ

᭗᭙. ᬲᬵᬯᬢ᭄ᬣᬶᬦᬶᬤᬵᬦᬂ. ‘‘ᬬᬾ ᬳᬶ ᬓᬾᬘᬶ, ᬪᬶᬓ᭄ᬔᬯᬾ, ᬲᬫᬡᬵ ᬯᬵ ᬩ᭄ᬭᬵᬳ᭄ᬫᬡᬵ ᬯᬵ ᬅᬦᬾᬓᬯᬶᬳᬶᬢᬂ ᬧᬸᬩ᭄ᬩᬾᬦᬶᬯᬵᬲᬂ ᬅᬦᬸᬲ᭄ᬲᬭᬫᬵᬦᬵ ᬅᬦᬸᬲ᭄ᬲᬭᬦ᭄ᬢᬶ ᬲᬩ᭄ᬩᬾᬢᬾ ᬧᬜ᭄ᬘᬸᬧᬵᬤᬵᬦᬓ᭄ᬔᬦ᭄ᬥᬾ ᬅᬦᬸᬲ᭄ᬲᬭᬦ᭄ᬢᬶ ᬏᬢᬾᬲᬂ ᬯᬵ ᬅᬜ᭄ᬜᬢᬭᬂ. ᬓᬢᬫᬾ ᬧᬜ᭄ᬘ? ‘ᬏᬯᬂᬭᬹᬧᭀ ᬅᬳᭀᬲᬶᬂ ᬅᬢᬷᬢᬫᬤ᭄ᬥᬵᬦ’ᬦ᭄ᬢᬶ – ᬇᬢᬶ ᬯᬵ ᬳᬶ, ᬪᬶᬓ᭄ᬔᬯᬾ, ᬅᬦᬸᬲ᭄ᬲᬭᬫᬵᬦᭀ ᬭᬹᬧᬂᬬᬾᬯ ᬅᬦᬸᬲ᭄ᬲᬭᬢᬶ. ‘ᬏᬯᬂᬯᬾᬤᬦᭀ ᬅᬳᭀᬲᬶᬂ ᬅᬢᬷᬢᬫᬤ᭄ᬥᬵᬦ’ᬦ᭄ᬢᬶ – ᬇᬢᬶ ᬯᬵ ᬳᬶ, ᬪᬶᬓ᭄ᬔᬯᬾ, ᬅᬦᬸᬲ᭄ᬲᬭᬫᬵᬦᭀ ᬯᬾᬤᬦᬂᬬᬾᬯ ᬅᬦᬸᬲ᭄ᬲᬭᬢᬶ. ‘ᬏᬯᬂᬲᬜ᭄ᬜᭀ ᬅᬳᭀᬲᬶᬂ ᬅᬢᬷᬢᬫᬤ᭄ᬥᬵᬦ’ᬦ᭄ᬢᬶ… ‘ᬏᬯᬂᬲᬗ᭄ᬔᬵᬭᭀ ᬅᬳᭀᬲᬶᬂ ᬅᬢᬷᬢᬫᬤ᭄ᬥᬵᬦ’ᬦ᭄ᬢᬶ… ‘ᬏᬯᬂᬯᬶᬜ᭄ᬜᬵᬡᭀ ᬅᬳᭀᬲᬶᬂ ᬅᬢᬷᬢᬫᬤ᭄ᬥᬵᬦ’ᬦ᭄ᬢᬶ – ᬇᬢᬶ ᬯᬵ ᬳᬶ, ᬪᬶᬓ᭄ᬔᬯᬾ, ᬅᬦᬸᬲ᭄ᬲᬭᬫᬵᬦᭀ ᬯᬶᬜ᭄ᬜᬵᬡᬫᬾᬯ ᬅᬦᬸᬲ᭄ᬲᬭᬢᬶ’’.

‘‘ᬓᬶᬜ᭄ᬘ, ᬪᬶᬓ᭄ᬔᬯᬾ, ᬭᬹᬧᬂ ᬯᬤᬾᬣ? ᬭᬸᬧ᭄ᬧᬢᬷᬢᬶ ᬔᭀ, ᬪᬶᬓ᭄ᬔᬯᬾ, ᬢᬲ᭄ᬫᬵ ‘ᬭᬹᬧ’ᬦ᭄ᬢᬶ ᬯᬸᬘ᭄ᬘᬢᬶ. ᬓᬾᬦ ᬭᬸᬧ᭄ᬧᬢᬶ? ᬲᬷᬢᬾᬦᬧᬶ ᬭᬸᬧ᭄ᬧᬢᬶ, ᬉᬡ᭄ᬳᬾᬦᬧᬶ ᬭᬸᬧ᭄ᬧᬢᬶ, ᬚᬶᬖᬘ᭄ᬙᬵᬬᬧᬶ ᬭᬸᬧ᭄ᬧᬢᬶ, ᬧᬶᬧᬵᬲᬵᬬᬧᬶ ᬭᬸᬧ᭄ᬧᬢᬶ, ᬟᬂᬲᬫᬓᬲᬯᬵᬢᬵᬢᬧᬲᬭᬷᬲᬧᬲᬫ᭄ᬨᬲ᭄ᬲᬾᬦᬧᬶ [… ᬲᬶᬭᬶᬂᬲᬧᬲᬫ᭄ᬨᬲ᭄ᬲᬾᬦᬧᬶ (ᬲᬷ. ᬧᬷ.)] ᬭᬸᬧ᭄ᬧᬢᬶ. ᬭᬸᬧ᭄ᬧᬢᬷᬢᬶ ᬔᭀ, ᬪᬶᬓ᭄ᬔᬯᬾ, ᬢᬲ᭄ᬫᬵ ‘ᬭᬹᬧ’ᬦ᭄ᬢᬶ ᬯᬸᬘ᭄ᬘᬢᬶ.

‘‘ᬓᬶᬜ᭄ᬘ, ᬪᬶᬓ᭄ᬔᬯᬾ, ᬯᬾᬤᬦᬂ ᬯᬤᬾᬣ? ᬯᬾᬤᬬᬢᬷᬢᬶ ᬔᭀ, ᬪᬶᬓ᭄ᬔᬯᬾ, ᬢᬲ᭄ᬫᬵ ‘ᬯᬾᬤᬦᬵ’ᬢᬶ ᬯᬸᬘ᭄ᬘᬢᬶ. ᬓᬶᬜ᭄ᬘ ᬯᬾᬤᬬᬢᬶ? ᬲᬸᬔᬫ᭄ᬧᬶ ᬯᬾᬤᬬᬢᬶ, ᬤᬸᬓ᭄ᬔᬫ᭄ᬧᬶ ᬯᬾᬤᬬᬢᬶ, ᬅᬤᬸᬓ᭄ᬔᬫᬲᬸᬔᬫ᭄ᬧᬶ ᬯᬾᬤᬬᬢᬶ. ᬯᬾᬤᬬᬢᬷᬢᬶ ᬔᭀ, ᬪᬶᬓ᭄ᬔᬯᬾ, ᬢᬲ᭄ᬫᬵ ‘ᬯᬾᬤᬦᬵ’ᬢᬶ ᬯᬸᬘ᭄ᬘᬢᬶ.

‘‘ᬓᬶᬜ᭄ᬘ, ᬪᬶᬓ᭄ᬔᬯᬾ, ᬲᬜ᭄ᬜᬂ ᬯᬤᬾᬣ? ᬲᬜ᭄ᬚᬵᬦᬵᬢᬷᬢᬶ ᬔᭀ, ᬪᬶᬓ᭄ᬔᬯᬾ, ᬢᬲ᭄ᬫᬵ ‘ᬲᬜ᭄ᬜᬵ’ᬢᬶ ᬯᬸᬘ᭄ᬘᬢᬶ. ᬓᬶᬜ᭄ᬘ ᬲᬜ᭄ᬚᬵᬦᬵᬢᬶ? ᬦᬷᬮᬫ᭄ᬧᬶ ᬲᬜ᭄ᬚᬵᬦᬵᬢᬶ, ᬧᬷᬢᬓᬫ᭄ᬧᬶ ᬲᬜ᭄ᬚᬵᬦᬵᬢᬶ, ᬮᭀᬳᬶᬢᬓᬫ᭄ᬧᬶ ᬲᬜ᭄ᬚᬵᬦᬵᬢᬶ, ᬑᬤᬵᬢᬫ᭄ᬧᬶ ᬲᬜ᭄ᬚᬵᬦᬵᬢᬶ. ᬲᬜ᭄ᬚᬵᬦᬵᬢᬷᬢᬶ ᬔᭀ, ᬪᬶᬓ᭄ᬔᬯᬾ, ᬢᬲ᭄ᬫᬵ ‘ᬲᬜ᭄ᬜᬵ’ᬢᬶ ᬯᬸᬘ᭄ᬘᬢᬶ.

‘‘ᬓᬶᬜ᭄ᬘ, ᬪᬶᬓ᭄ᬔᬯᬾ, ᬲᬗ᭄ᬔᬵᬭᬾ ᬯᬤᬾᬣ? ᬲᬗ᭄ᬔᬢᬫᬪᬶᬲᬗ᭄ᬔᬭᭀᬦ᭄ᬢᬷᬢᬶ ᬔᭀ, ᬪᬶᬓ᭄ᬔᬯᬾ, ᬢᬲ᭄ᬫᬵ ‘ᬲᬗ᭄ᬔᬵᬭᬵ’ᬢᬶ ᬯᬸᬘ᭄ᬘᬢᬶ. ᬓᬶᬜ᭄ᬘ ᬲᬗ᭄ᬔᬢᬫᬪᬶᬲᬗ᭄ᬔᬭᭀᬦ᭄ᬢᬶ? ᬭᬹᬧᬂ ᬭᬹᬧᬢ᭄ᬢᬵᬬ [ᬭᬹᬧᬢ᭄ᬣᬵᬬ (ᬓ.)] ᬲᬗ᭄ᬔᬢᬫᬪᬶᬲᬗ᭄ᬔᬭᭀᬦ᭄ᬢᬶ, ᬯᬾᬤᬦᬂ ᬯᬾᬤᬦᬢ᭄ᬢᬵᬬ ᬲᬗ᭄ᬔᬢᬫᬪᬶᬲᬗ᭄ᬔᬭᭀᬦ᭄ᬢᬶ, ᬲᬜ᭄ᬜᬂ ᬲᬜ᭄ᬜᬢ᭄ᬢᬵᬬ ᬲᬗ᭄ᬔᬢᬫᬪᬶᬲᬗ᭄ᬔᬭᭀᬦ᭄ᬢᬶ, ᬲᬗ᭄ᬔᬵᬭᬾ ᬲᬗ᭄ᬔᬵᬭᬢ᭄ᬢᬵᬬ ᬲᬗ᭄ᬔᬢᬫᬪᬶᬲᬗ᭄ᬔᬭᭀᬦ᭄ᬢᬶ, ᬯᬶᬜ᭄ᬜᬵᬡᬂ ᬯᬶᬜ᭄ᬜᬵᬡᬢ᭄ᬢᬵᬬ ᬲᬗ᭄ᬔᬢᬫᬪᬶᬲᬗ᭄ᬔᬭᭀᬦ᭄ᬢᬶ. ᬲᬗ᭄ᬔᬢᬫᬪᬶᬲᬗ᭄ᬔᬭᭀᬦ᭄ᬢᬷᬢᬶ ᬔᭀ, ᬪᬶᬓ᭄ᬔᬯᬾ, ᬢᬲ᭄ᬫᬵ ‘ᬲᬗ᭄ᬔᬵᬭᬵ’ᬢᬶ ᬯᬸᬘ᭄ᬘᬢᬶ.

‘‘ᬓᬶᬜ᭄ᬘ, ᬪᬶᬓ᭄ᬔᬯᬾ, ᬯᬶᬜ᭄ᬜᬵᬡᬂ ᬯᬤᬾᬣ? ᬯᬶᬚᬵᬦᬵᬢᬷᬢᬶ ᬔᭀ, ᬪᬶᬓ᭄ᬔᬯᬾ, ᬢᬲ᭄ᬫᬵ ‘ᬯᬶᬜ᭄ᬜᬵᬡ’ᬦ᭄ᬢᬶ ᬯᬸᬘ᭄ᬘᬢᬶ. ᬓᬶᬜ᭄ᬘ ᬯᬶᬚᬵᬦᬵᬢᬶ? ᬅᬫ᭄ᬩᬶᬮᬫ᭄ᬧᬶ ᬯᬶᬚᬵᬦᬵᬢᬶ, ᬢᬶᬢ᭄ᬢᬓᬫ᭄ᬧᬶ ᬯᬶᬚᬵᬦᬵᬢᬶ, ᬓᬝᬸᬓᬫ᭄ᬧᬶ ᬯᬶᬚᬵᬦᬵᬢᬶ, ᬫᬥᬸᬭᬫ᭄ᬧᬶ ᬯᬶᬚᬵᬦᬵᬢᬶ, ᬔᬵᬭᬶᬓᬫ᭄ᬧᬶ ᬯᬶᬚᬵᬦᬵᬢᬶ, ᬅᬔᬵᬭᬶᬓᬫ᭄ᬧᬶ ᬯᬶᬚᬵᬦᬵᬢᬶ, ᬮᭀᬡᬶᬓᬫ᭄ᬧᬶ ᬯᬶᬚᬵᬦᬵᬢᬶ, ᬅᬮᭀᬡᬶᬓᬫ᭄ᬧᬶ ᬯᬶᬚᬵᬦᬵᬢᬶ. ᬯᬶᬚᬵᬦᬵᬢᬷᬢᬶ ᬔᭀ, ᬪᬶᬓ᭄ᬔᬯᬾ, ᬢᬲ᭄ᬫᬵ ‘ᬯᬶᬜ᭄ᬜᬵᬡ’ᬦ᭄ᬢᬶ ᬯᬸᬘ᭄ᬘᬢᬶ.

‘‘ᬢᬢ᭄ᬭ, ᬪᬶᬓ᭄ᬔᬯᬾ, ᬲᬸᬢᬯᬵ ᬅᬭᬶᬬᬲᬵᬯᬓᭀ ᬇᬢᬶ ᬧᬝᬶᬲᬜ᭄ᬘᬶᬓ᭄ᬔᬢᬶ – ‘ᬅᬳᬂ ᬔᭀ ᬏᬢᬭᬳᬶ ᬭᬹᬧᬾᬦ ᬔᬚ᭄ᬚᬵᬫᬶ. ᬅᬢᬷᬢᬫ᭄ᬧᬵᬳᬂ ᬅᬤ᭄ᬥᬵᬦᬂ ᬏᬯᬫᬾᬯ ᬭᬹᬧᬾᬦ ᬔᬚ᭄ᬚᬶᬂ, ᬲᬾᬬ᭄ᬬᬣᬵᬧᬶ ᬏᬢᬭᬳᬶ ᬧᬘ᭄ᬘᬸᬧ᭄ᬧᬦ᭄ᬦᬾᬦ ᬭᬹᬧᬾᬦ ᬔᬚ᭄ᬚᬵᬫᬶ. ᬅᬳᬜ᭄ᬘᬾᬯ ᬔᭀ ᬧᬦ ᬅᬦᬵᬕᬢᬂ ᬭᬹᬧᬂ ᬅᬪᬶᬦᬦ᭄ᬤᬾᬬ᭄ᬬᬂ, ᬅᬦᬵᬕᬢᬫ᭄ᬧᬵᬳᬂ ᬅᬤ᭄ᬥᬵᬦᬂ ᬏᬯᬫᬾᬯ ᬭᬹᬧᬾᬦ ᬔᬚ᭄ᬚᬾᬬ᭄ᬬᬂ, ᬲᬾᬬ᭄ᬬᬣᬵᬧᬶ ᬏᬢᬭᬳᬶ ᬧᬘ᭄ᬘᬸᬧ᭄ᬧᬦ᭄ᬦᬾᬦ ᬭᬹᬧᬾᬦ ᬔᬚ᭄ᬚᬵᬫᬷ’ᬢᬶ. ᬲᭀ ᬇᬢᬶ ᬧᬝᬶᬲᬗ᭄ᬔᬵᬬ ᬅᬢᬷᬢᬲ᭄ᬫᬶᬂ ᬭᬹᬧᬲ᭄ᬫᬶᬂ ᬅᬦᬧᬾᬓ᭄ᬔᭀ ᬳᭀᬢᬶ; ᬅᬦᬵᬕᬢᬂ ᬭᬹᬧᬂ ᬦᬵᬪᬶᬦᬦ᭄ᬤᬢᬶ; ᬧᬘ᭄ᬘᬸᬧ᭄ᬧᬦ᭄ᬦᬲ᭄ᬲ ᬭᬹᬧᬲ᭄ᬲ ᬦᬶᬩ᭄ᬩᬶᬤᬵᬬ ᬯᬶᬭᬵᬕᬵᬬ ᬦᬶᬭᭀᬥᬵᬬ ᬧᬝᬶᬧᬦ᭄ᬦᭀ ᬳᭀᬢᬶ.

‘‘‘ᬅᬳᬂ ᬔᭀ ᬏᬢᬭᬳᬶ ᬯᬾᬤᬦᬵᬬ ᬔᬚ᭄ᬚᬵᬫᬶ. ᬅᬢᬷᬢᬫ᭄ᬧᬵᬳᬂ ᬅᬤ᭄ᬥᬵᬦᬂ ᬏᬯᬫᬾᬯ ᬯᬾᬤᬦᬵᬬ ᬔᬚ᭄ᬚᬶᬂ, ᬲᬾᬬ᭄ᬬᬣᬵᬧᬶ ᬏᬢᬭᬳᬶ ᬧᬘ᭄ᬘᬸᬧ᭄ᬧᬦ᭄ᬦᬵᬬ ᬯᬾᬤᬦᬵᬬ ᬔᬚ᭄ᬚᬵᬫᬶ. ᬅᬳᬜ᭄ᬘᬾᬯ ᬔᭀ ᬧᬦ ᬅᬦᬵᬕᬢᬂ ᬯᬾᬤᬦᬂ ᬅᬪᬶᬦᬦ᭄ᬤᬾᬬ᭄ᬬᬂ; ᬅᬦᬵᬕᬢᬫ᭄ᬧᬵᬳᬂ ᬅᬤ᭄ᬥᬵᬦᬂ ᬏᬯᬫᬾᬯ ᬯᬾᬤᬦᬵᬬ ᬔᬚ᭄ᬚᬾᬬ᭄ᬬᬂ, ᬲᬾᬬ᭄ᬬᬣᬵᬧᬶ ᬏᬢᬭᬳᬶ ᬧᬘ᭄ᬘᬸᬧ᭄ᬧᬦ᭄ᬦᬵᬬ ᬯᬾᬤᬦᬵᬬ ᬔᬚ᭄ᬚᬵᬫᬷ’ᬢᬶ. ᬲᭀ ᬇᬢᬶ ᬧᬝᬶᬲᬗ᭄ᬔᬵᬬ ᬅᬢᬷᬢᬵᬬ ᬯᬾᬤᬦᬵᬬ ᬅᬦᬧᬾᬓ᭄ᬔᭀ ᬳᭀᬢᬶ; ᬅᬦᬵᬕᬢᬂ ᬯᬾᬤᬦᬂ ᬦᬵᬪᬶᬦᬦ᭄ᬤᬢᬶ; ᬧᬘ᭄ᬘᬸᬧ᭄ᬧᬦ᭄ᬦᬵᬬ ᬯᬾᬤᬦᬵᬬ ᬦᬶᬩ᭄ᬩᬶᬤᬵᬬ ᬯᬶᬭᬵᬕᬵᬬ ᬦᬶᬭᭀᬥᬵᬬ ᬧᬝᬶᬧᬦ᭄ᬦᭀ ᬳᭀᬢᬶ.

‘‘‘ᬅᬳᬂ ᬔᭀ ᬏᬢᬭᬳᬶ ᬲᬜ᭄ᬜᬵᬬ ᬔᬚ᭄ᬚᬵᬫᬶ…ᬧᬾ… ᬅᬳᬂ ᬔᭀ ᬏᬢᬭᬳᬶ ᬲᬗ᭄ᬔᬵᬭᬾᬳᬶ ᬔᬚ᭄ᬚᬵᬫᬶ. ᬅᬢᬷᬢᬫ᭄ᬧᬵᬳᬂ ᬅᬤ᭄ᬥᬵᬦᬂ ᬏᬯᬫᬾᬯ ᬲᬗ᭄ᬔᬵᬭᬾᬳᬶ ᬔᬚ᭄ᬚᬶᬂ, ᬲᬾᬬ᭄ᬬᬣᬵᬧᬶ ᬏᬢᬭᬳᬶ ᬧᬘ᭄ᬘᬸᬧ᭄ᬧᬦ᭄ᬦᬾᬳᬶ ᬲᬗ᭄ᬔᬵᬭᬾᬳᬶ ᬔᬚ᭄ᬚᬵᬫᬷᬢᬶ. ᬅᬳᬜ᭄ᬘᬾᬯ ᬔᭀ ᬧᬦ ᬅᬦᬵᬕᬢᬾ ᬲᬗ᭄ᬔᬵᬭᬾ ᬅᬪᬶᬦᬦ᭄ᬤᬾᬬ᭄ᬬᬂ; ᬅᬦᬵᬕᬢᬫ᭄ᬧᬵᬳᬂ ᬅᬤ᭄ᬥᬵᬦᬂ ᬏᬯᬫᬾᬯ ᬲᬗ᭄ᬔᬵᬭᬾᬳᬶ ᬔᬚ᭄ᬚᬾᬬ᭄ᬬᬂ, ᬲᬾᬬ᭄ᬬᬣᬵᬧᬶ ᬏᬢᬭᬳᬶ ᬧᬘ᭄ᬘᬸᬧ᭄ᬧᬦ᭄ᬦᬾᬳᬶ ᬲᬗ᭄ᬔᬵᬭᬾᬳᬶ ᬔᬚ᭄ᬚᬵᬫᬷ’ᬢᬶ. ᬲᭀ ᬇᬢᬶ ᬧᬝᬶᬲᬗ᭄ᬔᬵᬬ ᬅᬢᬷᬢᬾᬲᬸ ᬲᬗ᭄ᬔᬵᬭᬾᬲᬸ ᬅᬦᬧᬾᬓ᭄ᬔᭀ ᬳᭀᬢᬶ; ᬅᬦᬵᬕᬢᬾ ᬲᬗ᭄ᬔᬵᬭᬾ ᬦᬵᬪᬶᬦᬦ᭄ᬤᬢᬶ; ᬧᬘ᭄ᬘᬸᬧ᭄ᬧᬦ᭄ᬦᬵᬦᬂ ᬲᬗ᭄ᬔᬵᬭᬵᬦᬂ ᬦᬶᬩ᭄ᬩᬶᬤᬵᬬ ᬯᬶᬭᬵᬕᬵᬬ ᬦᬶᬭᭀᬥᬵᬬ ᬧᬝᬶᬧᬦ᭄ᬦᭀ ᬳᭀᬢᬶ.

