২. উপোসথক্খন্ধকং

সন্নিপাতানুজাননাদিকথাৱণ্ণনা

১৩২. উপোসথক্খন্ধকে তৰন্তি প্লৱন্তি এত্থ বালাতি তিত্থং. ইতোতি ইমস্মিং সাসনে লদ্ধিতো. তং কথেন্তীতি ‘‘ইমস্মিং নাম দিৱসে মুহুত্তে ৱা ইদং কত্তব্ব’’ন্তিআদিনা কথেন্তি.

১৩৪. ‘‘সুণাতু মে ভন্তে’’তিআদীসু যং ৱত্তব্বং, তং মাতিকাট্ঠকথাযং (কঙ্খা. অট্ঠ. নিদানৱণ্ণনা) ৱিত্থাৰতো আগতমেৱাতি ন ইধ ৱিত্থাৰযিস্সাম, অত্থিকেহি পন ততোযেৱ গহেতব্বং.

১৩৫. আপজ্জিত্ৱা ৱা ৱুট্ঠিতোতি এত্থ আৰোচিতাপি আপত্তি অসন্তী নাম হোতীতি ৱেদিতব্বং. তেনেৱ মাতিকাট্ঠকথাযং (কঙ্খা. অট্ঠ. নিদানৱণ্ণনা) ৱুত্তং ‘‘যস্স পন এৱং অনাপন্না ৱা আপত্তি আপজ্জিত্ৱা চ পন ৱুট্ঠিতা ৱা দেসিতা ৱা আৰোচিতা ৱা, তস্স সা আপত্তি অসন্তী নাম হোতী’’তি. মুসাৱাদো নাম ৱচীভেদপচ্চযা হোতীতি আহ ‘‘ন মুসাৱাদলক্খণেনা’’তি. ভগৱতো পন ৱচনেনাতি সম্পজানমুসাৱাদে কিং হোতি? ‘‘দুক্কটং হোতী’’তি ইমিনা ৱচনেন. ৱচীদ্ৱাৰে অকিৰিযসমুট্ঠানা আপত্তি হোতীতি যস্মা যস্স ভিক্খুনো অধম্মিকায পটিঞ্ঞায তুণ্হীভূতস্স নিসিন্নস্স মনোদ্ৱাৰে আপত্তি নাম নত্থি, যস্মা পন আৱি কাতব্বং ন আৱি অকাসি, তেনস্স ৱচীদ্ৱাৰে অকিৰিযসমুট্ঠানা আপত্তি হোতি.

ৱাচাতি ৱাচায, য-কাৰলোপেনাযং নিদ্দেসো. কেনচি মনুজেন ৱাচায অনালপন্তোতি যোজেতব্বং. গিৰং নো চ পৰে ভণেয্যাতি ‘‘ইমে সোস্সন্তী’’তি পৰপুগ্গলে সন্ধায সদ্দম্পি ন নিচ্ছাৰেয্য. আপজ্জেয্য ৱাচসিকন্তি ৱাচতো সমুট্ঠিতং আপত্তিং আপজ্জেয্য.

অন্তৰাযকৰোতি ৱিপ্পটিসাৰৱত্থুতায পামোজ্জাদিসম্ভৱং নিৱাৰেত্ৱা পঠমজ্ঝানাদীনং অধিগমায অন্তৰাযকৰো. তস্স ভিক্খুনো ফাসু হোতীতি অৱিপ্পটিসাৰমূলকানং পামোজ্জাদীনং ৱসেন তস্স ভিক্খুনো সুখা পটিপদা সম্পজ্জতীতি অত্থো.

সন্নিপাতানুজাননাদিকথাৱণ্ণনা নিট্ঠিতা.

সীমানুজাননকথাৱণ্ণনা

১৩৮. ইতৰোপীতি সুদ্ধপংসুপব্বতাদিং সন্ধায ৱদতি. হত্থিপ্পমাণো নাম পব্বতো হেট্ঠিমকোটিযা অড্ঢট্ঠমৰতনুব্বেধো. তস্মাতি যস্মা একেন ন ৱট্টতি, তস্মা. দ্ৱত্তিংসপলগুড়পিণ্ডপ্পমাণতা থূলতায গহেতব্বা, ন তুলগণনায. অন্তোসাৰমিস্সকানন্তি অন্তোসাৰৰুক্খেহি মিস্সকানং. সূচিদণ্ডকপ্পমাণোতি সীহড়দীপে লেখনদণ্ডপ্পমাণোতি ৱদন্তি, সো চ কনিট্ঠঙ্গুলিপৰিমাণোতি দট্ঠব্বং. এতন্তি নৱমূলসাখানিগ্গমনং. পৰভাগে কিত্তেতুং ৱট্টতীতি বহি নিক্খমিত্ৱা ঠিতেসু অট্ঠসু মগ্গেসু একিস্সা দিসায একং, অপৰায একন্তি এৱং চতূসু ঠানেসু কিত্তেতুং ৱট্টতি.

যত্থ কত্থচি উত্তৰন্তিযা ভিক্খুনিযা অন্তৰৱাসকো তেমিযতীতি সিক্খাকৰণীযং আগতলক্খণেন তিমণ্ডলং পটিচ্ছাদেত্ৱা অন্তৰৱাসকং অনুক্খিপিত্ৱা তিত্থেন ৱা অতিত্থেন ৱা উত্তৰন্তিযা ভিক্খুনিযা একদ্ৱঙ্গুলমত্তম্পি অন্তৰৱাসকো তেমিযতি. ভিক্খুনিযা এৱ গহণঞ্চেত্থ ভিক্খুনীৱিভঙ্গে ভিক্খুনিযা ৱসেন নদীলক্খণস্স পাড়িযং আগতত্তা তেনেৱ নযেন দস্সনত্থং কতং. সীমং বন্ধন্তানং নিমিত্তং হোতীতি অযং ৱুত্তলক্খণা নদী সমুদ্দং ৱা পৱিসতু তড়াকং ৱা, পভৱতো পট্ঠায নিমিত্তং হোতি. অজ্ঝোত্থৰিত্ৱা আৱৰণং পৱত্ততিযেৱাতি আৱৰণং অজ্ঝোত্থৰিত্ৱা সন্দতিযেৱ. অপ্পৱত্তমানাতি অসন্দমানুদকা. আৱৰণঞ্হি পত্ৱা নদিযা যত্তকে পদেসে উদকং অসন্দমানং সন্তিট্ঠতি, তত্থ নদীনিমিত্তং কাতুং ন ৱট্টতি. উপৰি সন্দমানট্ঠানেযেৱ ৱট্টতি, অসন্দমানট্ঠানে পন উদকনিমিত্তং কাতুং ৱট্টতি. ঠিতমেৱ হি উদকনিমিত্তে ৱট্টতি, ন সন্দমানং. তেনেৱাহ ‘‘পৱত্তনট্ঠানে নদীনিমিত্তং, অপ্পৱত্তনট্ঠানে উদকনিমিত্তং কাতুং ৱট্টতী’’তি. নদিং ভিন্দিত্ৱাতি মাতিকামুখদ্ৱাৰেন নদীকূলং ভিন্দিত্ৱা. উক্খেপিমন্তি কূপতো ৱিয উক্খিপিত্ৱা গহেতব্বং.

