৮. বোধিসম্মজ্জকত্থেৰঅপদানং

৪৮. ‘‘অহং পুৰে বোধিপত্তং, উজ্ঝিতং চেতিযঙ্গণে;

তং গহেত্ৱান ছড্ডেসিং, অলভিং ৱীসতীগুণে.

৪৯. ‘‘তস্স কম্মস্স তেজেন, সংসৰন্তো ভৱাভৱে;

দুৱে ভৱে সংসৰামি, দেৱত্তে চাপি মানুসে.

৫০. ‘‘দেৱলোকা চৱিত্ৱান, আগন্ত্ৱা মানুসং ভৱং;

দুৱে কুলে পজাযামি, খত্তিযে চাপি ব্ৰাহ্মণে.

৫১. ‘‘অঙ্গপচ্চঙ্গসম্পন্নো, আৰোহপৰিণাহৱা;

অভিৰূপো সুচি হোমি, সম্পুণ্ণঙ্গো অনূনকো.

৫২. ‘‘দেৱলোকে মনুস্সে ৱা, জাতো ৱা যত্থ কত্থচি;

ভৱে সুৱণ্ণৱণ্ণো চ, উত্তত্তকনকূপমো.

৫৩. ‘‘মুদুকা মদ্দৱা স্নিদ্ধা [মুদু মদ্দৱা সিনিদ্ধা (স্যা.)], সুখুমা সুকুমাৰিকা;

ছৱি মে সব্বদা হোতি, বোধিপত্তে সুছড্ডিতে [সুছড্ডিনে (সী.)].

৫৪. ‘‘যতো কুতোচি গতীসু, সৰীৰে সমুদাগতে;

ন লিম্পতি ৰজোজল্লং, ৱিপাকো পত্তছড্ডিতে.

৫৫. ‘‘উণ্হে ৱাতাতপে তস্স, অগ্গিতাপেন ৱা পন;

গত্তে সেদা ন মুচ্চন্তি, ৱিপাকো পত্তছড্ডিতে.

৫৬. ‘‘কুট্ঠং গণ্ডো কিলাসো চ, তিলকা পিড়কা তথা;

ন হোন্তি কাযে দদ্দু চ, ৱিপাকো পত্তছড্ডিতে.

৫৭. ‘‘অপৰম্পি গুণং তস্স, নিব্বত্ততি ভৱাভৱে;

ৰোগা ন হোন্তি কাযস্মিং, ৱিপাকো পত্তছড্ডিতে.

৫৮. ‘‘অপৰম্পি গুণং তস্স, নিব্বত্ততি ভৱাভৱে;

ন হোতি চিত্তজা পীড়া, ৱিপাকো পত্তছড্ডিতে.

৫৯. ‘‘অপৰম্পি গুণং তস্স, নিব্বত্ততি ভৱাভৱে;

অমিত্তা ন ভৱন্তস্স, ৱিপাকো পত্তছড্ডিতে.

৬০. ‘‘অপৰম্পি গুণং তস্স, নিব্বত্ততি ভৱাভৱে;

অনূনভোগো ভৱতি, ৱিপাকো পত্তছড্ডিতে.

৬১. ‘‘অপৰম্পি গুণং তস্স, নিব্বত্ততি ভৱাভৱে;

অগ্গিৰাজূহি চোৰেহি, ন হোতি উদকে ভযং.

৬২. ‘‘অপৰম্পি গুণং তস্স, নিব্বত্ততি ভৱাভৱে;

দাসিদাসা অনুচৰা, হোন্তি চিত্তানুৱত্তকা.

৬৩. ‘‘যম্হি আযুপ্পমাণম্হি, জাযতে মানুসে ভৱে;

ততো ন হাযতে আযু, তিট্ঠতে যাৱতাযুকং.

৬৪. ‘‘অব্ভন্তৰা চ বাহিৰা [বহিচৰা (সী. পী. ক.)], নেগমা চ সৰট্ঠকা;

নুযুত্তা হোন্তি সব্বেপি, ৱুদ্ধিকামা সুখিচ্ছকা.

৬৫. ‘‘ভোগৱা যসৱা হোমি, সিৰিমা ঞাতিপক্খৱা;

অপেতভযসন্তাসো, ভৱেহং সব্বতো ভৱে.

৬৬. ‘‘দেৱা মনুস্সা অসুৰা, গন্ধব্বা যক্খৰক্খসা;

সব্বে তে পৰিৰক্খন্তি, ভৱে সংসৰতো সদা.

৬৭. ‘‘দেৱলোকে মনুস্সে চ, অনুভোত্ৱা উভো যসে;

অৱসানে চ নিব্বানং, সিৱং পত্তো অনুত্তৰং.

৬৮. ‘‘সম্বুদ্ধমুদ্দিসিত্ৱান, বোধিং ৱা তস্স সত্থুনো;

যো পুঞ্ঞং পসৱে পোসো, তস্স কিং নাম দুল্লভং.

৬৯. ‘‘মগ্গে ফলে আগমে চ, ঝানাভিঞ্ঞাগুণেসু চ;

অঞ্ঞেসং অধিকো হুত্ৱা, নিব্বাযামি অনাসৱো.

৭০. ‘‘পুৰেহং বোধিযা পত্তং, ছড্ডেত্ৱা হট্ঠমানসো;

ইমেহি ৱীসতঙ্গেহি, সমঙ্গী হোমি সব্বদা.

৭১. ‘‘কিলেসা ঝাপিতা ময্হং…পে… ৱিহৰামি অনাসৱো.

৭২. ‘‘স্ৱাগতং ৱত মে আসি…পে… কতং বুদ্ধস্স সাসনং.

৭৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা বোধিসম্মজ্জকো থেৰো ইমা গাথাযো

অভাসিত্থাতি.

বোধিসম্মজ্জকত্থেৰস্সাপদানং অট্ঠমং.