᭒. ᬲᭀᬮ᬴ᬲᬜᬵᬡᬦᬶᬤ᭄ᬤᬾᬲᭀ

᭑᭕᭓. ᬇᬫᬾᬳᬶ ᬲᭀᬮ᬴ᬲᬳᬶ ᬆᬓᬵᬭᬾᬳᬶ ᬉᬤᬸᬘᬶᬢ᭄ᬢᬂ ᬘᬶᬢ᭄ᬢᬂ ᬲᬫᬸᬤᬸᬘᬶᬢᬂ ᬘᬶᬢ᭄ᬢᬂ ᬏᬓᬢ᭄ᬢᬾ ᬲᬦ᭄ᬢᬶᬝ᭄ᬞᬢᬶ, ᬦᬷᬯᬭᬡᬾᬳᬶ ᬯᬶᬲᬸᬚ᭄ᬛᬢᬶ. ᬓᬢᬫᬾ ᬢᬾ ᬏᬓᬢ᭄ᬢᬵ? ᬦᬾᬓ᭄ᬔᬫ᭄ᬫᬂ ᬏᬓᬢ᭄ᬢᬂ, ᬅᬩ᭄ᬬᬵᬧᬵᬤᭀ ᬏᬓᬢ᭄ᬢᬂ, ᬆᬮᭀᬓᬲᬜ᭄ᬜᬵ ᬏᬓᬢ᭄ᬢᬂ, ᬅᬯᬶᬓ᭄ᬔᬾᬧᭀ ᬏᬓᬢ᭄ᬢᬂ, ᬥᬫ᭄ᬫᬯᬯᬢ᭄ᬣᬵᬦᬂ ᬏᬓᬢ᭄ᬢᬂ, ᬜᬵᬡᬂ ᬏᬓᬢ᭄ᬢᬂ, ᬧᬵᬫᭀᬚ᭄ᬚᬂ ᬏᬓᬢ᭄ᬢᬂ, ᬲᬩ᭄ᬩᬾᬧᬶ ᬓᬸᬲᬮᬵ ᬥᬫ᭄ᬫᬵ ᬏᬓᬢ᭄ᬢᬵ.

ᬦᬷᬯᬭᬡᬵᬢᬶ, ᬓᬢᬫᬾ ᬢᬾ ᬦᬷᬯᬭᬡᬵ? ᬓᬵᬫᬘ᭄ᬙᬦ᭄ᬤᭀ ᬦᬷᬯᬭᬡᬂ, ᬩ᭄ᬬᬵᬧᬵᬤᭀ ᬦᬷᬯᬭᬡᬂ, ᬣᬶᬦᬫᬶᬤ᭄ᬥᬂ ᬦᬷᬯᬭᬡᬂ, ᬉᬤ᭄ᬥᬘ᭄ᬘᬓᬸᬓ᭄ᬓᬸᬘ᭄ᬘᬂ ᬦᬷᬯᬭᬡᬂ, ᬯᬶᬘᬶᬓᬶᬘ᭄ᬙᬵ ᬦᬷᬯᬭᬡᬂ, ᬅᬯᬶᬚ᭄ᬚᬵ ᬦᬷᬯᬭᬡᬂ, ᬅᬭᬢᬶ ᬦᬷᬯᬭᬡᬂ, ᬲᬩ᭄ᬩᬾᬧᬶ ᬅᬓᬸᬲᬮᬵ ᬥᬫ᭄ᬫᬵ ᬦᬷᬯᬭᬡᬵ.