‘‘‘ᬅᬳᬂ ᬔᭀ ᬏᬢᬭᬳᬶ ᬯᬶᬜ᭄ᬜᬵᬡᬾᬦ ᬔᬚ᭄ᬚᬵᬫᬶ. ᬅᬢᬷᬢᬫ᭄ᬧᬶ ᬅᬤ᭄ᬥᬵᬦᬂ ᬏᬯᬫᬾᬯ ᬯᬶᬜ᭄ᬜᬵᬡᬾᬦ ᬔᬚ᭄ᬚᬶᬂ, ᬲᬾᬬ᭄ᬬᬣᬵᬧᬶ ᬏᬢᬭᬳᬶ ᬧᬘ᭄ᬘᬸᬧ᭄ᬧᬦ᭄ᬦᬾᬦ ᬯᬶᬜ᭄ᬜᬵᬡᬾᬦ ᬔᬚ᭄ᬚᬵᬫᬶ. ᬅᬳᬜ᭄ᬘᬾᬯ ᬔᭀ ᬧᬦ ᬅᬦᬵᬕᬢᬂ ᬯᬶᬜ᭄ᬜᬵᬡᬂ ᬅᬪᬶᬦᬦ᭄ᬤᬾᬬ᭄ᬬᬂ; ᬅᬦᬵᬕᬢᬫ᭄ᬧᬵᬳᬂ ᬅᬤ᭄ᬥᬵᬦᬂ ᬏᬯᬫᬾᬯ ᬯᬶᬜ᭄ᬜᬵᬡᬾᬦ ᬔᬚ᭄ᬚᬾᬬ᭄ᬬᬂ, ᬲᬾᬬ᭄ᬬᬣᬵᬧᬶ ᬏᬢᬭᬳᬶ ᬧᬘ᭄ᬘᬸᬧ᭄ᬧᬦ᭄ᬦᬾᬦ ᬯᬶᬜ᭄ᬜᬵᬡᬾᬦ ᬔᬚ᭄ᬚᬵᬫᬷ’ᬢᬶ. ᬲᭀ ᬇᬢᬶ ᬧᬝᬶᬲᬗ᭄ᬔᬵᬬ ᬅᬢᬷᬢᬲ᭄ᬫᬶᬂ ᬯᬶᬜ᭄ᬜᬵᬡᬲ᭄ᬫᬶᬂ ᬅᬦᬧᬾᬓ᭄ᬔᭀ ᬳᭀᬢᬶ; ᬅᬦᬵᬕᬢᬂ ᬯᬶᬜ᭄ᬜᬵᬡᬂ ᬦᬵᬪᬶᬦᬦ᭄ᬤᬢᬶ; ᬧᬘ᭄ᬘᬸᬧ᭄ᬧᬦ᭄ᬦᬲ᭄ᬲ ᬯᬶᬜ᭄ᬜᬵᬡᬲ᭄ᬲ ᬦᬶᬩ᭄ᬩᬶᬤᬵᬬ ᬯᬶᬭᬵᬕᬵᬬ ᬦᬶᬭᭀᬥᬵᬬ ᬧᬝᬶᬧᬦ᭄ᬦᭀ ᬳᭀᬢᬶ.

‘‘ᬢᬂ ᬓᬶᬂ ᬫᬜ᭄ᬜᬣ, ᬪᬶᬓ᭄ᬔᬯᬾ, ᬭᬹᬧᬂ ᬦᬶᬘ᭄ᬘᬂ ᬯᬵ ᬅᬦᬶᬘ᭄ᬘᬂ ᬯᬵ’’ᬢᬶ? ‘‘ᬅᬦᬶᬘ᭄ᬘᬂ, ᬪᬦ᭄ᬢᬾ’’. ‘‘ᬬᬂ ᬧᬦᬵᬦᬶᬘ᭄ᬘᬂ ᬤᬸᬓ᭄ᬔᬂ ᬯᬵ ᬢᬂ ᬲᬸᬔᬂ ᬯᬵ’’ᬢᬶ? ‘‘ᬤᬸᬓ᭄ᬔᬂ, ᬪᬦ᭄ᬢᬾ’’. ‘‘ᬬᬂ ᬧᬦᬵᬦᬶᬘ᭄ᬘᬂ ᬤᬸᬓ᭄ᬔᬂ ᬯᬶᬧᬭᬶᬡᬵᬫᬥᬫ᭄ᬫᬂ, ᬓᬮ᭄ᬮᬂ ᬦᬸ ᬢᬂ ᬲᬫᬦᬸᬧᬲ᭄ᬲᬶᬢᬸᬂ – ‘ᬏᬢᬂ ᬫᬫ, ᬏᬲᭀᬳᬫᬲ᭄ᬫᬶ, ᬏᬲᭀ ᬫᬾ ᬅᬢ᭄ᬢᬵ’’’ᬢᬶ? ‘‘ᬦᭀ ᬳᬾᬢᬂ, ᬪᬦ᭄ᬢᬾ’’. ‘‘ᬯᬾᬤᬦᬵ … ᬲᬜ᭄ᬜᬵ… ᬲᬗ᭄ᬔᬵᬭᬵ… ᬯᬶᬜ᭄ᬜᬵᬡᬂ ᬦᬶᬘ᭄ᬘᬂ ᬯᬵ ᬅᬦᬶᬘ᭄ᬘᬂ ᬯᬵ’’ᬢᬶ? ‘‘ᬅᬦᬶᬘ᭄ᬘᬂ, ᬪᬦ᭄ᬢᬾ’’. ‘‘ᬬᬂ ᬧᬦᬵᬦᬶᬘ᭄ᬘᬂ, ᬤᬸᬓ᭄ᬔᬂ ᬯᬵ ᬢᬂ ᬲᬸᬔᬂ ᬯᬵ’’ᬢᬶ? ‘‘ᬤᬸᬓ᭄ᬔᬂ, ᬪᬦ᭄ᬢᬾ’’. ‘‘ᬬᬂ ᬧᬦᬵᬦᬶᬘ᭄ᬘᬂ ᬤᬸᬓ᭄ᬔᬂ ᬯᬶᬧᬭᬶᬡᬵᬫᬥᬫ᭄ᬫᬂ, ᬓᬮ᭄ᬮᬂ ᬦᬸ ᬢᬂ ᬲᬫᬦᬸᬧᬲ᭄ᬲᬶᬢᬸᬂ – ‘ᬏᬢᬂ ᬫᬫ, ᬏᬲᭀᬳᬫᬲ᭄ᬫᬶ, ᬏᬲᭀ ᬫᬾ ᬅᬢ᭄ᬢᬵ’’’ᬢᬶ? ‘‘ᬦᭀ ᬳᬾᬢᬂ, ᬪᬦ᭄ᬢᬾ’’. ‘‘ᬢᬲ᭄ᬫᬵᬢᬶᬳ, ᬪᬶᬓ᭄ᬔᬯᬾ, ᬬᬂ ᬓᬶᬜ᭄ᬘᬶ ᬭᬹᬧᬂ ᬅᬢᬷᬢᬵᬦᬵᬕᬢᬧᬘ᭄ᬘᬸᬧ᭄ᬧᬦ᭄ᬦᬂ ᬅᬚ᭄ᬛᬢ᭄ᬢᬂ ᬯᬵ ᬩᬳᬶᬤ᭄ᬥᬵ ᬯᬵ ᬑᬮ᬴ᬵᬭᬶᬓᬂ ᬯᬵ ᬲᬸᬔᬸᬫᬂ ᬯᬵ ᬳᬷᬦᬂ ᬯᬵ ᬧᬡᬷᬢᬂ ᬯᬵ ᬬᬂ ᬤᬹᬭᬾ ᬲᬦ᭄ᬢᬶᬓᬾ ᬯᬵ, ᬲᬩ᭄ᬩᬂ ᬭᬹᬧᬂ – ‘ᬦᬾᬢᬂ ᬫᬫ, ᬦᬾᬲᭀᬳᬫᬲ᭄ᬫᬶ, ᬦ ᬫᬾᬲᭀ ᬅᬢ᭄ᬢᬵ’ᬢᬶ ᬏᬯᬫᬾᬢᬂ ᬬᬣᬵᬪᬹᬢᬂ ᬲᬫ᭄ᬫᬧ᭄ᬧᬜ᭄ᬜᬵᬬ ᬤᬝ᭄ᬞᬩ᭄ᬩᬂ. ᬬᬵ ᬓᬵᬘᬶ ᬯᬾᬤᬦᬵ… ᬬᬵ ᬓᬵᬘᬶ ᬲᬜ᭄ᬜᬵ… ᬬᬾ ᬓᬾᬘᬶ ᬲᬗ᭄ᬔᬵᬭᬵ… ᬬᬂ ᬓᬶᬜ᭄ᬘᬶ ᬯᬶᬜ᭄ᬜᬵᬡᬂ ᬅᬢᬷᬢᬵᬦᬵᬕᬢᬧᬘ᭄ᬘᬸᬧ᭄ᬧᬦ᭄ᬦᬂ…ᬧᬾ… ᬬᬂ ᬤᬹᬭᬾ ᬲᬦ᭄ᬢᬶᬓᬾ ᬯᬵ, ᬲᬩ᭄ᬩᬂ ᬯᬶᬜ᭄ᬜᬵᬡᬂ – ‘ᬦᬾᬢᬂ ᬫᬫ, ᬦᬾᬲᭀᬳᬫᬲ᭄ᬫᬶ, ᬦ ᬫᬾᬲᭀ ᬅᬢ᭄ᬢᬵ’ᬢᬶ ᬏᬯᬫᬾᬢᬂ ᬬᬣᬵᬪᬹᬢᬂ ᬲᬫ᭄ᬫᬧ᭄ᬧᬜ᭄ᬜᬵᬬ ᬤᬝ᭄ᬞᬩ᭄ᬩᬂ’’.

‘‘ᬅᬬᬂ ᬯᬸᬘ᭄ᬘᬢᬶ, ᬪᬶᬓ᭄ᬔᬯᬾ, ᬅᬭᬶᬬᬲᬵᬯᬓᭀ ᬅᬧᬘᬶᬦᬵᬢᬶ, ᬦᭀ ᬆᬘᬶᬦᬵᬢᬶ; ᬧᬚᬳᬢᬶ [ᬦᭀ (ᬲᬷ.)], ᬦ ᬉᬧᬵᬤᬶᬬᬢᬶ; ᬯᬶᬲᬶᬦᬾᬢᬶ [ᬦᭀ (ᬲᬷ.)], ᬦ ᬉᬲ᭄ᬲᬶᬦᬾᬢᬶ; ᬯᬶᬥᬹᬧᬾᬢᬶ [ᬦᭀ (ᬲᬷ.)], ᬦ ᬲᬦ᭄ᬥᬹᬧᬾᬢᬶ. ᬓᬶᬜ᭄ᬘ ᬅᬧᬘᬶᬦᬵᬢᬶ, ᬦᭀ ᬆᬘᬶᬦᬵᬢᬶ? ᬭᬹᬧᬂ ᬅᬧᬘᬶᬦᬵᬢᬶ, ᬦᭀ ᬆᬘᬶᬦᬵᬢᬶ; ᬯᬾᬤᬦᬂ … ᬲᬜ᭄ᬜᬂ… ᬲᬗ᭄ᬔᬵᬭᬾ… ᬯᬶᬜ᭄ᬜᬵᬡᬂ ᬅᬧᬘᬶᬦᬵᬢᬶ, ᬦᭀ ᬆᬘᬶᬦᬵᬢᬶ. ᬓᬶᬜ᭄ᬘ ᬧᬚᬳᬢᬶ, ᬦ ᬉᬧᬵᬤᬶᬬᬢᬶ? ᬭᬹᬧᬂ ᬧᬚᬳᬢᬶ, ᬦ ᬉᬧᬵᬤᬶᬬᬢᬶ; ᬯᬾᬤᬦᬂ… ᬲᬜ᭄ᬜᬂ… ᬲᬗ᭄ᬔᬵᬭᬾ… ᬯᬶᬜ᭄ᬜᬵᬡᬂ ᬧᬚᬳᬢᬶ, ᬦ ᬉᬧᬵᬤᬶᬬᬢᬶ. ᬓᬶᬜ᭄ᬘ ᬯᬶᬲᬶᬦᬾᬢᬶ, ᬦ ᬉᬲ᭄ᬲᬶᬦᬾᬢᬶ? ᬭᬹᬧᬂ ᬯᬶᬲᬶᬦᬾᬢᬶ, ᬦ ᬉᬲ᭄ᬲᬶᬦᬾᬢᬶ; ᬯᬾᬤᬦᬂ… ᬲᬜ᭄ᬜᬂ… ᬲᬗ᭄ᬔᬵᬭᬾ… ᬯᬶᬜ᭄ᬜᬵᬡᬂ ᬯᬶᬲᬶᬦᬾᬢᬶ, ᬦ ᬉᬲ᭄ᬲᬶᬦᬾᬢᬶ. ᬓᬶᬜ᭄ᬘ ᬯᬶᬥᬹᬧᬾᬢᬶ, ᬦ ᬲᬦ᭄ᬥᬹᬧᬾᬢᬶ? ᬭᬹᬧᬂ ᬯᬶᬥᬹᬧᬾᬢᬶ, ᬦ ᬲᬦ᭄ᬥᬹᬧᬾᬢᬶ; ᬯᬾᬤᬦᬂ… ᬲᬜ᭄ᬜᬂ… ᬲᬗ᭄ᬔᬵᬭᬾ… ᬯᬶᬜ᭄ᬜᬵᬡᬂ ᬯᬶᬥᬹᬧᬾᬢᬶ, ᬦ ᬲᬦ᭄ᬥᬹᬧᬾᬢᬶ.

‘‘ᬅᬬᬂ ᬯᬸᬘ᭄ᬘᬢᬶ, ᬪᬶᬓ᭄ᬔᬯᬾ, ᬪᬶᬓ᭄ᬔᬸ ᬦᬾᬯᬵᬘᬶᬦᬵᬢᬶ ᬦ ᬅᬧᬘᬶᬦᬵᬢᬶ, ᬅᬧᬘᬶᬦᬶᬢ᭄ᬯᬵ ᬞᬶᬢᭀ ᬦᬾᬯ ᬧᬚᬳᬢᬶ ᬦ ᬉᬧᬵᬤᬶᬬᬢᬶ, ᬧᬚᬳᬶᬢ᭄ᬯᬵ ᬞᬶᬢᭀ ᬦᬾᬯ ᬯᬶᬲᬶᬦᬾᬢᬶ ᬦ ᬉᬲ᭄ᬲᬶᬦᬾᬢᬶ, ᬯᬶᬲᬶᬦᬾᬢ᭄ᬯᬵ ᬞᬶᬢᭀ ᬦᬾᬯ ᬯᬶᬥᬹᬧᬾᬢᬶ ᬦ ᬲᬦ᭄ᬥᬹᬧᬾᬢᬶ. ᬯᬶᬥᬹᬧᬾᬢ᭄ᬯᬵ ᬞᬶᬢᭀ ᬓᬶᬜ᭄ᬘ ᬦᬾᬯᬵᬘᬶᬦᬵᬢᬶ ᬦ ᬅᬧᬘᬶᬦᬵᬢᬶ? ᬅᬧᬘᬶᬦᬶᬢ᭄ᬯᬵ ᬞᬶᬢᭀ ᬭᬹᬧᬂ ᬦᬾᬯᬵᬘᬶᬦᬵᬢᬶ ᬦ ᬅᬧᬘᬶᬦᬵᬢᬶ; ᬅᬧᬘᬶᬦᬶᬢ᭄ᬯᬵ ᬞᬶᬢᭀ ᬯᬾᬤᬦᬂ… ᬲᬜ᭄ᬜᬂ… ᬲᬗ᭄ᬔᬵᬭᬾ… ᬯᬶᬜ᭄ᬜᬵᬡᬂ ᬦᬾᬯᬵᬘᬶᬦᬵᬢᬶ ᬦ ᬅᬧᬘᬶᬦᬵᬢᬶ. ᬅᬧᬘᬶᬦᬶᬢ᭄ᬯᬵ ᬞᬶᬢᭀ ᬓᬶᬜ᭄ᬘ ᬦᬾᬯ ᬧᬚᬳᬢᬶ ᬦ ᬉᬧᬵᬤᬶᬬᬢᬶ? ᬧᬚᬳᬶᬢ᭄ᬯᬵ ᬞᬶᬢᭀ ᬭᬹᬧᬂ ᬦᬾᬯ ᬧᬚᬳᬢᬶ ᬦ ᬉᬧᬵᬤᬶᬬᬢᬶ; ᬧᬚᬳᬶᬢ᭄ᬯᬵ ᬞᬶᬢᭀ ᬯᬾᬤᬦᬂ… ᬲᬜ᭄ᬜᬂ… ᬲᬗ᭄ᬔᬵᬭᬾ… ᬯᬶᬜ᭄ᬜᬵᬡᬂ ᬦᬾᬯ ᬧᬚᬳᬢᬶ ᬦ ᬉᬧᬵᬤᬶᬬᬢᬶ. ᬧᬚᬳᬶᬢ᭄ᬯᬵ ᬞᬶᬢᭀ ᬓᬶᬜ᭄ᬘ ᬦᬾᬯ ᬯᬶᬲᬶᬦᬾᬢᬶ ᬦ ᬉᬲ᭄ᬲᬶᬦᬾᬢᬶ? ᬯᬶᬲᬶᬦᬾᬢ᭄ᬯᬵ ᬞᬶᬢᭀ ᬭᬹᬧᬂ ᬦᬾᬯ ᬯᬶᬲᬶᬦᬾᬢᬶ ᬦ ᬉᬲ᭄ᬲᬶᬦᬾᬢᬶ; ᬯᬶᬲᬶᬦᬾᬢ᭄ᬯᬵ ᬞᬶᬢᭀ ᬯᬾᬤᬦᬂ… ᬲᬜ᭄ᬜᬂ… ᬲᬗ᭄ᬔᬵᬭᬾ… ᬯᬶᬜ᭄ᬜᬵᬡᬂ ᬦᬾᬯ ᬯᬶᬲᬶᬦᬾᬢᬶ ᬦ ᬉᬲ᭄ᬲᬶᬦᬾᬢᬶ. ᬯᬶᬲᬶᬦᬾᬢ᭄ᬯᬵ ᬞᬶᬢᭀ ᬓᬶᬜ᭄ᬘ ᬦᬾᬯ ᬯᬶᬥᬹᬧᬾᬢᬶ ᬦ ᬲᬦ᭄ᬥᬹᬧᬾᬢᬶ? ᬯᬶᬥᬹᬧᬾᬢ᭄ᬯᬵ ᬞᬶᬢᭀ ᬭᬹᬧᬂ ᬦᬾᬯ ᬯᬶᬥᬹᬧᬾᬢᬶ ᬦ ᬲᬦ᭄ᬥᬹᬧᬾᬢᬶ; ᬯᬶᬥᬹᬧᬾᬢ᭄ᬯᬵ ᬞᬶᬢᭀ ᬯᬾᬤᬦᬂ… ᬲᬜ᭄ᬜᬂ… ᬲᬗ᭄ᬔᬵᬭᬾ… ᬯᬶᬜ᭄ᬜᬵᬡᬂ ᬦᬾᬯ ᬯᬶᬥᬹᬧᬾᬢᬶ ᬦ ᬲᬦ᭄ᬥᬹᬧᬾᬢᬶ. ᬯᬶᬥᬹᬧᬾᬢ᭄ᬯᬵ ᬞᬶᬢᭀ ᬏᬯᬂᬯᬶᬫᬸᬢ᭄ᬢᬘᬶᬢ᭄ᬢᬂ ᬔᭀ, ᬪᬶᬓ᭄ᬔᬯᬾ, ᬪᬶᬓ᭄ᬔᬸᬂ ᬲᬇᬦ᭄ᬤᬵ ᬤᬾᬯᬵ ᬲᬩ᭄ᬭᬳ᭄ᬫᬓᬵ ᬲᬧᬚᬵᬧᬢᬶᬓᬵ ᬆᬭᬓᬵᬯ ᬦᬫᬲ᭄ᬲᬦ᭄ᬢᬶ –

‘‘ᬦᬫᭀ ᬢᬾ ᬧᬸᬭᬶᬲᬵᬚᬜ᭄ᬜ, ᬦᬫᭀ ᬢᬾ ᬧᬸᬭᬶᬲᬸᬢ᭄ᬢᬫ;

ᬬᬲ᭄ᬲ ᬢᬾ ᬦᬵᬪᬶᬚᬵᬦᬵᬫ, ᬬᬫ᭄ᬧᬶ ᬦᬶᬲ᭄ᬲᬵᬬ ᬛᬵᬬᬲᬷ’’ᬢᬶ. ᬲᬢ᭄ᬢᬫᬂ;

᭘. ᬧᬶᬡ᭄ᬟᭀᬮ᭄ᬬᬲᬸᬢ᭄ᬢᬂ

᭘᭐. ᬏᬓᬂ ᬲᬫᬬᬂ ᬪᬕᬯᬵ ᬲᬓ᭄ᬓᬾᬲᬸ ᬯᬶᬳᬭᬢᬶ ᬓᬧᬶᬮᬯᬢ᭄ᬣᬸᬲ᭄ᬫᬶᬂ ᬦᬶᬕ᭄ᬭᭀᬥᬵᬭᬵᬫᬾ. ᬅᬣ ᬔᭀ ᬪᬕᬯᬵ ᬓᬶᬲ᭄ᬫᬶᬜ᭄ᬘᬶᬤᬾᬯ ᬧᬓᬭᬡᬾ ᬪᬶᬓ᭄ᬔᬸᬲᬗ᭄ᬖᬂ ᬧᬡᬵᬫᬾᬢ᭄ᬯᬵ ᬧᬸᬩ᭄ᬩᬡ᭄ᬳᬲᬫᬬᬂ ᬦᬶᬯᬵᬲᬾᬢ᭄ᬯᬵ ᬧᬢ᭄ᬢᬘᬷᬯᬭᬫᬵᬤᬵᬬ ᬓᬧᬶᬮᬯᬢ᭄ᬣᬸᬂ ᬧᬶᬡ᭄ᬟᬵᬬ ᬧᬵᬯᬶᬲᬶ. ᬓᬧᬶᬮᬯᬢ᭄ᬣᬸᬲ᭄ᬫᬶᬂ ᬧᬶᬡ᭄ᬟᬵᬬ ᬘᬭᬶᬢ᭄ᬯᬵ ᬧᬘ᭄ᬙᬵᬪᬢ᭄ᬢᬂ ᬧᬶᬡ᭄ᬟᬧᬵᬢᬧᬝᬶᬓ᭄ᬓᬦ᭄ᬢᭀ ᬬᬾᬦ ᬫᬳᬵᬯᬦᬂ ᬢᬾᬦᬸᬧᬲᬗ᭄ᬓᬫᬶ ᬤᬶᬯᬵᬯᬶᬳᬵᬭᬵᬬ. ᬫᬳᬵᬯᬦᬂ ᬅᬚ᭄ᬛᭀᬕᬵᬳᬾᬢ᭄ᬯᬵ ᬩᬾᬮᬸᬯᬮᬝ᭄ᬞᬶᬓᬵᬬ ᬫᬹᬮᬾ ᬤᬶᬯᬵᬯᬶᬳᬵᬭᬂ ᬦᬶᬲᬷᬤᬶ.

