নমো তস্স ভগৱতো অৰহতো সম্মাসম্বুদ্ধস্স

খুদ্দকনিকাযে

পেটকোপদেসপাড়ি

১. অৰিযসচ্চপ্পকাসনপঠমভূমি

নমো সম্মাসম্বুদ্ধানং পৰমত্থদস্সীনং

সীলাদিগুণপাৰমিপ্পত্তানং.

১. দুৱে হেতূ দুৱে পচ্চযা সাৱকস্স সম্মাদিট্ঠিযা উপ্পাদায – পৰতো চ ঘোসো সচ্চানুসন্ধি, অজ্ঝত্তঞ্চ যোনিসো মনসিকাৰো. তত্থ কতমো পৰতো ঘোসো? যা পৰতো দেসনা ওৱাদো অনুসাসনী সচ্চকথা সচ্চানুলোমো. চত্তাৰি সচ্চানি – দুক্খং সমুদযো নিৰোধো মগ্গো. ইমেসং চতুন্নং সচ্চানং যা দেসনা সন্দস্সনা ৱিৱৰণা ৱিভজনা উত্তানীকিৰিযা [উত্তানিকিৰিযা (ক.)] পকাসনা – অযং ৱুচ্চতি সচ্চানুলোমো ঘোসোতি.

২. তত্থ কতমো অজ্ঝত্তং যোনিসো মনসিকাৰো?

অজ্ঝত্তং যোনিসো মনসিকাৰো নাম যো যথাদেসিতে ধম্মে বহিদ্ধা আৰম্মণং অনভিনীহৰিত্ৱা যোনিসো মনসিকাৰো – অযং ৱুচ্চতি যোনিসো মনসিকাৰো.

তংআকাৰো যোনিসো দ্ৱাৰো ৱিধি উপাযো. যথা পুৰিসো সুক্খে কট্ঠে ৱিগতস্নেহে সুক্খায উত্তৰাৰণিযা থলে অভিমন্থমানং ভব্বো জোতিস্স অধিগমায. তং কিস্স হেতু. যোনিসো অগ্গিস্স অধিগমায. এৱমেৱস্স যমিদং দুক্খসমুদযনিৰোধমগ্গানং অৱিপৰীতধম্মদেসনং মনসিকৰোতি – অযং ৱুচ্চতি যোনিসো মনসিকাৰো.

যথা তিস্সো উপমা পুব্বে অস্সুতা চ অস্সুতপুব্বা চ পটিভন্তি. যো হি কোচি কামেসু অৱীতৰাগোতি…পে… দুৱে উপমা অযোনিসো কাতব্বা পচ্ছিমেসু ৱুত্তং. তত্থ যো চ পৰতো ঘোসো যো চ অজ্ঝত্তং যোনিসো মনসিকাৰো – ইমে দ্ৱে পচ্চযা. পৰতো ঘোসেন যা উপ্পজ্জতি পঞ্ঞা – অযং ৱুচ্চতি সুতমযী পঞ্ঞা. যা অজ্ঝত্তং যোনিসো মনসিকাৰেন উপ্পজ্জতি পঞ্ঞা – অযং ৱুচ্চতি চিন্তামযী পঞ্ঞাতি. ইমা দ্ৱে পঞ্ঞা ৱেদিতব্বা. পুৰিমকা চ দ্ৱে পচ্চযা. ইমে দ্ৱে হেতূ দ্ৱে পচ্চযা সাৱকস্স সম্মাদিট্ঠিযা উপ্পাদায.