সিঙ্ঘাটকসণ্ঠানাতি তিকোণৰচ্ছাসণ্ঠানা. মুদিঙ্গসণ্ঠানাতি মুদিঙ্গভেৰী ৱিয মজ্ঝে ৱিত্থতা উভোসু কোটীসু সঙ্কোটিতা হোতি. উপচাৰং ঠপেত্ৱাতি পচ্ছা সীমং বন্ধন্তানং সীমায ওকাসং ঠপেত্ৱা. অন্তোনিমিত্তগতেহি পনাতি একস্স গামস্স উপড্ঢং অন্তো কত্তুকামতায সতি সব্বেসং আগমনে পযোজনং নত্থীতি কত্ৱা ৱুত্তং. আগন্তব্বন্তি চ সামীচিৱসেন ৱুত্তং, নাযং নিযমো ‘‘আগন্তব্বমেৱা’’তি. তেনেৱাহ ‘‘আগমনম্পি অনাগমনম্পি ৱট্টতী’’তি. অবদ্ধায হি সীমায নানাগামখেত্তানং নানাসীমসভাৱত্তা তেসং অনাগমনেপি ৱগ্গকম্মং ন হোতি, তস্মা অনাগমনম্পি ৱট্টতি. বদ্ধায পন সীমায একসীমভাৱতো পুন অঞ্ঞস্মিং কম্মে কৰিযমানে অন্তো সীমগতেহি আগন্তব্বমেৱাতি আহ ‘‘অৱিপ্পৱাসসীমা…পে… আগন্তব্ব’’ন্তি. নিমিত্তকিত্তনকালে অসোধিতাযপি সীমায নেৱত্থি দোসো নিমিত্তকিত্তনস্স অপলোকনাদীসু অঞ্ঞতৰাভাৱতো.

ভণ্ডুকম্মাপুচ্ছনং সন্ধায পব্বজ্জা-গহণং. সুখকৰণত্থন্তি সব্বেসং সন্নিপাতনপৰিস্সমং পহায অপ্পতৰেহি সুখকৰণত্থং. একৱীসতি ভিক্খূ গণ্হাতীতি ৱীসতিৱগ্গকৰণীযপৰমত্তা সঙ্ঘকম্মস্স কম্মাৰহেন সদ্ধিং একৱীসতি ভিক্খূ গণ্হাতি. ইদঞ্চ নিসিন্নানং ৱসেন ৱুত্তং. হেট্ঠিমন্ততো হি যত্থ একৱীসতি ভিক্খূ নিসীদিতুং সক্কোন্তি, তত্তকে পদেসে সীমং বন্ধিতুং ৱট্টতি. ন সক্খিস্সন্তীতি অৱিপ্পৱাসসীমায বদ্ধভাৱং অসল্লক্খেত্ৱা ‘‘সমানসংৱাসকমেৱ সমূহনিস্সামা’’তি ৱাযমন্তা ন সক্খিস্সন্তি. বদ্ধায হি অৱিপ্পৱাসসীমায তং অসমূহনিত্ৱা ‘‘সমানসংৱাসকসীমং সমূহনিস্সামা’’তি কতাযপি কম্মৱাচায অসমূহতাৱ হোতি সীমা. পঠমঞ্হি অৱিপ্পৱাসং সমূহনিত্ৱা পচ্ছা সীমা সমূহনিতব্বা. একৰতনপ্পমাণা সুৱিঞ্ঞেয্যতৰা হোতীতি কত্ৱা ৱুত্তং ‘‘একৰতনপ্পমাণা ৱট্টতী’’তি. একঙ্গুলমত্তাপি সীমন্তৰিকা ৱট্টতিযেৱ. তত্তকেনপি হি সীমা অসম্ভিন্নাৱ হোতি.

অৱসেসনিমিত্তানীতি মহাসীমায বাহিৰপস্সে নিমিত্তানি. খণ্ডসীমতো পট্ঠায বন্ধনং আচিণ্ণং, আচিণ্ণকৰণেনেৱ চ সম্মোহো ন হোতীতি আহ ‘‘খণ্ডসীমতোৱ পট্ঠায বন্ধিতব্বা’’তি. কুটিগেহেতি কুটিঘৰে, ভূমিঘৰেতি অত্থো. উদুক্খলন্তি খুদ্দকাৱাটং. নিমিত্তং ন কাতব্বন্তি তং ৰাজিং ৱা উদুক্খলং ৱা নিমিত্তং ন কাতব্বং.

হেট্ঠা ন ওতৰতীতি ভিত্তিতো ওৰং নিমিত্তানি ঠপেত্ৱা কিত্তিতত্তা হেট্ঠা আকাসপ্পদেসং ন ওতৰতি. হেট্ঠাপি ওতৰতীতি সচে হেট্ঠা অন্তোভিত্তিযং একৱীসতিযা ভিক্খূনং ওকাসো হোতি, ওতৰতি. ওতৰমানা চ উপৰিসীমপ্পমাণেন ন ওতৰতি, সমন্তা ভিত্তিপ্পমাণেন ওতৰতি. ওতৰণানোতৰণং ৱুত্তনযেনেৱ ৱেদিতব্বন্তি সচে হেট্ঠা একৱীসতিযা ভিক্খূনং ওকাসো হোতি, ওতৰতি. নো চে, ন ওতৰতীতি অধিপ্পাযো. সব্বো পাসাদো সীমট্ঠো হোতীতি উপৰিমতলেন সদ্ধিং একাবদ্ধভিত্তিকো ৱা হোতু মা ৱা, সব্বোপি পাসাদো সীমট্ঠোৱ হোতি.

