᭕. ᬧᬞᬫᬏᬲᬦᬵᬲᬸᬢ᭄ᬢᬯᬡ᭄ᬡᬦᬵ

᭕᭔. ᬧᬜ᭄ᬘᬫᬾ ᬏᬲᬦᬵᬢᬶ ᬕᬯᬾᬲᬦᬵ ᬧᬭᬶᬬᬾᬲᬦᬵ ᬫᬕ᭄ᬕᬦᬵ. ᬢᬵ ᬯᬶᬪᬵᬕᬢᭀ ᬤᬲ᭄ᬲᬾᬢᬸᬂ ‘‘ᬓᬵᬫᬾᬲᬦᬵ’’ᬢᬶᬆᬤᬶ ᬯᬸᬢ᭄ᬢᬂ. ᬢᬢ᭄ᬣ ᬓᬵᬫᬾᬲᬦᬵᬢᬶ ᬓᬵᬫᬵᬦᬂ ᬏᬲᬦᬵ, ᬓᬵᬫᬲᬗ᭄ᬔᬵᬢᬵ ᬯᬵ ᬏᬲᬦᬵ ᬓᬵᬫᬾᬲᬦᬵ. ᬯᬸᬢ᭄ᬢᬜ᭄ᬳᬾᬢᬂ –

‘‘ᬢᬢ᭄ᬣ ᬓᬢᬫᬵ ᬓᬵᬫᬾᬲᬦᬵ? ᬬᭀ ᬓᬵᬫᬾᬲᬸ ᬓᬵᬫᬘ᭄ᬙᬦ᭄ᬤᭀ, ᬓᬵᬫᬭᬵᬕᭀ, ᬓᬵᬫᬦᬦ᭄ᬤᬷ, ᬓᬵᬫᬲ᭄ᬦᬾᬳᭀ, ᬓᬵᬫᬧᬶᬧᬵᬲᬵ, ᬓᬵᬫᬫᬸᬘ᭄ᬙᬵ, ᬓᬵᬫᬚ᭄ᬛᭀᬲᬵᬦᬂ, ᬅᬬᬂ ᬯᬸᬘ᭄ᬘᬢᬶ ᬓᬵᬫᬾᬲᬦᬵ’’ᬢᬶ (ᬯᬶᬪ. ᭙᭑᭙).

ᬢᬲ᭄ᬫᬵ ᬓᬵᬫᬭᬵᬕᭀ ᬓᬵᬫᬾᬲᬦᬵᬢᬶ ᬯᬾᬤᬶᬢᬩ᭄ᬩᭀ. ᬪᬯᬾᬲᬦᬵᬬᬧᬶ ᬏᬲᬾᬯ ᬦᬬᭀ. ᬯᬸᬢ᭄ᬢᬫ᭄ᬧᬶ ᬘᬾᬢᬂ –

‘‘ᬢᬢ᭄ᬣ ᬓᬢᬫᬵ ᬪᬯᬾᬲᬦᬵ? ᬬᭀ ᬪᬯᬾᬲᬸ ᬪᬯᬘ᭄ᬙᬦ᭄ᬤᭀ…ᬧᬾ… ᬪᬯᬚ᭄ᬛᭀᬲᬵᬦᬂ, ᬅᬬᬂ ᬯᬸᬘ᭄ᬘᬢᬶ ᬪᬯᬾᬲᬦᬵ’’ᬢᬶ (ᬯᬶᬪ. ᭙᭑᭙).

ᬢᬲ᭄ᬫᬵ ᬪᬯᬾᬲᬦᬭᬵᬕᭀ ᬭᬹᬧᬵᬭᬹᬧᬪᬯᬧᬢ᭄ᬣᬦᬵ ᬪᬯᬾᬲᬦᬵᬢᬶ ᬯᬾᬤᬶᬢᬩ᭄ᬩᬵ. ᬩ᭄ᬭᬳ᭄ᬫᬘᬭᬶᬬᬲ᭄ᬲ ᬏᬲᬦᬵ ᬩ᭄ᬭᬳ᭄ᬫᬘᬭᬶᬬᬾᬲᬦᬵ. ᬬᬣᬵᬳ –

