᭔. ᬘᬢᬸᬢ᭄ᬣᬧᬡ᭄ᬡᬵᬲᬓᬂ

(᭑᭖) ᭑. ᬲᬤ᭄ᬥᬫ᭄ᬫᬯᬕ᭄ᬕᭀ

᭑. ᬧᬞᬫᬲᬫ᭄ᬫᬢ᭄ᬢᬦᬶᬬᬵᬫᬲᬸᬢ᭄ᬢᬯᬡ᭄ᬡᬦᬵ

᭑᭕᭑. ᬘᬢᬸᬢ᭄ᬣᬲ᭄ᬲ ᬧᬞᬫᬾ ᬅᬪᬩ᭄ᬩᭀ ᬦᬶᬬᬵᬫᬂ ᬑᬓ᭄ᬓᬫᬶᬢᬸᬂ ᬓᬸᬲᬮᬾᬲᬸ ᬥᬫ᭄ᬫᬾᬲᬸ ᬲᬫ᭄ᬫᬢ᭄ᬢᬦ᭄ᬢᬶ ᬓᬸᬲᬮᬾᬲᬸ ᬥᬫ᭄ᬫᬾᬲᬸ ᬲᬫ᭄ᬫᬢ᭄ᬢᬪᬹᬢᬂ ᬫᬕ᭄ᬕᬦᬶᬬᬵᬫᬂ ᬑᬓ᭄ᬓᬫᬶᬢᬸᬂ ᬅᬪᬩ᭄ᬩᭀ ᬅᬪᬵᬚᬦᬂ. ᬓᬣᬂ ᬧᬭᬶᬪᭀᬢᬷᬢᬶᬆᬤᬷᬲᬸ ‘‘ᬓᬶᬂ ᬓᬣᬵ ᬦᬵᬫ ᬏᬲᬵ’’ᬢᬶ ᬯᬤᬦ᭄ᬢᭀ ᬓᬣᬂ ᬧᬭᬶᬪᭀᬢᬶ ᬦᬵᬫ. ‘‘ᬓᬶᬂ ᬦᬵᬫᬾᬲ ᬓᬣᬾᬢᬶ, ᬓᬶᬂ ᬅᬬᬂ ᬚᬵᬦᬵᬢᬷ’’ᬢᬶ ᬯᬤᬦ᭄ᬢᭀ ᬓᬣᬶᬓᬂ ᬧᬭᬶᬪᭀᬢᬶ ᬦᬵᬫ. ‘‘ᬫᬬᬂ ᬓᬶᬂ ᬚᬵᬦᬵᬫ, ᬓᬸᬢᭀ ᬅᬫ᭄ᬳᬵᬓᬂ ᬏᬢᬂ ᬲᭀᬢᬸᬂ ᬩᬮ’’ᬦ᭄ᬢᬶ ᬯᬤᬦ᭄ᬢᭀ ᬅᬢ᭄ᬢᬵᬦᬂ ᬧᬭᬶᬪᭀᬢᬶ ᬦᬵᬫ. ᬯᬶᬧᬭᬶᬬᬵᬬᬾᬦ ᬲᬸᬓ᭄ᬓᬧᬓ᭄ᬔᭀ ᬯᬾᬤᬶᬢᬩ᭄ᬩᭀ.

᭒. ᬤᬸᬢᬶᬬᬲᬫ᭄ᬫᬢ᭄ᬢᬦᬶᬬᬵᬫᬲᬸᬢ᭄ᬢᬯᬡ᭄ᬡᬦᬵ

᭑᭕᭒. ᬤᬸᬢᬶᬬᬾ ᬅᬦᬜ᭄ᬜᬵᬢᬾ ᬅᬜ᭄ᬜᬵᬢᬫᬵᬦᬷᬢᬶ ᬅᬯᬶᬜ᭄ᬜᬵᬢᬲ᭄ᬫᬶᬂᬬᬾᬯ ‘‘ᬯᬶᬜ᭄ᬜᬵᬢᬫᬶᬤᬂ ᬫᬬᬵ’’ᬢᬶ ᬏᬯᬂᬫᬵᬦᬷ.

᭓. ᬢᬢᬶᬬᬲᬫ᭄ᬫᬢ᭄ᬢᬦᬶᬬᬵᬫᬲᬸᬢ᭄ᬢᬯᬡ᭄ᬡᬦᬵ

᭑᭕᭓. ᬢᬢᬶᬬᬾ ᬫᬓ᭄ᬔᬷ ᬥᬫ᭄ᬫᬂ ᬲᬸᬡᬵᬢᬷᬢᬶ ᬫᬓ᭄ᬔᬷ ᬳᬸᬢ᭄ᬯᬵ ᬕᬸᬡᬫᬓ᭄ᬔᬦᬘᬶᬢ᭄ᬢᬾᬦ ᬥᬫ᭄ᬫᬂ ᬲᬸᬡᬵᬢᬶ. ᬉᬧᬵᬭᬫ᭄ᬪᬘᬶᬢ᭄ᬢᭀᬢᬶ ᬦᬶᬕ᭄ᬕᬳᬵᬭᭀᬧᬦᬘᬶᬢ᭄ᬢᭀ. ᬭᬦ᭄ᬥᬕᬯᬾᬲᬷᬢᬶ ᬕᬸᬡᬭᬦ᭄ᬥᬂ ᬕᬸᬡᬘ᭄ᬙᬶᬤ᭄ᬤᬂ ᬕᬯᬾᬲᬦ᭄ᬢᭀ.

᭔. ᬧᬞᬫᬲᬤ᭄ᬥᬫ᭄ᬫᬲᬫ᭄ᬫᭀᬲᬲᬸᬢ᭄ᬢᬯᬡ᭄ᬡᬦᬵ

᭑᭕᭔. ᬘᬢᬸᬢ᭄ᬣᬾ ᬦ ᬲᬓ᭄ᬓᬘ᭄ᬘᬂ ᬥᬫ᭄ᬫᬂ ᬲᬸᬡᬦ᭄ᬢᬷᬢᬶ ᬑᬳᬶᬢᬲᭀᬢᬵ ᬲᬸᬓᬢᬓᬵᬭᬶᬦᭀ ᬳᬸᬢ᭄ᬯᬵ ᬦ ᬲᬸᬡᬦ᭄ᬢᬶ. ᬦ ᬧᬭᬶᬬᬵᬧᬸᬡᬦ᭄ᬢᬷᬢᬶ ᬬᬣᬵᬲᬸᬢᬂ ᬥᬫ᭄ᬫᬂ ᬯᬮ᬴ᬜ᭄ᬚᬦ᭄ᬢᬵᬧᬶ ᬲᬓ᭄ᬓᬘ᭄ᬘᬂ ᬦ ᬯᬮ᬴ᬜ᭄ᬚᬾᬦ᭄ᬢᬶ. ᬧᬜ᭄ᬘᬫᬂ ᬉᬢ᭄ᬢᬵᬦᬫᬾᬯ.

᭖. ᬢᬢᬶᬬᬲᬤ᭄ᬥᬫ᭄ᬫᬲᬫ᭄ᬫᭀᬲᬲᬸᬢ᭄ᬢᬯᬡ᭄ᬡᬦᬵ

᭑᭕᭖. ᬙᬝ᭄ᬞᬾ ᬅᬧ᭄ᬧᬝᬶᬲᬭᬡᭀᬢᬶ ᬅᬧ᭄ᬧᬢᬶᬝ᭄ᬞᭀ. ᬆᬘᬭᬶᬬᬵ ᬳᬶ ᬲᬸᬢ᭄ᬢᬦ᭄ᬢᬲ᭄ᬲ ᬧᬝᬶᬲᬭᬡᬂ ᬦᬵᬫ, ᬢᬾᬲᬂ ᬅᬪᬵᬯᬵ ᬅᬧ᭄ᬧᬝᬶᬲᬭᬡᭀ ᬳᭀᬢᬶ. ᬲᬾᬲᬫᬾᬢ᭄ᬣ ᬳᬾᬝ᭄ᬞᬵ ᬯᬸᬢ᭄ᬢᬦᬬᬫᬾᬯ.

᭗. ᬤᬸᬓ᭄ᬓᬣᬵᬲᬸᬢ᭄ᬢᬯᬡ᭄ᬡᬦᬵ

᭑᭕᭗. ᬲᬢ᭄ᬢᬫᬾ ᬧᬸᬕ᭄ᬕᬮᬂ ᬉᬧᬦᬶᬥᬵᬬᬵᬢᬶ ᬢᬂ ᬢᬂ ᬧᬸᬕ᭄ᬕᬮᬂ ᬉᬧᬦᬶᬓ᭄ᬔᬶᬧᬶᬢ᭄ᬯᬵ, ᬲᬓ᭄ᬔᬶᬂ ᬓᬢ᭄ᬯᬵᬢᬶ ᬅᬢ᭄ᬣᭀ. ᬓᬘ᭄ᬙᬫᬵᬦᬵᬬᬵᬢᬶ ᬓᬣᬶᬬᬫᬵᬦᬵᬬ. ᬲᬾᬲᬫᬾᬢ᭄ᬣ ᬅᬝ᭄ᬞᬫᬜ᭄ᬘ ᬉᬢ᭄ᬢᬵᬦᬢ᭄ᬣᬫᬾᬯᬵᬢᬶ.

᭙. ᬉᬤᬵᬬᬷᬲᬸᬢ᭄ᬢᬯᬡ᭄ᬡᬦᬵ

᭑᭕᭙. ᬦᬯᬫᬾ ᬅᬦᬸᬧᬸᬩ᭄ᬩᬶᬂ ᬓᬣᬂ ᬓᬣᬾᬲ᭄ᬲᬵᬫᬷᬢᬶ ᬤᬵᬦᬵᬦᬦ᭄ᬢᬭᬂ ᬲᬷᬮᬂ, ᬲᬷᬮᬵᬦᬦ᭄ᬢᬭᬂ ᬲᬕ᭄ᬕᬦ᭄ᬢᬶ ᬏᬯᬂ ᬤᬾᬲᬦᬵᬦᬸᬧᬸᬩ᭄ᬩᬶᬂ ᬓᬣᬂ ᬯᬵ, ᬬᬂ ᬬᬂ ᬲᬸᬢ᭄ᬢᬧᬤᬂ ᬯᬵ ᬕᬵᬣᬵᬧᬤᬂ ᬯᬵ ᬦᬶᬓ᭄ᬔᬶᬢ᭄ᬢᬂ ᬳᭀᬢᬶ, ᬢᬲ᭄ᬲ ᬢᬲ᭄ᬲ ᬅᬦᬸᬭᬹᬧᬓᬣᬂ ᬓᬣᬾᬲ᭄ᬲᬵᬫᬷᬢᬶ ᬘᬶᬢ᭄ᬢᬂ ᬉᬧᬝ᭄ᬞᬧᬾᬢ᭄ᬯᬵ ᬧᬭᬾᬲᬂ ᬥᬫ᭄ᬫᭀ ᬤᬾᬲᬾᬢᬩ᭄ᬩᭀ. ᬧᬭᬶᬬᬵᬬᬤᬲ᭄ᬲᬵᬯᬷᬢᬶ ᬢᬲ᭄ᬲ ᬢᬲ᭄ᬲ ᬅᬢ᭄ᬣᬲ᭄ᬲ ᬢᬂ ᬢᬂ ᬓᬵᬭᬡᬂ ᬤᬲ᭄ᬲᬾᬦ᭄ᬢᭀ. ᬓᬵᬭᬡᬜ᭄ᬳᬶ ᬇᬥ ᬧᬭᬶᬬᬵᬬᭀᬢᬶ ᬯᬸᬢ᭄ᬢᬂ. ᬅᬦᬸᬤ᭄ᬤᬬᬢᬂ ᬧᬝᬶᬘ᭄ᬘᬵᬢᬶ ‘‘ᬫᬳᬵᬲᬫ᭄ᬩᬵᬥᬧ᭄ᬧᬢ᭄ᬢᬾ ᬲᬢ᭄ᬢᬾ ᬲᬫ᭄ᬩᬵᬥᬢᭀ ᬫᭀᬘᬾᬲ᭄ᬲᬵᬫᬷ’’ᬢᬶ ᬅᬦᬸᬓᬫ᭄ᬧᬂ ᬆᬕᬫ᭄ᬫ. ᬦ ᬆᬫᬶᬲᬦ᭄ᬢᬭᭀᬢᬶ ᬦ ᬆᬫᬶᬲᬳᬾᬢᬸᬓᭀ, ᬅᬢ᭄ᬢᬦᭀ ᬘᬢᬸᬧᬘ᭄ᬘᬬᬮᬵᬪᬂ ᬅᬦᬵᬲᬷᬲᬦ᭄ᬢᭀᬢᬶ ᬅᬢ᭄ᬣᭀ. ᬅᬢ᭄ᬢᬵᬦᬜ᭄ᬘ ᬧᬭᬜ᭄ᬘ ᬅᬦᬸᬧᬳᬘ᭄ᬘᬵᬢᬶ ᬅᬢ᭄ᬢᬸᬓ᭄ᬓᬂᬲᬦᬧᬭᬯᬫ᭄ᬪᬦᬵᬤᬶᬯᬲᬾᬦ ᬅᬢ᭄ᬢᬵᬦᬜ᭄ᬘ ᬧᬭᬜ᭄ᬘ ᬕᬸᬡᬸᬧᬖᬵᬢᬾᬦ ᬅᬦᬸᬧᬳᬦ᭄ᬢ᭄ᬯᬵ.

᭑᭐. ᬤᬸᬧ᭄ᬧᬝᬶᬯᬶᬦᭀᬤᬬᬲᬸᬢ᭄ᬢᬯᬡ᭄ᬡᬦᬵ

᭑᭖᭐. ᬤᬲᬫᬾ ᬤᬸᬧ᭄ᬧᬝᬶᬯᬶᬦᭀᬤᬬᬵᬢᬶ ᬬᬵᬦᬶ ᬳᬲ᭄ᬲᬵᬤᬷᬦᬶ ᬓᬶᬘ᭄ᬘᬵᬦᬶ ᬦᬶᬧ᭄ᬨᬵᬤᬾᬢᬸᬂ ᬞᬵᬦᬵᬦᬶ ᬉᬧ᭄ᬧᬦ᭄ᬦᬵᬦᬶ ᬳᭀᬦ᭄ᬢᬶ, ᬢᬾᬲᬸ ᬫᬢ᭄ᬣᬓᬂ ᬅᬲᬫ᭄ᬧᬢ᭄ᬢᬾᬲᬸ ᬅᬦ᭄ᬢᬭᬵᬬᬾᬯ ᬤᬸᬦ᭄ᬦᬷᬳᬵᬭᬵ ᬤᬸᬯᬶᬓ᭄ᬔᬫ᭄ᬪᬬᬵ ᬳᭀᬦ᭄ᬢᬶ. ᬧᬝᬶᬪᬵᬦᬦ᭄ᬢᬶ ᬓᬣᬾᬢᬸᬓᬵᬫᬢᬵ ᬯᬸᬘ᭄ᬘᬢᬶ. ᬇᬫᬵᬦᬶ ᬧᬜ᭄ᬘ ᬤᬸᬧ᭄ᬧᬝᬶᬯᬶᬦᭀᬤᬬᬵᬦᬶ, ᬦ ᬲᬸᬧ᭄ᬧᬝᬶᬯᬶᬦᭀᬤᬬᬵᬦᬶ. ᬉᬧᬵᬬᬾᬦ ᬧᬦ ᬓᬵᬭᬡᬾᬦ ᬅᬦᬸᬭᬹᬧᬵᬳᬶ ᬧᬘ᭄ᬘᬯᬾᬓ᭄ᬔᬡᬅᬦᬸᬲᬵᬲᬦᬵᬤᬷᬳᬶ ᬲᬓ᭄ᬓᬵ ᬧᬝᬶᬯᬶᬦᭀᬤᬾᬢᬸᬦ᭄ᬢᬶ.

ᬲᬤ᭄ᬥᬫ᭄ᬫᬯᬕ᭄ᬕᭀ ᬧᬞᬫᭀ.

(᭑᭗) ᭒. ᬆᬖᬵᬢᬯᬕ᭄ᬕᭀ

᭑. ᬧᬞᬫᬆᬖᬵᬢᬧᬝᬶᬯᬶᬦᬬᬲᬸᬢ᭄ᬢᬯᬡ᭄ᬡᬦᬵ

᭑᭖᭑. ᬤᬸᬢᬶᬬᬲ᭄ᬲ ᬧᬞᬫᬾ ᬆᬖᬵᬢᬂ ᬧᬝᬶᬯᬶᬦᬾᬦ᭄ᬢᬶ ᬯᬹᬧᬲᬫᬾᬦ᭄ᬢᬷᬢᬶ ᬆᬖᬵᬢᬧᬝᬶᬯᬶᬦᬬᬵ. ᬬᬢ᭄ᬣ ᬪᬶᬓ᭄ᬔᬸᬦᭀ ᬉᬧ᭄ᬧᬦ᭄ᬦᭀ ᬆᬖᬵᬢᭀ ᬲᬩ᭄ᬩᬲᭀ ᬧᬝᬶᬯᬶᬦᬾᬢᬩ᭄ᬩᭀᬢᬶ ᬬᬢ᭄ᬣ ᬆᬭᬫ᭄ᬫᬡᬾ ᬪᬶᬓ᭄ᬔᬸᬦᭀ ᬆᬖᬵᬢᭀ ᬉᬧ᭄ᬧᬦ᭄ᬦᭀ ᬳᭀᬢᬶ, ᬢᬢ᭄ᬣ ᬲᭀ ᬲᬩ᭄ᬩᭀ ᬇᬫᬾᬳᬶ ᬧᬜ᭄ᬘᬳᬶ ᬧᬝᬶᬯᬶᬦᭀᬤᬾᬢᬩ᭄ᬩᭀᬢᬶ ᬅᬢ᭄ᬣᭀ. ᬫᬾᬢ᭄ᬢᬵ ᬢᬲ᭄ᬫᬶᬂ ᬧᬸᬕ᭄ᬕᬮᬾ ᬪᬵᬯᬾᬢᬩ᭄ᬩᬵᬢᬶ ᬢᬶᬓᬘᬢᬸᬓ᭄ᬓᬚ᭄ᬛᬵᬦᬯᬲᬾᬦ ᬫᬾᬢ᭄ᬢᬵ ᬪᬵᬯᬾᬢᬩ᭄ᬩᬵ. ᬓᬭᬸᬡᬵᬬᬧᬶ ᬏᬲᬾᬯ ᬦᬬᭀ. ᬉᬧᬾᬓ᭄ᬔᬵ ᬧᬦ ᬘᬢᬸᬓ᭄ᬓᬧᬜ᭄ᬘᬓᬚ᭄ᬛᬵᬦᬯᬲᬾᬦ ᬪᬵᬯᬾᬢᬩ᭄ᬩᬵ. ᬬᬲ᭄ᬫᬵ ᬧᬦ ᬬᬂ ᬧᬸᬕ᭄ᬕᬮᬂ ᬧᬲ᭄ᬲᬢᭀ ᬘᬶᬢ᭄ᬢᬂ ᬦ ᬦᬶᬩ᭄ᬩᬵᬢᬶ, ᬢᬲ᭄ᬫᬶᬂ ᬫᬸᬤᬶᬢᬵ ᬦ ᬲᬡ᭄ᬞᬳᬢᬶ, ᬢᬲ᭄ᬫᬵ ᬲᬵ ᬦ ᬯᬸᬢ᭄ᬢᬵ. ᬅᬲᬢᬶᬅᬫᬦᬲᬶᬓᬵᬭᭀᬢᬶ ᬬᬣᬵ ᬲᭀ ᬧᬸᬕ᭄ᬕᬮᭀ ᬦ ᬉᬧᬝ᭄ᬞᬵᬢᬶ, ᬓᬸᬝ᭄ᬝᬵᬤᬷᬳᬶ ᬅᬦ᭄ᬢᬭᬶᬢᭀ ᬯᬶᬬ ᬳᭀᬢᬶ, ᬏᬯᬂ ᬢᬲ᭄ᬫᬶᬂ ᬅᬲᬢᬶᬅᬫᬦᬲᬶᬓᬵᬭᭀ ᬆᬧᬚ᭄ᬚᬶᬢᬩ᭄ᬩᭀ. ᬲᬾᬲᬂ ᬳᬾᬝ᭄ᬞᬵ ᬯᬸᬢ᭄ᬢᬦᬬᬢ᭄ᬢᬵ ᬉᬢ᭄ᬢᬵᬦᬫᬾᬯ.

᭒. ᬤᬸᬢᬶᬬᬆᬖᬵᬢᬧᬝᬶᬯᬶᬦᬬᬲᬸᬢ᭄ᬢᬯᬡ᭄ᬡᬦᬵ

᭑᭖᭒. ᬤᬸᬢᬶᬬᬾ ᬆᬖᬵᬢᭀ ᬏᬢᬾᬲᬸ ᬧᬝᬶᬯᬶᬦᬾᬢᬩ᭄ᬩᭀᬢᬶ ᬆᬖᬵᬢᬧᬝᬶᬯᬶᬦᬬᬵ. ᬆᬖᬵᬢᭀ ᬏᬢᬾᬳᬶ ᬧᬝᬶᬯᬶᬦᬾᬢᬩ᭄ᬩᭀᬢᬶᬧᬶ ᬆᬖᬵᬢᬧᬝᬶᬯᬶᬦᬬᬵ. ᬧᬝᬶᬯᬶᬦᬬᭀᬢᬶ ᬳᬶ ᬧᬝᬶᬯᬶᬦᬬᬯᬢ᭄ᬣᬹᬦᬫ᭄ᬧᬶ ᬧᬝᬶᬯᬶᬦᬬᬓᬵᬭᬡᬵᬦᬫ᭄ᬧᬶ ᬏᬢᬂ ᬅᬥᬶᬯᬘᬦᬂ, ᬢᬤᬸᬪᬬᬫ᭄ᬧᬶ ᬇᬥ ᬯᬝ᭄ᬝᬢᬶ. ᬧᬜ᭄ᬘ ᬳᬶ ᬧᬸᬕ᭄ᬕᬮᬵ ᬧᬝᬶᬯᬶᬦᬬᬯᬢ᭄ᬣᬹ ᬳᭀᬦ᭄ᬢᬶ ᬧᬜ᭄ᬘᬳᬶ ᬉᬧᬫᬵᬳᬶ ᬧᬜ᭄ᬘ ᬧᬝᬶᬧᬢ᭄ᬢᬶᬬᭀ ᬧᬝᬶᬯᬶᬦᬬᬓᬵᬭᬡᬵᬦᬶ. ᬮᬪᬢᬶ ᬘ ᬓᬵᬮᬾᬦ ᬓᬵᬮᬂ ᬘᬾᬢᬲᭀ ᬯᬶᬯᬭᬂ ᬘᬾᬢᬲᭀ ᬧᬲᬵᬤᬦ᭄ᬢᬶ ᬓᬵᬮᬾ ᬓᬵᬮᬾ ᬲᬫᬣᬯᬶᬧᬲ᭄ᬲᬦᬵᬘᬶᬢ᭄ᬢᬲ᭄ᬲ ᬉᬧ᭄ᬧᬦ᭄ᬦᭀᬓᬵᬲᬲᬗ᭄ᬔᬵᬢᬂ ᬯᬶᬯᬭᬜ᭄ᬘᬾᬯ ᬲᬤ᭄ᬥᬵᬲᬫ᭄ᬧᬦ᭄ᬦᬪᬵᬯᬲᬗ᭄ᬔᬵᬢᬂ ᬧᬲᬵᬤᬜ᭄ᬘ ᬮᬪᬢᬶ.

ᬭᬣᬶᬬᬵᬬᬵᬢᬶ ᬅᬦ᭄ᬢᬭᬯᬷᬣᬶᬬᬂ. ᬦᬦ᭄ᬢᬓᬦ᭄ᬢᬶ ᬧᬶᬮᭀᬢᬶᬓᬔᬡ᭄ᬟᬂ. ᬦᬶᬕ᭄ᬕᬳᬾᬢ᭄ᬯᬵᬢᬶ ᬅᬓ᭄ᬓᬫᬶᬢ᭄ᬯᬵ. ᬬᭀ ᬢᬢ᭄ᬣ ᬲᬵᬭᭀᬢᬶ ᬬᬂ ᬢᬢ᭄ᬣ ᬣᬶᬭᬝ᭄ᬞᬵᬦᬂ. ᬢᬂ ᬧᬭᬶᬧᬵᬢᬾᬢ᭄ᬯᬵᬢᬶ ᬢᬂ ᬮᬸᬜ᭄ᬘᬶᬢ᭄ᬯᬵ. ᬏᬯᬫᬾᬯ ᬔᭀᬢᬶ ᬏᬢ᭄ᬣ ᬧᬂᬲᬸᬓᬹᬮᬶᬓᭀ ᬯᬶᬬ ᬫᬾᬢ᭄ᬢᬵᬯᬶᬳᬵᬭᬷ ᬤᬝ᭄ᬞᬩ᭄ᬩᭀ, ᬭᬣᬶᬬᬵᬬ ᬦᬦ᭄ᬢᬓᬂ ᬯᬶᬬ ᬯᬾᬭᬶᬧᬸᬕ᭄ᬕᬮᭀ, ᬤᬸᬩ᭄ᬩᬮᬝ᭄ᬞᬵᬦᬂ ᬯᬶᬬ ᬅᬧᬭᬶᬲᬸᬤ᭄ᬥᬓᬵᬬᬲᬫᬵᬘᬵᬭᬢᬵ, ᬣᬶᬭᬝ᭄ᬞᬵᬦᬂ ᬯᬶᬬ ᬧᬭᬶᬲᬸᬤ᭄ᬥᬯᬘᬷᬲᬫᬵᬘᬵᬭᬢᬵ, ᬤᬸᬩ᭄ᬩᬮᬝ᭄ᬞᬵᬦᬂ ᬙᬟ᭄ᬟᬾᬢ᭄ᬯᬵ ᬣᬶᬭᬝ᭄ᬞᬵᬦᬂ ᬆᬤᬵᬬ ᬕᬦ᭄ᬢ᭄ᬯᬵ ᬲᬶᬩ᭄ᬩᬶᬢ᭄ᬯᬵ ᬭᬚᬶᬢ᭄ᬯᬵ ᬧᬵᬭᬸᬧᬶᬢ᭄ᬯᬵ ᬯᬶᬘᬭᬡᬓᬵᬮᭀ ᬯᬶᬬ ᬅᬧᬭᬶᬲᬸᬤ᭄ᬥᬓᬵᬬᬲᬫᬵᬘᬵᬭᬢᬂ ᬅᬫᬦᬲᬶᬓᬢ᭄ᬯᬵ ᬧᬭᬶᬲᬸᬤ᭄ᬥᬯᬘᬷᬲᬫᬵᬘᬵᬭᬢᬂ ᬫᬦᬲᬶᬓᬢ᭄ᬯᬵ ᬯᬾᬭᬶᬫ᭄ᬳᬶ ᬘᬶᬢ᭄ᬢᬸᬧ᭄ᬧᬵᬤᬂ ᬦᬶᬩ᭄ᬩᬵᬧᬾᬢ᭄ᬯᬵ ᬨᬵᬲᬸᬯᬶᬳᬵᬭᬓᬵᬮᭀ ᬤᬝ᭄ᬞᬩ᭄ᬩᭀ.

ᬲᬾᬯᬵᬮᬧᬡᬓᬧᬭᬶᬬᭀᬦᬤ᭄ᬥᬵᬢᬶ ᬲᬾᬯᬵᬮᬾᬦ ᬘ ᬉᬤᬓᬧᬧ᭄ᬧᬝᬓᬾᬦ ᬘ ᬧᬝᬶᬘ᭄ᬙᬦ᭄ᬦᬵ. ᬖᬫ᭄ᬫᬧᬭᬾᬢᭀᬢᬶ ᬖᬫ᭄ᬫᬾᬦ ᬅᬦᬸᬕᬢᭀ. ᬓᬶᬮᬦ᭄ᬢᭀᬢᬶ ᬫᬕ᭄ᬕᬓᬶᬮᬦ᭄ᬢᭀ. ᬢᬲᬶᬢᭀᬢᬶ ᬢᬡ᭄ᬳᬵᬪᬶᬪᬹᬢᭀ. ᬧᬶᬧᬵᬲᬶᬢᭀᬢᬶ ᬧᬵᬦᬷᬬᬂ ᬧᬵᬢᬸᬓᬵᬫᭀ. ᬅᬧᬯᬶᬬᬹᬳᬶᬢ᭄ᬯᬵᬢᬶ ᬅᬧᬦᬾᬢ᭄ᬯᬵ. ᬧᬶᬯᬶᬢ᭄ᬯᬵᬢᬶ ᬧᬲᬦ᭄ᬦᬉᬤᬓᬂ ᬧᬶᬯᬶᬢ᭄ᬯᬵ. ᬏᬯᬫᬾᬯ ᬔᭀᬢᬶ ᬏᬢ᭄ᬣ ᬖᬫ᭄ᬫᬵᬪᬶᬢᬢ᭄ᬢᭀ ᬧᬸᬭᬶᬲᭀ ᬯᬶᬬ ᬫᬾᬢ᭄ᬢᬵᬯᬶᬳᬵᬭᬷ ᬤᬝ᭄ᬞᬩ᭄ᬩᭀ, ᬲᬾᬯᬵᬮᬧᬡᬓᬂ ᬯᬶᬬ ᬅᬧᬭᬶᬲᬸᬤ᭄ᬥᬯᬘᬷᬲᬫᬵᬘᬵᬭᬢᬵ, ᬧᬲᬦ᭄ᬦᬉᬤᬓᬂ ᬯᬶᬬ ᬧᬭᬶᬲᬸᬤ᭄ᬥᬓᬵᬬᬲᬫᬵᬘᬵᬭᬢᬵ, ᬲᬾᬯᬵᬮᬧᬡᬓᬂ ᬅᬧᬩ᭄ᬬᬹᬳᬶᬢ᭄ᬯᬵ ᬧᬲᬦ᭄ᬦᭀᬤᬓᬂ ᬧᬶᬯᬶᬢ᭄ᬯᬵ ᬕᬫᬦᬂ ᬯᬶᬬ ᬅᬧᬭᬶᬲᬸᬤ᭄ᬥᬯᬘᬷᬲᬫᬵᬘᬵᬭᬢᬂ ᬅᬫᬦᬲᬶᬓᬢ᭄ᬯᬵ ᬧᬭᬶᬲᬸᬤ᭄ᬥᬓᬵᬬᬲᬫᬵᬘᬵᬭᬢᬂ ᬫᬦᬲᬶᬓᬢ᭄ᬯᬵ ᬯᬾᬭᬶᬫ᭄ᬳᬶ ᬘᬶᬢ᭄ᬢᬸᬧ᭄ᬧᬵᬤᬂ ᬦᬶᬩ᭄ᬩᬵᬧᬾᬢ᭄ᬯᬵ ᬨᬵᬲᬸᬯᬶᬳᬵᬭᬓᬵᬮᭀ ᬤᬝ᭄ᬞᬩ᭄ᬩᭀ.

