১০. নাড়িকেৰফলদাযকত্থেৰঅপদানং

৯১. ‘‘নগৰে বন্ধুমতিযা, আৰামিকো অহং তদা;

অদ্দসং ৱিৰজং বুদ্ধং, গচ্ছন্তং অনিলঞ্জসে.

৯২. ‘‘নাড়িকেৰফলং গয্হ, বুদ্ধসেট্ঠস্সদাসহং;

আকাসে ঠিতকো সন্তো, পটিগ্গণ্হি মহাযসো.

৯৩. ‘‘ৱিত্তিসঞ্জননো ময্হং, দিট্ঠধম্মসুখাৱহো;

ফলং বুদ্ধস্স দত্ৱান, ৱিপ্পসন্নেন চেতসা.

৯৪. ‘‘অধিগচ্ছিং তদা পীতিং, ৱিপুলঞ্চ সুখুত্তমং;

উপ্পজ্জতেৱ ৰতনং, নিব্বত্তস্স তহিং তহিং.

৯৫. ‘‘একনৱুতিতো কপ্পে, যং ফলং অদদিং তদা;

দুগ্গতিং নাভিজানামি, ফলদানস্সিদং ফলং.

৯৬. ‘‘দিব্বচক্খু ৱিসুদ্ধং মে, সমাধিকুসলো অহং;

অভিঞ্ঞাপাৰমিপ্পত্তো, ফলদানস্সিদং ফলং.

৯৭. ‘‘কিলেসা ঝাপিতা ময্হং…পে… ৱিহৰামি অনাসৱো.

৯৮. ‘‘স্ৱাগতং ৱত মে আসি…পে… কতং বুদ্ধস্স সাসনং.

৯৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা নাড়িকেৰফলদাযকো থেৰো ইমা

গাথাযো অভাসিত্থাতি.

নাড়িকেৰফলদাযকত্থেৰস্সাপদানং দসমং.

কণিকাৰৱগ্গো একপঞ্ঞাসমো.