᭗. ᬲᬦ᭄ᬢᬸᬝ᭄ᬞᬶᬲᬸᬢ᭄ᬢᬂ

᭒᭗. ‘‘ᬘᬢ᭄ᬢᬵᬭᬶᬫᬵᬦᬶ, ᬪᬶᬓ᭄ᬔᬯᬾ, ᬅᬧ᭄ᬧᬵᬦᬶ ᬘ [ᬘᬾᬯ (ᬓ.)] ᬲᬸᬮᬪᬵᬦᬶ ᬘ, ᬢᬵᬦᬶ ᬘ ᬅᬦᬯᬚ᭄ᬚᬵᬦᬶ. ᬓᬢᬫᬵᬦᬶ ᬘᬢ᭄ᬢᬵᬭᬶ? ᬧᬂᬲᬸᬓᬹᬮᬂ, ᬪᬶᬓ᭄ᬔᬯᬾ, ᬘᬷᬯᬭᬵᬦᬂ ᬅᬧ᭄ᬧᬜ᭄ᬘ ᬲᬸᬮᬪᬜ᭄ᬘ, ᬢᬜ᭄ᬘ ᬅᬦᬯᬚ᭄ᬚᬂ. ᬧᬶᬡ᭄ᬟᬶᬬᬵᬮᭀᬧᭀ, ᬪᬶᬓ᭄ᬔᬯᬾ, ᬪᭀᬚᬦᬵᬦᬂ ᬅᬧ᭄ᬧᬜ᭄ᬘ ᬲᬸᬮᬪᬜ᭄ᬘ, ᬢᬜ᭄ᬘ ᬅᬦᬯᬚ᭄ᬚᬂ. ᬭᬸᬓ᭄ᬔᬫᬹᬮᬂ, ᬪᬶᬓ᭄ᬔᬯᬾ, ᬲᬾᬦᬵᬲᬦᬵᬦᬂ ᬅᬧ᭄ᬧᬜ᭄ᬘ ᬲᬸᬮᬪᬜ᭄ᬘ, ᬢᬜ᭄ᬘ ᬅᬦᬯᬚ᭄ᬚᬂ. ᬧᬹᬢᬶᬫᬸᬢ᭄ᬢᬂ, ᬪᬶᬓ᭄ᬔᬯᬾ, ᬪᬾᬲᬚ᭄ᬚᬵᬦᬂ ᬅᬧ᭄ᬧᬜ᭄ᬘ ᬲᬸᬮᬪᬜ᭄ᬘ, ᬢᬜ᭄ᬘ ᬅᬦᬯᬚ᭄ᬚᬂ. ᬇᬫᬵᬦᬶ ᬔᭀ, ᬪᬶᬓ᭄ᬔᬯᬾ, ᬘᬢ᭄ᬢᬵᬭᬶ ᬅᬧ᭄ᬧᬵᬦᬶ ᬘ ᬲᬸᬮᬪᬵᬦᬶ ᬘ, ᬢᬵᬦᬶ ᬘ ᬅᬦᬯᬚ᭄ᬚᬵᬦᬶ. ᬬᬢᭀ ᬔᭀ, ᬪᬶᬓ᭄ᬔᬯᬾ, ᬪᬶᬓ᭄ᬔᬸ ᬅᬧ᭄ᬧᬾᬦ ᬘ ᬢᬸᬝ᭄ᬞᭀ ᬳᭀᬢᬶ ᬲᬸᬮᬪᬾᬦ ᬘ, ᬇᬤᬫᬲ᭄ᬲᬵᬳᬂ ᬅᬜ᭄ᬜᬢᬭᬂ ᬲᬵᬫᬜ᭄ᬜᬗ᭄ᬕᬦ᭄ᬢᬶ [ᬲᬵᬫᬜ᭄ᬜᬦ᭄ᬢᬶ (ᬓ.)] ᬯᬤᬵᬫᬷ’’ᬢᬶ.

‘‘ᬅᬦᬯᬚ᭄ᬚᬾᬦ ᬢᬸᬝ᭄ᬞᬲ᭄ᬲ, ᬅᬧ᭄ᬧᬾᬦ ᬲᬸᬮᬪᬾᬦ ᬘ;

ᬦ ᬲᬾᬦᬵᬲᬦᬫᬵᬭᬩ᭄ᬪ, ᬘᬷᬯᬭᬂ ᬧᬵᬦᬪᭀᬚᬦᬂ;

ᬯᬶᬖᬵᬢᭀ ᬳᭀᬢᬶ ᬘᬶᬢ᭄ᬢᬲ᭄ᬲ, ᬤᬶᬲᬵ ᬦᬧ᭄ᬧᬝᬶᬳᬜ᭄ᬜᬢᬶ.

‘‘ᬬᬾ ᬘᬲ᭄ᬲ ᬥᬫ᭄ᬫᬵ ᬅᬓ᭄ᬔᬵᬢᬵ, ᬲᬵᬫᬜ᭄ᬜᬲ᭄ᬲᬵᬦᬸᬮᭀᬫᬶᬓᬵ;

ᬅᬥᬶᬕ᭄ᬕᬳᬶᬢᬵ ᬢᬸᬝ᭄ᬞᬲ᭄ᬲ, ᬅᬧ᭄ᬧᬫᬢ᭄ᬢᬲ᭄ᬲ ᬲᬶᬓ᭄ᬔᬢᭀ’’ᬢᬶ. ᬲᬢ᭄ᬢᬫᬂ;