৯. সযংপটিভানিযত্থেৰঅপদানং

৪৫. ‘‘ককুধং ৱিলসন্তংৱ, দেৱদেৱং নৰাসভং;

ৰথিযং পটিপজ্জন্তং, কো দিস্ৱা ন পসীদতি.

৪৬. ‘‘তমন্ধকাৰং নাসেত্ৱা, সন্তাৰেত্ৱা বহুং জনং;

ঞাণালোকেন জোতন্তং, কো দিস্ৱা ন পসীদতি.

৪৭. ‘‘ৱসীসতসহস্সেহি, নীযন্তং লোকনাযকং;

উদ্ধৰন্তং বহূ সত্তে, কো দিস্ৱা ন পসীদতি.

৪৮. ‘‘আহনন্তং [আহনিত্ৱা (স্যা. ক.)] ধম্মভেৰিং, মদ্দন্তং তিত্থিযে গণে;

সীহনাদং ৱিনদন্তং, কো দিস্ৱা ন পসীদতি.

৪৯. ‘‘যাৱতা ব্ৰহ্মলোকতো, আগন্ত্ৱান সব্ৰহ্মকা;

পুচ্ছন্তি নিপুণে পঞ্হে, কো দিস্ৱা ন পসীদতি.

৫০. ‘‘যস্সঞ্জলিং কৰিত্ৱান, আযাচন্তি সদেৱকা;

তেন পুঞ্ঞং অনুভোন্তি, কো দিস্ৱা ন পসীদতি.

৫১. ‘‘সব্বে জনা সমাগন্ত্ৱা, সম্পৱাৰেন্তি চক্খুমং;

ন ৱিকম্পতি অজ্ঝিট্ঠো, কো দিস্ৱা ন পসীদতি.

৫২. ‘‘নগৰং পৱিসতো যস্স, ৰৱন্তি ভেৰিযো বহূ;

ৱিনদন্তি গজা মত্তা, কো দিস্ৱা ন পসীদতি.

৫৩. ‘‘ৱীথিযা [ৰথিযা (সী.)] গচ্ছতো যস্স, সব্বাভা জোততে সদা;

অব্ভুন্নতা সমা হোন্তি, কো দিস্ৱা ন পসীদতি.

৫৪. ‘‘ব্যাহৰন্তস্স বুদ্ধস্স, চক্কৱাড়ম্পি সুয্যতি;

সব্বে সত্তে ৱিঞ্ঞাপেতি, কো দিস্ৱা ন পসীদতি.

৫৫. ‘‘সতসহস্সিতো কপ্পে, যং বুদ্ধমভিকিত্তযিং;

দুগ্গতিং নাভিজানামি, কিত্তনায ইদং ফলং.

৫৬. ‘‘কিলেসা ঝাপিতা ময্হং…পে… ৱিহৰামি অনাসৱো.

৫৭. ‘‘স্ৱাগতং ৱত মে আসি…পে… কতং বুদ্ধস্স সাসনং.

৫৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সযংপটিভানিযো থেৰো ইমা গাথাযো

অভাসিত্থাতি.

সযংপটিভানিযত্থেৰস্সাপদানং নৱমং.