তালমূলকপব্বতেতি তালমূলসদিসে পব্বতে. সো চ হেট্ঠা মহন্তো হুত্ৱা অনুপুব্বেন তনুকো হোতীতি দট্ঠব্বং. পণৱসণ্ঠানো মজ্ঝে তনুকো হোতি মূলে অগ্গে চ ৱিত্থতো. হেট্ঠা ৱা মজ্ঝে ৱাতি মুদিঙ্গসণ্ঠানস্স হেট্ঠা পণৱসণ্ঠানস্স মজ্ঝে. আকাসপব্ভাৰন্তি ভিত্তিযা অপৰিক্খিত্তপব্ভাৰং. অন্তোলেণং হোতীতি পব্বতস্স অন্তো লেণং হোতি. সীমামাড়কেতি খণ্ডসীমামাড়কে. মহাসীমং সোধেত্ৱা ৱা কম্মং কাতব্বন্তি মহাসীমগতা ভিক্খূ হত্থপাসং ৱা আনেতব্বা, সীমতো ৱা বহি কাতব্বাতি অধিপ্পাযো. গণ্ঠিপদেসু পন ‘‘মহাসীমগতেহি ভিক্খূহি তং সাখং ৱা পাৰোহং ৱা অনামসিত্ৱা ঠাতব্বন্তি অধিপ্পাযো’’তি ৱুত্তং, তং ন গহেতব্বং. পুৰিমনযেপীতি খণ্ডসীমায উট্ঠহিত্ৱা মহাসীমায ওণতৰুক্খেপি. উক্খিপাপেত্ৱা কাতুং ন ৱট্টতীতি খণ্ডসীমায অন্তো ঠিতত্তা ৰুক্খস্স তত্থ ঠিতো হত্থপাসংযেৱ আনেতব্বোতি উক্খিপাপেত্ৱা কাতুং ন ৱট্টতি.

১৪০. পাৰযতীতি অজ্ঝোত্থৰতি. পাৰাতি সীমাপেক্খো ইত্থিলিঙ্গনিদ্দেসো. অস্সাতি ভৱেয্য. ইধাধিপ্পেতনাৱায পমাণং দস্সেন্তো আহ ‘‘যা সব্বন্তিমেন পৰিচ্ছেদেন…পে… তযো জনে ৱহতী’’তি. ইমিনা চ ৱুত্তপ্পমাণতো খুদ্দকা নাৱা ৱিজ্জমানাপি ইধ অসন্তপক্খং ভজতীতি দীপেতি. অৱস্সং লব্ভনেয্যা ধুৱনাৱাৱ হোতীতি সম্বন্ধো. ৰুক্খং ছিন্দিত্ৱা কতোতি পাঠসেসো. পৰতীৰে সম্মুখট্ঠানেতি ওৰিমতীৰে সব্বপৰিযন্তনিমিত্তস্স সম্মুখট্ঠানে. সব্বনিমিত্তানং অন্তো ঠিতে ভিক্খূ হত্থপাসগতে কত্ৱাতি এত্থ সচে একং গামখেত্তং হোতি, উভোসু তীৰেসু সব্বনিমিত্তানং অন্তো ঠিতে ভিক্খূ হত্থপাসগতে কত্ৱা সম্মন্নিতব্বা. নানাগামক্খেত্তং চে, সমানসংৱাসকসীমাবন্ধনকালে অনাগন্তুম্পি ৱট্টতি. অৱিপ্পৱাসসীমাসম্মুতিযং পন আগন্তব্বমেৱ. যস্মা উভোসু তীৰেসু নিমিত্তকিত্তনমত্তেন দীপকো সঙ্গহিতো নাম ন হোতি, তস্মা দীপকেপি নিমিত্তানি ৱিসুং কিত্তেতব্বানেৱাতি আহ ‘‘দীপকস্স ওৰিমন্তে চ পাৰিমন্তে চ নিমিত্তং কিত্তেতব্ব’’ন্তি. দীপকসিখৰন্তি দীপকমত্থকং. পব্বতসণ্ঠানাতি দীপকস্স একতো অধিকতৰত্তা ৱুত্তং.

সীমানুজাননকথাৱণ্ণনা নিট্ঠিতা.

উপোসথাগাৰাদিকথাৱণ্ণনা

১৪২. ৱত্থুৱসেন ৱুত্তন্তি ‘‘মযঞ্চম্হা অসম্মতায ভূমিযা নিসিন্না পাতিমোক্খং অস্সুম্হা’’তি ৱত্থুম্হি পাতিমোক্খসৱনস্স আগতত্তা ৱুত্তং. উপোসথপ্পমুখং নাম উপোসথাগাৰস্স সম্মুখট্ঠানং. পাড়িযং ‘‘পঠমং নিমিত্তা কিত্তেতব্বা’’তি এত্তকমেৱ ৱত্ৱা সীমাসম্মুতিযং ৱিয ‘‘পব্বতনিমিত্তং পাসাণনিমিত্ত’’ন্তিআদিনা ৱিসেসেত্ৱা নিমিত্তানং অদস্সিতত্তা ‘‘খুদ্দকানি ৱা…পে… যানি কানিচি নিমিত্তানী’’তি ৱুত্তং. কিত্তেতুং ৱট্টতীতি ইমিনা সম্বন্ধো.

অৱিপ্পৱাসসীমানুজাননকথাৱণ্ণনা

১৪৪. অস্সাতি ভিক্খুনিসঙ্ঘস্স. দ্ৱেপি সীমাযোতি পঠমং ৱুত্তা অৱিপ্পৱাসসীমা সমানসংৱাসকসীমা চ. ন কম্মৱাচং ৱগ্গং কৰোন্তীতি কম্মৱাচং ন ভিন্দন্তি, কম্মং ন কোপেন্তীতি অধিপ্পাযো. এত্থাতি ‘‘ঠপেত্ৱা গামঞ্চ গামূপচাৰঞ্চা’’তি এত্থ. গামঞ্চ গামূপচাৰঞ্চ ন ওত্থৰতীতি ‘‘ঠপেত্ৱা গামঞ্চ গামূপচাৰঞ্চা’’তি ৱুত্তত্তা. সীমাসঙ্খ্যমেৱ গচ্ছতীতি অৱিপ্পৱাসসীমাসঙ্খং গচ্ছতি. একম্পি কুলং পৱিট্ঠং ৱাতি অভিনৱকতগেহেসু সব্বপঠমং একম্পি কুলং পৱিট্ঠং অত্থি. অগতং ৱাতি পোৰাণকগামে অঞ্ঞেসু গেহানি ছড্ডেত্ৱা গতেসু একম্পি কুলং অগতং অত্থি.