ᬔᭀᬪᬾᬲ᭄ᬲᬵᬫᬷᬢᬶ ᬘᬵᬮᬾᬲ᭄ᬲᬵᬫᬶ. ᬮᭀᬮ᬴ᬾᬲ᭄ᬲᬵᬫᬷᬢᬶ ᬆᬓᬸᬮᬂ ᬓᬭᬶᬲ᭄ᬲᬵᬫᬶ. ᬅᬧᬾᬬ᭄ᬬᬫ᭄ᬧᬶ ᬢᬂ ᬓᬭᬶᬲ᭄ᬲᬵᬫᬷᬢᬶ ᬧᬶᬯᬶᬢᬸᬂ ᬅᬲᬓ᭄ᬓᬸᬡᬾᬬ᭄ᬬᬂ ᬓᬭᬶᬲ᭄ᬲᬵᬫᬶ. ᬘᬢᬸᬓ᭄ᬓᬸᬡ᭄ᬟᬶᬓᭀᬢᬶ ᬚᬵᬡᬹᬳᬶ ᬘ ᬳᬢ᭄ᬣᬾᬳᬶ ᬘ ᬪᬹᬫᬶᬬᬂ ᬧᬢᬶᬝ᭄ᬞᬵᬦᬾᬦ ᬘᬢᬸᬓ᭄ᬓᬸᬡ᭄ᬟᬶᬓᭀ ᬳᬸᬢ᭄ᬯᬵ. ᬕᭀᬧᬷᬢᬓᬂ ᬧᬶᬯᬶᬢ᭄ᬯᬵᬢᬶ ᬕᬵᬯᬶᬬᭀ ᬯᬶᬬ ᬫᬸᬔᬾᬦ ᬆᬓᬟ᭄ᬠᬾᬦ᭄ᬢᭀ ᬧᬶᬯᬶᬢ᭄ᬯᬵ. ᬏᬯᬫᬾᬯ ᬔᭀᬢᬶ ᬏᬢ᭄ᬣ ᬖᬫ᭄ᬫᬵᬪᬶᬢᬢ᭄ᬢᭀ ᬧᬸᬭᬶᬲᭀ ᬯᬶᬬ ᬫᬾᬢ᭄ᬢᬵᬯᬶᬳᬵᬭᬷ ᬤᬝ᭄ᬞᬩ᭄ᬩᭀ, ᬕᭀᬧᬤᬂ ᬯᬶᬬ ᬯᬾᬭᬶᬧᬸᬕ᭄ᬕᬮᭀ, ᬕᭀᬧᬤᬾ ᬧᬭᬶᬢ᭄ᬢᬉᬤᬓᬂ ᬯᬶᬬ ᬢᬲ᭄ᬲᬩ᭄ᬪᬦ᭄ᬢᬭᬾ ᬧᬭᬶᬢ᭄ᬢᬕᬸᬡᭀ, ᬘᬢᬸᬓ᭄ᬓᬸᬡ᭄ᬟᬶᬓᬲ᭄ᬲ ᬕᭀᬧᬷᬢᬓᬂ ᬧᬶᬯᬶᬢ᭄ᬯᬵ ᬧᬓ᭄ᬓᬫᬦᬂ ᬯᬶᬬ ᬢᬲ᭄ᬲ ᬅᬧᬭᬶᬲᬸᬤ᭄ᬥᬓᬵᬬᬯᬘᬷᬲᬫᬵᬘᬵᬭᬢᬂ ᬅᬫᬦᬲᬶᬓᬢ᭄ᬯᬵ ᬬᬂ ᬲᭀ ᬓᬵᬮᬾᬦ ᬓᬵᬮᬂ ᬥᬫ᭄ᬫᬲ᭄ᬲᬯᬦᬂ ᬦᬶᬲ᭄ᬲᬵᬬ ᬘᬾᬢᬲᭀ ᬯᬶᬯᬭᬧ᭄ᬧᬲᬵᬤᬲᬗ᭄ᬔᬵᬢᬂ ᬧᬷᬢᬶᬧᬵᬫᭀᬚ᭄ᬚᬂ ᬮᬪᬢᬶ, ᬢᬂ ᬫᬦᬲᬶᬓᬢ᭄ᬯᬵ ᬘᬶᬢ᭄ᬢᬸᬧ᭄ᬧᬵᬤᬦᬶᬩ᭄ᬩᬵᬧᬦᬂ ᬯᬾᬤᬶᬢᬩ᭄ᬩᬂ.

ᬆᬩᬵᬥᬶᬓᭀᬢᬶ ᬇᬭᬶᬬᬵᬧᬣᬪᬜ᭄ᬚᬦᬓᬾᬦ ᬯᬶᬲᬪᬵᬕᬵᬩᬵᬥᬾᬦ ᬆᬩᬵᬥᬶᬓᭀ. ᬧᬸᬭᬢᭀᬧᬶᬲ᭄ᬲᬵᬢᬶ ᬧᬸᬭᬢᭀᬧᬶ ᬪᬯᬾᬬ᭄ᬬ. ᬅᬦᬬᬩ᭄ᬬᬲᬦᬦ᭄ᬢᬶ ᬅᬯᬟ᭄ᬠᬶᬯᬶᬦᬵᬲᬂ. ᬏᬯᬫᬾᬯ ᬔᭀᬢᬶ ᬏᬢ᭄ᬣ ᬲᭀ ᬅᬦᬵᬣᬕᬶᬮᬵᬦᭀ ᬯᬶᬬ ᬲᬩ᭄ᬩᬓᬡ᭄ᬳᬥᬫ᭄ᬫᬲᬫᬦ᭄ᬦᬵᬕᬢᭀ ᬧᬸᬕ᭄ᬕᬮᭀ, ᬅᬤ᭄ᬥᬵᬦᬫᬕ᭄ᬕᭀ ᬯᬶᬬ ᬅᬦᬫᬢᬕ᭄ᬕᬲᬂᬲᬵᬭᭀ, ᬧᬸᬭᬢᭀ ᬘ ᬧᬘ᭄ᬙᬢᭀ ᬘ ᬕᬵᬫᬵᬦᬂ ᬤᬹᬭᬪᬵᬯᭀ ᬯᬶᬬ ᬦᬶᬩ᭄ᬩᬵᬦᬲ᭄ᬲ ᬤᬹᬭᬪᬵᬯᭀ, ᬲᬧ᭄ᬧᬵᬬᬪᭀᬚᬦᬵᬦᬂ ᬅᬮᬵᬪᭀ ᬯᬶᬬ ᬲᬵᬫᬜ᭄ᬜᬨᬮᬪᭀᬚᬦᬵᬦᬂ ᬅᬮᬵᬪᭀ, ᬲᬧ᭄ᬧᬵᬬᬪᬾᬲᬚ᭄ᬚᬵᬦᬂ ᬅᬮᬵᬪᭀ ᬯᬶᬬ ᬲᬫᬣᬯᬶᬧᬲ᭄ᬲᬦᬵᬦᬂ ᬅᬪᬵᬯᭀ, ᬧᬢᬶᬭᬹᬧᬉᬧᬝ᭄ᬞᬵᬓᬵᬦᬂ ᬅᬮᬵᬪᭀ ᬯᬶᬬ ᬑᬯᬵᬤᬵᬦᬸᬲᬵᬲᬦᬷᬳᬶ ᬓᬶᬮᬾᬲᬢᬶᬓᬶᬘ᭄ᬙᬓᬵᬦᬂ ᬅᬪᬵᬯᭀ, ᬕᬵᬫᬦ᭄ᬢᬦᬵᬬᬓᬲ᭄ᬲ ᬅᬮᬵᬪᭀ ᬯᬶᬬ ᬦᬶᬩ᭄ᬩᬵᬦᬲᬫ᭄ᬧᬵᬧᬓᬲ᭄ᬲ ᬢᬣᬵᬕᬢᬲ᭄ᬲ ᬯᬵ ᬢᬣᬵᬕᬢᬲᬵᬯᬓᬲ᭄ᬲ ᬯᬵ ᬅᬮᬤ᭄ᬥᬪᬵᬯᭀ, ᬅᬜ᭄ᬜᬢᬭᬲ᭄ᬲ ᬧᬸᬭᬶᬲᬲ᭄ᬲ ᬤᬶᬲ᭄ᬯᬵ ᬓᬵᬭᬸᬜ᭄ᬜᬸᬧᬝ᭄ᬞᬵᬦᬂ ᬯᬶᬬ ᬢᬲ᭄ᬫᬶᬂ ᬧᬸᬕ᭄ᬕᬮᬾ ᬫᬾᬢ᭄ᬢᬵᬯᬶᬳᬵᬭᬶᬓᬲ᭄ᬲ ᬓᬵᬭᬸᬜ᭄ᬜᬂ ᬉᬧ᭄ᬧᬵᬤᬾᬢ᭄ᬯᬵ ᬘᬶᬢ᭄ᬢᬦᬶᬩ᭄ᬩᬵᬧᬦᬂ ᬯᬾᬤᬶᬢᬩ᭄ᬩᬂ.

ᬅᬘ᭄ᬙᭀᬤᬓᬵᬢᬶ ᬧᬲᬦ᭄ᬦᭀᬤᬓᬵ. ᬲᬵᬢᭀᬤᬓᬵᬢᬶ ᬫᬥᬸᬭᭀᬤᬓᬵ. ᬲᬷᬢᭀᬤᬓᬵᬢᬶ ᬢᬦᬸᬲᬷᬢᬲᬮᬶᬮᬵ. ᬲᬾᬢᬓᬵᬢᬶ ᬊᬫᬶᬪᬶᬚ᭄ᬚᬦᬝ᭄ᬞᬵᬦᬾᬲᬸ ᬲᬾᬢᬯᬡ᭄ᬡᬵ. ᬲᬸᬧᬢᬶᬢ᭄ᬣᬵᬢᬶ ᬲᬫᬢᬶᬢ᭄ᬣᬵ. ᬏᬯᬫᬾᬯ ᬔᭀᬢᬶ ᬏᬢ᭄ᬣ ᬖᬫ᭄ᬫᬵᬪᬶᬢᬢ᭄ᬢᭀ ᬧᬸᬭᬶᬲᭀ ᬯᬶᬬ ᬫᬾᬢ᭄ᬢᬵᬯᬶᬳᬵᬭᬷ ᬤᬝ᭄ᬞᬩ᭄ᬩᭀ, ᬲᬵ ᬧᭀᬓ᭄ᬔᬭᬡᬷ ᬯᬶᬬ ᬧᬭᬶᬲᬸᬤ᭄ᬥᬲᬩ᭄ᬩᬤ᭄ᬯᬵᬭᭀ ᬧᬸᬭᬶᬲᭀ, ᬦ᭄ᬳᬢ᭄ᬯᬵ ᬧᬶᬯᬶᬢ᭄ᬯᬵ ᬧᬘ᭄ᬘᬸᬢ᭄ᬢᬭᬶᬢ᭄ᬯᬵ ᬭᬸᬓ᭄ᬔᬘ᭄ᬙᬵᬬᬵᬬ ᬦᬶᬧᬚ᭄ᬚᬶᬢ᭄ᬯᬵ ᬬᬣᬵᬓᬵᬫᬂ ᬕᬫᬦᬂ ᬯᬶᬬ ᬢᬾᬲᬸ ᬤ᭄ᬯᬵᬭᬾᬲᬸ ᬬᬂ ᬇᬘ᭄ᬙᬢᬶ, ᬢᬂ ᬆᬭᬫ᭄ᬫᬡᬂ ᬓᬢ᭄ᬯᬵ ᬘᬶᬢ᭄ᬢᬦᬶᬩ᭄ᬩᬵᬧᬦᬂ ᬯᬾᬤᬶᬢᬩ᭄ᬩᬂ. ᬢᬢᬶᬬᬘᬢᬸᬢ᭄ᬣᬵᬦᬶ ᬳᬾᬝ᭄ᬞᬵ ᬯᬸᬢ᭄ᬢᬦᬬᬵᬦᬾᬯ.

᭕. ᬧᬜ᭄ᬳᬧᬸᬘ᭄ᬙᬵᬲᬸᬢ᭄ᬢᬯᬡ᭄ᬡᬦᬵ

᭑᭖᭕. ᬧᬜ᭄ᬘᬫᬾ ᬧᬭᬶᬪᬯᬦ᭄ᬢᬶ ᬧᬭᬶᬪᬯᬦ᭄ᬢᭀ, ᬏᬯᬂ ᬧᬭᬶᬪᬯᬶᬲ᭄ᬲᬵᬫᬷᬢᬶ ᬧᬭᬶᬪᬯᬦᬢ᭄ᬣᬵᬬ ᬧᬸᬘ᭄ᬙᬢᬷᬢᬶ ᬅᬢ᭄ᬣᭀ. ᬅᬜ᭄ᬜᬵᬢᬸᬓᬵᬫᭀᬢᬶ ᬚᬵᬦᬶᬢᬸᬓᬵᬫᭀ ᬳᬸᬢ᭄ᬯᬵ.

᭖. ᬦᬶᬭᭀᬥᬲᬸᬢ᭄ᬢᬯᬡ᭄ᬡᬦᬵ

᭑᭖᭖. ᬙᬝ᭄ᬞᬾ ᬅᬢ᭄ᬣᬾᬢᬂ ᬞᬵᬦᬦ᭄ᬢᬶ ᬅᬢ᭄ᬣᬶ ᬏᬢᬂ ᬓᬵᬭᬡᬂ. ᬦᭀ ᬘᬾ ᬤᬶᬝ᭄ᬞᬾᬯ ᬥᬫ᭄ᬫᬾ ᬅᬜ᭄ᬜᬂ ᬆᬭᬵᬥᬾᬬ᭄ᬬᬵᬢᬶ ᬦᭀ ᬘᬾ ᬇᬫᬲ᭄ᬫᬶᬂᬬᬾᬯ ᬅᬢ᭄ᬢᬪᬵᬯᬾ ᬅᬭᬳᬢ᭄ᬢᬂ ᬧᬵᬧᬸᬡᬾᬬ᭄ᬬ. ᬓᬩᬮ᬴ᬷᬓᬵᬭᬵᬳᬵᬭᬪᬓ᭄ᬔᬵᬦᬂ ᬤᬾᬯᬵᬦᬦ᭄ᬢᬶ ᬓᬵᬫᬵᬯᬘᬭᬤᬾᬯᬵᬦᬂ. ᬅᬜ᭄ᬜᬢᬭᬂ ᬫᬦᭀᬫᬬᬂ ᬓᬵᬬᬦ᭄ᬢᬶ ᬛᬵᬦᬫᬦᬾᬦ ᬦᬶᬩ᭄ᬩᬢ᭄ᬢᬂ ᬅᬜ᭄ᬜᬢᬭᬂ ᬲᬸᬤ᭄ᬥᬵᬯᬵᬲᬩ᭄ᬭᬳ᭄ᬫᬓᬵᬬᬂ. ᬉᬤᬵᬬᬷᬢᬶ ᬮᬵᬮ᬴ᬸᬤᬵᬬᬷ. ᬲᭀ ᬳᬶ ‘‘ᬫᬦᭀᬫᬬ’’ᬦ᭄ᬢᬶ ᬲᬸᬢ᭄ᬯᬵ ‘‘ᬆᬭᬸᬧ᭄ᬧᬾ ᬦ ᬪᬯᬶᬢᬩ᭄ᬩ’’ᬦ᭄ᬢᬶ ᬧᬝᬶᬩᬵᬳᬶ. ᬣᬾᬭᭀ ‘‘ᬲᬵᬭᬶᬧᬸᬢ᭄ᬢᭀ ᬓᬶᬂ ᬚᬵᬦᬵᬢᬶ, ᬬᬲ᭄ᬲ ᬲᬫ᭄ᬫᬸᬔᬵ ᬏᬯᬂ ᬪᬶᬓ᭄ᬔᬹ ᬯᬘᬦᬂ ᬧᬝᬶᬓ᭄ᬓᭀᬲᬦ᭄ᬢᬷ’’ᬢᬶ ᬏᬯᬂ ᬩᬵᬮᬵᬦᬂ ᬮᬤ᭄ᬥᬶᬉᬧ᭄ᬧᬢ᭄ᬢᬶᬧᬝᬶᬩᬵᬳᬦᬢ᭄ᬣᬂ ᬢᬂ ᬯᬘᬦᬂ ᬅᬦᬥᬶᬯᬵᬲᬾᬢ᭄ᬯᬵ ᬬᬾᬦ ᬪᬕᬯᬵ ᬢᬾᬦᬸᬧᬲᬗ᭄ᬓᬫᬶ.

ᬅᬢ᭄ᬣᬶ ᬦᬵᬫᬵᬢᬶ ᬅᬫᬭᬶᬲᬦᬢ᭄ᬣᬾ ᬦᬶᬧᬵᬢᭀ. ᬢᬾᬦᬾᬯ ᬘᬾᬢ᭄ᬣ ‘‘ᬅᬚ᭄ᬛᬸᬧᬾᬓ᭄ᬔᬶᬲ᭄ᬲᬣᬵ’’ᬢᬶ ᬅᬦᬵᬕᬢᬯᬘᬦᬂ ᬓᬢᬂ. ᬅᬬᬜ᭄ᬳᬾᬢ᭄ᬣᬢ᭄ᬣᭀ – ᬆᬦᬦ᭄ᬤ, ᬢᬸᬫ᭄ᬳᬾ ᬣᬾᬭᬂ ᬪᬶᬓ᭄ᬔᬸᬂ ᬯᬶᬳᬾᬞᬶᬬᬫᬵᬦᬂ ᬅᬚ᭄ᬛᬸᬧᬾᬓ᭄ᬔᬣ, ᬦ ᬯᭀ ᬏᬢᬂ ᬫᬭᬶᬲᬬᬵᬫᬶ ᬦ ᬲᬳᬵᬫᬶ ᬦᬵᬥᬶᬯᬵᬲᬾᬫᬷᬢᬶ. ᬓᬲ᭄ᬫᬵ ᬧᬦ ᬪᬕᬯᬵ ᬆᬦᬦ᭄ᬤᬣᬾᬭᬂᬬᬾᬯ ᬏᬯᬫᬵᬳᬵᬢᬶ? ᬥᬫ᭄ᬫᬪᬡ᭄ᬟᬵᬕᬵᬭᬶᬓᬢ᭄ᬢᬵ. ᬥᬫ᭄ᬫᬪᬡ᭄ᬟᬵᬕᬵᬭᬶᬓᬲ᭄ᬲ ᬳᬶ ᬏᬯᬂ ᬯᬤᬦ᭄ᬢᭀ ᬧᬝᬶᬩᬵᬳᬶᬢᬸᬂ ᬪᬵᬭᭀ. ᬅᬧᬶᬘᬾᬲ ᬲᬵᬭᬶᬧᬸᬢ᭄ᬢᬢ᭄ᬣᬾᬭᬲ᭄ᬲ ᬧᬶᬬᬲᬳᬵᬬᭀ, ᬢᬾᬦᬵᬧᬶᬲ᭄ᬲ ᬏᬲ ᬪᬵᬭᭀ. ᬢᬢ᭄ᬣ ᬓᬶᬜ᭄ᬘᬵᬧᬶ ᬪᬕᬯᬵ ᬆᬦᬦ᭄ᬤᬢ᭄ᬣᬾᬭᬂ ᬕᬭᬳᬦ᭄ᬢᭀ ᬏᬯᬫᬵᬳ, ᬦ ᬧᬦᬾᬲᬵ ᬢᬲ᭄ᬲᬾᬯ ᬕᬭᬳᬵ, ᬲᬫ᭄ᬫᬸᬔᬷᬪᬹᬢᬵᬦᬂ ᬲᬩ᭄ᬩᬾᬲᬂᬬᬾᬯ ᬕᬭᬳᬵᬢᬶ ᬯᬾᬤᬶᬢᬩ᭄ᬩᬵ. ᬯᬶᬳᬵᬭᬦ᭄ᬢᬶ ᬕᬦ᭄ᬥᬓᬸᬝᬶᬂ.

ᬅᬦᬘ᭄ᬙᬭᬶᬬᬦ᭄ᬢᬶ ᬦ ᬅᬘ᭄ᬙᬭᬶᬬᬂ. ᬬᬣᬵᬢᬶ ᬓᬵᬭᬡᬯᬘᬦᬂ. ᬆᬬᬲ᭄ᬫᬦ᭄ᬢᬂᬬᬾᬯᬾᬢ᭄ᬣ ᬉᬧᬯᬵᬦᬂ ᬧᬝᬶᬪᬵᬲᬾᬬ᭄ᬬᬵᬢᬶ ᬏᬢ᭄ᬣ ᬪᬕᬯᬢᬵ ᬘ ᬏᬯᬂ ᬏᬢᬤᬾᬯ ᬓᬵᬭᬡᬂ ᬆᬭᬩ᭄ᬪ ᬉᬤᬵᬳᬝᬾ ᬆᬬᬲ᭄ᬫᬢᭀᬬᬾᬯ ᬉᬧᬯᬵᬦᬲ᭄ᬲ ᬧᬝᬶᬯᬘᬦᬂ ᬧᬝᬶᬪᬵᬢᬸ ᬉᬧᬝ᭄ᬞᬵᬢᬹᬢᬶ ᬤᬷᬧᬾᬢᬶ. ᬲᬵᬭᬚ᭄ᬚᬂ ᬑᬓ᭄ᬓᬦ᭄ᬢᬦ᭄ᬢᬶ ᬤᭀᬫᬦᬲ᭄ᬲᬂ ᬅᬦᬸᬧᬯᬶᬝ᭄ᬞᬂ. ᬲᬷᬮᬯᬵᬢᬶᬆᬤᬷᬳᬶ ᬔᬷᬡᬵᬲᬯᬲᬷᬮᬵᬤᬷᬦᬶᬬᬾᬯ ᬓᬣᬶᬢᬵᬦᬶ. ᬔᬡ᭄ᬟᬶᬘ᭄ᬘᬾᬦᬵᬢᬶᬆᬤᬷᬦᬶ ᬲᬓ᭄ᬓᬵᬭᬵᬤᬷᬦᬂ ᬓᬵᬭᬡᬧᬸᬘ᭄ᬙᬵᬯᬲᬾᬦ ᬯᬸᬢ᭄ᬢᬵᬦᬶ. ᬓᬶᬂ ᬔᬡ᭄ᬟᬶᬘ᭄ᬘᬵᬤᬷᬳᬶ ᬓᬵᬭᬡᬾᬳᬶ ᬢᬂ ᬢᬂ ᬲᬩ᭄ᬭᬳ᭄ᬫᬘᬵᬭᬶᬂ ᬲᬓ᭄ᬓᬭᬾᬬ᭄ᬬᬸᬦ᭄ᬢᬶ ᬅᬬᬜ᭄ᬳᬾᬢ᭄ᬣ ᬅᬥᬶᬧ᭄ᬧᬵᬬᭀ.

᭗. ᬘᭀᬤᬦᬵᬲᬸᬢ᭄ᬢᬯᬡ᭄ᬡᬦᬵ

᭑᭖᭗. ᬲᬢ᭄ᬢᬫᬾ ᬘᭀᬤᬓᬾᬦᬵᬢᬶ ᬯᬢ᭄ᬣᬸᬲᬦ᭄ᬤᬲ᭄ᬲᬦᬵ ᬆᬧᬢ᭄ᬢᬶᬲᬦ᭄ᬤᬲ᭄ᬲᬦᬵ ᬲᬂᬯᬵᬲᬧ᭄ᬧᬝᬶᬓ᭄ᬔᬾᬧᭀ ᬲᬵᬫᬷᬘᬶᬧ᭄ᬧᬝᬶᬓ᭄ᬔᬾᬧᭀᬢᬶ ᬘᬢᬹᬳᬶ ᬘᭀᬤᬦᬵᬯᬢ᭄ᬣᬹᬳᬶ ᬘᭀᬤᬬᬫᬵᬦᬾᬦ. ᬓᬵᬮᬾᬦ ᬯᬓ᭄ᬔᬵᬫᬶ ᬦᭀ ᬅᬓᬵᬮᬾᬦᬵᬢᬶ ᬏᬢ᭄ᬣ ᬘᬸᬤᬶᬢᬓᬲ᭄ᬲ ᬓᬵᬮᭀ ᬓᬣᬶᬢᭀ, ᬦ ᬘᭀᬤᬓᬲ᭄ᬲ. ᬧᬭᬂ ᬘᭀᬤᬾᬦ᭄ᬢᬾᬦ ᬳᬶ ᬧᬭᬶᬲᬫᬚ᭄ᬛᬾ ᬯᬵ ᬉᬧᭀᬲᬣᬧᬯᬵᬭᬡᬕ᭄ᬕᬾ ᬯᬵ ᬆᬲᬦᬲᬵᬮᬵᬪᭀᬚᬦᬲᬵᬮᬵᬤᬷᬲᬸ ᬯᬵ ᬦ ᬘᭀᬤᬾᬢᬩ᭄ᬩᭀ, ᬤᬶᬯᬵᬝ᭄ᬞᬵᬦᬾ ᬦᬶᬲᬶᬦ᭄ᬦᬓᬵᬮᬾ ‘‘ᬓᬭᭀᬢᬵᬬᬲ᭄ᬫᬵ ᬑᬓᬵᬲᬂ, ᬅᬳᬂ ᬆᬬᬲ᭄ᬫᬦ᭄ᬢᬂ ᬯᬢ᭄ᬢᬸᬓᬵᬫᭀ’’ᬢᬶ ᬏᬯᬂ ᬑᬓᬵᬲᬂ ᬓᬵᬭᬾᬢ᭄ᬯᬵ ᬘᭀᬤᬾᬢᬩ᭄ᬩᭀ. ᬧᬸᬕ᭄ᬕᬮᬂ ᬧᬦ ᬉᬧᬧᬭᬶᬓ᭄ᬔᬶᬢ᭄ᬯᬵ ᬬᭀ ᬮᭀᬮᬧᬸᬕ᭄ᬕᬮᭀ ᬅᬪᬹᬢᬂ ᬯᬢ᭄ᬯᬵ ᬪᬶᬓ᭄ᬔᬹᬦᬂ ᬅᬬᬲᬂ ᬆᬭᭀᬧᬾᬢᬶ, ᬲᭀ ᬑᬓᬵᬲᬓᬫ᭄ᬫᬂ ᬯᬶᬦᬵᬧᬶ ᬘᭀᬤᬾᬢᬩ᭄ᬩᭀ. ᬪᬹᬢᬾᬦᬵᬢᬶ ᬢᬘ᭄ᬙᬾᬦ ᬲᬪᬵᬯᬾᬦ. ᬲᬡ᭄ᬳᬾᬦᬵᬢᬶ ᬫᬝ᭄ᬞᬾᬦ ᬫᬸᬤᬸᬓᬾᬦ. ᬅᬢ᭄ᬣᬲᬂᬳᬶᬢᬾᬦᬵᬢᬶ ᬅᬢ᭄ᬣᬓᬵᬫᬢᬵᬬ ᬳᬶᬢᬓᬵᬫᬢᬵᬬ ᬉᬧᬾᬢᬾᬦ. ᬅᬯᬶᬧ᭄ᬧᬝᬶᬲᬵᬭᭀ ᬉᬧᬤᬳᬵᬢᬩ᭄ᬩᭀᬢᬶ ᬅᬫᬗ᭄ᬓᬸᬪᬵᬯᭀ ᬉᬧᬦᬾᬢᬩ᭄ᬩᭀ. ᬅᬮᬂ ᬢᬾ ᬅᬯᬶᬧ᭄ᬧᬝᬶᬲᬵᬭᬵᬬᬵᬢᬶ ᬬᬸᬢ᭄ᬢᬂ ᬢᬾ ᬅᬫᬗ᭄ᬓᬸᬪᬵᬯᬵᬬ. ᬲᬾᬲᬫᬾᬢ᭄ᬣ ᬉᬢ᭄ᬢᬵᬦᬫᬾᬯᬵᬢᬶ. ᬅᬝ᭄ᬞᬫᬂ ᬳᬾᬝ᭄ᬞᬵ ᬯᬸᬢ᭄ᬢᬦᬬᬢ᭄ᬢᬵ ᬧᬵᬓᬝᬫᬾᬯ.

