৫. পত্তনিদ্দেসো

পত্তো চাতি –

৬০. অযোপত্তো ভূমিপত্তো, জাতিযা কপ্পিযা দুৱে;

উক্কট্ঠো মজ্ঝিমো চেৱ, ওমকো চ পমাণতো.

৬১. উক্কট্ঠো মগধে নাড়ি-দ্ৱযতণ্ডুলসাধিতং;

গণ্হাতি ওদনং সূপং, ব্যঞ্জনঞ্চ তদূপিযং.

৬২. মজ্ঝিমো তস্সুপড্ঢোৱ, ততোপড্ঢোৱ ওমকো;

উক্কট্ঠতো চ উক্কট্ঠো, অপত্তো ওমকোমকো.

৬৩. অতিৰেকপত্তো ধাৰেয্যো, দসাহপৰমং সকো;

কপ্পো নিস্সগ্গিযো হোতি, তস্মিং কালেতিনামিতে.

৬৪. অচ্ছেদদানগাহেহি, ৱিব্ভমা মৰণুদ্ধটা;

লিঙ্গসিক্খাহি ছিদ্দেন, পত্তাধিট্ঠানমুজ্ঝতি.

৬৫. পত্তং ন পটিসামেয্য, সোদকং ন চ ওতপে;

উণ্হে ন নিদহে ভুম্যা, ন ঠপে নো চ লগ্গযে.

৬৬. মিড্ঢন্তে পৰিভণ্ডন্তে, অঙ্কে ৱা আতপত্তকে;

পাদেসু মঞ্চপীঠে ৱা, ঠপেতুং ন চ কপ্পতি.

৬৭. ন নীহৰেয্য উচ্ছিট্ঠো-দকঞ্চ চলকট্ঠিকং;

পত্তেন পত্তহত্থো ৱা, কৱাটং ন পণামযে.

৬৮. ভূমিআধাৰকে দাৰুদণ্ডাধাৰে সুসজ্জিতে;

দুৱে পত্তে ঠপেয্যেকং, নিক্কুজ্জিত্ৱান ভূমিযং.

৬৯. দাৰুৰূপিযসোৱণ্ণ-মণিৱেড়ুৰিযামযা;

কংসকাচতিপুসীসফলিকাতম্বলোহজা.

৭০. ছৱসীসমযো চাপি, ঘটীতুম্বকটাহজা;

পত্তা অকপ্পিযা সব্বে, ৱুত্তা দুক্কটৱত্থুকাতি.