ᬅᬣ ᬔᭀ ᬪᬕᬯᬢᭀ ᬭᬳᭀᬕᬢᬲ᭄ᬲ ᬧᬝᬶᬲᬮ᭄ᬮᬷᬦᬲ᭄ᬲ ᬏᬯᬂ ᬘᬾᬢᬲᭀ ᬧᬭᬶᬯᬶᬢᬓ᭄ᬓᭀ ᬉᬤᬧᬵᬤᬶ – ‘‘ᬫᬬᬵ ᬔᭀ ᬪᬶᬓ᭄ᬔᬸᬲᬗ᭄ᬖᭀ ᬧᬩᬵᬮ᬴᭄ᬳᭀ. ᬲᬦ᭄ᬢᬾᬢ᭄ᬣ ᬪᬶᬓ᭄ᬔᬹ ᬦᬯᬵ ᬅᬘᬶᬭᬧᬩ᭄ᬩᬚᬶᬢᬵ ᬅᬥᬸᬦᬵᬕᬢᬵ ᬇᬫᬂ ᬥᬫ᭄ᬫᬯᬶᬦᬬᬂ. ᬢᬾᬲᬂ ᬫᬫᬂ ᬅᬧᬲ᭄ᬲᬦ᭄ᬢᬵᬦᬂ ᬲᬶᬬᬵ ᬅᬜ᭄ᬜᬣᬢ᭄ᬢᬂ ᬲᬶᬬᬵ ᬯᬶᬧᬭᬶᬡᬵᬫᭀ. ᬲᬾᬬ᭄ᬬᬣᬵᬧᬶ ᬦᬵᬫ ᬯᬘ᭄ᬙᬲ᭄ᬲ ᬢᬭᬸᬡᬲ᭄ᬲ ᬫᬵᬢᬭᬂ ᬅᬧᬲ᭄ᬲᬦ᭄ᬢᬲ᭄ᬲ ᬲᬶᬬᬵ ᬅᬜ᭄ᬜᬣᬢ᭄ᬢᬂ ᬲᬶᬬᬵ ᬯᬶᬧᬭᬶᬡᬵᬫᭀ, ᬏᬯᬫᬾᬯ ᬲᬦ᭄ᬢᬾᬢ᭄ᬣ ᬪᬶᬓ᭄ᬔᬹ ᬦᬯᬵ ᬅᬘᬶᬭᬧᬩ᭄ᬩᬚᬶᬢᬵ ᬅᬥᬸᬦᬵᬕᬢᬵ ᬇᬫᬂ ᬥᬫ᭄ᬫᬯᬶᬦᬬᬂ ᬢᬾᬲᬂ ᬫᬫᬂ ᬅᬧᬲ᭄ᬲᬦ᭄ᬢᬵᬦᬂ ᬲᬶᬬᬵ ᬅᬜ᭄ᬜᬣᬢ᭄ᬢᬂ ᬲᬶᬬᬵ ᬯᬶᬧᬭᬶᬡᬵᬫᭀ. ᬲᬾᬬ᭄ᬬᬣᬵᬧᬶ ᬦᬵᬫ ᬩᬷᬚᬵᬦᬂ ᬢᬭᬸᬡᬵᬦᬂ ᬉᬤᬓᬂ ᬅᬮᬪᬦ᭄ᬢᬵᬦᬂ ᬲᬶᬬᬵ ᬅᬜ᭄ᬜᬣᬢ᭄ᬢᬂ ᬲᬶᬬᬵ ᬯᬶᬧᬭᬶᬡᬵᬫᭀ, ᬏᬯᬫᬾᬯ ᬲᬦ᭄ᬢᬾᬢ᭄ᬣ…ᬧᬾ… ᬢᬾᬲᬂ ᬫᬫᬂ ᬅᬮᬪᬦ᭄ᬢᬵᬦᬂ ᬤᬲ᭄ᬲᬦᬵᬬ ᬲᬶᬬᬵ ᬅᬜ᭄ᬜᬣᬢ᭄ᬢᬂ ᬲᬶᬬᬵ ᬯᬶᬧᬭᬶᬡᬵᬫᭀ. ᬬᬂᬦᬹᬦᬵᬳᬂ ᬬᬣᬾᬯ ᬫᬬᬵ ᬧᬸᬩ᭄ᬩᬾ ᬪᬶᬓ᭄ᬔᬸᬲᬗ᭄ᬖᭀ ᬅᬦᬸᬕ᭄ᬕᬳᬶᬢᭀ, ᬏᬯᬫᬾᬯ ᬏᬢᬭᬳᬶ ᬅᬦᬸᬕ᭄ᬕᬡ᭄ᬳᬾᬬ᭄ᬬᬂ ᬪᬶᬓ᭄ᬔᬸᬲᬗ᭄ᬖ’’ᬦ᭄ᬢᬶ.

ᬅᬣ ᬔᭀ ᬩ᭄ᬭᬳ᭄ᬫᬵ ᬲᬳᬫ᭄ᬧᬢᬶ ᬪᬕᬯᬢᭀ ᬘᬾᬢᬲᬵ ᬘᬾᬢᭀᬧᬭᬶᬯᬶᬢᬓ᭄ᬓᬫᬜ᭄ᬜᬵᬬ – ᬲᬾᬬ᭄ᬬᬣᬵᬧᬶ ᬦᬵᬫ ᬩᬮᬯᬵ ᬧᬸᬭᬶᬲᭀ ᬲᬫᬶᬜ᭄ᬚᬶᬢᬂ [ᬲᬫ᭄ᬫᬶᬜ᭄ᬚᬶᬢᬂ (ᬲᬷ. ᬲ᭄ᬬᬵ. ᬓᬂ. ᬧᬷ.)] ᬯᬵ ᬩᬵᬳᬂ ᬧᬲᬵᬭᬾᬬ᭄ᬬ ᬧᬲᬵᬭᬶᬢᬂ ᬯᬵ ᬩᬵᬳᬂ ᬲᬫᬶᬜ᭄ᬚᬾᬬ᭄ᬬ ᬏᬯᬫᬾᬯ – ᬩ᭄ᬭᬳ᭄ᬫᬮᭀᬓᬾ ᬅᬦ᭄ᬢᬭᬳᬶᬢᭀ ᬪᬕᬯᬢᭀ ᬧᬸᬭᬢᭀ ᬧᬵᬢᬸᬭᬳᭀᬲᬶ. ᬅᬣ ᬔᭀ ᬩ᭄ᬭᬳ᭄ᬫᬵ ᬲᬳᬫ᭄ᬧᬢᬶ ᬏᬓᬂᬲᬂ ᬉᬢ᭄ᬢᬭᬵᬲᬗ᭄ᬕᬂ ᬓᬭᬶᬢ᭄ᬯᬵ ᬬᬾᬦ ᬪᬕᬯᬵ ᬢᬾᬦᬜ᭄ᬚᬮᬶᬂ ᬧᬡᬵᬫᬾᬢ᭄ᬯᬵ ᬪᬕᬯᬦ᭄ᬢᬂ ᬏᬢᬤᬯᭀᬘ – ‘‘ᬏᬯᬫᬾᬢᬂ, ᬪᬕᬯᬵ; ᬏᬯᬫᬾᬢᬂ, ᬲᬸᬕᬢ! ᬪᬕᬯᬢᭀ, ᬪᬦ᭄ᬢᬾ, ᬪᬶᬓ᭄ᬔᬸᬲᬗ᭄ᬖᭀ ᬧᬩᬵᬮ᬴᭄ᬳᭀ. ᬲᬦ᭄ᬢᬾᬢ᭄ᬣ ᬪᬶᬓ᭄ᬔᬹ ᬦᬯᬵ ᬅᬘᬶᬭᬧᬩ᭄ᬩᬚᬶᬢᬵ ᬅᬥᬸᬦᬵᬕᬢᬵ ᬇᬫᬂ ᬥᬫ᭄ᬫᬯᬶᬦᬬᬂ. ᬢᬾᬲᬂ ᬪᬕᬯᬦ᭄ᬢᬂ ᬅᬧᬲ᭄ᬲᬦ᭄ᬢᬵᬦᬂ ᬲᬶᬬᬵ ᬅᬜ᭄ᬜᬣᬢ᭄ᬢᬂ ᬲᬶᬬᬵ ᬯᬶᬧᬭᬶᬡᬵᬫᭀ. ᬲᬾᬬ᭄ᬬᬣᬵᬧᬶ ᬦᬵᬫ ᬯᬘ᭄ᬙᬲ᭄ᬲ ᬢᬭᬸᬡᬲ᭄ᬲ ᬫᬵᬢᬭᬂ ᬅᬧᬲ᭄ᬲᬦ᭄ᬢᬲ᭄ᬲ ᬲᬶᬬᬵ ᬅᬜ᭄ᬜᬣᬢ᭄ᬢᬂ ᬲᬶᬬᬵ ᬯᬶᬧᬭᬶᬡᬵᬫᭀ, ᬏᬯᬫᬾᬯ ᬲᬦ᭄ᬢᬾᬢ᭄ᬣ ᬪᬶᬓ᭄ᬔᬹ ᬦᬯᬵ ᬅᬘᬶᬭᬧᬩ᭄ᬩᬚᬶᬢᬵ ᬅᬥᬸᬦᬵᬕᬢᬵ ᬇᬫᬂ ᬥᬫ᭄ᬫᬯᬶᬦᬬᬂ ᬢᬾᬲᬂ ᬪᬕᬯᬦ᭄ᬢᬂ ᬅᬧᬲ᭄ᬲᬦ᭄ᬢᬵᬦᬂ ᬲᬶᬬᬵ ᬅᬜ᭄ᬜᬣᬢ᭄ᬢᬂ ᬲᬶᬬᬵ ᬯᬶᬧᬭᬶᬡᬵᬫᭀ. ᬲᬾᬬ᭄ᬬᬣᬵᬧᬶ ᬦᬵᬫ ᬩᬷᬚᬵᬦᬂ ᬢᬭᬸᬡᬵᬦᬂ ᬉᬤᬓᬂ ᬅᬮᬪᬦ᭄ᬢᬵᬦᬂ ᬲᬶᬬᬵ ᬅᬜ᭄ᬜᬣᬢ᭄ᬢᬂ ᬲᬶᬬᬵ ᬯᬶᬧᬭᬶᬡᬵᬫᭀ, ᬏᬯᬫᬾᬯ ᬲᬦ᭄ᬢᬾᬢ᭄ᬣ ᬪᬶᬓ᭄ᬔᬹ ᬦᬯᬵ ᬅᬘᬶᬭᬧᬩ᭄ᬩᬚᬶᬢᬵ ᬅᬥᬸᬦᬵᬕᬢᬵ ᬇᬫᬂ ᬥᬫ᭄ᬫᬯᬶᬦᬬᬂ, ᬢᬾᬲᬂ ᬪᬕᬯᬦ᭄ᬢᬂ ᬅᬮᬪᬦ᭄ᬢᬵᬦᬂ ᬤᬲ᭄ᬲᬦᬵᬬ ᬲᬶᬬᬵ ᬅᬜ᭄ᬜᬣᬢ᭄ᬢᬂ ᬲᬶᬬᬵ ᬯᬶᬧᬭᬶᬡᬵᬫᭀ. ᬅᬪᬶᬦᬦ᭄ᬤᬢᬸ, ᬪᬦ᭄ᬢᬾ, ᬪᬕᬯᬵ ᬪᬶᬓ᭄ᬔᬸᬲᬗ᭄ᬖᬂ; ᬅᬪᬶᬯᬤᬢᬸ, ᬪᬦ᭄ᬢᬾ, ᬪᬕᬯᬵ ᬪᬶᬓ᭄ᬔᬸᬲᬗ᭄ᬖᬂ. ᬬᬣᬾᬯ ᬪᬕᬯᬢᬵ ᬧᬸᬩ᭄ᬩᬾ ᬪᬶᬓ᭄ᬔᬸᬲᬗ᭄ᬖᭀ ᬅᬦᬸᬕ᭄ᬕᬳᬶᬢᭀ, ᬏᬯᬫᬾᬯ ᬏᬢᬭᬳᬶ ᬅᬦᬸᬕ᭄ᬕᬡ᭄ᬳᬵᬢᬸ ᬪᬶᬓ᭄ᬔᬸᬲᬗ᭄ᬖ’’ᬦ᭄ᬢᬶ.

ᬅᬥᬶᬯᬵᬲᬾᬲᬶ ᬪᬕᬯᬵ ᬢᬸᬡ᭄ᬳᬷᬪᬵᬯᬾᬦ. ᬅᬣ ᬔᭀ ᬩ᭄ᬭᬳ᭄ᬫᬵ ᬲᬳᬫ᭄ᬧᬢᬶ ᬪᬕᬯᬢᭀ ᬅᬥᬶᬯᬵᬲᬦᬂ ᬯᬶᬤᬶᬢ᭄ᬯᬵ ᬪᬕᬯᬦ᭄ᬢᬂ ᬅᬪᬶᬯᬵᬤᬾᬢ᭄ᬯᬵ ᬧᬤᬓ᭄ᬔᬶᬡᬂ ᬓᬢ᭄ᬯᬵ ᬢᬢ᭄ᬣᬾᬯᬦ᭄ᬢᬭᬥᬵᬬᬶ.

ᬅᬣ ᬔᭀ ᬪᬕᬯᬵ ᬲᬵᬬᬦ᭄ᬳᬲᬫᬬᬂ ᬧᬝᬶᬲᬮ᭄ᬮᬵᬦᬵ ᬯᬸᬝ᭄ᬞᬶᬢᭀ ᬬᬾᬦ ᬦᬶᬕ᭄ᬭᭀᬥᬵᬭᬵᬫᭀ ᬢᬾᬦᬸᬧᬲᬗ᭄ᬓᬫᬶ; ᬉᬧᬲᬗ᭄ᬓᬫᬶᬢ᭄ᬯᬵ ᬧᬜ᭄ᬜᬢ᭄ᬢᬾ ᬆᬲᬦᬾ ᬦᬶᬲᬷᬤᬶ. ᬦᬶᬲᬚ᭄ᬚ ᬔᭀ ᬪᬕᬯᬵ ᬢᬣᬵᬭᬹᬧᬂ ᬇᬤ᭄ᬥᬵᬪᬶᬲᬗ᭄ᬔᬵᬭᬂ ᬅᬪᬶᬲᬗ᭄ᬔᬵᬲᬶ [ᬅᬪᬶᬲᬗ᭄ᬔᬵᬭᬾᬲᬶ (ᬲ᭄ᬬᬵ. ᬓᬂ.), ᬅᬪᬶᬲᬗ᭄ᬔᬵᬬᬶ (ᬧᬷ.), ᬅᬪᬶᬲᬗ᭄ᬔᬭᭀᬢᬶ (ᬓ.)] ᬬᬣᬵ ᬢᬾ ᬪᬶᬓ᭄ᬔᬹ (ᬏᬓᬤ᭄ᬯᬷᬳᬶᬓᬵᬬ ᬲᬵᬭᬚ᭄ᬚᬫᬵᬦᬭᬹᬧᬵ ᬬᬾᬦᬵᬳᬂ [ᬬᬾᬦ ᬪᬕᬯᬵ (?)] ᬢᬾᬦᬸᬧᬲᬗ᭄ᬓᬫᬾᬬ᭄ᬬᬸᬂ. ᬢᬾᬧᬶ ᬪᬶᬓ᭄ᬔᬹ ) [( ) ᬲᬷ. ᬲ᭄ᬬᬵ. ᬓᬂ. ᬧᭀᬢ᭄ᬣᬓᬾᬲᬸ ᬦᬢ᭄ᬣᬶ] ᬏᬓᬤ᭄ᬯᬷᬳᬶᬓᬵᬬ ᬲᬵᬭᬚ᭄ᬚᬫᬵᬦᬭᬹᬧᬵ ᬬᬾᬦ ᬪᬕᬯᬵ ᬢᬾᬦᬸᬧᬲᬗ᭄ᬓᬫᬶᬂᬲᬸ; ᬉᬧᬲᬗ᭄ᬓᬫᬶᬢ᭄ᬯᬵ ᬪᬕᬯᬦ᭄ᬢᬂ ᬅᬪᬶᬯᬵᬤᬾᬢ᭄ᬯᬵ ᬏᬓᬫᬦ᭄ᬢᬂ ᬦᬶᬲᬷᬤᬶᬂᬲᬸ. ᬏᬓᬫᬦ᭄ᬢᬂ ᬦᬶᬲᬶᬦ᭄ᬦᬾ ᬔᭀ ᬢᬾ ᬪᬶᬓ᭄ᬔᬹ ᬪᬕᬯᬵ ᬏᬢᬤᬯᭀᬘ –

‘‘ᬅᬦ᭄ᬢᬫᬶᬤᬂ, ᬪᬶᬓ᭄ᬔᬯᬾ, ᬚᬷᬯᬶᬓᬵᬦᬂ ᬬᬤᬶᬤᬂ ᬧᬶᬡ᭄ᬟᭀᬮ᭄ᬬᬂ. ᬅᬪᬶᬲᬵᬧᭀᬬᬂ, ᬪᬶᬓ᭄ᬔᬯᬾ, ᬮᭀᬓᬲ᭄ᬫᬶᬂ ᬧᬶᬡ᭄ᬟᭀᬮᭀ ᬯᬶᬘᬭᬲᬶ ᬧᬢ᭄ᬢᬧᬵᬡᬷᬢᬶ. ᬢᬜ᭄ᬘ ᬔᭀ ᬏᬢᬂ, ᬪᬶᬓ᭄ᬔᬯᬾ, ᬓᬸᬮᬧᬸᬢ᭄ᬢᬵ ᬉᬧᬾᬦ᭄ᬢᬶ ᬅᬢ᭄ᬣᬯᬲᬶᬓᬵ, ᬅᬢ᭄ᬣᬯᬲᬂ ᬧᬝᬶᬘ᭄ᬘ; ᬦᬾᬯ ᬭᬵᬚᬵᬪᬶᬦᬷᬢᬵ, ᬦ ᬘᭀᬭᬵᬪᬶᬦᬷᬢᬵ, ᬦ ᬇᬡᬝ᭄ᬝᬵ, ᬦ ᬪᬬᬝ᭄ᬝᬵ, ᬦ ᬆᬚᬷᬯᬶᬓᬵᬧᬓᬢᬵ; ᬅᬧᬶ ᬘ ᬔᭀ ᬑᬢᬶᬡ᭄ᬡᬵᬫ᭄ᬳ ᬚᬵᬢᬶᬬᬵ ᬚᬭᬵᬬ ᬫᬭᬡᬾᬦ ᬲᭀᬓᬾᬳᬶ ᬧᬭᬶᬤᬾᬯᬾᬳᬶ ᬤᬸᬓ᭄ᬔᬾᬳᬶ ᬤᭀᬫᬦᬲ᭄ᬲᬾᬳᬶ ᬉᬧᬵᬬᬵᬲᬾᬳᬶ ᬤᬸᬓ᭄ᬔᭀᬢᬶᬡ᭄ᬡᬵ ᬤᬸᬓ᭄ᬔᬧᬭᬾᬢᬵ ᬅᬧ᭄ᬧᬾᬯ ᬦᬵᬫ ᬇᬫᬲ᭄ᬲ ᬓᬾᬯᬮᬲ᭄ᬲ ᬤᬸᬓ᭄ᬔᬓ᭄ᬔᬦ᭄ᬥᬲ᭄ᬲ ᬅᬦ᭄ᬢᬓᬶᬭᬶᬬᬵ ᬧᬜ᭄ᬜᬵᬬᬾᬣᬵᬢᬶ.

