১২. ৰজ্জুমালাৱিমানৱত্থু

৮২৬. ‘‘অভিক্কন্তেন ৱণ্ণেন, যা ত্ৱং তিট্ঠসি দেৱতে;

হত্থপাদে চ ৱিগ্গয্হ, নচ্চসি সুপ্পৱাদিতে.

৮২৭. ‘‘তস্সা তে নচ্চমানায, অঙ্গমঙ্গেহি সব্বসো;

দিব্বা সদ্দা নিচ্ছৰন্তি, সৱনীযা মনোৰমা.

৮২৮. ‘‘তস্সা তে নচ্চমানায, অঙ্গমঙ্গেহি সব্বসো;

দিব্বা গন্ধা পৱাযন্তি, সুচিগন্ধা মনোৰমা.

৮২৯. ‘‘ৱিৱত্তমানা কাযেন, যা ৱেণীসু পিড়ন্ধনা;

তেসং সুয্যতি নিগ্ঘোসো, তুৰিযে পঞ্চঙ্গিকে যথা.

৮৩০. ‘‘ৱটংসকা ৱাতধুতা, ৱাতেন সম্পকম্পিতা;

তেসং সুয্যতি নিগ্ঘোসো, তুৰিযে পঞ্চঙ্গিকে যথা.

৮৩১. ‘‘যাপি তে সিৰস্মিং মালা, সুচিগন্ধা মনোৰমা;

ৱাতি গন্ধো দিসা সব্বা, ৰুক্খো মঞ্জূসকো যথা.

৮৩২. ‘‘ঘাযসে তং সুচিগন্ধং, ৰূপং পস্সসি অমানুসং;

দেৱতে পুচ্ছিতাচিক্খ, কিস্স কম্মস্সিদং ফল’’ন্তি.

৮৩৩. ‘‘দাসী অহং পুৰে আসিং, গযাযং ব্ৰাহ্মণস্সহং;

অপ্পপুঞ্ঞা অলক্খিকা, ৰজ্জুমালাতি মং ৱিদুং [ৱিদূ (স্যা. পী. ক.)].

৮৩৪. ‘‘অক্কোসানং ৱধানঞ্চ, তজ্জনায চ উগ্গতা [উক্কতা (সী. স্যা.)];

কুটং গহেত্ৱা নিক্খম্ম, অগঞ্ছিং [আগচ্ছিং (স্যা. ক.), অগচ্ছিং (পী.), গচ্ছিং (সী.)] উদহাৰিযা [উদকহাৰিযা (সী.)].

৮৩৫. ‘‘ৱিপথে কুটং নিক্খিপিত্ৱা, ৱনসণ্ডং উপাগমিং;

ইধেৱাহং মৰিস্সামি, কো অত্থো [ক্ৱত্থোসি (ক.), কীৱত্থোপি (স্যা.)] জীৱিতেন মে.

৮৩৬. ‘‘দড়্হং পাসং কৰিত্ৱান, আসুম্ভিত্ৱান পাদপে;

ততো দিসা ৱিলোকেসিং,কো নু খো ৱনমস্সিতো.

৮৩৭. ‘‘তত্থদ্দসাসিং সম্বুদ্ধং, সব্বলোকহিতং মুনিং;

নিসিন্নং ৰুক্খমূলস্মিং, ঝাযন্তং অকুতোভযং.

৮৩৮. ‘‘তস্সা মে অহু সংৱেগো, অব্ভুতো লোমহংসনো;

কো নু খো ৱনমস্সিতো, মনুস্সো উদাহু দেৱতা.

৮৩৯. ‘‘পাসাদিকং পসাদনীযং, ৱনা নিব্বনমাগতং;

দিস্ৱা মনো মে পসীদি, নাযং যাদিসকীদিসো.

৮৪০. ‘‘গুত্তিন্দ্ৰিযো ঝানৰতো, অবহিগ্গতমানসো;

হিতো সব্বস্স লোকস্স, বুদ্ধো অযং [সোযং (সী.)] ভৱিস্সতি.

৮৪১. ‘‘ভযভেৰৱো দুৰাসদো, সীহোৱ গুহমস্সিতো;

দুল্লভাযং দস্সনায, পুপ্ফং ওদুম্বৰং যথা.

