᭗. ᬭᬵᬳᬸᬮᬲᬸᬢ᭄ᬢᬂ

᭑᭗᭗. ᬅᬣ ᬔᭀ ᬆᬬᬲ᭄ᬫᬵ ᬭᬵᬳᬸᬮᭀ ᬬᬾᬦ ᬪᬕᬯᬵ ᬢᬾᬦᬸᬧᬲᬗ᭄ᬓᬫᬶ; ᬉᬧᬲᬗ᭄ᬓᬫᬶᬢ᭄ᬯᬵ ᬪᬕᬯᬦ᭄ᬢᬂ ᬅᬪᬶᬯᬵᬤᬾᬢ᭄ᬯᬵ ᬏᬓᬫᬦ᭄ᬢᬂ ᬦᬶᬲᬷᬤᬶ. ᬏᬓᬫᬦ᭄ᬢᬂ ᬦᬶᬲᬶᬦ᭄ᬦᬂ ᬔᭀ ᬆᬬᬲ᭄ᬫᬦ᭄ᬢᬂ ᬭᬵᬳᬸᬮᬂ ᬪᬕᬯᬵ ᬏᬢᬤᬯᭀᬘ –

‘‘ᬬᬵ ᬘ, ᬭᬵᬳᬸᬮ, ᬅᬚ᭄ᬛᬢ᭄ᬢᬶᬓᬵ ᬧᬣᬯᬷᬥᬵᬢᬸ ᬬᬵ ᬘ ᬩᬵᬳᬶᬭᬵ ᬧᬣᬯᬷᬥᬵᬢᬸ, ᬧᬣᬯᬷᬥᬵᬢᬸᬭᬾᬯᬾᬲᬵ. ‘ᬢᬂ ᬦᬾᬢᬂ ᬫᬫ, ᬦᬾᬲᭀᬳᬫᬲ᭄ᬫᬶ, ᬦ ᬫᬾᬲᭀ ᬅᬢ᭄ᬢᬵ’ᬢᬶ, ᬏᬯᬫᬾᬢᬂ ᬬᬣᬵᬪᬹᬢᬂ ᬲᬫ᭄ᬫᬧ᭄ᬧᬜ᭄ᬜᬵᬬ ᬤᬝ᭄ᬞᬩ᭄ᬩᬂ. ᬏᬯᬫᬾᬢᬂ ᬬᬣᬵᬪᬹᬢᬂ ᬲᬫ᭄ᬫᬧ᭄ᬧᬜ᭄ᬜᬵᬬ ᬤᬶᬲ᭄ᬯᬵ ᬧᬣᬯᬷᬥᬵᬢᬸᬬᬵ ᬦᬶᬩ᭄ᬩᬶᬦ᭄ᬤᬢᬶ, ᬧᬣᬯᬷᬥᬵᬢᬸᬬᬵ ᬘᬶᬢ᭄ᬢᬂ ᬯᬶᬭᬵᬚᬾᬢᬶ.

‘‘ᬬᬵ ᬘ, ᬭᬵᬳᬸᬮ, ᬅᬚ᭄ᬛᬢ᭄ᬢᬶᬓᬵ ᬆᬧᭀᬥᬵᬢᬸ ᬬᬵ ᬘ ᬩᬵᬳᬶᬭᬵ ᬆᬧᭀᬥᬵᬢᬸ, ᬆᬧᭀᬥᬵᬢᬸᬭᬾᬯᬾᬲᬵ. ‘ᬢᬂ ᬦᬾᬢᬂ ᬫᬫ, ᬦᬾᬲᭀᬳᬫᬲ᭄ᬫᬶ, ᬦ ᬫᬾᬲᭀ ᬅᬢ᭄ᬢᬵ’ᬢᬶ, ᬏᬯᬫᬾᬢᬂ ᬬᬣᬵᬪᬹᬢᬂ ᬲᬫ᭄ᬫᬧ᭄ᬧᬜ᭄ᬜᬵᬬ ᬤᬝ᭄ᬞᬩ᭄ᬩᬂ. ᬏᬯᬫᬾᬢᬂ ᬬᬣᬵᬪᬹᬢᬂ ᬲᬫ᭄ᬫᬧ᭄ᬧᬜ᭄ᬜᬵᬬ ᬤᬶᬲ᭄ᬯᬵ ᬆᬧᭀᬥᬵᬢᬸᬬᬵ ᬦᬶᬩ᭄ᬩᬶᬦ᭄ᬤᬢᬶ, ᬆᬧᭀᬥᬵᬢᬸᬬᬵ ᬘᬶᬢ᭄ᬢᬂ ᬯᬶᬭᬵᬚᬾᬢᬶ.