‘‘ᬏᬯᬂ ᬧᬩ᭄ᬩᬚᬶᬢᭀ ᬘᬵᬬᬂ, ᬪᬶᬓ᭄ᬔᬯᬾ, ᬓᬸᬮᬧᬸᬢ᭄ᬢᭀ. ᬲᭀ ᬘ ᬳᭀᬢᬶ ᬅᬪᬶᬚ᭄ᬛᬵᬮᬸ ᬓᬵᬫᬾᬲᬸ ᬢᬶᬩ᭄ᬩᬲᬵᬭᬵᬕᭀ ᬩ᭄ᬬᬵᬧᬦ᭄ᬦᬘᬶᬢ᭄ᬢᭀ ᬧᬤᬸᬝ᭄ᬞᬫᬦᬲᬗ᭄ᬓᬧ᭄ᬧᭀ ᬫᬸᬝ᭄ᬞᬲ᭄ᬲᬢᬶ ᬅᬲᬫ᭄ᬧᬚᬵᬦᭀ ᬅᬲᬫᬵᬳᬶᬢᭀ ᬯᬶᬩ᭄ᬪᬦ᭄ᬢᬘᬶᬢ᭄ᬢᭀ ᬧᬵᬓᬢᬶᬦ᭄ᬤ᭄ᬭᬶᬬᭀ. ᬲᬾᬬ᭄ᬬᬣᬵᬧᬶ, ᬪᬶᬓ᭄ᬔᬯᬾ, ᬙᬯᬵᬮᬵᬢᬂ ᬉᬪᬢᭀᬧᬤᬶᬢ᭄ᬢᬂ ᬫᬚ᭄ᬛᬾ ᬕᬹᬣᬕᬢᬂ, ᬦᬾᬯ ᬕᬵᬫᬾ ᬓᬝ᭄ᬞᬢ᭄ᬣᬂ ᬨᬭᬢᬶ, ᬦᬵᬭᬜ᭄ᬜᬾ ᬓᬝ᭄ᬞᬢ᭄ᬣᬂ ᬨᬭᬢᬶ. ᬢᬣᬹᬧᬫᬵᬳᬂ, ᬪᬶᬓ᭄ᬔᬯᬾ, ᬇᬫᬂ ᬧᬸᬕ᭄ᬕᬮᬂ ᬯᬤᬵᬫᬶ ᬕᬶᬳᬶᬪᭀᬕᬵ ᬘ ᬧᬭᬶᬳᬷᬦᭀ, ᬲᬵᬫᬜ᭄ᬜᬢ᭄ᬣᬜ᭄ᬘ ᬦ ᬧᬭᬶᬧᬹᬭᬾᬢᬶ.

‘‘ᬢᬬᭀᬫᬾ, ᬪᬶᬓ᭄ᬔᬯᬾ, ᬅᬓᬸᬲᬮᬯᬶᬢᬓ᭄ᬓᬵ – ᬓᬵᬫᬯᬶᬢᬓ᭄ᬓᭀ, ᬩ᭄ᬬᬵᬧᬵᬤᬯᬶᬢᬓ᭄ᬓᭀ, ᬯᬶᬳᬶᬂᬲᬵᬯᬶᬢᬓ᭄ᬓᭀ. ᬇᬫᬾ ᬘ ᬪᬶᬓ᭄ᬔᬯᬾ, ᬢᬬᭀ ᬅᬓᬸᬲᬮᬯᬶᬢᬓ᭄ᬓᬵ ᬓ᭄ᬯ ᬅᬧᬭᬶᬲᬾᬲᬵ ᬦᬶᬭᬸᬚ᭄ᬛᬦ᭄ᬢᬶ? ᬘᬢᬹᬲᬸ ᬯᬵ ᬲᬢᬶᬧᬝ᭄ᬞᬵᬦᬾᬲᬸ ᬲᬸᬧ᭄ᬧᬢᬶᬝ᭄ᬞᬶᬢᬘᬶᬢ᭄ᬢᬲ᭄ᬲ ᬯᬶᬳᬭᬢᭀ ᬅᬦᬶᬫᬶᬢ᭄ᬢᬂ ᬯᬵ ᬲᬫᬵᬥᬶᬂ ᬪᬵᬯᬬᬢᭀ. ᬬᬵᬯᬜ᭄ᬘᬶᬤᬂ, ᬪᬶᬓ᭄ᬔᬯᬾ, ᬅᬮᬫᬾᬯ ᬅᬦᬶᬫᬶᬢ᭄ᬢᭀ ᬲᬫᬵᬥᬶ ᬪᬵᬯᬾᬢᬸᬂ. ᬅᬦᬶᬫᬶᬢ᭄ᬢᭀ, ᬪᬶᬓ᭄ᬔᬯᬾ, ᬲᬫᬵᬥᬶ ᬪᬵᬯᬶᬢᭀ ᬩᬳᬸᬮᬷᬓᬢᭀ ᬫᬳᬧ᭄ᬨᬮᭀ ᬳᭀᬢᬶ ᬫᬳᬵᬦᬶᬲᬂᬲᭀ.

‘‘ᬤ᭄ᬯᬾᬫᬵ, ᬪᬶᬓ᭄ᬔᬯᬾ, ᬤᬶᬝ᭄ᬞᬶᬬᭀ – ᬪᬯᬤᬶᬝ᭄ᬞᬶ ᬘ ᬯᬶᬪᬯᬤᬶᬝ᭄ᬞᬶ ᬘ. ᬢᬢ᭄ᬭ ᬔᭀ, ᬪᬶᬓ᭄ᬔᬯᬾ, ᬲᬸᬢᬯᬵ ᬅᬭᬶᬬᬲᬵᬯᬓᭀ ᬇᬢᬶ ᬧᬝᬶᬲᬜ᭄ᬘᬶᬓ᭄ᬔᬢᬶ – ‘ᬅᬢ᭄ᬣᬶ ᬦᬸ ᬔᭀ ᬢᬂ ᬓᬶᬜ᭄ᬘᬶ ᬮᭀᬓᬲ᭄ᬫᬶᬂ ᬬᬫᬳᬂ ᬉᬧᬵᬤᬶᬬᬫᬵᬦᭀ ᬦ ᬯᬚ᭄ᬚᬯᬵ ᬅᬲ᭄ᬲ’ᬦ᭄ᬢᬶ? ᬲᭀ ᬏᬯᬂ ᬧᬚᬵᬦᬵᬢᬶ – ‘ᬦᬢ᭄ᬣᬶ ᬦᬸ ᬔᭀ ᬢᬂ ᬓᬶᬜ᭄ᬘᬶ ᬮᭀᬓᬲ᭄ᬫᬶᬂ ᬬᬫᬳᬂ ᬉᬧᬵᬤᬶᬬᬫᬵᬦᭀ ᬦ ᬯᬚ᭄ᬚᬯᬵ ᬅᬲ᭄ᬲᬂ. ᬅᬳᬜ᭄ᬳᬶ ᬭᬹᬧᬜ᭄ᬜᬾᬯ ᬉᬧᬵᬤᬶᬬᬫᬵᬦᭀ ᬉᬧᬵᬤᬶᬬᬾᬬ᭄ᬬᬂ ᬯᬾᬤᬦᬜ᭄ᬜᬾᬯ… ᬲᬜ᭄ᬜᬜ᭄ᬜᬾᬯ… ᬲᬗ᭄ᬔᬵᬭᬾᬬᬾᬯ ᬯᬶᬜ᭄ᬜᬵᬡᬜ᭄ᬜᬾᬯ ᬉᬧᬵᬤᬶᬬᬫᬵᬦᭀ ᬉᬧᬵᬤᬶᬬᬾᬬ᭄ᬬᬂ. ᬢᬲ᭄ᬲ ᬫᬾ ᬅᬲ᭄ᬲ [ᬅᬬᬂ (ᬓ.)] ᬉᬧᬵᬤᬵᬦᬧᬘ᭄ᬘᬬᬵ ᬪᬯᭀ; ᬪᬯᬧᬘ᭄ᬘᬬᬵ ᬚᬵᬢᬶ; ᬚᬵᬢᬶᬧᬘ᭄ᬘᬬᬵ ᬚᬭᬵᬫᬭᬡᬂ ᬲᭀᬓᬧᬭᬶᬤᬾᬯᬤᬸᬓ᭄ᬔᬤᭀᬫᬦᬲ᭄ᬲᬸᬧᬵᬬᬵᬲᬵ ᬲᬫ᭄ᬪᬯᬾᬬ᭄ᬬᬸᬂ. ᬏᬯᬫᬾᬢᬲ᭄ᬲ ᬓᬾᬯᬮᬲ᭄ᬲ ᬤᬸᬓ᭄ᬔᬓ᭄ᬔᬦ᭄ᬥᬲ᭄ᬲ ᬲᬫᬸᬤᬬᭀ ᬅᬲ᭄ᬲᬵ’’’ᬢᬶ.

‘‘ᬢᬂ ᬓᬶᬂ ᬫᬜ᭄ᬜᬣ, ᬪᬶᬓ᭄ᬔᬯᬾ, ᬭᬹᬧᬂ ᬦᬶᬘ᭄ᬘᬂ ᬯᬵ ᬅᬦᬶᬘ᭄ᬘᬂ ᬯᬵ’’ᬢᬶ? ‘‘ᬅᬦᬶᬘ᭄ᬘᬂ, ᬪᬦ᭄ᬢᬾ’’. ‘‘ᬬᬂ ᬧᬦᬵᬦᬶᬘ᭄ᬘᬂ ᬤᬸᬓ᭄ᬔᬂ ᬯᬵ ᬢᬂ ᬲᬸᬔᬂ ᬯᬵ’’ᬢᬶ? ‘‘ᬤᬸᬓ᭄ᬔᬂ, ᬪᬦ᭄ᬢᬾ’’. ‘‘ᬬᬂ ᬧᬦᬵᬦᬶᬘ᭄ᬘᬂ ᬤᬸᬓ᭄ᬔᬂ ᬯᬶᬧᬭᬶᬡᬵᬫᬥᬫ᭄ᬫᬂ ᬓᬮ᭄ᬮᬂ ᬦᬸ ᬢᬂ ᬲᬫᬦᬸᬧᬲ᭄ᬲᬶᬢᬸᬂ – ‘ᬏᬢᬂ ᬫᬫ, ᬏᬲᭀᬳᬫᬲ᭄ᬫᬶ, ᬏᬲᭀ ᬫᬾ ᬅᬢ᭄ᬢᬵ’’’ᬢᬶ? ‘‘ᬦᭀ ᬳᬾᬢᬂ, ᬪᬦ᭄ᬢᬾ’’. ‘‘ᬯᬾᬤᬦᬵ… ᬲᬜ᭄ᬜᬵ… ᬲᬗ᭄ᬔᬵᬭᬵ… ᬯᬶᬜ᭄ᬜᬵᬡᬂ…ᬧᬾ… ᬢᬲ᭄ᬫᬵᬢᬶᬳ, ᬪᬶᬓ᭄ᬔᬯᬾ, ᬏᬯᬂ ᬧᬲ᭄ᬲᬂ… ᬦᬵᬧᬭᬂ ᬇᬢ᭄ᬣᬢ᭄ᬢᬵᬬᬵᬢᬶ ᬧᬚᬵᬦᬵᬢᬷ’’ᬢᬶ. ᬅᬝ᭄ᬞᬫᬂ.

᭙. ᬧᬵᬮᬶᬮᬾᬬ᭄ᬬᬲᬸᬢ᭄ᬢᬂ

᭘᭑. ᬏᬓᬂ ᬲᬫᬬᬂ ᬪᬕᬯᬵ ᬓᭀᬲᬫ᭄ᬩᬶᬬᬂ ᬯᬶᬳᬭᬢᬶ ᬖᭀᬲᬶᬢᬵᬭᬵᬫᬾ. ᬅᬣ ᬔᭀ ᬪᬕᬯᬵ ᬧᬸᬩ᭄ᬩᬡ᭄ᬳᬲᬫᬬᬂ ᬦᬶᬯᬵᬲᬾᬢ᭄ᬯᬵ ᬧᬢ᭄ᬢᬘᬷᬯᬭᬫᬵᬤᬵᬬ ᬓᭀᬲᬫ᭄ᬩᬶᬂ ᬧᬶᬡ᭄ᬟᬵᬬ ᬧᬵᬯᬶᬲᬶ. ᬓᭀᬲᬫ᭄ᬩᬶᬬᬂ ᬧᬶᬡ᭄ᬟᬵᬬ ᬘᬭᬶᬢ᭄ᬯᬵ ᬧᬘ᭄ᬙᬵᬪᬢ᭄ᬢᬂ ᬧᬶᬡ᭄ᬟᬧᬵᬢᬧᬝᬶᬓ᭄ᬓᬦ᭄ᬢᭀ ᬲᬵᬫᬂ ᬲᬾᬦᬵᬲᬦᬂ ᬲᬂᬲᬵᬫᬾᬢ᭄ᬯᬵ ᬧᬢ᭄ᬢᬘᬷᬯᬭᬫᬵᬤᬵᬬ ᬅᬦᬵᬫᬦ᭄ᬢᬾᬢ᭄ᬯᬵ ᬉᬧᬝ᭄ᬞᬵᬓᬾ ᬅᬦᬧᬮᭀᬓᬾᬢ᭄ᬯᬵ ᬪᬶᬓ᭄ᬔᬸᬲᬗ᭄ᬖᬂ ᬏᬓᭀ ᬅᬤᬸᬢᬶᬬᭀ ᬘᬵᬭᬶᬓᬂ ᬧᬓ᭄ᬓᬵᬫᬶ.

ᬅᬣ ᬔᭀ ᬅᬜ᭄ᬜᬢᬭᭀ ᬪᬶᬓ᭄ᬔᬸ ᬅᬘᬶᬭᬧᬓ᭄ᬓᬦ᭄ᬢᬲ᭄ᬲ ᬪᬕᬯᬢᭀ ᬬᬾᬦᬵᬬᬲ᭄ᬫᬵ ᬆᬦᬦ᭄ᬤᭀ ᬢᬾᬦᬸᬧᬲᬗ᭄ᬓᬫᬶ; ᬉᬧᬲᬗ᭄ᬓᬫᬶᬢ᭄ᬯᬵ ᬆᬬᬲ᭄ᬫᬦ᭄ᬢᬂ ᬆᬦᬦ᭄ᬤᬂ ᬏᬢᬤᬯᭀᬘ – ‘‘ᬏᬲᬵᬯᬸᬲᭀ, ᬆᬦᬦ᭄ᬤ, ᬪᬕᬯᬵ ᬲᬵᬫᬂ ᬲᬾᬦᬵᬲᬦᬂ ᬲᬂᬲᬵᬫᬾᬢ᭄ᬯᬵ ᬧᬢ᭄ᬢᬘᬷᬯᬭᬫᬵᬤᬵᬬ ᬅᬦᬵᬫᬦ᭄ᬢᬾᬢ᭄ᬯᬵ ᬉᬧᬝ᭄ᬞᬵᬓᬾ ᬅᬦᬧᬮᭀᬓᬾᬢ᭄ᬯᬵ ᬪᬶᬓ᭄ᬔᬸᬲᬗ᭄ᬖᬂ ᬏᬓᭀ ᬅᬤᬸᬢᬶᬬᭀ ᬘᬵᬭᬶᬓᬂ ᬧᬓ᭄ᬓᬦ᭄ᬢᭀ’’ᬢᬶ. ‘‘ᬬᬲ᭄ᬫᬶᬂ, ᬆᬯᬸᬲᭀ, ᬲᬫᬬᬾ ᬪᬕᬯᬵ ᬲᬵᬫᬂ ᬲᬾᬦᬵᬲᬦᬂ ᬲᬂᬲᬵᬫᬾᬢ᭄ᬯᬵ ᬧᬢ᭄ᬢᬘᬷᬯᬭᬫᬵᬤᬵᬬ ᬅᬦᬵᬫᬦ᭄ᬢᬾᬢ᭄ᬯᬵ ᬉᬧᬝ᭄ᬞᬵᬓᬾ ᬅᬦᬧᬮᭀᬓᬾᬢ᭄ᬯᬵ ᬪᬶᬓ᭄ᬔᬸᬲᬗ᭄ᬖᬂ ᬏᬓᭀ ᬅᬤᬸᬢᬶᬬᭀ ᬘᬵᬭᬶᬓᬂ ᬧᬓ᭄ᬓᬫᬢᬶ, ᬏᬓᭀᬯ ᬪᬕᬯᬵ ᬢᬲ᭄ᬫᬶᬂ ᬲᬫᬬᬾ ᬯᬶᬳᬭᬶᬢᬸᬓᬵᬫᭀ ᬳᭀᬢᬶ; ᬦ ᬪᬕᬯᬵ ᬢᬲ᭄ᬫᬶᬂ ᬲᬫᬬᬾ ᬓᬾᬦᬘᬶ ᬅᬦᬸᬩᬦ᭄ᬥᬶᬢᬩ᭄ᬩᭀ ᬳᭀᬢᬷ’’ᬢᬶ.

ᬅᬣ ᬔᭀ ᬪᬕᬯᬵ ᬅᬦᬸᬧᬸᬩ᭄ᬩᬾᬦ ᬘᬵᬭᬶᬓᬂ ᬘᬭᬫᬵᬦᭀ ᬬᬾᬦ ᬧᬵᬮᬶᬮᬾᬬ᭄ᬬᬓᬂ [ᬧᬵᬭᬶᬮᬾᬬ᭄ᬬᬓᬂ (ᬲᬷ. ᬧᬷ.)] ᬢᬤᬯᬲᬭᬶ. ᬢᬢ᭄ᬭ ᬲᬸᬤᬂ ᬪᬕᬯᬵ ᬧᬵᬮᬶᬮᬾᬬ᭄ᬬᬓᬾ ᬯᬶᬳᬭᬢᬶ ᬪᬤ᭄ᬤᬲᬵᬮᬫᬹᬮᬾ. ᬅᬣ ᬔᭀ ᬲᬫ᭄ᬩᬳᬸᬮᬵ ᬪᬶᬓ᭄ᬔᬹ ᬬᬾᬦᬵᬬᬲ᭄ᬫᬵ ᬆᬦᬦ᭄ᬤᭀ ᬢᬾᬦᬸᬧᬲᬗ᭄ᬓᬫᬶᬂᬲᬸ; ᬉᬧᬲᬗ᭄ᬓᬫᬶᬢ᭄ᬯᬵ ᬆᬬᬲ᭄ᬫᬢᬵ ᬆᬦᬦ᭄ᬤᬾᬦ ᬲᬤ᭄ᬥᬶᬂ ᬲᬫ᭄ᬫᭀᬤᬶᬂᬲᬸ. ᬲᬫ᭄ᬫᭀᬤᬦᬷᬬᬂ ᬓᬣᬂ ᬲᬵᬭᬡᬷᬬᬂ ᬯᬷᬢᬶᬲᬵᬭᬾᬢ᭄ᬯᬵ ᬏᬓᬫᬦ᭄ᬢᬂ ᬦᬶᬲᬷᬤᬶᬂᬲᬸ. ᬏᬓᬫᬦ᭄ᬢᬂ ᬦᬶᬲᬶᬦ᭄ᬦᬵ ᬔᭀ ᬢᬾ ᬪᬶᬓ᭄ᬔᬹ ᬆᬬᬲ᭄ᬫᬦ᭄ᬢᬂ ᬆᬦᬦ᭄ᬤᬂ ᬏᬢᬤᬯᭀᬘᬸᬂ – ‘‘ᬘᬶᬭᬲ᭄ᬲᬸᬢᬵ ᬔᭀ ᬦᭀ, ᬆᬯᬸᬲᭀ ᬆᬦᬦ᭄ᬤ, ᬪᬕᬯᬢᭀ ᬲᬫ᭄ᬫᬸᬔᬵ ᬥᬫ᭄ᬫᬷ ᬓᬣᬵ; ᬇᬘ᭄ᬙᬵᬫ ᬫᬬᬂ, ᬆᬯᬸᬲᭀ ᬆᬦᬦ᭄ᬤ, ᬪᬕᬯᬢᭀ ᬲᬫ᭄ᬫᬸᬔᬵ ᬥᬫ᭄ᬫᬶᬂ ᬓᬣᬂ ᬲᭀᬢᬸ’’ᬦ᭄ᬢᬶ.