৩. তত্থ পৰতো ঘোসস্স সচ্চানুসন্ধিস্স দেসিতস্স অত্থং অৱিজানন্তো অত্থপ্পটিসংৱেদী ভৱিস্সতীতি নেতং ঠানং ৱিজ্জতি. ন চ অত্থপ্পটিসংৱেদী যোনিসো মনসিকৰিস্সতীতি নেতং ঠানং ৱিজ্জতি. পৰতো ঘোসস্স সচ্চানুসন্ধিস্স দেসিতস্স অত্থং ৱিজানন্তো অত্থপ্পটিসংৱেদী ভৱিস্সতীতি ঠানমেতং ৱিজ্জতি. অত্থপ্পটিসংৱেদী চ যোনিসো মনসিকৰিস্সতীতি ঠানমেতং ৱিজ্জতি. এস হেতু এতং আৰম্মণং এসো উপাযো সাৱকস্স নিয্যানস্স, নত্থঞ্ঞো. সোযং ন চ সুত্তস্স অত্থৱিজাননায সহ যুত্তো নাপি ঘোসানুযোগেন পৰতো ঘোসস্স অত্থং অৱিজানন্তেন সক্কা উত্তৰিমনুস্সধম্মং অলমৰিযঞাণদস্সনং অধিগন্তুং, তস্মা নিব্বাযিতুকামেন সুতমযেন অত্থা পৰিযেসিতব্বা. তত্থ পৰিযেসনায অযং অনুপুব্বী ভৱতি সোড়স হাৰা, পঞ্চ নযা, অট্ঠাৰস মূলপদানি.

তত্থাযং উদ্দানগাথা

সোড়সহাৰা নেত্তী, পঞ্চনযা সাসনস্স পৰিযেট্ঠি;

অট্ঠাৰসমূলপদা, কচ্চাযনগোত্তনিদ্দিট্ঠা.

৪. তত্থ কতমে সোড়সহাৰা?

দেসনা ৱিচযো যুত্তি পদট্ঠানং লক্খণং চতুব্যূহো আৱট্টো ৱিভত্তি পৰিৱত্তনো ৱেৱচনো পঞ্ঞত্তি ওতৰণো সোধনো অধিট্ঠানো পৰিক্খাৰো সমাৰোপনো – ইমে সোড়স হাৰা.

তত্থ উদ্দানগাথা

দেসনা ৱিচযো যুত্তি, পদট্ঠানো চ লক্খণো [পদট্ঠানঞ্চ লক্খণং (পী.)];

চতুব্যূহো চ আৱট্টো, ৱিভত্তি পৰিৱত্তনো.

ৱেৱচনো চ পঞ্ঞত্তি, ওতৰণো চ সোধনো;

অধিট্ঠানো পৰিক্খাৰো, সমাৰোপনো সোড়সো – [সোড়স হাৰা (পী. ক.)];

৫. তত্থ কতমে পঞ্চ নযা?

নন্দিযাৱট্টো তিপুক্খলো সীহৱিক্কীড়িতো দিসালোচনো অঙ্কুসোতি.

তত্থ উদ্দানগাথা

পঠমো নন্দিযাৱট্টো, দুতিযো চ তিপুক্খলো;

সীহৱিক্কীড়িতো নাম, ততিযো হোতি সো নযো.

দিসালোচনমাহংসু, চতুত্থো নযলঞ্জকো;

পঞ্চমো অঙ্কুসো নাম [পঞ্চমং অঙ্কুসং আহু (পী. ক.)], সব্বে পঞ্চ নযা গতা.

৬. তত্থ কতমানি অট্ঠাৰস মূলপদানি?

অৱিজ্জা তণ্হা লোভো দোসো মোহো সুভসঞ্ঞা সুখসঞ্ঞা নিচ্চসঞ্ঞা অত্তসঞ্ঞা সমথো ৱিপস্সনা অলোভো অদোসো অমোহো অসুভসঞ্ঞা দুক্খসঞ্ঞা অনিচ্চসঞ্ঞা অনত্তসঞ্ঞা, ইমানি অট্ঠাৰস মূলপদানি. তত্থ নৱ পদানি অকুসলানি যত্থ সব্বং অকুসলং সমোসৰতি. নৱ পদানি কুসলানি যত্থ সব্বং কুসলং সমোসৰতি.

কতমানি নৱ পদানি অকুসলানি যত্থ সব্বং অকুসলং সমোসৰতি?

অৱিজ্জা যাৱ অত্তসঞ্ঞা, ইমানি নৱ পদানি অকুসলানি, যত্থ সব্বং অকুসলং সমোসৰতি.