‘‘ᬢᬢ᭄ᬣ ᬓᬢᬫᬵ ᬩ᭄ᬭᬳ᭄ᬫᬘᬭᬶᬬᬾᬲᬦᬵ? ᬲᬲ᭄ᬲᬢᭀ ᬮᭀᬓᭀᬢᬶ ᬯᬵ, ᬅᬲᬲ᭄ᬲᬢᭀ ᬮᭀᬓᭀᬢᬶ ᬯᬵ, ᬅᬦ᭄ᬢᬯᬵ ᬮᭀᬓᭀᬢᬶ ᬯᬵ, ᬅᬦᬦ᭄ᬢᬯᬵ ᬮᭀᬓᭀᬢᬶ ᬯᬵ, ᬢᬂ ᬚᬷᬯᬂ ᬢᬂ ᬲᬭᬷᬭᬦ᭄ᬢᬶ ᬯᬵ, ᬅᬜ᭄ᬜᬂ ᬚᬷᬯᬂ ᬅᬜ᭄ᬜᬂ ᬲᬭᬷᬭᬦ᭄ᬢᬶ ᬯᬵ, ᬳᭀᬢᬶ ᬢᬣᬵᬕᬢᭀ ᬧᬭᬂ ᬫᬭᬡᬵᬢᬶ ᬯᬵ, ᬦ ᬳᭀᬢᬶ ᬢᬣᬵᬕᬢᭀ ᬧᬭᬂ ᬫᬭᬡᬵᬢᬶ ᬯᬵ, ᬳᭀᬢᬶ ᬘ ᬦ ᬘ ᬳᭀᬢᬶ ᬢᬣᬵᬕᬢᭀ ᬧᬭᬂ ᬫᬭᬡᬵᬢᬶ ᬯᬵ, ᬦᬾᬯ ᬳᭀᬢᬶ ᬦ ᬦ ᬳᭀᬢᬶ ᬢᬣᬵᬕᬢᭀ ᬧᬭᬂ ᬫᬭᬡᬵᬢᬶ ᬯᬵ, ᬬᬵ ᬏᬯᬭᬹᬧᬵ ᬤᬶᬝ᭄ᬞᬶ ᬤᬶᬝ᭄ᬞᬶᬕᬢᬂ ᬤᬶᬝ᭄ᬞᬶᬕᬳᬦᬂ ᬤᬶᬝ᭄ᬞᬶᬓᬦ᭄ᬢᬵᬭᭀ ᬤᬶᬝ᭄ᬞᬶᬯᬶᬲᬹᬓᬵᬬᬶᬓᬂ ᬤᬶᬝ᭄ᬞᬶᬯᬶᬧ᭄ᬨᬦ᭄ᬤᬶᬢᬂ ᬤᬶᬝ᭄ᬞᬶᬲᬜ᭄ᬜᭀᬚᬦᬂ ᬕᬵᬳᭀ ᬧᬢᬶᬝ᭄ᬞᬵᬳᭀ ᬅᬪᬶᬦᬶᬯᬾᬲᭀ ᬧᬭᬵᬫᬵᬲᭀ ᬓᬸᬫ᭄ᬫᬕ᭄ᬕᭀ ᬫᬶᬘ᭄ᬙᬵᬧᬣᭀ ᬫᬶᬘ᭄ᬙᬢ᭄ᬢᬂ ᬢᬶᬢ᭄ᬣᬵᬬᬢᬦᬂ ᬯᬶᬧᬭᬶᬬᬾᬲᬕ᭄ᬕᬵᬳᭀ, ᬅᬬᬂ ᬯᬸᬘ᭄ᬘᬢᬶ ᬩ᭄ᬭᬳ᭄ᬫᬘᬭᬶᬬᬾᬲᬦᬵ’’ᬢᬶ (ᬯᬶᬪ. ᭙᭑᭙).

ᬢᬲ᭄ᬫᬵ ᬤᬶᬝ᭄ᬞᬶᬕᬢᬲᬫ᭄ᬫᬢᬲ᭄ᬲ ᬩ᭄ᬭᬳ᭄ᬫᬘᬭᬶᬬᬲ᭄ᬲ ᬏᬲᬦᬵ ᬤᬶᬝ᭄ᬞᬶᬩ᭄ᬭᬳ᭄ᬫᬘᬭᬶᬬᬾᬲᬦᬵᬢᬶ ᬯᬾᬤᬶᬢᬩ᭄ᬩᬵᬢᬶ. ᬏᬢ᭄ᬢᬵᬯᬢᬵ ᬭᬵᬕᬤᬶᬝ᭄ᬞᬶᬬᭀ ᬏᬲᬦᬵᬢᬶ ᬤᬲ᭄ᬲᬶᬢᬵ ᬳᭀᬦ᭄ᬢᬶ. ᬦ ᬓᬾᬯᬮᬜ᭄ᬘ ᬭᬵᬕᬤᬶᬝ᭄ᬞᬶᬬᭀᬯ ᬏᬲᬦᬵ, ᬢᬤᬾᬓᬝ᭄ᬞᬂ ᬓᬫ᭄ᬫᬫ᭄ᬧᬶ. ᬯᬸᬢ᭄ᬢᬫ᭄ᬧᬶ ᬘᬾᬢᬂ –