᭙. ᬔᬶᬧ᭄ᬧᬦᬶᬲᬦ᭄ᬢᬶᬲᬸᬢ᭄ᬢᬯᬡ᭄ᬡᬦᬵ

᭑᭖᭙. ᬦᬯᬫᬾ ᬔᬶᬧ᭄ᬧᬂ ᬦᬶᬲᬵᬫᬬᬢᬶ ᬉᬧᬥᬵᬭᬾᬢᬷᬢᬶ ᬔᬶᬧ᭄ᬧᬦᬶᬲᬦ᭄ᬢᬶ. ᬲᬸᬕ᭄ᬕᬳᬶᬢᬂ ᬓᬢ᭄ᬯᬵ ᬕᬡ᭄ᬳᬵᬢᬷᬢᬶ ᬲᬸᬕ᭄ᬕᬳᬶᬢᬕ᭄ᬕᬵᬳᬷ. ᬅᬢ᭄ᬣᬓᬸᬲᬮᭀᬢᬶ ᬅᬝ᭄ᬞᬓᬣᬵᬬ ᬙᬾᬓᭀ. ᬥᬫ᭄ᬫᬓᬸᬲᬮᭀᬢᬶ ᬧᬵᬮ᬴ᬶᬬᬂ ᬙᬾᬓᭀ. ᬦᬶᬭᬸᬢ᭄ᬢᬶᬓᬸᬲᬮᭀᬢᬶ ᬦᬶᬭᬸᬢ᭄ᬢᬶᬯᬘᬦᬾᬲᬸ ᬙᬾᬓᭀ. ᬩ᭄ᬬᬜ᭄ᬚᬦᬓᬸᬲᬮᭀᬢᬶ ᬅᬓ᭄ᬔᬭᬧ᭄ᬧᬪᬾᬤᬾ ᬙᬾᬓᭀ. ᬧᬸᬩ᭄ᬩᬵᬧᬭᬓᬸᬲᬮᭀᬢᬶ ᬅᬢ᭄ᬣᬧᬸᬩ᭄ᬩᬵᬧᬭᬂ, ᬥᬫ᭄ᬫᬧᬸᬩ᭄ᬩᬵᬧᬭᬂ, ᬅᬓ᭄ᬔᬭᬧᬸᬩ᭄ᬩᬵᬧᬭᬂ, ᬩ᭄ᬬᬜ᭄ᬚᬦᬧᬸᬩ᭄ᬩᬵᬧᬭᬂ, ᬅᬦᬸᬲᬦ᭄ᬥᬶᬧᬸᬩ᭄ᬩᬵᬧᬭᬦ᭄ᬢᬶ ᬇᬫᬲ᭄ᬫᬶᬂ ᬧᬜ᭄ᬘᬯᬶᬥᬾ ᬧᬸᬩ᭄ᬩᬵᬧᬭᬾ ᬙᬾᬓᭀ. ᬢᬢ᭄ᬣ ᬅᬢ᭄ᬣᬧᬸᬩ᭄ᬩᬵᬧᬭᬓᬸᬲᬮᭀᬢᬶ ᬳᬾᬝ᭄ᬞᬵ ᬅᬢ᭄ᬣᬾᬦ ᬉᬧᬭᬶ ᬅᬢ᭄ᬣᬂ ᬚᬵᬦᬵᬢᬶ, ᬉᬧᬭᬶ ᬅᬢ᭄ᬣᬾᬦ ᬳᬾᬝ᭄ᬞᬵ ᬅᬢ᭄ᬣᬂ ᬚᬵᬦᬵᬢᬶ. ᬓᬣᬂ? ᬲᭀ ᬳᬶ ᬳᬾᬝ᭄ᬞᬵ ᬅᬢ᭄ᬣᬂ ᬞᬧᬾᬢ᭄ᬯᬵ ᬉᬧᬭᬶ ᬅᬢ᭄ᬣᬾ ᬯᬸᬢ᭄ᬢᬾ ‘‘ᬳᬾᬝ᭄ᬞᬵ ᬅᬢ᭄ᬣᭀ ᬅᬢ᭄ᬣᬷ’’ᬢᬶ ᬚᬵᬦᬵᬢᬶ. ᬉᬧᬭᬶ ᬅᬢ᭄ᬣᬂ ᬞᬧᬾᬢ᭄ᬯᬵ ᬳᬾᬝ᭄ᬞᬵ ᬅᬢ᭄ᬣᬾ ᬯᬸᬢ᭄ᬢᬾᬧᬶ ‘‘ᬉᬧᬭᬶ ᬅᬢ᭄ᬣᭀ ᬅᬢ᭄ᬣᬷ’’ᬢᬶ ᬚᬵᬦᬵᬢᬶ. ᬉᬪᬢᭀ ᬞᬧᬾᬢ᭄ᬯᬵ ᬫᬚ᭄ᬛᬾ ᬅᬢ᭄ᬣᬾ ᬯᬸᬢ᭄ᬢᬾ ‘‘ᬉᬪᬢᭀ ᬅᬢ᭄ᬣᭀ ᬅᬢ᭄ᬣᬷ’’ᬢᬶ ᬚᬵᬦᬵᬢᬶ. ᬫᬚ᭄ᬛᬾ ᬅᬢ᭄ᬣᬂ ᬞᬧᬾᬢ᭄ᬯᬵ ᬉᬪᬢᭀᬪᬵᬕᬾᬲᬸ ᬅᬢ᭄ᬣᬾ ᬯᬸᬢ᭄ᬢᬾ ‘‘ᬫᬚ᭄ᬛᬾ ᬅᬢ᭄ᬣᭀ ᬅᬢ᭄ᬣᬷ’’ᬢᬶ ᬚᬵᬦᬵᬢᬶ. ᬥᬫ᭄ᬫᬧᬸᬩ᭄ᬩᬵᬧᬭᬵᬤᬷᬲᬸᬧᬶ ᬏᬲᬾᬯ ᬦᬬᭀ. ᬅᬦᬸᬲᬦ᭄ᬥᬶᬧᬸᬩ᭄ᬩᬵᬧᬭᬾ ᬧᬦ ᬲᬷᬮᬂ ᬆᬤᬶᬂ ᬓᬢ᭄ᬯᬵ ᬆᬭᬤ᭄ᬥᬾ ᬲᬸᬢ᭄ᬢᬦ᭄ᬢᬾ ᬫᬢ᭄ᬣᬓᬾ ᬙᬲᬸ ᬅᬪᬶᬜ᭄ᬜᬵᬲᬸ ᬆᬕᬢᬵᬲᬸ ‘‘ᬬᬣᬵᬦᬸᬲᬦ᭄ᬥᬶᬂ ᬬᬣᬵᬦᬸᬧᬭᬶᬘ᭄ᬙᬾᬤᬂ ᬲᬸᬢ᭄ᬢᬦ᭄ᬢᭀ ᬕᬢᭀ’’ᬢᬶ ᬚᬵᬦᬵᬢᬶ. ᬤᬶᬝ᭄ᬞᬶᬯᬲᬾᬦ ᬆᬭᬤ᭄ᬥᬾ ᬉᬧᬭᬶ ᬲᬘ᭄ᬘᬾᬲᬸ ᬆᬕᬢᬾᬲᬸᬧᬶ ‘‘ᬬᬣᬵᬦᬸᬲᬦ᭄ᬥᬶᬦᬵ ᬕᬢᭀ’’ᬢᬶ ᬚᬵᬦᬵᬢᬶ. ᬓᬮᬳᬪᬡ᭄ᬟᬦᬯᬲᬾᬦ ᬆᬭᬤ᭄ᬥᬾ ᬉᬧᬭᬶ ᬲᬵᬭᬡᬷᬬᬥᬫ᭄ᬫᬾᬲᬸ ᬆᬕᬢᬾᬲᬸᬧᬶ, ᬤ᭄ᬯᬢ᭄ᬢᬶᬂᬲᬢᬶᬭᬘ᭄ᬙᬵᬦᬓᬣᬵᬯᬲᬾᬦ ᬆᬭᬤ᭄ᬥᬾ ᬉᬧᬭᬶ ᬤᬲᬓᬣᬵᬯᬢ᭄ᬣᬹᬲᬸ (ᬅ. ᬦᬶ. ᭑᭐.᭖᭙; ᬉᬤᬵ.᭓᭑) ᬆᬕᬢᬾᬲᬸᬧᬶ ‘‘ᬬᬣᬵᬦᬸᬲᬦ᭄ᬥᬶᬦᬵ ᬕᬢᭀ’’ᬢᬶ ᬚᬵᬦᬵᬢᬷᬢᬶ.

᭑᭐. ᬪᬤ᭄ᬤᬚᬶᬲᬸᬢ᭄ᬢᬯᬡ᭄ᬡᬦᬵ

᭑᭗᭐. ᬤᬲᬫᬾ ᬅᬪᬶᬪᬹᬢᬶ ᬅᬪᬶᬪᬯᬶᬢ᭄ᬯᬵ ᬞᬶᬢᭀ ᬚᬾᬝ᭄ᬞᬓᭀ. ᬅᬦᬪᬶᬪᬹᬢᭀᬢᬶ ᬅᬜ᭄ᬜᬾᬳᬶ ᬅᬦᬪᬶᬪᬹᬢᭀ. ᬅᬜ᭄ᬜᬤᬢ᭄ᬣᬹᬢᬶ ᬏᬓᬂᬲᬯᬘᬦᬾ ᬦᬶᬧᬵᬢᭀ. ᬤᬲ᭄ᬲᬦᬯᬲᬾᬦ ᬤᬲᭀ, ᬲᬩ᭄ᬩᬂ ᬧᬲ᭄ᬲᬢᬷᬢᬶ ᬅᬥᬶᬧ᭄ᬧᬵᬬᭀ. ᬯᬲᬯᬢ᭄ᬢᬷᬢᬶ ᬲᬩ᭄ᬩᬂ ᬚᬦᬂ ᬯᬲᬾ ᬯᬢ᭄ᬢᬾᬢᬶ. ᬬᬣᬵ ᬧᬲ᭄ᬲᬢᭀᬢᬶ ᬇᬝ᭄ᬞᬵᬭᬫ᭄ᬫᬡᬂ ᬯᬵ ᬳᭀᬢᬸ ᬅᬦᬶᬝ᭄ᬞᬵᬭᬫ᭄ᬫᬡᬂ ᬯᬵ, ᬬᬾᬦᬵᬓᬵᬭᬾᬦ ᬢᬂ ᬧᬲ᭄ᬲᬦ᭄ᬢᬲ᭄ᬲ. ᬅᬦᬦ᭄ᬢᬭᬵ ᬆᬲᬯᬵᬦᬂ ᬔᬬᭀ ᬳᭀᬢᬷᬢᬶ ᬅᬦᬦ᭄ᬢᬭᬵᬬᬾᬯ ᬅᬭᬳᬢ᭄ᬢᬂ ᬉᬧ᭄ᬧᬚ᭄ᬚᬢᬶ. ᬬᬣᬵ ᬲᬸᬡᬢᭀᬢᬶ ᬏᬢ᭄ᬣᬵᬧᬶ ᬏᬲᬾᬯ ᬦᬬᭀ. ᬅᬣ ᬯᬵ ᬬᬂ ᬘᬓ᭄ᬔᬸᬦᬵ ᬭᬹᬧᬂ ᬤᬶᬲ᭄ᬯᬵ ᬦᬶᬭᬦ᭄ᬢᬭᬫᬾᬯ ᬯᬶᬧᬲ᭄ᬲᬦᬂ ᬧᬝ᭄ᬞᬧᬾᬢ᭄ᬯᬵ ᬅᬭᬳᬢ᭄ᬢᬂ ᬧᬵᬧᬸᬡᬵᬢᬶ, ᬢᬂ ᬢᬲ᭄ᬲ ᬅᬭᬳᬢ᭄ᬢᬂ ᬘᬓ᭄ᬔᬸᬯᬶᬜ᭄ᬜᬵᬡᬵᬦᬦ᭄ᬢᬭᬂ ᬦᬵᬫ ᬳᭀᬢᬶ. ᬢᬂ ᬲᬦ᭄ᬥᬵᬬ ᬯᬸᬢ᭄ᬢᬂ – ᬇᬤᬂ ᬤᬲ᭄ᬲᬦᬵᬦᬂ ᬅᬕ᭄ᬕᬦ᭄ᬢᬶ. ᬤᬸᬢᬶᬬᬧᬤᬾᬧᬶ ᬏᬲᬾᬯ ᬦᬬᭀ.

ᬬᬣᬵ ᬲᬸᬔᬶᬢᬲ᭄ᬲᬵᬢᬶ ᬬᬾᬦ ᬫᬕ᭄ᬕᬲᬸᬔᬾᬦ ᬲᬸᬔᬶᬢᬲ᭄ᬲ. ᬅᬦᬦ᭄ᬢᬭᬵ ᬆᬲᬯᬵᬦᬂ ᬔᬬᭀ ᬳᭀᬢᬷᬢᬶ ᬲᬫᬦᬦ᭄ᬢᬭᬫᬾᬯ ᬅᬭᬳᬢ᭄ᬢᬂ ᬉᬧ᭄ᬧᬚ᭄ᬚᬢᬶ. ᬇᬤᬂ ᬲᬸᬔᬵᬦᬂ ᬅᬕ᭄ᬕᬦ᭄ᬢᬶ ᬇᬤᬂ ᬫᬕ᭄ᬕᬲᬸᬔᬂ ᬲᬸᬔᬵᬦᬂ ᬉᬢ᭄ᬢᬫᬂ. ᬬᬣᬵ ᬲᬜ᭄ᬜᬶᬲ᭄ᬲᬵᬢᬶ ᬇᬥᬵᬧᬶ ᬫᬕ᭄ᬕᬲᬜ᭄ᬜᬵᬯ ᬅᬥᬶᬧ᭄ᬧᬾᬢᬵ. ᬬᬣᬵ ᬪᬹᬢᬲ᭄ᬲᬵᬢᬶ ᬬᬲ᭄ᬫᬶᬂ ᬪᬯᬾ ᬬᬲ᭄ᬫᬶᬂ ᬅᬢ᭄ᬢᬪᬵᬯᬾ ᬞᬶᬢᬲ᭄ᬲ. ᬅᬦᬦ᭄ᬢᬭᬵᬢᬶ ᬅᬦᬦ᭄ᬢᬭᬵᬬᬾᬦ ᬅᬭᬳᬢ᭄ᬢᬂ ᬉᬧ᭄ᬧᬚ᭄ᬚᬢᬶ. ᬇᬤᬂ ᬪᬯᬵᬦᬂ ᬅᬕ᭄ᬕᬦ᭄ᬢᬶ ᬅᬬᬂ ᬧᬘ᭄ᬙᬶᬫᭀ ᬅᬢ᭄ᬢᬪᬵᬯᭀ ᬪᬯᬵᬦᬂ ᬅᬕ᭄ᬕᬂ ᬦᬵᬫ. ᬅᬣ ᬯᬵ ᬬᬣᬵ ᬪᬹᬢᬲ᭄ᬲᬵᬢᬶ ᬬᬾᬳᬶ ᬔᬦ᭄ᬥᬾᬳᬶ ᬫᬕ᭄ᬕᬓ᭄ᬔᬡᬾ ᬪᬹᬢᬲ᭄ᬲ ᬯᬶᬚ᭄ᬚᬫᬵᬦᬲ᭄ᬲ. ᬅᬦᬦ᭄ᬢᬭᬵ ᬆᬲᬯᬵᬦᬂ ᬔᬬᭀ ᬳᭀᬢᬷᬢᬶ ᬫᬕ᭄ᬕᬵᬦᬦ᭄ᬢᬭᬫᬾᬯ ᬨᬮᬂ ᬉᬧ᭄ᬧᬚ᭄ᬚᬢᬶ. ᬇᬤᬂ ᬪᬯᬵᬦᬂ ᬅᬕ᭄ᬕᬦ᭄ᬢᬶ ᬇᬤᬂ ᬫᬕ᭄ᬕᬓ᭄ᬔᬡᬾ ᬔᬦ᭄ᬥᬧᬜ᭄ᬘᬓᬂ ᬪᬯᬵᬦᬂ ᬅᬕ᭄ᬕᬂ ᬦᬵᬫᬵᬢᬶ.

ᬆᬖᬵᬢᬯᬕ᭄ᬕᭀ ᬤᬸᬢᬶᬬᭀ.

(᭑᭘) ᭓. ᬉᬧᬵᬲᬓᬯᬕ᭄ᬕᭀ

᭑-᭓. ᬲᬵᬭᬚ᭄ᬚᬲᬸᬢ᭄ᬢᬵᬤᬶᬯᬡ᭄ᬡᬦᬵ

᭑᭗᭑-᭑᭗᭓. ᬢᬢᬶᬬᬲ᭄ᬲ ᬧᬞᬫᬤᬸᬢᬶᬬᬢᬢᬶᬬᬾᬲᬸ ᬅᬕᬵᬭᬶᬬᬧ᭄ᬧᬝᬶᬧᬢ᭄ᬢᬶ ᬓᬣᬶᬢᬵ. ᬲᭀᬢᬵᬧᬦ᭄ᬦᬲᬓᬤᬵᬕᬵᬫᬶᬦᭀᬧᬶ ᬳᭀᬦ᭄ᬢᬸ, ᬯᬝ᭄ᬝᬦ᭄ᬢᬶᬬᬾᬯ.

᭔. ᬯᬾᬭᬲᬸᬢ᭄ᬢᬯᬡ᭄ᬡᬦᬵ

᭑᭗᭔. ᬘᬢᬸᬢ᭄ᬣᬾ ᬪᬬᬵᬦᬷᬢᬶ ᬘᬶᬢ᭄ᬢᬸᬢ᭄ᬭᬵᬲᬪᬬᬵᬦᬶ. ᬯᬾᬭᬵᬦᬷᬢᬶ ᬅᬓᬸᬲᬮᬯᬾᬭᬵᬦᬶᬧᬶ ᬧᬸᬕ᭄ᬕᬮᬯᬾᬭᬵᬦᬶᬧᬶ. ᬘᬾᬢᬲᬶᬓᬦ᭄ᬢᬶ ᬘᬶᬢ᭄ᬢᬦᬶᬲ᭄ᬲᬶᬢᬂ. ᬤᬸᬓ᭄ᬔᬦ᭄ᬢᬶ ᬓᬵᬬᬧᬲᬵᬤᬯᬢ᭄ᬣᬸᬓᬂ ᬤᬸᬓ᭄ᬔᬂ. ᬤᭀᬫᬦᬲ᭄ᬲᬦ᭄ᬢᬶ ᬤᭀᬫᬦᬲ᭄ᬲᬯᬾᬤᬦᬂ. ᬇᬫᬲ᭄ᬫᬶᬂ ᬲᬸᬢ᭄ᬢᬾ ᬯᬶᬭᬢᬶᬧᬳᬵᬦᬂ ᬓᬣᬶᬢᬂ.

᭕. ᬘᬡ᭄ᬟᬵᬮᬲᬸᬢ᭄ᬢᬯᬡ᭄ᬡᬦᬵ

᭑᭗᭕. ᬧᬜ᭄ᬘᬫᬾ ᬉᬧᬵᬲᬓᬧᬢᬶᬓᬸᬝ᭄ᬞᭀᬢᬶ ᬉᬧᬵᬲᬓᬧᬘ᭄ᬙᬶᬫᬓᭀ. ᬓᭀᬢᬹᬳᬮᬫᬗ᭄ᬕᬮᬶᬓᭀᬢᬶ ‘‘ᬇᬫᬶᬦᬵ ᬇᬤᬂ ᬪᬯᬶᬲ᭄ᬲᬢᬷ’’ᬢᬶ ᬏᬯᬂ ᬧᬯᬢ᭄ᬢᬢ᭄ᬢᬵ ᬓᭀᬢᬹᬳᬮᬲᬗ᭄ᬔᬵᬢᬾᬦ ᬤᬶᬝ᭄ᬞᬲᬸᬢᬫᬸᬢᬫᬗ᭄ᬕᬮᬾᬦ ᬲᬫᬦ᭄ᬦᬵᬕᬢᭀ. ᬫᬗ᭄ᬕᬮᬂ ᬧᬘ᭄ᬘᬾᬢᬶ ᬦᭀ ᬓᬫ᭄ᬫᬦ᭄ᬢᬶ ᬫᬗ᭄ᬕᬮᬂ ᬑᬮᭀᬓᬾᬢᬶ, ᬓᬫ᭄ᬫᬂ ᬦ ᬑᬮᭀᬓᬾᬢᬶ. ᬇᬢᭀ ᬘ ᬩᬳᬶᬤ᭄ᬥᬵᬢᬶ ᬇᬫᬫ᭄ᬳᬵ ᬲᬵᬲᬦᬵ ᬩᬳᬶᬤ᭄ᬥᬵ. ᬧᬸᬩ᭄ᬩᬓᬵᬭᬂ ᬓᬭᭀᬢᬷᬢᬶ ᬤᬵᬦᬵᬤᬶᬓᬂ ᬓᬸᬲᬮᬓᬶᬘ᭄ᬘᬂ ᬧᬞᬫᬢᬭᬂ ᬓᬭᭀᬢᬶ.

᭖. ᬧᬷᬢᬶᬲᬸᬢ᭄ᬢᬯᬡ᭄ᬡᬦᬵ

᭑᭗᭖. ᬙᬝ᭄ᬞᬾ ᬓᬶᬦ᭄ᬢᬶ ᬫᬬᬦ᭄ᬢᬶ ᬓᬾᬦ ᬦᬵᬫ ᬉᬧᬵᬬᬾᬦ ᬫᬬᬂ. ᬧᬯᬶᬯᬾᬓᬂ ᬧᬷᬢᬶᬦ᭄ᬢᬶ ᬧᬞᬫᬤᬸᬢᬶᬬᬚ᭄ᬛᬵᬦᬵᬦᬶ ᬦᬶᬲ᭄ᬲᬵᬬ ᬉᬧ᭄ᬧᬚ᭄ᬚᬦᬓᬧᬷᬢᬶᬂ. ᬓᬵᬫᬹᬧᬲᬂᬳᬶᬢᬦ᭄ᬢᬶ ᬓᬵᬫᬦᬶᬲ᭄ᬲᬶᬢᬂ ᬤᬸᬯᬶᬥᬾ ᬓᬵᬫᬾ ᬆᬭᬩ᭄ᬪ ᬉᬧ᭄ᬧᬚ᭄ᬚᬦᬓᬂ. ᬅᬓᬸᬲᬮᬹᬧᬲᬂᬳᬶᬢᬦ᭄ᬢᬶ ‘‘ᬫᬶᬕᬲᬹᬓᬭᬵᬤᬬᭀ ᬯᬶᬚ᭄ᬛᬶᬲ᭄ᬲᬵᬫᬷ’’ᬢᬶ ᬲᬭᬂ ᬔᬶᬧᬶᬢ᭄ᬯᬵ ᬢᬲ᭄ᬫᬶᬂ ᬯᬶᬭᬤ᭄ᬥᬾ ‘‘ᬯᬶᬭᬤ᭄ᬥᬂ ᬫᬬᬵ’’ᬢᬶ ᬏᬯᬂ ᬅᬓᬸᬲᬮᬾ ᬦᬶᬲ᭄ᬲᬵᬬ ᬉᬧ᭄ᬧᬚ᭄ᬚᬦᬓᬂ. ᬢᬵᬤᬶᬲᬾᬲᬸ ᬧᬦ ᬞᬵᬦᬾᬲᬸ ᬅᬯᬶᬭᬚ᭄ᬛᬦ᭄ᬢᬲ᭄ᬲ ‘‘ᬲᬸᬝ᭄ᬞᬸ ᬫᬾ ᬯᬶᬤ᭄ᬥᬂ, ᬲᬸᬝ᭄ᬞᬸ ᬫᬾ ᬧᬳᬝ’’ᬦ᭄ᬢᬶ ᬉᬧ᭄ᬧᬚ᭄ᬚᬦᬓᬂ ᬅᬓᬸᬲᬮᬹᬧᬲᬂᬳᬶᬢᬂ ᬲᬸᬔᬂ ᬲᭀᬫᬦᬲ᭄ᬲᬂ ᬦᬵᬫ. ᬤᬵᬦᬵᬤᬶᬉᬧᬓᬭᬡᬵᬦᬂ ᬅᬲᬫ᭄ᬧᬢ᭄ᬢᬶᬬᬵ ᬉᬧ᭄ᬧᬚ᭄ᬚᬫᬵᬦᬂ ᬧᬦ ᬓᬸᬲᬮᬹᬧᬲᬂᬳᬶᬢᬂ ᬤᬸᬓ᭄ᬔᬂ ᬤᭀᬫᬦᬲ᭄ᬲᬦ᭄ᬢᬶ ᬯᬾᬤᬶᬢᬩ᭄ᬩᬂ.

᭗. ᬯᬡᬶᬚ᭄ᬚᬵᬲᬸᬢ᭄ᬢᬯᬡ᭄ᬡᬦᬵ

᭑᭗᭗. ᬲᬢ᭄ᬢᬫᬾ ᬯᬡᬶᬚ᭄ᬚᬵᬢᬶ ᬯᬵᬡᬶᬚᬓᬫ᭄ᬫᬵᬦᬶ. ᬉᬧᬵᬲᬓᬾᬦᬵᬢᬶ ᬢᬶᬲᬭᬡᬕᬢᬾᬦ. ᬲᬢ᭄ᬣᬯᬡᬶᬚ᭄ᬚᬵᬢᬶ ᬆᬯᬸᬥᬪᬡ᭄ᬟᬂ ᬓᬵᬭᬾᬢ᭄ᬯᬵ ᬢᬲ᭄ᬲ ᬯᬶᬓ᭄ᬓᬬᭀ. ᬲᬢ᭄ᬢᬯᬡᬶᬚ᭄ᬚᬵᬢᬶ ᬫᬦᬸᬲ᭄ᬲᬯᬶᬓ᭄ᬓᬬᭀ. ᬫᬂᬲᬯᬡᬶᬚ᭄ᬚᬵᬢᬶ ᬲᬹᬓᬭᬫᬶᬕᬵᬤᬬᭀ ᬧᭀᬲᬾᬢ᭄ᬯᬵ ᬢᬾᬲᬂ ᬯᬶᬓ᭄ᬓᬬᭀ. ᬫᬚ᭄ᬚᬯᬡᬶᬚ᭄ᬚᬵᬢᬶ ᬬᬂᬓᬶᬜ᭄ᬘᬶ ᬫᬚ᭄ᬚᬂ ᬓᬵᬭᬾᬢ᭄ᬯᬵ ᬢᬲ᭄ᬲ ᬯᬶᬓ᭄ᬓᬬᭀ. ᬯᬶᬲᬯᬡᬶᬚ᭄ᬚᬵᬢᬶ ᬯᬶᬲᬂ ᬓᬵᬭᬾᬢ᭄ᬯᬵ ᬢᬲ᭄ᬲ ᬯᬶᬓ᭄ᬓᬬᭀ. ᬇᬢᬶ ᬲᬩ᭄ᬩᬫ᭄ᬧᬶ ᬇᬫᬂ ᬯᬡᬶᬚ᭄ᬚᬂ ᬦᬾᬯ ᬅᬢ᭄ᬢᬦᬵ ᬓᬵᬢᬸᬂ, ᬦ ᬧᬭᬾ ᬲᬫᬵᬤᬧᬾᬢ᭄ᬯᬵ ᬓᬵᬭᬾᬢᬸᬂ ᬯᬝ᭄ᬝᬢᬶ.

᭘. ᬭᬵᬚᬲᬸᬢ᭄ᬢᬯᬡ᭄ᬡᬦᬵ

᭑᭗᭘. ᬅᬝ᭄ᬞᬫᬾ ᬧᬩ᭄ᬩᬵᬚᬾᬦ᭄ᬢᬷᬢᬶ ᬭᬝ᭄ᬞᬫ᭄ᬳᬵ ᬧᬩ᭄ᬩᬵᬚᬾᬦ᭄ᬢᬶ. ᬬᬣᬵᬧᬘ᭄ᬘᬬᬂ ᬯᬵ ᬓᬭᭀᬦ᭄ᬢᬷᬢᬶ ᬬᬣᬵᬥᬶᬧ᭄ᬧᬵᬬᬂ ᬬᬣᬵᬚ᭄ᬛᬵᬲᬬᬂ ᬓᬭᭀᬦ᭄ᬢᬶ. ᬢᬣᬾᬯ ᬧᬵᬧᬓᬫ᭄ᬫᬂ ᬧᬯᬾᬤᬾᬦ᭄ᬢᬷᬢᬶ ᬬᬣᬵ ᬢᬾᬦ ᬓᬢᬂ, ᬢᬂ ᬢᬣᬾᬯ ᬅᬜ᭄ᬜᬾᬲᬂ ᬆᬭᭀᬘᬾᬦ᭄ᬢᬶ ᬓᬣᬾᬦ᭄ᬢᬶ.