কতমানি নৱ পদানি কুসলানি যত্থ সব্বং কুসলং সমোসৰতি?

সমথো যাৱ অনত্তসঞ্ঞা, ইমানি নৱ পদানি কুসলানি যত্থ সব্বং কুসলং সমোসৰতি. ইমানি অট্ঠাৰস মূলপদানি.

তত্থ ইমা উদ্দানগাথা

তণ্হা চ অৱিজ্জা লোভো, দোসো তথেৱ মোহো চ;

চত্তাৰো চ ৱিপল্লাসা, কিলেসভূমি নৱ পদানি.

যে চ সতিপট্ঠানা সমথো, ৱিপস্সনা কুসলমূলং;

এতং সব্বং কুসলং, ইন্দ্ৰিযভূমি নৱপদানি.

সব্বং কুসলং নৱহি পদেহি যুজ্জতি, নৱহি চেৱ অকুসলং;

এককে নৱ মূলপদানি, উভযতো অট্ঠাৰস মূলপদানি.

ইমেসং অট্ঠাৰসন্নং মূলপদানং যানি নৱ পদানি অকুসলানি, অযং দুক্খসমুদযো; যানি নৱ পদানি কুসলানি, অযং দুক্খনিৰোধগামিনী পটিপদা. ইতি সমুদযস্স দুক্খং ফলং, দুক্খনিৰোধগামিনিযা পটিপদায নিৰোধং ফলং. ইমানি চত্তাৰি অৰিযসচ্চানি ভগৱতা বাৰাণসিযং দেসিতানি.

৭. তত্থ দুক্খস্স অৰিযসচ্চস্স অপৰিমাণানি অক্খৰানি পদানি ব্যঞ্জনানি আকাৰানি নিৰুত্তিযো নিদ্দেসা দেসিতা এতস্সেৱত্থস্স সঙ্কাসনায পকাসনায ৱিৱৰণায ৱিভজনায উত্তানীকম্মতায পঞ্ঞাপনাযাতি যা এৱং সব্বেসং সচ্চানং. ইতি একমেকং সচ্চং অপৰিমাণেহি অক্খৰপদব্যঞ্জনআকাৰনিৰুত্তিনিদ্দেসেহি পৰিযেসিতব্বং, তঞ্চ ব্যঞ্জনং অত্থপুথুত্তেন পন অত্থেৱ ব্যঞ্জনপুথুত্তেন.

যো হি কোচি সমণো ৱা ব্ৰাহ্মণো ৱা এৱং ৱদেয্য ‘‘অহং ইদং দুক্খং পচ্চক্খায অঞ্ঞং দুক্খং পঞ্ঞপেস্সামী’’তি তস্স তং ৱাচাৱত্থুকমেৱস্স পুচ্ছিতো চ ন সম্পাযিস্সতি. এৱং সচ্চানি. যঞ্চ ৰত্তিং ভগৱা অভিসম্বুদ্ধো, যঞ্চ ৰত্তিং অনুপাদায পৰিনিব্বুতো, এত্থন্তৰে যং কিঞ্চি ভগৱতা ভাসিতং সুত্তং গেয্যং ৱেয্যাকৰণং গাথা উদানং ইতিৱুত্তকং জাতকং অব্ভুতধম্মং ৱেদল্লং, সব্বং তং ধম্মচক্কং পৱত্তিতং. ন কিঞ্চি বুদ্ধানং ভগৱন্তানং ধম্মদেসনায ধম্মচক্কতো বহিদ্ধা, তস্স সব্বং সুত্তং অৰিযধম্মেসু পৰিযেসিতব্বং. তত্থ পৰিগ্গণ্হনায আলোকসভানি চত্তাৰি অৰিযসচ্চানি থাৱৰানি ইমানি.

