৪৩৪. চক্কৱাকজাতকং (৮)

৬৯. কাসাযৱত্থে সকুণে ৱদামি, দুৱে দুৱে নন্দমনে [নন্দিমনে (সী. পী.)] চৰন্তে;

কং অণ্ডজং অণ্ডজা মানুসেসু, জাতিং পসংসন্তি তদিঙ্ঘ ব্ৰূথ.

৭০. অম্হে মনুস্সেসু মনুস্সহিংস, অনুব্বতে [অনুপুব্বকে (ক.)] চক্কৱাকে ৱদন্তি;

কল্যাণভাৱম্হে [ভাৱ’ম্হ (সী. পী.)] দিজেসু সম্মতা, অভিৰূপা [অভীতৰূপা (সী. স্যা. পী.)] ৱিচৰাম অণ্ণৱে. ( ) [(ন ঘাসহেতূপি কৰোম পাপং) (ক.)]

৭১. কিং অণ্ণৱে কানি ফলানি ভুঞ্জে, মংসং কুতো খাদথ চক্কৱাকা;

কিং ভোজনং ভুঞ্জথ ৱো অনোমা [অভিণ্হং (ক.)], বলঞ্চ ৱণ্ণো চ অনপ্পৰূপা [অনপ্পৰূপো (সী. স্যা. পী.)].

৭২. ন অণ্ণৱে সন্তি ফলানি ধঙ্ক, মংসং কুতো খাদিতুং চক্কৱাকে;

সেৱালভক্খম্হ [ভক্খিম্হ (ক.)] অপাণভোজনা [অৱাকভোজনা (সী. পী.)], ন ঘাসহেতূপি কৰোম পাপং.

৭৩. ন মে ইদং ৰুচ্চতি চক্কৱাক, অস্মিং ভৱে ভোজনসন্নিকাসো;

অহোসি পুব্বে ততো মে অঞ্ঞথা, ইচ্চেৱ মে ৱিমতি এত্থ জাতা.

৭৪. অহম্পি মংসানি ফলানি ভুঞ্জে, অন্নানি চ লোণিযতেলিযানি;

ৰসং মনুস্সেসু লভামি ভোত্তুং, সূৰোৱ সঙ্গামমুখং ৱিজেত্ৱা;

ন চ মে তাদিসো ৱণ্ণো, চক্কৱাক যথা তৱ.

৭৫. অসুদ্ধভক্খোসি খণানুপাতী, কিচ্ছেন তে লব্ভতি অন্নপানং;

ন তুস্সসী ৰুক্খফলেহি ধঙ্ক, মংসানি ৱা যানি সুসানমজ্ঝে.

৭৬. যো সাহসেন অধিগম্ম ভোগে, পৰিভুঞ্জতি ধঙ্ক খণানুপাতী;

ততো উপক্কোসতি নং সভাৱো, উপক্কুট্ঠো ৱণ্ণবলং জহাতি.

৭৭. অপ্পম্পি চে নিব্বুতিং ভুঞ্জতী যদি, অসাহসেন অপৰূপঘাতী [অসাহসেনানুপঘাতিনো (ক.)];

বলঞ্চ ৱণ্ণো চ তদস্স হোতি, ন হি সব্বো আহাৰমযেন ৱণ্ণোতি.

চক্কৱাকজাতকং অট্ঠমং.