২৮. কম্মনিদ্দেসো

কম্মঞ্চাতি –

১৯৯. ৱগ্গেন অধম্মকম্মং, সমগ্গেন অধম্মিকং;

ৱগ্গেন ধম্মকম্মঞ্চ, সমগ্গেন চ ধম্মিকং;

চতুত্থংযেৱানুঞ্ঞাতং, সেসকম্মেসু দুক্কটং.

২০০. চতুৱগ্গো পঞ্চৱগ্গো, দসৱীসতিৱগ্গিকো;

তিৰেকৱীসতিৱগ্গো, পঞ্চ সঙ্ঘা ৱিভাৱিতা.

২০১. চতুৱগ্গেত্থ অব্ভানু-পসম্পদাপৱাৰণা;

পঞ্চৱগ্গো চ অব্ভানং, মজ্ঝদেসুপসম্পদং.

২০২. দসৱগ্গো চ অব্ভানং, ঠপেত্ৱা সব্বকম্মিকো;

ইতৰো সব্বকম্মেসু, কম্মপ্পত্তোতি দীপিতো.

২০৩. চতুৱগ্গেন কত্তব্বে, চত্তাৰো পকতত্তকা;

কম্মপ্পত্তা পৰে ছন্দা-ৰহা সেসেপ্যযং নযো.

২০৪. চতুৱগ্গাদিকত্তব্বং, অসংৱাসকম্মাৰহ;

গৰুকট্ঠেস্ৱঞ্ঞতৰং, কত্ৱান গণপূৰকং;

পৰিৱাসাদিকং কম্মং, কতং কুপ্পঞ্চ দুক্কটং.

২০৫. অধম্মকম্মং ৱাৰেয্য, অন্তৰাযে দুৱে তযো;

দিট্ঠাৱিমেকোধিট্ঠানং, ৱাৰেন্তেৱ ততোধিকা.

২০৬. কম্মাৰহা অসংৱাসা, খিত্তচিত্তদুখট্টিতা;

এতেসং সঙ্ঘমজ্ঝম্হি, পটিক্খেপো ন ৰুহতি.

২০৭. পকতত্তেকসীমট্ঠ-সমসংৱাসভিক্খুনো;

আৰোচেন্তস্সন্তমসো-নন্তৰস্সাপি ৰূহতি.

২০৮. কোপেতুং ধম্মিকং কম্মং, পটিক্কোসেয্য সম্মুখা;

তিৰোক্খা কাযসামগ্গিং, ছন্দং নো দেয্য দুক্কটন্তি.