তত্থ কতমং দুক্খং? জাতি জৰা ব্যাধি মৰণং সংখিত্তেন পঞ্চুপাদানক্খন্ধা দুক্খা. তত্থাযং লক্খণনিদ্দেসো, পাতুভাৱলক্খণা জাতি, পৰিপাকলক্খণা জৰা, দুক্খদুক্খতালক্খণো ব্যাধি, চুতিলক্খণং মৰণং, পিযৱিপ্পযোগৱিপৰিণামপৰিতাপনলক্খণো সোকো, লালপ্পনলক্খণো পৰিদেৱো, কাযসম্পীড়নলক্খণং দুক্খং, চিত্তসম্পীড়নলক্খণং দোমনস্সং, কিলেসপৰিদহনলক্খণো উপাযাসো, অমনাপসমোধানলক্খণো অপ্পিযসম্পযোগো, মনাপৱিনাভাৱলক্খণো পিযৱিপ্পযোগো, অধিপ্পাযৱিৱত্তনলক্খণো অলাভো, অপৰিঞ্ঞালক্খণা পঞ্চুপাদানক্খন্ধা, পৰিপাকচুতিলক্খণং জৰামৰণং, পাতুভাৱচুতিলক্খণং চুতোপপত্তি, পটিসন্ধিনিব্বত্তনলক্খণো সমুদযো, সমুদযপৰিজহনলক্খণো নিৰোধো, অনুসযসমুচ্ছেদলক্খণো মগ্গো. ব্যাধিলক্খণং দুক্খং, সঞ্জাননলক্খণো সমুদযো, নিয্যানিকলক্খণো মগ্গো, সন্তিলক্খণো নিৰোধো. অপ্পটিসন্ধিভাৱনিৰোধলক্খণা অনুপাদিসেসা নিব্বানধাতু, দুক্খঞ্চ সমুদযো চ, দুক্খঞ্চ নিৰোধো চ, দুক্খঞ্চ মগ্গো চ, সমুদযো চ দুক্খঞ্চ, সমুদযো চ নিৰোধো চ, সমুদযো চ মগ্গো চ, নিৰোধো চ সমুদযো চ, নিৰোধো চ দুক্খঞ্চ, নিৰোধো চ মগ্গো চ, মগ্গো চ নিৰোধো চ, মগ্গো চ সমুদযো চ, মগ্গো চ দুক্খঞ্চ.

৮. তত্থিমানি সুত্তানি.

‘‘যমেকৰত্তিং [জাতক ১ ৱীসতিনিপাতে অযোঘৰজাতকে] পঠমং, গব্ভে ৱসতি মাণৱো;

অব্ভুট্ঠিতোৱ সো যাতি, স গচ্ছং ন নিৱত্ততী’’তি.

অট্ঠিমা, আনন্দ, দানুপপত্তিযো একুত্তৰিকে সুত্তং – অযং জাতি.

তত্থ কতমা জৰা?

অচৰিত্ৱা [ধ. প. ১৫৫] ব্ৰহ্মচৰিযং, অলদ্ধা যোব্বনে ধনং;

জিণ্ণকোঞ্চাৱ ঝাযন্তি, খীণমচ্ছেৱ পল্ললে.

পঞ্চ পুব্বনিমিত্তানি দেৱেসু – অযং জৰা.

তত্থ কতমো ব্যাধি?

সামং তেন কুতো ৰাজ, তুৱম্পি জৰাযন্তি ৱেদেসি;

খত্তিয কম্মস্স ফলো, লোকো ন হি কম্মং পনযতি.

তযো গিলানা – অযং ব্যাধি.

তত্থ কতমং মৰণং?

যথাপি [দীঘনিকাযে অধোলিখিতগাথা] কুম্ভকাৰস্স, কতং মত্তিকভাজনং;

খুদ্দকঞ্চ মহন্তঞ্চ, যং পক্কং যঞ্চ আমকং;

সব্বং ভেদনপৰিযন্তং, এৱং মচ্চান জীৱিতং.

মমাযিতে পস্সথ ফন্দমানে [হঞ্ঞমানে (পী) পস্স সু. নি. ৭৮৩], মচ্ছেৱ অপ্পোদকে খীণসোতে;

এতম্পি দিস্ৱা অমমো চৰেয্য, ভৱেসু আসত্তিমকুব্বমানো.

উদকপ্পনসুত্তং – ইদং মৰণং.

তত্থ কতমো সোকো?

ইধ সোচতি পেচ্চ সোচতি, পাপকাৰী উভযত্থ সোচতি;

সো সোচতি সো ৱিহঞ্ঞতি, দিস্ৱা কম্মকিলিট্ঠমত্তনো [কম্মকিলিট্ঠং অত্থনো (পী.) পস্স ধ. প. ১৫].

তীণি দুচ্চৰিতানি – অযং সোকো.

তত্থ কতমো পৰিদেৱো?

কামেসু [সু. নি. ৭৮০] গিদ্ধা পসুতা পমূড়্হা, অৱদানিযা তে ৱিসমে নিৱিট্ঠা;

দুক্খূপনীতা পৰিদেৱযন্তি, কিংসু ভৱিস্সাম ইতো চুতাসে.

তিস্সো ৱিপত্তিযো – অযং পৰিদেৱো.

তত্থ কতমং দুক্খং?

সতং আসি অযোসঙ্কূ [অযোসঙ্কু (পী. ক.) পস্স থেৰগা. ১১৯৭], সব্বে পচ্চত্তৱেদনা;

জলিতা জাতৱেদাৱ, অচ্চিসঙ্ঘসমাকুলা.

মহা ৱত সো পৰিড়াহো [পৰিদাঘো (পী. ক.) পস্স সং. নি. ৫.১১১৩] সংযুত্তকে সুত্তং সচ্চসংযুত্তেসু – ইদং দুক্খং.

তত্থ কতমং দোমনস্সং?

সঙ্কপ্পেহি পৰেতো [পৰতো (ক.) পস্স সু. নি. ৮২৪] সো, কপণো ৱিয ঝাযতি;

সুত্ৱা পৰেসং নিগ্ঘোসং, মঙ্কু হোতি তথাৱিধো.

দ্ৱেমে তপনীযা ধম্মা – ইদং দোমনস্সং.

তত্থ কতমো উপাযাসো?

কম্মাৰানং যথা উক্কা, অন্তো ডয্হতি নো বহি;

এৱং ডয্হতি মে হদযং, সুত্ৱা নিব্বত্তমম্বুজং.

তযো অগ্গী – অযং উপাযাসো.

তত্থ কতমো অপ্পিযসম্পযোগো?

অযসাৱ [ধ. প. ২৪০] মলং সমুট্ঠিতং, ততুট্ঠায তমেৱ খাদতি;

এৱং অতিধোনচাৰিনং, সানি কম্মানি নযন্তি দুগ্গতিং.

দ্ৱেমে তথাগতং অব্ভাচিক্খন্তি, একুত্তৰিকে সুত্তং দুকেসু – অযং অপ্পিযসম্পযোগো.

তত্থ কতমো পিযৱিপ্পযোগো?

সুপিনেন যথাপি সঙ্গতং, পটিবুদ্ধো পুৰিসো ন পস্সতি;

এৱম্পি পিযাযিতং [মমাযিতং (পী. ক.) পস্স সু. নি. ৮১৩] জনং, পেতং কালঙ্কতং [কালকতং (পী.)] ন পস্সতি.

তে দেৱা চৱনধম্মং ৱিদিত্ৱা তীহি ৱাচাহি অনুসাসন্তি. অযং পিযৱিপ্পযোগো.

যম্পিচ্ছং ন লভতি, তিস্সো মাৰধীতৰো;

তস্স চে কামযানস্স [কামযমানস্স (ক.) পস্স সু. নি. ৭৭৩], ছন্দজাতস্স জন্তুনো;

তে কামা পৰিহাযন্তি, সল্লৱিদ্ধোৱ ৰুপ্পতি.

সংখিত্তেন পঞ্চুপাদানক্খন্ধা দুক্খা.

