(৮) ৩. যমকৱগ্গো

১-১০. সদ্ধাসুত্তাদিৱণ্ণনা

৭১-৮০. অট্ঠমস্স পঠমাদীনি উত্তানত্থানেৱ. দসমে কুচ্ছিতং সীদতীতি কুসীতো দ-কাৰস্স ত-কাৰং কত্ৱা. যস্স ধম্মস্স ৱসেন পুগ্গলো ‘‘কুসীতো’’তি ৱুচ্চতি, সো কুসিতভাৱো ইধ কুসিত-সদ্দেন ৱুত্তো. ৱিনাপি হি ভাৱজোতনসদ্দং ভাৱত্থো ৱিঞ্ঞাযতি যথা ‘‘পটস্স সুক্ক’’ন্তি, তস্মা কুসীতভাৱৱত্থূনীতি অত্থো. তেনাহ ‘‘কোসজ্জকাৰণানীতি অত্থো’’তি. কম্মং নাম সমণসাৰুপ্পং ঈদিসন্তি আহ ‘‘চীৱৰৱিচাৰণাদী’’তি. ৱীৰিযন্তি পধানৱীৰিযং. তং পন চঙ্কমনৱসেন কৰণে কাযিকন্তিপি ৱত্তব্বতং লভতীতি আহ ‘‘দুৱিধম্পী’’তি. পত্তিযাতি পাপুণনত্থং. ওসীদনন্তি ভাৱনানুযোগে সঙ্কোচো. মাসেহি আচিতং নিচিতং ৱিযাতি মাসাচিতং, তং মঞ্ঞে. যস্মা মাসা তিন্তা ৱিসেসেন গৰুকা হোন্তি, তস্মা ‘‘যথা তিন্তমাসো’’তিআদি ৱুত্তং. ৱুট্ঠিতো হোতি গিলানভাৱাতি অধিপ্পাযো.

তেসন্তি আৰম্ভৱত্থূনং. ইমিনাৱ নযেনাতি ইমিনা কুসীতৱত্থূসু ৱুত্তেনেৱ নযেন ‘‘দুৱিধম্পি ৱীৰিযং আৰভতী’’তিআদিনা. ইদং পঠমন্তি ‘‘ইদং, হন্দাহং, ৱীৰিযং আৰভামী’’তি, ‘‘এৱং ভাৱনায অব্ভুস্সহনং পঠমং আৰম্ভৱত্থূ’’তিআদিনা চ অত্থো ৱেদিতব্বো. যথা তথা পঠমং পৱত্তং অব্ভুস্সহনঞ্হি উপৰি ৱীৰিযাৰম্ভস্স কাৰণং হোতি. অনুৰূপপচ্চৱেক্খণসহিতানি হি অব্ভুস্সহনানি তম্মূলকানি ৱা পচ্চৱেক্খণানি অট্ঠ আৰম্ভৱত্থূনীতি ৱেদিতব্বানি.

সদ্ধাসুত্তাদিৱণ্ণনা নিট্ঠিতা.

যমকৱগ্গৱণ্ণনা নিট্ঠিতা.

৮১-৬২৬. সেসং উত্তানমেৱ.

ইতি মনোৰথপূৰণিযা অঙ্গুত্তৰনিকায-অট্ঠকথায

অট্ঠকনিপাতৱণ্ণনায অনুত্তানত্থদীপনা সমত্তা.