ᬅᬣ ᬔᭀ ᬆᬬᬲ᭄ᬫᬵ ᬆᬦᬦ᭄ᬤᭀ ᬢᬾᬳᬶ ᬪᬶᬓ᭄ᬔᬹᬳᬶ ᬲᬤ᭄ᬥᬶᬂ ᬬᬾᬦ ᬧᬵᬮᬶᬮᬾᬬ᭄ᬬᬓᬂ ᬪᬤ᭄ᬤᬲᬵᬮᬫᬹᬮᬂ ᬬᬾᬦ ᬪᬕᬯᬵ ᬢᬾᬦᬸᬧᬲᬗ᭄ᬓᬫᬶ; ᬉᬧᬲᬗ᭄ᬓᬫᬶᬢ᭄ᬯᬵ ᬪᬕᬯᬦ᭄ᬢᬂ ᬅᬪᬶᬯᬵᬤᬾᬢ᭄ᬯᬵ ᬏᬓᬫᬦ᭄ᬢᬂ ᬦᬶᬲᬷᬤᬶ. ᬏᬓᬫᬦ᭄ᬢᬂ ᬦᬶᬲᬶᬦ᭄ᬦᬾ ᬔᭀ ᬢᬾ ᬪᬶᬓ᭄ᬔᬹ ᬪᬕᬯᬵ ᬥᬫ᭄ᬫᬶᬬᬵ ᬓᬣᬵᬬ ᬲᬦ᭄ᬤᬲ᭄ᬲᬾᬲᬶ ᬲᬫᬵᬤᬧᬾᬲᬶ ᬲᬫᬸᬢ᭄ᬢᬾᬚᬾᬲᬶ ᬲᬫ᭄ᬧᬳᬂᬲᬾᬲᬶ. ᬢᬾᬦ ᬔᭀ ᬧᬦ ᬲᬫᬬᬾᬦ ᬅᬜ᭄ᬜᬢᬭᬲ᭄ᬲ ᬪᬶᬓ᭄ᬔᬸᬦᭀ ᬏᬯᬂ ᬘᬾᬢᬲᭀ ᬧᬭᬶᬯᬶᬢᬓ᭄ᬓᭀ ᬉᬤᬧᬵᬤᬶ – ‘‘ᬓᬣᬂ ᬦᬸ ᬔᭀ ᬚᬵᬦᬢᭀ ᬓᬣᬂ ᬧᬲ᭄ᬲᬢᭀ ᬅᬦᬦ᭄ᬢᬭᬵ ᬆᬲᬯᬵᬦᬂ ᬔᬬᭀ ᬳᭀᬢᬷ’’ᬢᬶ? ᬅᬣ ᬔᭀ ᬪᬕᬯᬵ ᬢᬲ᭄ᬲ ᬪᬶᬓ᭄ᬔᬸᬦᭀ ᬘᬾᬢᬲᬵ ᬘᬾᬢᭀᬧᬭᬶᬯᬶᬢᬓ᭄ᬓᬫᬜ᭄ᬜᬵᬬ ᬪᬶᬓ᭄ᬔᬹ ᬆᬫᬦ᭄ᬢᬾᬲᬶ – ‘‘ᬯᬶᬘᬬᬲᭀ ᬤᬾᬲᬶᬢᭀ, ᬪᬶᬓ᭄ᬔᬯᬾ, ᬫᬬᬵ ᬥᬫ᭄ᬫᭀ; ᬯᬶᬘᬬᬲᭀ ᬤᬾᬲᬶᬢᬵ ᬘᬢ᭄ᬢᬵᬭᭀ ᬲᬢᬶᬧᬝ᭄ᬞᬵᬦᬵ; ᬯᬶᬘᬬᬲᭀ ᬤᬾᬲᬶᬢᬵ ᬘᬢ᭄ᬢᬵᬭᭀ ᬲᬫ᭄ᬫᬧ᭄ᬧᬥᬵᬦᬵ; ᬯᬶᬘᬬᬲᭀ ᬤᬾᬲᬶᬢᬵ ᬘᬢ᭄ᬢᬵᬭᭀ ᬇᬤ᭄ᬥᬶᬧᬵᬤᬵ; ᬯᬶᬘᬬᬲᭀ ᬤᬾᬲᬶᬢᬵᬦᬶ ᬧᬜ᭄ᬘᬶᬦ᭄ᬤ᭄ᬭᬶᬬᬵᬦᬶ; ᬯᬶᬘᬬᬲᭀ ᬤᬾᬲᬶᬢᬵᬦᬶ ᬧᬜ᭄ᬘ ᬩᬮᬵᬦᬶ; ᬯᬶᬘᬬᬲᭀ ᬤᬾᬲᬶᬢᬵ ᬲᬢ᭄ᬢᬩᭀᬚ᭄ᬛᬗ᭄ᬕᬵ; ᬯᬶᬘᬬᬲᭀ ᬤᬾᬲᬶᬢᭀ ᬅᬭᬶᬬᭀ ᬅᬝ᭄ᬞᬗ᭄ᬕᬶᬓᭀ ᬫᬕ᭄ᬕᭀ. ᬏᬯᬂ ᬯᬶᬘᬬᬲᭀ ᬤᬾᬲᬶᬢᭀ, ᬪᬶᬓ᭄ᬔᬯᬾ, ᬫᬬᬵ ᬥᬫ᭄ᬫᭀ. ᬏᬯᬂ ᬯᬶᬘᬬᬲᭀ ᬤᬾᬲᬶᬢᬾ ᬔᭀ, ᬪᬶᬓ᭄ᬔᬯᬾ, ᬫᬬᬵ ᬥᬫ᭄ᬫᬾ ᬅᬣ ᬘ ᬧᬦᬶᬥᬾᬓᬘ᭄ᬘᬲ᭄ᬲ ᬪᬶᬓ᭄ᬔᬸᬦᭀ ᬏᬯᬂ ᬘᬾᬢᬲᭀ ᬧᬭᬶᬯᬶᬢᬓ᭄ᬓᭀ ᬉᬤᬧᬵᬤᬶ – ‘ᬓᬣᬂ ᬦᬸ ᬔᭀ ᬚᬵᬦᬢᭀ ᬓᬣᬂ ᬧᬲ᭄ᬲᬢᭀ ᬅᬦᬦ᭄ᬢᬭᬵ ᬆᬲᬯᬵᬦᬂ ᬔᬬᭀ ᬳᭀᬢᬷ’’’ᬢᬶ?

‘‘ᬓᬣᬜ᭄ᬘ, ᬪᬶᬓ᭄ᬔᬯᬾ, ᬚᬵᬦᬢᭀ ᬓᬣᬂ ᬧᬲ᭄ᬲᬢᭀ ᬅᬦᬦ᭄ᬢᬭᬵ ᬆᬲᬯᬵᬦᬂ ᬔᬬᭀ ᬳᭀᬢᬶ? ᬇᬥ ᬪᬶᬓ᭄ᬔᬯᬾ, ᬅᬲ᭄ᬲᬸᬢᬯᬵ ᬧᬸᬣᬸᬚ᭄ᬚᬦᭀ ᬅᬭᬶᬬᬵᬦᬂ ᬅᬤᬲ᭄ᬲᬵᬯᬷ ᬅᬭᬶᬬᬥᬫ᭄ᬫᬲ᭄ᬲ ᬅᬓᭀᬯᬶᬤᭀ ᬅᬭᬶᬬᬥᬫ᭄ᬫᬾ ᬅᬯᬶᬦᬷᬢᭀ, ᬲᬧ᭄ᬧᬸᬭᬶᬲᬵᬦᬂ ᬅᬤᬲ᭄ᬲᬵᬯᬷ ᬲᬧ᭄ᬧᬸᬭᬶᬲᬥᬫ᭄ᬫᬲ᭄ᬲ ᬅᬓᭀᬯᬶᬤᭀ ᬲᬧ᭄ᬧᬸᬭᬶᬲᬥᬫ᭄ᬫᬾ ᬅᬯᬶᬦᬷᬢᭀ ᬭᬹᬧᬂ ᬅᬢ᭄ᬢᬢᭀ ᬲᬫᬦᬸᬧᬲ᭄ᬲᬢᬶ. ᬬᬵ ᬔᭀ ᬧᬦ ᬲᬵ, ᬪᬶᬓ᭄ᬔᬯᬾ, ᬲᬫᬦᬸᬧᬲ᭄ᬲᬦᬵ ᬲᬗ᭄ᬔᬵᬭᭀ ᬲᭀ. ᬲᭀ ᬧᬦ ᬲᬗ᭄ᬔᬵᬭᭀ ᬓᬶᬂᬦᬶᬤᬵᬦᭀ ᬓᬶᬂᬲᬫᬸᬤᬬᭀ ᬓᬶᬂᬚᬵᬢᬶᬓᭀ ᬓᬶᬂᬧᬪᬯᭀ? ᬅᬯᬶᬚ᭄ᬚᬵᬲᬫ᭄ᬨᬲ᭄ᬲᬚᬾᬦ, ᬪᬶᬓ᭄ᬔᬯᬾ, ᬯᬾᬤᬬᬶᬢᬾᬦ ᬨᬸᬝ᭄ᬞᬲ᭄ᬲ ᬅᬲ᭄ᬲᬸᬢᬯᬢᭀ ᬧᬸᬣᬸᬚ᭄ᬚᬦᬲ᭄ᬲ ᬉᬧ᭄ᬧᬦ᭄ᬦᬵ ᬢᬡ᭄ᬳᬵ; ᬢᬢᭀᬚᭀ ᬲᭀ ᬲᬗ᭄ᬔᬵᬭᭀ. ᬇᬢᬶ ᬔᭀ, ᬪᬶᬓ᭄ᬔᬯᬾ, ᬲᭀᬧᬶ ᬲᬗ᭄ᬔᬵᬭᭀ ᬅᬦᬶᬘ᭄ᬘᭀ ᬲᬗ᭄ᬔᬢᭀ ᬧᬝᬶᬘ᭄ᬘᬲᬫᬸᬧ᭄ᬧᬦ᭄ᬦᭀ. ᬲᬵᬧᬶ ᬢᬡ᭄ᬳᬵ ᬅᬦᬶᬘ᭄ᬘᬵ ᬲᬗ᭄ᬔᬢᬵ ᬧᬝᬶᬘ᭄ᬘᬲᬫᬸᬧ᭄ᬧᬦ᭄ᬦᬵ. ᬲᬵᬧᬶ ᬯᬾᬤᬦᬵ ᬅᬦᬶᬘ᭄ᬘᬵ ᬲᬗ᭄ᬔᬢᬵ ᬧᬝᬶᬘ᭄ᬘᬲᬫᬸᬧ᭄ᬧᬦ᭄ᬦᬵ. ᬲᭀᬧᬶ ᬨᬲ᭄ᬲᭀ ᬅᬦᬶᬘ᭄ᬘᭀ ᬲᬗ᭄ᬔᬢᭀ ᬧᬝᬶᬘ᭄ᬘᬲᬫᬸᬧ᭄ᬧᬦ᭄ᬦᭀ. ᬲᬵᬧᬶ ᬅᬯᬶᬚ᭄ᬚᬵ ᬅᬦᬶᬘ᭄ᬘᬵ ᬲᬗ᭄ᬔᬢᬵ ᬧᬝᬶᬘ᭄ᬘᬲᬫᬸᬧ᭄ᬧᬦ᭄ᬦᬵ. ᬏᬯᬫ᭄ᬧᬶ ᬔᭀ, ᬪᬶᬓ᭄ᬔᬯᬾ, ᬚᬵᬦᬢᭀ ᬏᬯᬂ ᬧᬲ᭄ᬲᬢᭀ ᬅᬦᬦ᭄ᬢᬭᬵ ᬆᬲᬯᬵᬦᬂ ᬔᬬᭀ ᬳᭀᬢᬶ.

‘‘ᬦ ᬳᬾᬯ ᬔᭀ ᬭᬹᬧᬂ ᬅᬢ᭄ᬢᬢᭀ ᬲᬫᬦᬸᬧᬲ᭄ᬲᬢᬶ; ᬅᬧᬶ ᬘ ᬔᭀ ᬭᬹᬧᬯᬦ᭄ᬢᬂ ᬅᬢ᭄ᬢᬵᬦᬂ ᬲᬫᬦᬸᬧᬲ᭄ᬲᬢᬶ. ᬬᬵ ᬔᭀ ᬧᬦ ᬲᬵ, ᬪᬶᬓ᭄ᬔᬯᬾ, ᬲᬫᬦᬸᬧᬲ᭄ᬲᬦᬵ ᬲᬗ᭄ᬔᬵᬭᭀ ᬲᭀ. ᬲᭀ ᬧᬦ ᬲᬗ᭄ᬔᬵᬭᭀ ᬓᬶᬂᬦᬶᬤᬵᬦᭀ ᬓᬶᬂᬲᬫᬸᬤᬬᭀ ᬓᬶᬂᬚᬵᬢᬶᬓᭀ ᬓᬶᬂᬧᬪᬯᭀ? ᬅᬯᬶᬚ᭄ᬚᬵᬲᬫ᭄ᬨᬲ᭄ᬲᬚᬾᬦ, ᬪᬶᬓ᭄ᬔᬯᬾ, ᬯᬾᬤᬬᬶᬢᬾᬦ ᬨᬸᬝ᭄ᬞᬲ᭄ᬲ ᬅᬲ᭄ᬲᬸᬢᬯᬢᭀ ᬧᬸᬣᬸᬚ᭄ᬚᬦᬲ᭄ᬲ ᬉᬧ᭄ᬧᬦ᭄ᬦᬵ ᬢᬡ᭄ᬳᬵ; ᬢᬢᭀᬚᭀ ᬲᭀ ᬲᬗ᭄ᬔᬵᬭᭀ. ᬇᬢᬶ ᬔᭀ, ᬪᬶᬓ᭄ᬔᬯᬾ, ᬲᭀᬧᬶ ᬲᬗ᭄ᬔᬵᬭᭀ ᬅᬦᬶᬘ᭄ᬘᭀ ᬲᬗ᭄ᬔᬢᭀ ᬧᬝᬶᬘ᭄ᬘᬲᬫᬸᬧ᭄ᬧᬦ᭄ᬦᭀ. ᬲᬵᬧᬶ ᬢᬡ᭄ᬳᬵ… ᬲᬵᬧᬶ ᬯᬾᬤᬦᬵ… ᬲᭀᬧᬶ ᬨᬲ᭄ᬲᭀ… ᬲᬵᬧᬶ ᬅᬯᬶᬚ᭄ᬚᬵ ᬅᬦᬶᬘ᭄ᬘᬵ ᬲᬗ᭄ᬔᬢᬵ ᬧᬝᬶᬘ᭄ᬘᬲᬫᬸᬧ᭄ᬧᬦ᭄ᬦᬵ. ᬏᬯᬫ᭄ᬧᬶ ᬔᭀ, ᬪᬶᬓ᭄ᬔᬯᬾ, ᬚᬵᬦᬢᭀ ᬏᬯᬂ ᬧᬲ᭄ᬲᬢᭀ ᬅᬦᬦ᭄ᬢᬭᬵ ᬆᬲᬯᬵᬦᬂ ᬔᬬᭀ ᬳᭀᬢᬶ.

‘‘ᬦ ᬳᬾᬯ ᬔᭀ ᬭᬹᬧᬂ ᬅᬢ᭄ᬢᬢᭀ ᬲᬫᬦᬸᬧᬲ᭄ᬲᬢᬶ, ᬦ ᬭᬹᬧᬯᬦ᭄ᬢᬂ ᬅᬢ᭄ᬢᬵᬦᬂ ᬲᬫᬦᬸᬧᬲ᭄ᬲᬢᬶ; ᬅᬧᬶ ᬘ ᬔᭀ ᬅᬢ᭄ᬢᬦᬶ ᬭᬹᬧᬂ ᬲᬫᬦᬸᬧᬲ᭄ᬲᬢᬶ. ᬬᬵ ᬔᭀ ᬧᬦ ᬲᬵ, ᬪᬶᬓ᭄ᬔᬯᬾ, ᬲᬫᬦᬸᬧᬲ᭄ᬲᬦᬵ ᬲᬗ᭄ᬔᬵᬭᭀ ᬲᭀ. ᬲᭀ ᬧᬦ ᬲᬗ᭄ᬔᬵᬭᭀ ᬓᬶᬂᬦᬶᬤᬵᬦᭀ ᬓᬶᬂᬲᬫᬸᬤᬬᭀ ᬓᬶᬂᬚᬵᬢᬶᬓᭀ ᬓᬶᬂᬧᬪᬯᭀ? ᬅᬯᬶᬚ᭄ᬚᬵᬲᬫ᭄ᬨᬲ᭄ᬲᬚᬾᬦ, ᬪᬶᬓ᭄ᬔᬯᬾ, ᬯᬾᬤᬬᬶᬢᬾᬦ ᬨᬸᬝ᭄ᬞᬲ᭄ᬲ ᬅᬲ᭄ᬲᬸᬢᬯᬢᭀ ᬧᬸᬣᬸᬚ᭄ᬚᬦᬲ᭄ᬲ ᬉᬧ᭄ᬧᬦ᭄ᬦᬵ ᬢᬡ᭄ᬳᬵ; ᬢᬢᭀᬚᭀ ᬲᭀ ᬲᬗ᭄ᬔᬵᬭᭀ. ᬇᬢᬶ ᬔᭀ, ᬪᬶᬓ᭄ᬔᬯᬾ, ᬲᭀᬧᬶ ᬲᬗ᭄ᬔᬵᬭᭀ ᬅᬦᬶᬘ᭄ᬘᭀ ᬲᬗ᭄ᬔᬢᭀ ᬧᬝᬶᬘ᭄ᬘᬲᬫᬸᬧ᭄ᬧᬦ᭄ᬦᭀ. ᬲᬵᬧᬶ ᬢᬡ᭄ᬳᬵ… ᬲᬵᬧᬶ ᬯᬾᬤᬦᬵ… ᬲᭀᬧᬶ ᬨᬲ᭄ᬲᭀ… ᬲᬵᬧᬶ ᬅᬯᬶᬚ᭄ᬚᬵ ᬅᬦᬶᬘ᭄ᬘᬵ ᬲᬗ᭄ᬔᬢᬵ ᬧᬝᬶᬘ᭄ᬘᬲᬫᬸᬧ᭄ᬧᬦ᭄ᬦᬵ. ᬏᬯᬫ᭄ᬧᬶ ᬔᭀ, ᬪᬶᬓ᭄ᬔᬯᬾ, ᬚᬵᬦᬢᭀ ᬏᬯᬂ ᬧᬲ᭄ᬲᬢᭀ ᬅᬦᬦ᭄ᬢᬭᬵ ᬆᬲᬯᬵᬦᬂ ᬔᬬᭀ ᬳᭀᬢᬶ.

‘‘ᬦ ᬳᬾᬯ ᬔᭀ ᬭᬹᬧᬂ ᬅᬢ᭄ᬢᬢᭀ ᬲᬫᬦᬸᬧᬲ᭄ᬲᬢᬶ, ᬦ ᬭᬹᬧᬯᬦ᭄ᬢᬂ ᬅᬢ᭄ᬢᬵᬦᬂ ᬲᬫᬦᬸᬧᬲ᭄ᬲᬢᬶ, ᬦ ᬅᬢ᭄ᬢᬦᬶ ᬭᬹᬧᬂ ᬲᬫᬦᬸᬧᬲ᭄ᬲᬢᬶ; ᬅᬧᬶ ᬘ ᬔᭀ ᬭᬹᬧᬲ᭄ᬫᬶᬂ ᬅᬢ᭄ᬢᬵᬦᬂ ᬲᬫᬦᬸᬧᬲ᭄ᬲᬢᬶ. ᬬᬵ ᬔᭀ ᬧᬦ ᬲᬵ, ᬪᬶᬓ᭄ᬔᬯᬾ, ᬲᬫᬦᬸᬧᬲ᭄ᬲᬦᬵ ᬲᬗ᭄ᬔᬵᬭᭀ ᬲᭀ. ᬲᭀ ᬧᬦ ᬲᬗ᭄ᬔᬵᬭᭀ ᬓᬶᬂᬦᬶᬤᬵᬦᭀ ᬓᬶᬂᬲᬫᬸᬤᬬᭀ ᬓᬶᬂᬚᬵᬢᬶᬓᭀ ᬓᬶᬂᬧᬪᬯᭀ? ᬅᬯᬶᬚ᭄ᬚᬵᬲᬫ᭄ᬨᬲ᭄ᬲᬚᬾᬦ, ᬪᬶᬓ᭄ᬔᬯᬾ, ᬯᬾᬤᬬᬶᬢᬾ ᬨᬸᬝ᭄ᬞᬲ᭄ᬲ ᬅᬲ᭄ᬲᬸᬢᬯᬢᭀ ᬧᬸᬣᬸᬚ᭄ᬚᬦᬲ᭄ᬲ ᬉᬧ᭄ᬧᬦ᭄ᬦᬵ ᬢᬡ᭄ᬳᬵ; ᬢᬢᭀᬚᭀ ᬲᭀ ᬲᬗ᭄ᬔᬵᬭᭀ. ᬇᬢᬶ ᬔᭀ, ᬪᬶᬓ᭄ᬔᬯᬾ, ᬲᭀᬧᬶ ᬲᬗ᭄ᬔᬵᬭᭀ ᬅᬦᬶᬘ᭄ᬘᭀ ᬲᬗ᭄ᬔᬢᭀ ᬧᬝᬶᬘ᭄ᬘᬲᬫᬸᬧ᭄ᬧᬦ᭄ᬦᭀ. ᬲᬵᬧᬶ ᬢᬡ᭄ᬳᬵ … ᬲᬵᬧᬶ ᬯᬾᬤᬦᬵ… ᬲᭀᬧᬶ ᬨᬲ᭄ᬲᭀ… ᬲᬵᬧᬶ ᬅᬯᬶᬚ᭄ᬚᬵ ᬅᬦᬶᬘ᭄ᬘᬵ ᬲᬗ᭄ᬔᬢᬵ ᬧᬝᬶᬘ᭄ᬘᬲᬫᬸᬧ᭄ᬧᬦ᭄ᬦᬵ. ᬏᬯᬫ᭄ᬧᬶ ᬔᭀ, ᬪᬶᬓ᭄ᬔᬯᬾ, ᬚᬵᬦᬢᭀ…ᬧᬾ… ᬆᬲᬯᬵᬦᬂ ᬔᬬᭀ ᬳᭀᬢᬶ.