চক্খু সোতঞ্চ ঘানঞ্চ, জিৱ্হা কাযো ততো মনং;

এতে লোকামিসা ঘোৰা, যত্থ সত্তা পুথুজ্জনা.

পঞ্চিমে ভিক্খৱে খন্ধা – ইদং দুক্খং.

তত্থ কতমা জৰা চ মৰণঞ্চ?

অপ্পং ৱত জীৱিতং ইদং, ওৰং ৱস্সসতাপি মীযতে [মীযতি (সু. নি. ৮১০)];

অথ ৱাপি অকিচ্ছং জীৱিতং, অথ খো সো জৰসাপি মীযতে.

সংযুত্তকে পসেনদিসংযুত্তকে সুত্তং অয্যিকা মে কালঙ্কতা – অযং জৰা চ মৰণঞ্চ.

তত্থ কতমা চুতি চ উপপত্তি চ?

‘‘সব্বে সত্তা মৰিস্সন্তি, মৰণন্তং হি জীৱিতং;

যথাকম্মং গমিস্সন্তি, অত্তকম্মফলূপগা’’তি [পুঞ্ঞপাপফলূপগাতি (সং. নি. ১.১৩৩)]. –

অযং চুতি চ উপপত্তি চ.

ইমেহি সুত্তেহি একসদিসেহি চ অঞ্ঞেহি নৱৱিধং সুত্তং তং অনুপৱিট্ঠেহি লক্খণতো দুক্খং ঞত্ৱা সাধাৰণঞ্চ অসাধাৰণঞ্চ দুক্খং অৰিযসচ্চং নিদ্দিসিতব্বং. গাথাহি গাথা অনুমিনিতব্বা, ব্যাকৰণেহি ৱা ব্যাকৰণং – ইদং দুক্খং.

৯. তত্থ কতমো দুক্খসমুদযো?

কামেসু সত্তা কামসঙ্গসত্তা [কামপসঙ্গসত্তা (পী.) পস্স উদা. ৬৩], সংযোজনে ৱজ্জমপস্সমানা;

ন হি জাতু সংযোজনসঙ্গসত্তা, ওঘং তৰেয্যুং ৱিপুলং মহন্তং.

চত্তাৰো আসৱা সুত্তং – অযং দুক্খসমুদযো.

তত্থ কতমো দুক্খনিৰোধো?

যম্হি ন মাযা ৱসতী ন মানো,

যো ৱীতলোভো অমমো নিৰাসো,

পনুণ্ণকোধো [পনুন্নকোধো (পী.) পস্স উদা. ২৬] অভিনিব্বুতত্তো;

সো ব্ৰাহ্মণো সো সমণো স ভিক্খু.

দ্ৱেমা ৱিমুত্তিযো, ৰাগৱিৰাগা চ চেতোৱিমুত্তি; অৱিজ্জাৱিৰাগা চ পঞ্ঞাৱিমুত্তি – অযং নিৰোধো.

তত্থ কতমো মগ্গো?

এসেৱ মগ্গো নত্থঞ্ঞো, দস্সনস্স ৱিসুদ্ধিযা;

অৰিযো অট্ঠঙ্গিকো মগ্গো, মাৰস্সেতং পমোহনং.

সত্তিমে, ভিক্খৱে, বোজ্ঝঙ্গা – অযং মগ্গো.

তত্থ কতমানি চত্তাৰি অৰিযসচ্চানি?

‘‘যে ধম্মা [মহাৱ. ৬০] হেতুপ্পভৱা, তেসং হেতুং তথাগতো আহ;

তেসঞ্চ যো নিৰোধো, এৱংৱাদী মহাসমণো’’তি.

