᭑. ᬧᬞᬫᬫᬶᬕᬚᬵᬮᬲᬸᬢ᭄ᬢᬯᬡ᭄ᬡᬦᬵ

᭖᭓. ᬫᬶᬕᬚᬵᬮᬯᬕ᭄ᬕᬲ᭄ᬲ ᬧᬞᬫᬾ ᬘᬓ᭄ᬔᬸᬯᬶᬜ᭄ᬜᬾᬬ᭄ᬬᬵᬢᬶ ᬘᬓ᭄ᬔᬸᬯᬶᬜ᭄ᬜᬵᬡᬾᬦ ᬧᬲ᭄ᬲᬶᬢᬩ᭄ᬩᬵ. ᬲᭀᬢᬯᬶᬜ᭄ᬜᬾᬬ᭄ᬬᬵᬤᬷᬲᬸᬧᬶ ᬏᬲᬾᬯ ᬦᬬᭀ. ᬇᬝ᭄ᬞᬵᬢᬶ ᬧᬭᬶᬬᬶᬝ᭄ᬞᬵ ᬯᬵ ᬳᭀᬦ᭄ᬢᬸ ᬫᬵ ᬯᬵ, ᬇᬝ᭄ᬞᬵᬭᬫ᭄ᬫᬡᬪᬹᬢᬵᬢᬶ ᬅᬢ᭄ᬣᭀ. ᬓᬦ᭄ᬢᬵᬢᬶ ᬓᬫᬦᬷᬬᬵ. ᬫᬦᬵᬧᬵᬢᬶ ᬫᬦᬯᬟ᭄ᬠᬦᬓᬵ. ᬧᬶᬬᬭᬹᬧᬵᬢᬶ ᬧᬶᬬᬚᬵᬢᬶᬓᬵ. ᬓᬵᬫᬹᬧᬲᬂᬳᬶᬢᬵᬢᬶ ᬆᬭᬫ᭄ᬫᬡᬂ ᬓᬢ᭄ᬯᬵ ᬉᬧ᭄ᬧᬚ᭄ᬚᬫᬵᬦᬾᬦ ᬓᬵᬫᬾᬦ ᬉᬧᬲᬂᬳᬶᬢᬵ ᬭᬚᬦᬷᬬᬵᬢᬶ ᬭᬜ᭄ᬚᬦᬷᬬᬵ, ᬭᬵᬕᬸᬧ᭄ᬧᬢ᭄ᬢᬶᬓᬵᬭᬡᬪᬹᬢᬵᬢᬶ ᬅᬢ᭄ᬣᭀ. ᬦᬦ᭄ᬤᬷᬢᬶ ᬢᬡ᭄ᬳᬵᬦᬦ᭄ᬤᬷ. ᬲᬂᬬᭀᬕᭀᬢᬶ ᬲᬂᬬᭀᬚᬦᬂ. ᬦᬦ᭄ᬤᬶᬲᬂᬬᭀᬚᬦᬲᬂᬬᬸᬢ᭄ᬢᭀᬢᬶ ᬦᬦ᭄ᬤᬷᬩᬦ᭄ᬥᬦᬾᬦ ᬩᬤ᭄ᬥᭀ. ᬅᬭᬜ᭄ᬜᬯᬦᬧᬢ᭄ᬣᬵᬦᬷᬢᬶ ᬅᬭᬜ᭄ᬜᬵᬦᬶ ᬘ ᬯᬦᬧᬢ᭄ᬣᬵᬦᬶ ᬘ. ᬢᬢ᭄ᬣ ᬓᬶᬜ᭄ᬘᬵᬧᬶ ᬅᬪᬶᬥᬫ᭄ᬫᬾ ᬦᬶᬧ᭄ᬧᬭᬶᬬᬵᬬᬾᬦ ‘‘ᬦᬶᬓ᭄ᬔᬫᬶᬢ᭄ᬯᬵ ᬩᬳᬶ ᬇᬦ᭄ᬤᬔᬷᬮᬵ ᬲᬩ᭄ᬩᬫᬾᬢᬂ ᬅᬭᬜ᭄ᬜ’’ᬦ᭄ᬢᬶ (ᬯᬶᬪ. ᭕᭒᭙) ᬯᬸᬢ᭄ᬢᬂ, ᬢᬣᬵᬧᬶ ᬬᬂ ᬢᬂ ‘‘ᬧᬜ᭄ᬘᬥᬦᬸᬲᬢᬶᬓᬂ ᬧᬘ᭄ᬙᬶᬫ’’ᬦ᭄ᬢᬶ (ᬧᬵᬭᬵ. ᭖᭕᭔) ᬅᬭᬜ᭄ᬜᬓᬗ᭄ᬕᬦᬶᬧ᭄ᬨᬵᬤᬓᬂ ᬲᬾᬦᬵᬲᬦᬂ ᬯᬸᬢ᭄ᬢᬂ, ᬢᬤᬾᬯ ᬅᬥᬶᬧ᭄ᬧᬾᬢᬦ᭄ᬢᬶ ᬯᬾᬤᬶᬢᬩ᭄ᬩᬂ. ᬯᬦᬧᬢ᭄ᬣᬦ᭄ᬢᬶ ᬕᬵᬫᬦ᭄ᬢᬂ ᬅᬢᬶᬓ᭄ᬓᬫᬶᬢ᭄ᬯᬵ ᬫᬦᬸᬲ᭄ᬲᬵᬦᬂ ᬅᬦᬸᬧᬘᬵᬭᬝ᭄ᬞᬵᬦᬂ, ᬬᬢ᭄ᬣ ᬦ ᬓᬲᬷᬬᬢᬶ ᬦ ᬯᬧᬷᬬᬢᬶ. ᬯᬸᬢ᭄ᬢᬫ᭄ᬧᬶ ᬘᬾᬢᬂ –

