᭑᭑. ᬢᬢᬶᬬᬧᬩ᭄ᬩᬢᬲᬸᬢ᭄ᬢᬂ

᭘᭔. ᬲᬵᬯᬢ᭄ᬣᬶᬬᬂ ᬯᬶᬳᬭᬢᬶ…ᬧᬾ… ‘‘ᬲᬾᬬ᭄ᬬᬣᬵᬧᬶ, ᬪᬶᬓ᭄ᬔᬯᬾ, ᬧᬸᬭᬶᬲᭀ ᬲᬶᬦᬾᬭᬸᬲ᭄ᬲ ᬧᬩ᭄ᬩᬢᬭᬵᬚᬲ᭄ᬲ ᬲᬢ᭄ᬢ ᬫᬸᬕ᭄ᬕᬫᬢ᭄ᬢᬶᬬᭀ ᬧᬵᬲᬵᬡᬲᬓ᭄ᬔᬭᬵ ᬉᬧᬦᬶᬓ᭄ᬔᬶᬧᬾᬬ᭄ᬬ. ᬢᬂ ᬓᬶᬂ ᬫᬜ᭄ᬜᬣ, ᬪᬶᬓ᭄ᬔᬯᬾ, ᬓᬢᬫᬂ ᬦᬸ ᬔᭀ ᬩᬳᬸᬢᬭᬂ, ᬬᬵ ᬯᬵ ᬲᬢ᭄ᬢ ᬫᬸᬕ᭄ᬕᬫᬢ᭄ᬢᬶᬬᭀ ᬧᬵᬲᬵᬡᬲᬓ᭄ᬔᬭᬵ ᬉᬧᬦᬶᬓ᭄ᬔᬶᬢ᭄ᬢᬵ ᬬᭀ ᬯᬵ ᬲᬶᬦᬾᬭᬸ [ᬉᬧᬦᬶᬓ᭄ᬔᬶᬢ᭄ᬢᬵ, ᬲᬶᬦᬾᬭᬸ ᬯᬵ (ᬲᬷ.)] ᬧᬩ᭄ᬩᬢᬭᬵᬚᬵ’’ᬢᬶ?

‘‘ᬏᬢᬤᬾᬯ, ᬪᬦ᭄ᬢᬾ, ᬩᬳᬸᬢᬭᬂ ᬬᬤᬶᬤᬂ ᬲᬶᬦᬾᬭᬸ ᬧᬩ᭄ᬩᬢᬭᬵᬚᬵ; ᬅᬧ᭄ᬧᬫᬢ᭄ᬢᬶᬓᬵ ᬲᬢ᭄ᬢ ᬫᬸᬕ᭄ᬕᬫᬢ᭄ᬢᬶᬬᭀ ᬧᬵᬲᬵᬡᬲᬓ᭄ᬔᬭᬵ ᬉᬧᬦᬶᬓ᭄ᬔᬶᬢ᭄ᬢᬵ. ᬦᬾᬯ ᬲᬢᬶᬫᬂ ᬓᬮᬂ ᬉᬧᬾᬦ᭄ᬢᬶ ᬦ ᬲᬳᬲ᭄ᬲᬶᬫᬂ ᬓᬮᬂ ᬉᬧᬾᬦ᭄ᬢᬶ ᬦ ᬲᬢᬲᬳᬲ᭄ᬲᬶᬫᬂ ᬓᬮᬂ ᬉᬧᬾᬦ᭄ᬢᬶ ᬲᬶᬦᬾᬭᬸᬂ ᬧᬩ᭄ᬩᬢᬭᬵᬚᬵᬦᬂ ᬉᬧᬦᬶᬥᬵᬬ ᬲᬢ᭄ᬢ ᬫᬸᬕ᭄ᬕᬫᬢ᭄ᬢᬶᬬᭀ ᬧᬵᬲᬵᬡᬲᬓ᭄ᬔᬭᬵ ᬉᬧᬦᬶᬓ᭄ᬔᬶᬢ᭄ᬢᬵ’’ᬢᬶ. ‘‘ᬏᬯᬫᬾᬯ ᬔᭀ, ᬪᬶᬓ᭄ᬔᬯᬾ, ᬅᬭᬶᬬᬲᬵᬯᬓᬲ᭄ᬲ ᬤᬶᬝ᭄ᬞᬶᬲᬫ᭄ᬧᬦ᭄ᬦᬲ᭄ᬲ ᬧᬸᬕ᭄ᬕᬮᬲ᭄ᬲ ᬅᬥᬶᬕᬫᬂ ᬉᬧᬦᬶᬥᬵᬬ ᬅᬜ᭄ᬜᬢᬶᬢ᭄ᬣᬶᬬᬲᬫᬡᬩ᭄ᬭᬵᬳ᭄ᬫᬡᬧᬭᬶᬩ᭄ᬩᬵᬚᬓᬵᬦᬂ ᬅᬥᬶᬕᬫᭀ ᬦᬾᬯ ᬲᬢᬶᬫᬂ ᬓᬮᬂ ᬉᬧᬾᬢᬶ ᬦ ᬲᬳᬲ᭄ᬲᬶᬫᬂ ᬓᬮᬂ ᬉᬧᬾᬢᬶ ᬦ ᬲᬢᬲᬳᬲ᭄ᬲᬶᬫᬂ ᬓᬮᬂ ᬉᬧᬾᬢᬶ. ᬏᬯᬂ ᬫᬳᬵᬥᬶᬕᬫᭀ, ᬪᬶᬓ᭄ᬔᬯᬾ, ᬤᬶᬝ᭄ᬞᬶᬲᬫ᭄ᬧᬦ᭄ᬦᭀ ᬧᬸᬕ᭄ᬕᬮᭀ, ᬏᬯᬂ ᬫᬳᬵᬪᬶᬜ᭄ᬜᭀ’’ᬢᬶ. ᬏᬓᬵᬤᬲᬫᬂ.

ᬅᬪᬶᬲᬫᬬᬲᬂᬬᬸᬢ᭄ᬢᬂ ᬲᬫᬢ᭄ᬢᬂ.