᭑᭒. ᬑᬢᬭᬡᬳᬵᬭᬲᬫ᭄ᬧᬵᬢᭀ

᭗᭔. ᬢᬢ᭄ᬣ ᬓᬢᬫᭀ ᬑᬢᬭᬡᭀ ᬳᬵᬭᬲᬫ᭄ᬧᬵᬢᭀ?

‘‘ᬢᬲ᭄ᬫᬵ ᬭᬓ᭄ᬔᬶᬢᬘᬶᬢ᭄ᬢᬲ᭄ᬲ, ᬲᬫ᭄ᬫᬵᬲᬗ᭄ᬓᬧ᭄ᬧᬕᭀᬘᬭᭀ’’ᬢᬶ ᬕᬵᬣᬵ. ‘‘ᬢᬲ᭄ᬫᬵ ᬭᬓ᭄ᬔᬶᬢᬘᬶᬢ᭄ᬢᬲ᭄ᬲ, ᬲᬫ᭄ᬫᬵᬲᬗ᭄ᬓᬧ᭄ᬧᬕᭀᬘᬭᭀ’’. ‘‘ᬲᬫ᭄ᬫᬵᬤᬶᬝ᭄ᬞᬶᬧᬸᬭᬾᬓ᭄ᬔᬵᬭᭀ’’ᬢᬶ ᬲᬫ᭄ᬫᬵᬤᬶᬝ᭄ᬞᬶᬬᬵ ᬕᬳᬶᬢᬵᬬ ᬕᬳᬶᬢᬵᬦᬶ ᬪᬯᬦ᭄ᬢᬶ ᬧᬜ᭄ᬘᬶᬦ᭄ᬤ᭄ᬭᬶᬬᬵᬦᬶ, ᬅᬬᬂ ᬇᬦ᭄ᬤ᭄ᬭᬶᬬᬾᬳᬶ ᬑᬢᬭᬡᬵ.

ᬢᬵᬦᬶᬬᬾᬯ ᬇᬦ᭄ᬤ᭄ᬭᬶᬬᬵᬦᬶ ᬯᬶᬚ᭄ᬚᬵ, ᬯᬶᬚ᭄ᬚᬸᬧ᭄ᬧᬵᬤᬵ ᬅᬯᬶᬚ᭄ᬚᬵᬦᬶᬭᭀᬥᭀ, ᬅᬯᬶᬚ᭄ᬚᬵᬦᬶᬭᭀᬥᬵ ᬲᬗ᭄ᬔᬵᬭᬦᬶᬭᭀᬥᭀ, ᬲᬗ᭄ᬔᬵᬭᬦᬶᬭᭀᬥᬵ ᬯᬶᬜ᭄ᬜᬵᬡᬦᬶᬭᭀᬥᭀ, ᬏᬯᬂ ᬲᬩ᭄ᬩᬂ, ᬅᬬᬂ ᬧᬝᬶᬘ᭄ᬘᬲᬫᬸᬧ᭄ᬧᬵᬤᬾᬦ ᬑᬢᬭᬡᬵ.

ᬢᬵᬦᬶᬬᬾᬯ ᬧᬜ᭄ᬘᬶᬦ᭄ᬤ᭄ᬭᬶᬬᬵᬦᬶ ᬢᬷᬳᬶ ᬔᬦ᭄ᬥᬾᬳᬶ ᬲᬗ᭄ᬕᬳᬶᬢᬵᬦᬶ – ᬲᬷᬮᬓ᭄ᬔᬦ᭄ᬥᬾᬦ ᬲᬫᬵᬥᬶᬓ᭄ᬔᬦ᭄ᬥᬾᬦ ᬧᬜ᭄ᬜᬵᬓ᭄ᬔᬦ᭄ᬥᬾᬦ. ᬅᬬᬂ ᬔᬦ᭄ᬥᬾᬳᬶ ᬑᬢᬭᬡᬵ.

ᬢᬵᬦᬶ ᬬᬾᬯ ᬧᬜ᭄ᬘᬶᬦ᭄ᬤ᭄ᬭᬶᬬᬵᬦᬶ ᬲᬗ᭄ᬔᬵᬭᬧᬭᬶᬬᬵᬧᬦ᭄ᬦᬵᬦᬶ. ᬬᬾ ᬲᬗ᭄ᬔᬵᬭᬵ ᬅᬦᬵᬲᬯᬵ ᬦᭀ ᬘ ᬪᬯᬗ᭄ᬕᬵ, ᬢᬾ ᬲᬗ᭄ᬔᬵᬭᬵ ᬥᬫ᭄ᬫᬥᬵᬢᬸᬲᬗ᭄ᬕᬳᬶᬢᬵ, ᬅᬬᬂ ᬥᬵᬢᬹᬳᬶ ᬑᬢᬭᬡᬵ.

ᬲᬵ ᬥᬫ᭄ᬫᬥᬵᬢᬸ ᬥᬫ᭄ᬫᬵᬬᬢᬦᬧᬭᬶᬬᬵᬧᬦ᭄ᬦᬵ, ᬬᬂ ᬆᬬᬢᬦᬂ ᬅᬦᬵᬲᬯᬂ ᬦᭀ ᬘ ᬪᬯᬗ᭄ᬕᬂ, ᬅᬬᬂ ᬆᬬᬢᬦᬾᬳᬶ ᬑᬢᬭᬡᬵ.

ᬦᬶᬬᬸᬢ᭄ᬢᭀ ᬑᬢᬭᬡᭀ ᬳᬵᬭᬲᬫ᭄ᬧᬵᬢᭀ.