᭑. ᬅᬧ᭄ᬧᬫᬵᬤᬕᬵᬭᬯᬲᬸᬢ᭄ᬢᬂ

᭓᭒. ᬅᬣ ᬔᭀ ᬅᬜ᭄ᬜᬢᬭᬵ ᬤᬾᬯᬢᬵ ᬅᬪᬶᬓ᭄ᬓᬦ᭄ᬢᬵᬬ ᬭᬢ᭄ᬢᬶᬬᬵ ᬅᬪᬶᬓ᭄ᬓᬦ᭄ᬢᬯᬡ᭄ᬡᬵ ᬓᬾᬯᬮᬓᬧ᭄ᬧᬂ ᬚᬾᬢᬯᬦᬂ ᬑᬪᬵᬲᬾᬢ᭄ᬯᬵ ᬬᬾᬦ ᬪᬕᬯᬵ ᬢᬾᬦᬸᬧᬲᬗ᭄ᬓᬫᬶ; ᬉᬧᬲᬗ᭄ᬓᬫᬶᬢ᭄ᬯᬵ ᬪᬕᬯᬦ᭄ᬢᬂ ᬅᬪᬶᬯᬵᬤᬾᬢ᭄ᬯᬵ ᬏᬓᬫᬦ᭄ᬢᬂ ᬅᬝ᭄ᬞᬵᬲᬶ. ᬏᬓᬫᬦ᭄ᬢᬂ ᬞᬶᬢᬵ ᬔᭀ ᬲᬵ ᬤᬾᬯᬢᬵ ᬪᬕᬯᬦ᭄ᬢᬂ ᬏᬢᬤᬯᭀᬘ –

‘‘ᬲᬢ᭄ᬢᬶᬫᬾ, ᬪᬦ᭄ᬢᬾ, ᬥᬫ᭄ᬫᬵ ᬪᬶᬓ᭄ᬔᬸᬦᭀ ᬅᬧᬭᬶᬳᬵᬦᬵᬬ ᬲᬂᬯᬢ᭄ᬢᬦ᭄ᬢᬶ. ᬓᬢᬫᬾ ᬲᬢ᭄ᬢ? ᬲᬢ᭄ᬣᬸᬕᬵᬭᬯᬢᬵ, ᬥᬫ᭄ᬫᬕᬵᬭᬯᬢᬵ, ᬲᬗ᭄ᬖᬕᬵᬭᬯᬢᬵ, ᬲᬶᬓ᭄ᬔᬵᬕᬵᬭᬯᬢᬵ, ᬲᬫᬵᬥᬶᬕᬵᬭᬯᬢᬵ, ᬅᬧ᭄ᬧᬫᬵᬤᬕᬵᬭᬯᬢᬵ, ᬧᬝᬶᬲᬦ᭄ᬣᬵᬭᬕᬵᬭᬯᬢᬵ. ᬇᬫᬾ ᬔᭀ, ᬪᬦ᭄ᬢᬾ, ᬲᬢ᭄ᬢ ᬥᬫ᭄ᬫᬵ ᬪᬶᬓ᭄ᬔᬸᬦᭀ ᬅᬧᬭᬶᬳᬵᬦᬵᬬ ᬲᬂᬯᬢ᭄ᬢᬦ᭄ᬢᬷ’’ᬢᬶ. ᬇᬤᬫᬯᭀᬘ ᬲᬵ ᬤᬾᬯᬢᬵ. ᬲᬫᬦᬸᬜ᭄ᬜᭀ ᬲᬢ᭄ᬣᬵ ᬅᬳᭀᬲᬶ. ᬅᬣ ᬔᭀ ᬲᬵ ᬤᬾᬯᬢᬵ ‘‘ᬲᬫᬦᬸᬜ᭄ᬜᭀ ᬫᬾ ᬲᬢ᭄ᬣᬵ’’ᬢᬶ ᬪᬕᬯᬦ᭄ᬢᬂ ᬅᬪᬶᬯᬵᬤᬾᬢ᭄ᬯᬵ ᬧᬤᬓ᭄ᬔᬶᬡᬂ ᬓᬢ᭄ᬯᬵ ᬢᬢ᭄ᬣᬾᬯᬦ᭄ᬢᬭᬥᬵᬬᬶ.

