২. চোদকাদিপটিপত্তি

৩৬৩. চোদকেন কথং পটিপজ্জিতব্বং? চুদিতকেন কথং পটিপজ্জিতব্বং? সঙ্ঘেন কথং পটিপজ্জিতব্বং? অনুৱিজ্জকেন কথং পটিপজ্জিতব্বং? চোদকেন কথং পটিপজ্জিতব্বন্তি? চোদকেন পঞ্চসু ধম্মেসু পতিট্ঠায পৰো চোদেতব্বো. কালেন ৱক্খামি নো অকালেন, ভূতেন ৱক্খামি নো অভূতেন, সণ্হেন ৱক্খামি নো ফৰুসেন, অত্থসংহিতেন ৱক্খামি নো অনত্থসংহিতেন, মেত্তাচিত্তো ৱক্খামি নো দোসন্তৰোতি – চোদকেন এৱং পটিপজ্জিতব্বং. চুদিতকেন কথং পটিপজ্জিতব্বন্তি? চুদিতকেন দ্ৱীসু ধম্মেসু পটিপজ্জিতব্বং. সচ্চে চ অকুপ্পে চ – চুদিতকেন এৱং পটিপজ্জিতব্বং. সঙ্ঘেন কথং পটিপজ্জিতব্বন্তি? সঙ্ঘেন ওতিণ্ণানোতিণ্ণং জানিতব্বং. সঙ্ঘেন এৱং পটিপজ্জিতব্বং. অনুৱিজ্জকেন কথং পটিপজ্জিতব্বন্তি? অনুৱিজ্জকেন যেন ধম্মেন যেন ৱিনযেন যেন সত্থুসাসনেন তং অধিকৰণং ৱূপসম্মতি তথা তং অধিকৰণং ৱূপসমেতব্বং. অনুৱিজ্জকেন এৱং পটিপজ্জিতব্বং.

৩৬৪. উপোসথো কিমত্থায, পৱাৰণা কিস্স কাৰণা;

পৰিৱাসো কিমত্থায, মূলাযপটিকস্সনা কিস্স কাৰণা;

মানত্তং কিমত্থায, অব্ভানং কিস্স কাৰণা.

উপোসথো সামগ্গত্থায, ৱিসুদ্ধত্থায পৱাৰণা;

পৰিৱাসো মানত্তত্থায, মূলাযপটিকস্সনা নিগ্গহত্থায;

মানত্তং অব্ভানত্থায, ৱিসুদ্ধত্থায অব্ভানং.

ছন্দা দোসা ভযা মোহা, থেৰে চ পৰিভাসতি;

কাযস্স ভেদা দুপ্পঞ্ঞো, খতো উপহতিন্দ্ৰিযো;

নিৰযং গচ্ছতি দুম্মেধো, ন চ সিক্খায গাৰৱো.

ন চ আমিসং নিস্সায;

ন চ নিস্সায পুগ্গলং;

উভো এতে ৱিৱজ্জেত্ৱা;

যথাধম্মো তথা কৰে.