‘‘ᬬᬵ ᬘ, ᬭᬵᬳᬸᬮ, ᬅᬚ᭄ᬛᬢ᭄ᬢᬶᬓᬵ ᬢᬾᬚᭀᬥᬵᬢᬸ ᬬᬵ ᬘ ᬩᬵᬳᬶᬭᬵ ᬢᬾᬚᭀᬥᬵᬢᬸ, ᬢᬾᬚᭀᬥᬵᬢᬸᬭᬾᬯᬾᬲᬵ. ‘ᬢᬂ ᬦᬾᬢᬂ ᬫᬫ, ᬦᬾᬲᭀᬳᬫᬲ᭄ᬫᬶ, ᬦ ᬫᬾᬲᭀ ᬅᬢ᭄ᬢᬵ’ᬢᬶ, ᬏᬯᬫᬾᬢᬂ ᬬᬣᬵᬪᬹᬢᬂ ᬲᬫ᭄ᬫᬧ᭄ᬧᬜ᭄ᬜᬵᬬ ᬤᬝ᭄ᬞᬩ᭄ᬩᬂ. ᬏᬯᬫᬾᬢᬂ ᬬᬣᬵᬪᬹᬢᬂ ᬲᬫ᭄ᬫᬧ᭄ᬧᬜ᭄ᬜᬵᬬ ᬤᬶᬲ᭄ᬯᬵ ᬢᬾᬚᭀᬥᬵᬢᬸᬬᬵ ᬦᬶᬩ᭄ᬩᬶᬦ᭄ᬤᬢᬶ, ᬢᬾᬚᭀᬥᬵᬢᬸᬬᬵ ᬘᬶᬢ᭄ᬢᬂ ᬯᬶᬭᬵᬚᬾᬢᬶ.

‘‘ᬬᬵ ᬘ, ᬭᬵᬳᬸᬮ, ᬅᬚ᭄ᬛᬢ᭄ᬢᬶᬓᬵ ᬯᬵᬬᭀᬥᬵᬢᬸ ᬬᬵ ᬘ ᬩᬵᬳᬶᬭᬵ ᬯᬵᬬᭀᬥᬵᬢᬸ, ᬯᬵᬬᭀᬥᬵᬢᬸᬭᬾᬯᬾᬲᬵ. ‘ᬢᬂ ᬦᬾᬢᬂ ᬫᬫ, ᬦᬾᬲᭀᬳᬫᬲ᭄ᬫᬶ, ᬦ ᬫᬾᬲᭀ ᬅᬢ᭄ᬢᬵ’ᬢᬶ, ᬏᬯᬫᬾᬢᬂ ᬬᬣᬵᬪᬹᬢᬂ ᬲᬫ᭄ᬫᬧ᭄ᬧᬜ᭄ᬜᬵᬬ ᬤᬝ᭄ᬞᬩ᭄ᬩᬂ. ᬏᬯᬫᬾᬢᬂ ᬬᬣᬵᬪᬹᬢᬂ ᬲᬫ᭄ᬫᬧ᭄ᬧᬜ᭄ᬜᬵᬬ ᬤᬶᬲ᭄ᬯᬵ ᬯᬵᬬᭀᬥᬵᬢᬸᬬᬵ ᬦᬶᬩ᭄ᬩᬶᬦ᭄ᬤᬢᬶ, ᬯᬵᬬᭀᬥᬵᬢᬸᬬᬵ ᬘᬶᬢ᭄ᬢᬂ ᬯᬶᬭᬵᬚᬾᬢᬶ.

‘‘ᬬᬢᭀ ᬔᭀ, ᬭᬵᬳᬸᬮ, ᬪᬶᬓ᭄ᬔᬸ ᬇᬫᬵᬲᬸ ᬘᬢᬹᬲᬸ ᬥᬵᬢᬹᬲᬸ ᬦᬾᬯᬢ᭄ᬢᬵᬦᬂ ᬦ ᬅᬢ᭄ᬢᬦᬶᬬᬂ ᬲᬫᬦᬸᬧᬲ᭄ᬲᬢᬶ, ᬅᬬᬂ ᬯᬸᬘ᭄ᬘᬢᬶ, ᬭᬵᬳᬸᬮ, ᬪᬶᬓ᭄ᬔᬸ ᬅᬘ᭄ᬙᬾᬘ᭄ᬙᬶ ᬢᬡ᭄ᬳᬂ, ᬯᬶᬯᬢ᭄ᬢᬬᬶ ᬲᬂᬬᭀᬚᬦᬂ, ᬲᬫ᭄ᬫᬵ ᬫᬵᬦᬵᬪᬶᬲᬫᬬᬵ ᬅᬦ᭄ᬢᬫᬓᬵᬲᬶ ᬤᬸᬓ᭄ᬔᬲ᭄ᬲᬵ’’ᬢᬶ. ᬲᬢ᭄ᬢᬫᬂ.