৩. নাগৱিমানৱত্থু

৭০৫. ‘‘অলঙ্কতা মণিকঞ্চনাচিতং, সোৱণ্ণজালচিতং মহন্তং;

অভিৰুয্হ গজৱৰং সুকপ্পিতং, ইধাগমা ৱেহাযসং [ৱেহাসযং (সী.)] অন্তলিক্খে.

৭০৬. ‘‘নাগস্স দন্তেসু দুৱেসু নিম্মিতা, অচ্ছোদকা [অচ্ছোদিকা (সী. ক.)] পদুমিনিযো সুফুল্লা;

পদুমেসু চ তুৰিযগণা পভিজ্জৰে, ইমা চ নচ্চন্তি মনোহৰাযো.

৭০৭. ‘‘দেৱিদ্ধিপত্তাসি মহানুভাৱে, মনুস্সভূতা কিমকাসি পুঞ্ঞং;

কেনাসি এৱং জলিতানুভাৱা, ৱণ্ণো চ তে সব্বদিসা পভাসতী’’তি.

৭০৮. ‘‘বাৰাণসিযং উপসঙ্কমিত্ৱা, বুদ্ধস্সহং ৱত্থযুগং অদাসিং;

পাদানি ৱন্দিত্ৱা [ৱন্দিত্ৱ (সী.)] ছমা নিসীদিং, ৱিত্তা চহং অঞ্জলিকং অকাসিং.

৭০৯. ‘‘বুদ্ধো চ মে কঞ্চনসন্নিভত্তচো, অদেসযি সমুদযদুক্খনিচ্চতং;

অসঙ্খতং দুক্খনিৰোধসস্সতং, মগ্গং অদেসযি [অদেসেসি (সী.)] যতো ৱিজানিসং;

৭১০. ‘‘অপ্পাযুকী কালকতা ততো চুতা, উপপন্না তিদসগণং যসস্সিনী;

সক্কস্সহং অঞ্ঞতৰা পজাপতি, যসুত্তৰা নাম দিসাসু ৱিস্সুতা’’তি.

নাগৱিমানং ততিযং.