১৬. অত্থদস্সীবুদ্ধৱংসো

১. তত্থেৱ মণ্ডকপ্পম্হি, অত্থদস্সী মহাযসো;

মহাতমং নিহন্ত্ৱান, পত্তো সম্বোধিমুত্তমং.

২. ব্ৰহ্মুনা যাচিতো সন্তো, ধম্মচক্কং পৱত্তযি;

অমতেন তপ্পযী লোকং, দসসহস্সিসদেৱকং.

৩. তস্সাপি লোকনাথস্স, অহেসুং অভিসমযা তযো;

কোটিসতসহস্সানং, পঠমাভিসমযো অহু.

৪. যদা বুদ্ধো অত্থদস্সী, চৰতে দেৱচাৰিকং;

কোটিসতসহস্সানং, দুতিযাভিসমযো অহু.

৫. পুনাপৰং যদা বুদ্ধো, দেসেসি পিতুসন্তিকে;

কোটিসতসহস্সানং, ততিযাভিসমযো অহু.

৬. সন্নিপাতা তযো আসুং, তস্সাপি চ মহেসিনো;

খীণাসৱানং ৱিমলানং, সন্তচিত্তান তাদিনং.

৭. অট্ঠনৱুতিসহস্সানং, পঠমো আসি সমাগমো;

অট্ঠাসীতিসহস্সানং, দুতিযো আসি সমাগমো.

৮. অট্ঠসত্ততিসতসহস্সানং, ততিযো আসি সমাগমো;

অনুপাদা ৱিমুত্তানং, ৱিমলানং মহেসিনং.

৯. অহং তেন সমযেন, জটিলো উগ্গতাপনো;

সুসীমো নাম নামেন, মহিযা সেট্ঠসম্মতো.

১০. দিব্বং মন্দাৰৱং পুপ্ফং, পদুমং পাৰিছত্তকং;

দেৱলোকাহৰিত্ৱান, সম্বুদ্ধমভিপূজযিং.

১১. সোপি মং বুদ্ধো ব্যাকাসি, অত্থদস্সী মহামুনি;

‘‘অট্ঠাৰসে কপ্পসতে, অযং বুদ্ধো ভৱিস্সতি.

১২. ‘‘পধানং পদহিত্ৱান…পে… হেস্সাম সম্মুখা ইমং’’.

১৩. তস্সাপি ৱচনং সুত্ৱা, হট্ঠো [তুট্ঠো (স্যা. কং.)] সংৱিগ্গমানসো;

উত্তৰিং ৱতমধিট্ঠাসিং, দসপাৰমিপূৰিযা.

১৪. সোভণং নাম নগৰং, সাগৰো নাম খত্তিযো;

সুদস্সনা নাম জনিকা, অত্থদস্সিস্স সত্থুনো.

১৫. দসৱস্সসহস্সানি, অগাৰং অজ্ঝ সো ৱসি;

অমৰগিৰি সুগিৰি ৱাহনা, তযো পাসাদমুত্তমা.

১৬. তেত্তিংসঞ্চ সহস্সানি, নাৰিযো সমলঙ্কতা;

ৱিসাখা নাম নাৰী চ, সেলো নামাসি অত্ৰজো.

১৭. নিমিত্তে চতুৰো দিস্ৱা, অস্সযানেন নিক্খমি;

অনূনঅট্ঠমাসানি, পধানং পদহী জিনো.

১৮. ব্ৰহ্মুনা যাচিতো সন্তো, অত্থদস্সী মহাযসো;

ৱত্তি চক্কং মহাৱীৰো, অনোমুয্যানে নৰাসভো.

১৯. সন্তো চ উপসন্তো চ, অহেসুং অগ্গসাৱকা;

অভযো নামুপট্ঠাকো, অত্থদস্সিস্স সত্থুনো.

২০. ধম্মা চেৱ সুধম্মা চ, অহেসুং অগ্গসাৱিকা;

বোধি তস্স ভগৱতো, চম্পকোতি পৱুচ্চতি.

২১. নকুলো চ নিসভো চ, অহেসুং অগ্গুপট্ঠকা;

মকিলা চ সুনন্দা চ, অহেসুং অগ্গুপট্ঠিকা.

২২. সোপি বুদ্ধো অসমসমো, অসীতিহত্থমুগ্গতো;

সোভতে সালৰাজাৱ, উড়ুৰাজাৱ পূৰিতো.

২৩. তস্স পাকতিকা ৰংসী, অনেকসতকোটিযো;

উদ্ধং অধো দস দিসা, ফৰন্তি যোজনং সদা.

২৪. সোপি বুদ্ধো নৰাসভো, সব্বসত্তুত্তমো মুনি;

ৱস্সসতসহস্সানি, লোকে অট্ঠাসি চক্খুমা.

২৫. অতুলং দস্সেত্ৱা ওভাসং, ৱিৰোচেত্ৱা সদেৱকে [অতুলং দস্সযিত্ৱান, ওভাসেত্ৱা সদেৱকে (সী. ক.)];

সোপি অনিচ্চতং পত্তো, যথগ্গুপাদানসঙ্খযা.

২৬. অত্থদস্সী জিনৱৰো, অনোমাৰামম্হি নিব্বুতো;

ধাতুৱিত্থাৰিকং আসি, তেসু তেসু পদেসতোতি.

অত্থদস্সিস্স ভগৱতো ৱংসো চুদ্দসমো.