᭒. ᬦᬶᬫᭀᬓ᭄ᬔᬲᬸᬢ᭄ᬢᬂ

᭒. ᬲᬵᬯᬢ᭄ᬣᬶᬦᬶᬤᬵᬦᬂ. ᬅᬣ ᬔᭀ ᬅᬜ᭄ᬜᬢᬭᬵ ᬤᬾᬯᬢᬵ ᬅᬪᬶᬓ᭄ᬓᬦ᭄ᬢᬵᬬ ᬭᬢ᭄ᬢᬶᬬᬵ ᬅᬪᬶᬓ᭄ᬓᬦ᭄ᬢᬯᬡ᭄ᬡᬵ ᬓᬾᬯᬮᬓᬧ᭄ᬧᬂ ᬚᬾᬢᬯᬦᬂ ᬑᬪᬵᬲᬾᬢ᭄ᬯᬵ ᬬᬾᬦ ᬪᬕᬯᬵ ᬢᬾᬦᬸᬧᬲᬗ᭄ᬓᬫᬶ; ᬉᬧᬲᬗ᭄ᬓᬫᬶᬢ᭄ᬯᬵ ᬪᬕᬯᬦ᭄ᬢᬂ ᬅᬪᬶᬯᬵᬤᬾᬢ᭄ᬯᬵ ᬏᬓᬫᬦ᭄ᬢᬂ ᬅᬝ᭄ᬞᬵᬲᬶ. ᬏᬓᬫᬦ᭄ᬢᬂ ᬞᬶᬢᬵ ᬔᭀ ᬲᬵ ᬤᬾᬯᬢᬵ ᬪᬕᬯᬦ᭄ᬢᬂ ᬏᬢᬤᬯᭀᬘ –

‘‘ᬚᬵᬦᬵᬲᬶ ᬦᭀ ᬢ᭄ᬯᬂ, ᬫᬵᬭᬶᬲ, ᬲᬢ᭄ᬢᬵᬦᬂ ᬦᬶᬫᭀᬓ᭄ᬔᬂ ᬧᬫᭀᬓ᭄ᬔᬂ ᬯᬶᬯᬾᬓ’’ᬦ᭄ᬢᬶ?

‘‘ᬚᬵᬦᬵᬫᬶ ᬔ᭄ᬯᬵᬳᬂ, ᬆᬯᬸᬲᭀ, ᬲᬢ᭄ᬢᬵᬦᬂ ᬦᬶᬫᭀᬓ᭄ᬔᬂ ᬧᬫᭀᬓ᭄ᬔᬂ ᬯᬶᬯᬾᬓ’’ᬦ᭄ᬢᬶ.

‘‘ᬬᬣᬵ ᬓᬣᬂ ᬧᬦ ᬢ᭄ᬯᬂ, ᬫᬵᬭᬶᬲ, ᬚᬵᬦᬵᬲᬶ ᬲᬢ᭄ᬢᬵᬦᬂ ᬦᬶᬫᭀᬓ᭄ᬔᬂ ᬧᬫᭀᬓ᭄ᬔᬂ ᬯᬶᬯᬾᬓ’’ᬦ᭄ᬢᬶ?

‘‘ᬦᬦ᭄ᬤᬷᬪᬯᬧᬭᬶᬓ᭄ᬔᬬᬵ [ᬦᬦ᭄ᬤᬶᬪᬯᬧᬭᬶᬓ᭄ᬔᬬᬵ (ᬲ᭄ᬬᬵ. ᬓᬂ.)], ᬲᬜ᭄ᬜᬵᬯᬶᬜ᭄ᬜᬵᬡᬲᬗ᭄ᬔᬬᬵ, ᬯᬾᬤᬦᬵᬦᬂ ᬦᬶᬭᭀᬥᬵ ᬉᬧᬲᬫᬵ – ᬏᬯᬂ ᬔ᭄ᬯᬵᬳᬂ, ᬆᬯᬸᬲᭀ, ᬚᬵᬦᬵᬫᬶ ᬲᬢ᭄ᬢᬵᬦᬂ ᬦᬶᬫᭀᬓ᭄ᬔᬂ ᬧᬫᭀᬓ᭄ᬔᬂ ᬯᬶᬯᬾᬓ’’ᬦ᭄ᬢᬶ.