৪৩১. হৰিতচজাতকং (৫)

৪০. সুতং মেতং মহাব্ৰহ্মে, কামে ভুঞ্জতি হাৰিতো;

কচ্চেতং ৱচনং তুচ্ছং, কচ্চি সুদ্ধো ইৰিয্যসি.

৪১. এৱমেতং মহাৰাজ, যথা তে ৱচনং সুতং;

কুম্মগ্গং পটিপন্নোস্মি, মোহনেয্যেসু মুচ্ছিতো.

৪২. অদু [আদু (সী. পী.)] পঞ্ঞা কিমত্থিযা, নিপুণা সাধুচিন্তিনী [চিন্তনী (সী. পী.)];

যায উপ্পতিতং ৰাগং, কিং মনো ন ৱিনোদযে.

৪৩. চত্তাৰোমে মহাৰাজ, লোকে অতিবলা ভুসা;

ৰাগো দোসো মদো মোহো, যত্থ পঞ্ঞা ন গাধতি.

৪৪. অৰহা সীলসম্পন্নো, সুদ্ধো চৰতি হাৰিতো;

মেধাৱী পণ্ডিতো চেৱ, ইতি নো সম্মতো ভৱং.

৪৫. মেধাৱীনম্পি হিংসন্তি, ইসিং ধম্মগুণে ৰতং;

ৱিতক্কা পাপকা ৰাজ, সুভা ৰাগূপসংহিতা.

৪৬. উপ্পন্নাযং সৰীৰজো, ৰাগো ৱণ্ণৱিদূসনো তৱ;

তং পজহ ভদ্দমত্থু তে, বহুন্নাসি মেধাৱিসম্মতো.

৪৭. তে অন্ধকাৰকে [কৰণে (সী. স্যা. পী.)] কামে, বহুদুক্খে মহাৱিসে;

তেসং মূলং গৱেসিস্সং, ছেচ্ছং ৰাগং সবন্ধনং.

৪৮. ইদং ৱত্ৱান হাৰিতো, ইসি সচ্চপৰক্কমো;

কামৰাগং ৱিৰাজেত্ৱা, ব্ৰহ্মলোকূপগো অহূতি.

হৰিতচজাতকং [হাৰিতজাতকং (সী. পী.)] পঞ্চমং.