অৱিপ্পৱাসসীমা ন সমূহন্তব্বাতি মহাসীমং সন্ধায ৱদতি. নিৰাসঙ্কট্ঠানেসু ঠত্ৱাতি চেতিযঙ্গণাদীনং খণ্ডসীমায অনোকাসত্তা ৱুত্তং. খণ্ডসীমঞ্হি বন্ধন্তা তাদিসং ঠানং পহায অঞ্ঞস্মিং ৱিৱিত্তে ওকাসে বন্ধন্তি. অপ্পেৱ নাম সমূহনিতুং সক্খিস্সন্তীতি অৱিপ্পৱাসসীমংযেৱ সমূহনিতুং সক্খিস্সন্তি, ন খণ্ডসীমং. পটিবন্ধিতুং পন ন সক্খিস্সন্তেৱাতি খণ্ডসীমায অঞ্ঞাতত্তা ন সক্খিস্সন্তি. ন সমূহনিতব্বাতি খণ্ডসীমং অজানন্তেহি ন সমূহনিতব্বা. উপোসথস্স ৱিসুং গহিতত্তা অৱসেসকম্মৱসেন সমানসংৱাসতা ৱেদিতব্বা.

গামসীমাদিকথাৱণ্ণনা

১৪৭. অপৰিচ্ছিন্নাযাতি বদ্ধসীমাৱসেন অকতপৰিচ্ছেদায. যেন কেনচি খণিত্ৱা অকতোতি অন্তমসো তিৰচ্ছানেনপি খণিত্ৱা অকতো. তস্স অন্তোহত্থপাসং ৱিজহিত্ৱা ঠিতো কম্মং কোপেতীতি ইমিনা বহিপৰিচ্ছেদতো যত্থ কত্থচি ঠিতো কম্মং ন কোপেতীতি দীপেতি. যং পন ৱুত্তং মাতিকাট্ঠকথাযং (কঙ্খা. অট্ঠ. নিদানৱণ্ণনা) ‘‘পৰিচ্ছেদব্ভন্তৰে হত্থপাসং ৱিজহিত্ৱা ঠিতোপি পৰিচ্ছেদতো বহি অঞ্ঞং তত্তকংযেৱ পৰিচ্ছেদং অনতিক্কমিত্ৱা ঠিতোপি কম্মং কোপেতি, ইদং সব্বঅট্ঠকথাসু সন্নিট্ঠান’’ন্তি, তত্থ ‘‘অঞ্ঞং তত্তকংযেৱ পৰিচ্ছেদং অনতিক্কমিত্ৱা ঠিতোপি কম্মং কোপেতী’’তি ইদং নেৱ পাড়িযং, ন অট্ঠকথাযং উপলব্ভতি. যদি চেতং দ্ৱিন্নং সঙ্ঘানং ৱিসুং উপোসথাদিকম্মকৰণাধিকাৰে ৱুত্তত্তা উদকুক্খেপতো বহি অঞ্ঞং উদকুক্খেপং অনতিক্কমিত্ৱা উপোসথাদিকৰণত্থং ঠিতো সঙ্ঘো সীমাসম্ভেদসম্ভৱতো কম্মং কোপেতীতি ইমিনা অধিপ্পাযেন ৱুত্তং সিযা, এৱং সতি যুজ্জেয্য. তেনেৱ মাতিকাট্ঠকথায লীনত্থপ্পকাসনিযং ৱুত্তং ‘‘অঞ্ঞং তত্তকংযেৱ পৰিচ্ছেদন্তি দুতিযং উদকুক্খেপং অনতিক্কন্তোপি কোপেতি. কস্মা? অত্তনো উদকুক্খেপসীমায পৰেসং উদকুক্খেপসীমায অজ্ঝোত্থটত্তা সীমাসম্ভেদো হোতি, তস্মা কোপেতী’’তি. ‘‘ইদং সব্বঅট্ঠকথাসু সন্নিট্ঠান’’ন্তি চ ইমিনা অধিপ্পাযেন ৱুত্তন্তি গহেতব্বং সব্বাসুপি অট্ঠকথাসু সীমাসম্ভেদস্স অনিচ্ছিতত্তা. তেনেৱ হি ‘‘অত্তনো চ অঞ্ঞেসঞ্চ উদকুক্খেপপৰিচ্ছেদস্স অন্তৰা অঞ্ঞো উদকুক্খেপো সীমন্তৰিকত্থায ঠপেতব্বো’’তি ৱুত্তং. অঞ্ঞে পনেত্থ অঞ্ঞথাপি পপঞ্চেন্তি, তং ন গহেতব্বং.

সব্বত্থ সঙ্ঘো নিসীদতীতি হত্থপাসং অৱিজহিত্ৱা নিসীদতি. উদকুক্খেপসীমাকম্মং নত্থীতি যস্মা সব্বোপি নদীপদেসো ভিক্খূহি অজ্ঝোত্থটো, তস্মা সমন্ততো নদিযা অভাৱা উদকুক্খেপে পযোজনং নত্থি. উদকুক্খেপপ্পমাণা সীমন্তৰিকা সুৱিঞ্ঞেয্যতৰা হোতি, সীমাসম্ভেদসঙ্কা ন চ সিযাতি সামীচিদস্সনত্থং ‘‘অঞ্ঞো উদকুক্খেপো সীমন্তৰিকত্থায ঠপেতব্বো’’তি ৱুত্তং. যত্তকেন পন সীমাসম্ভেদো ন হোতি, তত্তকং ঠপেতুং ৱট্টতিযেৱ. তেনেৱাহু পোৰাণা ‘‘যত্তকেন সীমাসঙ্কৰো ন হোতি, তত্তকম্পি ঠপেতুং ৱট্টতী’’তি. ঊনকং পন ন ৱট্টতীতি ইদম্পি উদকুক্খেপসীমায পৰিসৱসেন ৱড্ঢনতো সীমাসম্ভেদসঙ্কা সিযাতি তংনিৱাৰণত্থমেৱ ৱুত্তং.