‘‘ᬦ ᬳᬾᬯ ᬔᭀ ᬭᬹᬧᬂ ᬅᬢ᭄ᬢᬢᭀ ᬲᬫᬦᬸᬧᬲ᭄ᬲᬢᬶ, ᬦ ᬭᬹᬧᬯᬦ᭄ᬢᬂ ᬅᬢ᭄ᬢᬵᬦᬂ, ᬦ ᬅᬢ᭄ᬢᬦᬶ ᬭᬹᬧᬂ, ᬦ ᬭᬹᬧᬲ᭄ᬫᬶᬂ ᬅᬢ᭄ᬢᬵᬦᬂ ᬲᬫᬦᬸᬧᬲ᭄ᬲᬢᬶ; ᬅᬧᬶ ᬘ ᬔᭀ ᬯᬾᬤᬦᬂ ᬅᬢ᭄ᬢᬢᭀ ᬲᬫᬦᬸᬧᬲ᭄ᬲᬢᬶ, ᬅᬧᬶ ᬘ ᬔᭀ ᬯᬾᬤᬦᬵᬯᬦ᭄ᬢᬂ ᬅᬢ᭄ᬢᬵᬦᬂ ᬲᬫᬦᬸᬧᬲ᭄ᬲᬢᬶ, ᬅᬧᬶ ᬘ ᬔᭀ ᬅᬢ᭄ᬢᬦᬶ ᬯᬾᬤᬦᬂ ᬲᬫᬦᬸᬧᬲ᭄ᬲᬢᬶ, ᬅᬧᬶ ᬘ ᬔᭀ ᬯᬾᬤᬦᬵᬬ ᬅᬢ᭄ᬢᬵᬦᬂ ᬲᬫᬦᬸᬧᬲ᭄ᬲᬢᬶ; ᬅᬧᬶ ᬘ ᬔᭀ ᬲᬜ᭄ᬜᬂ… ᬅᬧᬶ ᬘ ᬔᭀ ᬲᬗ᭄ᬔᬵᬭᬾ ᬅᬢ᭄ᬢᬢᭀ ᬲᬫᬦᬸᬧᬲ᭄ᬲᬢᬶ, ᬅᬧᬶ ᬘ ᬔᭀ ᬲᬗ᭄ᬔᬵᬭᬯᬦ᭄ᬢᬂ ᬅᬢ᭄ᬢᬵᬦᬂ ᬲᬫᬦᬸᬧᬲ᭄ᬲᬢᬶ, ᬅᬧᬶ ᬘ ᬔᭀ ᬅᬢ᭄ᬢᬦᬶ ᬲᬗ᭄ᬔᬵᬭᬾ ᬲᬫᬦᬸᬧᬲ᭄ᬲᬢᬶ, ᬅᬧᬶ ᬘ ᬔᭀ ᬲᬗ᭄ᬔᬵᬭᬾᬲᬸ ᬅᬢ᭄ᬢᬵᬦᬂ ᬲᬫᬦᬸᬧᬲ᭄ᬲᬢᬶ; ᬅᬧᬶ ᬘ ᬔᭀ ᬯᬶᬜ᭄ᬜᬵᬡᬂ ᬅᬢ᭄ᬢᬢᭀ ᬲᬫᬦᬸᬧᬲ᭄ᬲᬢᬶ, ᬅᬧᬶ ᬘ ᬔᭀ ᬯᬶᬜ᭄ᬜᬵᬡᬯᬦ᭄ᬢᬂ ᬅᬢ᭄ᬢᬵᬦᬂ, ᬅᬧᬶ ᬘ ᬔᭀ ᬅᬢ᭄ᬢᬦᬶ ᬯᬶᬜ᭄ᬜᬵᬡᬂ, ᬅᬧᬶ ᬘ ᬔᭀ ᬯᬶᬜ᭄ᬜᬵᬡᬲ᭄ᬫᬶᬂ ᬅᬢ᭄ᬢᬵᬦᬂ ᬲᬫᬦᬸᬧᬲ᭄ᬲᬢᬶ. ᬬᬵ ᬔᭀ ᬧᬦ ᬲᬵ, ᬪᬶᬓ᭄ᬔᬯᬾ, ᬲᬫᬦᬸᬧᬲ᭄ᬲᬦᬵ ᬲᬗ᭄ᬔᬵᬭᭀ ᬲᭀ. ᬲᭀ ᬧᬦ ᬲᬗ᭄ᬔᬵᬭᭀ ᬓᬶᬂᬦᬶᬤᬵᬦᭀ…ᬧᬾ… ᬓᬶᬂᬧᬪᬯᭀ? ᬅᬯᬶᬚ᭄ᬚᬵᬲᬫ᭄ᬨᬲ᭄ᬲᬚᬾᬦ, ᬪᬶᬓ᭄ᬔᬯᬾ, ᬯᬾᬤᬬᬶᬢᬾ ᬨᬸᬝ᭄ᬞᬲ᭄ᬲ ᬅᬲ᭄ᬲᬸᬢᬯᬢᭀ ᬧᬸᬣᬸᬚ᭄ᬚᬦᬲ᭄ᬲ ᬉᬧ᭄ᬧᬦ᭄ᬦᬵ ᬢᬡ᭄ᬳᬵ; ᬢᬢᭀᬚᭀ ᬲᭀ ᬲᬗ᭄ᬔᬵᬭᭀ. ᬇᬢᬶ ᬔᭀ, ᬪᬶᬓ᭄ᬔᬯᬾ, ᬲᭀᬧᬶ ᬲᬗ᭄ᬔᬵᬭᭀ ᬅᬦᬶᬘ᭄ᬘᭀ ᬲᬗ᭄ᬔᬢᭀ ᬧᬝᬶᬘ᭄ᬘᬲᬫᬸᬧ᭄ᬧᬦ᭄ᬦᭀ. ᬲᬵᬧᬶ ᬢᬡ᭄ᬳᬵ… ᬲᬵᬧᬶ ᬯᬾᬤᬦᬵ… ᬲᭀᬧᬶ ᬨᬲ᭄ᬲᭀ … ᬲᬵᬧᬶ ᬅᬯᬶᬚ᭄ᬚᬵ ᬅᬦᬶᬘ᭄ᬘᬵ ᬲᬗ᭄ᬔᬢᬵ ᬧᬝᬶᬘ᭄ᬘᬲᬫᬸᬧ᭄ᬧᬦ᭄ᬦᬵ. ᬏᬯᬂ ᬔᭀ, ᬪᬶᬓ᭄ᬔᬯᬾ, ᬚᬵᬦᬢᭀ ᬏᬯᬂ ᬧᬲ᭄ᬲᬢᭀ ᬅᬦᬦ᭄ᬢᬭᬵ ᬆᬲᬯᬵᬦᬂ ᬔᬬᭀ ᬳᭀᬢᬶ.

‘‘ᬦ ᬳᬾᬯ ᬔᭀ ᬭᬹᬧᬂ ᬅᬢ᭄ᬢᬢᭀ ᬲᬫᬦᬸᬧᬲ᭄ᬲᬢᬶ, ᬦ ᬯᬾᬤᬦᬂ ᬅᬢ᭄ᬢᬢᭀ ᬲᬫᬦᬸᬧᬲ᭄ᬲᬢᬶ, ᬦ ᬲᬜ᭄ᬜᬂ… ᬦ ᬲᬗ᭄ᬔᬵᬭᬾ… ᬦ ᬯᬶᬜ᭄ᬜᬵᬡᬂ ᬅᬢ᭄ᬢᬢᭀ ᬲᬫᬦᬸᬧᬲ᭄ᬲᬢᬶ; ᬅᬧᬶ ᬘ ᬔᭀ ᬏᬯᬂᬤᬶᬝ᭄ᬞᬶ ᬳᭀᬢᬶ – ‘ᬲᭀ ᬅᬢ᭄ᬢᬵ ᬲᭀ ᬮᭀᬓᭀ, ᬲᭀ ᬧᬾᬘ᭄ᬘ ᬪᬯᬶᬲ᭄ᬲᬵᬫᬶ ᬦᬶᬘ᭄ᬘᭀ ᬥᬸᬯᭀ ᬲᬲ᭄ᬲᬢᭀ ᬅᬯᬶᬧᬭᬶᬡᬵᬫᬥᬫ᭄ᬫᭀ’ᬢᬶ. ᬬᬵ ᬔᭀ ᬧᬦ ᬲᬵ, ᬪᬶᬓ᭄ᬔᬯᬾ, ᬲᬲ᭄ᬲᬢᬤᬶᬝ᭄ᬞᬶ ᬲᬗ᭄ᬔᬵᬭᭀ ᬲᭀ. ᬲᭀ ᬧᬦ ᬲᬗ᭄ᬔᬵᬭᭀ ᬓᬶᬂᬦᬶᬤᬵᬦᭀ…ᬧᬾ… ᬏᬯᬫ᭄ᬧᬶ ᬔᭀ, ᬪᬶᬓ᭄ᬔᬯᬾ, ᬚᬵᬦᬢᭀ ᬏᬯᬂ ᬧᬲ᭄ᬲᬢᭀ ᬅᬦᬦ᭄ᬢᬭᬵ ᬆᬲᬯᬵᬦᬂ ᬔᬬᭀ ᬳᭀᬢᬶ.

‘‘ᬦ ᬳᬾᬯ ᬔᭀ ᬭᬹᬧᬂ ᬅᬢ᭄ᬢᬢᭀ ᬲᬫᬦᬸᬧᬲ᭄ᬲᬢᬶ, ᬦ ᬯᬾᬤᬦᬂ … ᬦ ᬲᬜ᭄ᬜᬂ… ᬦ ᬲᬗ᭄ᬔᬵᬭᬾ… ᬦ ᬯᬶᬜ᭄ᬜᬵᬡᬂ ᬅᬢ᭄ᬢᬢᭀ ᬲᬫᬦᬸᬧᬲ᭄ᬲᬢᬶ; ᬦᬵᬧᬶ ᬏᬯᬂᬤᬶᬝ᭄ᬞᬶ ᬳᭀᬢᬶ – ‘ᬲᭀ ᬅᬢ᭄ᬢᬵ ᬲᭀ ᬮᭀᬓᭀ, ᬲᭀ ᬧᬾᬘ᭄ᬘ ᬪᬯᬶᬲ᭄ᬲᬵᬫᬶ ᬦᬶᬘ᭄ᬘᭀ ᬥᬸᬯᭀ ᬲᬲ᭄ᬲᬢᭀ ᬅᬯᬶᬧᬭᬶᬡᬵᬫᬥᬫ᭄ᬫᭀ’ᬢᬶ. ᬅᬧᬶ ᬘ ᬔᭀ ᬏᬯᬂᬤᬶᬝ᭄ᬞᬶ ᬳᭀᬢᬶ – ‘ᬦᭀ ᬘᬲ᭄ᬲᬂ ᬦᭀ ᬘ ᬫᬾ ᬲᬶᬬᬵ ᬦᬵᬪᬯᬶᬲ᭄ᬲᬂ ᬦ ᬫᬾ ᬪᬯᬶᬲ᭄ᬲᬢᬷ’ᬢᬶ. ᬬᬵ ᬔᭀ ᬧᬦ ᬲᬵ, ᬪᬶᬓ᭄ᬔᬯᬾ, ᬉᬘ᭄ᬙᬾᬤᬤᬶᬝ᭄ᬞᬶ ᬲᬗ᭄ᬔᬵᬭᭀ ᬲᭀ. ᬲᭀ ᬧᬦ ᬲᬗ᭄ᬔᬵᬭᭀ ᬓᬶᬂᬦᬶᬤᬵᬦᭀ ᬓᬶᬂᬲᬫᬸᬤᬬᭀ ᬓᬶᬂᬚᬵᬢᬶᬓᭀ ᬓᬶᬂᬧᬪᬯᭀ? ᬅᬯᬶᬚ᭄ᬚᬵᬲᬫ᭄ᬨᬲ᭄ᬲᬚᬾᬦ, ᬪᬶᬓ᭄ᬔᬯᬾ, ᬯᬾᬤᬬᬶᬢᬾᬦ ᬨᬸᬝ᭄ᬞᬲ᭄ᬲ ᬅᬲ᭄ᬲᬸᬢᬯᬢᭀ ᬧᬸᬣᬸᬚ᭄ᬚᬦᬲ᭄ᬲ ᬉᬧ᭄ᬧᬦ᭄ᬦᬵ ᬢᬡ᭄ᬳᬵ; ᬢᬢᭀᬚᭀ ᬲᭀ ᬲᬗ᭄ᬔᬵᬭᭀ. ᬇᬢᬶ ᬔᭀ, ᬪᬶᬓ᭄ᬔᬯᬾ, ᬲᭀᬧᬶ ᬲᬗ᭄ᬔᬵᬭᭀ ᬅᬦᬶᬘ᭄ᬘᭀ…ᬧᬾ… ᬏᬯᬫ᭄ᬧᬶ ᬔᭀ, ᬪᬶᬓ᭄ᬔᬯᬾ, ᬚᬵᬦᬢᭀ ᬏᬯᬂ ᬧᬲ᭄ᬲᬢᭀ ᬅᬦᬦ᭄ᬢᬭᬵ ᬆᬲᬯᬵᬦᬂ ᬔᬬᭀ ᬳᭀᬢᬶ.

‘‘ᬦ ᬳᬾᬯ ᬔᭀ ᬭᬹᬧᬂ ᬅᬢ᭄ᬢᬢᭀ ᬲᬫᬦᬸᬧᬲ᭄ᬲᬢᬶ, ᬦ ᬯᬾᬤᬦᬂ… ᬦ ᬲᬜ᭄ᬜᬂ… ᬦ ᬲᬗ᭄ᬔᬵᬭᬾ… ᬦ ᬯᬶᬜ᭄ᬜᬵᬡᬂ ᬅᬢ᭄ᬢᬢᭀ ᬲᬫᬦᬸᬧᬲ᭄ᬲᬢᬶ…ᬧᬾ… ᬦ ᬯᬶᬜ᭄ᬜᬵᬡᬲ᭄ᬫᬶᬂ ᬅᬢ᭄ᬢᬢᭀ ᬲᬫᬦᬸᬧᬲ᭄ᬲᬢᬶ, ᬦᬵᬧᬶ ᬏᬯᬂᬤᬶᬝ᭄ᬞᬶ ᬳᭀᬢᬶ – ‘ᬲᭀ ᬅᬢ᭄ᬢᬵ ᬲᭀ ᬮᭀᬓᭀ, ᬲᭀ ᬧᬾᬘ᭄ᬘ ᬪᬯᬶᬲ᭄ᬲᬵᬫᬶ ᬦᬶᬘ᭄ᬘᭀ ᬥᬸᬯᭀ ᬲᬲ᭄ᬲᬢᭀ ᬅᬯᬶᬧᬭᬶᬡᬵᬫᬥᬫ᭄ᬫᭀ’ᬢᬶ; ᬦᬵᬧᬶ ᬏᬯᬂᬤᬶᬝ᭄ᬞᬶ ᬳᭀᬢᬶ – ‘ᬦᭀ ᬘᬲ᭄ᬲᬂ ᬦᭀ ᬘ ᬫᬾ ᬲᬶᬬᬵ ᬦᬵᬪᬯᬶᬲ᭄ᬲᬂ ᬦ ᬫᬾ ᬪᬯᬶᬲ᭄ᬲᬢᬷ’ᬢᬶ; ᬅᬧᬶ ᬘ ᬔᭀ ᬓᬗ᭄ᬔᬷ ᬳᭀᬢᬶ ᬯᬶᬘᬶᬓᬶᬘ᭄ᬙᬷ ᬅᬦᬶᬝ᭄ᬞᬗ᭄ᬕᬢᭀ ᬲᬤ᭄ᬥᬫ᭄ᬫᬾ. ᬬᬵ ᬔᭀ ᬧᬦ ᬲᬵ, ᬪᬶᬓ᭄ᬔᬯᬾ, ᬓᬗ᭄ᬔᬶᬢᬵ ᬯᬶᬘᬶᬓᬶᬘ᭄ᬙᬶᬢᬵ ᬅᬦᬶᬝ᭄ᬞᬗ᭄ᬕᬢᬢᬵ ᬲᬤ᭄ᬥᬫ᭄ᬫᬾ ᬲᬗ᭄ᬔᬵᬭᭀ ᬲᭀ. ᬲᭀ ᬧᬦ ᬲᬗ᭄ᬔᬵᬭᭀ ᬓᬶᬂᬦᬶᬤᬵᬦᭀ ᬓᬶᬂᬲᬫᬸᬤᬬᭀ ᬓᬶᬂᬚᬵᬢᬶᬓᭀ ᬓᬶᬂᬧᬪᬯᭀ? ᬅᬯᬶᬚ᭄ᬚᬵᬲᬫ᭄ᬨᬲ᭄ᬲᬚᬾᬦ, ᬪᬶᬓ᭄ᬔᬯᬾ, ᬯᬾᬤᬬᬶᬢᬾᬦ ᬨᬸᬝ᭄ᬞᬲ᭄ᬲ ᬅᬲ᭄ᬲᬸᬢᬯᬢᭀ ᬧᬸᬣᬸᬚ᭄ᬚᬦᬲ᭄ᬲ ᬉᬧ᭄ᬧᬦ᭄ᬦᬵ ᬢᬡ᭄ᬳᬵ; ᬢᬢᭀᬚᭀ ᬲᭀ ᬲᬗ᭄ᬔᬵᬭᭀ. ᬇᬢᬶ ᬔᭀ, ᬪᬶᬓ᭄ᬔᬯᬾ, ᬲᭀᬧᬶ ᬲᬗ᭄ᬔᬵᬭᭀ ᬅᬦᬶᬘ᭄ᬘᭀ ᬲᬗ᭄ᬔᬢᭀ ᬧᬝᬶᬘ᭄ᬘᬲᬫᬸᬧ᭄ᬧᬦ᭄ᬦᭀ. ᬲᬵᬧᬶ ᬢᬡ᭄ᬳᬵ ᬅᬦᬶᬘ᭄ᬘᬵ ᬲᬗ᭄ᬔᬢᬵ ᬧᬝᬶᬘ᭄ᬘᬲᬫᬸᬧ᭄ᬧᬦ᭄ᬦᬵ. ᬲᬵᬧᬶ ᬯᬾᬤᬦᬵ ᬅᬦᬶᬘ᭄ᬘᬵ ᬲᬗ᭄ᬔᬢᬵ ᬧᬝᬶᬘ᭄ᬘᬲᬫᬸᬧ᭄ᬧᬦ᭄ᬦᬵ. ᬲᭀᬧᬶ ᬨᬲ᭄ᬲᭀ ᬅᬦᬶᬘ᭄ᬘᭀ ᬲᬗ᭄ᬔᬢᭀ ᬧᬝᬶᬘ᭄ᬘᬲᬫᬸᬧ᭄ᬧᬦ᭄ᬦᭀ. ᬲᬵᬧᬶ ᬅᬯᬶᬚ᭄ᬚᬵ ᬅᬦᬶᬘ᭄ᬘᬵ ᬲᬗ᭄ᬔᬢᬵ ᬧᬝᬶᬘ᭄ᬘᬲᬫᬸᬧ᭄ᬧᬦ᭄ᬦᬵ. ᬏᬯᬂ ᬔᭀ, ᬪᬶᬓ᭄ᬔᬯᬾ, ᬚᬵᬦᬢᭀ ᬏᬯᬂ ᬧᬲ᭄ᬲᬢᭀ ᬅᬦᬦ᭄ᬢᬭᬵ ᬆᬲᬯᬵᬦᬂ ᬔᬬᭀ ᬳᭀᬢᬷ’’ᬢᬶ. ᬦᬯᬫᬂ.

᭑᭐. ᬧᬸᬡ᭄ᬡᬫᬲᬸᬢ᭄ᬢᬂ

᭘᭒. ᬏᬓᬂ ᬲᬫᬬᬂ ᬪᬕᬯᬵ ᬲᬵᬯᬢ᭄ᬣᬶᬬᬂ ᬯᬶᬳᬭᬢᬶ ᬧᬸᬩ᭄ᬩᬵᬭᬵᬫᬾ ᬫᬶᬕᬵᬭᬫᬵᬢᬸᬧᬵᬲᬵᬤᬾ ᬫᬳᬢᬵ ᬪᬶᬓ᭄ᬔᬸᬲᬗ᭄ᬖᬾᬦ ᬲᬤ᭄ᬥᬶᬂ. ᬢᬾᬦ ᬔᭀ ᬧᬦ ᬲᬫᬬᬾᬦ ᬪᬕᬯᬵ ᬢᬤᬳᬸᬧᭀᬲᬣᬾ ᬧᬦ᭄ᬦᬭᬲᬾ ᬧᬸᬡ᭄ᬡᬵᬬ ᬧᬸᬡ᭄ᬡᬫᬵᬬ ᬭᬢ᭄ᬢᬶᬬᬵ ᬪᬶᬓ᭄ᬔᬸᬲᬗ᭄ᬖᬧᬭᬶᬯᬸᬢᭀ ᬅᬚ᭄ᬛᭀᬓᬵᬲᬾ ᬦᬶᬲᬶᬦ᭄ᬦᭀ ᬳᭀᬢᬶ.