᭙. ᬕᬶᬳᬶᬲᬸᬢ᭄ᬢᬯᬡ᭄ᬡᬦᬵ

᭑᭗᭙. ᬦᬯᬫᬾ ᬲᬂᬯᬸᬢᬓᬫ᭄ᬫᬦ᭄ᬢᬦ᭄ᬢᬶ ᬧᬶᬳᬶᬢᬓᬫ᭄ᬫᬦ᭄ᬢᬂ. ᬆᬪᬶᬘᬾᬢᬲᬶᬓᬵᬦᬦ᭄ᬢᬶ ᬉᬢ᭄ᬢᬫᬘᬶᬢ᭄ᬢᬦᬶᬲ᭄ᬲᬶᬢᬵᬦᬂ. ᬤᬶᬝ᭄ᬞᬥᬫ᭄ᬫᬲᬸᬔᬯᬶᬳᬵᬭᬵᬦᬦ᭄ᬢᬶ ᬧᬘ᭄ᬘᬓ᭄ᬔᬾᬬᬾᬯ ᬥᬫ᭄ᬫᬾ ᬧᬯᬢ᭄ᬢᬶᬓ᭄ᬔᬡᬾ ᬲᬸᬔᬯᬶᬳᬵᬭᬵᬦᬂ. ᬅᬭᬶᬬᬓᬦ᭄ᬢᬾᬳᬷᬢᬶ ᬅᬭᬶᬬᬵᬦᬂ ᬓᬦ᭄ᬢᬾᬳᬶ ᬫᬕ᭄ᬕᬨᬮᬲᬷᬮᬾᬳᬶ.

ᬅᬭᬶᬬᬥᬫ᭄ᬫᬂ ᬲᬫᬵᬤᬵᬬᬵᬢᬶ ᬏᬢ᭄ᬣ ᬅᬭᬶᬬᬥᬫ᭄ᬫᭀᬢᬶ ᬧᬜ᭄ᬘ ᬲᬷᬮᬵᬦᬶ ᬓᬣᬶᬢᬵᬦᬶ. ᬫᬾᬭᬬᬂ ᬯᬵᬭᬸᬡᬶᬦ᭄ᬢᬶ ᬘᬢᬸᬩ᭄ᬩᬶᬥᬂ ᬫᬾᬭᬬᬂ ᬧᬜ᭄ᬘᬯᬶᬥᬜ᭄ᬘ ᬲᬸᬭᬂ. ᬥᬫ᭄ᬫᬜ᭄ᬘᬵᬦᬸᬯᬶᬢᬓ᭄ᬓᬬᬾᬢᬶ ᬦᬯᬯᬶᬥᬂ ᬮᭀᬓᬸᬢ᭄ᬢᬭᬥᬫ᭄ᬫᬂ ᬅᬦᬸᬲ᭄ᬲᬢᬶᬯᬲᬾᬦᬾᬯ ᬯᬶᬢᬓ᭄ᬓᬾᬬ᭄ᬬ. ᬅᬩ᭄ᬬᬵᬧᬚ᭄ᬛᬂ ᬳᬶᬢᬂ ᬘᬶᬢ᭄ᬢᬦ᭄ᬢᬶ ᬦᬶᬤ᭄ᬤᬸᬓ᭄ᬔᬂ ᬫᬾᬢ᭄ᬢᬵᬤᬶᬩ᭄ᬭᬳ᭄ᬫᬯᬶᬳᬵᬭᬘᬶᬢ᭄ᬢᬂ. ᬤᬾᬯᬮᭀᬓᬵᬬ ᬪᬵᬯᬬᬾᬢᬶ ᬩ᭄ᬭᬳ᭄ᬫᬮᭀᬓᬢ᭄ᬣᬵᬬ ᬪᬵᬯᬾᬬ᭄ᬬ. ᬧᬸᬜ᭄ᬜᬢ᭄ᬣᬲ᭄ᬲ ᬚᬶᬕᬷᬲᬢᭀᬢᬶ ᬧᬸᬜ᭄ᬜᬾᬦ ᬅᬢ᭄ᬣᬶᬓᬲ᭄ᬲ ᬧᬸᬜ᭄ᬜᬂ ᬕᬯᬾᬲᬦ᭄ᬢᬲ᭄ᬲ. ᬲᬦ᭄ᬢᬾᬲᬹᬢᬶ ᬩᬸᬤ᭄ᬥᬧᬘ᭄ᬘᬾᬓᬩᬸᬤ᭄ᬥᬢᬣᬵᬕᬢᬲᬵᬯᬓᬾᬲᬸ. ᬯᬶᬧᬸᬮᬵ ᬳᭀᬢᬶ ᬤᬓ᭄ᬔᬶᬡᬵᬢᬶ ᬏᬯᬂ ᬤᬶᬦ᭄ᬦᬤᬵᬦᬂ ᬫᬳᬧ᭄ᬨᬮᬂ ᬳᭀᬢᬶ. ᬅᬦᬸᬧᬸᬩ᭄ᬩᬾᬦᬵᬢᬶ ᬲᬷᬮᬧᬹᬭᬡᬵᬤᬶᬦᬵ ᬅᬦᬸᬓ᭄ᬓᬫᬾᬦ. ᬲᬾᬲᬂ ᬢᬶᬓᬦᬶᬧᬵᬢᬾ ᬯᬸᬢ᭄ᬢᬢ᭄ᬣᬫᬾᬯ.

᭑᭐. ᬕᬯᬾᬲᬷᬲᬸᬢ᭄ᬢᬯᬡ᭄ᬡᬦᬵ

᭑᭘᭐. ᬤᬲᬫᬾ ᬲᬶᬢᬂ ᬧᬵᬢ᭄ᬯᬵᬓᬵᬲᬷᬢᬶ ᬫᬳᬵᬫᬕ᭄ᬕᬾᬦᬾᬯ ᬕᬘ᭄ᬙᬦ᭄ᬢᭀ ᬢᬂ ᬲᬵᬮᬯᬦᬂ ᬑᬮᭀᬓᬾᬢ᭄ᬯᬵ ‘‘ᬅᬢ᭄ᬣᬶ ᬦᬸ ᬔᭀ ᬇᬫᬲ᭄ᬫᬶᬂ ᬞᬵᬦᬾ ᬓᬶᬜ᭄ᬘᬶ ᬲᬸᬓᬵᬭᬡᬂ ᬉᬧ᭄ᬧᬦ᭄ᬦᬧᬸᬩ᭄ᬩ’’ᬦ᭄ᬢᬶ ᬅᬤ᭄ᬤᬲ ᬓᬲ᭄ᬲᬧᬩᬸᬤ᭄ᬥᬓᬵᬮᬾ ᬕᬯᬾᬲᬶᬦᬵ ᬉᬧᬵᬲᬓᬾᬦ ᬓᬢᬂ ᬲᬸᬓᬵᬭᬡᬂ. ᬅᬣᬲ᭄ᬲ ᬏᬢᬤᬳᭀᬲᬶ – ‘‘ᬇᬤᬂ ᬲᬸᬓᬵᬭᬡᬂ ᬪᬶᬓ᭄ᬔᬸᬲᬗ᭄ᬖᬲ᭄ᬲ ᬅᬧᬵᬓᬝᬂ ᬧᬝᬶᬘ᭄ᬙᬦ᭄ᬦᬂ, ᬳᬦ᭄ᬤ ᬦᬂ ᬪᬶᬓ᭄ᬔᬸᬲᬗ᭄ᬖᬲ᭄ᬲ ᬧᬵᬓᬝᬂ ᬓᬭᭀᬫᬷ’’ᬢᬶ ᬫᬕ᭄ᬕᬵ ᬑᬓ᭄ᬓᬫ᭄ᬫ ᬅᬜ᭄ᬜᬢᬭᬲ᭄ᬫᬶᬂ ᬧᬤᬾᬲᬾ ᬞᬶᬢᭀᬯ ᬲᬶᬢᬧᬵᬢᬸᬓᬫ᭄ᬫᬂ ᬅᬓᬵᬲᬶ, ᬅᬕ᭄ᬕᬕ᭄ᬕᬤᬦ᭄ᬢᬾ ᬤᬲ᭄ᬲᬾᬢ᭄ᬯᬵ ᬫᬦ᭄ᬤᬳᬲᬶᬢᬂ ᬳᬲᬶ. ᬬᬣᬵ ᬳᬶ ᬮᭀᬓᬶᬬᬫᬦᬸᬲ᭄ᬲᬵ ᬉᬤᬭᬂ ᬧᬳᬭᬦ᭄ᬢᬵ ‘‘ᬓᬳᬂ ᬓᬳ’’ᬦ᭄ᬢᬶ ᬳᬲᬦ᭄ᬢᬶ, ᬦ ᬏᬯᬂ ᬩᬸᬤ᭄ᬥᬵ. ᬩᬸᬤ᭄ᬥᬵᬦᬂ ᬧᬦ ᬳᬲᬶᬢᬂ ᬳᬝ᭄ᬞᬧᬳᬝ᭄ᬞᬵᬓᬵᬭᬫᬢ᭄ᬢᬫᬾᬯ ᬳᭀᬢᬶ.

ᬳᬲᬶᬢᬜ᭄ᬘ ᬦᬵᬫᬾᬢᬂ ᬢᬾᬭᬲᬳᬶ ᬲᭀᬫᬦᬲ᭄ᬲᬲᬳᬕᬢᬘᬶᬢ᭄ᬢᬾᬳᬶ ᬳᭀᬢᬶ. ᬢᬢ᭄ᬣ ᬮᭀᬓᬶᬬᬫᬳᬵᬚᬦᭀ ᬅᬓᬸᬲᬮᬢᭀ ᬘᬢᬹᬳᬶ, ᬓᬵᬫᬵᬯᬘᬭᬓᬸᬲᬮᬢᭀ ᬘᬢᬹᬳᬷᬢᬶ ᬅᬝ᭄ᬞᬳᬶ ᬘᬶᬢ᭄ᬢᬾᬳᬶ ᬳᬲᬢᬶ, ᬲᬾᬔᬵ ᬅᬓᬸᬲᬮᬢᭀ ᬤᬶᬝ᭄ᬞᬶᬕᬢᬲᬫ᭄ᬧᬬᬸᬢ᭄ᬢᬵᬦᬶ ᬤ᭄ᬯᬾ ᬅᬧᬦᬾᬢ᭄ᬯᬵ ᬙᬳᬶ ᬘᬶᬢ᭄ᬢᬾᬳᬶ ᬳᬲᬦ᭄ᬢᬶ, ᬔᬷᬡᬵᬲᬯᬵ ᬘᬢᬹᬳᬶ ᬲᬳᬾᬢᬸᬓᬓᬶᬭᬶᬬᬘᬶᬢ᭄ᬢᬾᬳᬶ, ᬏᬓᬾᬦ ᬅᬳᬾᬢᬸᬓᬓᬶᬭᬶᬬᬘᬶᬢ᭄ᬢᬾᬦᬵᬢᬶ ᬧᬜ᭄ᬘᬳᬶ ᬘᬶᬢ᭄ᬢᬾᬳᬶ ᬳᬲᬦ᭄ᬢᬶ. ᬢᬾᬲᬸᬧᬶ ᬩᬮᬯᬵᬭᬫ᭄ᬫᬡᬾ ᬆᬧᬵᬣᬫᬵᬕᬢᬾ ᬤ᭄ᬯᬷᬳᬶ ᬜᬵᬡᬲᬫ᭄ᬧᬬᬸᬢ᭄ᬢᬘᬶᬢ᭄ᬢᬾᬳᬶ ᬳᬲᬦ᭄ᬢᬶ, ᬤᬸᬩ᭄ᬩᬮᬵᬭᬫ᭄ᬫᬡᬾ ᬤᬸᬳᬾᬢᬸᬓᬘᬶᬢ᭄ᬢᬤ᭄ᬯᬬᬾᬦ ᬘ ᬅᬳᬾᬢᬸᬓᬘᬶᬢ᭄ᬢᬾᬦ ᬘᬵᬢᬶ ᬢᬷᬳᬶ ᬘᬶᬢ᭄ᬢᬾᬳᬶ ᬳᬲᬦ᭄ᬢᬶ. ᬇᬫᬲ᭄ᬫᬶᬂ ᬧᬦ ᬞᬵᬦᬾ ᬓᬶᬭᬶᬬᬵᬳᬾᬢᬸᬓᬫᬦᭀᬯᬶᬜ᭄ᬜᬵᬡᬥᬵᬢᬸᬲᭀᬫᬦᬲ᭄ᬲᬲᬳᬕᬢᬘᬶᬢ᭄ᬢᬂ ᬪᬕᬯᬢᭀ ᬧᬳᬝ᭄ᬞᬵᬓᬵᬭᬫᬢ᭄ᬢᬳᬲᬶᬢᬂ ᬉᬧ᭄ᬧᬵᬤᬾᬢᬶ.

ᬢᬂ ᬧᬦᬾᬢᬂ ᬳᬲᬶᬢᬂ ᬏᬯᬂ ᬅᬧ᭄ᬧᬫᬢ᭄ᬢᬓᬫ᭄ᬧᬶ ᬣᬾᬭᬲ᭄ᬲ ᬧᬵᬓᬝᬂ ᬅᬳᭀᬲᬶ. ᬓᬣᬂ? ᬢᬣᬵᬭᬹᬧᬾ ᬳᬶ ᬓᬵᬮᬾ ᬢᬣᬵᬕᬢᬲ᭄ᬲ ᬘᬢᬹᬳᬶ ᬤᬵᬞᬵᬳᬶ ᬘᬵᬢᬸᬤ᭄ᬤᬷᬧᬶᬓᬫᬳᬵᬫᬾᬖᬫᬸᬔᬢᭀ ᬲᬫᭀᬲᬭᬶᬢᬵ ᬯᬶᬚ᭄ᬚᬸᬮᬢᬵ ᬯᬶᬬ ᬯᬶᬭᭀᬘᬫᬵᬦᬵ ᬫᬳᬵᬢᬵᬮᬓ᭄ᬔᬦ᭄ᬥᬧ᭄ᬧᬫᬵᬡᬵ ᬭᬲ᭄ᬫᬶᬯᬝ᭄ᬝᬶᬬᭀ ᬉᬝ᭄ᬞᬳᬶᬢ᭄ᬯᬵ ᬢᬶᬓ᭄ᬔᬢ᭄ᬢᬸᬂ ᬲᬶᬭᬯᬭᬂ ᬧᬤᬓ᭄ᬔᬶᬡᬂ ᬓᬢ᭄ᬯᬵ ᬤᬵᬞᬕ᭄ᬕᬾᬲᬸᬬᬾᬯ ᬅᬦ᭄ᬢᬭᬥᬵᬬᬦ᭄ᬢᬶ. ᬢᬾᬦ ᬲᬜ᭄ᬜᬵᬡᬾᬦ ᬆᬬᬲ᭄ᬫᬵ ᬆᬦᬦ᭄ᬤᭀ ᬪᬕᬯᬢᭀ ᬧᬘ᭄ᬙᬢᭀ ᬕᬘ᭄ᬙᬫᬵᬦᭀᬧᬶ ᬲᬶᬢᬧᬵᬢᬸᬪᬵᬯᬂ ᬚᬵᬦᬵᬢᬶ.

ᬇᬤ᭄ᬥᬦ᭄ᬢᬶ ᬲᬫᬶᬤ᭄ᬥᬂ. ᬨᬷᬢᬦ᭄ᬢᬶ ᬅᬢᬶᬲᬫᬶᬤ᭄ᬥᬂ ᬲᬩ᭄ᬩᬧᬵᬮᬶᬨᬸᬮ᭄ᬮᬂ ᬯᬶᬬ. ᬆᬓᬶᬡ᭄ᬡᬫᬦᬸᬲ᭄ᬲᬦ᭄ᬢᬶ ᬚᬦᬲᬫᬵᬓᬸᬮᬂ. ᬲᬷᬮᬾᬲᬸ ᬅᬧᬭᬶᬧᬹᬭᬓᬵᬭᬷᬢᬶ ᬧᬜ᭄ᬘᬲᬸ ᬲᬷᬮᬾᬲᬸ ᬅᬲᬫᬢ᭄ᬢᬓᬵᬭᬷ. ᬧᬝᬶᬤᬾᬲᬶᬢᬵᬦᬷᬢᬶ ᬉᬧᬵᬲᬓᬪᬵᬯᬂ ᬧᬝᬶᬤᬾᬲᬶᬢᬵᬦᬶ. ᬲᬫᬵᬤᬧᬶᬢᬵᬦᬷᬢᬶ ᬲᬭᬡᬾᬲᬸ ᬧᬢᬶᬝ᭄ᬞᬵᬧᬶᬢᬵᬦᬷᬢᬶ ᬅᬢ᭄ᬣᭀ. ᬇᬘ᭄ᬘᬾᬢᬂ ᬲᬫᬲᬫᬦ᭄ᬢᬶ ᬇᬢᬶ ᬏᬢᬂ ᬓᬵᬭᬡᬂ ᬲᬩ᭄ᬩᬵᬓᬵᬭᬢᭀ ᬲᬫᬪᬵᬯᬾᬦᬾᬯ ᬲᬫᬂ, ᬦ ᬏᬓᬤᬾᬲᬾᬦ. ᬦᬢ᭄ᬣᬶ ᬓᬶᬜ᭄ᬘᬶ ᬅᬢᬶᬭᬾᬓᬦ᭄ᬢᬶ ᬫᬬ᭄ᬳᬂ ᬇᬫᬾᬳᬶ ᬓᬶᬜ᭄ᬘᬶ ᬅᬢᬶᬭᬾᬓᬂ ᬦᬢ᭄ᬣᬶ. ᬳᬦ᭄ᬤᬵᬢᬶ ᬯᬯᬲ᭄ᬲᬕ᭄ᬕᬢ᭄ᬣᬾ ᬦᬶᬧᬵᬢᭀ. ᬅᬢᬶᬭᬾᬓᬵᬬᬵᬢᬶ ᬯᬶᬲᬾᬲᬓᬵᬭᬡᬢ᭄ᬣᬵᬬ ᬧᬝᬶᬧᬚ᭄ᬚᬵᬫᬷᬢᬶ ᬅᬢ᭄ᬣᭀ. ᬲᬷᬮᬾᬲᬸ ᬧᬭᬶᬧᬹᬭᬓᬵᬭᬶᬂ ᬥᬵᬭᬾᬣᬵᬢᬶ ᬧᬜ᭄ᬘᬲᬸ ᬲᬷᬮᬾᬲᬸ ᬲᬫᬢ᭄ᬢᬓᬵᬭᬷᬢᬶ ᬚᬵᬦᬵᬣ. ᬏᬢ᭄ᬢᬵᬯᬢᬵ ᬢᬾᬦ ᬧᬜ᭄ᬘ ᬲᬷᬮᬵᬦᬶ ᬲᬫᬵᬤᬶᬦ᭄ᬦᬵᬦᬶ ᬦᬵᬫ ᬳᭀᬦ᭄ᬢᬶ. ᬓᬶᬫᬗ᭄ᬕ ᬧᬦ ᬦ ᬫᬬᬦ᭄ᬢᬶ ᬫᬬᬂ ᬧᬦ ᬓᬾᬦᬾᬯ ᬓᬵᬭᬡᬾᬦ ᬧᬭᬶᬧᬹᬭᬓᬵᬭᬶᬦᭀ ᬦ ᬪᬯᬶᬲ᭄ᬲᬵᬫ. ᬲᬾᬲᬫᬾᬢ᭄ᬣ ᬉᬢ᭄ᬢᬵᬦᬫᬾᬯᬵᬢᬶ.

ᬉᬧᬵᬲᬓᬯᬕ᭄ᬕᭀ ᬢᬢᬶᬬᭀ.

(᭑᭙) ᭔. ᬅᬭᬜ᭄ᬜᬯᬕ᭄ᬕᭀ

᭑. ᬆᬭᬜ᭄ᬜᬶᬓᬲᬸᬢ᭄ᬢᬯᬡ᭄ᬡᬦᬵ

᭑᭘᭑. ᬘᬢᬸᬢ᭄ᬣᬲ᭄ᬲ ᬧᬞᬫᬾ ᬫᬦ᭄ᬤᬢ᭄ᬢᬵ ᬫᭀᬫᬹᬳᬢ᭄ᬢᬵᬢᬶ ᬦᬾᬯ ᬲᬫᬵᬤᬵᬦᬂ ᬚᬵᬦᬵᬢᬶ, ᬦ ᬆᬦᬶᬲᬂᬲᬂ. ᬅᬢ᭄ᬢᬦᭀ ᬧᬦ ᬫᬦ᭄ᬤᬢ᭄ᬢᬵ ᬫᭀᬫᬹᬳᬢ᭄ᬢᬵ ᬅᬜ᭄ᬜᬵᬡᬾᬦᬾᬯ ᬆᬭᬜ᭄ᬜᬓᭀ ᬳᭀᬢᬶ. ᬧᬵᬧᬶᬘ᭄ᬙᭀ ᬇᬘ᭄ᬙᬵᬧᬓᬢᭀᬢᬶ ‘‘ᬅᬭᬜ᭄ᬜᬾ ᬫᬾ ᬯᬶᬳᬭᬦ᭄ᬢᬲ᭄ᬲ ‘ᬅᬬᬂ ᬆᬭᬜ᭄ᬜᬓᭀ’ᬢᬶ ᬘᬢᬸᬧᬘ᭄ᬘᬬᬲᬓ᭄ᬓᬵᬭᬂ ᬓᬭᬶᬲ᭄ᬲᬦ᭄ᬢᬶ, ‘ᬅᬬᬂ ᬪᬶᬓ᭄ᬔᬸ ᬮᬚ᭄ᬚᬷ ᬧᬯᬶᬯᬶᬢ᭄ᬢᭀ’ᬢᬶᬆᬤᬷᬳᬶ ᬘ ᬕᬸᬡᬾᬳᬶ ᬲᬫ᭄ᬪᬵᬯᬾᬲ᭄ᬲᬦ᭄ᬢᬷ’’ᬢᬶ ᬏᬯᬂ ᬧᬵᬧᬶᬓᬵᬬ ᬇᬘ᭄ᬙᬵᬬ ᬞᬢ᭄ᬯᬵ ᬢᬵᬬ ᬏᬯ ᬇᬘ᭄ᬙᬵᬬ ᬅᬪᬶᬪᬹᬢᭀ ᬳᬸᬢ᭄ᬯᬵ ᬆᬭᬜ᭄ᬜᬓᭀ ᬳᭀᬢᬶ. ᬉᬫ᭄ᬫᬵᬤᬯᬲᬾᬦ ᬅᬭᬜ᭄ᬜᬂ ᬧᬯᬶᬲᬶᬢ᭄ᬯᬵ ᬯᬶᬳᬭᬦ᭄ᬢᭀ ᬧᬦ ᬉᬫ᭄ᬫᬵᬤᬵ ᬘᬶᬢ᭄ᬢᬓ᭄ᬔᬾᬧᬵ ᬆᬭᬜ᭄ᬜᬓᭀ ᬦᬵᬫ ᬳᭀᬢᬶ. ᬯᬡ᭄ᬡᬶᬢᬦ᭄ᬢᬶ ᬇᬤᬂ ᬆᬭᬜ᭄ᬜᬓᬗ᭄ᬕᬂ ᬦᬵᬫ ᬩᬸᬤ᭄ᬥᬾᬳᬶ ᬘ ᬩᬸᬤ᭄ᬥᬲᬵᬯᬓᬾᬳᬶ ᬘ ᬯᬡ᭄ᬡᬶᬢᬂ ᬧᬲᬢ᭄ᬣᬦ᭄ᬢᬶ ᬆᬭᬜ᭄ᬜᬓᭀ ᬳᭀᬢᬶ. ᬇᬤᬫᬢ᭄ᬣᬶᬢᬦ᭄ᬢᬶ ᬇᬫᬵᬬ ᬓᬮ᭄ᬬᬵᬡᬵᬬ ᬧᬝᬶᬧᬢ᭄ᬢᬶᬬᬵ ᬅᬢ᭄ᬣᭀ ᬏᬢᬲ᭄ᬲᬵᬢᬶ ᬇᬤᬫᬢ᭄ᬣᬷ, ᬇᬤᬫᬢ᭄ᬣᬶᬦᭀ ᬪᬵᬯᭀ ᬇᬤᬫᬢ᭄ᬣᬶᬢᬵ. ᬢᬂ ᬇᬤᬫᬢ᭄ᬣᬶᬢᬂᬬᬾᬯ ᬦᬶᬲ᭄ᬲᬵᬬ, ᬦ ᬅᬜ᭄ᬜᬂ ᬓᬶᬜ᭄ᬘᬶ ᬮᭀᬓᬵᬫᬶᬲᬦ᭄ᬢᬶ ᬅᬢ᭄ᬣᭀ. ᬲᬾᬲᬫᬾᬢ᭄ᬣ ᬇᬢᭀ ᬧᬭᬾᬲᬸ ᬘ ᬉᬢ᭄ᬢᬵᬦᬢ᭄ᬣᬫᬾᬯ.

ᬅᬭᬜ᭄ᬜᬯᬕ᭄ᬕᭀ ᬘᬢᬸᬢ᭄ᬣᭀ.

(᭒᭐) ᭕. ᬩ᭄ᬭᬵᬳ᭄ᬫᬡᬯᬕ᭄ᬕᭀ

᭑. ᬲᭀᬡᬲᬸᬢ᭄ᬢᬯᬡ᭄ᬡᬦᬵ

᭑᭙᭑. ᬧᬜ᭄ᬘᬫᬲ᭄ᬲ ᬧᬞᬫᬾ ᬩ᭄ᬭᬵᬳ᭄ᬫᬡᬥᬫ᭄ᬫᬵᬢᬶ ᬩ᭄ᬭᬵᬳ᭄ᬫᬡᬲᬪᬵᬯᬵ. ᬲᬸᬦᬔᬾᬲᬹᬢᬶ ᬓᬸᬓ᭄ᬓᬸᬭᬾᬲᬸ. ᬦᬾᬯ ᬓᬶᬡᬦ᭄ᬢᬶ ᬦ ᬯᬶᬓ᭄ᬓᬶᬡᬦ᭄ᬢᬷᬢᬶ ᬦ ᬕᬡ᭄ᬳᬦ᭄ᬢᬵ ᬓᬶᬡᬦ᭄ᬢᬶ, ᬦ ᬤᬤᬦ᭄ᬢᬵ ᬯᬶᬓ᭄ᬓᬶᬡᬦ᭄ᬢᬶ. ᬲᬫ᭄ᬧᬶᬬᬾᬦᬾᬯ ᬲᬂᬯᬵᬲᬂ ᬲᬂᬩᬦ᭄ᬥᬵᬬ ᬲᬫ᭄ᬧᬯᬢ᭄ᬢᬾᬦ᭄ᬢᬷᬢᬶ ᬧᬶᬬᭀ ᬧᬶᬬᬂ ᬉᬧᬲᬗ᭄ᬓᬫᬶᬢ᭄ᬯᬵ ᬧᬯᬾᬡᬶᬬᬵ ᬩᬦ᭄ᬥᬦᬢ᭄ᬣᬂ ᬲᬂᬯᬵᬲᬂ ᬧᬯᬢ᭄ᬢᬬᬦ᭄ᬢᬶ. ᬉᬤᬭᬵᬯᬤᬾᬳᬓᬦ᭄ᬢᬶ ᬉᬤᬭᬂ ᬅᬯᬤᬶᬳᬶᬢ᭄ᬯᬵ ᬉᬧᬘᬶᬦᬶᬢ᭄ᬯᬵ ᬧᬹᬭᬾᬢ᭄ᬯᬵ. ᬅᬯᬲᬾᬲᬂ ᬆᬤᬵᬬ ᬧᬓ᭄ᬓᬫᬦ᭄ᬢᬷᬢᬶ ᬬᬂ ᬪᬸᬜ᭄ᬚᬶᬢᬸᬂ ᬦ ᬲᬓ᭄ᬓᭀᬦ᭄ᬢᬶ, ᬢᬂ ᬪᬡ᭄ᬟᬶᬓᬂ ᬓᬢ᭄ᬯᬵ ᬕᬳᬾᬢ᭄ᬯᬵ ᬕᬘ᭄ᬙᬦ᭄ᬢᬶ. ᬇᬫᬲ᭄ᬫᬶᬂ ᬲᬸᬢ᭄ᬢᬾ ᬯᬝ᭄ᬝᬫᬾᬯ ᬓᬣᬶᬢᬂ.