‘‘ᬯᬦᬧᬢ᭄ᬣᬦ᭄ᬢᬶ ᬤᬹᬭᬵᬦᬫᬾᬢᬂ ᬲᬾᬦᬵᬲᬦᬵᬦᬂ ᬅᬥᬶᬯᬘᬦᬂ. ᬯᬦᬧᬢ᭄ᬣᬦ᭄ᬢᬶ ᬯᬦᬲᬡ᭄ᬟᬵᬦᬫᬾᬢᬂ, ᬯᬦᬧᬢ᭄ᬣᬦ᭄ᬢᬶ ᬪᬶᬂᬲᬦᬓᬵᬦᬫᬾᬢᬂ, ᬯᬦᬧᬢ᭄ᬣᬦ᭄ᬢᬶ ᬲᬮᭀᬫᬳᬂᬲᬵᬦᬫᬾᬢᬂ, ᬯᬦᬧᬢ᭄ᬣᬦ᭄ᬢᬶ ᬧᬭᬶᬬᬦ᭄ᬢᬵᬦᬫᬾᬢᬂ, ᬯᬦᬧᬢ᭄ᬣᬦ᭄ᬢᬶ ᬅᬫᬦᬸᬲ᭄ᬲᬹᬧᬘᬵᬭᬵᬦᬂ ᬲᬾᬦᬵᬲᬦᬵᬦᬫᬾᬢᬂ ᬅᬥᬶᬯᬘᬦ’’ᬦ᭄ᬢᬶ (ᬯᬶᬪ. ᭕᭓᭑).

ᬏᬢ᭄ᬣ ᬘ ᬧᬭᬶᬬᬦ᭄ᬢᬵᬦᬦ᭄ᬢᬶ ᬇᬫᬂ ᬏᬓᬂ ᬧᬭᬶᬬᬵᬬᬂ ᬞᬧᬾᬢ᭄ᬯᬵ ᬲᬾᬲᬧᬭᬶᬬᬵᬬᬾᬳᬶ ᬯᬦᬧᬢ᭄ᬣᬵᬦᬶ ᬯᬾᬤᬶᬢᬩ᭄ᬩᬵᬦᬶ. ᬧᬦ᭄ᬢᬵᬦᬷᬢᬶ ᬧᬭᬶᬬᬦ᭄ᬢᬵᬦᬶ ᬅᬢᬶᬤᬹᬭᬵᬦᬶ. ᬅᬧ᭄ᬧᬲᬤ᭄ᬤᬵᬦᬷᬢᬶ ᬉᬤᬸᬓ᭄ᬔᬮᬫᬸᬲᬮᬤᬵᬭᬓᬲᬤ᭄ᬤᬵᬤᬷᬦᬂ ᬅᬪᬵᬯᬾᬦ ᬅᬧ᭄ᬧᬲᬤ᭄ᬤᬵᬦᬶ. ᬅᬧ᭄ᬧᬦᬶᬕ᭄ᬖᭀᬲᬵᬦᬷᬢᬶ ᬢᬾᬲᬂ ᬢᬾᬲᬂ ᬦᬶᬦ᭄ᬦᬵᬤᬫᬳᬵᬦᬶᬕ᭄ᬖᭀᬲᬲ᭄ᬲ ᬅᬪᬵᬯᬾᬦ ᬅᬧ᭄ᬧᬦᬶᬕ᭄ᬖᭀᬲᬵᬦᬶ. ᬯᬶᬚᬦᬯᬵᬢᬵᬦᬷᬢᬶ ᬲᬜ᭄ᬘᬭᬡᬚᬦᬲ᭄ᬲ ᬲᬭᬷᬭᬯᬵᬢᬯᬶᬭᬳᬶᬢᬵᬦᬶ. ᬫᬦᬸᬲ᭄ᬲᬭᬵᬳᬲ᭄ᬲᬾᬬ᭄ᬬᬓᬵᬦᬷᬢᬶ ᬫᬦᬸᬲ᭄ᬲᬵᬦᬂ ᬭᬳᭀᬓᬫ᭄ᬫᬲ᭄ᬲ ᬅᬦᬸᬘ᭄ᬙᬯᬶᬓᬵᬦᬶ. ᬧᬝᬶᬲᬮ᭄ᬮᬵᬦᬲᬵᬭᬸᬧ᭄ᬧᬵᬦᬷᬢᬶ ᬦᬶᬮᬷᬬᬦᬲᬵᬭᬸᬧ᭄ᬧᬵᬦᬶ.