ᬅᬣ ᬔᭀ ᬅᬜ᭄ᬜᬢᬭᭀ ᬪᬶᬓ᭄ᬔᬸ ᬉᬝ᭄ᬞᬵᬬᬵᬲᬦᬵ ᬏᬓᬂᬲᬂ ᬉᬢ᭄ᬢᬭᬵᬲᬗ᭄ᬕᬂ ᬓᬭᬶᬢ᭄ᬯᬵ ᬬᬾᬦ ᬪᬕᬯᬵ ᬢᬾᬦᬜ᭄ᬚᬮᬶᬂ ᬧᬡᬵᬫᬾᬢ᭄ᬯᬵ ᬪᬕᬯᬦ᭄ᬢᬂ ᬏᬢᬤᬯᭀᬘ – ‘‘ᬧᬸᬘ᭄ᬙᬾᬬ᭄ᬬᬵᬳᬂ, ᬪᬦ᭄ᬢᬾ, ᬪᬕᬯᬦ᭄ᬢᬂ ᬓᬶᬜ᭄ᬘᬶᬤᬾᬯ [ᬓᬜ᭄ᬘᬶᬤᬾᬯ (?)] ᬤᬾᬲᬂ, ᬲᬘᬾ ᬫᬾ ᬪᬕᬯᬵ ᬑᬓᬵᬲᬂ ᬓᬭᭀᬢᬶ ᬧᬜ᭄ᬳᬲ᭄ᬲ ᬯᬾᬬ᭄ᬬᬵᬓᬭᬡᬵᬬᬵ’’ᬢᬶ? ‘‘ᬢᬾᬦ ᬳᬶ ᬢ᭄ᬯᬂ, ᬪᬶᬓ᭄ᬔᬸ, ᬲᬓᬾ ᬆᬲᬦᬾ ᬦᬶᬲᬷᬤᬶᬢ᭄ᬯᬵ ᬧᬸᬘ᭄ᬙ ᬬᬤᬵᬓᬗ᭄ᬔᬲᬷ’’ᬢᬶ. ‘‘ᬏᬯᬂ, ᬪᬦ᭄ᬢᬾ’’ᬢᬶ ᬔᭀ ᬲᭀ ᬪᬶᬓ᭄ᬔᬸ ᬪᬕᬯᬢᭀ ᬧᬝᬶᬲ᭄ᬲᬸᬢ᭄ᬯᬵ ᬲᬓᬾ ᬆᬲᬦᬾ ᬦᬶᬲᬷᬤᬶᬢ᭄ᬯᬵ ᬪᬕᬯᬦ᭄ᬢᬂ ᬏᬢᬤᬯᭀᬘ – ‘‘ᬇᬫᬾ ᬦᬸ ᬔᭀ, ᬪᬦ᭄ᬢᬾ, ᬧᬜ᭄ᬘᬸᬧᬵᬤᬵᬦᬓ᭄ᬔᬦ᭄ᬥᬵ, ᬲᬾᬬ᭄ᬬᬣᬶᬤᬂ – ᬭᬹᬧᬸᬧᬵᬤᬵᬦᬓ᭄ᬔᬦ᭄ᬥᭀ, ᬯᬾᬤᬦᬸᬧᬵᬤᬵᬦᬓ᭄ᬔᬦ᭄ᬥᭀ, ᬲᬜ᭄ᬜᬸᬧᬵᬤᬵᬦᬓ᭄ᬔᬦ᭄ᬥᭀ, ᬲᬗ᭄ᬔᬵᬭᬸᬧᬵᬤᬵᬦᬓ᭄ᬔᬦ᭄ᬥᭀ, ᬯᬶᬜ᭄ᬜᬵᬡᬸᬧᬵᬤᬵᬦᬓ᭄ᬔᬦ᭄ᬥᭀ’’ᬢᬶ.

‘‘ᬇᬫᬾ ᬔᭀ ᬧᬦ, ᬪᬶᬓ᭄ᬔᬸ, ᬧᬜ᭄ᬘᬸᬧᬵᬤᬵᬦᬓ᭄ᬔᬦ᭄ᬥᬵ; ᬲᬾᬬ᭄ᬬᬣᬶᬤᬂ – ᬭᬹᬧᬸᬧᬵᬤᬵᬦᬓ᭄ᬔᬦ᭄ᬥᭀ…ᬧᬾ… ᬯᬶᬜ᭄ᬜᬵᬡᬸᬧᬵᬤᬵᬦᬓ᭄ᬔᬦ᭄ᬥᭀ’’ᬢᬶ. ‘‘ᬲᬵᬥᬸ, ᬪᬦ᭄ᬢᬾ’’ᬢᬶ ᬔᭀ ᬲᭀ ᬪᬶᬓ᭄ᬔᬸ ᬪᬕᬯᬢᭀ ᬪᬵᬲᬶᬢᬂ ᬅᬪᬶᬦᬦ᭄ᬤᬶᬢ᭄ᬯᬵ ᬅᬦᬸᬫᭀᬤᬶᬢ᭄ᬯᬵ ᬪᬕᬯᬦ᭄ᬢᬂ ᬉᬢ᭄ᬢᬭᬶᬂ ᬧᬜ᭄ᬳᬂ ᬅᬧᬸᬘ᭄ᬙᬶ –

‘‘ᬇᬫᬾ ᬔᭀ ᬧᬦ, ᬪᬦ᭄ᬢᬾ, ᬧᬜ᭄ᬘᬸᬧᬵᬤᬵᬦᬓ᭄ᬔᬦ᭄ᬥᬵ ᬓᬶᬂᬫᬹᬮᬓᬵ’’ᬢᬶ? ‘‘ᬇᬫᬾ ᬔᭀ, ᬪᬶᬓ᭄ᬔᬸ, ᬧᬜ᭄ᬘᬸᬧᬵᬤᬵᬦᬓ᭄ᬔᬦ᭄ᬥᬵ ᬙᬦ᭄ᬤᬫᬹᬮᬓᬵ’’ᬢᬶ…ᬧᬾ… ᬢᬜ᭄ᬜᬾᬯ ᬦᬸ ᬔᭀ, ᬪᬦ᭄ᬢᬾ, ᬉᬧᬵᬤᬵᬦᬂ ᬢᬾ ᬧᬜ᭄ᬘᬸᬧᬵᬤᬵᬦᬓ᭄ᬔᬦ᭄ᬥᬵ ᬉᬤᬵᬳᬸ ᬅᬜ᭄ᬜᬢ᭄ᬭ ᬧᬜ᭄ᬘᬳᬶ ᬉᬧᬵᬤᬵᬦᬓ᭄ᬔᬦ᭄ᬥᬾᬳᬶ ᬉᬧᬵᬤᬵᬦᬦ᭄ᬢᬶ? ‘‘ᬦ ᬔᭀ, ᬪᬶᬓ᭄ᬔᬸ, ᬢᬜ᭄ᬜᬾᬯ ᬉᬧᬵᬤᬵᬦᬂ ᬢᬾ ᬧᬜ᭄ᬘᬸᬧᬵᬤᬵᬦᬓ᭄ᬔᬦ᭄ᬥᬵ ᬦᬵᬧᬶ ᬅᬜ᭄ᬜᬢ᭄ᬭ ᬧᬜ᭄ᬘᬳᬶ ᬉᬧᬵᬤᬵᬦᬓ᭄ᬔᬦ᭄ᬥᬾᬳᬶ ᬉᬧᬵᬤᬵᬦᬂ, ᬅᬧᬶ ᬘ ᬬᭀ ᬢᬢ᭄ᬣ ᬙᬦ᭄ᬤᬭᬵᬕᭀ ᬢᬂ ᬢᬢ᭄ᬣ ᬉᬧᬵᬤᬵᬦ’’ᬦ᭄ᬢᬶ. ‘‘ᬲᬵᬥᬸ, ᬪᬦ᭄ᬢᬾ’’ᬢᬶ ᬔᭀ ᬲᭀ ᬪᬶᬓ᭄ᬔᬸ…ᬧᬾ… ᬉᬢ᭄ᬢᬭᬶᬂ ᬧᬜ᭄ᬳᬂ ᬅᬧᬸᬘ᭄ᬙᬶ –

‘‘ᬲᬶᬬᬵ ᬧᬦ, ᬪᬦ᭄ᬢᬾ, ᬧᬜ᭄ᬘᬸᬧᬵᬤᬵᬦᬓ᭄ᬔᬦ᭄ᬥᬾᬲᬸ ᬙᬦ᭄ᬤᬭᬵᬕᬯᬾᬫᬢ᭄ᬢᬢᬵ’’ᬢᬶ? ‘‘ᬲᬶᬬᬵ, ᬪᬶᬓ᭄ᬔᬹ’’ᬢᬶ ᬪᬕᬯᬵ ᬅᬯᭀᬘ – ‘‘ᬇᬥ, ᬪᬶᬓ᭄ᬔᬸ, ᬏᬓᬘ᭄ᬘᬲ᭄ᬲ ᬏᬯᬂ ᬳᭀᬢᬶ – ‘ᬏᬯᬂᬭᬹᬧᭀ ᬲᬶᬬᬂ ᬅᬦᬵᬕᬢᬫᬤ᭄ᬥᬵᬦᬂ, ᬏᬯᬂᬯᬾᬤᬦᭀ ᬲᬶᬬᬂ ᬅᬦᬵᬕᬢᬫᬤ᭄ᬥᬵᬦᬂ, ᬏᬯᬂᬲᬜ᭄ᬜᭀ ᬲᬶᬬᬂ ᬅᬦᬵᬕᬢᬫᬤ᭄ᬥᬵᬦᬂ, ᬏᬯᬂᬲᬗ᭄ᬔᬵᬭᭀ ᬲᬶᬬᬂ ᬅᬦᬵᬕᬢᬫᬤ᭄ᬥᬵᬦᬂ, ᬏᬯᬂᬯᬶᬜ᭄ᬜᬵᬡᭀ ᬲᬶᬬᬂ ᬅᬦᬵᬕᬢᬫᬤ᭄ᬥᬵᬦ’ᬦ᭄ᬢᬶ. ᬏᬯᬂ ᬔᭀ, ᬪᬶᬓ᭄ᬔᬸ, ᬲᬶᬬᬵ ᬧᬜ᭄ᬘᬸᬧᬵᬤᬵᬦᬓ᭄ᬔᬦ᭄ᬥᬾᬲᬸ ᬙᬦ᭄ᬤᬭᬵᬕᬯᬾᬫᬢ᭄ᬢᬢᬵ’’ᬢᬶ? ‘‘ᬲᬵᬥᬸ, ᬪᬦ᭄ᬢᬾ’’ᬢᬶ ᬔᭀ ᬲᭀ ᬪᬶᬓ᭄ᬔᬸ…ᬧᬾ… ᬉᬢ᭄ᬢᬭᬶᬂ ᬧᬜ᭄ᬳᬂ ᬅᬧᬸᬘ᭄ᬙᬶ –

‘‘ᬓᬶᬢ᭄ᬢᬵᬯᬢᬵ ᬦᬸ ᬔᭀ, ᬪᬦ᭄ᬢᬾ, ᬔᬦ᭄ᬥᬵᬦᬂ ᬔᬦ᭄ᬥᬵᬥᬶᬯᬘᬦ’’ᬦ᭄ᬢᬶ? ‘‘ᬬᬂ ᬓᬶᬜ᭄ᬘᬶ, ᬪᬶᬓ᭄ᬔᬸ, ᬭᬹᬧᬂ ᬅᬢᬷᬢᬵᬦᬵᬕᬢᬧᬘ᭄ᬘᬸᬧ᭄ᬧᬦ᭄ᬦᬂ ᬅᬚ᭄ᬛᬢ᭄ᬢᬂ ᬯᬵ ᬩᬳᬶᬤ᭄ᬥᬵ ᬯᬵ ᬑᬮ᬴ᬵᬭᬶᬓᬂ ᬯᬵ ᬲᬸᬔᬸᬫᬂ ᬯᬵ ᬳᬷᬦᬂ ᬯᬵ ᬧᬡᬷᬢᬂ ᬯᬵ ᬬᬂ ᬤᬹᬭᬾ ᬲᬦ᭄ᬢᬶᬓᬾ ᬯᬵ, ᬅᬬᬂ ᬯᬸᬘ᭄ᬘᬢᬶ ᬭᬹᬧᬓ᭄ᬔᬦ᭄ᬥᭀ. ᬬᬵ ᬓᬵᬘᬶ ᬯᬾᬤᬦᬵ… ᬬᬵ ᬓᬵᬘᬶ ᬲᬜ᭄ᬜᬵ … ᬬᬾ ᬓᬾᬘᬶ ᬲᬗ᭄ᬔᬵᬭᬵ… ᬬᬂ ᬓᬶᬜ᭄ᬘᬶ ᬯᬶᬜ᭄ᬜᬵᬡᬂ ᬅᬢᬷᬢᬵᬦᬵᬕᬢᬧᬘ᭄ᬘᬸᬧ᭄ᬧᬦ᭄ᬦᬂ ᬅᬚ᭄ᬛᬢ᭄ᬢᬂ ᬯᬵ ᬩᬳᬶᬤ᭄ᬥᬵ ᬯᬵ ᬑᬮ᬴ᬵᬭᬶᬓᬂ ᬯᬵ ᬲᬸᬔᬸᬫᬂ ᬯᬵ ᬳᬷᬦᬂ ᬯᬵ ᬧᬡᬷᬢᬂ ᬯᬵ ᬬᬂ ᬤᬹᬭᬾ ᬲᬦ᭄ᬢᬶᬓᬾ ᬯᬵ, ᬅᬬᬂ ᬯᬸᬘ᭄ᬘᬢᬶ ᬯᬶᬜ᭄ᬜᬵᬡᬓ᭄ᬔᬦ᭄ᬥᭀ. ᬏᬢ᭄ᬢᬵᬯᬢᬵ ᬔᭀ, ᬪᬶᬓ᭄ᬔᬸ, ᬔᬦ᭄ᬥᬵᬦᬂ ᬔᬦ᭄ᬥᬵᬥᬶᬯᬘᬦ’’ᬦ᭄ᬢᬶ. ‘‘ᬲᬵᬥᬸ, ᬪᬦ᭄ᬢᬾ’’ᬢᬶ ᬔᭀ ᬲᭀ ᬪᬶᬓ᭄ᬔᬸ…ᬧᬾ… ᬅᬧᬸᬘ᭄ᬙᬶ –

‘‘ᬓᭀ ᬦᬸ ᬔᭀ, ᬪᬦ᭄ᬢᬾ, ᬳᬾᬢᬸ ᬓᭀ ᬧᬘ᭄ᬘᬬᭀ ᬭᬹᬧᬓ᭄ᬔᬦ᭄ᬥᬲ᭄ᬲ ᬧᬜ᭄ᬜᬵᬧᬦᬵᬬ; ᬓᭀ ᬳᬾᬢᬸ ᬓᭀ ᬧᬘ᭄ᬘᬬᭀ ᬯᬾᬤᬦᬵᬓ᭄ᬔᬦ᭄ᬥᬲ᭄ᬲ ᬧᬜ᭄ᬜᬵᬧᬦᬵᬬ; ᬓᭀ ᬳᬾᬢᬸ ᬓᭀ ᬧᬘ᭄ᬘᬬᭀ ᬲᬜ᭄ᬜᬵᬓ᭄ᬔᬦ᭄ᬥᬲ᭄ᬲ ᬧᬜ᭄ᬜᬵᬧᬦᬵᬬ; ᬓᭀ ᬳᬾᬢᬸ ᬓᭀ ᬧᬘ᭄ᬘᬬᭀ ᬲᬗ᭄ᬔᬵᬭᬓ᭄ᬔᬦ᭄ᬥᬲ᭄ᬲ ᬧᬜ᭄ᬜᬵᬧᬦᬵᬬ; ᬓᭀ ᬳᬾᬢᬸ ᬓᭀ ᬧᬘ᭄ᬘᬬᭀ ᬯᬶᬜ᭄ᬜᬵᬡᬓ᭄ᬔᬦ᭄ᬥᬲ᭄ᬲ ᬧᬜ᭄ᬜᬵᬧᬦᬵᬬᬵ’’ᬢᬶ? ‘‘ᬘᬢ᭄ᬢᬵᬭᭀ ᬔᭀ, ᬪᬶᬓ᭄ᬔᬸ, ᬫᬳᬵᬪᬹᬢᬵ ᬳᬾᬢᬸ, ᬘᬢ᭄ᬢᬵᬭᭀ ᬫᬳᬵᬪᬹᬢᬵ ᬧᬘ᭄ᬘᬬᭀ ᬭᬹᬧᬓ᭄ᬔᬦ᭄ᬥᬲ᭄ᬲ ᬧᬜ᭄ᬜᬵᬧᬦᬵᬬ. ᬨᬲ᭄ᬲᭀ ᬳᬾᬢᬸ ᬨᬲ᭄ᬲᭀ ᬧᬘ᭄ᬘᬬᭀ ᬯᬾᬤᬦᬵᬓ᭄ᬔᬦ᭄ᬥᬲ᭄ᬲ ᬧᬜ᭄ᬜᬵᬧᬦᬵᬬ. ᬨᬲ᭄ᬲᭀ ᬳᬾᬢᬸ ᬨᬲ᭄ᬲᭀ ᬧᬘ᭄ᬘᬬᭀ ᬲᬜ᭄ᬜᬵᬓ᭄ᬔᬦ᭄ᬥᬲ᭄ᬲ ᬧᬜ᭄ᬜᬵᬧᬦᬵᬬ. ᬨᬲ᭄ᬲᭀ ᬳᬾᬢᬸ, ᬨᬲ᭄ᬲᭀ ᬧᬘ᭄ᬘᬬᭀ ᬲᬗ᭄ᬔᬵᬭᬓ᭄ᬔᬦ᭄ᬥᬲ᭄ᬲ ᬧᬜ᭄ᬜᬵᬧᬦᬵᬬ. ᬦᬵᬫᬭᬹᬧᬂ ᬳᬾᬢᬸ, ᬦᬵᬫᬭᬹᬧᬂ ᬧᬘ᭄ᬘᬬᭀ ᬯᬶᬜ᭄ᬜᬵᬡᬓ᭄ᬔᬦ᭄ᬥᬲ᭄ᬲ ᬧᬜ᭄ᬜᬵᬧᬦᬵᬬᬵ’’ᬢᬶ. ‘‘ᬲᬵᬥᬸ, ᬪᬦ᭄ᬢᬾ’’ᬢᬶ ᬔᭀ ᬲᭀ ᬪᬶᬓ᭄ᬔᬸ…ᬧᬾ… ᬅᬧᬸᬘ᭄ᬙᬶ –

‘‘ᬓᬣᬂ ᬦᬸ ᬔᭀ, ᬪᬦ᭄ᬢᬾ, ᬲᬓ᭄ᬓᬵᬬᬤᬶᬝ᭄ᬞᬶ ᬳᭀᬢᬷ’’ᬢᬶ? ‘‘ᬇᬥ, ᬪᬶᬓ᭄ᬔᬸ, ᬅᬲ᭄ᬲᬸᬢᬯᬵ ᬧᬸᬣᬸᬚ᭄ᬚᬦᭀ ᬅᬭᬶᬬᬵᬦᬂ ᬅᬤᬲ᭄ᬲᬵᬯᬷ ᬅᬭᬶᬬᬥᬫ᭄ᬫᬲ᭄ᬲ ᬅᬓᭀᬯᬶᬤᭀ ᬅᬭᬶᬬᬥᬫ᭄ᬫᬾ ᬅᬯᬶᬦᬷᬢᭀ, ᬲᬧ᭄ᬧᬸᬭᬶᬲᬵᬦᬂ ᬅᬤᬲ᭄ᬲᬵᬯᬷ ᬲᬧ᭄ᬧᬸᬭᬶᬲᬥᬫ᭄ᬫᬲ᭄ᬲ ᬅᬓᭀᬯᬶᬤᭀ ᬲᬧ᭄ᬧᬸᬭᬶᬲᬥᬫ᭄ᬫᬾ ᬅᬯᬶᬦᬷᬢᭀ ᬭᬹᬧᬂ ᬅᬢ᭄ᬢᬢᭀ ᬲᬫᬦᬸᬧᬲ᭄ᬲᬢᬶ, ᬭᬹᬧᬯᬦ᭄ᬢᬂ ᬯᬵ ᬅᬢ᭄ᬢᬵᬦᬂ; ᬅᬢ᭄ᬢᬦᬶ ᬯᬵ ᬭᬹᬧᬂ, ᬭᬹᬧᬲ᭄ᬫᬶᬂ ᬯᬵ ᬅᬢ᭄ᬢᬵᬦᬂ; ᬯᬾᬤᬦᬂ… ᬲᬜ᭄ᬜᬂ… ᬲᬗ᭄ᬔᬵᬭᬾ… ᬯᬶᬜ᭄ᬜᬵᬡᬂ… ᬅᬢ᭄ᬢᬢᭀ ᬲᬫᬦᬸᬧᬲ᭄ᬲᬢᬶ, ᬯᬶᬜ᭄ᬜᬵᬡᬯᬦ᭄ᬢᬂ ᬯᬵ ᬅᬢ᭄ᬢᬵᬦᬂ; ᬅᬢ᭄ᬢᬦᬶ ᬯᬵ ᬯᬶᬜ᭄ᬜᬵᬡᬂ, ᬯᬶᬜ᭄ᬜᬵᬡᬲ᭄ᬫᬶᬂ ᬯᬵ ᬅᬢ᭄ᬢᬵᬦᬂ. ᬏᬯᬂ ᬔᭀ, ᬪᬶᬓ᭄ᬔᬸ, ᬲᬓ᭄ᬓᬵᬬᬤᬶᬝ᭄ᬞᬶ ᬳᭀᬢᬷ’’ᬢᬶ. ‘‘ᬲᬵᬥᬸ, ᬪᬦ᭄ᬢᬾ’’ᬢᬶ ᬔᭀ ᬲᭀ ᬪᬶᬓ᭄ᬔᬸ…ᬧᬾ… ᬅᬧᬸᬘ᭄ᬙᬶ –