ᬅᬣ ᬔᭀ ᬪᬕᬯᬵ ᬢᬲ᭄ᬲᬵ ᬭᬢ᭄ᬢᬶᬬᬵ ᬅᬘ᭄ᬘᬬᬾᬦ ᬪᬶᬓ᭄ᬔᬹ ᬆᬫᬦ᭄ᬢᬾᬲᬶ – ‘‘ᬇᬫᬂ, ᬪᬶᬓ᭄ᬔᬯᬾ, ᬭᬢ᭄ᬢᬶᬂ ᬅᬜ᭄ᬜᬢᬭᬵ ᬤᬾᬯᬢᬵ ᬅᬪᬶᬓ᭄ᬓᬦ᭄ᬢᬵᬬ ᬭᬢ᭄ᬢᬶᬬᬵ ᬅᬪᬶᬓ᭄ᬓᬦ᭄ᬢᬯᬡ᭄ᬡᬵ ᬓᬾᬯᬮᬓᬧ᭄ᬧᬂ ᬚᬾᬢᬯᬦᬂ ᬑᬪᬵᬲᬾᬢ᭄ᬯᬵ ᬬᬾᬦᬵᬳᬂ ᬢᬾᬦᬸᬧᬲᬗ᭄ᬓᬫᬶ; ᬉᬧᬲᬗ᭄ᬓᬫᬶᬢ᭄ᬯᬵ ᬫᬂ ᬅᬪᬶᬯᬵᬤᬾᬢ᭄ᬯᬵ ᬏᬓᬫᬦ᭄ᬢᬂ ᬅᬝ᭄ᬞᬵᬲᬶ. ᬏᬓᬫᬦ᭄ᬢᬂ ᬞᬶᬢᬵ ᬔᭀ, ᬪᬶᬓ᭄ᬔᬯᬾ, ᬲᬵ ᬤᬾᬯᬢᬵ ᬫᬂ ᬏᬢᬤᬯᭀᬘ – ‘ᬲᬢ᭄ᬢᬶᬫᬾ, ᬪᬦ᭄ᬢᬾ, ᬥᬫ᭄ᬫᬵ ᬪᬶᬓ᭄ᬔᬸᬦᭀ ᬅᬧᬭᬶᬳᬵᬦᬵᬬ ᬲᬂᬯᬢ᭄ᬢᬦ᭄ᬢᬶ. ᬓᬢᬫᬾ ᬲᬢ᭄ᬢ? ᬲᬢ᭄ᬣᬸᬕᬵᬭᬯᬢᬵ, ᬥᬫ᭄ᬫᬕᬵᬭᬯᬢᬵ, ᬲᬗ᭄ᬖᬕᬵᬭᬯᬢᬵ, ᬲᬶᬓ᭄ᬔᬵᬕᬵᬭᬯᬢᬵ, ᬲᬫᬵᬥᬶᬕᬵᬭᬯᬢᬵ, ᬅᬧ᭄ᬧᬫᬵᬤᬕᬵᬭᬯᬢᬵ, ᬧᬝᬶᬲᬦ᭄ᬣᬵᬭᬕᬵᬭᬯᬢᬵ – ᬇᬫᬾ ᬔᭀ, ᬪᬦ᭄ᬢᬾ, ᬲᬢ᭄ᬢ ᬥᬫ᭄ᬫᬵ ᬪᬶᬓ᭄ᬔᬸᬦᭀ ᬅᬧᬭᬶᬳᬵᬦᬵᬬ ᬲᬂᬯᬢ᭄ᬢᬦ᭄ᬢᬷ’ᬢᬶ. ᬇᬤᬫᬯᭀᬘ, ᬪᬶᬓ᭄ᬔᬯᬾ, ᬲᬵ ᬤᬾᬯᬢᬵ. ᬇᬤᬂ ᬯᬢ᭄ᬯᬵ ᬫᬂ ᬅᬪᬶᬯᬵᬤᬾᬢ᭄ᬯᬵ ᬧᬤᬓ᭄ᬔᬶᬡᬂ ᬓᬢ᭄ᬯᬵ ᬢᬢ᭄ᬣᬾᬯᬦ᭄ᬢᬭᬥᬵᬬᬷ’’ᬢᬶ.

‘‘ᬲᬢ᭄ᬣᬸᬕᬭᬸ ᬥᬫ᭄ᬫᬕᬭᬸ, ᬲᬗ᭄ᬖᬾ ᬘ ᬢᬶᬩ᭄ᬩᬕᬵᬭᬯᭀ;

ᬲᬫᬵᬥᬶᬕᬭᬸ ᬆᬢᬵᬧᬷ [ᬲᬫᬵᬥᬶᬕᬵᬭᬯᬢᬵᬧᬶ ᬘ (ᬓ.)], ᬲᬶᬓ᭄ᬔᬵᬬ ᬢᬶᬩ᭄ᬩᬕᬵᬭᬯᭀ.

‘‘ᬅᬧ᭄ᬧᬫᬵᬤᬕᬭᬸ ᬪᬶᬓ᭄ᬔᬸ, ᬧᬝᬶᬲᬦ᭄ᬣᬵᬭᬕᬵᬭᬯᭀ;

ᬅᬪᬩ᭄ᬩᭀ ᬧᬭᬶᬳᬵᬦᬵᬬ, ᬦᬶᬩ᭄ᬩᬵᬦᬲ᭄ᬲᬾᬯ ᬲᬦ᭄ᬢᬶᬓᬾ’’ᬢᬶ. ᬧᬞᬫᬂ;