᭑. ᬅᬯᬶᬚ᭄ᬚᬵᬲᬸᬢ᭄ᬢᬂ

᭑᭑᭓. ᬲᬵᬯᬢ᭄ᬣᬶᬦᬶᬤᬵᬦᬂ. ᬅᬣ ᬔᭀ ᬅᬜ᭄ᬜᬢᬭᭀ ᬪᬶᬓ᭄ᬔᬸ ᬬᬾᬦ ᬪᬕᬯᬵ ᬢᬾᬦᬸᬧᬲᬗ᭄ᬓᬫᬶ…ᬧᬾ… ᬏᬓᬫᬦ᭄ᬢᬂ ᬦᬶᬲᬶᬦ᭄ᬦᭀ ᬔᭀ ᬲᭀ ᬪᬶᬓ᭄ᬔᬸ ᬪᬕᬯᬦ᭄ᬢᬂ ᬏᬢᬤᬯᭀᬘ – ‘‘‘ᬅᬯᬶᬚ᭄ᬚᬵ ᬅᬯᬶᬚ᭄ᬚᬵ’ᬢᬶ, ᬪᬦ᭄ᬢᬾ, ᬯᬸᬘ᭄ᬘᬢᬶ. ᬓᬢᬫᬵ ᬦᬸ ᬔᭀ, ᬪᬦ᭄ᬢᬾ, ᬅᬯᬶᬚ᭄ᬚᬵ, ᬓᬶᬢ᭄ᬢᬵᬯᬢᬵ ᬘ ᬅᬯᬶᬚ᭄ᬚᬵᬕᬢᭀ ᬳᭀᬢᬷ’’ᬢᬶ? ‘‘ᬇᬥ, ᬪᬶᬓ᭄ᬔᬸ, ᬅᬲ᭄ᬲᬸᬢᬯᬵ ᬧᬸᬣᬸᬚ᭄ᬚᬦᭀ ᬭᬹᬧᬂ ᬦᬧ᭄ᬧᬚᬵᬦᬵᬢᬶ, ᬭᬹᬧᬲᬫᬸᬤᬬᬂ ᬦᬧ᭄ᬧᬚᬵᬦᬵᬢᬶ, ᬭᬹᬧᬦᬶᬭᭀᬥᬂ ᬦᬧ᭄ᬧᬚᬵᬦᬵᬢᬶ, ᬭᬹᬧᬦᬶᬭᭀᬥᬕᬵᬫᬶᬦᬶᬂ ᬧᬝᬶᬧᬤᬂ ᬦᬧ᭄ᬧᬚᬵᬦᬵᬢᬶ; ᬯᬾᬤᬦᬂ ᬦᬧ᭄ᬧᬚᬵᬦᬵᬢᬶ… ᬲᬜ᭄ᬜᬂ… ᬲᬗ᭄ᬔᬵᬭᬾ ᬦᬧ᭄ᬧᬚᬵᬦᬵᬢᬶ…ᬧᬾ… ᬯᬶᬜ᭄ᬜᬵᬡᬦᬶᬭᭀᬥᬕᬵᬫᬶᬦᬶᬂ ᬧᬝᬶᬧᬤᬂ ᬦᬧ᭄ᬧᬚᬵᬦᬵᬢᬶ. ᬅᬬᬂ ᬯᬸᬘ᭄ᬘᬢᬶ, ᬪᬶᬓ᭄ᬔᬸ, ᬅᬯᬶᬚ᭄ᬚᬵ. ᬏᬢ᭄ᬢᬵᬯᬢᬵ ᬘ ᬅᬯᬶᬚ᭄ᬚᬵᬕᬢᭀ ᬳᭀᬢᬷ’’ᬢᬶ. ᬧᬞᬫᬂ.