গচ্ছন্তিযা পন নাৱায কাতুং ন ৱট্টতীতি এত্থ উদকুক্খেপমনতিক্কমিত্ৱা পৰিৱত্তমানায কাতুং ৱট্টতীতি ৱেদিতব্বং. সীমং ৱা সোধেত্ৱাতি এত্থ সীমসোধনং নাম গামসীমাদীসু ঠিতানং হত্থপাসানযনাদি. ‘‘নদিং ৱিনাসেত্ৱা তড়াকং কৰোন্তী’’তি ৱুত্তমেৱত্থং ৱিভাৱেতি ‘‘হেট্ঠা পাড়ি বদ্ধা’’তি, হেট্ঠানদিং আৱৰিত্ৱা পাড়ি বদ্ধাতি অত্থো. ছড্ডিতমোদকন্তি তড়াকৰক্খণত্থং একমন্তেন ছড্ডিতমুদকং. দেৱে অৱস্সন্তেতি দুব্বুট্ঠিকালে ৱস্সানেপি দেৱে অৱস্সন্তে. উপ্পতিত্ৱাতি উত্তৰিত্ৱা. গামনিগমসীমং ওত্থৰিত্ৱা পৱত্ততীতি ৱুত্তপ্পকাৰে ৱস্সকালে চত্তাৰো মাসে অব্বোচ্ছিন্না পৱত্ততি. ৱিহাৰসীমন্তি বদ্ধসীমং সন্ধায ৱদতি.

অগমনপথেতি যত্থ তদহেৱ গন্ত্ৱা পচ্চাগন্তুং ন সক্কা হোতি, তাদিসে পদেসে অৰঞ্ঞসীমাসঙ্খমেৱ গচ্ছতীতি সত্তব্ভন্তৰসীমং সন্ধায ৱদতি. তেসন্তি মচ্ছবন্ধানং. গমনপৰিযন্তস্স ওৰতোতি গমনপৰিযন্তস্স ওৰিমভাগে দীপকং পব্বতঞ্চ সন্ধায ৱুত্তং, ন সমুদ্দপ্পদেসং.

১৪৮. সংসট্ঠৱিটপাতি ইমিনা অঞ্ঞমঞ্ঞস্স আসন্নতং দীপেতি. বদ্ধা হোতীতি পচ্ছিমদিসাভাগে সীমং সন্ধায ৱুত্তং. তস্সা পদেসন্তি যত্থ ঠত্ৱা ভিক্খূহি কম্মং কাতুং সক্কা হোতি, তাদিসং পদেসং. যত্থ পন ঠিতেহি কম্মং কাতুং ন সক্কা হোতি, তাদিসং পদেসং অন্তোকৰিত্ৱা বন্ধন্তা সীমায সীমং সম্ভিন্দন্তি নাম. দ্ৱিন্নং সীমানং নিমিত্তং হোতীতি নিমিত্তস্স সীমতো বাহিৰত্তা সীমাসম্ভেদো ন হোতীতি ৱুত্তং. সীমাসঙ্কৰং কৰোতীতি ৱড্ঢিত্ৱা সীমপ্পদেসং পৱিট্ঠে দ্ৱিন্নং সীমানং গতট্ঠানস্স দুৱিঞ্ঞেয্যত্তা ৱুত্তং, ন পন তত্থ কম্মং কাতুং ন ৱট্টতীতি দস্সনত্থং. ন হি সীমা তত্তকেন অসীমা হোতি, দ্ৱে পন সীমা পচ্ছা ৱড্ঢিতেন ৰুক্খেন অজ্ঝোত্থটত্তা একাবদ্ধা হোন্তি, তস্মা একত্থ ঠত্ৱা কম্মং কৰোন্তেহি ইতৰং সোধেত্ৱা কাতব্বং.

গামসীমাদিকথাৱণ্ণনা নিট্ঠিতা.

উপোসথভেদাদিকথাৱণ্ণনা

১৪৯. অধম্মেন ৱগ্গং উপোসথকম্মন্তি এত্থ যত্থ চত্তাৰো ৱসন্তি, তত্থ পাতিমোক্খুদ্দেসো অনুঞ্ঞাতো. যত্থ দ্ৱে ৱা তযো ৱা ৱসন্তি, তত্থ পাৰিসুদ্ধিউপোসথো. ইধ পন তথা অকত্ৱা চতুন্নং ৱসনট্ঠানে পাৰিসুদ্ধিউপোসথস্স কতত্তা তিণ্ণং ৱসনট্ঠানে চ পাতিমোক্খস্স উদ্দিট্ঠত্তা ‘‘অধম্মেনা’’তি ৱুত্তং. যস্মা সব্বেৱ ন সন্নিপতিংসু, ছন্দপাৰিসুদ্ধি চ সঙ্ঘমজ্ঝংযেৱ আগচ্ছতি, ন গণমজ্ঝং, তস্মা ‘‘ৱগ্গ’’ন্তি ৱুত্তং.

পাতিমোক্খুদ্দেসকথাৱণ্ণনা

১৫০. এৱমেতং ধাৰযামীতি ‘‘সুতা খো পনাযস্মন্তেহী’’তি এত্থ ‘‘এৱমেতং ধাৰযামী’’তি ৱত্ৱা ‘‘উদ্দিট্ঠং খো আযস্মন্তো নিদানং, সুতা খো পনাযস্মন্তেহি চত্তাৰো পাৰাজিকা ধম্মা’’তি ৱত্তব্বং. তেনেৱ মাতিকাট্ঠকথাযং (কঙ্খা. অট্ঠ. নিদানৱণ্ণনা) ‘‘তত্থাযস্মন্তে পুচ্ছামি কচ্চিত্থ পৰিসুদ্ধা, দুতিযম্পি পুচ্ছামি…পে… তস্মা তুণ্হী, এৱমেতং ধাৰযামীতি ৱত্ৱা ‘উদ্দিট্ঠং খো আযস্মন্তো নিদান’ন্তিআদিনা নযেন অৱসেসে সুতেন সাৱিতে উদ্দিট্ঠো হোতী’’তি ৱুত্তং. সুতেনাতি সুতপদেন. সৱৰভযন্তি ৱনচৰকভযং. তেনাহ ‘‘অটৱিমনুস্সভয’’ন্তি. ‘‘অৱসেসং সুতেন সাৱেতব্ব’’ন্তি ৱচনতো নিদানুদ্দেসে অনিট্ঠিতে সুতেন সাৱেতব্বং নাম নত্থীতি আহ ‘‘দুতিযাদীসু উদ্দেসেসূ’’তি. উদ্দিট্ঠউদ্দেসাপেক্খঞ্হি অৱসেসগ্গহণং, তস্মা নিদানে উদ্দিট্ঠে পাৰাজিকুদ্দেসাদীসু যস্মিং ৱিপ্পকতে অন্তৰাযো উপ্পজ্জতি, তেন সদ্ধিং অৱসেসং সুতেন সাৱেতব্বং.

