৪২৭. গিজ্ঝজাতকং (১)

১. পৰিসঙ্কুপথো নাম, গিজ্ঝপন্থো সনন্তনো;

তত্ৰাসি মাতাপিতৰো, গিজ্ঝো পোসেসি জিণ্ণকে;

তেসং অজগৰমেদং, অচ্চহাসি বহুত্তসো [পহুত্ততো (ক. সী.), পহূতসো (স্যা. পী.), বহুধসো (ক.)].

২. পিতা চ পুত্তং অৱচ, জানং উচ্চং পপাতিনং;

সুপত্তং থামসম্পন্নং [পক্খসম্পন্নং (সী. স্যা. পী.)], তেজস্সিং দূৰগামিনং.

৩. পৰিপ্লৱন্তং পথৱিং, যদা তাত ৱিজানহি;

সাগৰেন পৰিক্খিত্তং, চক্কংৱ পৰিমণ্ডলং;

ততো তাত নিৱত্তস্সু, মাস্সু এত্তো পৰং গমি.

৪. উদপত্তোসি [উদ্ধং পত্তোসি (ক. সী.)] ৱেগেন, বলী পক্খী দিজুত্তমো;

ওলোকযন্তো ৱক্কঙ্গো, পব্বতানি ৱনানি চ.

৫. অদ্দস্স পথৱিং গিজ্ঝো, যথাসাসি [যথাস্সাসি (স্যা. অট্ঠ. পাঠন্তৰং)] পিতুস্সুতং;

সাগৰেন পৰিক্খিত্তং, চক্কংৱ পৰিমণ্ডলং.

৬. তঞ্চ সো সমতিক্কম্ম, পৰমেৱচ্চৱত্তথ [পৰমেৱ পৱত্তথ (সী. স্যা.)];

তঞ্চ ৱাতসিখা তিক্খা, অচ্চহাসি বলিং দিজং.

৭. নাসক্খাতিগতো পোসো, পুনদেৱ নিৱত্তিতুং;

দিজো ব্যসনমাপাদি, ৱেৰম্ভানং [ৱেৰম্বানং (সী. পী.)] ৱসং গতো.

৮. তস্স পুত্তা চ দাৰা চ, যে চঞ্ঞে অনুজীৱিনো;

সব্বে ব্যসনমাপাদুং, অনোৱাদকৰে দিজে.

৯. এৱম্পি ইধ ৱুড্ঢানং, যো ৱাক্যং নাৱবুজ্ঝতি;

অতিসীমচৰো দিত্তো, গিজ্ঝোৱাতীতসাসনো;

স ৱে ব্যসনং পপ্পোতি, অকত্ৱা ৱুড্ঢসাসনন্তি.

গিজ্ঝজাতকং পঠমং.