᭒. ᬤᭀᬡᬩ᭄ᬭᬵᬳ᭄ᬫᬡᬲᬸᬢ᭄ᬢᬯᬡ᭄ᬡᬦᬵ

᭑᭙᭒. ᬤᬸᬢᬶᬬᬾ ᬢ᭄ᬯᬫ᭄ᬧᬶ ᬦᭀᬢᬶ ᬢ᭄ᬯᬫ᭄ᬧᬶ ᬦᬸ. ᬧᬯᬢ᭄ᬢᬵᬭᭀᬢᬶ ᬧᬯᬢ᭄ᬢᬬᬶᬢᬵᬭᭀ. ᬬᬾᬲᬦ᭄ᬢᬶ ᬬᬾᬲᬂ ᬲᬦ᭄ᬢᬓᬂ. ᬫᬦ᭄ᬢᬧᬤᬦ᭄ᬢᬶ ᬯᬾᬤᬲᬗ᭄ᬔᬵᬢᬂ ᬫᬦ᭄ᬢᬫᬾᬯ. ᬕᬷᬢᬦ᭄ᬢᬶ ᬅᬝ᭄ᬞᬓᬵᬤᬷᬳᬶ ᬤᬲᬳᬶ ᬧᭀᬭᬵᬡᬓᬩ᭄ᬭᬵᬳ᭄ᬫᬡᬾᬳᬶ ᬲᬭᬲᬫ᭄ᬧᬢ᭄ᬢᬶᬯᬲᬾᬦ ᬲᬚ᭄ᬛᬵᬬᬶᬢᬂ. ᬧᬯᬸᬢ᭄ᬢᬦ᭄ᬢᬶ ᬅᬜ᭄ᬜᬾᬲᬂ ᬯᬸᬢ᭄ᬢᬂ, ᬯᬵᬘᬶᬢᬦ᭄ᬢᬶ ᬅᬢ᭄ᬣᭀ. ᬲᬫᬷᬳᬶᬢᬦ᭄ᬢᬶ ᬲᬫᬸᬧᬩ᭄ᬬᬹᬮ᬴᭄ᬳᬂ ᬭᬵᬲᬶᬓᬢᬂ, ᬧᬶᬡ᭄ᬟᬂ ᬓᬢ᭄ᬯᬵ ᬞᬧᬶᬢᬦ᭄ᬢᬶ ᬅᬢ᭄ᬣᭀ. ᬢᬤᬦᬸᬕᬵᬬᬦ᭄ᬢᬷᬢᬶ ᬏᬢᬭᬳᬶ ᬩ᭄ᬭᬵᬳ᭄ᬫᬡᬵ ᬢᬂ ᬢᬾᬳᬶ ᬧᬸᬩ᭄ᬩᬾᬳᬶ ᬕᬷᬢᬂ ᬅᬦᬸᬕᬵᬬᬦ᭄ᬢᬶ ᬅᬦᬸᬲᬚ᭄ᬛᬵᬬᬦ᭄ᬢᬶ. ᬢᬤᬦᬸᬪᬵᬲᬦ᭄ᬢᬷᬢᬶ ᬢᬂ ᬅᬦᬸᬪᬵᬲᬦ᭄ᬢᬶ. ᬇᬤᬂ ᬧᬸᬭᬶᬫᬲ᭄ᬲᬾᬯ ᬯᬾᬯᬘᬦᬂ. ᬪᬵᬲᬶᬢᬫᬦᬸᬪᬵᬲᬦ᭄ᬢᬷᬢᬶ ᬢᬾᬳᬶ ᬪᬵᬲᬶᬢᬂ ᬅᬦᬸᬪᬵᬲᬦ᭄ᬢᬶ. ᬲᬚ᭄ᬛᬵᬬᬶᬢᬫᬦᬸᬲᬚ᭄ᬛᬵᬬᬦ᭄ᬢᬷᬢᬶ ᬢᬾᬳᬶ ᬲᬚ᭄ᬛᬵᬬᬶᬢᬂ ᬅᬦᬸᬲᬚ᭄ᬛᬵᬬᬦ᭄ᬢᬶ. ᬯᬵᬘᬶᬢᬫᬦᬸᬯᬵᬘᬾᬦ᭄ᬢᬷᬢᬶ ᬢᬾᬳᬶ ᬅᬜ᭄ᬜᬾᬲᬂ ᬯᬵᬘᬶᬢᬂ ᬅᬦᬸᬯᬵᬘᬾᬦ᭄ᬢᬶ. ᬲᬾᬬ᭄ᬬᬣᬶᬤᬦ᭄ᬢᬶ ᬢᬾ ᬓᬢᬫᬾᬢᬶ ᬅᬢ᭄ᬣᭀ. ᬅᬝ᭄ᬞᬓᭀᬢᬶᬆᬤᬷᬦᬶ ᬢᬾᬲᬂ ᬦᬵᬫᬵᬦᬶ. ᬢᬾ ᬓᬶᬭ ᬤᬶᬩ᭄ᬩᬾᬦ ᬘᬓ᭄ᬔᬸᬦᬵ ᬑᬮᭀᬓᬾᬢ᭄ᬯᬵ ᬧᬭᬹᬧᬖᬵᬢᬂ ᬅᬓᬢ᭄ᬯᬵ ᬓᬲ᭄ᬲᬧᬲᬫ᭄ᬫᬵᬲᬫ᭄ᬩᬸᬤ᭄ᬥᬲ᭄ᬲ ᬪᬕᬯᬢᭀ ᬧᬵᬯᬘᬦᬾᬦ ᬲᬳ ᬲᬂᬲᬦ᭄ᬤᬾᬢ᭄ᬯᬵ ᬫᬦ᭄ᬢᬾ ᬕᬦ᭄ᬣᬾᬲᬸᬂ. ᬅᬧᬭᬵᬧᬭᬾ ᬧᬦ ᬩ᭄ᬭᬵᬳ᭄ᬫᬡᬵ ᬧᬵᬡᬵᬢᬶᬧᬵᬢᬵᬤᬷᬦᬶ ᬧᬓ᭄ᬔᬶᬧᬶᬢ᭄ᬯᬵ ᬢᬬᭀ ᬯᬾᬤᬾ ᬪᬶᬦ᭄ᬤᬶᬢ᭄ᬯᬵ ᬩᬸᬤ᭄ᬥᬯᬘᬦᬾᬦ ᬲᬤ᭄ᬥᬶᬂ ᬯᬶᬭᬸᬤ᭄ᬥᬾ ᬅᬓᬂᬲᬸ. ᬢ᭄ᬬᬵᬲ᭄ᬲᬸ’ᬫᬾᬢᬶ ᬏᬢ᭄ᬣ ᬅᬲ᭄ᬲᬹᬢᬶ ᬦᬶᬧᬵᬢᬫᬢ᭄ᬢᬂ, ᬢᬾ ᬩ᭄ᬭᬵᬳ᭄ᬫᬡᬵ ᬇᬫᬾ ᬧᬜ᭄ᬘ ᬩ᭄ᬭᬵᬳ᭄ᬫᬡᬾ ᬧᬜ᭄ᬜᬵᬧᬾᬦ᭄ᬢᬷᬢᬶ ᬅᬢ᭄ᬣᭀ.

ᬫᬦ᭄ᬢᬾ ᬅᬥᬷᬬᬫᬵᬦᭀᬢᬶ ᬯᬾᬤᬾ ᬲᬚ᭄ᬛᬵᬬᬦ᭄ᬢᭀ ᬕᬡ᭄ᬳᬦ᭄ᬢᭀ. ᬆᬘᬭᬶᬬᬥᬦᬦ᭄ᬢᬶ ᬆᬘᬭᬶᬬᬤᬓ᭄ᬔᬶᬡᬂ ᬆᬘᬭᬶᬬᬪᬵᬕᬂ. ᬦ ᬇᬲ᭄ᬲᬢ᭄ᬣᬾᬦᬵᬢᬶ ᬦ ᬬᭀᬥᬵᬚᬷᬯᬓᬫ᭄ᬫᬾᬦ ᬉᬧ᭄ᬧᬵᬤᬾᬢᬶ. ᬦ ᬭᬵᬚᬧᭀᬭᬶᬲᬾᬦᬵᬢᬶ ᬦ ᬭᬵᬚᬸᬧᬝ᭄ᬞᬵᬓᬪᬵᬯᬾᬦ. ᬓᬾᬯᬮᬂ ᬪᬶᬓ᭄ᬔᬵᬘᬭᬶᬬᬵᬬᬵᬢᬶ ᬲᬸᬤ᭄ᬥᬵᬬ ᬪᬶᬓ᭄ᬔᬵᬘᬭᬶᬬᬵᬬ ᬏᬯ. ᬓᬧᬵᬮᬂ ᬅᬦᬢᬶᬫᬜ᭄ᬜᬫᬵᬦᭀᬢᬶ ᬢᬂ ᬪᬶᬓ᭄ᬔᬵᬪᬵᬚᬦᬂ ᬅᬦᬢᬶᬫᬜ᭄ᬜᬫᬵᬦᭀ. ᬲᭀ ᬳᬶ ᬧᬸᬡ᭄ᬡᬧᬢ᭄ᬢᬂ ᬆᬤᬵᬬ ᬲᬷᬲᬂ ᬦ᭄ᬳᬵᬢᭀ ᬓᬸᬮᬤ᭄ᬯᬵᬭᬾᬲᬸ ᬞᬢ᭄ᬯᬵ ‘‘ᬅᬳᬂ ᬅᬝ᭄ᬞᬘᬢ᭄ᬢᬵᬮᬷᬲ ᬯᬲ᭄ᬲᬵᬦᬶ ᬓᭀᬫᬵᬭᬩ᭄ᬭᬳ᭄ᬫᬘᬭᬶᬬᬂ ᬘᬭᬶᬂ, ᬫᬦ᭄ᬢᬵᬧᬶ ᬫᬾ ᬕᬳᬶᬢᬵ, ᬆᬘᬭᬶᬬᬲ᭄ᬲ ᬆᬘᬭᬶᬬᬥᬦᬂ ᬤᬲ᭄ᬲᬵᬫᬶ, ᬥᬦᬂ ᬫᬾ ᬤᬾᬣᬵ’’ᬢᬶ ᬬᬵᬘᬢᬶ. ᬢᬂ ᬲᬸᬢ᭄ᬯᬵ ᬫᬦᬸᬲ᭄ᬲᬵ ᬬᬣᬵᬲᬢ᭄ᬢᬶ ᬬᬣᬵᬩᬮᬂ ᬅᬝ᭄ᬞᬧᬶ ᬲᭀᬮ᬴ᬲᬧᬶ ᬲᬢᬫ᭄ᬧᬶ ᬲᬳᬲ᭄ᬲᬫ᭄ᬧᬶ ᬤᬾᬦ᭄ᬢᬶ. ᬏᬯᬂ ᬲᬓᬮᬕᬵᬫᬂ ᬘᬭᬶᬢ᭄ᬯᬵ ᬮᬤ᭄ᬥᬥᬦᬂ ᬆᬘᬭᬶᬬᬲ᭄ᬲ ᬦᬶᬬ᭄ᬬᬵᬤᬾᬢᬶ. ᬢᬂ ᬲᬦ᭄ᬥᬵᬬᬾᬢᬂ ᬯᬸᬢ᭄ᬢᬂ. ᬏᬯᬂ ᬔᭀ ᬤᭀᬡ ᬩ᭄ᬭᬵᬳ᭄ᬫᬡᭀ ᬩ᭄ᬭᬳ᭄ᬫᬲᬫᭀ ᬳᭀᬢᬷᬢᬶ ᬏᬯᬂ ᬩ᭄ᬭᬳ᭄ᬫᬯᬶᬳᬵᬭᬾᬳᬶ ᬲᬫᬦ᭄ᬦᬵᬕᬢᬢ᭄ᬢᬵ ᬩ᭄ᬭᬵᬳ᭄ᬫᬡᭀ ᬩ᭄ᬭᬳ᭄ᬫᬲᬫᭀ ᬦᬵᬫ ᬳᭀᬢᬶ.

ᬦᬾᬯ ᬓᬬᬾᬦ ᬦ ᬯᬶᬓ᭄ᬓᬬᬾᬦᬵᬢᬶ ᬦᬾᬯ ᬅᬢ᭄ᬢᬦᬵ ᬓᬬᬂ ᬓᬢ᭄ᬯᬵ ᬕᬡ᭄ᬳᬵᬢᬶ, ᬦ ᬧᬭᬾᬦ ᬯᬶᬓ᭄ᬓᬬᬂ ᬓᬢ᭄ᬯᬵ ᬤᬶᬦ᭄ᬦᬂ. ᬉᬤᬓᬹᬧᬲ᭄ᬲᬝ᭄ᬞᬦ᭄ᬢᬶ ᬉᬤᬓᬾᬦ ᬉᬧᬲ᭄ᬲᬝ᭄ᬞᬂ ᬧᬭᬶᬘ᭄ᬘᬢ᭄ᬢᬂ. ᬲᭀ ᬳᬶ ᬬᬲ᭄ᬫᬶᬂ ᬓᬸᬮᬾ ᬯᬬᬧ᭄ᬧᬢ᭄ᬢᬵ ᬤᬵᬭᬶᬓᬵ ᬅᬢ᭄ᬣᬶ, ᬕᬦ᭄ᬢ᭄ᬯᬵ ᬢᬲ᭄ᬲ ᬤ᭄ᬯᬵᬭᬾ ᬢᬶᬝ᭄ᬞᬢᬶ. ‘‘ᬓᬲ᭄ᬫᬵ ᬞᬶᬢᭀᬲᬷ’’ᬢᬶ ᬯᬸᬢ᭄ᬢᬾ ‘‘ᬅᬳᬂ ᬅᬝ᭄ᬞᬘᬢ᭄ᬢᬵᬮᬷᬲ ᬯᬲ᭄ᬲᬵᬦᬶ ᬓᭀᬫᬵᬭᬩ᭄ᬭᬳ᭄ᬫᬘᬭᬶᬬᬂ ᬘᬭᬶᬂ, ᬢᬂ ᬲᬩ᭄ᬩᬂ ᬢᬸᬫ᭄ᬳᬵᬓᬂ ᬤᬾᬫᬶ, ᬢᬸᬫ᭄ᬳᬾ ᬫᬬ᭄ᬳᬂ ᬤᬵᬭᬶᬓᬂ ᬤᬾᬣᬵ’’ᬢᬶ ᬯᬤᬢᬶ. ᬢᬾ ᬤᬵᬭᬶᬓᬂ ᬆᬦᬾᬢ᭄ᬯᬵ ᬢᬲ᭄ᬲ ᬳᬢ᭄ᬣᬾ ᬉᬤᬓᬂ ᬧᬵᬢᬾᬢ᭄ᬯᬵ ᬤᬾᬦ᭄ᬢᬶ. ᬲᭀ ᬢᬂ ᬉᬤᬓᬹᬧᬲ᭄ᬲᬝ᭄ᬞᬂ ᬪᬭᬶᬬᬂ ᬕᬡ᭄ᬳᬶᬢ᭄ᬯᬵ ᬕᬘ᭄ᬙᬢᬶ. ᬅᬢᬶᬫᬷᬮ᬴᭄ᬳᬚᭀᬢᬶ ᬅᬢᬶᬫᬷᬮ᬴᭄ᬳᬾ ᬫᬳᬵᬕᬹᬣᬭᬵᬲᬶᬫ᭄ᬳᬶ ᬚᬵᬢᭀ. ᬢᬲ᭄ᬲ ᬲᬵᬢᬶ ᬢᬲ᭄ᬲ ᬏᬲᬵ. ᬦ ᬤᬯᬢ᭄ᬣᬵᬢᬶ ᬦ ᬓᬷᬮ᬴ᬦᬢ᭄ᬣᬵ. ᬦ ᬭᬢᬢ᭄ᬣᬵᬢᬶ ᬦ ᬓᬵᬫᬭᬢᬶᬅᬢ᭄ᬣᬵ. ᬫᬾᬣᬸᬦᬂ ᬉᬧ᭄ᬧᬵᬤᬾᬢ᭄ᬯᬵᬢᬶ ᬥᬷᬢᬭᬂ ᬯᬵ ᬧᬸᬢ᭄ᬢᬂ ᬯᬵ ᬉᬧ᭄ᬧᬵᬤᬾᬢ᭄ᬯᬵ ‘‘ᬇᬤᬵᬦᬶ ᬧᬯᬾᬡᬶ ᬖᬝᬷᬬᬶᬲ᭄ᬲᬢᬷ’’ᬢᬶ ᬦᬶᬓ᭄ᬔᬫᬶᬢ᭄ᬯᬵ ᬧᬩ᭄ᬩᬚᬢᬶ. ᬲᬸᬕᬢᬶᬂ ᬲᬕ᭄ᬕᬂ ᬮᭀᬓᬦ᭄ᬢᬶ ᬩ᭄ᬭᬳ᭄ᬫᬮᭀᬓᬫᬾᬯ ᬲᬦ᭄ᬥᬵᬬᬾᬢᬂ ᬯᬸᬢ᭄ᬢᬂ. ᬤᬾᬯᬲᬫᭀ ᬳᭀᬢᬷᬢᬶ ᬤᬶᬩ᭄ᬩᬯᬶᬳᬵᬭᬾᬳᬶ ᬲᬫᬦ᭄ᬦᬵᬕᬢᬢ᭄ᬢᬵ ᬤᬾᬯᬲᬫᭀ ᬦᬵᬫ ᬳᭀᬢᬶ.

ᬢᬫᬾᬯ ᬧᬸᬢ᭄ᬢᬲ᭄ᬲᬵᬤᬂ ᬦᬶᬓᬵᬫᬬᬫᬵᬦᭀᬢᬶ ᬬ᭄ᬯᬵᬲ᭄ᬲ ᬥᬷᬢᬭᬂ ᬯᬵ ᬧᬸᬢ᭄ᬢᬂ ᬯᬵ ᬚᬵᬢᬂ ᬤᬶᬲ᭄ᬯᬵ ᬧᬸᬢ᭄ᬢᬧᬾᬫᬂ ᬧᬸᬢ᭄ᬢᬲ᭄ᬲᬵᬤᭀ ᬉᬧ᭄ᬧᬚ᭄ᬚᬢᬶ, ᬢᬂ ᬧᬢ᭄ᬣᬬᬫᬵᬦᭀ ᬇᬘ᭄ᬙᬫᬵᬦᭀ. ᬓᬸᬝᬸᬫ᭄ᬩᬂ ᬅᬚ᭄ᬛᬵᬯᬲᬢᬷᬢᬶ ᬓᬸᬝᬸᬫ᭄ᬩᬂ ᬲᬡ᭄ᬞᬧᬾᬢ᭄ᬯᬵ ᬓᬸᬝᬸᬫ᭄ᬩᬫᬚ᭄ᬛᬾ ᬯᬲᬢᬶ. ᬲᬾᬲᬫᬾᬢ᭄ᬣ ᬉᬢ᭄ᬢᬵᬦᬫᬾᬯᬵᬢᬶ.

᭓. ᬲᬗ᭄ᬕᬵᬭᬯᬲᬸᬢ᭄ᬢᬯᬡ᭄ᬡᬦᬵ

᭑᭙᭓. ᬢᬢᬶᬬᬾ ᬧᬕᬾᬯᬵᬢᬶ ᬧᬞᬫᬜ᭄ᬜᬾᬯ. ᬓᬵᬫᬭᬵᬕᬧᬭᬶᬬᬸᬝ᭄ᬞᬶᬢᬾᬦᬵᬢᬶ ᬓᬵᬫᬭᬵᬕᬕ᭄ᬕᬳᬶᬢᬾᬦ. ᬓᬵᬫᬭᬵᬕᬧᬭᬾᬢᬾᬦᬵᬢᬶ ᬓᬵᬫᬭᬵᬕᬵᬦᬸᬕᬢᬾᬦ. ᬦᬶᬲ᭄ᬲᬭᬡᬦ᭄ᬢᬶ ᬢᬶᬯᬶᬥᬂ ᬓᬵᬫᬭᬵᬕᬲ᭄ᬲ ᬦᬶᬲ᭄ᬲᬭᬡᬂ ᬯᬶᬓ᭄ᬔᬫ᭄ᬪᬦᬦᬶᬲ᭄ᬲᬭᬡᬂ, ᬢᬤᬗ᭄ᬕᬦᬶᬲ᭄ᬲᬭᬡᬂ, ᬲᬫᬸᬘ᭄ᬙᬾᬤᬦᬶᬲ᭄ᬲᬭᬡᬦ᭄ᬢᬶ. ᬢᬢ᭄ᬣ ᬅᬲᬸᬪᬾ ᬧᬞᬫᬚ᭄ᬛᬵᬦᬂ ᬯᬶᬓ᭄ᬔᬫ᭄ᬪᬦᬦᬶᬲ᭄ᬲᬭᬡᬂ ᬦᬵᬫ, ᬯᬶᬧᬲ᭄ᬲᬦᬵ ᬢᬤᬗ᭄ᬕᬦᬶᬲ᭄ᬲᬭᬡᬂ ᬦᬵᬫ, ᬅᬭᬳᬢ᭄ᬢᬫᬕ᭄ᬕᭀ ᬲᬫᬸᬘ᭄ᬙᬾᬤᬦᬶᬲ᭄ᬲᬭᬡᬂ ᬦᬵᬫ. ᬢᬂ ᬢᬶᬯᬶᬥᬫ᭄ᬧᬶ ᬦᬧ᭄ᬧᬚᬵᬦᬵᬢᬷᬢᬶ ᬅᬢ᭄ᬣᭀ. ᬅᬢ᭄ᬢᬢ᭄ᬣᬫ᭄ᬧᬷᬢᬶᬆᬤᬷᬲᬸ ᬅᬭᬳᬢ᭄ᬢᬲᬗ᭄ᬔᬵᬢᭀ ᬅᬢ᭄ᬢᬦᭀ ᬅᬢ᭄ᬣᭀ ᬅᬢ᭄ᬢᬢ᭄ᬣᭀ ᬦᬵᬫ, ᬧᬘ᭄ᬘᬬᬤᬵᬬᬓᬵᬦᬂ ᬅᬢ᭄ᬣᭀ ᬧᬭᬢ᭄ᬣᭀ ᬦᬵᬫ, ᬲ᭄ᬯᬾᬯ ᬤᬸᬯᬶᬥᭀ ᬉᬪᬬᬢ᭄ᬣᭀ ᬦᬵᬫ. ᬇᬫᬶᬦᬵ ᬦᬬᬾᬦ ᬲᬩ᭄ᬩᬯᬵᬭᬾᬲᬸ ᬅᬢ᭄ᬣᭀ ᬯᬾᬤᬶᬢᬩ᭄ᬩᭀ.

ᬅᬬᬂ ᬧᬦ ᬯᬶᬲᬾᬲᭀ – ᬩ᭄ᬬᬵᬧᬵᬤᬲ᭄ᬲ ᬦᬶᬲ᭄ᬲᬭᬡᬦ᭄ᬢᬶᬆᬤᬷᬲᬸ ᬳᬶ ᬤ᭄ᬯᬾᬯ ᬦᬶᬲ᭄ᬲᬭᬡᬵᬦᬶ ᬯᬶᬓ᭄ᬔᬫ᭄ᬪᬦᬦᬶᬲ᭄ᬲᬭᬡᬜ᭄ᬘ ᬲᬫᬸᬘ᭄ᬙᬾᬤᬦᬶᬲ᭄ᬲᬭᬡᬜ᭄ᬘ. ᬢᬢ᭄ᬣ ᬩ᭄ᬬᬵᬧᬵᬤᬲ᭄ᬲ ᬢᬵᬯ ᬫᬾᬢ᭄ᬢᬵᬬ ᬧᬞᬫᬚ᭄ᬛᬵᬦᬂ ᬯᬶᬓ᭄ᬔᬫ᭄ᬪᬦᬦᬶᬲ᭄ᬲᬭᬡᬂ ᬦᬵᬫ, ᬅᬦᬵᬕᬵᬫᬶᬫᬕ᭄ᬕᭀ ᬲᬫᬸᬘ᭄ᬙᬾᬤᬦᬶᬲ᭄ᬲᬭᬡᬂ, ᬣᬶᬦᬫᬶᬤ᭄ᬥᬲ᭄ᬲ ᬆᬮᭀᬓᬲᬜ᭄ᬜᬵ ᬯᬶᬓ᭄ᬔᬫ᭄ᬪᬦᬦᬶᬲ᭄ᬲᬭᬡᬂ, ᬅᬭᬳᬢ᭄ᬢᬫᬕ᭄ᬕᭀ ᬲᬫᬸᬘ᭄ᬙᬾᬤᬦᬶᬲ᭄ᬲᬭᬡᬂ. ᬉᬤ᭄ᬥᬘ᭄ᬘᬓᬸᬓ᭄ᬓᬸᬘ᭄ᬘᬲ᭄ᬲ ᬬᭀ ᬓᭀᬘᬶ ᬲᬫᬣᭀ ᬯᬶᬓ᭄ᬔᬫ᭄ᬪᬦᬦᬶᬲ᭄ᬲᬭᬡᬂ, ᬉᬤ᭄ᬥᬘ᭄ᬘᬲ᭄ᬲ ᬧᬦᬾᬢ᭄ᬣ ᬅᬭᬳᬢ᭄ᬢᬫᬕ᭄ᬕᭀ, ᬓᬸᬓ᭄ᬓᬸᬘ᭄ᬘᬲ᭄ᬲ ᬅᬦᬵᬕᬵᬫᬶᬫᬕ᭄ᬕᭀ ᬲᬫᬸᬘ᭄ᬙᬾᬤᬦᬶᬲ᭄ᬲᬭᬡᬂ. ᬯᬶᬘᬶᬓᬶᬘ᭄ᬙᬵᬬ ᬥᬫ᭄ᬫᬯᬯᬢ᭄ᬣᬵᬦᬂ ᬯᬶᬓ᭄ᬔᬫ᭄ᬪᬦᬦᬶᬲ᭄ᬲᬭᬡᬂ, ᬧᬞᬫᬫᬕ᭄ᬕᭀ ᬲᬫᬸᬘ᭄ᬙᬾᬤᬦᬶᬲ᭄ᬲᬭᬡᬂ.

ᬬᬵ ᬧᬦᬾᬢ᭄ᬣ ᬲᬾᬬ᭄ᬬᬣᬵᬧᬶ, ᬩ᭄ᬭᬵᬳ᭄ᬫᬡ, ᬉᬤᬧᬢ᭄ᬢᭀ ᬲᬂᬲᬝ᭄ᬞᭀ ᬮᬵᬔᬵᬬ ᬯᬵᬢᬶᬆᬤᬶᬓᬵ ᬉᬧᬫᬵ ᬯᬸᬢ᭄ᬢᬵ, ᬢᬵᬲᬸ ᬉᬤᬧᬢ᭄ᬢᭀᬢᬶ ᬉᬤᬓᬪᬭᬶᬢᬵ ᬧᬵᬢᬶ. ᬲᬂᬲᬝ᭄ᬞᭀᬢᬶ ᬯᬡ᭄ᬡᬪᬾᬤᬓᬭᬡᬯᬲᬾᬦ ᬲᬂᬲᬝ᭄ᬞᭀ. ᬉᬓ᭄ᬓᬸᬥᬶᬢᭀᬢᬶ ᬓᬸᬥᬶᬢᭀ. ᬉᬲ᭄ᬲᬤᬓᬚᬵᬢᭀᬢᬶ ᬉᬲᬸᬫᬓᬚᬵᬢᭀ. ᬲᬾᬯᬵᬮᬧᬡᬓᬧᬭᬶᬬᭀᬦᬤ᭄ᬥᭀᬢᬶ ᬢᬶᬮᬩᬷᬚᬓᬵᬤᬶᬪᬾᬤᬾᬦ ᬲᬾᬯᬵᬮᬾᬦ ᬯᬵ ᬦᬷᬮᬫᬡ᭄ᬟᬹᬓᬧᬶᬝ᭄ᬞᬶᬯᬡ᭄ᬡᬾᬦ ᬯᬵ ᬉᬤᬓᬧᬶᬝ᭄ᬞᬶᬂ ᬙᬵᬤᬾᬢ᭄ᬯᬵ ᬦᬶᬩ᭄ᬩᬢ᭄ᬢᬾᬦ ᬧᬡᬓᬾᬦ ᬧᬭᬶᬬᭀᬦᬤ᭄ᬥᭀ. ᬯᬵᬢᬾᬭᬶᬢᭀᬢᬶ ᬯᬵᬢᬾᬦ ᬏᬭᬶᬢᭀ ᬓᬫ᭄ᬧᬶᬢᭀ. ᬆᬯᬶᬮᭀᬢᬶ ᬅᬧ᭄ᬧᬲᬦ᭄ᬦᭀ. ᬮᬸᬮ᬴ᬶᬢᭀᬢᬶ ᬅᬲᬦ᭄ᬦᬶᬲᬶᬦ᭄ᬦᭀ. ᬓᬮᬮᬷᬪᬹᬢᭀᬢᬶ ᬓᬤ᭄ᬤᬫᬷᬪᬹᬢᭀ. ᬅᬦ᭄ᬥᬓᬵᬭᬾ ᬦᬶᬓ᭄ᬔᬶᬢ᭄ᬢᭀᬢᬶ ᬓᭀᬝ᭄ᬞᬓᬦ᭄ᬢᬭᬵᬤᬶᬪᬾᬤᬾ ᬅᬦᬵᬮᭀᬓᬝ᭄ᬞᬵᬦᬾ ᬞᬧᬶᬢᭀ. ᬇᬫᬲ᭄ᬫᬶᬂ ᬲᬸᬢ᭄ᬢᬾ ᬪᬕᬯᬵ ᬢᬷᬳᬶ ᬪᬯᬾᬳᬶ ᬤᬾᬲᬦᬂ ᬦᬶᬯᬝ᭄ᬝᬾᬢ᭄ᬯᬵ ᬅᬭᬳᬢ᭄ᬢᬦᬶᬓᬹᬝᬾᬦ ᬦᬶᬝ᭄ᬞᬧᬾᬲᬶ, ᬩ᭄ᬭᬵᬳ᭄ᬫᬡᭀ ᬧᬦ ᬲᬭᬡᬫᬢ᭄ᬢᬾ ᬧᬢᬶᬝ᭄ᬞᬶᬢᭀᬢᬶ.