তীহিপি ৱিধীহীতি ওসাৰণকথনসৰভঞ্ঞেহি. এত্থ চ অত্থং ভণিতুকামতায সুত্তস্স ওসাৰণা ওসাৰণং নাম. তস্সেৱ অত্থপ্পকাসনা কথনং নাম. সুত্তস্স তদত্থস্স ৱা সৰেন ভণনং সৰভঞ্ঞং নাম. সজ্ঝাযং অধিট্ঠহিত্ৱাতি ‘‘সজ্ঝাযং কৰোমী’’তি চিত্তং উপ্পাদেত্ৱা. ওসাৰেত্ৱা পন কথেন্তেনাতি পঠমং উস্সাৰেত্ৱা পচ্ছা অত্থং কথেন্তেন. মনুস্সানং পন ‘‘ভণাহী’’তি ৱত্তুং ৱট্টতীতি এত্থ উচ্চতৰে নিসিন্নেনপি মনুস্সানং ভণাহীতি ৱিসেসেত্ৱাযেৱ ৱত্তুং ৱট্টতি, অৱিসেসেত্ৱা পন ন ৱট্টতি. সজ্ঝাযং কৰোন্তেনাতি যত্থ কত্থচি নিসীদিত্ৱা সজ্ঝাযং কৰোন্তেন. থেৰোতি যো কোচি অত্তনা ৱুড্ঢতৰো. একং আপুচ্ছিত্ৱাতি একং ৱুড্ঢতৰং আপুচ্ছিত্ৱা. অপৰো আগচ্ছতীতি অপৰো ততোপি ৱুড্ঢতৰো আগচ্ছতি.

পাতিমোক্খুদ্দেসকথাৱণ্ণনা নিট্ঠিতা.

পাতিমোক্খুদ্দেসকঅজ্ঝেসনাদিকথাৱণ্ণনা

১৫৫. চোদনাৱত্থু নাম একং নগৰং. সঙ্ঘউপোসথাদিভেদেন নৱৱিধন্তি সঙ্ঘে উপোসথো গণে উপোসথো পুগ্গলে উপোসথোতি এৱং কাৰকৱসেন তযো, সুত্তুদ্দেসো পাৰিসুদ্ধিউপোসথো অধিট্ঠানুপোসথোতি এৱং কত্তব্বাকাৰৱসেন তযো, চাতুদ্দসিকো পন্নৰসিকো সামগ্গীউপোসথোতি এৱং দিৱসৱসেন তযোতি নৱৱিধং. চতুব্বিধং উপোসথকম্মন্তি অধম্মেন ৱগ্গং উপোসথকম্মং, অধম্মেন সমগ্গং উপোসথকম্মং, ধম্মেন ৱগ্গং উপোসথকম্মং, ধম্মেন সমগ্গং উপোসথকম্মন্তি এৱং চতুব্বিধম্পি উপোসথকম্মং. দুৱিধং পাতিমোক্খন্তি ভিক্খুপাতিমোক্খং ভিক্খুনীপাতিমোক্খন্তি দুৱিধং পাতিমোক্খং. নৱৱিধং পাতিমোক্খুদ্দেসন্তি ভিক্খূনং পঞ্চ উদ্দেসা, ভিক্খুনীনং ঠপেত্ৱা অনিযতুদ্দেসং অৱসেসা চত্তাৰোতি নৱৱিধং পাতিমোক্খুদ্দেসং.

পক্খগণনাদিউগ্গহণানুজাননকথাৱণ্ণনা

১৫৮-১৬১. সমন্নাহৰথাতি সল্লক্খেথ. পৰিযেসিতব্বানীতি ভিক্খাচাৰেন পৰিযেসিতব্বানি.

দিসংগমিকাদিৱত্থুকথাৱণ্ণনা

১৬৩. উতুৱস্সেযেৱাতি হেমন্তগিম্হেসুযেৱ.

পাৰিসুদ্ধিদানকথাৱণ্ণনা

১৬৪. যেন কেনচি অঙ্গপচ্চঙ্গেন ৱিঞ্ঞাপেতীতি মনসা চিন্তেত্ৱা হত্থপ্পযোগাদিনা যেন কেনচি ৱিঞ্ঞাপেতি. সঙ্ঘো নপ্পহোতীতি দ্ৱিন্নং দ্ৱিন্নং অন্তৰা হত্থপাসং অৱিজহিত্ৱা পটিপাটিযা ঠাতুং নপ্পহোতি. ইতৰা পন বিড়ালসঙ্খলিকপাৰিসুদ্ধি নামাতি এত্থ কেচি ৱদন্তি ‘‘বিড়ালসঙ্খলিকা বদ্ধাৱ হোতি অন্তোগেহে এৱ সম্পযোজনত্তা, যথা সা ন কত্থচি গচ্ছতি, তথা সাপি ন গচ্ছতীতি অধিপ্পাযো. ইতৰথা ৱিসেসনং নিৰত্থকং হোতী’’তি. অপৰে পন ‘‘যথা বহূহি মনুস্সেহি একস্স বিড়ালস্স অত্তনো অত্তনো সঙ্খলিকা গীৱায আবদ্ধা বিড়ালে গচ্ছন্তে গচ্ছন্তি আবদ্ধত্তা, ন অঞ্ঞস্মিং বিড়ালে গচ্ছন্তে গচ্ছন্তি অনাবদ্ধত্তা, এৱমেৱস্স ভিক্খুস্স বহূহি সঙ্খলিকসদিসা ছন্দপাৰিসুদ্ধি দিন্না, সা তস্মিং ভিক্খুস্মিং গচ্ছন্তে গচ্ছতি তস্মিং সঙ্খলিকা ৱিয আবদ্ধত্তা, ন অঞ্ঞস্মিং অনাবদ্ধত্তা’’তি ৱদন্তি. সব্বম্পেতং ন সাৰতো পচ্চেতব্বং. অযং পনেত্থ সাৰো – যথা সঙ্খলিকায পঠমৱলযং দুতিযংযেৱ ৱলযং পাপুণাতি, ন ততিযং, এৱমযম্পি পাৰিসুদ্ধিদাযকেন যস্স দিন্না, ততো অঞ্ঞত্থ ন গচ্ছতীতি সঙ্খলিকসদিসত্তা ‘‘বিড়ালসঙ্খলিকা’’তি ৱুত্তা. বিড়ালসঙ্খলিকগহণঞ্চেত্থ যাসং কাসঞ্চি সঙ্খলিকানং উপলক্খণমত্তন্তি দট্ঠব্বং.