৮৪২. ‘‘সো মং মুদূহি ৱাচাহি, আলপিত্ৱা তথাগতো;

ৰজ্জুমালেতি মংৱোচ, সৰণং গচ্ছ তথাগতং.

৮৪৩. ‘‘তাহং গিৰং সুণিত্ৱান, নেলং অত্থৱতিং সুচিং;

সণ্হং মুদুঞ্চ ৱগ্গুঞ্চ, সব্বসোকাপনূদনং.

৮৪৪. ‘‘কল্লচিত্তঞ্চ মং ঞত্ৱা, পসন্নং সুদ্ধমানসং;

হিতো সব্বস্স লোকস্স, অনুসাসি তথাগতো.

৮৪৫. ‘‘ইদং দুক্খন্তি মংৱোচ, অযং দুক্খস্স সম্ভৱো;

দুক্খ [অযং (সী. স্যা. পী.)] নিৰোধো মগ্গো চ [দুক্খনিৰোধো চ (স্যা.)], অঞ্জসো অমতোগধো.

৮৪৬. ‘‘অনুকম্পকস্স কুসলস্স, ওৱাদম্হি অহং ঠিতা;

অজ্ঝগা অমতং সন্তিং, নিব্বানং পদমচ্চুতং.

৮৪৭. ‘‘সাহং অৱট্ঠিতাপেমা, দস্সনে অৱিকম্পিনী;

মূলজাতায সদ্ধায, ধীতা বুদ্ধস্স ওৰসা.

৮৪৮. ‘‘সাহং ৰমামি কীড়ামি, মোদামি অকুতোভযা;

দিব্বমালং ধাৰযামি, পিৱামি মধুমদ্দৱং.

৮৪৯. ‘‘সট্ঠিতুৰিযসহস্সানি, পটিবোধং কৰোন্তি মে;

আড়ম্বো গগ্গৰো ভীমো, সাধুৱাদী চ সংসযো.

৮৫০. ‘‘পোক্খৰো চ সুফস্সো চ, ৱীণামোক্খা চ নাৰিযো;

নন্দা চেৱ সুনন্দা চ, সোণদিন্না সুচিম্হিতা.

৮৫১. ‘‘অলম্বুসা মিস্সকেসী চ, পুণ্ডৰীকাতিদাৰুণী [… তিচাৰুণী (সী.)];

এণীফস্সা সুফস্সা [সুপস্সা (স্যা. পী. ক.)] চ, সুভদ্দা [সংভদ্দা (ক.)] মুদুৱাদিনী.

৮৫২. ‘‘এতা চঞ্ঞা চ সেয্যাসে, অচ্ছৰানং পবোধিকা;

তা মং কালেনুপাগন্ত্ৱা, অভিভাসন্তি দেৱতা.

৮৫৩. ‘‘হন্দ নচ্চাম গাযাম, হন্দ তং ৰমযামসে;

নযিদং অকতপুঞ্ঞানং, কতপুঞ্ঞানমেৱিদং.

৮৫৪. ‘‘অসোকং নন্দনং ৰম্মং, তিদসানং মহাৱনং;

সুখং অকতপুঞ্ঞানং, ইধ নত্থি পৰত্থ চ.

৮৫৫. ‘‘সুখঞ্চ কতপুঞ্ঞানং, ইধ চেৱ পৰত্থ চ;

তেসং সহব্যকামানং, কত্তব্বং কুসলং বহুং;

কতপুঞ্ঞা হি মোদন্তি, সগ্গে ভোগসমঙ্গিনো.

৮৫৬. ‘‘বহূনং ৱত অত্থায, উপ্পজ্জন্তি তথাগতা;

দক্খিণেয্যা মনুস্সানং, পুঞ্ঞখেত্তানমাকৰা;

যত্থ কাৰং কৰিত্ৱান, সগ্গে মোদন্তি দাযকা’’তি.

ৰজ্জুমালাৱিমানং দ্ৱাদসমং.

মঞ্জিট্ঠকৱগ্গো চতুত্থো নিট্ঠিতো.

তস্সুদ্দানং –

মঞ্জিট্ঠা পভস্সৰা নাগা, অলোমাকঞ্জিকদাযিকা;

ৱিহাৰচতুৰিত্থম্বা, পীতা উচ্ছুৱন্দনৰজ্জুমালা চ;

ৱগ্গো তেন পৱুচ্চতীতি.

ইত্থিৱিমানং সমত্তং.