᭔. ᬓᬵᬭᬡᬧᬵᬮᬷᬲᬸᬢ᭄ᬢᬯᬡ᭄ᬡᬦᬵ

᭑᭙᭔. ᬘᬢᬸᬢ᭄ᬣᬾ ᬓᬵᬭᬡᬧᬵᬮᬷᬢᬶ ᬧᬵᬮᭀᬢᬶ ᬢᬲ᭄ᬲ ᬦᬵᬫᬂ, ᬭᬵᬚᬓᬸᬮᬵᬦᬂ ᬧᬦ ᬓᬫ᭄ᬫᬦ᭄ᬢᬾ ᬓᬵᬭᬾᬢᬷᬢᬶ ᬓᬵᬭᬡᬧᬵᬮᬷ ᬦᬵᬫ ᬚᬵᬢᭀ. ᬓᬫ᭄ᬫᬦ᭄ᬢᬂ ᬓᬵᬭᬾᬢᬷᬢᬶ ᬧᬵᬢᭀᬯ ᬉᬝ᭄ᬞᬵᬬ ᬤ᭄ᬯᬵᬭᬝ᭄ᬝᬵᬮᬓᬧᬵᬓᬵᬭᬾ ᬅᬓᬢᬾ ᬓᬵᬭᬾᬢᬶ, ᬚᬶᬡ᭄ᬡᬾ ᬧᬝᬶᬚᬕ᭄ᬕᬵᬧᬾᬢᬶ. ᬧᬶᬗ᭄ᬕᬶᬬᬵᬦᬶᬂ ᬩ᭄ᬭᬵᬳ᭄ᬫᬡᬦ᭄ᬢᬶ ᬏᬯᬂᬦᬵᬫᬓᬂ ᬅᬦᬵᬕᬵᬫᬶᬨᬮᬾ ᬧᬢᬶᬝ᭄ᬞᬶᬢᬂ ᬅᬭᬶᬬᬲᬵᬯᬓᬂ ᬩ᭄ᬭᬵᬳ᭄ᬫᬡᬂ. ᬲᭀ ᬓᬶᬭ ᬧᬵᬢᭀᬯ ᬉᬝ᭄ᬞᬵᬬ ᬕᬦ᭄ᬥᬫᬵᬮᬵᬤᬷᬦᬶ ᬕᬵᬳᬵᬧᬾᬢ᭄ᬯᬵ ᬲᬢ᭄ᬣᬸ ᬲᬦ᭄ᬢᬶᬓᬂ ᬕᬦ᭄ᬢ᭄ᬯᬵ ᬯᬦ᭄ᬤᬶᬢ᭄ᬯᬵ ᬕᬦ᭄ᬥᬫᬵᬮᬵᬤᬷᬳᬶ ᬧᬹᬚᬾᬢ᭄ᬯᬵ ᬦᬕᬭᬂ ᬆᬕᬘ᭄ᬙᬢᬶ, ᬇᬤᬂ ᬩ᭄ᬭᬵᬳ᭄ᬫᬡᬲ᭄ᬲ ᬤᬾᬯᬲᬶᬓᬂ ᬯᬢ᭄ᬢᬦ᭄ᬢᬶ. ᬢᬂ ᬲᭀ ᬏᬯᬂ ᬯᬢ᭄ᬢᬂ ᬓᬢ᭄ᬯᬵ ᬆᬕᬘ᭄ᬙᬦ᭄ᬢᬂ ᬅᬤ᭄ᬤᬲ. ᬏᬢᬤᬯᭀᬘᬵᬢᬶ ‘‘ᬅᬬᬂ ᬩ᭄ᬭᬵᬳ᭄ᬫᬡᭀ ᬧᬜ᭄ᬜᬯᬵ ᬜᬵᬡᬸᬢ᭄ᬢᬭᭀ, ᬓᬳᬂ ᬦᬸ ᬔᭀ ᬧᬵᬢᭀᬯ ᬕᬦ᭄ᬢ᭄ᬯᬵ ᬆᬕᬘ᭄ᬙᬢᬷ’’ᬢᬶ ᬘᬶᬦ᭄ᬢᬾᬢ᭄ᬯᬵ ᬅᬦᬸᬓ᭄ᬓᬫᬾᬦ ᬲᬦ᭄ᬢᬶᬓᬂ ᬆᬕᬢᬂ ᬲᬜ᭄ᬚᬵᬦᬶᬢ᭄ᬯᬵ ‘‘ᬳᬦ᭄ᬤ ᬓᬸᬢᭀ ᬦᬹ’’ᬢᬶᬆᬤᬶᬯᬘᬦᬂ ᬅᬯᭀᬘ.

ᬢᬢ᭄ᬣ ᬤᬶᬯᬵ ᬤᬶᬯᬲ᭄ᬲᬵᬢᬶ ᬤᬶᬯᬲᬲ᭄ᬲᬵᬧᬶ ᬤᬶᬯᬵ, ᬫᬚ᭄ᬛᬦ᭄ᬳᬶᬓᬓᬵᬮᬾᬢᬶ ᬅᬢ᭄ᬣᭀ. ᬧᬡ᭄ᬟᬶᬢᭀ ᬫᬜ᭄ᬜᬾᬢᬶ ᬪᬯᬂ ᬧᬶᬗ᭄ᬕᬶᬬᬵᬦᬷ ᬲᬫᬡᬂ ᬕᭀᬢᬫᬂ ᬧᬡ᭄ᬟᬶᬢᭀᬢᬶ ᬫᬜ᭄ᬜᬢᬶ, ᬉᬤᬵᬳᬸ ᬦᭀᬢᬶ ᬅᬬᬫᬾᬢ᭄ᬣ ᬅᬢ᭄ᬣᭀ. ᬓᭀ ᬘᬵᬳᬂ, ᬪᭀᬢᬶ, ᬪᭀ, ᬲᬫᬡᬲ᭄ᬲ ᬕᭀᬢᬫᬲ᭄ᬲ ᬧᬜ᭄ᬜᬵᬯᬾᬬ᭄ᬬᬢ᭄ᬢᬶᬬᬚᬵᬦᬦᬾ ᬅᬳᬂ ᬓᭀ ᬦᬵᬫ? ᬓᭀ ᬘ ᬲᬫᬡᬲ᭄ᬲ ᬕᭀᬢᬫᬲ᭄ᬲ ᬧᬜ᭄ᬜᬵᬯᬾᬬ᭄ᬬᬢ᭄ᬢᬶᬬᬂ ᬚᬵᬦᬶᬲ᭄ᬲᬵᬫᬷᬢᬶ ᬓᬸᬢᭀ ᬘᬵᬳᬂ ᬲᬫᬡᬲ᭄ᬲ ᬕᭀᬢᬫᬲ᭄ᬲ ᬧᬜ᭄ᬜᬵᬯᬾᬬ᭄ᬬᬢ᭄ᬢᬶᬬᬂ ᬚᬵᬦᬶᬲ᭄ᬲᬵᬫᬶ, ᬓᬾᬦ ᬦᬵᬫ ᬓᬵᬭᬡᬾᬦ ᬚᬵᬦᬶᬲ᭄ᬲᬵᬫᬷᬢᬶ ᬏᬯᬂ ᬲᬩ᭄ᬩᬣᬵᬧᬶ ᬅᬢ᭄ᬢᬦᭀ ᬅᬚᬵᬦᬦᬪᬵᬯᬂ ᬤᬷᬧᬾᬢᬶ. ᬲᭀᬧᬶ ᬦᬹᬦᬲ᭄ᬲ ᬢᬵᬤᬶᬲᭀᬯᬵᬢᬶ ᬬᭀ ᬲᬫᬡᬲ᭄ᬲ ᬕᭀᬢᬫᬲ᭄ᬲ ᬧᬜ᭄ᬜᬵᬯᬾᬬ᭄ᬬᬢ᭄ᬢᬶᬬᬂ ᬚᬵᬦᬾᬬ᭄ᬬ, ᬲᭀᬧᬶ ᬦᬹᬦ ᬤᬲ ᬧᬵᬭᬫᬶᬬᭀ ᬧᬹᬭᬾᬢ᭄ᬯᬵ ᬲᬩ᭄ᬩᬜ᭄ᬜᬸᬢᬂ ᬧᬢ᭄ᬢᭀ ᬢᬵᬤᬶᬲᭀ ᬩᬸᬤ᭄ᬥᭀᬬᬾᬯ ᬪᬯᬾᬬ᭄ᬬ. ᬲᬶᬦᬾᬭᬸᬂ ᬯᬵ ᬳᬶ ᬧᬣᬯᬶᬂ ᬯᬵ ᬆᬓᬵᬲᬂ ᬯᬵ ᬧᬫᬾᬢᬸᬓᬵᬫᬾᬦ ᬢᬧ᭄ᬧᬫᬵᬡᭀ ᬤᬡ᭄ᬟᭀ ᬯᬵ ᬭᬚ᭄ᬚᬸ ᬯᬵ ᬮᬤ᭄ᬥᬸᬂ ᬯᬝ᭄ᬝᬢᬶ, ᬲᬫᬡᬲ᭄ᬲ ᬕᭀᬢᬫᬲ᭄ᬲ ᬧᬜ᭄ᬜᬂ ᬚᬵᬦᬦ᭄ᬢᬾᬦᬧᬶ ᬢᬲ᭄ᬲ ᬜᬵᬡᬲᬤᬶᬲᬫᬾᬯ ᬲᬩ᭄ᬩᬜ᭄ᬜᬸᬢᬜ᭄ᬜᬵᬡᬂ ᬮᬤ᭄ᬥᬸᬂ ᬯᬝ᭄ᬝᬢᬷᬢᬶ ᬤᬷᬧᬾᬢᬶ. ᬆᬤᬭᬯᬲᬾᬦ ᬧᬦᬾᬢ᭄ᬣ ᬆᬫᬾᬟᬶᬢᬂ ᬓᬢᬂ. ᬉᬮ᬴ᬵᬭᬵᬬᬵᬢᬶ ᬉᬢ᭄ᬢᬫᬵᬬ ᬲᬾᬝ᭄ᬞᬵᬬ. ᬓᭀ ᬘᬵᬳᬂ, ᬪᭀᬢᬶ, ᬪᭀ, ᬅᬳᬂ ᬲᬫᬡᬲ᭄ᬲ ᬕᭀᬢᬫᬲ᭄ᬲ ᬧᬲᬂᬲᬦᬾ ᬓᭀ ᬦᬵᬫ. ᬓᭀ ᬘ ᬲᬫᬡᬂ ᬕᭀᬢᬫᬂ ᬧᬲᬂᬲᬶᬲ᭄ᬲᬵᬫᬷᬢᬶ ᬓᬾᬦ ᬓᬵᬭᬡᬾᬦ ᬧᬲᬂᬲᬶᬲ᭄ᬲᬵᬫᬶ.

ᬧᬲᬢ᭄ᬣᬧ᭄ᬧᬲᬢ᭄ᬣᭀᬢᬶ ᬲᬩ᭄ᬩᬕᬸᬡᬵᬦᬂ ᬉᬧᬭᬶ ᬘᬭᬾᬳᬶ ᬲᬩ᭄ᬩᬮᭀᬓᬧᬲᬢ᭄ᬣᬾᬳᬶ ᬅᬢ᭄ᬢᬦᭀ ᬕᬸᬡᬾᬳᬾᬯ ᬧᬲᬢ᭄ᬣᭀ, ᬦ ᬢᬲ᭄ᬲ ᬅᬜ᭄ᬜᬾᬳᬶ ᬧᬲᬂᬲᬦᬓᬶᬘ᭄ᬘᬂ ᬅᬢ᭄ᬣᬶ. ᬬᬣᬵ ᬳᬶ ᬘᬫ᭄ᬧᬓᬧᬸᬧ᭄ᬨᬂ ᬯᬵ ᬦᬷᬮᬸᬧ᭄ᬧᬮᬂ ᬯᬵ ᬧᬤᬸᬫᬂ ᬯᬵ ᬮᭀᬳᬶᬢᬘᬦ᭄ᬤᬦᬂ ᬯᬵ ᬅᬢ᭄ᬢᬦᭀ ᬯᬡ᭄ᬡᬕᬦ᭄ᬥᬲᬶᬭᬶᬬᬵᬯ ᬧᬵᬲᬵᬤᬶᬓᬜ᭄ᬘᬾᬯ ᬲᬸᬕᬦ᭄ᬥᬜ᭄ᬘ, ᬦ ᬢᬲ᭄ᬲ ᬆᬕᬦ᭄ᬢᬸᬓᬾᬳᬶ ᬯᬡ᭄ᬡᬕᬦ᭄ᬥᬾᬳᬶ ᬣᭀᬫᬦᬓᬶᬘ᭄ᬘᬂ ᬅᬢ᭄ᬣᬶ. ᬬᬣᬵ ᬘ ᬫᬡᬶᬭᬢᬦᬂ ᬯᬵ ᬘᬦ᭄ᬤᬫᬡ᭄ᬟᬮᬂ ᬯᬵ ᬅᬢ᭄ᬢᬦᭀ ᬆᬮᭀᬓᬾᬦᬾᬯ ᬑᬪᬵᬲᬢᬶ, ᬦ ᬢᬲ᭄ᬲ ᬅᬜ᭄ᬜᬾᬦ ᬑᬪᬵᬲᬦᬓᬶᬘ᭄ᬘᬂ ᬅᬢ᭄ᬣᬶ, ᬏᬯᬂ ᬲᬫᬡᭀ ᬕᭀᬢᬫᭀ ᬲᬩ᭄ᬩᬮᭀᬓᬧᬲᬢ᭄ᬣᬾᬳᬶ ᬅᬢ᭄ᬢᬦᭀ ᬕᬸᬡᬾᬳᬾᬯ ᬧᬲᬢ᭄ᬣᭀ ᬣᭀᬫᬶᬢᭀ, ᬲᬩ᭄ᬩᬮᭀᬓᬲ᭄ᬲ ᬲᬾᬝ᭄ᬞᬢᬂ ᬧᬵᬧᬶᬢᭀ. ᬦ ᬢᬲ᭄ᬲ ᬅᬜ᭄ᬜᬾᬦ ᬧᬲᬂᬲᬦᬓᬶᬘ᭄ᬘᬂ ᬅᬢ᭄ᬣᬶ.

ᬧᬲᬢ᭄ᬣᬾᬳᬶ ᬯᬵ ᬧᬲᬢ᭄ᬣᭀᬢᬶᬧᬶ ᬧᬲᬢ᭄ᬣᬧ᭄ᬧᬲᬢ᭄ᬣᭀ. ᬓᬾ ᬧᬦ ᬧᬲᬢ᭄ᬣᬵ ᬦᬵᬫ? ᬭᬵᬚᬵ ᬧᬲᬾᬦᬤᬶ ᬓᭀᬲᬮᭀ ᬓᬵᬲᬶᬓᭀᬲᬮᬯᬵᬲᬶᬓᬾᬳᬶ ᬧᬲᬢ᭄ᬣᭀ, ᬩᬶᬫ᭄ᬩᬶᬲᬵᬭᭀ ᬅᬗ᭄ᬕᬫᬕᬥᬯᬵᬲᬷᬳᬶ, ᬯᬾᬲᬵᬮᬶᬓᬵ ᬮᬶᬘ᭄ᬙᬯᬷ ᬯᬚ᭄ᬚᬶᬢᬝ᭄ᬞᬯᬵᬲᬷᬳᬶ ᬧᬲᬢ᭄ᬣᬵ, ᬧᬵᬯᬾᬬ᭄ᬬᬓᬵ ᬫᬮ᭄ᬮᬵ ᬓᭀᬲᬶᬦᬵᬭᬓᬵ ᬫᬮ᭄ᬮᬵ ᬅᬜ᭄ᬜᬾᬧᬶ ᬢᬾ ᬢᬾ ᬔᬢ᭄ᬢᬶᬬᬵ ᬢᬾᬳᬶ ᬢᬾᬳᬶ ᬚᬵᬦᬧᬤᬾᬳᬶ ᬧᬲᬢ᭄ᬣᬵ, ᬘᬗ᭄ᬓᬶᬆᬤᬬᭀ ᬩ᭄ᬭᬵᬳ᭄ᬫᬡᬵ ᬩ᭄ᬭᬵᬳ᭄ᬫᬡᬕᬡᬾᬳᬶ, ᬅᬦᬵᬣᬧᬶᬡ᭄ᬟᬶᬓᬵᬤᬬᭀ ᬉᬧᬵᬲᬓᬵ ᬉᬧᬵᬲᬓᬕᬡᬾᬳᬶ, ᬯᬶᬲᬵᬔᬵᬆᬤᬶᬓᬵ ᬉᬧᬵᬲᬶᬓᬵ ᬅᬦᬾᬓᬲᬢᬵᬳᬶ ᬉᬧᬵᬲᬶᬓᬵᬳᬶ, ᬲᬓᬸᬮᬸᬤᬵᬬᬶᬆᬤᬬᭀ ᬧᬭᬶᬩ᭄ᬩᬵᬚᬓᬵ ᬅᬦᬾᬓᬾᬳᬶ ᬧᬭᬶᬩ᭄ᬩᬵᬚᬓᬲᬢᬾᬳᬶ, ᬉᬧ᭄ᬧᬮᬯᬡ᭄ᬡᬢ᭄ᬣᬾᬭᬶᬆᬤᬶᬓᬵ ᬫᬳᬵᬲᬵᬯᬶᬓᬵ ᬅᬦᬾᬓᬾᬳᬶ ᬪᬶᬓ᭄ᬔᬸᬦᬶᬲᬢᬾᬳᬶ, ᬲᬵᬭᬶᬧᬸᬢ᭄ᬢᬢ᭄ᬣᬾᬭᬵᬤᬬᭀ ᬫᬳᬵᬣᬾᬭᬵ ᬅᬦᬾᬓᬲᬢᬾᬳᬶ ᬪᬶᬓ᭄ᬔᬹᬳᬶ, ᬲᬓ᭄ᬓᬵᬤᬬᭀ ᬤᬾᬯᬵ ᬅᬦᬾᬓᬲᬳᬲ᭄ᬲᬾᬳᬶ ᬤᬾᬯᬾᬳᬶ, ᬫᬳᬵᬩ᭄ᬭᬳ᭄ᬫᬵᬤᬬᭀ ᬩ᭄ᬭᬳ᭄ᬫᬵᬦᭀ ᬅᬦᬾᬓᬲᬳᬲ᭄ᬲᬾᬳᬶ ᬩ᭄ᬭᬳ᭄ᬫᬾᬳᬶ ᬧᬲᬢ᭄ᬣᬵ. ᬢᬾ ᬲᬩ᭄ᬩᬾᬧᬶ ᬤᬲᬩᬮᬂ ᬣᭀᬫᬾᬦ᭄ᬢᬶ ᬯᬡ᭄ᬡᬾᬦ᭄ᬢᬶ ᬧᬲᬂᬲᬦ᭄ᬢᬷᬢᬶ ᬪᬕᬯᬵ ‘‘ᬧᬲᬢ᭄ᬣᬧ᭄ᬧᬲᬢ᭄ᬣᭀ’’ᬢᬶ ᬯᬸᬘ᭄ᬘᬢᬶ. ᬅᬢ᭄ᬣᬯᬲᬦ᭄ᬢᬶ ᬅᬢ᭄ᬣᬵᬦᬶᬲᬂᬲᬂ.

ᬅᬣᬲ᭄ᬲ ᬲᭀ ᬅᬢ᭄ᬢᬦᭀ ᬧᬲᬵᬤᬓᬵᬭᬡᬂ ᬆᬘᬶᬓ᭄ᬔᬦ᭄ᬢᭀ ᬲᬾᬬ᭄ᬬᬣᬵᬧᬶ, ᬪᭀ, ᬧᬸᬭᬶᬲᭀᬢᬶᬆᬤᬶᬫᬵᬳ. ᬢᬢ᭄ᬣ ᬅᬕ᭄ᬕᬭᬲᬧᬭᬶᬢᬶᬢ᭄ᬢᭀᬢᬶ ᬪᭀᬚᬦᬭᬲᬾᬲᬸ ᬧᬵᬬᬵᬲᭀ ᬲ᭄ᬦᬾᬳᬭᬲᬾᬲᬸ ᬕᭀᬲᬧ᭄ᬧᬶ, ᬓᬲᬵᬯᬭᬲᬾᬲᬸ ᬔᬸᬤ᭄ᬤᬓᬫᬥᬸ ᬅᬦᬾᬮ᬴ᬓᬂ, ᬫᬥᬸᬭᬭᬲᬾᬲᬸ ᬲᬓ᭄ᬓᬭᬵᬢᬶ ᬏᬯᬫᬵᬤᬬᭀ ᬅᬕ᭄ᬕᬭᬲᬵ ᬦᬵᬫ. ᬢᬾᬲᬸ ᬬᬾᬦ ᬓᬾᬦᬘᬶ ᬧᬭᬶᬢᬶᬢ᭄ᬢᭀ ᬆᬓᬡ᭄ᬞᬧ᭄ᬧᬫᬵᬡᬂ ᬪᬸᬜ᭄ᬚᬶᬢ᭄ᬯᬵ ᬞᬶᬢᭀ. ᬅᬜ᭄ᬜᬾᬲᬂ ᬳᬷᬦᬵᬦᬦ᭄ᬢᬶ ᬅᬕ᭄ᬕᬭᬲᬾᬳᬶ ᬅᬜ᭄ᬜᬾᬲᬂ ᬳᬷᬦᬭᬲᬵᬦᬂ. ᬲᬸᬢ᭄ᬢᬲᭀᬢᬶ ᬲᬸᬢ᭄ᬢᬢᭀ, ᬲᬸᬢ᭄ᬢᬪᬵᬯᬾᬦᬵᬢᬶ ᬅᬢ᭄ᬣᭀ. ᬲᬾᬲᬸᬧᬶ ᬏᬲᬾᬯ ᬦᬬᭀ. ᬢᬢᭀ ᬢᬢᭀᬢᬶ ᬲᬸᬢ᭄ᬢᬵᬤᬷᬲᬸ ᬢᬢᭀ ᬢᬢᭀ. ᬅᬜ᭄ᬜᬾᬲᬂ ᬧᬸᬣᬸᬲᬫᬡᬩ᭄ᬭᬵᬳ᭄ᬫᬡᬵᬧ᭄ᬧᬯᬵᬤᬵᬦᬦ᭄ᬢᬶ ᬬᬾ ᬅᬜ᭄ᬜᬾᬲᬂ ᬧᬸᬣᬹᬦᬂ ᬲᬫᬡᬩ᭄ᬭᬵᬳ᭄ᬫᬡᬵᬦᬂ ᬮᬤ᭄ᬥᬶᬲᬗ᭄ᬔᬵᬢᬧ᭄ᬧᬯᬵᬤᬵ, ᬢᬾᬲᬂ. ᬦ ᬧᬶᬳᬾᬢᬷᬢᬶ ᬦ ᬧᬢ᭄ᬣᬾᬢᬶ, ᬢᬾ ᬓᬣᬶᬬᬫᬵᬦᬾ ᬲᭀᬢᬸᬫ᭄ᬧᬶ ᬦ ᬇᬘ᭄ᬙᬢᬶ. ᬚᬶᬖᬘ᭄ᬙᬵᬤᬸᬩ᭄ᬩᬮ᭄ᬬᬧᬭᬾᬢᭀᬢᬶ ᬚᬶᬖᬘ᭄ᬙᬵᬬ ᬘᬾᬯ ᬤᬸᬩ᭄ᬩᬮᬪᬵᬯᬾᬦ ᬘ ᬅᬦᬸᬕᬢᭀ. ᬫᬥᬸᬧᬶᬡ᭄ᬟᬶᬓᬦ᭄ᬢᬶ ᬲᬵᬮᬶᬧᬶᬝ᭄ᬞᬂ ᬪᬚ᭄ᬚᬶᬢ᭄ᬯᬵ ᬘᬢᬸᬫᬥᬸᬭᬾᬦ ᬬᭀᬚᬾᬢ᭄ᬯᬵ ᬓᬢᬂ ᬩᬤ᭄ᬥᬲᬢ᭄ᬢᬸᬧᬶᬡ᭄ᬟᬶᬓᬂ, ᬫᬥᬸᬭᬧᬹᬯᬫᬾᬯ ᬯᬵ. ᬅᬥᬶᬕᬘ᭄ᬙᬾᬬ᭄ᬬᬵᬢᬶ ᬮᬪᬾᬬ᭄ᬬ. ᬅᬲᬾᬘᬦᬓᬦ᭄ᬢᬶ ᬫᬥᬸᬭᬪᬵᬯᬓᬭᬡᬢ᭄ᬣᬵᬬ ᬅᬜ᭄ᬜᬾᬦ ᬭᬲᬾᬦ ᬅᬦᬵᬲᬶᬢ᭄ᬢᬓᬂ ᬑᬚᬯᬦ᭄ᬢᬂ ᬧᬡᬷᬢᬭᬲᬂ.

ᬳᬭᬶᬘᬦ᭄ᬤᬦᬲ᭄ᬲᬵᬢᬶ ᬲᬸᬯᬡ᭄ᬡᬯᬡ᭄ᬡᬘᬦ᭄ᬤᬦᬲ᭄ᬲ. ᬮᭀᬳᬶᬢᬘᬦ᭄ᬤᬦᬲ᭄ᬲᬵᬢᬶ ᬭᬢ᭄ᬢᬯᬡ᭄ᬡᬘᬦ᭄ᬤᬦᬲ᭄ᬲ. ᬲᬸᬭᬪᬶᬕᬦ᭄ᬥᬦ᭄ᬢᬶ ᬲᬸᬕᬦ᭄ᬥᬂ. ᬤᬭᬣᬵᬤᬬᭀ ᬯᬝ᭄ᬝᬤᬭᬣᬵ, ᬯᬝ᭄ᬝᬓᬶᬮᬫᬣᬵ, ᬯᬝ᭄ᬝᬧᬭᬶᬮ᬴ᬵᬳᬵ ᬏᬯ. ᬉᬤᬵᬦᬂ ᬉᬤᬵᬦᬾᬲᬷᬢᬶ ᬉᬤᬵᬳᬵᬭᬂ ᬉᬤᬵᬳᬭᬶ. ᬬᬣᬵ ᬳᬶ ᬬᬂ ᬢᬾᬮᬂ ᬫᬵᬦᬂ ᬕᬳᬾᬢᬸᬂ ᬦ ᬲᬓ᭄ᬓᭀᬢᬶ, ᬯᬶᬲ᭄ᬲᬦ᭄ᬤᬶᬢ᭄ᬯᬵ ᬕᬘ᭄ᬙᬢᬶ, ᬢᬂ ᬅᬯᬲᬾᬓᭀᬢᬶ ᬯᬸᬘ᭄ᬘᬢᬶ. ᬬᬜ᭄ᬘ ᬚᬮᬂ ᬢᬮ᬴ᬵᬓᬂ ᬕᬳᬾᬢᬸᬂ ᬦ ᬲᬓ᭄ᬓᭀᬢᬶ, ᬅᬚ᭄ᬛᭀᬢ᭄ᬣᬭᬶᬢ᭄ᬯᬵ ᬕᬘ᭄ᬙᬢᬶ, ᬢᬂ ᬑᬖᭀᬢᬶ ᬯᬸᬘ᭄ᬘᬢᬶ. ᬏᬯᬫᬾᬯᬂ ᬬᬂ ᬧᬷᬢᬶᬯᬘᬦᬂ ᬳᬤᬬᬂ ᬕᬳᬾᬢᬸᬂ ᬦ ᬲᬓ᭄ᬓᭀᬢᬶ, ᬅᬥᬶᬓᬂ ᬳᬸᬢ᭄ᬯᬵ ᬅᬦ᭄ᬢᭀ ᬅᬲᬡ᭄ᬞᬳᬶᬢ᭄ᬯᬵ ᬩᬳᬶ ᬦᬶᬓ᭄ᬔᬫᬢᬶ, ᬢᬂ ᬉᬤᬵᬦᬦ᭄ᬢᬶ ᬯᬸᬘ᭄ᬘᬢᬶ. ᬏᬯᬭᬹᬧᬂ ᬧᬷᬢᬶᬫᬬᬯᬘᬦᬂ ᬦᬶᬘ᭄ᬙᬵᬭᬾᬲᬷᬢᬶ ᬅᬢ᭄ᬣᭀ.

᭕. ᬧᬶᬗ᭄ᬕᬶᬬᬵᬦᬷᬲᬸᬢ᭄ᬢᬯᬡ᭄ᬡᬦᬵ

᭑᭙᭕. ᬧᬜ᭄ᬘᬫᬾ ᬦᬷᬮᬵᬢᬶ ᬇᬤᬂ ᬲᬩ᭄ᬩᬲᬗ᭄ᬕᬵᬳᬶᬓᬂ. ᬦᬷᬮᬯᬡ᭄ᬡᬵᬢᬶᬆᬤᬶ ᬢᬲ᭄ᬲᬾᬯ ᬯᬶᬪᬵᬕᬤᬲ᭄ᬲᬦᬂ. ᬢᬢ᭄ᬣ ᬦ ᬢᬾᬲᬂ ᬧᬓᬢᬶᬯᬡ᭄ᬡᭀ ᬦᬷᬮᭀ, ᬦᬷᬮᬯᬶᬮᬾᬧᬦᬯᬶᬮᬶᬢ᭄ᬢᬢ᭄ᬢᬵ ᬧᬦᬾᬢᬂ ᬯᬸᬢ᭄ᬢᬂ. ᬦᬷᬮᬯᬢ᭄ᬣᬵᬢᬶ ᬧᬝᬤᬸᬓᬹᬮᬓᭀᬲᬾᬬ᭄ᬬᬵᬤᬷᬦᬶᬧᬶ ᬢᬾᬲᬂ ᬦᬷᬮᬵᬦᬾᬯ ᬳᭀᬦ᭄ᬢᬶ. ᬦᬷᬮᬵᬮᬗ᭄ᬓᬵᬭᬵᬢᬶ ᬦᬷᬮᬫᬡᬷᬳᬶ ᬦᬷᬮᬧᬸᬧ᭄ᬨᬾᬳᬶ ᬅᬮᬗ᭄ᬓᬢᬵ, ᬢᬾᬲᬂ ᬳᬢ᭄ᬣᬵᬮᬗ᭄ᬓᬵᬭ-ᬅᬲ᭄ᬲᬵᬮᬗ᭄ᬓᬵᬭ-ᬭᬣᬵᬮᬗ᭄ᬓᬵᬭ-ᬲᬵᬡᬶᬯᬶᬢᬵᬦᬓᬜ᭄ᬘᬸᬓᬵᬧᬶ ᬲᬩ᭄ᬩᬾ ᬦᬷᬮᬵᬬᬾᬯ ᬳᭀᬦ᭄ᬢᬶ. ᬇᬫᬶᬦᬵ ᬦᬬᬾᬦ ᬲᬩ᭄ᬩᬧᬤᬾᬲᬸ ᬅᬢ᭄ᬣᭀ ᬯᬾᬤᬶᬢᬩ᭄ᬩᭀ.