হেতুপ্পভৱা ধম্মা দুক্খং, হেতুসমুদযো, যং ভগৱতো ৱচনং. অযং ধম্মো যো নিৰোধো, যে হি কেচি সংযোজনিযেসু ধম্মেসু অস্সদানুপস্সিনো ৱিহৰন্তি. কিলেসা তণ্হা পৱড্ঢতি, তণ্হাপচ্চযা উপাদানং…পে… এৱমেতস্স কেৱলস্স দুক্খক্খন্ধস্স সমুদযো হোতি. তত্থ যং সংযোজনং – অযং সমুদযো. যে সংযোজনিযা ধম্মা যে চ সোকপৰিদেৱদুক্খদোমনস্সুপাযাসা সম্ভৱন্তি – ইদং দুক্খং. যা সংযোজনিযেসু ধম্মেসু আদীনৱানুপস্সনা – অযং মগ্গো. পৰিমুচ্চতি জাতিযা জৰায ব্যাধীহি মৰণেহি সোকেহি পৰিদেৱেহি যাৱ উপাযাসেহি – ইদং নিব্বানং. ইমানি চত্তাৰি সচ্চানি.

তত্থ কতমা অনুপাদিসেসা নিব্বানধাতু?

অত্থঙ্গতস্স ন পমাণমত্থি, তং হি ৱা নত্থি যেন নং পঞ্ঞপেয্য;

সব্বসঙ্গানং সমূহতত্তা ৱিদূ, সিতা ৱাদসতস্সু [ৱাদসতস্স (পী. ক.)] সব্বে.

সংযুত্তকে গোধিকসংযুত্তং.

ইমানি অসাধাৰণানি সুত্তানি. যহিং যহিং সচ্চানি নিদ্দিট্ঠানি, তহিং তহিং সচ্চলক্খণতো ওতাৰেত্ৱা [ওহাৰেত্ৱা (পী. ক.)] অপৰিমাণেহি ব্যঞ্জনেহি সো অত্থো পৰিযেসিতব্বো. তত্থ অত্থানুপৰিৱত্তি ব্যঞ্জনেন পুন ব্যঞ্জনানুপৰিৱত্তি অত্থেন তস্স একমেকস্স অপৰিমাণানি ব্যঞ্জনানি ইমেহি সুত্তেহি যথানিক্খিত্তেহি চত্তাৰি অৰিযসচ্চানি নিদ্দিসিতব্বানি. পঞ্চনিকাযে অনুপৱিট্ঠাহি গাথাহি গাথা অনুমিনিতব্বা, ব্যাকৰণেন ব্যাকৰণং. ইমানি অসাধাৰণানি সুত্তানি.

তেসং ইমা উদ্দানগাথা

যমেকৰত্তিং পঠমং, অট্ঠ দানূপপত্তিযো;

পঞ্চ পুব্বনিমিত্তানি, খীণমচ্ছংৱ পল্ললং.

সামং তেন কুতো ৰাজ, তযো দেৱা গিলানকা;

যথাপি কুম্ভকাৰস্স, যথা নদিদকপ্পনং.

ইধ সোচতি পেচ্চ সোচতি, তীণি দুচ্চৰিতানি চ;

কামেসু গিদ্ধা পসুতা, যাৱ তিস্সো ৱিপত্তিযো.

সতং আসি [সতমাযু (সী.), সতধাতু (পী.)] অযোসঙ্কূ, পৰিড়াহো মহত্তৰো;

সঙ্কপ্পেহি পৰেতো সো, তত্থ তপনিযেহি চ.

কম্মাৰানং যথা উক্কা, তযো অগ্গী পকাসিতা;

অযতো মলমুপ্পন্নং, অব্ভক্খানং তথাগতে.

তিৱিধং দেৱানুসাসন্তি, সুপিনেন সঙ্গমো যথা;

তিস্সো চেৱ মাৰধীতা, সল্লৱিদ্ধোৱ ৰুপ্পতি.

চক্খু সোতঞ্চ ঘানঞ্চ, পঞ্চক্খন্ধা পকাসিতা;

অপ্পং ৱত জীৱিতং ইদং, অয্যিকা মে মহল্লিকা.

সব্বে সত্তা মৰিস্সন্তি, উপপত্তি চুতিচযং;

কামেসু সত্তা পসুতা, আসৱেহি চতূহি চ.

যম্হি ন মাযা ৱসতি, দ্ৱেমা চেতোৱিমুত্তিযো;