৯. পীতৱিমানৱত্থু

৭৯৫. ‘‘পীতৱত্থে পীতধজে, পীতালঙ্কাৰভূসিতে;

পীতচন্দনলিত্তঙ্গে, পীতউপ্পলমালিনী [পীতুপ্পলমধাৰিনী (স্যা. ক.), পীতুপ্পলমালিনী (পী.)].

৭৯৬. ‘‘পীতপাসাদসযনে, পীতাসনে পীতভাজনে;

পীতছত্তে পীতৰথে, পীতস্সে পীতবীজনে.

৭৯৭. ‘‘কিং কম্মমকৰী ভদ্দে, পুব্বে মানুসকে ভৱে;

দেৱতে পুচ্ছিতাচিক্খ, কিস্স কম্মস্সিদং ফল’’ন্তি.

৭৯৮. ‘‘কোসাতকী নাম লতত্থি ভন্তে, তিত্তিকা অনভিচ্ছিতা;

তস্সা চত্তাৰি পুপ্ফানি, থূপং অভিহৰিং অহং.

৭৯৯. ‘‘সত্থু সৰীৰমুদ্দিস্স, ৱিপ্পসন্নেন চেতসা;

নাস্স মগ্গং অৱেক্খিস্সং, ন তগ্গমনসা [তদগ্গমনসা (সী.), তদঙ্গমনসা (স্যা.)] সতী.

৮০০. ‘‘ততো মং অৱধী গাৱী, থূপং অপত্তমানসং;

তঞ্চাহং অভিসঞ্চেয্যং, ভিয্যো [ভীযো (সী. অট্ঠ.)] নূন ইতো সিযা.

৮০১. ‘‘তেন কম্মেন দেৱিন্দ, মঘৱা দেৱকুঞ্জৰো;

পহায মানুসং দেহং, তৱ সহব্য [সহব্যত (সী. স্যা.)] মাগতা’’তি.

৮০২. ইদং সুত্ৱা তিদসাধিপতি, মঘৱা দেৱকুঞ্জৰো;

তাৱতিংসে পসাদেন্তো, মাতলিং এতদব্ৰৱি [এতদব্ৰূৱীতি (সী.)].

৮০৩. ‘‘পস্স মাতলি অচ্ছেৰং, চিত্তং কম্মফলং ইদং;

অপ্পকম্পি কতং দেয্যং, পুঞ্ঞং হোতি মহপ্ফলং.

৮০৪. ‘‘নত্থি চিত্তে পসন্নম্হি, অপ্পকা নাম দক্খিণা;

তথাগতে ৱা সম্বুদ্ধে, অথ ৱা তস্স সাৱকে.

৮০৫. ‘‘এহি মাতলি অম্হেপি, ভিয্যো ভিয্যো মহেমসে;

তথাগতস্স ধাতুযো, সুখো পুঞ্ঞান মুচ্চযো.

৮০৬. ‘‘তিট্ঠন্তে নিব্বুতে চাপি, সমে চিত্তে সমং ফলং;

চেতোপণিধিহেতু হি, সত্তা গচ্ছন্তি সুগ্গতিং.

৮০৭. ‘‘বহূনং [বহুন্নং (সী. স্যা.)] ৱত অত্থায, উপ্পজ্জন্তি তথাগতা;

যত্থ কাৰং কৰিত্ৱান, সগ্গং গচ্ছন্তি দাযকা’’তি.

পীতৱিমানং নৱমং.