ᬧᬤᬸᬫᬂ ᬬᬣᬵᬢᬶ ᬬᬣᬵ ᬲᬢᬧᬢ᭄ᬢᬂ ᬭᬢ᭄ᬢᬧᬤᬸᬫᬂ. ᬓᭀᬓᬦᬤᬦ᭄ᬢᬶ ᬢᬲ᭄ᬲᬾᬯ ᬯᬾᬯᬘᬦᬂ. ᬧᬵᬢᭀᬢᬶ ᬧᬕᬾᬯ ᬲᬸᬭᬶᬬᬸᬕ᭄ᬕᬫᬦᬓᬵᬮᬾ. ᬲᬶᬬᬵᬢᬶ ᬪᬯᬾᬬ᭄ᬬ. ᬅᬯᬷᬢᬕᬦ᭄ᬥᬦ᭄ᬢᬶ ᬅᬯᬶᬕᬢᬕᬦ᭄ᬥᬂ. ᬅᬗ᭄ᬕᬷᬭᬲᬦ᭄ᬢᬶ ᬪᬕᬯᬢᭀ ᬅᬗ᭄ᬕᬫᬗ᭄ᬕᬾᬳᬶ ᬭᬲ᭄ᬫᬶᬬᭀ ᬦᬶᬘ᭄ᬙᬭᬦ᭄ᬢᬶ, ᬢᬲ᭄ᬫᬵ ᬅᬗ᭄ᬕᬷᬭᬲᭀᬢᬶ ᬯᬸᬘ᭄ᬘᬢᬶ. ᬢᬧᬦ᭄ᬢᬫᬵᬤᬶᬘ᭄ᬘᬫᬶᬯᬦ᭄ᬢᬮᬶᬓ᭄ᬔᬾᬢᬶ ᬤ᭄ᬯᬶᬲᬳᬲ᭄ᬲᬤᬷᬧᬧᬭᬶᬯᬵᬭᬾᬲᬸ ᬘᬢᬹᬲᬸ ᬫᬳᬵᬤᬷᬧᬾᬲᬸ ᬆᬮᭀᬓᬓᬭᬡᬯᬲᬾᬦ ᬅᬦ᭄ᬢᬮᬶᬓ᭄ᬔᬾ ᬢᬧᬦ᭄ᬢᬂ ᬆᬤᬶᬘ᭄ᬘᬂ ᬯᬶᬬ ᬯᬶᬭᭀᬘᬫᬵᬦᬂ. ᬅᬗ᭄ᬕᬷᬭᬲᬂ ᬧᬲ᭄ᬲᬵᬢᬶ ᬅᬢ᭄ᬢᬵᬦᬫᬾᬯ ᬯᬵ ᬫᬳᬵᬚᬦᬂ ᬯᬵ ᬲᬦ᭄ᬥᬵᬬ ᬏᬯᬂ ᬯᬤᬢᬶ.

᭖. ᬫᬳᬵᬲᬸᬧᬶᬦᬲᬸᬢ᭄ᬢᬯᬡ᭄ᬡᬦᬵ

᭑᭙᭖. ᬙᬝ᭄ᬞᬾ ᬫᬳᬵᬲᬸᬧᬶᬦᬵᬢᬶ ᬫᬳᬦ᭄ᬢᬾᬳᬶ ᬧᬸᬭᬶᬲᬾᬳᬶ ᬧᬲ᭄ᬲᬶᬢᬩ᭄ᬩᬢᭀ ᬫᬳᬦ᭄ᬢᬵᬦᬜ᭄ᬘ ᬅᬢ᭄ᬣᬵᬦᬂ ᬦᬶᬫᬶᬢ᭄ᬢᬪᬵᬯᬢᭀ ᬫᬳᬵᬲᬸᬧᬶᬦᬵ. ᬧᬵᬢᬸᬭᬳᬾᬲᬸᬦ᭄ᬢᬶ ᬧᬵᬓᬝᬵ ᬅᬳᬾᬲᬸᬂ. ᬢᬢ᭄ᬣ ᬲᬸᬧᬶᬦᬂ ᬧᬲ᭄ᬲᬦ᭄ᬢᭀ ᬘᬢᬹᬳᬶ ᬓᬵᬭᬡᬾᬳᬶ ᬧᬲ᭄ᬲᬢᬶ ᬥᬵᬢᬸᬓ᭄ᬔᭀᬪᬢᭀ ᬯᬵ ᬅᬦᬸᬪᬹᬢᬧᬸᬩ᭄ᬩᬢᭀ ᬯᬵ ᬤᬾᬯᬢᭀᬧᬲᬂᬳᬵᬭᬢᭀ ᬯᬵ ᬧᬸᬩ᭄ᬩᬦᬶᬫᬶᬢ᭄ᬢᬢᭀ ᬯᬵᬢᬶ.

ᬢᬢ᭄ᬣ ᬧᬶᬢ᭄ᬢᬵᬤᬷᬦᬂ ᬔᭀᬪᬓᬭᬡᬧᬘ᭄ᬘᬬᬧ᭄ᬧᬬᭀᬕᬾᬦ ᬔᬸᬪᬶᬢᬥᬵᬢᬸᬓᭀ ᬥᬵᬢᬸᬓ᭄ᬔᭀᬪᬢᭀ ᬲᬸᬧᬶᬦᬂ ᬧᬲ᭄ᬲᬢᬶ. ᬧᬲ᭄ᬲᬦ᭄ᬢᭀ ᬘ ᬦᬵᬦᬵᬯᬶᬥᬂ ᬲᬸᬧᬶᬦᬂ ᬧᬲ᭄ᬲᬢᬶ ᬧᬩ᭄ᬩᬢᬵ ᬧᬢᬦ᭄ᬢᭀ ᬯᬶᬬ, ᬆᬓᬵᬲᬾᬦ ᬕᬘ᭄ᬙᬦ᭄ᬢᭀ ᬯᬶᬬ, ᬯᬵᬮ᬴ᬫᬶᬕᬳᬢ᭄ᬣᬶᬘᭀᬭᬵᬤᬷᬳᬶ ᬅᬦᬸᬩᬤ᭄ᬥᭀ ᬯᬶᬬ ᬘ. ᬅᬦᬸᬪᬹᬢᬧᬸᬩ᭄ᬩᬢᭀ ᬧᬲ᭄ᬲᬦ᭄ᬢᭀ ᬧᬸᬩ᭄ᬩᬾ ᬅᬦᬸᬪᬹᬢᬧᬸᬩ᭄ᬩᬂ ᬆᬭᬫ᭄ᬫᬡᬂ ᬧᬲ᭄ᬲᬢᬶ. ᬤᬾᬯᬢᭀᬧᬲᬂᬳᬵᬭᬢᭀ ᬧᬲ᭄ᬲᬦ᭄ᬢᬲ᭄ᬲ ᬤᬾᬯᬢᬵ ᬅᬢ᭄ᬣᬓᬵᬫᬢᬵᬬ ᬯᬵ ᬅᬦᬢ᭄ᬣᬓᬵᬫᬢᬵᬬ ᬯᬵ ᬅᬢ᭄ᬣᬵᬬ ᬯᬵ ᬅᬦᬢ᭄ᬣᬵᬬ ᬯᬵ ᬦᬵᬦᬵᬯᬶᬥᬵᬦᬶ ᬆᬭᬫ᭄ᬫᬡᬵᬦᬶ ᬉᬧᬲᬂᬳᬭᬦ᭄ᬢᬶ. ᬲᭀ ᬢᬵᬲᬂ ᬤᬾᬯᬢᬵᬦᬂ ᬆᬦᬸᬪᬵᬯᬾᬦ ᬢᬵᬦᬶ ᬆᬭᬫ᭄ᬫᬡᬵᬦᬶ ᬧᬲ᭄ᬲᬢᬶ. ᬧᬸᬩ᭄ᬩᬦᬶᬫᬶᬢ᭄ᬢᬢᭀ ᬧᬲ᭄ᬲᬦ᭄ᬢᭀ ᬧᬸᬜ᭄ᬜᬵᬧᬸᬜ᭄ᬜᬯᬲᬾᬦ ᬉᬧ᭄ᬧᬚ᭄ᬚᬶᬢᬸᬓᬵᬫᬲ᭄ᬲ ᬅᬢ᭄ᬣᬲ᭄ᬲ ᬯᬵ ᬅᬦᬢ᭄ᬣᬲ᭄ᬲ ᬯᬵ ᬧᬸᬩ᭄ᬩᬦᬶᬫᬶᬢ᭄ᬢᬪᬹᬢᬂ ᬲᬸᬧᬶᬦᬂ ᬧᬲ᭄ᬲᬢᬶ ᬩᭀᬥᬶᬲᬢ᭄ᬢᬫᬵᬢᬵ ᬯᬶᬬ ᬧᬸᬢ᭄ᬢᬧᬝᬶᬮᬵᬪᬦᬶᬫᬶᬢ᭄ᬢᬂ, ᬓᭀᬲᬮᬭᬵᬚᬵ ᬯᬶᬬ ᬲᭀᬮ᬴ᬲ ᬲᬸᬧᬶᬦᬾ, ᬅᬬᬫᬾᬯ ᬪᬕᬯᬵ ᬩᭀᬥᬶᬲᬢ᭄ᬢᬪᬹᬢᭀ ᬇᬫᬾ ᬧᬜ᭄ᬘ ᬫᬳᬵᬲᬸᬧᬶᬦᬾ ᬯᬶᬬ ᬘᬵᬢᬶ.

ᬢᬢ᭄ᬣ ᬬᬂ ᬥᬵᬢᬸᬓ᭄ᬔᭀᬪᬢᭀ ᬅᬦᬸᬪᬹᬢᬧᬸᬩ᭄ᬩᬢᭀ ᬘ ᬲᬸᬧᬶᬦᬾ ᬧᬲ᭄ᬲᬢᬶ, ᬦ ᬢᬂ ᬲᬘ᭄ᬘᬂ ᬳᭀᬢᬶ. ᬬᬂ ᬤᬾᬯᬢᭀᬧᬲᬂᬳᬵᬭᬢᭀ ᬧᬲ᭄ᬲᬢᬶ, ᬢᬂ ᬲᬘ᭄ᬘᬂ ᬯᬵ ᬳᭀᬢᬶ ᬅᬮᬶᬓᬂ ᬯᬵ. ᬓᬸᬤ᭄ᬥᬵ ᬳᬶ ᬤᬾᬯᬢᬵ ᬉᬧᬵᬬᬾᬦ ᬯᬶᬦᬵᬲᬾᬢᬸᬓᬵᬫᬵ ᬯᬶᬧᬭᬷᬢᬫ᭄ᬧᬶ ᬓᬢ᭄ᬯᬵ ᬤᬲ᭄ᬲᬾᬦ᭄ᬢᬶ. ᬬᬂ ᬧᬦ ᬧᬸᬩ᭄ᬩᬦᬶᬫᬶᬢ᭄ᬢᬢᭀ ᬧᬲ᭄ᬲᬢᬶ, ᬢᬂ ᬏᬓᬦ᭄ᬢᬂ ᬲᬘ᭄ᬘᬫᬾᬯ ᬳᭀᬢᬶ. ᬏᬢᬾᬲᬂ ᬘᬢᬸᬦ᭄ᬦᬂ ᬫᬹᬮᬓᬵᬭᬡᬵᬦᬂ ᬲᬂᬲᬕ᭄ᬕᬪᬾᬤᬢᭀᬧᬶ ᬲᬸᬧᬶᬦᬪᬾᬤᭀ ᬳᭀᬢᬶᬬᬾᬯ.

ᬢᬂ ᬧᬦᬾᬢᬂ ᬘᬢᬸᬩ᭄ᬩᬶᬥᬫ᭄ᬧᬶ ᬲᬸᬧᬶᬦᬂ ᬲᬾᬔᬧᬸᬣᬸᬚ᭄ᬚᬦᬵᬯ ᬧᬲ᭄ᬲᬦ᭄ᬢᬶ ᬅᬧ᭄ᬧᬳᬷᬦᬯᬶᬧᬮ᭄ᬮᬵᬲᬢ᭄ᬢᬵ, ᬅᬲᬾᬔᬵ ᬦ ᬧᬲ᭄ᬲᬦ᭄ᬢᬶ ᬧᬳᬷᬦᬯᬶᬧᬮ᭄ᬮᬵᬲᬢ᭄ᬢᬵ. ᬓᬶᬂ ᬧᬦᬾᬢᬂ ᬧᬲ᭄ᬲᬦ᭄ᬢᭀ ᬲᬸᬢ᭄ᬢᭀ ᬧᬲ᭄ᬲᬢᬶ ᬧᬝᬶᬩᬸᬤ᭄ᬥᭀ, ᬉᬤᬵᬳᬸ ᬦᬾᬯ ᬲᬸᬢ᭄ᬢᭀ ᬦ ᬧᬝᬶᬩᬸᬤ᭄ᬥᭀᬢᬶ? ᬓᬶᬜ᭄ᬘᬾᬢ᭄ᬣ ᬬᬤᬶ ᬢᬵᬯ ᬲᬸᬢ᭄ᬢᭀ ᬧᬲ᭄ᬲᬢᬶ, ᬅᬪᬶᬥᬫ᭄ᬫᬯᬶᬭᭀᬥᭀ ᬆᬧᬚ᭄ᬚᬢᬶ. ᬪᬯᬗ᭄ᬕᬘᬶᬢ᭄ᬢᬾᬦ ᬳᬶ ᬲᬸᬧᬢᬶ, ᬢᬂ ᬭᬹᬧᬦᬶᬫᬶᬢ᭄ᬢᬵᬤᬶᬆᬭᬫ᭄ᬫᬡᬂ ᬭᬵᬕᬵᬤᬶᬲᬫ᭄ᬧᬬᬸᬢ᭄ᬢᬂ ᬯᬵ ᬦ ᬳᭀᬢᬶ. ᬲᬸᬧᬶᬦᬂ ᬧᬲ᭄ᬲᬦ᭄ᬢᬲ᭄ᬲ ᬘ ᬈᬤᬶᬲᬵᬦᬶ ᬘᬶᬢ᭄ᬢᬵᬦᬶ ᬉᬧ᭄ᬧᬚ᭄ᬚᬦ᭄ᬢᬶ. ᬅᬣ ᬧᬝᬶᬩᬸᬤ᭄ᬥᭀ ᬧᬲ᭄ᬲᬢᬶ, ᬯᬶᬦᬬᬯᬶᬭᭀᬥᭀ ᬆᬧᬚ᭄ᬚᬢᬶ. ᬬᬜ᭄ᬳᬶ ᬧᬝᬶᬩᬸᬤ᭄ᬥᭀ ᬧᬲ᭄ᬲᬢᬶ, ᬢᬂ ᬲᬩ᭄ᬩᭀᬳᬵᬭᬶᬓᬘᬶᬢ᭄ᬢᬾᬦ ᬧᬲ᭄ᬲᬢᬶ. ᬲᬩ᭄ᬩᭀᬳᬵᬭᬶᬓᬘᬶᬢ᭄ᬢᬾᬦ ᬘ ᬓᬢᬾ ᬯᬷᬢᬶᬓ᭄ᬓᬫᬾ ᬅᬦᬵᬧᬢ᭄ᬢᬶ ᬦᬵᬫ ᬦᬢ᭄ᬣᬶ. ᬲᬸᬧᬶᬦᬂ ᬧᬲ᭄ᬲᬦ᭄ᬢᬾᬦ ᬧᬦ ᬓᬢᬾᬧᬶ ᬯᬷᬢᬶᬓ᭄ᬓᬫᬾ ᬏᬓᬦ᭄ᬢᬂ ᬅᬦᬵᬧᬢ᭄ᬢᬶ ᬏᬯ. ᬅᬣ ᬦᬾᬯ ᬲᬸᬢ᭄ᬢᭀ ᬦ ᬧᬝᬶᬩᬸᬤ᭄ᬥᭀ ᬧᬲ᭄ᬲᬢᬶ, ᬦ ᬦᬵᬫ ᬧᬲ᭄ᬲᬢᬶ. ᬏᬯᬜ᭄ᬘ ᬲᬢᬶ ᬲᬸᬧᬶᬦᬲ᭄ᬲ ᬅᬪᬵᬯᭀ ᬘ ᬆᬧᬚ᭄ᬚᬢᬶ? ᬦ ᬅᬪᬵᬯᭀ. ᬓᬲ᭄ᬫᬵ? ᬬᬲ᭄ᬫᬵ ᬓᬧᬶᬫᬶᬤ᭄ᬥᬧᬭᬾᬢᭀ ᬧᬲ᭄ᬲᬢᬶ. ᬯᬸᬢ᭄ᬢᬜ᭄ᬳᬾᬢᬂ – ‘‘ᬓᬧᬶᬫᬶᬤ᭄ᬥᬧᬭᬾᬢᭀ ᬔᭀ, ᬫᬳᬵᬭᬵᬚ, ᬲᬸᬧᬶᬦᬂ ᬧᬲ᭄ᬲᬢᬷ’’ᬢᬶ.

ᬓᬧᬶᬫᬶᬤ᭄ᬥᬧᬭᬾᬢᭀᬢᬶ ᬫᬓ᭄ᬓᬝᬦᬶᬤ᭄ᬤᬵᬬ ᬬᬸᬢ᭄ᬢᭀ. ᬬᬣᬵ ᬳᬶ ᬫᬓ᭄ᬓᬝᬲ᭄ᬲ ᬦᬶᬤ᭄ᬤᬵ ᬮᬳᬸᬧᬭᬶᬯᬢ᭄ᬢᬵ ᬳᭀᬢᬶ, ᬏᬯᬂ ᬬᬵ ᬦᬶᬤ᭄ᬤᬵ ᬧᬸᬦᬧ᭄ᬧᬸᬦᬂ ᬓᬸᬲᬮᬵᬤᬶᬘᬶᬢ᭄ᬢᬯᭀᬓᬶᬡ᭄ᬡᬢ᭄ᬢᬵ ᬮᬳᬸᬧᬭᬶᬯᬢ᭄ᬢᬵ, ᬬᬲ᭄ᬲᬵ ᬧᬯᬢ᭄ᬢᬶᬬᬂ ᬧᬸᬦᬧ᭄ᬧᬸᬦᬂ ᬪᬯᬗ᭄ᬕᬢᭀ ᬉᬢ᭄ᬢᬭᬡᬂ ᬳᭀᬢᬶ, ᬢᬵᬬ ᬬᬸᬢ᭄ᬢᭀ ᬲᬸᬧᬶᬦᬂ ᬧᬲ᭄ᬲᬢᬶ. ᬢᬾᬦᬵᬬᬂ ᬲᬸᬧᬶᬦᭀ ᬓᬸᬲᬮᭀᬧᬶ ᬳᭀᬢᬶ ᬅᬓᬸᬲᬮᭀᬧᬶ ᬅᬩ᭄ᬬᬵᬓᬢᭀᬧᬶ. ᬢᬢ᭄ᬣ ᬲᬸᬧᬶᬦᬦ᭄ᬢᬾ ᬘᬾᬢᬶᬬᬯᬦ᭄ᬤᬦᬥᬫ᭄ᬫᬲ᭄ᬲᬯᬦᬥᬫ᭄ᬫᬤᬾᬲᬦᬵᬤᬷᬦᬶ ᬓᬭᭀᬦ᭄ᬢᬲ᭄ᬲ ᬓᬸᬲᬮᭀ, ᬧᬵᬡᬵᬢᬶᬧᬵᬢᬵᬤᬷᬦᬶ ᬓᬭᭀᬦ᭄ᬢᬲ᭄ᬲ ᬅᬓᬸᬲᬮᭀ, ᬤ᭄ᬯᬷᬳᬶ ᬅᬦ᭄ᬢᬾᬳᬶ ᬫᬸᬢ᭄ᬢᭀ ᬆᬯᬚ᭄ᬚᬦᬢᬤᬵᬭᬫ᭄ᬫᬡᬓ᭄ᬔᬡᬾ ᬅᬩ᭄ᬬᬵᬓᬢᭀᬢᬶ ᬯᬾᬤᬶᬢᬩ᭄ᬩᭀ. ᬲ᭄ᬯᬵᬬᬂ ᬤᬸᬩ᭄ᬩᬮᬯᬢ᭄ᬣᬸᬓᬢ᭄ᬢᬵ ᬘᬾᬢᬦᬵᬬ ᬧᬝᬶᬲᬦ᭄ᬥᬶᬂ ᬆᬓᬟ᭄ᬠᬶᬢᬸᬂ ᬅᬲᬫᬢ᭄ᬣᭀ. ᬧᬯᬢ᭄ᬢᬾ ᬧᬦ ᬅᬜ᭄ᬜᬾᬳᬶ ᬓᬸᬲᬮᬵᬓᬸᬲᬮᬾᬳᬶ ᬉᬧᬢ᭄ᬣᬫ᭄ᬪᬶᬢᭀ ᬯᬶᬧᬵᬓᬂ ᬤᬾᬢᬶ. ᬓᬶᬜ᭄ᬘᬵᬧᬶ ᬯᬶᬧᬵᬓᬂ ᬤᬾᬢᬶ, ᬅᬣ ᬔᭀ ᬅᬯᬶᬲᬬᬾ ᬉᬧ᭄ᬧᬦ᭄ᬦᬢ᭄ᬢᬵ ᬅᬩ᭄ᬩᭀᬳᬵᬭᬶᬓᬵᬯ ᬲᬸᬧᬶᬦᬦ᭄ᬢᬘᬾᬢᬦᬵ. ᬲᭀ ᬧᬦᬾᬲ ᬲᬸᬧᬶᬦᭀ ᬓᬵᬮᬯᬲᬾᬦᬧᬶ ᬤᬶᬯᬵ ᬢᬵᬯ ᬤᬶᬝ᭄ᬞᭀ ᬦ ᬲᬫᬾᬢᬶ, ᬢᬣᬵ ᬧᬞᬫᬬᬵᬫᬾ ᬫᬚ᭄ᬛᬶᬫᬬᬵᬫᬾ ᬧᬘ᭄ᬙᬶᬫᬬᬵᬫᬾ ᬘ. ᬩᬮᬯᬧᬘ᭄ᬘᬹᬲᬾ ᬧᬦ ᬅᬲᬶᬢᬧᬷᬢᬔᬵᬬᬶᬢᬾ ᬲᬫ᭄ᬫᬵ ᬧᬭᬶᬡᬵᬫᬂ ᬕᬢᬾ ᬓᬵᬬᬲ᭄ᬫᬶᬂ ᬑᬚᬵᬬ ᬧᬢᬶᬝ᭄ᬞᬶᬢᬵᬬ ᬅᬭᬸᬡᬾ ᬉᬕ᭄ᬕᬘ᭄ᬙᬫᬵᬦᬾᬯ ᬤᬶᬝ᭄ᬞᭀ ᬲᬸᬧᬶᬦᭀ ᬲᬫᬾᬢᬶ. ᬇᬝ᭄ᬞᬦᬶᬫᬶᬢ᭄ᬢᬂ ᬲᬸᬧᬶᬦᬂ ᬧᬲ᭄ᬲᬦ᭄ᬢᭀ ᬇᬝ᭄ᬞᬂ ᬧᬝᬶᬮᬪᬢᬶ, ᬅᬦᬶᬝ᭄ᬞᬦᬶᬫᬶᬢ᭄ᬢᬂ ᬧᬲ᭄ᬲᬦ᭄ᬢᭀ ᬅᬦᬶᬝ᭄ᬞᬂ.

ᬇᬫᬾ ᬧᬦ ᬧᬜ᭄ᬘ ᬫᬳᬵᬲᬸᬧᬶᬦᬾ ᬦᬾᬯ ᬮᭀᬓᬶᬬᬫᬳᬵᬚᬦᭀ ᬧᬲ᭄ᬲᬢᬶ, ᬦ ᬫᬳᬵᬭᬵᬚᬵᬦᭀ, ᬦ ᬘᬓ᭄ᬓᬯᬢ᭄ᬢᬶᬭᬵᬚᬵᬦᭀ, ᬦ ᬅᬕ᭄ᬕᬲᬵᬯᬓᬵ, ᬦ ᬧᬘ᭄ᬘᬾᬓᬩᬸᬤ᭄ᬥᬵ, ᬦ ᬲᬫ᭄ᬫᬵᬲᬫ᭄ᬩᬸᬤ᭄ᬥᬵ, ᬏᬓᭀ ᬲᬩ᭄ᬩᬜ᭄ᬜᬸᬩᭀᬥᬶᬲᬢ᭄ᬢᭀᬬᬾᬯ ᬧᬲ᭄ᬲᬢᬶ. ᬅᬫ᭄ᬳᬵᬓᬂ ᬧᬦ ᬩᭀᬥᬶᬲᬢ᭄ᬢᭀ ᬓᬤᬵ ᬇᬫᬾ ᬲᬸᬧᬶᬦᬾ ᬧᬲ᭄ᬲᬷᬢᬶ? ‘‘ᬲ᭄ᬯᬾ ᬩᬸᬤ᭄ᬥᭀ ᬪᬯᬶᬲ᭄ᬲᬵᬫᬷ’’ᬢᬶ ᬘᬵᬢᬸᬤ᭄ᬤᬲᬶᬬᬂ ᬧᬓ᭄ᬔᬲ᭄ᬲ ᬭᬢ᭄ᬢᬶᬯᬶᬪᬵᬬᬦᬓᬵᬮᬾ ᬧᬲ᭄ᬲᬶ. ᬢᬾᬭᬲᬶᬬᬦ᭄ᬢᬶᬧᬶ ᬯᬤᬦ᭄ᬢᬶᬬᬾᬯ. ᬲᭀ ᬇᬫᬾ ᬲᬸᬧᬶᬦᬾ ᬤᬶᬲ᭄ᬯᬵ ᬉᬝ᭄ᬞᬵᬬ ᬧᬮ᭄ᬮᬗ᭄ᬓᬂ ᬆᬪᬸᬜ᭄ᬚᬶᬢ᭄ᬯᬵ ᬦᬶᬲᬶᬦ᭄ᬦᭀ ᬘᬶᬦ᭄ᬢᬾᬲᬶ – ‘‘ᬲᬘᬾ ᬫᬬᬵ ᬓᬧᬶᬮᬯᬢ᭄ᬣᬸᬦᬕᬭᬾ ᬇᬫᬾ ᬲᬸᬧᬶᬦᬵ ᬤᬶᬝ᭄ᬞᬵ ᬅᬲ᭄ᬲᬸ, ᬧᬶᬢᬸ ᬫᬳᬵᬭᬵᬚᬲ᭄ᬲ ᬓᬣᬾᬬ᭄ᬬᬂ. ᬲᬘᬾ ᬧᬦ ᬫᬾ ᬫᬵᬢᬵ ᬚᬷᬯᬾᬬ᭄ᬬ, ᬢᬲ᭄ᬲᬵ ᬓᬣᬾᬬ᭄ᬬᬂ. ᬇᬫᬲ᭄ᬫᬶᬂ ᬔᭀ ᬧᬦ ᬞᬵᬦᬾ ᬇᬫᬾᬲᬂ ᬧᬝᬶᬕ᭄ᬕᬵᬳᬓᭀ ᬦᬵᬫ ᬦᬢ᭄ᬣᬶ, ᬅᬳᬫᬾᬯ ᬧᬝᬶᬕᬡ᭄ᬳᬶᬲ᭄ᬲᬵᬫᬷ’’ᬢᬶ. ᬢᬢᭀ ‘‘ᬇᬤᬂ ᬇᬫᬲ᭄ᬲ ᬧᬸᬩ᭄ᬩᬦᬶᬫᬶᬢ᭄ᬢᬂ ᬇᬤᬂ ᬇᬫᬲ᭄ᬲᬵ’’ᬢᬶ ᬲᬬᬫᬾᬯ ᬲᬸᬧᬶᬦᬾ ᬧᬝᬶᬕ᭄ᬕᬡ᭄ᬳᬶᬢ᭄ᬯᬵ ᬉᬭᬸᬯᬾᬮᬕᬵᬫᬾ ᬲᬸᬚᬵᬢᬵᬬ ᬤᬶᬦ᭄ᬦᬂ ᬧᬵᬬᬵᬲᬂ ᬧᬭᬶᬪᬸᬜ᭄ᬚᬶᬢ᭄ᬯᬵ ᬩᭀᬥᬶᬫᬡ᭄ᬟᬂ ᬆᬭᬸᬬ᭄ᬳ ᬩᭀᬥᬶᬂ ᬧᬢ᭄ᬯᬵ ᬅᬦᬸᬓ᭄ᬓᬫᬾᬦ ᬚᬾᬢᬯᬦᬾ ᬯᬶᬳᬭᬦ᭄ᬢᭀ ᬅᬢ᭄ᬢᬦᭀ ᬫᬓᬸᬮᬩᬸᬤ᭄ᬥᬓᬵᬮᬾ ᬤᬶᬝ᭄ᬞᬾ ᬧᬜ᭄ᬘ ᬫᬳᬵᬲᬸᬧᬶᬦᬾ ᬯᬶᬢ᭄ᬣᬵᬭᬾᬢᬸᬂ ᬪᬶᬓ᭄ᬔᬹ ᬆᬫᬦ᭄ᬢᬾᬢ᭄ᬯᬵ ᬇᬫᬂ ᬤᬾᬲᬦᬂ ᬆᬭᬪᬶ.

