১-১২. গঙ্গানদীআদিসুত্তদ্ৱাদসকং

৮৪৫-৮৫৬. ‘‘সেয্যথাপি, ভিক্খৱে, গঙ্গা নদী পাচীননিন্না পাচীনপোণা পাচীনপব্ভাৰা; এৱমেৱ খো, ভিক্খৱে, ভিক্খু চত্তাৰো ইদ্ধিপাদে ভাৱেন্তো চত্তাৰো ইদ্ধিপাদে বহুলীকৰোন্তো নিব্বাননিন্নো হোতি নিব্বানপোণো নিব্বানপব্ভাৰো. কথঞ্চ, ভিক্খৱে, ভিক্খু চত্তাৰো ইদ্ধিপাদে ভাৱেন্তো চত্তাৰো ইদ্ধিপাদে বহুলীকৰোন্তো নিব্বাননিন্নো হোতি নিব্বানপোণো নিব্বানপব্ভাৰো? ইধ, ভিক্খৱে, ভিক্খু ছন্দসমাধিপ্পধানসঙ্খাৰসমন্নাগতং ইদ্ধিপাদং ভাৱেতি, ৱীৰিযসমাধি…পে… চিত্তসমাধি…পে… ৱীমংসাসমাধিপ্পধানসঙ্খাৰসমন্নাগতং ইদ্ধিপাদং ভাৱেতি.

‘‘এৱং খো, ভিক্খৱে, ভিক্খু চত্তাৰো ইদ্ধিপাদে ভাৱেন্তো চত্তাৰো ইদ্ধিপাদে বহুলীকৰোন্তো নিব্বাননিন্নো হোতি নিব্বানপোণো নিব্বানপব্ভাৰো’’তি. দ্ৱাদসমং.

গঙ্গাপেয্যালৱগ্গো চতুত্থো.

তস্সুদ্দানং –

ছ পাচীনতো নিন্না, ছ নিন্না চ সমুদ্দতো;

দ্ৱেতে ছ দ্ৱাদস হোন্তি, ৱগ্গো তেন পৱুচ্চতীতি.

অপ্পমাদৱগ্গো ৱিত্থাৰেতব্বো.

তস্সুদ্দানং –

তথাগতং পদং কূটং, মূলং সাৰো চ ৱস্সিকং;

ৰাজা চন্দিমসূৰিযা, ৱত্থেন দসমং পদন্তি.

বলকৰণীযৱগ্গো ৱিত্থাৰেতব্বো.

তস্সুদ্দানং –

বলং বীজঞ্চ নাগো চ, ৰুক্খো কুম্ভেন সূকিযা;

আকাসেন চ দ্ৱে মেঘা, নাৱা আগন্তুকা নদীতি.

এসনাৱগ্গো ৱিত্থাৰেতব্বো.

তস্সুদ্দানং –

এসনা ৱিধা আসৱো, ভৱো চ দুক্খতা তিস্সো;

খিলং মলঞ্চ নীঘো চ, ৱেদনা তণ্হা তসিনা চাতি.