ᬦᬷᬯᬭᬡᬵᬢᬶ, ᬓᬾᬦᬝ᭄ᬞᬾᬦ ᬦᬷᬯᬭᬡᬵ? ᬦᬶᬬ᭄ᬬᬵᬦᬵᬯᬭᬡᬝ᭄ᬞᬾᬦ ᬦᬷᬯᬭᬡᬵ. ᬓᬢᬫᬾ ᬢᬾ ᬦᬶᬬ᭄ᬬᬵᬦᬵ? ᬦᬾᬓ᭄ᬔᬫ᭄ᬫᬂ ᬅᬭᬶᬬᬵᬦᬂ ᬦᬶᬬ᭄ᬬᬵᬦᬂ. ᬢᬾᬦ ᬘ ᬦᬾᬓ᭄ᬔᬫ᭄ᬫᬾᬦ ᬅᬭᬶᬬᬵ ᬦᬶᬬ᭄ᬬᬦ᭄ᬢᬶ. ᬓᬵᬫᬘ᭄ᬙᬦ᭄ᬤᭀ ᬦᬶᬬ᭄ᬬᬵᬦᬵᬯᬭᬡᬂ. ᬢᬾᬦ ᬘ ᬓᬵᬫᬘ᭄ᬙᬦ᭄ᬤᬾᬦ ᬦᬶᬯᬸᬢᬢ᭄ᬢᬵ ᬦᬾᬓ᭄ᬔᬫ᭄ᬫᬂ ᬅᬭᬶᬬᬵᬦᬂ ᬦᬶᬬ᭄ᬬᬵᬦᬂ ᬦᬧ᭄ᬧᬚᬵᬦᬵᬢᬷᬢᬶ – ᬓᬵᬫᬘ᭄ᬙᬦ᭄ᬤᭀ ᬦᬶᬬ᭄ᬬᬵᬦᬵᬯᬭᬡᬂ. ᬅᬩ᭄ᬬᬵᬧᬵᬤᭀ ᬅᬭᬶᬬᬵᬦᬂ ᬦᬶᬬ᭄ᬬᬵᬦᬂ. ᬢᬾᬦ ᬘ ᬅᬩ᭄ᬬᬵᬧᬵᬤᬾᬦ ᬅᬭᬶᬬᬵ ᬦᬶᬬ᭄ᬬᬦ᭄ᬢᬶ. ᬩ᭄ᬬᬵᬧᬵᬤᭀ ᬦᬶᬬ᭄ᬬᬵᬦᬵᬯᬭᬡᬂ. ᬢᬾᬦ ᬘ ᬩ᭄ᬬᬵᬧᬵᬤᬾᬦ ᬦᬶᬯᬸᬢᬢ᭄ᬢᬵ ᬅᬩ᭄ᬬᬵᬧᬵᬤᬂ ᬅᬭᬶᬬᬵᬦᬂ ᬦᬶᬬ᭄ᬬᬵᬦᬂ ᬦᬧ᭄ᬧᬚᬵᬦᬵᬢᬷᬢᬶ – ᬩ᭄ᬬᬵᬧᬵᬤᭀ ᬦᬶᬬ᭄ᬬᬵᬦᬵᬯᬭᬡᬂ. ᬆᬮᭀᬓᬲᬜ᭄ᬜᬵ ᬅᬭᬶᬬᬵᬦᬂ ᬦᬶᬬ᭄ᬬᬵᬦᬂ. ᬢᬵᬬ ᬘ ᬆᬮᭀᬓᬲᬜ᭄ᬜᬵᬬ ᬅᬭᬶᬬᬵ ᬦᬶᬬ᭄ᬬᬦ᭄ᬢᬶ. ᬣᬶᬦᬫᬶᬤ᭄ᬥᬂ ᬦᬶᬬ᭄ᬬᬵᬦᬵᬯᬭᬡᬂ. ᬢᬾᬦ ᬘ ᬣᬶᬦᬫᬶᬤ᭄ᬥᬾᬦ ᬦᬶᬯᬸᬢᬢ᭄ᬢᬵ ᬆᬮᭀᬓᬲᬜ᭄ᬜᬂ ᬅᬭᬶᬬᬵᬦᬂ ᬦᬶᬬ᭄ᬬᬵᬦᬂ ᬦᬧ᭄ᬧᬚᬵᬦᬵᬢᬷᬢᬶ – ᬣᬶᬦᬫᬶᬤ᭄ᬥᬂ ᬦᬶᬬ᭄ᬬᬵᬦᬵᬯᬭᬡᬂ. ᬅᬯᬶᬓ᭄ᬔᬾᬧᭀ ᬅᬭᬶᬬᬵᬦᬂ ᬦᬶᬬ᭄ᬬᬵᬦᬂ. ᬢᬾᬦ ᬘ ᬅᬯᬶᬓ᭄ᬔᬾᬧᬾᬦ ᬅᬭᬶᬬᬵ ᬦᬶᬬ᭄ᬬᬦ᭄ᬢᬶ. ᬉᬤ᭄ᬥᬘ᭄ᬘᬂ ᬦᬶᬬ᭄ᬬᬵᬦᬵᬯᬭᬡᬂ. ᬢᬾᬦ ᬘ ᬉᬤ᭄ᬥᬘ᭄ᬘᬾᬦ ᬦᬶᬯᬸᬢᬢ᭄ᬢᬵ ᬅᬯᬶᬓ᭄ᬔᬾᬧᬂ ᬅᬭᬶᬬᬵᬦᬂ ᬦᬶᬬ᭄ᬬᬵᬦᬂ ᬦᬧ᭄ᬧᬚᬵᬦᬵᬢᬷᬢᬶ – ᬉᬤ᭄ᬥᬘ᭄ᬘᬂ ᬦᬶᬬ᭄ᬬᬵᬦᬵᬯᬭᬡᬂ. ᬥᬫ᭄ᬫᬯᬯᬢ᭄ᬣᬵᬦᬂ ᬅᬭᬶᬬᬵᬦᬂ ᬦᬶᬬ᭄ᬬᬵᬦᬂ. ᬢᬾᬦ ᬘ ᬥᬫ᭄ᬫᬯᬯᬢ᭄ᬣᬵᬦᬾᬦ ᬅᬭᬶᬬᬵ ᬦᬶᬬ᭄ᬬᬦ᭄ᬢᬶ. ᬯᬶᬘᬶᬓᬶᬘ᭄ᬙᬵ ᬦᬶᬬ᭄ᬬᬵᬦᬵᬯᬭᬡᬂ. ᬢᬵᬬ ᬘ ᬯᬶᬘᬶᬓᬶᬘ᭄ᬙᬵᬬ ᬦᬶᬯᬸᬢᬢ᭄ᬢᬵ ᬥᬫ᭄ᬫᬯᬯᬢ᭄ᬣᬵᬦᬂ ᬅᬭᬶᬬᬵᬦᬂ ᬦᬶᬬ᭄ᬬᬵᬦᬂ ᬦᬧ᭄ᬧᬚᬵᬦᬵᬢᬷᬢᬶ – ᬯᬶᬘᬶᬓᬶᬘ᭄ᬙᬵ ᬦᬶᬬ᭄ᬬᬵᬦᬵᬯᬭᬡᬂ. ᬜᬵᬡᬂ ᬅᬭᬶᬬᬵᬦᬂ ᬦᬶᬬ᭄ᬬᬵᬦᬂ. ᬢᬾᬦ ᬘ ᬜᬵᬡᬾᬦ ᬅᬭᬶᬬᬵ ᬦᬶᬬ᭄ᬬᬦ᭄ᬢᬶ. ᬅᬯᬶᬚ᭄ᬚᬵ ᬦᬶᬬ᭄ᬬᬵᬦᬵᬯᬭᬡᬂ. ᬢᬵᬬ ᬘ ᬅᬯᬶᬚ᭄ᬚᬵᬬ ᬦᬶᬯᬸᬢᬢ᭄ᬢᬵ ᬜᬵᬡᬂ ᬅᬭᬶᬬᬵᬦᬂ ᬦᬶᬬ᭄ᬬᬵᬦᬂ ᬦᬧ᭄ᬧᬚᬵᬦᬵᬢᬷᬢᬶ – ᬅᬯᬶᬚ᭄ᬚᬵ ᬦᬶᬬ᭄ᬬᬵᬦᬵᬯᬭᬡᬂ. ᬧᬵᬫᭀᬚ᭄ᬚᬂ ᬅᬭᬶᬬᬵᬦᬂ ᬦᬶᬬ᭄ᬬᬵᬦᬂ. ᬢᬾᬦ ᬘ ᬧᬵᬫᭀᬚ᭄ᬚᬾᬦ ᬅᬭᬶᬬᬵ ᬦᬶᬬ᭄ᬬᬦ᭄ᬢᬶ. ᬅᬭᬢᬶ ᬦᬶᬬ᭄ᬬᬵᬦᬵᬯᬭᬡᬂ. ᬢᬵᬬ ᬘ ᬅᬭᬢᬶᬬᬵ ᬦᬶᬯᬸᬢᬢ᭄ᬢᬵ ᬧᬵᬫᭀᬚ᭄ᬚᬂ ᬅᬭᬶᬬᬵᬦᬂ ᬦᬶᬬ᭄ᬬᬵᬦᬂ ᬦᬧ᭄ᬧᬚᬵᬦᬵᬢᬷᬢᬶ – ᬅᬭᬢᬶ ᬦᬶᬬ᭄ᬬᬵᬦᬵᬯᬭᬡᬂ. ᬲᬩ᭄ᬩᬾᬧᬶ ᬓᬸᬲᬮᬵ ᬥᬫ᭄ᬫᬵ ᬅᬭᬶᬬᬵᬦᬂ ᬦᬶᬬ᭄ᬬᬵᬦᬂ. ᬢᬾᬳᬶ ᬘ ᬓᬸᬲᬮᬾᬳᬶ ᬥᬫ᭄ᬫᬾᬳᬶ ᬅᬭᬶᬬᬵ ᬦᬶᬬ᭄ᬬᬦ᭄ᬢᬶ. ᬲᬩ᭄ᬩᬾᬧᬶ ᬅᬓᬸᬲᬮᬵ ᬥᬫ᭄ᬫᬵ ᬦᬶᬬ᭄ᬬᬵᬦᬵᬯᬭᬡᬵ. ᬢᬾᬳᬶ ᬘ ᬅᬓᬸᬲᬮᬾᬳᬶ ᬥᬫ᭄ᬫᬾᬳᬶ ᬦᬶᬯᬸᬢᬢ᭄ᬢᬵ ᬓᬸᬲᬮᬾ ᬥᬫ᭄ᬫᬾ ᬅᬭᬶᬬᬵᬦᬂ ᬦᬶᬬ᭄ᬬᬵᬦᬂ ᬦᬧ᭄ᬧᬚᬵᬦᬵᬢᬷᬢᬶ – ᬲᬩ᭄ᬩᬾᬧᬶ ᬅᬓᬸᬲᬮᬵ ᬥᬫ᭄ᬫᬵ ᬦᬶᬬ᭄ᬬᬵᬦᬵᬯᬭᬡᬵ. ᬇᬫᬾᬳᬶ ᬘ ᬧᬦ ᬦᬷᬯᬭᬡᬾᬳᬶ ᬯᬶᬲᬸᬤ᭄ᬥᬘᬶᬢ᭄ᬢᬲ᭄ᬲ ᬲᭀᬮ᬴ᬲᬯᬢ᭄ᬣᬸᬓᬂ ᬆᬦᬵᬧᬵᬦᬲ᭄ᬲᬢᬶᬲᬫᬵᬥᬶᬂ ᬪᬵᬯᬬᬢᭀ ᬔᬡᬶᬓᬲᬫᭀᬥᬵᬦᬵ.

ᬲᭀᬮ᬴ᬲᬜᬵᬡᬦᬶᬤ᭄ᬤᬾᬲᭀ ᬤᬸᬢᬶᬬᭀ.