ᬢᬢ᭄ᬣ ᬫᬳᬵᬧᬣᬯᬷᬢᬶ ᬘᬓ᭄ᬓᬯᬵᬮ᬴ᬕᬩ᭄ᬪᬂ ᬧᬹᬭᬾᬢ᭄ᬯᬵ ᬞᬶᬢᬵ ᬫᬳᬵᬧᬣᬯᬷ. ᬫᬳᬵᬲᬬᬦᬂ ᬅᬳᭀᬲᬷᬢᬶ ᬲᬶᬭᬶᬲᬬᬦᬂ ᬅᬳᭀᬲᬶ. ᬑᬳᬶᬢᭀᬢᬶ ᬞᬧᬶᬢᭀ. ᬲᭀ ᬧᬦ ᬦ ᬉᬤᬓᬲ᭄ᬫᬶᬂᬬᬾᬯ ᬞᬧᬶᬢᭀ ᬅᬳᭀᬲᬶ, ᬅᬣ ᬔᭀ ᬧᬵᬘᬷᬦᬲᬫᬸᬤ᭄ᬤᬲ᭄ᬲ ᬉᬧᬭᬹᬧᬭᬶᬪᬵᬕᬾᬦ ᬕᬦ᭄ᬢ᭄ᬯᬵ ᬧᬵᬘᬷᬦᬘᬓ᭄ᬓᬯᬵᬮ᬴ᬫᬢ᭄ᬣᬓᬾ ᬞᬧᬶᬢᭀ ᬅᬳᭀᬲᬷᬢᬶ ᬯᬾᬤᬶᬢᬩ᭄ᬩᭀ. ᬧᬘ᭄ᬙᬶᬫᬾ ᬲᬫᬸᬤ᭄ᬤᬾ ᬤᬓ᭄ᬔᬶᬡᬾ ᬲᬫᬸᬤ᭄ᬤᬾᬢᬶ ᬏᬢᬾᬲᬸᬧᬶ ᬏᬲᬾᬯ ᬦᬬᭀ. ᬢᬶᬭᬶᬬᬵ ᬦᬵᬫ ᬢᬶᬡᬚᬵᬢᬷᬢᬶ ᬤᬩ᭄ᬩᬢᬶᬡᬂ ᬯᬸᬘ᭄ᬘᬢᬶ. ᬦᬵᬪᬶᬬᬵ ᬉᬕ᭄ᬕᬦ᭄ᬢ᭄ᬯᬵ ᬦᬪᬂ ᬆᬳᬘ᭄ᬘ ᬞᬶᬢᬵ ᬅᬳᭀᬲᬷᬢᬶ ᬦᬗ᭄ᬕᬮᬫᬢ᭄ᬢᬾᬦ ᬭᬢ᭄ᬢᬤᬡ᭄ᬟᬾᬦ ᬦᬵᬪᬶᬢᭀ ᬉᬕ᭄ᬕᬦ᭄ᬢ᭄ᬯᬵ ᬧᬲ᭄ᬲᬦ᭄ᬢᬲ᭄ᬲ ᬧᬲ᭄ᬲᬦ᭄ᬢᬲ᭄ᬲᬾᬯ ᬯᬶᬤᬢ᭄ᬣᬶᬫᬢ᭄ᬢᬂ ᬭᬢᬦᬫᬢ᭄ᬢᬂ ᬩ᭄ᬬᬵᬫᬫᬢ᭄ᬢᬂ ᬬᬝ᭄ᬞᬶᬫᬢ᭄ᬢᬂ ᬕᬵᬯᬸᬢᬫᬢ᭄ᬢᬂ ᬅᬟ᭄ᬠᬬᭀᬚᬦᬫᬢ᭄ᬢᬂ ᬬᭀᬚᬦᬫᬢ᭄ᬢᬦ᭄ᬢᬶ ᬏᬯᬂ ᬉᬕ᭄ᬕᬦ᭄ᬢ᭄ᬯᬵ ᬉᬕ᭄ᬕᬦ᭄ᬢ᭄ᬯᬵ ᬅᬦᬾᬓᬬᭀᬚᬦᬲᬳᬲ᭄ᬲᬂ ᬦᬪᬂ ᬆᬳᬘ᭄ᬘ ᬞᬶᬢᬵ ᬅᬳᭀᬲᬶ. ᬧᬵᬤᬾᬳᬶ ᬉᬲ᭄ᬲᬓ᭄ᬓᬶᬢ᭄ᬯᬵᬢᬶ ᬅᬕ᭄ᬕᬦᬔᬢᭀ ᬧᬝ᭄ᬞᬵᬬ ᬧᬵᬤᬾᬳᬶ ᬅᬪᬶᬭᬸᬳᬶᬢ᭄ᬯᬵ. ᬦᬵᬦᬵᬯᬡ᭄ᬡᬵᬢᬶ ᬏᬓᭀ ᬦᬷᬮᬯᬡ᭄ᬡᭀ, ᬏᬓᭀ ᬧᬷᬢᬯᬡ᭄ᬡᭀ, ᬏᬓᭀ ᬮᭀᬳᬶᬢᬯᬡ᭄ᬡᭀ, ᬏᬓᭀ ᬧᬡ᭄ᬟᬸᬧᬮᬵᬲᬯᬡ᭄ᬡᭀᬢᬶ ᬏᬯᬂ ᬦᬵᬦᬵᬯᬡ᭄ᬡᬵ. ᬲᬾᬢᬵᬢᬶ ᬧᬡ᭄ᬟᬭᬵ ᬧᬭᬶᬲᬸᬤ᭄ᬥᬵ. ᬫᬳᬢᭀ ᬫᬷᬮ᬴᭄ᬳᬧᬩ᭄ᬩᬢᬲ᭄ᬲᬵᬢᬶ ᬢᬶᬬᭀᬚᬦᬸᬩ᭄ᬩᬾᬥᬲ᭄ᬲ ᬕᬹᬣᬧᬩ᭄ᬩᬢᬲ᭄ᬲ. ᬉᬧᬭᬹᬧᬭᬶ ᬘᬗ᭄ᬓᬫᬢᬷᬢᬶ ᬫᬢ᭄ᬣᬓᬫᬢ᭄ᬣᬓᬾ ᬘᬗ᭄ᬓᬫᬢᬶ. ᬤᬷᬖᬵᬬᬸᬓᬩᬸᬤ᭄ᬥᬵ ᬧᬦ ᬢᬶᬬᭀᬚᬦᬶᬓᬾ ᬫᬷᬮ᬴᭄ᬳᬧᬩ᭄ᬩᬢᬾ ᬅᬦᬸᬧᬯᬶᬲᬶᬢ᭄ᬯᬵ ᬦᬶᬲᬶᬦ᭄ᬦᬵ ᬯᬶᬬ ᬳᭀᬦ᭄ᬢᬶ.

ᬏᬯᬂ ᬏᬢ᭄ᬢᬓᬾᬦ ᬞᬵᬦᬾᬦ ᬧᬸᬩ᭄ᬩᬦᬶᬫᬶᬢ᭄ᬢᬵᬦᬶ ᬤᬲ᭄ᬲᬾᬢ᭄ᬯᬵ ᬇᬤᬵᬦᬶ ᬲᬳ ᬧᬸᬩ᭄ᬩᬦᬶᬫᬶᬢ᭄ᬢᬾᬳᬶ ᬧᬝᬶᬮᬵᬪᬂ ᬤᬲ᭄ᬲᬾᬢᬸᬂ ᬬᬫ᭄ᬧᬶ, ᬪᬶᬓ᭄ᬔᬯᬾᬢᬶᬆᬤᬶᬫᬵᬳ. ᬢᬢ᭄ᬣ ᬲᬩ᭄ᬩᬕᬸᬡᬤᬵᬬᬓᬢ᭄ᬢᬵ ᬩᬸᬤ᭄ᬥᬵᬦᬂ ᬅᬭᬳᬢ᭄ᬢᬫᬕ᭄ᬕᭀ ᬅᬦᬸᬢ᭄ᬢᬭᬵ ᬲᬫ᭄ᬫᬵᬲᬫ᭄ᬩᭀᬥᬶ ᬦᬵᬫ. ᬢᬲ᭄ᬫᬵ ᬬᬂ ᬲᭀ ᬘᬓ᭄ᬓᬯᬵᬮ᬴ᬫᬳᬵᬧᬣᬯᬶᬂ ᬲᬶᬭᬶᬲᬬᬦᬪᬹᬢᬂ ᬅᬤ᭄ᬤᬲ, ᬢᬂ ᬩᬸᬤ᭄ᬥᬪᬵᬯᬲ᭄ᬲ ᬧᬸᬩ᭄ᬩᬦᬶᬫᬶᬢ᭄ᬢᬂ. ᬬᬂ ᬳᬶᬫᬯᬦ᭄ᬢᬧᬩ᭄ᬩᬢᬭᬵᬚᬵᬦᬂ ᬩᬶᬫ᭄ᬩᭀᬳᬦᬂ ᬅᬤ᭄ᬤᬲ, ᬢᬂ ᬲᬩ᭄ᬩᬜ᭄ᬜᬸᬢᬜ᭄ᬜᬵᬡᬩᬶᬫ᭄ᬩᭀᬳᬦᬲ᭄ᬲ ᬧᬸᬩ᭄ᬩᬦᬶᬫᬶᬢ᭄ᬢᬂ. ᬬᬂ ᬘᬢ᭄ᬢᬵᬭᭀ ᬳᬢ᭄ᬣᬧᬵᬤᬾ ᬘᬓ᭄ᬓᬯᬵᬮ᬴ᬫᬢ᭄ᬣᬓᬾ ᬞᬶᬢᬾ ᬅᬤ᭄ᬤᬲ, ᬢᬂ ᬥᬫ᭄ᬫᬘᬓ᭄ᬓᬲ᭄ᬲ ᬅᬧ᭄ᬧᬝᬶᬯᬢ᭄ᬢᬶᬬᬪᬵᬯᬾ ᬧᬸᬩ᭄ᬩᬦᬶᬫᬶᬢ᭄ᬢᬂ. ᬬᬂ ᬅᬢ᭄ᬢᬵᬦᬂ ᬉᬢ᭄ᬢᬵᬦᬓᬂ ᬦᬶᬧᬦ᭄ᬦᬂ ᬅᬤ᭄ᬤᬲ, ᬢᬂ ᬢᬷᬲᬸ ᬪᬯᬾᬲᬸ ᬅᬯᬓᬸᬚ᭄ᬚᬵᬦᬂ ᬲᬢ᭄ᬢᬵᬦᬂ ᬉᬢ᭄ᬢᬵᬦᬫᬸᬔᬪᬵᬯᬲ᭄ᬲ ᬧᬸᬩ᭄ᬩᬦᬶᬫᬶᬢ᭄ᬢᬂ. ᬬᬂ ᬅᬓ᭄ᬔᬷᬦᬶ ᬉᬫ᭄ᬫᬷᬮᬾᬢ᭄ᬯᬵ ᬧᬲ᭄ᬲᬦ᭄ᬢᭀ ᬯᬶᬬ ᬅᬳᭀᬲᬶ, ᬢᬂ ᬤᬶᬩ᭄ᬩᬘᬓ᭄ᬔᬸᬧᬝᬶᬮᬵᬪᬲ᭄ᬲ ᬧᬸᬩ᭄ᬩᬦᬶᬫᬶᬢ᭄ᬢᬂ. ᬬᬂ ᬬᬵᬯ ᬪᬯᬕ᭄ᬕᬵ ᬏᬓᬵᬮᭀᬓᬂ ᬅᬳᭀᬲᬶ, ᬢᬂ ᬅᬦᬵᬯᬭᬡᬜᬵᬡᬲ᭄ᬲ ᬧᬸᬩ᭄ᬩᬦᬶᬫᬶᬢ᭄ᬢᬂ. ᬲᬾᬲᬂ ᬧᬵᬮ᬴ᬶᬯᬲᬾᬦᬾᬯ ᬯᬾᬤᬶᬢᬩ᭄ᬩᬦ᭄ᬢᬶ.

᭗. ᬯᬲ᭄ᬲᬲᬸᬢ᭄ᬢᬯᬡ᭄ᬡᬦᬵ

᭑᭙᭗. ᬲᬢ᭄ᬢᬫᬾ ᬦᬾᬫᬶᬢ᭄ᬢᬵᬢᬶ ᬦᬶᬫᬶᬢ᭄ᬢᬧᬵᬞᬓᬵ. ᬢᬾᬚᭀᬥᬵᬢᬸ ᬧᬓᬸᬧ᭄ᬧᬢᬷᬢᬶ ᬫᬳᬵᬅᬕ᭄ᬕᬶᬓ᭄ᬔᬦ᭄ᬥᭀ ᬉᬧ᭄ᬧᬚ᭄ᬚᬢᬶ. ᬧᬵᬡᬶᬦᬵ ᬉᬤᬓᬂ ᬲᬫ᭄ᬧᬝᬶᬘ᭄ᬙᬶᬢ᭄ᬯᬵᬢᬶ ᬉᬧ᭄ᬧᬦ᭄ᬦᬂ ᬉᬢᬸᬲᬫᬸᬝ᭄ᬞᬵᬦᬂ ᬉᬤᬓᬂ ᬢᬶᬬᭀᬚᬦᬲᬢᬾᬦ ᬳᬢ᭄ᬣᬾᬦ ᬧᬝᬶᬕ᭄ᬕᬳᬾᬢ᭄ᬯᬵ. ᬧᬫᬢ᭄ᬢᬵ ᬳᭀᬦ᭄ᬢᬷᬢᬶ ᬅᬢ᭄ᬢᬦᭀ ᬓᬷᬮ᬴ᬵᬬ ᬧᬫᬢ᭄ᬢᬵ ᬳᭀᬦ᭄ᬢᬶ ᬯᬶᬧ᭄ᬧᬯᬸᬝ᭄ᬞᬲᬢᬶᬦᭀ. ᬢᬾᬲᬜ᭄ᬳᬶ ᬲᬓᬵᬬ ᬭᬢᬶᬬᬵ ‘‘ᬭᬫᬵᬫᬵ’’ᬢᬶ ᬘᬶᬢ᭄ᬢᬾ ᬉᬧ᭄ᬧᬦ᭄ᬦᬾ ᬅᬓᬵᬮᬾᬧᬶ ᬤᬾᬯᭀ ᬯᬲ᭄ᬲᬢᬶ, ᬢᬤᬪᬵᬯᬾ ᬦ ᬯᬲ᭄ᬲᬢᬶ. ᬢᬂ ᬲᬦ᭄ᬥᬵᬬᬾᬢᬂ ᬯᬸᬢ᭄ᬢᬂ – ‘‘ᬦ ᬓᬵᬮᬯᬲ᭄ᬲ’’ᬦ᭄ᬢᬶ. ᬅᬝ᭄ᬞᬫᬦᬯᬫᬵᬦᬶ ᬉᬢ᭄ᬢᬵᬦᬢ᭄ᬣᬵᬦᬾᬯ.

᭑᭐. ᬦᬶᬲ᭄ᬲᬵᬭᬡᬷᬬᬲᬸᬢ᭄ᬢᬯᬡ᭄ᬡᬦᬵ

᭒᭐᭐. ᬤᬲᬫᬾ ᬦᬶᬲ᭄ᬲᬵᬭᬡᬷᬬᬵᬢᬶ ᬦᬶᬲ᭄ᬲᬝᬵ ᬯᬶᬲᬜ᭄ᬜᬸᬢ᭄ᬢᬵ. ᬥᬵᬢᬸᬬᭀᬢᬶ ᬅᬢ᭄ᬢᬲᬸᬜ᭄ᬜᬲᬪᬵᬯᬵ. ᬓᬵᬫᬂ ᬫᬦᬲᬶᬓᬭᭀᬢᭀᬢᬶ ᬓᬵᬫᬂ ᬫᬦᬲᬶᬓᬭᭀᬦ᭄ᬢᬲ᭄ᬲ, ᬅᬲᬸᬪᬚ᭄ᬛᬵᬦᬢᭀ ᬯᬸᬝ᭄ᬞᬵᬬ ᬅᬕᬤᬂ ᬕᬳᬾᬢ᭄ᬯᬵ ᬯᬶᬲᬂ ᬯᬷᬫᬂᬲᬦ᭄ᬢᭀ ᬯᬶᬬ ᬯᬷᬫᬂᬲᬦᬢ᭄ᬣᬂ ᬓᬵᬫᬵᬪᬶᬫᬸᬔᬂ ᬘᬶᬢ᭄ᬢᬂ ᬧᬾᬲᬾᬦ᭄ᬢᬲ᭄ᬲᬵᬢᬶ ᬅᬢ᭄ᬣᭀ. ᬦ ᬧᬓ᭄ᬔᬦ᭄ᬤᬢᬷᬢᬶ ᬦᬧ᭄ᬧᬯᬶᬲᬢᬶ. ᬦᬧ᭄ᬧᬲᬷᬤᬢᬷᬢᬶ ᬧᬲᬵᬤᬂ ᬦᬵᬧᬚ᭄ᬚᬢᬶ. ᬦ ᬲᬦ᭄ᬢᬶᬝ᭄ᬞᬢᬷᬢᬶ ᬦᬧ᭄ᬧᬢᬶᬝ᭄ᬞᬳᬢᬶ. ᬦ ᬯᬶᬫᬸᬘ᭄ᬘᬢᬷᬢᬶ ᬦ ᬅᬥᬶᬫᬸᬘ᭄ᬘᬢᬶ. ᬬᬣᬵ ᬧᬦ ᬓᬸᬓ᭄ᬓᬸᬝᬧᬢ᭄ᬢᬂ ᬯᬵ ᬦ᭄ᬳᬵᬭᬸᬤᬤ᭄ᬤᬸᬮᬂ ᬯᬵ ᬅᬕ᭄ᬕᬶᬫ᭄ᬳᬶ ᬧᬓ᭄ᬔᬶᬢ᭄ᬢᬂ ᬧᬝᬶᬮᬷᬬᬢᬶ ᬧᬢᬶᬓᬸᬝᬢᬶ ᬧᬢᬶᬯᬝ᭄ᬝᬢᬶ ᬦ ᬲᬂᬧᬲᬵᬭᬷᬬᬢᬶ, ᬏᬯᬂ ᬧᬝᬶᬮᬷᬬᬢᬶ ᬦ ᬲᬂᬧᬲᬵᬭᬷᬬᬢᬶ. ᬦᬾᬓ᭄ᬔᬫ᭄ᬫᬂ ᬔᭀ ᬧᬦᬵᬢᬶ ᬇᬥ ᬦᬾᬓ᭄ᬔᬫ᭄ᬫᬂ ᬦᬵᬫ ᬅᬲᬸᬪᬾᬲᬸ ᬧᬞᬫᬚ᭄ᬛᬵᬦᬂ, ᬢᬤᬲ᭄ᬲ ᬫᬦᬲᬶᬓᬭᭀᬢᭀ ᬘᬶᬢ᭄ᬢᬂ ᬧᬓ᭄ᬔᬦ᭄ᬤᬢᬶ. ᬢᬲ᭄ᬲ ᬢᬂ ᬘᬶᬢ᭄ᬢᬦ᭄ᬢᬶ ᬢᬲ᭄ᬲ ᬢᬂ ᬅᬲᬸᬪᬚ᭄ᬛᬵᬦᬘᬶᬢ᭄ᬢᬂ. ᬲᬸᬕᬢᬦ᭄ᬢᬶ ᬕᭀᬘᬭᬾ ᬕᬢᬢ᭄ᬢᬵ ᬲᬸᬝ᭄ᬞᬸ ᬕᬢᬂ. ᬲᬸᬪᬵᬯᬶᬢᬦ᭄ᬢᬶ ᬅᬳᬵᬦᬪᬵᬕᬶᬬᬢ᭄ᬢᬵ ᬲᬸᬝ᭄ᬞᬸ ᬪᬵᬯᬶᬢᬂ. ᬲᬸᬯᬸᬝ᭄ᬞᬶᬢᬦ᭄ᬢᬶ ᬓᬵᬫᬢᭀ ᬯᬸᬝ᭄ᬞᬶᬢᬂ. ᬲᬸᬯᬶᬫᬸᬢ᭄ᬢᬦ᭄ᬢᬶ ᬓᬵᬫᬾᬳᬶ ᬲᬸᬝ᭄ᬞᬸ ᬯᬶᬫᬸᬢ᭄ᬢᬂ. ᬓᬵᬫᬧᬘ᭄ᬘᬬᬵ ᬆᬲᬯᬵ ᬦᬵᬫ ᬓᬵᬫᬳᬾᬢᬸᬓᬵ ᬘᬢ᭄ᬢᬵᬭᭀ ᬆᬲᬯᬵ. ᬯᬶᬖᬵᬢᬵᬢᬶ ᬤᬸᬓ᭄ᬔᬵ. ᬧᬭᬶᬮ᬴ᬵᬳᬵᬢᬶ ᬓᬵᬫᬭᬵᬕᬧᬭᬶᬮ᬴ᬵᬳᬵ. ᬦ ᬲᭀ ᬢᬂ ᬯᬾᬤᬦᬂ ᬯᬾᬤᬶᬬᬢᬷᬢᬶ ᬲᭀ ᬢᬂ ᬓᬵᬫᬯᬾᬤᬦᬂ ᬯᬶᬖᬵᬢᬧᬭᬶᬮ᬴ᬵᬳᬯᬾᬤᬦᬜ᭄ᬘ ᬦ ᬯᬾᬤᬶᬬᬢᬶ. ᬇᬤᬫᬓ᭄ᬔᬵᬢᬂ ᬓᬵᬫᬵᬦᬂ ᬦᬶᬲ᭄ᬲᬭᬡᬦ᭄ᬢᬶ ᬇᬤᬂ ᬅᬲᬸᬪᬚ᭄ᬛᬵᬦᬂ ᬓᬵᬫᬾᬳᬶ ᬦᬶᬲ᭄ᬲᬝᬢ᭄ᬢᬵ ᬓᬵᬫᬵᬦᬂ ᬦᬶᬲ᭄ᬲᬭᬡᬦ᭄ᬢᬶ ᬅᬓ᭄ᬔᬵᬢᬂ. ᬬᭀ ᬧᬦ ᬢᬂ ᬛᬵᬦᬂ ᬧᬵᬤᬓᬂ ᬓᬢ᭄ᬯᬵ ᬲᬗ᭄ᬔᬵᬭᬾ ᬲᬫ᭄ᬫᬲᬦ᭄ᬢᭀ ᬢᬢᬶᬬᬫᬕ᭄ᬕᬂ ᬧᬢ᭄ᬯᬵ ᬅᬦᬵᬕᬵᬫᬶᬨᬮᬾᬦ ᬦᬶᬩ᭄ᬩᬵᬦᬂ ᬤᬶᬲ᭄ᬯᬵ ‘‘ᬧᬸᬦ ᬓᬵᬫᬵ ᬦᬵᬫ ᬦᬢ᭄ᬣᬷ’’ᬢᬶ ᬚᬵᬦᬵᬢᬶ. ᬢᬲ᭄ᬲ ᬘᬶᬢ᭄ᬢᬂ ᬅᬘ᭄ᬘᬦ᭄ᬢᬦᬶᬲ᭄ᬲᬭᬡᬫᬾᬯ. ᬲᬾᬲᬧᬤᬾᬲᬸᬧᬶ ᬏᬲᬾᬯ ᬦᬬᭀ.

ᬅᬬᬂ ᬧᬦ ᬯᬶᬲᬾᬲᭀ – ᬤᬸᬢᬶᬬᬯᬵᬭᬾ ᬫᬾᬢ᭄ᬢᬵᬛᬵᬦᬵᬦᬶ ᬩ᭄ᬬᬵᬧᬵᬤᬲ᭄ᬲ ᬦᬶᬲ᭄ᬲᬭᬡᬂ ᬦᬵᬫ. ᬢᬢᬶᬬᬯᬵᬭᬾ ᬓᬭᬸᬡᬵᬛᬵᬦᬵᬦᬶ ᬯᬶᬳᬶᬂᬲᬵᬬ ᬦᬶᬲ᭄ᬲᬭᬡᬂ ᬦᬵᬫ. ᬘᬢᬸᬢ᭄ᬣᬯᬵᬭᬾ ᬅᬭᬹᬧᬚ᭄ᬛᬵᬦᬵᬦᬶ ᬭᬹᬧᬵᬦᬂ ᬦᬶᬲ᭄ᬲᬭᬡᬂ ᬦᬵᬫ. ᬅᬘ᭄ᬘᬦ᭄ᬢᬦᬶᬲ᭄ᬲᬭᬡᬜ᭄ᬘᬾᬢ᭄ᬣ ᬅᬭᬳᬢ᭄ᬢᬨᬮᬂ ᬬᭀᬚᬾᬢᬩ᭄ᬩᬂ. ᬧᬜ᭄ᬘᬫᬯᬵᬭᬾ ᬲᬓ᭄ᬓᬵᬬᬂ ᬫᬦᬲᬶᬓᬭᭀᬢᭀᬢᬶ ᬲᬸᬤ᭄ᬥᬲᬗ᭄ᬔᬵᬭᬾ ᬧᬭᬶᬕ᭄ᬕᬡ᭄ᬳᬶᬢ᭄ᬯᬵ ᬅᬭᬳᬢ᭄ᬢᬂ ᬧᬢ᭄ᬢᬲ᭄ᬲ ᬲᬸᬓ᭄ᬔᬯᬶᬧᬲ᭄ᬲᬓᬲ᭄ᬲ ᬨᬮᬲᬫᬵᬧᬢ᭄ᬢᬶᬢᭀ ᬯᬸᬝ᭄ᬞᬵᬬ ᬯᬷᬫᬂᬲᬦᬢ᭄ᬣᬂ ᬧᬜ᭄ᬘᬸᬧᬵᬤᬵᬦᬓ᭄ᬔᬦ᭄ᬥᬵᬪᬶᬫᬸᬔᬂ ᬘᬶᬢ᭄ᬢᬂ ᬧᬾᬲᬾᬦ᭄ᬢᬲ᭄ᬲ. ᬇᬤᬫᬓ᭄ᬔᬵᬢᬂ ᬲᬓ᭄ᬓᬵᬬᬲ᭄ᬲ ᬦᬶᬲ᭄ᬲᬭᬡᬦ᭄ᬢᬶ ᬇᬤᬂ ᬅᬭᬳᬢ᭄ᬢᬫᬕ᭄ᬕᬾᬦ ᬘ ᬨᬮᬾᬦ ᬘ ᬦᬶᬩ᭄ᬩᬵᬦᬂ ᬤᬶᬲ᭄ᬯᬵ ᬞᬶᬢᬲ᭄ᬲ ᬪᬶᬓ᭄ᬔᬸᬦᭀ ‘‘ᬧᬸᬦ ᬲᬓ᭄ᬓᬵᬬᭀ ᬦᬢ᭄ᬣᬷ’’ᬢᬶ ᬉᬧ᭄ᬧᬦ᭄ᬦᬂ ᬅᬭᬳᬢ᭄ᬢᬨᬮᬲᬫᬵᬧᬢ᭄ᬢᬶᬘᬶᬢ᭄ᬢᬂ ᬲᬓ᭄ᬓᬵᬬᬲ᭄ᬲ ᬦᬶᬲ᭄ᬲᬭᬡᬦ᭄ᬢᬶ ᬅᬓ᭄ᬔᬵᬢᬂ. ᬇᬤᬵᬦᬶ ᬏᬯᬂ ᬲᬓ᭄ᬓᬵᬬᬦᬶᬲ᭄ᬲᬭᬡᬂ ᬦᬶᬭᭀᬥᬂ ᬧᬢ᭄ᬯᬵ ᬞᬶᬢᬲ᭄ᬲ ᬔᬷᬡᬵᬲᬯᬲ᭄ᬲ ᬯᬡ᭄ᬡᬂ ᬓᬣᬾᬦ᭄ᬢᭀ ᬢᬲ᭄ᬲ ᬓᬵᬫᬦᬦ᭄ᬤᬷᬧᬶ ᬦᬵᬦᬸᬲᬾᬢᬷᬢᬶᬆᬤᬶᬫᬵᬳ. ᬢᬢ᭄ᬣ ᬦᬵᬦᬸᬲᬾᬢᬷᬢᬶ ᬦ ᬦᬶᬩ᭄ᬩᬢ᭄ᬢᬢᬶ. ᬅᬦᬦᬸᬲᬬᬵᬢᬶ ᬅᬦᬶᬩ᭄ᬩᬢ᭄ᬢᬶᬬᬵ. ᬲᬾᬲᬫᬾᬢ᭄ᬣ ᬉᬢ᭄ᬢᬵᬦᬢ᭄ᬣᬫᬾᬯᬵᬢᬶ.

ᬩ᭄ᬭᬵᬳ᭄ᬫᬡᬯᬕ᭄ᬕᭀ ᬧᬜ᭄ᬘᬫᭀ.

ᬘᬢᬸᬢ᭄ᬣᬧᬡ᭄ᬡᬵᬲᬓᬂ ᬦᬶᬝ᭄ᬞᬶᬢᬂ.