‘‘ᬓᬣᬂ ᬧᬦ, ᬪᬦ᭄ᬢᬾ, ᬲᬓ᭄ᬓᬵᬬᬤᬶᬝ᭄ᬞᬶ ᬦ ᬳᭀᬢᬷ’’ᬢᬶ? ‘‘ᬇᬥ, ᬪᬶᬓ᭄ᬔᬸ, ᬲᬸᬢᬯᬵ ᬅᬭᬶᬬᬲᬵᬯᬓᭀ ᬅᬭᬶᬬᬵᬦᬂ ᬤᬲ᭄ᬲᬵᬯᬷ ᬅᬭᬶᬬᬥᬫ᭄ᬫᬲ᭄ᬲ ᬓᭀᬯᬶᬤᭀ ᬅᬭᬶᬬᬥᬫ᭄ᬫᬾ ᬲᬸᬯᬶᬦᬷᬢᭀ, ᬲᬧ᭄ᬧᬸᬭᬶᬲᬵᬦᬂ ᬤᬲ᭄ᬲᬵᬯᬷ ᬲᬧ᭄ᬧᬸᬭᬶᬲᬥᬫ᭄ᬫᬲ᭄ᬲ ᬓᭀᬯᬶᬤᭀ ᬲᬧ᭄ᬧᬸᬭᬶᬲᬥᬫ᭄ᬫᬾ ᬲᬸᬯᬶᬦᬷᬢᭀ ᬦ ᬭᬹᬧᬂ ᬅᬢ᭄ᬢᬢᭀ ᬲᬫᬦᬸᬧᬲ᭄ᬲᬢᬶ, ᬦ ᬭᬹᬧᬯᬦ᭄ᬢᬂ ᬯᬵ ᬅᬢ᭄ᬢᬵᬦᬂ; ᬦ ᬅᬢ᭄ᬢᬦᬶ ᬯᬵ ᬭᬹᬧᬂ, ᬦ ᬭᬹᬧᬲ᭄ᬫᬶᬂ ᬯᬵ ᬅᬢ᭄ᬢᬵᬦᬂ; ᬦ ᬯᬾᬤᬦᬂ… ᬦ ᬲᬜ᭄ᬜᬂ… ᬦ ᬲᬗ᭄ᬔᬵᬭᬾ… ᬦ ᬯᬶᬜ᭄ᬜᬵᬡᬂ ᬅᬢ᭄ᬢᬢᭀ ᬲᬫᬦᬸᬧᬲ᭄ᬲᬢᬶ, ᬦ ᬯᬶᬜ᭄ᬜᬵᬡᬯᬦ᭄ᬢᬂ ᬯᬵ ᬅᬢ᭄ᬢᬵᬦᬂ; ᬦ ᬅᬢ᭄ᬢᬦᬶ ᬯᬵ ᬯᬶᬜ᭄ᬜᬵᬡᬂ, ᬦ ᬯᬶᬜ᭄ᬜᬵᬡᬲ᭄ᬫᬶᬂ ᬯᬵ ᬅᬢ᭄ᬢᬵᬦᬂ. ᬏᬯᬂ ᬔᭀ, ᬪᬶᬓ᭄ᬔᬸ, ᬲᬓ᭄ᬓᬵᬬᬤᬶᬝ᭄ᬞᬶ ᬦ ᬳᭀᬢᬷ’’ᬢᬶ. ‘‘ᬲᬵᬥᬸ, ᬪᬦ᭄ᬢᬾ’’ᬢᬶ ᬔᭀ ᬲᭀ ᬪᬶᬓ᭄ᬔᬸ…ᬧᬾ… ᬅᬧᬸᬘ᭄ᬙᬶ –

‘‘ᬓᭀ ᬦᬸ ᬔᭀ, ᬪᬦ᭄ᬢᬾ, ᬭᬹᬧᬲ᭄ᬲ ᬅᬲ᭄ᬲᬵᬤᭀ, ᬓᭀ ᬆᬤᬷᬦᬯᭀ, ᬓᬶᬂ ᬦᬶᬲ᭄ᬲᬭᬡᬂ; ᬓᭀ ᬯᬾᬤᬦᬵᬬ… ᬓᭀ ᬲᬜ᭄ᬜᬵᬬ… ᬓᭀ ᬲᬗ᭄ᬔᬵᬭᬵᬦᬂ… ᬓᭀ ᬯᬶᬜ᭄ᬜᬵᬡᬲ᭄ᬲ ᬅᬲ᭄ᬲᬵᬤᭀ, ᬓᭀ ᬆᬤᬷᬦᬯᭀ, ᬓᬶᬂ ᬦᬶᬲ᭄ᬲᬭᬡ’’ᬦ᭄ᬢᬶ? ‘‘ᬬᬂ ᬔᭀ, ᬪᬶᬓ᭄ᬔᬸ, ᬭᬹᬧᬂ ᬧᬝᬶᬘ᭄ᬘ ᬉᬧ᭄ᬧᬚ᭄ᬚᬢᬶ ᬲᬸᬔᬂ ᬲᭀᬫᬦᬲ᭄ᬲᬂ – ᬅᬬᬂ ᬭᬹᬧᬲ᭄ᬲ ᬅᬲ᭄ᬲᬵᬤᭀ. ᬬᬂ ᬭᬹᬧᬂ ᬅᬦᬶᬘ᭄ᬘᬂ ᬤᬸᬓ᭄ᬔᬂ ᬯᬶᬧᬭᬶᬡᬵᬫᬥᬫ᭄ᬫᬂ – ᬅᬬᬂ ᬭᬹᬧᬲ᭄ᬲ ᬆᬤᬷᬦᬯᭀ. ᬬᭀ ᬭᬹᬧᬲ᭄ᬫᬶᬂ ᬙᬦ᭄ᬤᬭᬵᬕᬯᬶᬦᬬᭀ ᬙᬦ᭄ᬤᬭᬵᬕᬧ᭄ᬧᬳᬵᬦᬂ – ᬇᬤᬂ ᬭᬹᬧᬲ᭄ᬲ ᬦᬶᬲ᭄ᬲᬭᬡᬂ. ᬬᬂ ᬯᬾᬤᬦᬂ ᬧᬝᬶᬘ᭄ᬘ… ᬬᬂ ᬲᬜ᭄ᬜᬂ ᬧᬝᬶᬘ᭄ᬘ… ᬬᬾ ᬲᬗ᭄ᬔᬵᬭᬾ ᬧᬝᬶᬘ᭄ᬘ… ᬬᬂ ᬯᬶᬜ᭄ᬜᬵᬡᬂ ᬧᬝᬶᬘ᭄ᬘ ᬉᬧ᭄ᬧᬚ᭄ᬚᬢᬶ ᬲᬸᬔᬂ ᬲᭀᬫᬦᬲ᭄ᬲᬂ – ᬅᬬᬂ ᬯᬶᬜ᭄ᬜᬵᬡᬲ᭄ᬲ ᬅᬲ᭄ᬲᬵᬤᭀ. ᬬᬂ ᬯᬶᬜ᭄ᬜᬵᬡᬂ ᬅᬦᬶᬘ᭄ᬘᬂ ᬤᬸᬓ᭄ᬔᬂ ᬯᬶᬧᬭᬶᬡᬵᬫᬥᬫ᭄ᬫᬂ – ᬅᬬᬂ ᬯᬶᬜ᭄ᬜᬵᬡᬲ᭄ᬲ ᬆᬤᬷᬦᬯᭀ. ᬬᭀ ᬯᬶᬜ᭄ᬜᬵᬡᬲ᭄ᬫᬶᬂ ᬙᬦ᭄ᬤᬭᬵᬕᬯᬶᬦᬬᭀ ᬙᬦ᭄ᬤᬭᬵᬕᬧ᭄ᬧᬳᬵᬦᬂ – ᬇᬤᬂ ᬯᬶᬜ᭄ᬜᬵᬡᬲ᭄ᬲ ᬦᬶᬲ᭄ᬲᬭᬡ’’ᬦ᭄ᬢᬶ. ‘‘ᬲᬵᬥᬸ, ᬪᬦ᭄ᬢᬾ’’ᬢᬶ ᬔᭀ ᬲᭀ ᬪᬶᬓ᭄ᬔᬸ ᬪᬕᬯᬢᭀ ᬪᬵᬲᬶᬢᬂ ᬅᬪᬶᬦᬦ᭄ᬤᬶᬢ᭄ᬯᬵ ᬅᬦᬸᬫᭀᬤᬶᬢ᭄ᬯᬵ ᬪᬕᬯᬦ᭄ᬢᬂ ᬉᬢ᭄ᬢᬭᬶᬂ ᬧᬜ᭄ᬳᬂ ᬅᬧᬸᬘ᭄ᬙᬶ –

‘‘ᬓᬣᬂ ᬦᬸ ᬔᭀ, ᬪᬦ᭄ᬢᬾ, ᬚᬵᬦᬢᭀ, ᬓᬣᬂ ᬧᬲ᭄ᬲᬢᭀ ᬇᬫᬲ᭄ᬫᬶᬜ᭄ᬘ ᬲᬯᬶᬜ᭄ᬜᬵᬡᬓᬾ ᬓᬵᬬᬾ ᬩᬳᬶᬤ᭄ᬥᬵ ᬘ ᬲᬩ᭄ᬩᬦᬶᬫᬶᬢ᭄ᬢᬾᬲᬸ ᬅᬳᬗ᭄ᬓᬵᬭᬫᬫᬗ᭄ᬓᬵᬭᬫᬵᬦᬵᬦᬸᬲᬬᬵ ᬦ ᬳᭀᬦ᭄ᬢᬷ’’ᬢᬶ? ‘‘ᬬᬂ ᬓᬶᬜ᭄ᬘᬶ, ᬪᬶᬓ᭄ᬔᬸ, ᬭᬹᬧᬂ ᬅᬢᬷᬢᬵᬦᬵᬕᬢᬧᬘ᭄ᬘᬸᬧ᭄ᬧᬦ᭄ᬦᬂ ᬅᬚ᭄ᬛᬢ᭄ᬢᬂ ᬯᬵ ᬩᬳᬶᬤ᭄ᬥᬵ ᬯᬵ ᬑᬮ᬴ᬵᬭᬶᬓᬂ ᬯᬵ ᬲᬸᬔᬸᬫᬂ ᬯᬵ ᬳᬷᬦᬂ ᬯᬵ ᬧᬡᬷᬢᬂ ᬯᬵ ᬬᬂ ᬤᬹᬭᬾ ᬲᬦ᭄ᬢᬶᬓᬾ ᬯᬵ, ᬲᬩ᭄ᬩᬂ ᬭᬹᬧᬂ – ‘ᬦᬾᬢᬂ ᬫᬫ, ᬦᬾᬲᭀᬳᬫᬲ᭄ᬫᬶ, ᬦ ᬫᬾᬲᭀ ᬅᬢ᭄ᬢᬵ’ᬢᬶ ᬏᬯᬫᬾᬢᬂ ᬬᬣᬵᬪᬹᬢᬂ ᬲᬫ᭄ᬫᬧ᭄ᬧᬜ᭄ᬜᬵᬬ ᬧᬲ᭄ᬲᬢᬶ. ᬬᬵ ᬓᬵᬘᬶ ᬯᬾᬤᬦᬵ… ᬬᬵ ᬓᬵᬘᬶ ᬲᬜ᭄ᬜᬵ… ᬬᬾ ᬓᬾᬘᬶ ᬲᬗ᭄ᬔᬵᬭᬵ… ᬬᬂ ᬓᬶᬜ᭄ᬘᬶ ᬯᬶᬜ᭄ᬜᬵᬡᬂ ᬅᬢᬷᬢᬵᬦᬵᬕᬢᬧᬘ᭄ᬘᬸᬧ᭄ᬧᬦ᭄ᬦᬂ ᬅᬚ᭄ᬛᬢ᭄ᬢᬂ ᬯᬵ ᬩᬳᬶᬤ᭄ᬥᬵ ᬯᬵ ᬑᬮ᬴ᬵᬭᬶᬓᬂ ᬯᬵ ᬲᬸᬔᬸᬫᬂ ᬯᬵ ᬳᬷᬦᬂ ᬯᬵ ᬧᬡᬷᬢᬂ ᬯᬵ ᬬᬂ ᬤᬹᬭᬾ ᬲᬦ᭄ᬢᬶᬓᬾ ᬯᬵ, ᬲᬩ᭄ᬩᬂ ᬯᬶᬜ᭄ᬜᬵᬡᬂ – ‘ᬦᬾᬢᬂ ᬫᬫ, ᬦᬾᬲᭀᬳᬫᬲ᭄ᬫᬶ, ᬦ ᬫᬾᬲᭀ ᬅᬢ᭄ᬢᬵ’ᬢᬶ ᬏᬯᬫᬾᬢᬂ ᬬᬣᬵᬪᬹᬢᬂ ᬲᬫ᭄ᬫᬧ᭄ᬧᬜ᭄ᬜᬵᬬ ᬧᬲ᭄ᬲᬢᬶ. ᬏᬯᬂ ᬔᭀ, ᬪᬶᬓ᭄ᬔᬸ, ᬚᬵᬦᬢᭀ ᬏᬯᬂ ᬧᬲ᭄ᬲᬢᭀ ᬇᬫᬲ᭄ᬫᬶᬜ᭄ᬘ ᬲᬯᬶᬜ᭄ᬜᬵᬡᬓᬾ ᬓᬵᬬᬾ ᬩᬳᬶᬤ᭄ᬥᬵ ᬘ ᬲᬩ᭄ᬩᬦᬶᬫᬶᬢ᭄ᬢᬾᬲᬸ ᬅᬳᬗ᭄ᬓᬵᬭᬫᬫᬗ᭄ᬓᬵᬭᬫᬵᬦᬵᬦᬸᬲᬬᬵ ᬦ ᬳᭀᬦ᭄ᬢᬷ’’ᬢᬶ.

ᬢᬾᬦ ᬔᭀ ᬧᬦ ᬲᬫᬬᬾᬦ ᬅᬜ᭄ᬜᬢᬭᬲ᭄ᬲ ᬪᬶᬓ᭄ᬔᬸᬦᭀ ᬏᬯᬂ ᬘᬾᬢᬲᭀ ᬧᬭᬶᬯᬶᬢᬓ᭄ᬓᭀ ᬉᬤᬧᬵᬤᬶ – ‘‘ᬇᬢᬶ ᬓᬶᬭ ᬪᭀ ᬭᬹᬧᬂ ᬅᬦᬢ᭄ᬢᬵ, ᬯᬾᬤᬦᬵ… ᬲᬜ᭄ᬜᬵ… ᬲᬗ᭄ᬔᬵᬭᬵ… ᬯᬶᬜ᭄ᬜᬵᬡᬂ ᬅᬦᬢ᭄ᬢᬵ; ᬅᬦᬢ᭄ᬢᬓᬢᬵᬦᬶ ᬓᬫ᭄ᬫᬵᬦᬶ ᬓᬣᬫᬢ᭄ᬢᬵᬦᬂ [ᬓᬢᬫᬢ᭄ᬢᬵᬦᬂ (ᬧᬷ.), ᬓᬫ᭄ᬫᬢ᭄ᬢᬵᬦᬂ (ᬲ᭄ᬬᬵ. ᬓᬂ. ᬓ.)] ᬨᬸᬲᬶᬲ᭄ᬲᬦ᭄ᬢᬷ’’ᬢᬶ. ᬅᬣ ᬔᭀ ᬪᬕᬯᬵ ᬢᬲ᭄ᬲ ᬪᬶᬓ᭄ᬔᬸᬦᭀ ᬘᬾᬢᬲᬵ ᬘᬾᬢᭀ ᬧᬭᬶᬯᬶᬢᬓ᭄ᬓᬫᬜ᭄ᬜᬵᬬ ᬪᬶᬓ᭄ᬔᬹ ᬆᬫᬦ᭄ᬢᬾᬲᬶ –

‘‘ᬞᬵᬦᬂ ᬔᭀ ᬧᬦᬾᬢᬂ, ᬪᬶᬓ᭄ᬔᬯᬾ, ᬯᬶᬚ᭄ᬚᬢᬶ ᬬᬂ ᬇᬥᬾᬓᬘ᭄ᬘᭀ ᬫᭀᬖᬧᬸᬭᬶᬲᭀ ᬅᬯᬶᬤ᭄ᬯᬵ ᬅᬯᬶᬚ᭄ᬚᬵᬕᬢᭀ ᬢᬡ᭄ᬳᬵᬥᬶᬧᬢᬾᬬ᭄ᬬᬾᬦ ᬘᬾᬢᬲᬵ ᬲᬢ᭄ᬣᬸᬲᬵᬲᬦᬂ ᬅᬢᬶᬥᬵᬯᬶᬢᬩ᭄ᬩᬂ ᬫᬜ᭄ᬜᬾᬬ᭄ᬬ. ᬇᬢᬶ ᬓᬶᬭ, ᬪᭀ, ᬭᬹᬧᬂ ᬅᬦᬢ᭄ᬢᬵ, ᬯᬾᬤᬦᬵ… ᬲᬜ᭄ᬜᬵ… ᬲᬗ᭄ᬔᬵᬭᬵ… ᬯᬶᬜ᭄ᬜᬵᬡᬂ ᬅᬦᬢ᭄ᬢᬵ. ᬅᬦᬢ᭄ᬢᬓᬢᬵᬦᬶ ᬓᬫ᭄ᬫᬵᬦᬶ ᬓᬣᬫᬢ᭄ᬢᬵᬦᬂ ᬨᬸᬲᬶᬲ᭄ᬲᬦ᭄ᬢᬷᬢᬶ? ᬧᬝᬶᬧᬸᬘ᭄ᬙᬵᬯᬶᬦᬷᬢᬵ ᬔᭀ ᬫᬾ ᬢᬸᬫ᭄ᬳᬾ, ᬪᬶᬓ᭄ᬔᬯᬾ, ᬢᬢ᭄ᬭ ᬢᬢ᭄ᬭ ᬢᬾᬲᬸ ᬢᬾᬲᬸ ᬥᬫ᭄ᬫᬾᬲᬸ.

‘‘ᬢᬂ ᬓᬶᬂ ᬫᬜ᭄ᬜᬣ, ᬪᬶᬓ᭄ᬔᬯᬾ, ᬭᬹᬧᬂ ᬦᬶᬘ᭄ᬘᬂ ᬯᬵ ᬅᬦᬶᬘ᭄ᬘᬂ ᬯᬵ’’ᬢᬶ? ‘‘ᬅᬦᬶᬘ᭄ᬘᬂ, ᬪᬦ᭄ᬢᬾ’’. ‘‘ᬯᬾᬤᬦᬵ… ᬲᬜ᭄ᬜᬵ… ᬲᬗ᭄ᬔᬵᬭᬵ… ᬯᬶᬜ᭄ᬜᬵᬡᬂ ᬦᬶᬘ᭄ᬘᬂ ᬯᬵ ᬅᬦᬶᬘ᭄ᬘᬂ ᬯᬵ’’ᬢᬶ? ‘‘ᬅᬦᬶᬘ᭄ᬘᬂ, ᬪᬦ᭄ᬢᬾ’’. ‘‘ᬬᬂ ᬧᬦᬵᬦᬶᬘ᭄ᬘᬂ ᬤᬸᬓ᭄ᬔᬂ ᬯᬵ ᬢᬂ ᬲᬸᬔᬂ ᬯᬵ’’ᬢᬶ? ‘‘ᬤᬸᬓ᭄ᬔᬂ, ᬪᬦ᭄ᬢᬾ’’. ‘‘ᬬᬂ ᬧᬦᬵᬦᬶᬘ᭄ᬘᬂ ᬤᬸᬓ᭄ᬔᬂ ᬯᬶᬧᬭᬶᬡᬵᬫᬥᬫ᭄ᬫᬂ, ᬓᬮ᭄ᬮᬂ ᬦᬸ ᬢᬂ ᬲᬫᬦᬸᬧᬲ᭄ᬲᬶᬢᬸᬂ – ‘ᬏᬢᬂ ᬫᬫ, ᬏᬲᭀᬳᬫᬲ᭄ᬫᬶ, ᬏᬲᭀ ᬫᬾ ᬅᬢ᭄ᬢᬵ’’’ᬢᬶ? ‘‘ᬦᭀ ᬳᬾᬢᬂ, ᬪᬦ᭄ᬢᬾ’’. ᬢᬲ᭄ᬫᬵᬢᬶᬳ…ᬧᬾ… ᬏᬯᬂ ᬧᬲ᭄ᬲᬂ…ᬧᬾ… ᬦᬵᬧᬭᬂ ᬇᬢ᭄ᬣᬢ᭄ᬢᬵᬬᬵᬢᬶ ᬧᬚᬵᬦᬵᬢᬷ’’ᬢᬶ.

‘‘ᬤ᭄ᬯᬾ ᬔᬦ᭄ᬥᬵ ᬢᬜ᭄ᬜᬾᬯ ᬲᬶᬬᬂ, ᬅᬥᬶᬯᬘᬦᬜ᭄ᬘ ᬳᬾᬢᬸᬦᬵ;

ᬲᬓ᭄ᬓᬵᬬᬾᬦ ᬤᬸᬯᬾ ᬯᬸᬢ᭄ᬢᬵ, ᬅᬲ᭄ᬲᬵᬤᬯᬶᬜ᭄ᬜᬵᬡᬓᬾᬦ ᬘ;

ᬏᬢᬾ ᬤᬲᬯᬶᬥᬵ ᬯᬸᬢ᭄ᬢᬵ, ᬳᭀᬢᬶ ᬪᬶᬓ᭄ᬔᬸ ᬧᬸᬘ᭄ᬙᬵᬬᬵ’’ᬢᬶ. ᬤᬲᬫᬂ;

ᬔᬚ᭄ᬚᬦᬷᬬᬯᬕ᭄ᬕᭀ ᬅᬝ᭄ᬞᬫᭀ.

ᬢᬲ᭄ᬲᬸᬤ᭄ᬤᬵᬦᬂ –

ᬅᬲ᭄ᬲᬵᬤᭀ ᬤ᭄ᬯᬾ ᬲᬫᬸᬤᬬᬵ, ᬅᬭᬳᬦ᭄ᬢᬾᬳᬶ ᬅᬧᬭᬾ ᬤ᭄ᬯᬾ;

ᬲᬷᬳᭀ ᬔᬚ᭄ᬚᬦᬷ ᬧᬶᬡ᭄ᬟᭀᬮ᭄ᬬᬂ, ᬧᬵᬮᬶᬮᬾᬬ᭄ᬬᬾᬦ ᬧᬸᬡ᭄ᬡᬫᬵᬢᬶ.