৬. তিণসন্থৰদাযকত্থেৰঅপদানং

২২. ‘‘হিমৱন্তস্সাৱিদূৰে, মহাজাতস্সৰো অহু;

সতপত্তেহি সঞ্ছন্নো, নানাসকুণমালযো.

২৩. ‘‘তম্হি ন্হত্ৱা চ পিত্ৱা [পীত্ৱা (সী. স্যা.)] চ, অৱিদূৰে ৱসামহং;

অদ্দসং সমণানগ্গং, গচ্ছন্তং অনিলঞ্জসে.

২৪. ‘‘মম সঙ্কপ্পমঞ্ঞায, সত্থা লোকে অনুত্তৰো;

অব্ভতো ওৰুহিত্ৱান, ভূমিযংঠাসি তাৱদে.

২৫. ‘‘ৱিসাণেন [লাযনেন (স্যা.)] তিণং গয্হ, নিসীদনমদাসহং;

নিসীদি ভগৱা তত্থ, তিস্সো লোকগ্গনাযকো.

২৬. ‘‘সকং চিত্তং পসাদেত্ৱা, অৱন্দি লোকনাযকং;

পটিকুটিকো [উক্কুটিকো (স্যা. ক.)] অপসক্কিং, নিজ্ঝাযন্তো মহামুনিং.

২৭. ‘‘তেন চিত্তপ্পসাদেন, নিম্মানং উপপজ্জহং;

দুগ্গতিং নাভিজানামি, সন্থৰস্স ইদং ফলং.

২৮. ‘‘ইতো দুতিযকে কপ্পে, মিগ [মিত্ত (স্যা.)] সম্মতখত্তিযো;

সত্তৰতনসম্পন্নো, চক্কৱত্তী মহব্বলো.

২৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তিণসন্থৰদাযকো থেৰো ইমা গাথাযো অভাসিত্থাতি.

তিণসন্থৰদাযকত্থেৰস্সাপদানং ছট্ঠং.