৬. ৱিমোক্খসুত্তৱণ্ণনা

৬৬. ছট্ঠে (দী. নি. টী. ২.১২৯) কেনট্ঠেনাতি কেন সভাৱেন. সভাৱো হি ঞাণেন যাথাৱতো অৰণীযতো ঞাতব্বতো ‘‘অত্থো’’তি ৱুচ্চতি, সো এৱ ত্থ-কাৰস্স ট্ঠ-কাৰং কত্ৱা ‘‘অট্ঠো’’তি ৱুত্তো. অধিমুচ্চনট্ঠেনাতি অধিকং সৱিসেসং মুচ্চনট্ঠেন. এতেন সতিপি সব্বস্সপি ৰূপাৱচৰজ্ঝানস্স ৱিক্খম্ভনৱসেন পটিপক্খতো ৱিমুত্তভাৱে যেন ভাৱনাৱিসেসেন তং ঝানং সাতিসযং পটিপক্খতো ৱিমুচ্চিত্ৱা পৱত্ততি, সো ভাৱনাৱিসেসো দীপিতো. ভৱতি হি সমানজাতিযুত্তোপি ভাৱনাৱিসেসেন পৱত্তিআকাৰৱিসেসো. যথা তং সদ্ধাৱিমুত্ততো দিট্ঠিপ্পত্তস্স, তথা পচ্চনীকধম্মেহি সুট্ঠু ৱিমুত্ততায এৱ অনিগ্গহিতভাৱেন নিৰাসঙ্কতায অভিৰতিৱসেন সুট্ঠু অধিমুচ্চনট্ঠেনপি ৱিমোক্খো. তেনাহ ‘‘আৰম্মণে চা’’তিআদি. অযং পনত্থোতি অযং অধিমুচ্চনট্ঠো পচ্ছিমে ৱিমোক্খে নিৰোধে নত্থি. কেৱলো ৱিমুত্তট্ঠো এৱ তত্থ লব্ভতি, তং সযমেৱ পৰতো ৱক্খতি.

ৰূপীতি যেনাযং সসন্ততিপৰিযাপন্নেন ৰূপেন সমন্নাগতো, তং যস্স ঝানস্স হেতুভাৱেন ৱিসিট্ঠৰূপং হোতি, যেন ৱিসিট্ঠেন ৰূপেন ‘‘ৰূপী’’তি ৱুচ্চেয্য ৰূপীসদ্দস্স অতিসযত্থদীপনতো, তদেৱ সসন্ততিপৰিযাপন্নৰূপস্স ৱসেন পটিলদ্ধজ্ঝানং ইধ পৰমত্থতো ৰূপিভাৱসাধকন্তি দট্ঠব্বং. তেনাহ ‘‘অজ্ঝত্ত’’ন্তিআদি. ৰূপজ্ঝানং ৰূপং উত্তৰপদলোপেন. ৰূপানীতি পনেত্থ পুৰিমপদলোপো দট্ঠব্বো. তেন ৱুত্তং ‘‘নীলকসিণাদীনি ৰূপানী’’তি. ৰূপে কসিণৰূপে সঞ্ঞা ৰূপসঞ্ঞা, সা এতস্স অত্থীতি ৰূপসঞ্ঞী, সঞ্ঞাসীসেন ঝানং ৱদতি. তপ্পটিপক্খেন অৰূপসঞ্ঞী. তেনাহ ‘‘অজ্ঝত্তং ন ৰূপসঞ্ঞী’’তিআদি.

অন্তো অপ্পনাযং ‘‘সুভ’’ন্তি আভোগো নত্থীতি ইমিনা পুব্বাভোগৱসেন তথা অধিমুত্তি সিযাতি দস্সেতি. এৱঞ্হেত্থ তথাৱত্তব্বতাপত্তিচোদনা অনৱট্ঠানা হোতি. যস্মা সুৱিসুদ্ধেসু নীলাদীসু ৱণ্ণকসিণেসু তত্থ কতাধিকাৰানং অভিৰতিৱসেন সুট্ঠু অধিমুচ্চনট্ঠো সম্ভৱতি, তস্মা অট্ঠকথাযং তথা ততিযো ৱিমোক্খো সংৱণ্ণিতো. যস্মা পন মেত্তাদিৱসেন পৱত্তমানা ভাৱনা সত্তে অপ্পটিকূলতো দহন্তি, তে সুভতো অধিমুচ্চিত্ৱা পৱত্ততি, তস্মা পটিসম্ভিদামগ্গে (পটি. ম. ১.২১২-২১৩) ব্ৰহ্মৱিহাৰভাৱনা ‘‘সুভৱিমোক্খো’’তি ৱুত্তা. তযিদং উভযম্পি তেন তেন পৰিযাযেন ৱুত্তত্তা ন ৱিৰুজ্ঝতীতি দট্ঠব্বং.

সব্বসোতি অনৱসেসতো. ন হি চতুন্নং অৰূপক্খন্ধানং একদেসোপি তত্থ অৱসিস্সতি. ৱিস্সট্ঠত্তাতি যথাপৰিচ্ছিন্নকালে নিৰোধিতত্তা. উত্তমো ৱিমোক্খো নাম অৰিযেহেৱ সমাপজ্জিতব্বতো অৰিযফলপৰিযোসানত্তা দিট্ঠেৱ ধম্মে নিব্বানপ্পত্তিভাৱতো চ.

ৱিমোক্খসুত্তৱণ্ণনা নিট্ঠিতা.