᭙. ᬧᬭᬶᬳᬵᬦᬲᬸᬢ᭄ᬢᬂ

᭗᭙. ‘‘ᬅᬝ᭄ᬞᬶᬫᬾ, ᬪᬶᬓ᭄ᬔᬯᬾ, ᬥᬫ᭄ᬫᬵ ᬲᬾᬔᬲ᭄ᬲ ᬪᬶᬓ᭄ᬔᬸᬦᭀ ᬧᬭᬶᬳᬵᬦᬵᬬ ᬲᬂᬯᬢ᭄ᬢᬦ᭄ᬢᬶ. ᬓᬢᬫᬾ ᬅᬝ᭄ᬞ? ᬓᬫ᭄ᬫᬵᬭᬵᬫᬢᬵ, ᬪᬲ᭄ᬲᬵᬭᬵᬫᬢᬵ, ᬦᬶᬤ᭄ᬤᬵᬭᬵᬫᬢᬵ, ᬲᬗ᭄ᬕᬡᬶᬓᬵᬭᬵᬫᬢᬵ, ᬇᬦ᭄ᬤ᭄ᬭᬶᬬᬾᬲᬸ ᬅᬕᬸᬢ᭄ᬢᬤ᭄ᬯᬵᬭᬢᬵ, ᬪᭀᬚᬦᬾ ᬅᬫᬢ᭄ᬢᬜ᭄ᬜᬸᬢᬵ, ᬲᬂᬲᬕ᭄ᬕᬵᬭᬵᬫᬢᬵ, ᬧᬧᬜ᭄ᬘᬵᬭᬵᬫᬢᬵ – ᬇᬫᬾ ᬔᭀ, ᬪᬶᬓ᭄ᬔᬯᬾ, ᬅᬝ᭄ᬞ ᬥᬫ᭄ᬫᬵ ᬲᬾᬔᬲ᭄ᬲ ᬪᬶᬓ᭄ᬔᬸᬦᭀ ᬧᬭᬶᬳᬵᬦᬵᬬ ᬲᬂᬯᬢ᭄ᬢᬦ᭄ᬢᬶ.

‘‘ᬅᬝ᭄ᬞᬶᬫᬾ, ᬪᬶᬓ᭄ᬔᬯᬾ, ᬥᬫ᭄ᬫᬵ ᬲᬾᬔᬲ᭄ᬲ ᬪᬶᬓ᭄ᬔᬸᬦᭀ ᬅᬧᬭᬶᬳᬵᬦᬵᬬ ᬲᬂᬯᬢ᭄ᬢᬦ᭄ᬢᬶ. ᬓᬢᬫᬾ ᬅᬝ᭄ᬞ? ᬦ ᬓᬫ᭄ᬫᬵᬭᬵᬫᬢᬵ, ᬦ ᬪᬲ᭄ᬲᬵᬭᬵᬫᬢᬵ, ᬦ ᬦᬶᬤ᭄ᬤᬵᬭᬵᬫᬢᬵ, ᬦ ᬲᬗ᭄ᬕᬡᬶᬓᬵᬭᬵᬫᬢᬵ, ᬇᬦ᭄ᬤ᭄ᬭᬶᬬᬾᬲᬸ ᬕᬸᬢ᭄ᬢᬤ᭄ᬯᬵᬭᬢᬵ, ᬪᭀᬚᬦᬾ ᬫᬢ᭄ᬢᬜ᭄ᬜᬸᬢᬵ, ᬅᬲᬂᬲᬕ᭄ᬕᬵᬭᬵᬫᬢᬵ, ᬦᬶᬧ᭄ᬧᬧᬜ᭄ᬘᬵᬭᬵᬫᬢᬵ – ᬇᬫᬾ ᬔᭀ, ᬪᬶᬓ᭄ᬔᬯᬾ, ᬅᬝ᭄ᬞ ᬥᬫ᭄ᬫᬵ ᬲᬾᬔᬲ᭄ᬲ ᬪᬶᬓ᭄ᬔᬸᬦᭀ ᬅᬧᬭᬶᬳᬵᬦᬵᬬ ᬲᬂᬯᬢ᭄ᬢᬦ᭄ᬢᬷ’’ᬢᬶ. ᬦᬯᬫᬂ.