ছন্দদানকথাৱণ্ণনা

১৬৫. ‘‘সন্তি সঙ্ঘস্স কৰণীযানী’’তি ৱত্তব্বে ৱচনৱিপল্লাসেন ‘‘কৰণীয’’ন্তি ৱুত্তং. তস্স সম্মুতিদানকিচ্চং নত্থি. ‘‘হত্থপাসং আনেতব্বোযেৱা’’তি গণ্ঠিপদেসু ৱুত্তং.

সঙ্ঘুপোসথাদিকথাৱণ্ণনা

১৬৮. সঙ্ঘসন্নিপাততো পঠমং কাতব্বং পুব্বকৰণন্তি ৱুত্তং, পুব্বকৰণতো পচ্ছা কাতব্বম্পি উপোসথকম্মতো পঠমং কাতব্বত্তা পুব্বকিচ্চন্তি ৱুত্তং. উভযম্পি চেতং উপোসথকম্মতো পঠমং কত্তব্বত্তা কত্থচি পুব্বকিচ্চমিচ্চেৱ ৱোহৰীযতি ‘‘কিং সঙ্ঘস্স পুব্বকিচ্চ’’ন্তিআদীসু ৱিয.

উপোসথোতি তীসু উপোসথদিৱসেসু অঞ্ঞতৰদিৱসো. তস্মিঞ্হি সতি ইদং সঙ্ঘস্স উপোসথকম্মং পত্তকল্লং নাম হোতি, নাসতি. যথাহ ‘‘ন চ, ভিক্খৱে, অনুপোসথে উপোসথো কাতব্বো’’তি (মহাৱ. ১৮৩). যাৱতিকা চ ভিক্খূ কম্মপ্পত্তাতি যত্তকা ভিক্খূ তস্স উপোসথকম্মস্স পত্তা যুত্তা অনুৰূপা সব্বন্তিমেন পৰিচ্ছেদেন চত্তাৰো ভিক্খূ পকতত্তা, তে চ খো হত্থপাসং অৱিজহিত্ৱা একসীমাযং ঠিতা. সভাগাপত্তিযো চ ন ৱিজ্জন্তীতি এত্থ যং সব্বো সঙ্ঘো ৱিকালভোজনাদিনা সভাগৱত্থুনা লহুকাপত্তিং আপজ্জতি, এৱৰূপা ‘‘ৱত্থুসভাগা’’তি ৱুচ্চন্তি. এতাসু হি অৱিজ্জমানাসু ৱিসভাগাসু ৱিজ্জমানাসুপি পত্তকল্লং হোতিযেৱ.

ৱজ্জনীযা চ পুগ্গলা তস্মিং ন হোন্তীতি ‘‘ন, ভিক্খৱে, সগহট্ঠায পৰিসাযা’’তি (মহাৱ. ১৫৪) ৱচনতো গহট্ঠো, ‘‘ন, ভিক্খৱে, ভিক্খুনিযা নিসিন্নপৰিসায পাতিমোক্খং উদ্দিসিতব্ব’’ন্তিআদিনা (মহাৱ. ১৮৩) নযেন ৱুত্তা ভিক্খুনী সিক্খমানা সামণেৰো সামণেৰী সিক্খাপচ্চক্খাতকো অন্তিমৱত্থুঅজ্ঝাপন্নকো আপত্তিযা অদস্সনে উক্খিত্তকো আপত্তিযা অপ্পটিকম্মে উক্খিত্তকো পাপিকায দিট্ঠিযা অপ্পটিনিস্সগ্গে উক্খিত্তকো পণ্ডকো থেয্যসংৱাসকো তিত্থিযপক্কন্তকো তিৰচ্ছানগতো মাতুঘাতকো পিতুঘাতকো অৰহন্তঘাতকো ভিক্খুনীদূসকো সঙ্ঘভেদকো লোহিতুপ্পাদকো উভতোব্যঞ্জনকোতি ইমে ৱীসতি চাতি একৱীসতি পুগ্গলা ৱজ্জনীযা নাম, তে হত্থপাসতো বহিকৰণৱসেন ৱজ্জেতব্বা. এতেসু হি তিৱিধে উক্খিত্তকে সতি উপোসথং কৰোন্তো সঙ্ঘো পাচিত্তিযং আপজ্জতি, সেসেসু দুক্কটং. এত্থ চ তিৰচ্ছানগতোতি যস্স উপসম্পদা পটিক্খিত্তা, সোৱ অধিপ্পেতো, তিত্থিযা গহট্ঠেনেৱ সঙ্গহিতা. এতেপি হি ৱজ্জনীযা. এৱং পত্তকল্লং ইমেহি চতূহি অঙ্গেহি সঙ্গহিতন্তি ৱেদিতব্বং.

অজ্জ মে উপোসথো পন্নৰসোতিপীতি পি-সদ্দেন পাড়িযং আগতনযেনেৱ ‘‘অজ্জ মে উপোসথো’’তিপি ৱত্তুং ৱট্টতীতি দীপেতি. মাতিকাট্ঠকথাযং (কঙ্খা. অট্ঠ. নিদানৱণ্ণনা) পন ‘‘অজ্জ মে উপোসথো চাতুদ্দসোতি ৱা পন্নৰসোতি ৱা ৱত্ৱা অধিট্ঠামীতি ৱত্তব্ব’’ন্তি ৱুত্তং.

সঙ্ঘুপোসথাদিকথাৱণ্ণনা নিট্ঠিতা.

