৪. অধোপুপ্ফিযত্থেৰঅপদানং

২২. ‘‘অভিভূ নাম সো ভিক্খু, সিখিনো অগ্গসাৱকো;

মহানুভাৱো তেৱিজ্জো, হিমৱন্তং উপাগমি.

২৩. ‘‘অহম্পি হিমৱন্তম্হি, ৰমণীযস্সমে ইসি;

ৱসামি অপ্পমঞ্ঞাসু, ইদ্ধীসু চ তদা ৱসী.

২৪. ‘‘পক্খিজাতো ৱিযাকাসে, পব্বতং অধিৱত্তযিং [অভিপত্থযিং (স্যা.), অভিমত্থযিং (ক.), অধিৱত্থযিন্তি পব্বতস্স উপৰি গচ্ছিন্তিঅত্থো];

অধোপুপ্ফং গহেত্ৱান, আগচ্ছিং [অগচ্ছিং (ক.)] পব্বতং অহং.

২৫. ‘‘সত্ত পুপ্ফানি গণ্হিত্ৱা, মত্থকে ওকিৰিং অহং;

আলোকিতে [আলোকিতো (স্যা.)] চ ৱীৰেন, পক্কামিং পাচিনামুখো.

২৬. ‘‘আৱাসং অভিসম্ভোসিং, পত্ৱান অস্সমং অহং;

খাৰিভাৰং গহেত্ৱান, পাযাসিং [পাৱিসিং (সী.)] পব্বতন্তৰং.

২৭. ‘‘অজগৰো মং পীড়েসি, ঘোৰৰূপো মহব্বলো;

পুব্বকম্মং সৰিত্ৱান, তত্থ কালঙ্কতো অহং.

২৮. ‘‘একত্তিংসে ইতো কপ্পে, যং পুপ্ফমভিৰোপযিং;

দুগ্গতিং নাভিজানামি, পুপ্ফপূজাযিদং ফলং.

২৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অধোপুপ্ফিযো থেৰো ইমা গাথাযো অভাসিত্থাতি.

অধোপুপ্ফিযত্থেৰস্সাপদানং চতুত্থং.