‘‘ᬢᬢ᭄ᬣ ᬓᬢᬫᬵ ᬓᬵᬫᬾᬲᬦᬵ? ᬓᬵᬫᬭᬵᬕᭀ ᬢᬤᬾᬓᬝ᭄ᬞᬂ ᬅᬓᬸᬲᬮᬂ ᬓᬵᬬᬓᬫ᭄ᬫᬂ ᬯᬘᬷᬓᬫ᭄ᬫᬂ ᬫᬦᭀᬓᬫ᭄ᬫᬂ, ᬅᬬᬂ ᬯᬸᬘ᭄ᬘᬢᬶ ᬓᬵᬫᬾᬲᬦᬵ. ᬢᬢ᭄ᬣ ᬓᬢᬫᬵ ᬪᬯᬾᬲᬦᬵ? ᬪᬯᬭᬵᬕᭀ ᬢᬤᬾᬓᬝ᭄ᬞᬂ ᬅᬓᬸᬲᬮᬂ ᬓᬵᬬᬓᬫ᭄ᬫᬂ ᬯᬘᬷᬓᬫ᭄ᬫᬂ ᬫᬦᭀᬓᬫ᭄ᬫᬂ, ᬅᬬᬂ ᬯᬸᬘ᭄ᬘᬢᬶ ᬪᬯᬾᬲᬦᬵ. ᬢᬢ᭄ᬣ ᬓᬢᬫᬵ ᬩ᭄ᬭᬳ᭄ᬫᬘᬭᬶᬬᬾᬲᬦᬵ? ᬅᬦ᭄ᬢᬕ᭄ᬕᬵᬳᬶᬓᬵ ᬤᬶᬝ᭄ᬞᬶ ᬢᬤᬾᬓᬝ᭄ᬞᬂ ᬅᬓᬸᬲᬮᬂ ᬓᬵᬬᬓᬫ᭄ᬫᬂ, ᬯᬘᬷᬓᬫ᭄ᬫᬂ, ᬫᬦᭀᬓᬫ᭄ᬫᬂ, ᬅᬬᬂ ᬯᬸᬘ᭄ᬘᬢᬶ ᬩ᭄ᬭᬳ᭄ᬫᬘᬭᬶᬬᬾᬲᬦᬵ’’ᬢᬶ (ᬯᬶᬪ. ᭙᭑᭙) –

ᬏᬯᬫᬾᬢᬵ ᬢᬶᬲ᭄ᬲᭀ ᬏᬲᬦᬵ ᬯᬾᬤᬶᬢᬩ᭄ᬩᬵ.

ᬕᬵᬣᬵᬲᬸ ᬲᬫ᭄ᬪᬯᬦ᭄ᬢᬶ ᬏᬢ᭄ᬣ ᬏᬲᬦᬵᬦᬂ ᬉᬧ᭄ᬧᬢ᭄ᬢᬶᬳᬾᬢᬸᬪᬹᬢᬵ ᬅᬯᬶᬚ᭄ᬚᬵᬤᬬᭀ ᬢᬡ᭄ᬳᬵ ᬘᬵᬢᬶ ᬲᬫ᭄ᬪᬯᭀ, ᬲᬫᬸᬤᬬᭀᬢᬶ ᬅᬢ᭄ᬣᭀ. ᬬᬢ᭄ᬣ ᬘᬾᬢᬵ ᬦᬶᬭᬸᬚ᭄ᬛᬦ᭄ᬢᬷᬢᬶ ᬩ᭄ᬭᬳ᭄ᬫᬘᬭᬶᬬᬾᬲᬦᬵ ᬧᬞᬫᬫᬕ᭄ᬕᬾᬦ ᬦᬶᬭᬸᬚ᭄ᬛᬢᬶ, ᬓᬵᬫᬾᬲᬦᬵ ᬅᬦᬵᬕᬵᬫᬶᬫᬕ᭄ᬕᬾᬦ, ᬪᬯᬾᬲᬦᬵ ᬅᬭᬳᬢ᭄ᬢᬫᬕ᭄ᬕᬾᬦ ᬦᬶᬭᬸᬚ᭄ᬛᬢᬷᬢᬶ ᬯᬾᬤᬶᬢᬩ᭄ᬩᬂ. ᬲᬾᬲᬂ ᬯᬸᬢ᭄ᬢᬦᬬᬫᬾᬯ.

ᬧᬜ᭄ᬘᬫᬲᬸᬢ᭄ᬢᬯᬡ᭄ᬡᬦᬵ ᬦᬶᬝ᭄ᬞᬶᬢᬵ.