আপত্তিপটিকম্মৱিধিকথাৱণ্ণনা

১৬৯. ননু চ ‘‘ন, ভিক্খৱে, সাপত্তিকেন উপোসথো কাতব্বো, যো কৰেয্য, আপত্তি দুক্কটস্সা’’তি এৱং সাপত্তিকস্স উপোসথকৰণে ৱিসুং পঞ্ঞত্তা আপত্তি ন দিস্সতি, তস্মা ভগৱতা পঞ্ঞত্তং ‘‘ন সাপত্তিকেন উপোসথো কাতব্বো’’তি ইদং কস্মা ৱুত্তন্তি আহ ‘‘যস্স সিযা আপত্তি…পে… পঞ্ঞত্তং হোতীতি ৱেদিতব্ব’’ন্তি. কিঞ্চাপি ৱিসুং পঞ্ঞত্তা আপত্তি ন দিস্সতি, অথ খো ‘‘যস্স সিযা আপত্তি, সো আৱিকৰেয্যা’’তিআদিং ৱদন্তেন অত্থতো পঞ্ঞত্তাযেৱাতি অধিপ্পাযো.

পাৰিসুদ্ধিদানপঞ্ঞাপনেন চাতি ইমিনাৱ ‘‘সাপত্তিকেন পাৰিসুদ্ধিপি ন দাতব্বা’’তি দীপিতং হোতি. ন হি সাপত্তিকো সমানো ‘‘পাৰিসুদ্ধিং দম্মি, পাৰিসুদ্ধিং মে হৰ, পাৰিসুদ্ধিং মে আৰোচেহী’’তি ৱত্তুমৰহতি. তস্মা পাৰিসুদ্ধিং দেন্তেন পঠমং সন্তী আপত্তি দেসেতব্বা ‘‘অহং, আৱুসো, ইত্থন্নামায আপত্তিযা ৱেমতিকো, যদা নিব্বেমতিকো ভৱিস্সামি, তদা তং আপত্তিং পটিকৰিস্সামী’’তি ৱত্ৱা উপোসথো কাতব্বো. ‘‘পাতিমোক্খং সোতব্ব’’ন্তি ৱচনতো যাৱ নিব্বেমতিকো ন হোতি, তাৱ সভাগাপত্তিং পটিগ্গহেতুং ন লভতি, অঞ্ঞেসঞ্চ কম্মানং পৰিসুদ্ধো নাম হোতি. ‘‘পুন নিব্বেমতিকো হুত্ৱা দেসেতব্বং ন চা’’তি নেৱ পাড়িযং ন অট্ঠকথাযং অত্থি, দেসিতে পন দোসো নত্থি. ‘‘ইতো ৱুট্ঠহিত্ৱা পটিকৰিস্সামীতি এত্থাপি এসেৱ নযো’’তি গণ্ঠিপদেসু ৱুত্তং. যথা সব্বো সঙ্ঘো সভাগাপত্তিং আপজ্জিত্ৱা ‘‘সুণাতু মে ভন্তে, সঙ্ঘো…পে… পটিকৰিস্সতী’’তি ঞত্তিং ঠপেত্ৱা উপোসথং কাতুং লভতি, এৱং তীহি ‘‘সুণন্তু মে আযস্মন্তা, ইমে ভিক্খূ সভাগং আপত্তিং আপন্না. যদা অঞ্ঞং ভিক্খুং সুদ্ধং অনাপত্তিকং পস্সিস্সন্তি, তদা তস্স সন্তিকে তং আপত্তিং পটিকৰিস্সন্তী’’তি গণঞত্তিং ঠপেত্ৱা, দ্ৱীহি অঞ্ঞমঞ্ঞং আৰোচেত্ৱা উপোসথং কাতুং ৱট্টতি. একেনপি ‘‘পৰিসুদ্ধং লভিত্ৱা পটিকৰিস্সামী’’তি আভোগং কত্ৱা কাতুং ৱট্টতীতি চ ৱদন্তি.

আপত্তিপটিকম্মৱিধিকথাৱণ্ণনা নিট্ঠিতা.

লিঙ্গাদিদস্সনকথাৱণ্ণনা

১৭৯. আচাৰসণ্ঠানন্তি আচাৰসণ্ঠিতি. আকৰীযতি পকাসীযতি এতেনাতি আকাৰো. লীনং গমযতি বোধেতীতি লিঙ্গং. নিমিযন্তি পৰিচ্ছিজ্জ ঞাযন্তি এতেনাতি নিমিত্তং. উদ্দিসীযন্তি অপদিসীযন্তি এতেনাতি উদ্দেসো. ‘‘অম্হাকং ইদ’’ন্তি অঞ্ঞাতং অৱিদিতন্তি অঞ্ঞাতকং. তঞ্চ অত্থতো পৰসন্তকংযেৱাতি আহ ‘‘অঞ্ঞেসং সন্তক’’ন্তি.

১৮০. নানাসংৱাসকভাৱন্তি লদ্ধিনানাসংৱাসকভাৱং. তস্স অভিভৱো নাম তেসং লদ্ধিৱিস্সজ্জাপনন্তি আহ ‘‘তং দিট্ঠিং ন নিস্সজ্জাপেন্তীতি অত্থো’’তি.

নগন্তব্বগন্তব্বৱাৰকথাৱণ্ণনা

১৮১. উপোসথাধিট্ঠানত্থং সীমাপি নদীপি ন গন্তব্বাতি গৰুকং পাতিমোক্খুদ্দেসং ৱিস্সজ্জেত্ৱা লহুকস্স অকত্তব্বত্তা ৱুত্তং. আৰঞ্ঞকেনাপি ভিক্খুনাতি একচাৰিকেন আৰঞ্ঞকভিক্খুনা, যত্থ ৱা সঙ্ঘপহোনকা ভিক্খূ ন সন্তি, তাদিসে অৰঞ্ঞে ৱসন্তেন. তত্থ উপোসথং কত্ৱাৱ গন্তব্বন্তি তস্স ৱসনট্ঠানে সঙ্ঘুপোসথস্স অপ্পৱত্তনতো ৱুত্তং. উপোসথন্তৰাযোতি অত্তনো উপোসথন্তৰাযো.

ৱজ্জনীযপুগ্গলসন্দস্সনকথাৱণ্ণনা

১৮৩. হত্থপাসুপগমনমেৱ পমাণন্তি ভিক্খুনীআদযো ঠিতা ৱা হোন্তু নিসিন্না ৱা, তেসং হত্থপাসুপগমনমেৱ আপত্তিযা পমাণন্তি অধিপ্পাযো, তস্মা একসীমাযম্পি হত্থপাসং জহাপেত্ৱা উপোসথং কাতুং ৱট্টতি. সেসমেত্থ উত্তানমেৱ.

উপোসথক্খন্ধকৱণ্ণনা নিট্ঠিতা.