২৫. অকপ্পিযসযননিদ্দেসো

অকপ্পিযসযনানীতি –

১৮৭. আসন্দী তূলী পল্লঙ্কো, পটিকং গোনচিত্তকং;

পটলী ৱিকতী উদ্দ-লোমী একন্তলোমিকা.

১৮৮. কুত্তং কোসেয্যং কট্টিস্সং, হত্থিঅস্সৰথত্থৰা;

জিনপ্পৱেণিকদলী-মিগপ্পৱৰঅত্থৰা.

১৮৯. সলোহিতৱিতানঞ্চু-ভতোৰত্তূপধানকং;

অকপ্পিযানি এতানি, দুক্কটং পৰিভুঞ্জতো.

১৯০. আসন্দাদিত্তযা সেসে, লব্ভতে গিহিসন্তকে;

ধম্মাসনে চ ভত্তগ্গে, ঘৰে চাপি নিসীদিতুং;

ভূমত্থৰণসঙ্খেপে, সযিতুঞ্চাপি কপ্পতি.

১৯১. চতুৰংসপীঠা সত্তঙ্গা, পঞ্চঙ্গা উচ্চপাদকা;

তূলোনদ্ধা ঘৰেযেৱ, মঞ্চপীঠা নিসীদিতুং.

১৯২. চোড়ৱাকুণ্ণপণ্ণানং, তিণানঞ্চেৱ পূৰিতা;

চীৱৰচ্ছৱিযো পঞ্চ, ভিসী সব্বত্থ কপ্পিযা.

১৯৩. তূলত্তযং ভিসিগব্ভো, লোমানি মিগপক্খিনং;

বিম্বোহনে অনুঞ্ঞাতং, তূলৱজ্জা মসূৰকে.

১৯৪. মনুস্সলোমমুণ্ণাযং, পণ্ণে পুপ্ফং তমালকং;

সুদ্ধং ন আসনঞ্চেৱ, লব্ভমপ্পটিৱেক্খিতন্তি.